Putum Tingting Blong Yu i Stap Strong Long Jeova Mo No Fraet

“Yumi mas [“putum tingting blong yumi i stap strong long Jeova,” NW ], mo yumi [“no mas fraet,” NW ]. Yumi no mas letem tingting blong yumi i foldaon, oltaem yumi mas trastem hem.”—OL SAM 27:14.

 1. ?Fasin ya blong putum tingting blong yumi i stap strong long wan samting, i impoten olsem wanem? ?Taem Baebol i yusum tok ya, hem i minim wanem?

TAEM yumi putum tingting blong yumi i stap strong long wan samting we i sua blong kamtru, hemia i olsem wan laet we i saengud insaed long yumi. Hem i givhan long yumi blong no wari tumas long ol traem we yumi fesem, be blong lukluk i go long fiuja wetem strong tingting mo glad. Jeova nomo i save talem samting we i sua blong kamtru, blong yumi save putum tingting blong yumi i stap strong long hem. Mo hem i mekem olsem long Tok blong hem. (2 Timoti 3:16) Tok ya “putum tingting blong yumi i stap strong” long wan samting, i stap plante taem long Baebol. Hem i stap minim se, yumi wet wetem glad blong kasem wan gudfala samting, mo i stap minim gudfala samting ya tu we yumi wet blong kasem.a Tok ya i no minim nomo se yumi wantem wan samting, we maet i no gat pruf se bambae i kamtru no maet i no gat rod blong kasem.

 2. ?Olsem wanem fasin ya blong putum tingting i stap strong long gudfala samting long fiuja i givhan long Jisas?

² Taem Jisas i kasem ol traem mo hadtaem, hem i no tingting tumas long ol trabol ya, be hem i lukluk i go long fiuja mo i putum tingting blong hem i stap strong long Jeova. “Taem hem i go blong i ded long [“pos,” NW ], hem i luksave finis we bambae i save harem gud. Nao from samting ya, hem i no moa tingbaot se [pos] ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i King, i stap sidaon long bigfala jea blong hem long heven.” (Hibrus 12:2) Jisas i neva lego fasin ya blong obei long God, nomata wanem trabol mo hadtaem hem i kasem. Hemia from we hem i stap tingbaot nomo se hemia wan janis blong hem blong soemaot se rul blong Jeova i nambawan, mo blong mekem nem blong Hem i tabu.

 3. ?Fasin blong putum tingting i stap strong long God, i givhan olsem wanem long ol man blong God?

³ King Deved i soemaot se fasin blong putum tingting i stap strong long Jeova i joen wetem fasin blong no fraet. Hem i se: “Yumi mas [“putum tingting blong yumi i stap strong long Jeova,” NW ], mo yumi [“no mas fraet,” NW ]. Yumi no mas letem tingting blong yumi i foldaon, oltaem yumi mas trastem hem.” (Ol Sam 27:14) Sipos yumi no wantem we tingting blong yumi i foldaon, yumi no mas letem gudfala fiuja blong yumi i kam olsem we i no moa klia long tingting blong yumi. Oltaem gudfala fiuja ya i mas kliagud long tingting blong yumi mo i mas wan samting we i gud we i gud tumas. Sipos i olsem, ale taem yumi joen long wok we Jisas i givim long ol disaepol blong hem, bambae yumi gat sem fasin olsem Jisas, we i no fraet mo i wok olsem we faea i laet long hem. (Matiu 24:14; 28:19, 20) Yes, Baebol i tokbaot fasin ya blong putum tingting blong yumi i stap strong long God, se i impoten olsem bilif mo lav. Hem i wan fasin we ol man blong God oli mas holem oltaem.—1 Korin 13:13.

?Yu Yu ‘Putum Tingting Blong Yu i Stap Strong Moa Long God Oltaem’?

 4. ?Ol tabu Kristin mo ol “narafala sipsip” oli stap wet blong kasem wanem blesing?

⁴ Ol man blong God oli gat wan nambawan fiuja. Ol Kristin we tabu spirit i makemaot olgeta, oli stap wet wetem glad blong oli go long heven blong wok wetem Kraes. Ol “narafala sipsip” oli stap wet blong ‘bambae oli fri olgeta, olsem ol pikinini blong God [long wol ya].’ (Jon 10:16; Rom 8:19-21; Filipae 3:20) “Fri olgeta” i min se bambae oli fri long sin mo ol nogud frut blong hem. Tru ya, ‘evri samting we Jeova i givim oli gud mo evri presen blong hem oli nambawan.’ Taswe, yumi save se fiuja we bambae hem i givim long ol man we oli stap tru long hem, bambae i nambawan.—Jemes 1:17; Aesea 25:8.

 5. ?Olsem wanem blong ‘putum tingting blong yumi i stap strong moa long God oltaem’?

⁵ ?Fasin blong putum tingting i stap strong long God i mas wan bigfala fasin long laef blong ol Kristin? Yes. Long Rom 15:13, yumi ridim se: “God nomo i save mekem we yumi putum tingting blong yumi i stap strong long hem. Mo prea blong mi, we hem bambae i mekem yufala i glad tumas, nao oltaem, bambae yufala i gat pis long tingting blong yufala from we yufala i bilif long hem. Nao bambae yufala i save putum tingting blong yufala i stap strong moa long hem oltaem, from we Tabu Spirit i stap givim paoa long yufala.” Yes, fasin ya i no olsem wan kandel nomo long tudak, be hem i olsem strong san we i saen long moning. Hem i fulumap laef blong man wetem pis mo glad, man i harem se i gat wan risen blong laef, mo i no fraet. Makemgud se ‘tingting blong yumi i stap strong moa long God’ taem yumi bilif long Tok blong Hem, Baebol, mo taem yumi kasem tabu spirit blong hem. Rom 15:4 i talem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” Taswe i gud blong tingbaot se: ‘?Mi mi stap stadi oltaem long Baebol, mo ridim Baebol evri dei, blong mekem se tingting blong mi i stap strong oltaem long God? ?Mi mi prea oltaem blong askem God blong givim tabu spirit long mi?’—Luk 11:13.

 6. ?Blong mekem se tingting blong yumi i stap strong oltaem long gudfala fiuja, yumi mas blokem wanem?

⁶ Jisas we hem i Eksampol blong yumi, i kasem bigfala paoa long Tok blong God. Sipos yumi stadi gud long laef blong hem, yumi no save ‘lego bilif blong yumi, mo oltaem tingting blong yumi bambae i stap strong.’ (Hibrus 12:3) I klia se sipos tingting blong yumi i no moa stap strong long gudfala fiuja we God i promes long yumi, no sipos yumi stat tingting long narafala samting olsem ol sas samting mo ol mak we yumi wantem kasem long wol ya, ale i no longtaem bambae yumi kam slak long saed blong bilif. Nao bambae yumi fraet mo yumi no moa gat paoa blong folem ol stret mo klin fasin. Tingting olsem i save mekem se ‘bilif blong yumi i foldaon’ olgeta. (1 Timoti 1:19) Be samting ya i no save hapen sipos tingting blong yumi i stap strong long gudfala fiuja we God i promes blong givim. Hemia bambae i mekem bilif blong yumi i strong moa.

Blong Gat Bilif, Yumi Mas Putum Tingting i Stap Strong Long Ol Promes Blong God

 7. ?Olsem wanem fasin ya blong putum tingting blong yumi i stap strong long ol promes blong God, i impoten blong yumi save gat bilif?

⁷ Baebol i talem se: “Fasin ya we yumi bilif strong long God, hem i soemaot long yumi we olgeta samting ya we yumi stap putum tingting blong yumi i strong long hem, olgeta oli tru. Mo hem i soemaot long yumi we olgeta samting ya we yumi no save luk, be oli stap.” (Hibrus 11:1) Taswe, fasin ya blong putum tingting blong yumi i stap strong long ol promes blong God, i no wan smol fasin nomo we i joen wetem bilif. Hem i wan impoten fasin we yumi mas gat blong yumi save holem bilif. Tingbaot Ebraham. Jeova i mekem promes long Ebraham mo woman blong hem Sera se bambae tufala i gat wan pikinini boe. Be tufala i olfala tumas blong gat pikinini. (Jenesis 17:15-17) ?Ale, Ebraham i tingting olsem wanem long promes ya? “Long taem we plante samting i save spolem tingting blong Ebraham, [“tingting blong hem i stap strong yet long God, nao from samting ya, hem i stap bilif long God,” NW ]. Nao hem i kam stamba blong ol man blong plante ples.” (Rom 4:18) Yes, taem Ebraham i putum tingting blong hem i stap strong long blesing ya we God i promes, hemia i olsem wan strong fandesen blong bilif blong hem se bambae hem i gat pikinini. Mo bilif ya i mekem se hem i putum tingting blong hem i strong moa bakegen long nambawan blesing ya. !Yes, Ebraham mo Sera tufala i no fraet blong lego ples blong tufala mo ol famle blong tufala! !Tufala i go stap long ol haos tapolen long narafala kantri, gogo laef blong tufala i finis!

 8. ?Olsem wanem fasin blong stanap strong longtaem i save mekem se yumi putum tingting blong yumi i strong moa long God?

⁸ Samting we i mekem tingting blong Ebraham i stap strong long ol promes blong God, hemia se, hem i obei long Jeova oltaem, nating se samtaem i had. (Jenesis 22:2, 12) Sem mak long yumi. Sipos yumi obei long Jeova oltaem mo yumi stanap strong long wok blong hem, yumi save sua blong kasem ol blesing we hem i promes blong givim. Pol i raetem se: “Taem yumi [“stanap strong longtaem,” NW ], God i save glad long yumi.” Taem God i glad long yumi, tingting blong yumi i stap strong moa long hem. “Mo taem tingting blong yumi i stap strong long hem, yumi no save harem nogud.” (Rom 5:4, 5) From samting ya, Pol i raetem se: “Mifala i wantem tumas we tingting blong yufala bambae i stap strong oltaem, nao bambae yufala i save kasem ol samting ya we yufala i putum tingting blong yufala i stap strong long hem.” (Hibrus 6:11) Wan gudfala tingting olsem long saed blong fiuja, we i kamaot from we yumi frengud wetem Jeova, i save givhan long yumi blong no fraet taem yumi fesem hadtaem, mo i save mekem tu we yumi fesem hadtaem wetem glad nomo.

‘From We Tingting i Stap Strong Long God, Oltaem Yu Harem Gud’

 9. ?Wanem samting we yumi mas mekem oltaem blong yumi harem gud mo ‘putum tingting blong yumi i stap strong’ long ol blesing long fiuja?

⁹ Yumi mas putum tingting blong yumi i stap strong long ol blesing we God i promes blong givim. Oli moagud olgeta i bitim eni samting we wol ya i save givim. Ol Sam 37:34 i talem se: “Yu mas putum tingting blong yu i stap strong long Hae God, mo yu mas obei long ol tok blong hem, nao bambae hem i ona long yu, i givim graon ya long yu. Bambae yu luk we hem i ronemaot ol man nogud.” Yes, ‘from we tingting blong yumi i stap strong long [ol blesing ya], oltaem yumi harem gud.’ (Rom 12:12) Be blong gohed blong harem gud, yumi mas tingbaot ol blesing ya oltaem. ?Olsem wanem long yu? ?Yu yu tingting oltaem long ol blesing we God i promes blong givim long yumi long fiuja? ?Long tingting blong yu, yu stap luk yu wan long Paradaes, we bodi blong yu i strong, yu no wari long wan samting, ol man mo woman we yu lavem olgeta oli stap raon long yu, mo yu stap mekem ol wok we oli rili givim glad? ?Taem yu stap luk ol pija blong Paradaes long ol buk blong yumi, yu yu stap tingting dip long olgeta? Taem yumi tingting dip, hemia i olsem we yumi stap klinim windo blong wan haos, blong yumi save lukluk klia ol naesfala samting we oli stap afsaed. Sipos yumi neva klinim windo ya, kwiktaem nomo bambae hem i doti mo yumi no moa save lukluk klia mo harem gud long ol naesfala samting afsaed. Ol narafala samting oli save pulum ae blong yumi. !Yumi neva mas letem samting ya i hapen!

10. ?Taem yumi lukluk i go long Jeova blong hem i mekem i gud long yumi, olsem wanem hemia i soemaot se yumi stap frengud wetem hem?

¹⁰ Yumi lavem Jeova. Hemia bigfala risen from wanem yumi mekem wok blong hem. (Mak 12:30) Be yumi mas putum tingting blong yumi i stap strong tu long pei we bambae yumi kasem. !Jeova i wantem se yumi mekem olsem! Hibrus 11:6 i talem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” ?From wanem Jeova i wantem se yumi lukluk i go long hem blong hem i mekem i gud long yumi? From we, taem yumi mekem olsem, yumi soemaot se yumi savegud Papa blong yumi long heven. Hem i gat gladhat blong givim presen, mo hem i lavem ol pikinini blong hem. Traem tingbaot sipos yumi no gat nambawan janis ya blong ‘stap gud olwe, mo kasem ol samting ya we tingting blong yumi i stap long hem.’ Bambae yumi harem nogud mo tingting blong yumi bambae i foldaon isi nomo.—Jeremaea 29:11.

11. ?Taem Moses i putum tingting blong hem i stap strong long ol blesing we God i promes blong givim, olsem wanem hem i mekem ol waes desisen?

¹¹ Nambawan eksampol blong wan man we i putum tingting blong hem i stap strong oltaem long ol blesing we God i promes, hemia Moses. From we Moses “i pikinini blong gel blong Fero,” hem i save kasem paoa, haenem, mo ol rij samting blong Ijip. ?Be Moses i jusum rod ya no nogat? ?Hem i ronem ol samting ya, no hem i mekem wok blong Jeova? Hem i no fraet blong jusum rod ya blong mekem wok blong Jeova. ?From wanem? From we “oltaem hem i stap luk long pei we God bambae i givim long hem.” (Hibrus 11:24-26) Yes, Moses i tinghae long ol gudfala blesing we Jeova i promes blong givim long hem.

12. ?Olsem wanem fasin ya blong putum tingting i stap strong long ol blesing long fiuja i olsem hat blong faet blong ol Kristin?

¹² Aposol Pol i talem se taem yumi putum tingting blong yumi i stap strong long ol blesing long fiuja, hemia i olsem wan hat blong faet. Fasin ya i protektem tingting blong yumi, nao yumi naf blong tekem ol waes desisen, putum ol impoten samting long fasples long laef blong yumi, mo holemstrong long God mo stret fasin. (1 Tesalonaeka 5:8) ?Olsem wanem? ?Yu yu stap werem hat blong faet blong yu oltaem? Sipos yes, ale bambae yu yu olsem Moses mo Pol. Bambae yu no putum tingting blong yu ‘long mane, from we mane i no wan samting blong stap longtaem. Bambae yu putum tingting blong yu i stap long God nomo, we hem i stap givim plante samting long yumi, blong yumi harem gud long hem.’ I tru, yu nidim fasin no fraet blong yu save stap defren long ol narafala man mo blong tanem baksaed long ol samting we yu nomo yu wantem. !Be bambae i no blong nating nomo! Bitim we yu glad long laef naoia, i moagud we yu traehad blong kasem “laef ya we i prapa wan.” Hemia nao blesing we i stap fored long olgeta we oli putum tingting blong olgeta i stap strong long Jeova mo lavem hem.—1 Timoti 6:17, 19.

“Bambae Mi Mi No Save Livim Yu”

13. ?Wanem promes we Jeova i mekem long ol man we oli stap tru long hem?

¹³ Wol ya i stap kam moa nogud oltaem, ‘olsem we woman i harem we bak blong hem i soa blong i bonem pikinini.’ Taswe ol man we oli putum tingting blong olgeta i stap strong long wol ya, oli no gat wan gudfala tingting nating long saed blong fiuja. (Matiu 24:8) Be ol man we oli putum tingting blong olgeta i stap strong long Jeova oli no save fraet. Bambae oli ‘stap gud oltaem long laef blong olgeta, bambae oli save we i no gat wan samting nating i save mekem olgeta oli fraet.’ (Ol Proveb 1:33) From we oli no putum tingting blong olgeta i stap strong long ol samting blong wol ya, oli glad blong folem advaes ya blong Pol se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem, from we God i talem se, ‘Bambae mi mi no save livim yu yu stap yu wan. Bambae mi mi no save lego yu samtaem.’ ”—Hibrus 13:5.

14. ?From wanem ol Kristin oli no nid blong wari tumas long ol samting long saed blong bodi?

¹⁴ Vas ya i mekem yumi suagud se God bambae i lukaot long yumi. Jisas tu i mekem promes se God bambae i lukaot long yumi wetem lav, i se: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu [ol samting long saed blong bodi we yumi nidim] long yufala. I nogud yufala i stap tingting tumas from ol samting blong tumora. Ol bisnes blong tumora i blong tumora.” (Matiu 6:33, 34) Jeova i save se i no isi blong wok strong long saed blong Kingdom, mo long semtaem wok blong kasem ol samting we yumi nidim blong laef. Taswe, yumi mas trastem Jeova fulwan se hem i naf blong givim samting we yumi nidim mo hem i wantem mekem olsem tu.—Matiu 6:25-32; 11:28-30.

15. ?Olsem wanem ol Kristin oli ‘mekem ae blong olgeta i klia gud’?

¹⁵ Yumi soem se yumi trastem Jeova blong lukaot long yumi, taem yumi ‘mekem ae blong yumi i klia gud.’ (Matiu 6:22, 23, Nyutesteman wetem Ol Sam long Bislama) Sipos ae blong yumi i klia gud, yumi wok wetem fulhat blong yumi, stret tingting i pusum yumi, yumi no griri, mo yumi no tingbaot yumi nomo. Ae we i klia gud i no min se yumi pua tumas we yumi no gat wan samting, mo i no min se yumi sakemaot wok ya we ol Kristin oli mas mekem blong lukaot long olgeta wan long saed blong bodi. Ae we i klia gud, i min se yumi “holem stret tingting long evri samting,” mo yumi gohed blong putum wok blong Jeova long fasples long laef blong yumi.—2 Timoti 1:7, NW.

16. ?Blong mekem ae blong yumi i stap klia gud, from wanem yumi nidim bilif mo yumi no mas fraet?

¹⁶ Blong mekem ae blong yumi i stap klia gud, yumi nidim bilif mo yumi no mas fraet. Tingbaot: ?Sipos bos blong yu i talem long yu blong wok long taem blong ol Kristin miting, bambae yu mekem wanem? ?Bambae yu holem strong tingting blong putum wosip blong yu long fasples long laef blong yu, no bambae yu fraet? Sipos bilif blong wan Kristin i hafhaf long saed blong promes blong Jeova blong lukaotgud long ol man blong Hem, Setan i save winim hem long poen ya. Bambae Setan i nidim nomo blong yusum bos blong hem blong gohed blong traem hem, nao bambae hem i stop olgeta blong go long miting. Yes, sipos yumi sot long bilif, yumi givim janis long Setan blong i kam bos long yumi. I no longtaem, bambae yumi no moa gat tingting blong Jeova long saed blong wanem samting i moa impoten, be bambae yumi gat tingting blong Setan. !Hemia bambae i nogud tumas!—2 Korin 13:5.

‘Putum Tingting Blong Yu i Stap Strong Long Jeova’

17. ?Olsem wanem olgeta we oli trastem Jeova oli kasem blesing naoia?

¹⁷ Bakegen mo bakegen, Baebol i soemaot se olgeta we oli trastem Jeova mo putum tingting blong olgeta i stap strong long hem, oli kasem help mo blesing blong hem. (Ol Proveb 3:5, 6; Jeremaea 17:7) I tru, maet sam samtaem oli gat smol nomo long saed blong bodi. Be long tingting blong olgeta, samting we oli lusum long saed blong bodi i nating nomo taem oli tingbaot ol bigfala blesing we bambae oli kasem long fiuja. Oli stap soemaot se oli ‘putum tingting blong olgeta i stap strong long Jeova.’ Mo oli trastem hem se long fiuja bambae hem i givim ol gudfala samting long ol man we oli stap tru long hem, olsem we oli wantem. (Ol Sam 37:4, 34) Taswe, oli gat trufala glad finis. “Ol samting we gudfala man i stap putum tingting blong hem i stap long hem, bambae oli mekem hem i glad tumas, be ol samting we man nogud i stap ting se bambae i kasem, bambae oli no save kamtru nating.”—Ol Proveb 10:28.

18, 19. (a) ?Wanem promes we Jeova i mekem long yumi from lav blong hem? (b) ?Olsem wanem yumi mekem se Jeova i stap long “raet saed” blong yumi?

¹⁸ Taem wan smol boe i wokbaot wetem papa blong hem mo i holem han blong hem, hem i harem se hem i stap sef. Sem mak long yumi taem yumi wokbaot wetem Papa blong yumi we i stap long heven. Jeova i talem long ol man Isrel se: “!Yufala i no fraet! !Mi mi stap wetem yufala! . . . !Mi bambae mi givhan long yufala! . . . !Mi mi Hae God, mi God blong yufala! Mi nao mi stap [“holem raet han blong yufala,” NW ], mo mi stap talem long yufala se, ‘!Yufala i no fraet! !Mi bambae mi givhan long yufala!’ ”—Aesea 41:10, 13.

¹⁹ Tingbaot olsem wanem tok ya i soemaot lav blong Jeova. !Jeova i stap holem han blong yumi! Deved i raetem se: “Oltaem mi mi save we Hae God i stap wetem mi, i stap [“long raet saed blong mi,” NW ], nao i no gat wan samting i save muvum mi.” (Ol Sam 16:8) ?Olsem wanem yumi mekem se Jeova i stap long “raet saed” blong yumi? Yumi mekem long tu rod: Faswan se, yumi letem Tok blong hem i lidim yumi long evri haf blong laef blong yumi. Sekenwan se, yumi putum tingting blong yumi i stap strong long ol nambawan blesing we Jeova i promes blong givim long yumi long fiuja. Long Ol Sam, Asaf i raetem wan singsing we i talem se: “Oltaem mi mi stap klosap long yu, mo yu stap holem [“raet,” NW ] han blong mi. Yu yu stap lidim mi long ol toktok blong yu, mo biaen, bambae yu ona long mi.” (Ol Sam 73:23, 24) Promes ya i save mekem se yumi gat strong tingting long saed blong fiuja.

‘I No Longtaem, Mi Bambae Mi Sevem Yufala’

20, 21. ?Wanem fiuja blong olgeta we oli putum tingting blong olgeta i stap strong long Jeova?

²⁰ Oltaem yumi mas mekem Jeova i stap long raet han blong yumi. Evri dei, samting ya i kam moa impoten. I no longtaem, ol giaman skul blong wol bambae oli lus. Hemia bambae i statem wan taem blong bigfala trabol long wol blong Setan, ol trabol we man i neva luk bifo. (Matiu 24:21) Olgeta man we oli no gat bilif, bambae oli fraet we oli fraet. !Be long trabol taem ya, ol man blong Jeova bambae oli no fraet! !Bambae oli glad tumas from we oli putum tingting blong olgeta i stap strong long ol blesing long fiuja! Jisas i talem se: “Taem ol samting ya oli stat kamtru, yufala i mas stanap stret, yufala i leftemap hed blong yufala, from we bambae i no longtaem, mi . . . sevem yufala, mi mekem yufala i fri.”—Luk 21:28.

²¹ Taswe, yumi mas glad tumas long ol nambawan promes blong God we yumi save putum tingting blong yumi i stap strong long olgeta. Setan i gat gudhan blong yusum ol trik. Be yumi no mas letem hem i giaman long yumi mo pulum yumi. Long semtaem, yumi mas wok had blong kasem bilif, lav, mo blong onagud long God. Sipos yumi mekem olsem, bambae yumi no fraet. Bambae yumi gat strong tingting blong obei long Jeova long evri samting, mo blong agensem Setan. (Jemes 4:7, 8) Yes, “yufala evriwan we yufala i putum tingting blong yufala i stap long Hae God, yufala i [“no mas fraet,” NW ]. Tingting blong yufala i mas stap strong oltaem.”—Ol Sam 31:24.

[Futnot]

?Yu Yu Save Ansa?

• ?Taem Jisas i putum tingting blong hem i stap strong long ol blesing long fiuja, olsem wanem hemia i mekem se hem i no fraet?

• ?Olsem wanem fasin blong putum tingting i stap strong long ol blesing long fiuja i joen wetem bilif?

• ?Sipos wan Kristin i bilif mo i putum tingting blong hem i stap strong long ol blesing long fiuja, olsem wanem i isi moa long hem blong mekem ol samting we oli moa impoten fastaem?

• ?From wanem olgeta we oli ‘putum tingting blong olgeta i stap strong long Jeova’ oli no fraet long fiuja?

[Tok blong pija long pej 28]

?Nating se yu yu wan yangfala no wan olfala, be long tingting blong yu, yu stap lukluk yu long Paradaes?