“Ol Pikinini, Yufala i Mas Obei Long Papa Mama Blong Yufala”

“Ol pikinini. Yufala i mas obei long papa mo mama blong yufala, from we yufala i joen long Masta blong yumi. Hemia i stret fasin blong yufala i mekem.”—EFESAS 6:1.

 1. ?Olsem wanem fasin blong obei i save protektem yu?

MAET yumi laef yet tede from we yumi obei be maet sam narafala oli ded from we oli no bin obei. ?Obei long wanem? Hemia fasin blong obei long ol woning, olsem ol woning we yumi harem save long bodi ya blong yumi we God i wokem long ‘fasin we i nambawan.’ (Ol Sam 139:14) Wetem ae blong yu, yu luk se ples i dak mo skae i fulap long klaod, mo sora blong yu i harem tanda. Ale, ol hea long skin blong yu i stanap from yu filim se i gat lektrik long win. Ol man we oli bin fesem samting ya finis oli save se hemia saen we denja i stap kam. Maet hemia saen se wan bigfala ren wetem laetning mo tanda i stap kam, mo i gud blong faenem ples blong haed.

 2. ?From wanem ol pikinini oli nidim ol woning? ?Mo from wanem oli mas obei long papa mama blong olgeta?

² Yufala ol yangfala, yufala i nidim ol woning long saed blong ol denja we oli stap kam. Papa mama blong yufala nao i mas givhan long yufala long saed ya. Ating yufala i bin tingbaot wantaem we papa no mama blong yufala i talem se: “Yu no holem sospen ya. Hem i hot.” “Yu no go klosap long hol ya, mbae yu foldaon.” “Bifo we yu krosem rod yu mas lukluk sipos i gat trak i stap kam.” Sore tumas, plante pikinini oli kasem kil no oli ded tu from we oli no obei. Fasin blong obei long papa mama blong yu hemia “stret fasin”—yes, hemia samting we i stret blong mekem. Mo tu, hem i waes. (Ol Proveb 8:33) Wan narafala vas blong Baebol i talem se fasin ya i “mekem Masta blong yumi [Jisas Kraes] i glad.” Yes, God nao i talem long yu se yu mas obei long papa mama blong yu.—Kolosi 3:20; 1 Korin 8:6.

Blesing We i Kamaot From Fasin Obei Bambae i Stap Olwe

 3. ?Wanem ya “laef ya we i prapa wan,” mo olsem wanem ol pikinini oli save kasem laef ya?

³ Taem yu obei long papa mama blong yu, fasin ya i protektem ‘laef blong yu long wol ya.’ Be fasin obei bambae i mekem se yu save harem gud tu long “laef ya we bambae i kamtru biaen,” we Baebol i talem se hemia “laef ya we i prapa wan.” (1 Timoti 4:8; 6:19) Bighaf blong yumi bambae i kasem laef ya we i prapa wan hemia long niufala wol we God bambae i mekem. Hem i mekem promes blong givim laef ya long olgeta we oli obei long loa blong hem. Wan long ol loa ya we i impoten tumas, hemia: “ ‘Yufala i mas ona long papa mo mama blong yufala,’ hemia i faswan long ol loa ya we i gat promes i stap long hem. Promes ya i talem se, ‘Sipos yufala i mekem olsem, bambae ol samting blong laef blong yufala i save ron gud, mo bambae laef blong yufala long graon ya, i longfala.’ ” Taswe, sipos yu obei long papa mama blong yu, bambae yu glad. !Bambae yu gat wan gudfala fiuja, mo bambae yu save kasem laef we i no save finis long wan paradaes wol!—Efesas 6:2, 3.

 4. ?Olsem wanem ol pikinini oli save ona long God mo harem gud from?

⁴ Taem yu obei long papa mama blong yu, yu soem se yu ona long tufala. Be tu, yu soem se yu ona long God from we hem nao i talem long yu blong obei long tufala. Ale, long semtaem we yu yu stap mekem olsem, yu tu yu haremgud. Baebol i talem se: “Mi mi [Jeova], mi God blong yufala. Mi nao mi stap tijim yufala blong givhan long yufala.” (Aesea 48:17; 1 Jon 5:3) ?Olsem wanem fasin obei i mekem i gud long yu? Fasin ya i mekem mama mo papa blong yu i hapi, mo biaen bambae tufala i soemaot long yu se tufala i glad long yu mo samting ya i save mekem laef blong yu i gud moa. (Ol Proveb 23:22-25) !Be samting we i moa impoten se fasin blong yu blong obei bambae i mekem Papa blong yu long heven i hapi, mo bambae hem i blesem yu long fasin we i nambawan tumas! Naoia bambae yumi tokbaot olsem wanem Jeova i blesem mo i protektem pikinini blong hem Jisas, we i tokbaot hem wan se: “Oltaem, mi stap mekem ol samting we hem i wantem.”—Jon 8:29.

Jisas—Wan Man We i Wok Strong

 5. ?Wanem i mekem yumi sua se Jisas i wan man blong wok strong?

⁵ Jisas hem i fasbon pikinini blong Meri. Man we i lukaot long hem olsem papa blong hem, hemia Josef, mo hem i wan kapenta. Ale Jisas tu i mekem wok blong kapenta, wok ya we ating Josef i tijim hem long hem. (Matiu 13:55; Mak 6:3; Luk 1:26-31) ?Yu ting se Jisas i mekem wok blong kapenta olsem wanem? Taem Jisas i stap long heven olsem waestok, hemia bifo we hem i bon i kam long wol ya tru long mama blong hem we i wan vejin, hem i eksplenem hem wan se: “Mi stap stanap long saed blong [God], mi olsem man we i mekem ol plan we hem i stap folem. Evri dei, mi stap mekem hem i glad.” Yes, God i glad long Jisas from we hem i wok strong taem hem i stap long heven. ?Ale yu ting se taem Jisas i stap long wol ya, hem i traehad tu blong mekemgud wok ya blong kapenta? I sua se hem i no wok les be hem i givim bes blong hem blong mekemgud wok blong hem.—Ol Proveb 8:30; Kolosi 1:15, 16.

 6. (a) ?Wanem i mekem yu yu ting se taem Jisas i pikinini hem i mekem ol wok long haos? (b) ?Olsem wanem ol pikinini oli save folem fasin blong Jisas?

⁶ Baebol i tokbaot ol pikinini long taem bifo se oli stap pleplei, taswe taem Jisas i pikinini, hem tu i stap pleplei samtaem. (Sekaraea 8:5; Matiu 11:16, 17) Be Jisas i fasbon pikinini long wan famle we oli no rijman. Taswe i sua se Jisas i gat ol wok blong mekem long haos mo Josef i mas trenem hem tu long wok blong kapenta. Biaen, Jisas i mekem wok blong prij, i yusum laef blong hem fulwan long wok ya mo i lego plante samting blong laef we oli save mekem hem i haremgud. (Luk 9:58; Jon 5:17) ?Yu yu tingbaot sam samting we yu save mekem blong folem fasin blong Jisas? ?Papa mama blong yu, tufala i askem yu blong klinim rum blong yu no blong mekem sam nara wok long haos? ?Tufala i stap leftemap tingting blong yu blong joen long wosip blong God, olsem blong go long ol miting mo prij? ?Sipos Jisas i stap long ples blong yu, bambae hem i mekem wanem?

Wan Man Blong Stadi Baebol Mo Wan Nambawan Tija

 7. (a) ?Jisas i wokbaot i go wetem hu long Pasova? (b) ?Jisas i stap wea taem ol narafala oli stat wokbaot i gohom, mo from wanem hem i stap long ples ya?

⁷ Long Isrel bifo, olgeta man mo boe insaed long famle oli mas go wosipim Jeova long haos tempol long taem blong tri bigfala lafet blong ol man Jiu. (Dutronome 16:16) Taem Jisas i gat 12 yia, ating ful famle blong hem oli wokbaot i go long Jerusalem blong mekem lafet blong Pasova. Ating ol narafala pikinini blong Josef mo Meri tu oli go. I luk olsem se olgeta we oli wokbaot wanples wetem famle blong Jisas, i gat Salome, we hem i sista blong Meri, wetem hasban blong hem Sebedi mo tufala pikinini blong tufala, Jemes mo Jon, we biaen tufala i kam ol aposol blong Kraes.a (Matiu 4:20, 21; 13:54-56; 27:56; Mak 15:40; Jon 19:25) Taem olgeta ya oli wokbaot blong gobak long ples blong olgeta, Josef mo Meri, tufala i ting se Jisas i stap wokbaot wetem ol narafala famle ya. Taswe oli no luksave se hem i no stap. Tri dei biaen, tufala i faenem Jisas long tempol, hem i stap “sidaon long medel blong ol tija blong ol laen blong Isrel. Hem i stap lesin long tok blong olgeta, mo i stap askem kwestin long olgeta.”—Luk 2:44-46.

 8. ?Jisas i mekem wanem long tempol, mo from wanem ol man oli sapraes tumas?

⁸ ?Jisas i stap askem wanem “kwestin” long ol tija ya? Ol kwestin we hem i askem i no blong save from wanem ol samting i olsem mo i no from we hem i no klia long sam samting. Nogat. Grik tok we oli yusum long vas ya i minim ol kwestin we man i yusum taem i pas long kot, olsem taem man i wantem faenemaot sipos narafala i save no i sua long wanem we hem i bilif long hem no i talem. !Tru ya, nating se Jisas i yangfala nomo be i klia se hem i laekem stadi long Baebol mo i mekem ol tija blong skul long taem ya oli sapraes tumas! “Olgeta evriwan we [oli] harem hem oli sapraes tumas long save blong hem, mo long ol ansa blong hem.”—Luk 2:47.

 9. ?Olsem wanem yu save folem fasin blong Jisas blong stadi Baebol?

⁹ Yes, nating se Jisas i yangfala be save we hem i gat long saed blong Baebol i mekem ol tija we oli waesgud, oli sapraes tumas. ?Jisas i kasem save ya olsem wanem? Hem i gat nambawan blesing ya se papa mama blong hem, tufala i laekem God, mo tufala ya i tijim hem long ol tok blong God stat taem we hem i bebi yet. (Eksodas 12:24-27; Dutronome 6:6-9; Matiu 1:18-20) Yumi sua se Josef i tekem yangfala Jisas i go wetem hem long haos prea, hemia Sinagog, blong harem ol man oli ridim mo storebaot Tok blong God. ?Papa mama blong yu, tufala i stap stadi Baebol wetem yu mo tekem yu yu go long ol Kristin miting wetem tufala? Hemia wan nambawan blesing ya. ?Yu yu tinghae long tufala from ol traehad ya, olsem we Jisas i tinghae long papa mama blong hem? ?Yu yu serem samting we yu lanem wetem ol narafala, olsem we Jisas tu i bin mekem?

Jisas i Stap Daon

10. (a) ?From wanem papa mama blong Jisas tufala i sud save weples hem i stap long hem? (b) ?Wanem nambawan eksampol we Jisas i soem long ol pikinini?

¹⁰ ?Yu ting se Meri mo Josef tufala i harem olsem wanem taem tufala i faenem Jisas long tempol afta long tri dei? I sua se tufala i harem gud tumas. Be, Jisas i sapraes we papa mama blong hem, tufala i no bin tingbaot se hem i stap long tempol. Tufala tugeta i save finis se Jisas i no olsem ol narafala pikinini. Hem i bon i kam long wol ya tru long wan merikel. Mo tu, nating we tufala i no save evri samting long saed blong Jisas, be tufala i mas save se long fiuja bambae hem i mekem wok olsem Sevia mo Rula long Kingdom blong God. (Matiu 1:21; Luk 1:32-35; 2:11) Taswe Jisas i askem long tufala se: “?From wanem yutufala i stap lukaot mi? ?Yutufala i no save se mi mi mas stap long haos blong Papa blong mi?” Nating se i olsem, Jisas i folem papa mama blong hem mo oli gobak long Nasaret. Baebol i talem se: “Oltaem hem i stap ona long tufala.” Antap long hemia, “mama blong hem i stap tingbaot ol samting ya,” i stap putumgud long hat blong hem.—Luk 2:48-51.

11. ?Jisas i tijim yu wanem long saed blong fasin obei?

¹¹ ?I isi long yu blong folem fasin blong Jisas mo obei oltaem long papa mama blong yu? ?No samtaem yu gat tingting se tufala i no gat save long laef blong wol naoia, mo yu yu save moa i bitim tufala? I tru, maet yu yu gat moa save bitim tufala long saed blong sam samting—maet yu save yusum mobaelfon, kompiuta, no sam narafala samting olsem. Be tingbaot Jisas. Hem i mekem ol waes tija long taem blong hem oli sapraes tumas long “save blong hem, mo long ol ansa blong hem.” Ating bambae yu agri se sipos oli skelem yu wetem Jisas, save blong yu i smol nomo. Nating se i olsem, Jisas i stap daon long papa mama blong hem. Hemia i no min se Jisas i agri nomo wetem evri desisen blong tufala. Be “oltaem hem i stap ona long tufala”—hem i mekem olsem long ful taem ya we hem i yangfala. ?Eksampol blong hem i save tijim yu long wanem samting?—Dutronome 5:16, 29.

I No Isi Blong Obei Oltaem

12. ?Olsem wanem fasin obei i save sevem laef blong yu?

¹² I no isi blong obei oltaem. Yumi luksave samting ya long wan stori we i hapen sam yia i pas finis. Tu yang gel tufala i wantem krosem wan bigfala rod we i gat sikis rod blong trak long hem. I gat wan spesel brij, blong ol man oli wokbaot long hem, we i go ovarem rod ya kasem narasaed, be tufala gel ya i no wantem pas long brij ya. Tufala i stap wetem wan boe we nem blong hem John. John i stap wokbaot i go from brij ya, nao tufala i singaot hem, tufala i se, “?Olsem wanem John? ?Mbae yu no kam wetem mitufala?” John i harem se hem i no wantem go, ale wan long tufala gel ya i jikim hem se: “!Yu yu man blong fraet nomo!” Be John i no fraet, hem i talem se: “Mi mi mas lesin long mama blong mi.” Ale hem i pas long brij. I no longtaem biaen, hem i harem noes blong trak we i brek strong long rod. Hem i lukluk i godaon mo i luk se wan trak i sperem tufala gel ya. Wan long tufala i ded, mo narawan i kasem bigfala kil tumas, oli mas katemaot wan saed leg blong hem. Mama blong tufala gel ya i bin talem finis long tufala se tufala i mas pas long brij antap. Afta long aksiden ya mama ya i talem long mama blong John se: “Sipos tufala i bin obei nomo olsem boe blong yu i mekem, bambae samting ya i no save hapen.”—Efesas 6:1.

13. (a) ?From wanem yu mas obei long papa mama blong yu? (b) ?Wetaem i stret we wan pikinini i no obei long papa mama blong hem?

¹³ ?From wanem God i talem se: ‘Ol pikinini, yufala i mas obei long papa mo mama blong yufala’? Taem yu obei long papa mama blong yu, yu stap obei tu long God. Mo tu, papa mama blong yu, tufala i gat moa save long laef i bitim yu. Faef yia nomo bifo long aksiden ya we yumi tokbaot antap, i gat wan fren blong mama blong John we pikinini blong hem tu i bin traem krosem rod ya nao i ded from wan trak i sperem hem. Tru ya, maet i no isi blong obei oltaem long papa mama blong yu, be God i talem se yu mas mekem olsem. Defren nao, sipos papa mama blong yu—no sam narafala man—oli talem long yu blong yu giaman, stil, no mekem eni narafala samting we God i no agri long hem, ale long taem ya nomo yu mas ‘obei long God, i no long man.’ Taswe, afta we Baebol i talem se “yufala i mas obei long papa mo mama blong yufala” hem i gohed i se “from we yufala i joen long Masta.” Hemia i min se yu mas obei long papa mama blong yu long evri samting we tufala i talem we i laenap wetem ol loa blong God.—Ol Wok 5:29.

14. ?From wanem i isi moa long wan stretman blong obei? ?Be, from wanem wan stretman i nidim yet blong lanem fasin ya?

¹⁴ Jisas ‘i no gat sam samting we i spolem hem, hem i narafala olgeta long ol man nogud.’ ?Yu yu ting se sipos yu tu yu stretgud olgeta, ale bambae i isi moa long yu blong obei long papa mama blong yu? (Hibrus 7:26) I tru se sipos yu yu stretman, bambae yu no gat ol tingting we oli stap pulum yu blong mekem samting nogud, olsem naoia. (Jenesis 8:21; Ol Sam 51:5) Be, Jisas tu i mas lanem fasin obei. Baebol i talem se: “Kraes i Pikinini blong God, be hem i lanem mining blong fasin ya blong obei long God, long ol samting we oli mekem hem i harem nogud long bodi blong hem.” (Hibrus 5:8) ?Olsem wanem Jisas i lanem fasin obei long ol samting we oli mekem hem i harem nogud, wan samting we hem i neva kasem long heven?

15, 16. ?Jisas i lanem fasin obei olsem wanem?

¹⁵ Jeova i givhan long Josef mo Meri blong tufala i lukaotgud long Jisas blong i no gat wan samting i spolem hem taem hem i pikinini. (Matiu 2:7-23) Be biaen, God i karemaot paoa ya blong hem we i protektem Jisas. Ale Baebol i talem se ol samting we oli mekem Jisas i harem nogud long tingting mo bodi oli bigwan tumas nao hem i “stap prea long God, i stap askem ol samting long hem, i stap krae bigwan, we wota blong ae blong hem i stap ron.” (Hibrus 5:7) ?Samting ya i hapen wetaem?

¹⁶ I hapen long ol laswan aoa bifo we Jisas i ded, taem Setan i traehad bigwan blong pulum hem blong lego God. I luk olsem se tingting blong Jisas i trabol we i trabol tumas from we hem i no wantem se taem ol man oli kilim hem i ded olsem wan rabis man, bambae samting ya i spolem gudnem blong Papa blong hem. Samting ya i stap wok long tingting blong hem nao “hem i stap prea i strong moa [long garen blong Getsemane], mo swet blong hem i stap folfoldaon long graon olsem blad nomo.” Sam aoa biaen, taem oli nilim Jisas long pos, soa we hem i harem i bigwan tumas mekem se hem “i stap krae bigwan, we wota blong ae blong hem i stap ron.” (Luk 22:42-44; Mak 15:34) Long rod ya nao, hem i “lanem mining blong fasin ya blong obei long God, long ol samting we oli mekem hem i harem nogud long bodi blong hem” mo i mekem Papa blong hem i glad tumas. Naoia, Jisas i stap long heven, mo hem i haremsave soa we yumi kasem taem yumi stap traehad blong obei long Jeova.—Ol Proveb 27:11; Hibrus 2:18; 4:15.

Lanem Fasin Blong Obei

17. ?I gud yumi tingbaot fasin stretem se hem i olsem wanem?

¹⁷ Taem papa mama blong yu, tufala i stretem yu, hemia i soem se tufala i wantem we yu yu haremgud, i soem se tufala i lavem yu. Baebol i talem se: “I no gat wan pikinini yet, we papa blong hem i no save stretem hem samtaem.” ?Yu yu glad sipos papa mama blong yu, tufala i no tektaem mo traehad blong stretem yu from we tufala i no kea long yu? Jeova tu i stap stretem yu from we hem i lavem yu. “Sipos God i stretem yumi, bambae samting ya i no save mekem yumi harem gud, i mas mekem we yumi harem nogud. Be biaen, bambae yumi save kasem frut blong hem, we yumi gat pis, from we laef blong yumi i stret gud long fes blong God.”—Hibrus 12:7-11.

18. (a) ?Fasin blong stretem pikinini wetem lav i soemaot wanem? (b) ?Yu yu luk eksampol blong samfala we i soem se fasin blong stretem pikinini wetem lav i karem gudfala frut?

¹⁸ Wan king blong Isrel bifo, we Jisas i tokbaot hem from we hem i gat bigfala waes, i talem se pikinini i nidim we papa mama blong hem i stretem hem wetem lav. King Solomon, i raetem se: “Sipos yu no wantem panisim pikinini blong yu, hemia i min se yu no lavem hem. Sipos yu lavem hem, bambae yu stap stretem hem.” Solomon i talem tu se fasin ya we man i stretem narafala wetem lav i save sevem laef blong narafala ya. (Ol Proveb 13:24; 23:13, 14; Matiu 12:42) Wan Kristin woman i tingbaot taem hem i pikinini se, sipos hem i stronghed long taem blong ol miting, papa blong hem bambae i talem long hem se hem i mas kasem panis taem oli gobak long haos. Tede, woman ya i tingbaot yet papa blong hem mo i laekem hem tumas from fasin blong hem blong stretem hem wetem lav, samting ya i halpem woman ya bigwan long laef blong hem biaen.

19. ?Wanem impoten risen from wanem yu mas obei long papa mama blong yu?

¹⁹ Sipos yu yu gat papa mama we lav i pusum tufala blong lukluk long yu mo traehad blong stretem fasin blong yu, yu yu mas rili tangkiu from. Yu mas obei long tufala, olsem we Masta Jisas Kraes i obei long papa mama blong hem, Josef mo Meri. Be impoten risen from wanem yu mas obei long tufala hemia from we Papa blong yu long heven, Jeova God, hem nao i talem long yu blong mekem olsem. Nao, fasin ya blong yu bambae i givhan bigwan long yu wan bakegen, mo ‘bambae ol samting blong laef blong yu i save ron gud, mo bambae laef blong yu long graon ya, i longfala.’—Efesas 6:2, 3.

[Futnot]

?Bambae Yu Yu Ansa Olsem Wanem?

• ?Wanem ol blesing we ol pikinini oli save kasem taem oli obei long papa mama blong olgeta?

• ?Taem Jisas i wan pikinini, olsem wanem hem i soem eksampol blong obei long papa mama?

• ?Olsem wanem Jisas i lanem fasin obei?

[Tok blong pija long pej 14]

Taem Jisas i gat twelef yia nomo hem i gat gud save long Tok blong God

[Tok blong pija long pej 16]

?Olsem wanem Jisas i lanem fasin obei taem hem i safa?