‘Yufala i Mas Glad Olwe’

“Yufala i mas mekem lafet [“blong Jeova,” NW ] . . . [mo] bambae yufala i mas glad [“olwe,” NW ]​—DUTRONOME 16:15.

 1. (a) ?Wanem toktok we Setan i sakem agensem God? (b) ?Afta we Adam mo Iv tufala i mekem stronghed, wanem samting we Jeova i tokbaot se bambae hem i mekem?

TAEM Setan i pulum Adam mo Iv blong sakemaot rul blong God ya we i wokem tufala, hem i tok agensem tu samting we oli impoten tumas. Faswan samting, hem i tok agensem Jeova se i giaman mo fasin blong hem blong rulum ol man i nogud. Seken samting, Setan i tok agensem wosip we ol man oli mekem long God. Hem i se, ol man oli stap mekem wok blong God from we oli wantem kasem samting nomo. Seken samting ya i kam long klia ples long taem blong Job. (Jenesis 3:​1-6; Job 1:​9, 10; 2:​4, 5) Nating se i olsem, Jeova i faenem rod blong stretem trabol ya kwiktaem nomo. Taem Adam mo Iv tufala i stap yet long garen blong Iden, Jeova i talem olsem wanem bambae hem i stretem bisnes ya wetem Setan. Jeova i tokbaot wan “pikinini” we bambae i bon mo we bambae i givim kil long Setan long hed blong hem, we i min se bambae hem i flatemgud Setan. Nating se fastaem Setan bambae i givim kil long leg blong pikinini ya, minim se bambae i traem kilim hem i ded, be bambae hem i no save win.​—Jenesis 3:15.

 2. ?Wanem ol save we Jeova i givim blong soemaot rod we bambae hem i yusum blong mekem profet tok blong Jenesis 3:15 i kamtru?

² Taem ol yia oli pas, Jeova i givim moa save long saed blong profet tok ya, mo long fasin ya hem i soemaot se profet tok ya i sua blong kamtru. God i talem long Ebraham se “pikinini” ya bambae i wan long olgeta we “oli kamaot biaen” long Ebraham. (Jenesis 22:​15-18) Smol bubu blong Ebraham, hemia Jekob, hem i gat 12 pikinini boe we oli kam papa blong ol 12 laen blong Isrel. Long yia 1513 B.K.T.,a taem ol 12 laen ya oli kam wan neson, Jeova i givim ol loa long olgeta. Insaed long ol loa ya i gat defdefren lafet we oli mas mekem evri yia. Aposol Pol i talem se ol lafet ya oli “olsem sado nomo blong samting we i no kamtru yet.” (Kolosi 2:​16, 17; Hibrus 10:1) Sam samting long ol lafet ya oli pija blong ol rod we Jeova i stap yusum blong mekem tok blong hem i kamtru long saed blong Pikinini ya we bambae i mas bon. Taem ol man Isrel oli mekem ol lafet ya, oli glad bigwan. Bambae yumi tokbaot sam long ol lafet ya. Samting ya i save halpem yumi blong yumi bilif strong moa se ol promes blong Jeova bambae oli kamtru.

Pikinini Ya i Kamtru

 3. ?Hu ya Pikinini ya we God i promes se bambae i bon long laen blong Ebraham? ?Olsem wanem Setan i givim kil long leg blong pikinini ya?

³ Bitim 4,000 yia afta we Jeova i talem profet tok ya blong Jenesis, pikinini ya we hem i tokbaot, i bon. Hemia Jisas. (Galesia 3:16) Jisas i no gat sin, mo hem i holemstrong long God gogo kasem we hem i ded. Olsem nao hem i pruvum se ol tok blong Setan agensem God oli giaman nomo. Mo tu, from we Jisas i no gat sin, ded blong hem i wan sakrefaes we praes blong hem i hae we i hae. From sakrefaes ya nao, Jisas i save tekemaot sin mo ded long olgeta pikinini blong Adam mo Iv. Taem Jisas i ded we oli nilim hem long wan pos, i olsem we Setan i ‘givim kil long leg’ blong pikinini blong woman ya.​—Hibrus 9:​11-14.

 4. ?Wanem samting we i olsem sado blong sakrefaes blong Jisas?

⁴ Jisas i ded long namba 14 dei blong manis Nisan long yia 33 K.T.b Long neson blong Isrel, Nisan 14 hem i wan hapi dei from we hem i lafet blong Pasova. Evri yia, long dei ya, ol famle oli joen wanples blong kakae wan smol sipsip we i no gat wan samting i rong long bodi blong hem. Hemia i mekem oli tingbaot taem ya we blad blong smol sipsip i bin sevem laef blong olgeta fasbon pikinini blong Isrel. Samting ya i hapen long Nisan 14 long yia 1513 B.K.T., taem enjel blong Jeova i kilim i ded olgeta fasbon pikinini blong ol man Ijip. (Eksodas 12:​1-14) Smol sipsip blong lafet blong Pasova ya i pija blong Jisas we aposol Pol i tokbaot hem se: “Kraes i olsem smol sipsip blong yumi blong Pasova, we ol man oli kilim hem finis.” (1 Korin 5:7) Blad blong Jisas we i ron i openem rod blong plante man oli save kasem laef, olsem blad blong smol sipsip ya long lafet blong Pasova.​—Jon 3:​16, 36.

‘Faswan We i Laef Bakegen Long Ded’

5, 6. (a) ?Jisas i laef bakegen wetaem, mo olsem wanem Loa i wan sado blong samting ya? (b) ?From wanem i impoten tumas we Jisas i laef bakegen long ded blong mekem ol tok blong Jenesis 3:15 oli kamtru?

⁵ Long namba tri dei, Jisas i laef bakegen long ded nao i go antap long heven i stanap long fes blong Papa blong hem blong soemaot se hem i givim sakrefaes ya finis. (Hibrus 9:24) I gat wan narafala lafet we i olsem sado blong taem ya we bambae hem i laef bakegen long ded. Long Nisan 15, oli statem lafet ya we oli kolem Lafet blong Kakae Bred We i No Gat Is. Ale long dei biaen, hemia long Nisan 16, ol man Isrel oli karem ol fas kakae blong bale i go long pris blong i givim long Jeova. Long olgeta samting we ol man Isrel oli planem long garen, bale nao hem i faswan blong karem kakae. (Levitikas 23:​6-14) I stret nomo we long yia 33 K.T., stret long dei ya Nisan 16, Jeova i blokem rabis plan blong Setan we i wantem se Jisas i lus blong olwe from we hem i “witnes ya [blong God] we i no save tanem tok blong hem.” Long Nisan 16, yia 33 K.T., Jeova i mekem Jisas i laef bakegen long ded mo i givim wan spirit bodi long hem we i no save ded samtaem.​—Revelesen 3:​14, NW; 1 Pita 3:18.

⁶ Jisas hem i ‘faswan we i laef bakegen long ded, hem i olsem fas kakae ya we i rere long garen.’ (1 Korin 15:20) Ol man we oli bin laef bakegen long ded long taem bifo, oli ded bakegen biaen. Be Jisas i no olsem. Hem i gobak long heven, i sidaon long raetsaed blong Jeova mo i wet gogo kasem taem we Jeova i putum hem i King long Kingdom long heven. (Ol Sam 110:1; Ol Wok 2:​32, 33; Hibrus 10:​12, 13) Stat long taem we Jisas i kam King, hem i gat paoa blong kilim bigfala enemi ya Setan i ded. Yes, bambae hem i givim kil long snek ya long hed blong hem mo bambae i finisim olgeta pikinini blong laen blong hem.​—Revelesen 11:​15, 18; 20:​1-3, 10.

Sam Nara Pikinini Long Laen Blong Ebraham

 7. ?Wanem ya Lafet blong ol Wik?

⁷ Jisas, hem i Pikinini ya we Jeova i tokbaot long garen blong Iden mo hem nao we Jeova i talem se bambae i “brekemdaon ol wok we Setan i mekem.” (1 Jon 3:8) Be, taem Jeova i toktok long Ebraham hem i soemaot se plante “pikinini” bambae oli “kamaot biaen” long Ebraham, i no wan nomo. Ol pikinini ya blong hem bambae oli “plante olsem ol sta long skae, mo olsem sanbij daon long solwota.” (Jenesis 22:17) I gat wan narafala lafet we i taem blong bigfala glad, mo hem i soemaot se i gat narafala man we bambae oli “pikinini” blong Ebraham. Fifti dei afta long Nisan 16, Isrel i mekem lafet we oli kolem Lafet blong ol Wik. Loa i tokbaot hemia i se: “Long namba fifti dei blong hem, we hemia dei ya biaen long namba seven Sabat dei, bambae yufala i mas tekem presen bakegen long narafala kakae blong garen blong givim i kam long mi. Bambae olgeta famle wanwan oli mas aot long ol ples blong olgeta, oli mas tekem tu bred i kam, blong pris i leftemap long fes blong mi blong makemaot se i wan spesel presen blong mi. Tufala bred ya, oli mas mekem long fo kilo flaoa, mo oli mas putum is long hem. Hemia i presen blong mi long ol fas kakae blong garen blong yufala.”c​—Levitikas 23:​16, 17, 20.

 8. ?Wanem nambawan samting i hapen long Pentekos 33 K.T.?

⁸ Taem Jisas i stap long wol, ol man oli singaotem Lafet blong ol Wik se lafet blong Pentekos (hemia i kam long wan Grik tok we i minim “namba fifti”). Jisas Kraes hem i Hae Pris ya we i hae moa long ol narafala Hae Pris. Long lafet blong Pentekos long yia 33 K.T., afta we Jisas i laef bakegen mo i go antap long heven, hem i sanem tabu spirit i kamdaon long wan smol grup blong 120 disaepol we oli joen wanples long Jerusalem. Ol disaepol ya oli kam ol tabu pikinini blong God mo ol brata blong Jisas Kraes. (Rom 8:​15-17) Oli kam olsem wan niufala neson, hemia we Baebol i kolem “Isrel blong God.” (Galesia 6:​16, NW ) Fastaem, neson ya i smol, be bambae i mas gat 144,000 man we oli memba blong hem.​—Revelesen 7:​1-4.

9, 10. ?Olsem wanem lafet blong Pentekos i wan sado blong kongregesen blong ol Kristin we tabu spirit i makemaot olgeta?

⁹ Tufala bred ya we i gat is long hem mo we pris i leftemap long fes blong Jeova long dei blong Pentekos, tufala i pija blong kongregesen ya blong ol Kristin we tabu spirit i makemaot olgeta. Tufala bred ya i gat is from we i minim se ol Kristin ya we tabu spirit i makemaot olgeta, oli gat sin blong Adam i stap yet long olgeta. Nating se i olsem, oli save kam long Jeova from ransom sakrefaes blong Jisas. (Rom 5:​1, 2) ?From wanem ol man Isrel oli wokem tu bred nomo? Maet hemia i minim se God bambae i jusum ol pikinini blong hem long tu grup. Faswan grup hemia ol man Jiu, mo seken grup hemia ol man blong ol narafala kantri.​—Galesia 3:​26-29; Efesas 2:​13-18.

¹⁰ Tufala bred we oli givim long God long lafet blong Pentekos oli wokem wetem ol faswan wit we oli raep long garen. Long sem fasin, ol Kristin ya we tabu spirit i makemaot olgeta, oli ol “fas kakae blong garen.” (Jemes 1:18) Oli ol faswan man we God i fogivim sin blong olgeta tru long blad blong Jisas we i ron. From samting ya nao oli save go laef long heven wetem wan bodi we i no save ded samtaem. Long heven bambae oli rul wetem Jisas long Kingdom blong hem. (1 Korin 15:53; Filipae 3:​20, 21; Revelesen 20:6) I no longtaem, bambae oli ‘rul long ol [neson] wetem wokingstik long aean’ mo bambae oli luk we God i ‘flatemgud Setan mo oli save purumbut long hem.’ (Revelesen 2:​26, 27; Rom 16:20) Aposol Jon i talem se: “Olgeta oli stap biaen long Smol Sipsip ya long evri ples we hem i pas long hem. God i pemaot olgeta finis, i tekemaot olgeta long ol narafala man, nao oli fri. Olgeta ya oli blong God mo blong Smol Sipsip ya, oli olsem ol fas kakae blong garen, we i blong givim i go long God.”​—Revelesen 14:4.

Dei We i Soemaot Rod Blong God Blong Sevem Ol Man

11, 12. (a) ?Wanem i hapen long Dei blong Stretem Sin? (b) ?Wanem blesing we ol man Isrel oli kasem from sakrefaes blong smol bul mo sakrefaes blong tufala nani?

¹¹ Long namba 10 dei blong manis ya Etanim (we biaen oli kolem Tisri),d Isrel i mekem wan lafet we i olsem sado blong ol blesing we ransom sakrefaes blong Jisas bambae i karem. Lafet ya oli kolem Dei blong Stretem Sin. Long dei ya, olgeta man Isrel oli kam wanples blong mekem ol sakrefaes from ol sin blong olgeta.​—Levitikas 16:​29, 30.

¹² Long Dei blong Stretem Sin, hae pris i kilim wan smol bul, nao hem i mas saksakem blad blong smol bul ya seven taem antap long lid blong bokis blong kontrak we i stap long Rum we i Tabu we i Tabu. Taem hem i mekem olsem, i olsem we hem i givim blad ya long Jeova. Sakrefaes ya i blong ol sin blong hae pris wetem “famle blong hem,” we i minim ol narafala pris we oli wok wetem hem mo ol Livaet tu. Biaen, hae pris i tekem tu nani. Wan long tufala nani ya, hae pris i kilim olsem sakrefaes blong pemaot sin blong olgeta man long neson blong Isrel. Mo hae pris i mas tekem sam blad blong nani ya, i mas saksakem antap long lid blong Bokis blong Kontrak we i stap long Rum we i Tabu we i Tabu. Biaen, hae pris i putum han blong hem antap long hed blong nambatu nani mo i talemaot olgeta sin blong ol man Isrel. Nao hem i mas sanem nani ya i go long draeples, mo letem nani ya i go fri. Mining blong fasin ya i olsem se nani ya i karem olgeta sin blong ol man Isrel i go lus.​—Levitikas 16:​3-16, 21, 22.

13. ?Ol samting we hae pris i mekem long Dei blong Stretem Sin i pija blong wanem samting we Jisas i mekem?

¹³ Ol samting ya we oli mekem long Dei blong Stretem Sin, oli olsem sado blong ol samting we Bigfala Hae Pris ya Jisas bambae i mekem. Jisas i yusum blad blong hem blong pemaot sin blong ol man. Fastaem, blad blong hem i wasemaot sin blong ol 144,000 tabu Kristin we oli ‘olsem haos blong God we i laef.’ Samting ya i mekem we ol man ya oli kam stret man long fes blong Jeova mo oli save stanap fored long hem we oli no gat sem nating. (1 Pita 2:5; 1 Korin 6:11) Smol bul ya we oli givim olsem sakrefaes hem i sado blong samting ya. Samting ya nao i openem rod long olgeta, blong oli kasem praes blong olgeta long heven. Seken samting, blad blong Jisas i wasemaot sin blong plante milian narafala man we oli bilif long Kraes, hemia nao we nani i pija blong hem. Blesing blong olgeta ya se bambae oli save laef blong olwe long wol ya, laef ya we Adam mo Iv tufala i lusum. (Ol Sam 37:​10, 11) Nani ya we oli letem i gofri long draeples olsem saen se hem i karem ol sin blong Isrel i go longwe, hem i pija blong wok we blad blong Jisas i mekem blong karemaot ol sin blong olgeta man.​—Aesea 53:​4, 5.

Stap Glad Olwe Long Fored Blong Jeova

14, 15. ?Wanem i hapen long taem blong Lafet blong ol Wansaed Haos, mo samting ya i mekem ol man Isrel oli tingbaot wanem?

¹⁴ Afta long Dei blong Stretem Sin, ol man Isrel oli mekem wan narafala lafet bakegen we oli kolem Lafet blong ol Wansaed Haos. Lafet ya i wan taem blong bigfala glad, i bitim ol narafala lafet long kalenda blong ol man Jiu. (Levitikas 23:​34-43) Lafet ya i stat long namba 15 go kasem 21 long manis Etanim. Nao long namba 22 blong manis ya, oli klosem lafet ya wetem wan impoten miting. Miting ya i makem se taem blong karem ol kakae long garen i finis nao, mo i taem blong talem tangkiu long God from we, long gladhat blong hem, hem i givim plante gudfala samting. From risen ya, Jeova i givim oda ya long ol man we oli joen long lafet ya se: “Bambae yufala i mas glad [“olwe,” NW ] from we [Jeova] i stap blesem ol garen blong yufala, wetem ol wok blong yufala.” (Dutronome 16:15) !Hemia wan taem blong bigbigfala glad!

¹⁵ Long taem blong lafet ya, ol man Isrel oli aot long ol haos blong olgeta, oli go stap 7 dei long ol wansaed haos we oli wokem long lif. Hemia i blong mekem oli tingbaot taem ya we oli bin stap long draeples nao oli stap slip long ol wansaed haos. Lafet ya i givim janis long ol man Isrel blong oli tingbaot olsem wanem Jeova i stap lukaotgud long olgeta olsem wan papa we i lukaotgud long ol pikinini blong hem. (Dutronome 8:​15, 16) Long taem ya, evri man, nating se rijman no puaman, be oli slip long ol wansaed haos we oli sem mak nomo. Hemia i mekem oli tingbaot se long taem blong lafet ya i no gat wan man we i hae moa long narawan.​—Nehemaea 8:​14-16.

16. ?Lafet blong ol Wansaed Haos i sado blong wanem samting?

¹⁶ Lafet blong ol Wansaed Haos i wan taem blong karem kakae long garen mo wan taem blong bigfala glad. Hem i wan taem blong selebresen mo hem i olsem sado blong hapi taem ya we God bambae i karem olgeta man we oli bilif long Jisas Kraes oli kam joen wanples. God i stat mekem samting ya long taem blong Pentekos long yia 33 K.T., taem tabu spirit i makemaot 120 disaepol blong Jisas nao oli kam “olsem ol tabu pris blong God.” Olsem ol man Isrel we oli stap long ol wansaed haos blong 7 dei, ol tabu Kristin tu oli save se oli “olsem ol strenja nomo” long rabis wol ya. Yes, olgeta ya oli no blong laef long wol ya, oli blong laef long heven. (1 Pita 2:​5, 11) Wok blong hivimap ol tabu Kristin ya i kasem en blong hem long taem blong “ol las dei,” hemia taem we God i hivimap ol laswan memba blong 144,000.​—2 Timoti 3:​1, NW.

17, 18. (a) ?Wanem i soemaot se i no ol tabu Kristin nomo we bambae oli kasem blesing from sakrefaes blong Jisas? (b) ?Hu tede i stap kasem blesing from Lafet blong ol Wansaed Haos, mo wetaem ful mining blong hapi lafet ya bambae i kamtru?

¹⁷ I gud blong makem se long Lafet blong ol Wansaed Haos ya bifo, oli stap kilim 70 buluk olsem sakrefaes. (Namba 29:​12-34) Namba ya 7 yumi kaontem 10 taem bakegen blong kasem 70. Long Baebol, tufala namba ya 7 mo 10 oli pija blong ol samting long heven mo long wol we oli stretgud olgeta long fes blong God. Taswe sakrefaes blong Jisas bambae i karem blesing i kam long olgeta man blong bilif we oli stap long olgeta 70 famle blong man we oli kamaot long Noa. (Jenesis 10:​1-29) Long taem blong yumi, wok blong pulum ol man oli kam long God i kam bigwan gogo i kasem olgeta neson blong wol. Long olgeta neson ya God i stap hivimap ol man we oli bilif long Jisas mo i givim janis long olgeta blong kasem laef long wan paradaes long wol.

¹⁸ Aposol Jon i luk wan vison we i soemaot taem blong yumi, we i taem blong God blong hivimap ol man oli kam long hem. Fastaem, hem i harem tok we i talem se God i putum mak blong hem long ol laswan memba blong ol 144,000 man. Nao hem i luk “wan bigfala kampani blong man, we i no gat man i save kaontem olgeta” oli stap stanap fored long Jeova mo Jisas, oli “stap holem han blong pamtri.” Olgeta ya oli “pastru long bigfala trabol” blong go long niufala wol. Olgeta ya tu oli stap laef long wol naoia olsem we oli strenja nomo. Tingting blong olgeta i stap long taem ya we bambae “Smol Sipsip ya . . . i lidim olgeta i go long ol springwota blong laef.” Long taem ya ‘bambae God i ravemaot wota long ae blong olgeta.’ (Revelesen 7:​1-10, 14-17, NW ) Ful mining blong Lafet ya blong ol Wansaed Haos bambae i kamtru long en blong Taosen Yia Rul blong Kraes, taem bigfala kampani ya wetem ol gudfala man blong God we oli laef bakegen long ded, oli kasem laef we i no save finis.​—Revelesen 20:5.

19. ?Olsem wanem save long saed blong ol lafet blong ol man Isrel bifo i save givhan long yumi?

¹⁹ Yumi save “glad olwe” sipos yumi tingting dip long mining blong ol lafet ya blong ol man Jiu bifo. I gud tumas blong luk se Jeova i bin yusum ol lafet ya bifo blong soemaot olsem wanem bambae hem i mekem profet tok we hem i talem long garen blong Iden i kamtru. Mo i gud tumas tu blong luk we sloslo ol defdefren haf blong profet tok ya oli stap kamtru. Tede yumi save se Pikinini ya i bon finis mo hem i bin kasem kil ya tu we snek i givim long leg blong hem. Be, naoia Pikinini ya i King finis long heven. Mo tu, bighaf blong ol 144,000 man oli stap tru long God finis gogo kasem we oli ded. ?Wanem samting i stap yet blong mekem? ?Wetaem bambae profet tok ya i kamtru kasem fulmak blong hem? Bambae yumi tokbaot samting ya long nekis stadi.

[Ol Futnot]

?Yu Yu Save Eksplenem?

• ?Smol sipsip ya we ol man oli kakae long lafet blong Pasova, hem i pija blong wanem?

• ?Taem blong hivimap kakae long lafet blong Pentekos, hem i pija blong wanem?

• ?Wanem samting we ol man Isrel oli stap mekem long Dei blong Stretem Sin we i laenap wetem ol blesing blong ransom sakrefaes blong Jisas?

• ?Olsem wanem Lafet blong ol Wansaed Haos i pija blong wok we God i stap mekem blong hivimap ol Kristin?

[Tok blong pija long pej 20]

(Lukluk niuspepa)

↑

50 dei

↓

[Tok blong pija long pej 19]

Blad blong Jisas i save sevem laef blong plante man, olsem blad blong smol sipsip long taem blong Pasova

[Tok blong pija long pej 20]

Fas kakae blong bale we oli givim long Jeova long Nisan 16, hem i pija blong taem we Jisas i laef bakegen long ded

[Tok blong pija long pej 21]

Tufala bred we oli givim long Jeova long lafet blong Pentekos, hem i pija blong kongregesen blong ol tabu Kristin