“Yufala i Mas Lukaot Gud Long Ol Man We God i Givim Long Yufala”
“Yufala i mas lukaot gud long ol man we God i givim long yufala, olsem we man blong lukaot long sipsip i stap lukaot gud long ol sipsip blong hem. Yufala i mas lukaot gud long olgeta, we tingting blong yufala i glad blong mekem, olsem we God i wantem.”—1 PITA 5:2.
1. ?Taem Pita i raetem fas leta blong hem, from wanem hem i leftemap tingting blong ol Kristin blong oli stanap strong?
SAM yia bifo we Nero i agensem ol Kristin long Rom, aposol Pita i raetem fas leta blong hem. Hem i wantem givhan long ol Kristin blong oli stanap strong. Setan i “stap raon” long ol Kristin oltaem, olsem wan laeon we i stap lukaot man blong i kakae. Taswe ol Kristin ‘oli mas lukaot gud’ mo oli mas ‘putum olgeta i stap daon, aninit long han blong God.’ (1 Pita 5:6, 8) Mo tu oli mas joen gud wanples. Oli no mas stap raorao long olgeta, from we sipos oli mekem olsem, bambae oli save spolem fasin fren blong olgeta wetem God.—Gal. 5:15.
2, 3. ?Yumi mas faet agens long hu, mo bambae yumi tokbaot wanem long stadi ya mo long nekis stadi?
2 Tede, yumi kasem semfala trabol. Setan i stap lukaot evri rod blong hem i save spolem yumi. (Rev. 12:12) Mo i no longtaem nao, bambae yumi mas fesem wan “bigfala trabol tumas, we neva man i luk bifo, i stat long taem we God i mekem wol ya.” (Mat. 24:21) Yumi mas mekem olsem ol fas Kristin ya bifo. Yumi mas blokem fasin ya blong stap raorao long yumi. Blong mekem olsem, samtaem yumi nidim ol man we oli bigman long ol Kristin fasin blong oli halpem yumi.
3 Long stadi ya bambae yumi luk olsem wanem ol elda oli save harem gud moa long wok blong olgeta blong lukaot gud long ‘ol man we God i givim long olgeta.’ (1 Pita 5:2) Mo tu bambae yumi tokbaot stret rod blong mekem wok ya blong lukaot long ol man blong God. Long nekis stadi, bambae yumi tokbaot olsem wanem kongregesen i save ‘ona gud long olgeta ya we oli stap wok had mo we oli stap lidim’ ol man blong God. (1 Tes. 5:12) Taem yumi tingting gud long samting ya, bambae yumi save stanap strong agensem bigfala Enemi blong yumi, mo bambae yumi luksave se hem nao we yumi stap faet agens long hem.—Efes. 6:12.
Yufala i Mas Lukaot Gud Long Ol Sipsip Blong God
4, 5. ?Ol elda oli mas tingbaot ol sipsip blong God olsem wanem? Yu save talem wan pijatok blong soemaot samting ya.
4 Pita i talem long ol Kristin elda long taem blong hem se oli mas gat tingting blong God long ol man we God i givim long olgeta. (Ridim 1 Pita 5:1, 2.) Ol Kristin oli luk Pita olsem wan brata we i strong long saed blong spirit long kongregesen. Hem i no tok daonem ol elda, be hem i givim advaes long olgeta. (Gal. 2:9, NW) Tede, Hed Kampani i gat sem tingting olsem Pita. Hem i givim advaes long ol elda long kongregesen blong oli mekem gud wok blong olgeta, blong lukaot gud long ol sipsip blong God. Hemia wan wok we i no isi.
5 Aposol Pita i raetem se ol elda oli mas ol man we oli ‘lukaot gud long ol man we God i givim long olgeta.’ Yes, i impoten we oli luksave se ol sipsip ya oli blong Jehova mo blong pikinini blong hem Jisas Kraes. Ol elda oli mas talemaot long God olsem wanem oli lukaot long ol sipsip blong Hem. Traem tingbaot sipos wan fren blong yu i wantem go spel samples nao i askem long yu blong lukaot long ol pikinini blong hem. Ating bambae yu yu lukaot gud long ol pikinini ya mo yu givim kakae long olgeta. Sipos wan i sik, bambae yu tekem hem i go long hospital. Long sem fasin, ol elda long kongregesen oli ‘mas lukaot long ol man blong God, olsem we man blong lukaot sipsip i stap lukaot long ol sipsip blong hem, from we God i pemaot ol man ya finis long blad blong Pikinini blong hem.’ (Wok 20:28) Oli mas tingbaot se Jehova i pemaot olgeta sipsip blong hem long gudfala blad ya blong Jisas Kraes. Ol elda oli mas talemaot ol fasin blong olgeta long God, taswe oli givim kakae long ol sipsip blong God, oli protektem olgeta, mo oli lukaot gud long olgeta.
6. ?Wanem wok blong ol man blong lukaot long sipsip bifo?
6 Yu traem tingbaot ol wok we ol man blong lukaot long sipsip long taem blong Baebol, oli stap mekem. Long dei, oli mas wok long bigsan, mo long naet, oli mas wok nating se ples i kolkol. (Jen. 31:40) Oli putum laef blong olgeta long denja tu, blong sevem ol sipsip. Deved i wan boe we i stap lukaot long ol sipsip. Hem i faet wetem wan laeon mo wan bea, taem tufala wael anamol ya tufala i kam blong tekemaot sipsip blong hem. Ale, hem i sevem sipsip blong hem. Long saed blong tufala anamol ya wanwan, Deved i talem se hem i stap ‘kasolem anamol ya long nek blong hem, mo i kilim i ded.’ (1 Saml. 17:34, 35) !Wan strong man ya! !Hem i go klosap long maot blong wael anamol wantaem blong tekemaot sipsip blong hem! Yes, hem i mekem evri samting we hem i naf blong mekem blong sevem sipsip blong hem.
7. ?I minim wanem se ol elda oli go pulumaot wan sipsip blong God long maot blong Setan?
7 Setan i olsem wan laeon. Hem i mekem ol strong fasin agens blong pulum ol Kristin blong oli lego Jehova. Taswe tede, ol elda oli mas blokem ol strong fasin agens ya. Be blong mekem olsem, oli mas gat strong tingting blong go pulumaot wan sipsip blong God long maot blong Setan. I min se ol elda oli mas toktok. Sipos wan brata i no luksave, nao i foldaon long wan trap blong Setan, ol elda oli mas toktok wetem hem blong mekem hem i tingting. (Ridim Jud 22, 23.) Taem ol elda oli stap mekem olsem, oltaem oli mas lukluk i go long Jehova blong i givhan long olgeta. Taem wan sipsip i gat kil no i sik long saed blong spirit, ol elda oli keagud long hem. Oli yusum Tok blong God blong mekem man i kam gud bakegen, olsem we man blong lukaot sipsip i putum meresin mo i fasem soa blong sipsip blong hem.
8. ?Ol elda oli lidim ol sipsip blong God oli go wea, mo oli mekem samting ya olsem wanem?
8 Wan man blong lukaot long sipsip i lidim ol sipsip oli go kakae long ples we i gat gudfala gras long hem, mo oli go dring long ples we i gat inaf wota long hem. Long sem fasin, ol elda oli mas lidim ol sipsip blong God oli kam long kongregesen, oli mas pulum ol sipsip ya blong kam oltaem long ol miting. Olsem nao, bambae oli save kakae gud ol kakae ya we oli kamaot long “stret taem.” (Mat. 24:45) Maet ol elda oli mas spenem sam moa taem wetem olgeta we oli sik long saed blong spirit, blong pulum olgeta blong oli wantem tekem ol kakae we oli kamaot long Tok blong God. Maet wan sipsip blong God we i lus, i traem blong joen bakegen long ol narafala sipsip. Ale, ol elda oli no mas mekem hem i fraet. Be wetem kaen fasin, oli mas eksplenem ol stamba rul blong Baebol long hem mo oli mas soemaot long hem, olsem wanem hem i save mekem ol advaes ya oli wok long laef blong hem.
9, 10. ?Ol elda oli mekem olsem wanem blong soemaot se oli tingbaot ol Kristin we oli sik long saed blong spirit?
9 Taem yu sik, ?yu yu laekem weswan dokta? ?Hemia we i no lesin tumas long yu, be i kwik blong talem weswan meresin bambae yu yu tekem? Nogat. Ating yu laekem moa dokta we i lesingud taem yu stap toktok, mo biaen hem i talem wanem sik blong yu, mo i talem tu ol tritmen we oli save givhan long yu.
10 Long sem fasin, ol elda oli save lesingud long ol Kristin we oli sik long saed blong spirit mo oli save halpem olgeta blong oli oraet bakegen. I olsem we ol elda oli ‘kafsaedem oel i go long olgeta long nem blong Jehova.’ (Ridim Jemes 5:14, 15.) Tok blong God i olsem meresin ya blong Gilead. Hem i save mekem olgeta we oli sik, oli kamgud bakegen. (Jer. 8:22; Esik. 34:16, NW) Sipos wan Kristin i mekem ol advaes blong Baebol oli wok long laef blong hem, bambae hem i save mekem ol desisen bakegen we oli halpem hem blong gohed blong mekem wok blong Jehova. Yes, taem ol elda oli lesin long tingting blong ol sipsip blong God we oli sik mo oli prea wetem olgeta, samting ya i mekem i gud tumas long olgeta ya.
Tingting Blong Yufala i Mas Glad Blong Mekem Wok Ya
11. ?Wanem i pulum ol elda blong oli glad blong lukaot long ol sipsip blong God?
11 Ale, Pita i mekem ol elda oli tingbaot bakegen se taem oli stap lukaot long ol sipsip blong God, i gat sam samting we oli mas mekem mo sam samting we oli no mas mekem tu. Ol elda oli mas lukaot long ol sipsip blong God, “we tingting blong olgeta i glad blong mekem.” ?Wanem i pulum ol elda blong glad nomo blong halpem ol Kristin brata sista blong olgeta? ?Wanem i pulum Pita blong lukaot gud long ol sipsip blong Jisas? Stamba samting we i pulum hem blong mekem olsem hemia lav we hem i gat long Jisas. (Jon 21:15-17) Ol elda tu oli lavem Jisas, taswe oli “no moa laef blong mekem ol wok blong olgeta nomo. . . . Oli laef blong mekem ol wok blong hem, we hem i ded, . . . blong i sevem olgeta.” (2 Kor. 5:14, 15) Antap long lav ya we oli gat long Jisas, ol elda oli lavem God mo oli lavem ol Kristin brata sista. Fasin ya nao i pulum ol elda blong yusum paoa blong olgeta, taem blong olgeta, mo ol samting we oli gat blong givhan long ol sipsip blong God. (Mat. 22:37-39) Ol elda oli glad blong mekem i gud long ol sipsip.
12. ?Pol i mekem i gud long narafala go kasem wanem mak?
12 ?Be ol elda oli glad blong mekem i gud long ol sipsip kasem wanem mak? Taem oli lukaot gud long ol sipsip, oli stap folem eksampol blong aposol Pol, olsem we Pol tu i folem eksampol blong Jisas. (1 Kor. 11:1) Pol mo ol fren blong hem oli lavem tumas ol brata long Tesalonaeka. From samting ya, oli ‘no tingbaot blong talemaot gud nius nomo long olgeta be oli rere tu blong lego laef blong olgeta.’ Taem oli stap givhan long ol brata ya, oli mekem i isi long olgeta “olsem wan mama we i stap lukaot long ol pikinini blong hem.” (1 Tes. 2:7, 8) Pol i save wanem fasin we wan mama i mekem long pikinini blong hem. Mama bambae i mekem evri samting blong givhan long pikinini blong hem, maet hem i mas girap long medel naet blong fidim pikinini blong hem.
13. ?Ol elda oli mas skelem gud wanem samting?
13 Ol elda oli mas skelemgud wok we oli gat blong lukaot long ol sipsip blong God mo ol wok blong olgeta insaed long famle. (1 Tim. 5:8) Wan elda we i spenem plante taem blong givhan long ol narafala long kongregesen, i stap yusum taem we maet hem i save spenem wetem famle blong hem. Wan rod we hem i save skelemgud ol wok blong hem, hemia blong askem samfala long kongregesen blong oli kam joen wetem hem mo famle blong hem long naet blong Famle Wosip. Wan elda long Japan, we nem blong hem Masanao, i stap singaot ol brata sista we oli no mared mo olgeta we papa blong olgeta i no stap long trutok, blong oli kam joen wetem hem mo famle blong hem blong mekem famle stadi. Hem i mekem samting ya blong plante yia. Naoia, sam long olgeta brata ya oli kam ol elda mo oli folem gudfala eksampol blong Masanao.
Yufala i Mas Sakemaot Tingting Blong Wantem Kasem Pei Mo Yufala i Mas Wantem Tumas Blong Mekem Wok Ya
14, 15. ?From wanem ol elda oli mas lukaot gud long tingting ya blong wantem “kasem pei”? ?Oli save folem eksampol blong Pol olsem wanem?
14 Pita i talem long ol elda se taem oli stap mekem wok ya blong lukaot long ol sipsip blong God, ‘i nogud oli mekem blong kasem pei be oli mas mekem from we oli glad long hem.’ Long sam narafala Baebol, tok ya oli “glad long hem,” oli tanem i kam ‘oli wantem tumas blong mekem wok ya.’ Ol elda oli spenem plante taem blong mekem ol wok blong olgeta. Nating se i olsem, oli no gat tingting ya se oli mas kasem pei from ol wok blong olgeta. Pita i luksave se hem i mas givim woning long ol elda blong oli luksave trap we i stap, hemia blong wantem “kasem pei” from wok we oli mekem blong lukaot long ol sipsip blong God. Ol lida blong Bigfala “Babilon,” oli foldaon long trap ya finis. Yumi luksave samting ya from we laef blong ol lida ya i fulap long plante rij samting, be plante long ol man blong olgeta, oli pua nomo. (Rev. 18:2, 3) Ol elda tede oli mas lukaot gud blong no foldaon long trap ya.
15 Pol i soemaot wan gudfala eksampol long ol Kristin elda. Nating se hem i wan aposol, be hem i no wantem mekem i hevi tumas long ol Kristin long Tesalonaeka. Hem i no askem blong oli givim kakae long hem we hem “i no pem.” Defren olgeta, hem ‘i stap wok long dei mo long naet.’ (2 Tes. 3:8) Tede tu, plante seket mo distrik elda oli soemaot wan gudfala eksampol long saed ya. Taem ol elda ya oli go stap wetem ol brata mo sista we oli singaot olgeta blong kam stap long haos blong olgeta, ol elda ya oli no ‘wantem mekem ol brata sista ya oli trabol.’—1 Tes. 2:9.
16. ?I minim wanem se ol elda oli mas ‘wantem tumas’ blong mekem wok blong lukaot long ol sipsip blong God?
16 Ol elda oli lukaot long ol sipsip blong God from we oli ‘wantem tumas’ blong mekem olsem. Yumi luksave se ol elda oli wantem tumas blong mekem wok blong olgeta from we oli lego samting we olgeta nomo oli wantem, blong givhan long ol sipsip blong God. Be hemia i no min se oli mekem i strong long ol sipsip blong oli wosipim Jehova, nogat. Mo i no minim tu se oli pulum ol Kristin blong oli mekem wok blong God wetem tingting ya blong traem winim ol narafala. (Gal. 5:26) Ol elda oli luksave se evri sipsip blong Jehova i gat prapa fasin blong hem we i mekem hem i defren long narawan. Ol elda oli wantem tumas blong halpem ol brata blong olgeta blong oli mekem wok blong Jehova we oli glad.
Yufala i No Mas Kam Bigfala Masta, Be Yufala i Mas Soemaot Ol Stret Fasin Blong Ol Sipsip Oli Save Folem
17, 18. (a) ?From wanem samtaem ol aposol oli faenem i had blong folem tijing blong Jisas long saed blong tingting daon? (b) ?Yumi lanem wanem long fasin blong olgeta?
17 Olsem yumi talem finis, ol elda oli mas tingbaot se oli stap lukaot long ol sipsip blong God, i no ol sipsip blong olgeta. Oli mas lukaot gud se oli no ‘kam olsem bigfala masta blong olgeta ya we God i putum long han blong olgeta.’ (Ridim 1 Pita 5:3.) Samtaem, ol aposol blong Jisas oli wantem mekem moa wok, be tingting we i pulum olgeta blong mekem olsem, i no stret. Oli gat fasin olsem ol man blong ol narafala kantri we oli wantem kam hae moa long ol narafala.—Ridim Mak 10:42-45.
18 Tede, ol brata we oli “wantem mekem wok blong elda long kongregesen” oli mas tingting gud fastaem se from wanem nao oli wantem mekem wok ya. (1 Tim. 3:1, NW) Ol brata we oli ol elda finis, oli no mas giaman long olgeta wan, be oli mas tingbaot sipos oli no stap mekem wok ya from we oli wantem kam hae moa long ol narafala no oli wantem bos long ol narafala, olsem sam long ol aposol oli mekem. Sipos ol aposol bifo oli mas faet strong agensem tingting ya blong wantem kam bos long narafala, ale ol elda tede tu, oli mas wok had blong blokem tingting ya blong wol blong wantem kam bos blong ol narafala.
19. ?Ol elda oli mas tingbaot wanem taem oli tekem aksen blong protektem wan sipsip?
19 I tru se ol elda oli mas strong blong protektem ol man blong God, sem mak olsem wan man blong lukaot long sipsip i protektem ol sipsip blong hem long ol “wael dog.” (Wok 20:28-30) Pol i talem long Taetas blong i ‘yusum paoa we hem i gat from hae nem blong hem blong leftemap tingting mo blong tok’ long ol Kristin. (Taet. 2:15) Be taem ol elda oli tekem aksen blong protektem wan Kristin, oli mas gat respek long Kristin ya. Ol elda oli luksave se sipos oli talem ol tok we i blong faenem poen no blong daonem wan Kristin we i mekem rong, samting ya i no save givhan long Kristin ya. Defren olgeta, sipos oli toktok gud blong pulum tingting blong Kristin ya we i mekem rong, bambae hem i kambak long stret rod.
20. ?Ol elda oli save folem fasin blong Jisas olsem wanem, blong soemaot eksampol long ol sipsip?
20 Gudfala eksampol blong Jisas i pulum ol elda blong lavem ol sipsip blong God. (Jon 13:12-15) Yumi harem gud taem yumi ridim stori blong ol disaepol blong Jisas, taem Jisas i tijim olgeta long wok blong prij mo long wok blong pulum ol man oli kam disaepol. Tingting daon we Jisas i soemaot long ol disaepol blong hem, i tajem hat blong olgeta, nao i pulum olgeta blong folem fasin blong Jisas hemia blong mekem ‘tingting blong olgeta i stap daon mo blong luk ol narafala olsem we oli gud moa long olgeta.’ (Fil. 2:3) Ol elda tede, oli folem gudfala eksampol blong Jisas, nao olgeta tu, oli wantem soemaot stret fasin blong ol man oli save folem.
21. ?Ol elda oli save tingbaot wanem blesing long fiuja?
21 Blong finisim toktok blong hem long ol elda, Pita i tokbaot wan promes long saed blong fiuja. (Ridim 1 Pita 5:4.) Ol brata we tabu spirit i makemaot olgeta mo we oli elda, bambae oli ‘kasem hae nem we i no save lus samtaem’ wetem Kraes long heven. Ol elda we oli blong ol “narafala sipsip” bambae oli gat janis blong lukaot long ol sipsip blong God long wol ya aninit long rul blong “Nambawan Man blong Lukaot long Sipsip.” (Jon 10:16) Long nekis stadi bambae yumi tokbaot ol rod we ol memba blong kongregesen oli save folem blong sapotem olgeta we oli stap lidim yumi.
Tingtingbak
• ?From wanem i stret we Pita i givim advaes long ol elda, blong oli lukaot gud long ol sipsip we God i givim long olgeta?
• ?Ol elda oli save mekem wanem blong givhan long ol Kristin we oli sik long saed blong spirit?
• ?Wanem i mas pulum ol elda blong lukaot gud long ol sipsip we God i givim long olgeta?
[Tok blong pija long pej 25]
Ol elda tede, oli mas protektem “ol sipsip” we God i putum long han blong olgeta, sem mak olsem wan man blong lukaot sipsip i mekem