Amagedon—Stat Blong Wan Hapi Taem

TOK ya “Amagedon” i kamaot long tok ya long lanwis Hibru se “Har–Magedon,” no “Hil blong Megido.” Yumi faenem tok ya long Revelesen 16:16 we i talem se: “Oli kam wanples long ples ya we long lanwis blong ol laen blong Isrel nem blong hem ‘Amagedon.’ ” ?Hu i kam wanples long Amagedon, mo from wanem? Long Revelesen 16:​14, yumi ridim se: “Ol king blong evri ples long wol” oli kam wanples, “blong oli mekem faet long bigfala Dei blong God ya we i gat olgeta paoa.” Ol vas ya oli mekem man i tingbaot sam kwestin we i pulum intres blong hem. ?Bambae ol “king” ya oli faet weples? ?Wanem i mekem se ol king ya oli faet mo bambae oli faet wetem hu? ?Bambae ol king ya oli yusum ol tul blong faet we oli denja tumas, olsem tingting we plante man oli gat tede? ?Bambae i gat sam man we oli laef tru long Amagedon? Letem Baebol i givim ansa long ol kwestin ya.

?Olsem wanem? ?Taem Baebol i tokbaot “Hil blong Megido,” hem i wantem minim se Amagedon bambae i wan faet we i stap long wan hil long Medel Is? No, i no minim olsem from we i no gat wan hil long Megido. Long ples we Megido i stap bifo, i gat wan smol hil nomo we i hae olsem 20 meta antap long flat ples we i stap raonabaot long hem. Mo tu, ol ples klosap long Megido i smol tumas blong evri “king blong wol wetem ol soldia blong olgeta” oli save hivap long hem. (Revelesen 19:19) I tru se long histri blong Medel Is, Megido nao i ples we i bin gat sam bigbigfala mo strongfala faet. Taswe, nem ya Amagedon i olsem pija blong wan strongfala faet, mo i klia se hu man ya we bambae i win long faet ya.​—Lukluk bokis ya “Megido​—Wan Stret Pija” long pej 5.

Amagedon i no wan faet bitwin ol neson blong wol nomo, from we Revelesen 16:14 i talem se “ol king blong evri ples long wol” oli joen wanples long “bigfala Dei blong God ya we i gat olgeta paoa.” Jeremaea i talem long profet tok blong hem se “ol dedbodi blong ol man ya we mi [Jeova] bambae mi kilim olgeta” bambae oli stap olbaot long graon, bambae oli “finisim olgeta ples long wol.” (Jeremaea 25:33) Taswe, Amagedon i no wan faet blong ol man we bambae i stap long wan stret ples long Medel Is. Hem i faet blong Jeova we bambae i stap long fulwol.

I gud blong makem tu se Revelesen 16:16 i tokbaot Amagedon olsem wan “ples.” Long Baebol, wan “ples” i save minim wan samting we i mas hapen. Long saed blong Amagedon, samting we i hapen hemia se fulwol bambae i joen tugeta blong agensem Jeova. (Revelesen 12:​6, 14) Long Amagedon, olgeta neson blong wol bambae oli joen tugeta agensem “ol soldia blong heven” we oli stap aninit long lida blong olgeta, Jisas Kraes, we hem i “King blong olgeta king, mo Masta blong olgeta masta.”​—Revelesen 19:​14, 16.

?Olsem wanem long tingting ya se Amagedon i wan faet we bambae ol man oli yusum ol tul blong faet we oli denja tumas, no tingting ya se wan planet bambae i foldaon i kam spolemgud wol? ?God we i gat lav i save letem wan rabis samting olsem i hapen blong finisim olgeta man mo ples blong olgeta tu, hemia wol? Nogat. God i talemaot klia se hem i no wokem wol ya blong i “ples nating nomo” be “blong man i save stap long hem.” (Aesea 45:18; Ol Sam 96:10) Long Amagedon, Jeova bambae i no mekem wan bigfala faea blong bonem mo spolem wol blong yumi. Defren olgeta, Hem bambae i “spolem ol man ya we oli stap spolem wol.”​—Revelesen 11:18.

Amagedon​—?Wetaem?

Blong plante handred yia finis, i gat wan kwestin i stap we ol man oli traem givim ansa blong hem. Kwestin ya hemia se, ?Wetaem Amagedon bambae i kam? I gud blong stadi buk blong Revelesen wetem help we sam narafala haf blong Baebol oli givim. Stadi ya i save halpem yumi blong luksave wanem we Baebol i talem long saed blong taem blong faet ya we i impoten tumas. Revelesen 16:15 i joenem tok ya Amagedon wetem taem we Jisas bambae i kamtru olsem wan stilman. Jisas i yusum pijatok ya tu blong tokbaot taem we hem bambae i kam blong jajem rabis wol ya.​—Matiu 24:​43, 44; 1 Tesalonaeka 5:2.

Ol profet tok blong Baebol we oli kamtru finis oli soem se stat long 1914, yumi stap laef long ol las dei blong fasin blong wol ya.a Jisas i kolem taem ya we bambae i makem en blong ol las dei se ‘taem blong bigfala trabol tumas.’ Baebol i no talem se taem ya bambae i longfala olsem wanem, be hem i talem nomo se ol trabol we i kamaot long taem ya, bambae i moa nogud i bitim ol samting we man i luk bifo. Bigfala trabol ya bambae i finis wetem Amagedon.​—Matiu 24:​21, 29.

From we Amagedon i ‘faet blong bigfala Dei blong God ya we i gat olgeta paoa,’ i no gat wan samting we ol man oli save mekem blong seftem dei ya i go longwe moa. Jeova i putum wan “stret taem” blong statem faet ya. “Hem i no save let.”​—Habakuk 2:​3, NW.

God Blong Stret Fasin i Mekem Faet We i Stret

?Be, from wanem God bambae i mekem wan faet long ful wol? Amagedon i laenap gud wetem wan long ol stamba fasin blong Hem, hemia stret fasin. Baebol i talem se: “[Jeova] i laekem ol fasin we i stret.” (Ol Sam 37:28) Hem i stap lukluk olgeta rabis fasin we i stap hapen long laef blong ol man. I klia se hem i no laekem nating ol fasin ya. Taswe, hem i putumap Pikinini blong hem blong mekem wan faet we i stret blong finisim olgeta rabis fasin blong wol ya.

Jeova nomo i naf blong mekem wan faet we i stret mo we bambae i spolem ol man nogud. Be bambae hem i letem ol stret man oli laef i stap long wol ya. (Matiu 24:​40, 41; Revelesen 7:​9, 10, 13, 14) Mo Jeova nomo i gat raet blong rul antap long wol ya from we hem nao i wokem wol ya.​—Revelesen 4:11.

?Jeova bambae i yusum wanem blong faet agensem ol enemi blong hem? Yumi no save ansa blong kwestin ya. Yumi save nomo se hem i save yusum plante defren samting blong spolemgud ol rabis man. (Job 38:​22, 23; Sefanaea 1:​15-18) Be, ol man blong God long wol ya bambae oli no joen long faet ya. Vison long Revelesen japta 19 i soem se ol ami blong Jeova long heven nomo bambae oli joen wetem Jisas Kraes blong mekem faet ya. I no gat wan long ol man blong Jeova long wol ya we bambae i joen long faet ya.​—2 Kronikel 20:​15, 17.

God We i Waes i Givim Woning

?Olsem wanem long olgeta we bambae oli pastru long Amagedon? Yes, i no nid we ol man oli ded long Amagedon. Aposol Pita i talem se: “[Jeova] i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Mo aposol Pol i talem se God “i wantem sevem olgeta man, mo i wantem we olgeta man bambae oli save trutok blong hem.”​—1 Timoti 2:4.

Blong mekem se man i save stap sef, Jeova i yusum wan rod we i waes. Hem i lukaotgud se ol man blong hem oli talemaot “gud nius ya, se God i King blong olgeta man” long olgeta ples long wol mo long plante defdefren lanwis. Olgeta man blong evri ples oli gat janis ya blong laef tru long Amagedon mo stap sef. (Matiu 24:14; Ol Sam 37:34; Filipae 2:12) Olgeta we oli lesin long gud nius ya, oli save laef tru long Amagedon mo gat wan laef we i stret gud olgeta blong olwe long paradaes long wol. (Esikel 18:​23, 32; Sefanaea 2:3; Rom 10:13) ?From we God hem i lav, i stret blong ting se bambae hem i mekem samting olsem?​—1 Jon 4:8.

?God We i Gat Lav i Save Mekem Faet?

Be, plante man oli talem se: ?From wanem God we i lavem man tumas i save kilim i ded mo spolemgud plante man olsem? Traem tingbaot wan haos we i gat fulap rat insaed long hem mo ol rat ya oli save givim sik long man. Ating bambae yu agri se man blong haos i mas kilim no mekem wan samting blong finisim ol rat ya blong oli no spolem famle blong hem.

Sem mak long Jeova. Jeova i laekem tumas ol man taswe hem i mas mekem faet blong Amagedon. Stamba tingting blong God i blong mekem wol ya i kam wan paradaes mo mekem ol man oli kam stretgud olgeta blong oli save stap long pis, we “i no moa gat man blong mekem olgeta oli fraet.” (Maeka 4:​3, 4; Revelesen 21:4) ?God bambae i mekem wanem long ol man we oli stap spolem pis mo seftaem blong ol narafala man? God i mas finisim olgeta olsem man blong haos i finisim ol rat blong lukaotgud long ol famle blong hem hemia ol stret man.​—2 Tesalonaeka 1:​8, 9; Revelesen 21:8.

Tede bighaf blong ol faet mo ol man we oli ded i kamaot from rul blong man we i no stret mo fasin ya we wanwan kantri i mekem samting we i gud long olgeta nomo. (Prija 8:9) Taem ol gavman blong wol oli stap lukaot rod blong kasem moa paoa, oli sakemaot Kingdom blong God we i stanap finis. I no gat wan samting we i soem se bambae oli lego rul blong olgeta blong letem God mo Kraes tufala i rul. (Ol Sam 2:​1-9) Ol gavman ya oli mas finis olgeta blong openem rod long Kingdom blong Jeova we i stretgud olgeta mo we Kraes i king blong hem. (Daniel 2:44) Jeova i mas mekem faet blong Amagedon blong stretem blong olwe kwestin ya se hu i gat raet blong rulum heven mo wol.

Samting we Jeova bambae i mekem long Amagedon i blong mekem i gud long ol man. From we laef long wol ya i stap kam nogud olgeta, stretfala rul blong God nomo bambae i givim olgeta samting we ol man oli nidim. Tru long Kingdom blong Hem nomo bambae ol man oli haremgud long pis mo oli gat plante samting. ?Laef blong wol bambae i olsem wanem sipos God i no tekem wan aksen nating? ?Yu no ting se fasin agens, raf fasin, mo faet, bambae oli gohed nomo blong spolem ol man we oli laef aninit long rul blong man? Si, taswe faet blong Amagedon i wan nambawan samting we i save mekem i gud long yumi.​—Luk 18:​7, 8; 2 Pita 3:13.

Wan Faet Blong Finisim Olgeta Faet

Amagedon bambae i mekem wan samting we ol narafala faet oli neva mekem bifo, hemia blong finisim olgeta faet. Yumi evriwan i wantem tumas blong luk wan taem we olgeta faet oli finis. Be ol traehad we ol man oli mekem blong traem finisim ol faet i no karem gudfala frut nating. Ol traehad ya we i no karem gudfala frut nating i makem trutok we Jeremaea i raetem se: “[Jeova]. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jeremaea 10:23) Long saed blong samting we Jeova bambae i mekem, Baebol i promes se: “Hem i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”​—Ol Sam 46:​8, 9.

!Taem ol neson oli stap yusum ol tul blong faet blong kilim i ded ol man mo blong spolem wol, Man ya we i wokem wol bambae i tekem aksen​—long Amagedon ya we Baebol i tokbaot! (Revelesen 11:18) Faet ya bambae i mekem ol samting we ol man we oli onagud long God oli wantem longtaem finis i kam. Faet ya bambae i pruvum raet we Man ya we i bos long wol, Jeova God, i gat blong rul antap long olgeta samting we Hem i wokem.

Taswe, Amagedon i no wan taem blong fraet blong olgeta we oli lavem stret fasin. Defren olgeta, Amagedon i givim hop long yumi. Faet blong Amagedon bambae i finisim olgeta kruked fasin mo nogud fasin we i stap long wol, mo bambae i openem rod blong wan niufala wol we i stretgud olgeta aninit long Kingdom blong God we Mesaea i rul long hem. (Aesea 11:​4, 5) Amagedon i no wan faet blong spolemgud wol ya be bambae hem i makem stat blong wan hapi taem blong ol man we oli stret mo we oli wantem laef foreva long paradaes long wol.​—Ol Sam 37:29.

[Futnot]

[Bokis/Foto blong pija long pej 5]

MEGIDO​—WAN STRET PIJA

Megido bifo i stap long wan gudfala ples we i lukluk i godaon long wes saed blong gudfala graon blong Vali blong Jisrehel, we i stap long not blong Isrel. Megido i wan taon we ol ami oli pastru long hem mo we ol bisnesman blong ol defren kantri oli kam long hem blong pem mo salem ol samting. Taswe, Megido i kam wan ples blong ol strongfala faet. Profesa Graham Davies i raetem long buk blong hem Cities of the Biblical World​—Megiddo se: “I isi nomo blong ol tredaman mo ol man blong olgeta kantri oli kasem . . . taon blong Megido. Be taem ol strongfala man oli holem taon ya, oli save kontrolem bisnes blong ol tredaman mo ol faet. Hemia from we oli save blokem ol rod ya we oli pastru long ples ya. Taswe yumi no sapraes we taon ya i olsem wan . . . gudfala praes we ol man oli faet blong winim, mo taem oli holem taon ya oli faet strong blong protektem.”

Bitim 3,500 yia bifo, King Thutmose 3 blong Ijip i winim king blong Kenan long Megido, mo long taem ya nao longfala histri blong Megido i stat. Histri blong Megido i gohed long ol handred yia we oli pas i kam kasem 1918, taem Edmund Allenby, Komanda blong ami blong Briten, i spolem gud ol ami blong Turkey. Long Megido, God i givim paoa long Jaj Barak blong spolem gud King Jabin blong Kenan. (Jajes 4:​12-24; 5:​19, 20) Long Megido bakegen, Jaj Gideon i winim ol man Midian. (Jajes 7:​1-22) Mo bakegen, King Ahasia mo Josaea tufala i ded long semfala ples ya.​—2 King 9:27; 23:​29, 30.

Taswe, i stret nomo we yumi joenem Amagedon wetem ples ya Megido, from we long Megido i bin gat plante strongfala faet. Hem i wan stret pija blong taem ya we God bambae i winim fulwan olgeta man we oli agensem Hem.

[Credit Line]

Pictorial Archive (Near Eastern History) Est.

[Tok blong pija long pej 7]

Raon long wol, ol man oli stap kasem woning mo janis blong laef tru long Amagedon

[Tok blong pija long pej 7]

Amagedon bambae i makem stat blong wan hapi taem