HIKÉCO 3

Mahikéco ma Benebene ma Bibiliya Mamone’ile Lùnge Biléhé?

Ng’ando ya balùmyana babele mùhikéla Bibiliya ùbalé’a mwa’a wa 1870 na ikéléléla — Bahikécibwa ba Bibiliya, ibalé’a mwa’a wa 1870 na ikéléléla

Mlùmyana hùlé mùsoma gazeti lya lùbalé’o lya Munara wa Mulinzi — Gazeti lya ùbalé’a lya *Munara wa Mulinzi,* 1879

Mmacana hùlé na magazeti Munara wa Mulinzi na Amuka! — Gazeti *Munara wa Mulinzi* lùno lusuku

Bibiliya yatenjile ù mbele nibo hanuma na lu’u lwa Kélésitù, bahikéca ba bùpé i bahuma mwingi na Bakélésitù ba lùbalé’o nabo bùsonya manga mahikéco ma benebene ma Bibiliya. (Mi’ambo 20:29, 30) Ikambo lélyo lyahùlùcelela benebene ité bilya byatenjilwe na Bibiliya. Bahikéca babo ba bùpé bahùlùsambya mahikéco ma Yesù na malénga ma bapakano, na bibyo Bùkélésitù bwa bùpé bùnabalé’a. (2 Timoteo 4:3, 4) Tùnabasha imanya benebene biléhé nibo lùno lusuku tùlé na bùmanyé’éca bwangéne bwa mahikéco ma benebene ma Bibiliya?

Ékyanga ’ya Yehofa ’yahùcile imone’ya bwaasé benebene ya Bibiliya. Yehofa atenjile ù mbele nibo m’m ékyanga ’ya éshi’a ’ya ésé, ma’enda ma imanyé’éca bishibe i maba manga.’ (Ndanyele 12:4) M mwa’a wa 1870 ng’ando yaniha ya batù babele mùlonda benebene ya Bibiliya bamanyinye nibo mahikéco ma malanda manga hange dini mahùsana na Bibiliya. Shi’éta, babo batù babele mùlonda benebene ya Bibiliya babalé’ile ihikéla mahikéco ma ale ma Bibiliya, na Yehofa anaba’watéléca iba na bwenge bwa salango ca Abeca.

Bahikécile benebene ya Bibiliya na mtéma hose. Babo Bahikécibwa ba Bibiliya babele na éhinyinya na babalé’ile ihikéla Bibiliya ù mbele netù, ba’ihanganine icanga ngyéla ya ihikéla Bibiliya ité hélya étùlé mùcanga lùno lusuku. Babele mùbalé’a ihikéla mcwe wa ikambo ù mcwe wa ikambo. Hanuma, anga basangana na mcinji wakùma manga imanya, babele mùlonda hénge micinji ya Bibiliya étondobole hùkyo mcinji wakùma imanya. Ù éshi’a, babele mùlonda hénge micinji ya Bibiliya yahunganwa na hékyo, na hanuma basalangile micinji hékyo yose. Bibyo, bale’ile Bibiliya heyo yobene y’itondobole. Ihikéla Bibiliya ù hékyo ngyéla, babisùcile benebene ya Bibiliya ùbanda na cina lya Abeca na bwake Bwami, wake mmémbé na make malénga ùbanda na balangamsenge na ésé, ba’u balé biléhé, na bwise’elelo bwa icùla ba’u. Ilonda-londa misahù yose hékyo m Bibiliya ’wahùlùba’watéleca ile’a mahikéco na ngolobelo ca bùpé.—Yohana 8:31, 32.

Ibalé’a mwa’a wa 1879 Bahikécibwa ba Bibiliya bamanyinye nibo ékyanga ’yabele ’yahùla nibo basahùléle bwasébwasé banyabilongo mahikéco ma benebene ma Bibiliya. Bibyo, m mwa’a hùkyo hùkyo, babalé’ile isalanga na ifyatùla gazeti lélé mùbocibwa lùno lusuku Munara wa Mulinzi Unaotangaza Ufalme wa Yehova (Lùhéngo lwa Mlénda Lùlé Mùsahùla Bwami bwa Yehofa). Lùno lusuku tùlé mùhikéca batù mahikéco ma benebene ma Bibiliya m bisé 240 na m tùtendeci twahétana 750. Ma’enda ma benebene ma Bibiliya malé manga lùno lusuku iheta suku cùnuma!

Hanuma na lu’u lwa Kélésitù, mahikéco ma benebene ma Bibiliya maciminine biléhé?
Étù beni ’yahùlùtù’watéleca imona lùnge benebene ya Ikambo lya Abeca?