Ester

3 Kenca si e, naik pangkat Haman iban Raja Ahasweros,+ janah pangkatna si meganjangna asangken kerina pejabat si deban.+ Haman e anak Hamedata, kalak Agak.+ 2 Enggo perentahken raja man kerina pelayanna si lit bas gerbang istana, gelah hamati kalak e Haman alu cara sujud. Tapi Mordekai la nggit sujud. 3 Emaka, nungkun pelayan-pelayan raja si lit bas gerbang istana man Mordekai, “Engkai la patuhindu perentah raja?” 4 E me tiap wari si sungkuni kalak e man Mordekai, tapi la begiken Mordekai cakap kalak e. Emaka laporken kalak e perbahanen Mordekai man Haman, guna meteh kai si arus ilakoken man Mordekai,+ sebap enggo kataken Mordekai man kalak e maka ia kalak Jahudi.+

5 Merawa kel Haman sanga idahna la nggit Mordekai sujud man bana.+ 6 Apai ka kenca teh Haman maka Mordekai e kalak Jahudi, la akapna puas adi Mordekai saja ngenca si bunuhna. Emaka usahakenna gelah kerina kalak Jahudi pe ibunuh, kerina si sada bangsa ras Mordekai bas daerah si kuasai Ahasweros.

7 Bas tahun si pe-12-ken+ pemerentahen Raja Ahasweros, bas bulan si pertama, eme bulan Nisan,* suruh Haman kalak erban Pur+ (maksudna undi) i lebe-lebena, guna meteh wari ras bulan si apai si cocok ngelakoken rencanana e. Emaka ndabuh undi e bas bulan si pe-12-ken eme bulan Adar.*+ 8 Jenari nina Haman man Raja Ahasweros, “O Raja, arah kerina bangsa-bangsa si lit bas kerina propinsi si kuasaindu,+ lit tading i tengah-tengah kalak e+ sada bangsa si undang-undangna la seri ras bangsa si deban. Kalak e la nggit patuh man undang-undangndu. Adi pediatndu kalak e rate-ate, rugi me kam Raja. 9 Emaka, adi cocok akapndu o Raja, banlah surat perentah gelah kerina kalak e ibunuh. Nggit aku mereken 342 ton* pirak man pegawai-pegawai gelah tamakenna ku bas kas kerajan.”*

10 Emaka, lepasken raja cincin stempel+ bas jari-jarina nari, jenari berekenna man Haman,+ anak Hamedata, kalak Agak.+ Ia me musuh kalak Jahudi. 11 Nina raja man Haman, “Lakokenlah kai si atendu lakokenndu man bangsa e bage pe man pirak e, perban kerina enggo kuserahken man bandu.” 12 Bas wari si pe-13-ken bas bulan si pertama, ilebuh me sekertaris-sekertaris raja.+ Kerina si perentahken Haman, tulisken kalak e+ bas bahasa ras tulisen si pake tiap bangsa bas tiap daerahna. Kenca si e, ikirimken me surat-surat e man kepala-kepala gubernur, man kerina gubernur si lit bas tiap propinsi, bage pe man pejabat-pejabat si lit bas erbage-bage bangsa. Kerina surat e itulisken bas gelar Raja Ahasweros, janah isahken alu cincin stempel raja.+

13 Surat-surat e ikirimken ku kerina propinsi si ikuasai raja arah kalak si dahinna mpeseh berita. Isi surat e eme perentah guna munuh janah engkernepken kerina kalak Jahudi, la soal nguda denga ntah enggo metua, anak-anak ntah pe diberu. Kerina erta kalak e pe arus ibuati.+ Si e arus ilakoken bas sada wari, bas wari pe-13-ken, arah bulan si pe-12-ken, eme bulan Adar.+ 14 Surat e arus jadi undang-undang bas tiap propinsi janah iumumken man kerina bangsa, gelah kerinana enggo ersikap bas wari si enggo itetapken e. 15 Perban perentah raja e, minter lawes kerina si dahinna mpeseh berita e.+ Undang-undang e pe iumumken bas Istana Susan.+ Kenca si e, kundul raja ras Haman janahna minem anggur. Tapi guntar kalak si lit bas Kota Susan.