Markus

14 Paskah+ ras Perayan Roti si La Itama Ragi+ dua wari nari.+ Imam-imam kepala ras ahli-ahli Undang-Undang Musa ndarami cara guna nangkap Jesus alu cara si licik ras munuh ia.+ 2 Sebap nina kalak e, “Ula sanga perayan, perban banci saja guntar kari jelma si enterem.”

3 Sanga Jesus i Betani, man ia i rumah Simon si pernah sakit kusta. Reh sekalak diberu ndahi ia, babana sada botol marmar,* isina minak wangi* si asli si iban arah urat-urat si merim, si seh kel ergana. Bukana botol e jenari curcurkenna ku takal Jesus.+ 4 Ngidah si e, piga-piga kalak jungut-jungut man sada ras si debanna, nina, “Engkai maka isia-siaken minak wangi e? 5 Sebap minak wangi e banci idayaken ergana lebih 300 dinar,* senna banci ibereken man kalak mesera!” Merawa kel ate kalak e man* diberu ndai. 6 Tapi nina Jesus, “Pediat saja ia. Engkai maka ban kena ia susah? Si mehuli kap banna man bangku.+ 7 Sebap kalak mesera lalap nge ras kena,+ janah banci ban kena si mehuli man kalak e katawari pe ate kena, tapi aku labo lalap ras kena.+ 8 Lakokenna kai si banci lakokenna, curcurkenna minak wangi ku dagingku ope lenga penguburenku.+ 9 Situhuna kukataken man kena, i japa pe berita si meriah iberitaken i belang-belang doni,+ kai si lakoken diberu enda iceritaken ka pagi guna nginget ia.”+

10 Judas Iskariot, salah sada arah 12 rasul, lawes ndahi imam-imam kepala guna nyerahken Jesus man kalak e.+ 11 Sanga begi kalak e kerna si e, meriah akapna janah janjikenna mere sen pirak man Judas.+ Emaka mulai daramina kesempaten guna nyerahken Jesus.

12 Sanga wari pertama bas Perayan Roti si La Itama Ragi,+ paksa korban Paskah biasana ibereken,+ nungkun murid-murid man Jesus, “Ku ja atendu kami lawes guna nikapken pangan Paskah man bandu?”+ 13 Emaka suruhna dua muridna janah nina, “To laweslah ku kota, i je lit kari sekalak dilaki si maba kudin taneh ingan lau si njumpai kena. Ikutkenlah ia,+ 14 ku ja pe ia masuk, kataken man tuan rumah, ‘Nina Guru, “I ja ruang tamu si banci jadi inganku man pangan Paskah ras murid-muridku?”’ 15 Cidahkenna kari man kena sada ruangen si mbelang i loteng, si enggo isikapken guna sipake. Sikapkenlah pangan Paskahta i je.” 16 Berkat murid-murid e, masuk kalak e ku kota janah dapetina kerina bagi si kataken Jesus, emaka sikapkenna perayan Paskah.

17 Sanga berngi, reh ia ras 12 rasulna.+ 18 Sanga kalak e kundul janah man, nina Jesus, “Situhuna kukataken man kena, sekalak arah kena nari si man ras aku, hianatina kari aku.”+ 19 Sedih kel kalak e janah sekalak-sekalak ia nungkun man bana, “Me labo aku?” 20 Nina man kalak e, “Ia salah sada arah 12 rasul enda, si ncelupken roti radu ras aku ku bas mangkok.+ 21 Lawes me Anak manusia e, bagi si enggo itulisken kerna ia. Tapi cilaka kel kalak si erhianat man Anak manusia e!+ Ulin min ndai ia la lahir.”+

22 Sanga kalak e man denga, ibuat Jesus roti, ertoto ia mindo pasu-pasu, cepik-cepikkenna roti e, jenari berekenna man kalak e, nina, “Buatlah, enda ngertiken dagingku.”+ 23 Kenca si e, buatna sada calung,* ertoto ia ngataken bujur, janah berekenna man kalak e, kerina ia minem je nari.+ 24 Nina man kalak e, “Enda ngertiken darehku, ‘dareh+ perjanjin’+ si iamburken pagi guna enterem jelma.+ 25 Situhuna kukataken man kena, lanai pagi kuinem anggur seh ngasa kuinem anggur si mbaru bas Kerajan Dibata.” 26 Dungna, kenca ngendeken puji-pujin,* lawes kalak e ku Gunung Saitun.+

27 Nina Jesus man kalak e, “Kerina kari kena nadingken aku, sebap bagi si tertulis, ‘Kuserang pagi permakan e,+ janah merap pagi biri-biri e.’+ 28 Tapi kenca aku ipekeke, leben pagi aku ku Galilea asangken kena.”+ 29 Ngaloi Petrus, “Amin pe kerina kalak nadingken kam, aku labo.”+ 30 Nina Jesus man bana, “Situhuna kukataken man bandu, bas wari enda, bas berngi enda pe, ope lenga tekuak manuk dua kali, enggo persokenndu kari aku telu kali.”+ 31 Tapi empetken Petrus lalap ngataken, “Amin pe arus aku mate ras kam, labo kam kupersoken.” Kerina murid-murid si deban pe bage ka nina.+

32 Jenari seh kalak e bas ingan si igelari Getsemane, janah nina man murid-muridna, “Kundullah i jenda, ertoto aku lebe ku jah.”+ 33 Babana Petrus, Jakup, bage pe Johanes,+ sedih kel akapna janah getem kel pusuhna. 34 Nina man kalak e, “Sedih kel kuakap,+ tempa mate atena. Timai i jenda janah tetaplah erjaga-jaga.”+ 35 Kenca si e miser ia ku lebe, sujud ia i taneh janah totokenna gelah adi banci kiniseran e ipedauh arah ia nari. 36 Nina, “Abba,* Bapak,+ kerina banci lakokenNdu. Agui min calung* enda arah aku nari. Tapi, labo peratenku, peratenNdulah si terjadi.”+ 37 Mulihken ia janah dapetina kalak e sangana medem. Nina man Petrus, “O Simon, engkai maka kam medem? La nge kam ngasup tetap erjaga-jaga sada jam sajalah gia?+ 38 Tetaplah erjaga-jaga janah teruslah ertoto, gelah ula kena nyerah ku bas percuban.+ Pusuh tuhu semangat, tapi daging lemah.”+ 39 Lawes ka ia mulihi janah ertoto, katakenna ka bagi si ndai.+ 40 Kenca si e mulihken ka ia janah dapetina kalak e sangana medem, sebap mberat matana, emaka la teh kalak e uga njawapsa. 41 Jenari mulihken ia petelu kaliken janah nina, “Bas paksa si bagenda pe kena medem ras istrahat! Enggo me bias!+ Enggo seh jamna! Anak manusia ihianati kari bas tan kalak perdosa. 42 Tediskenlah, ota kita lawes. Nenlah! Si erhianat man bangku enggo ndeher.”+

43 Sanga ia ngerana denga, mis reh Judas, sekalak arah 12 rasul, reh ia radu ras sada rombongen si enterem, si maba pedang ras perpalu. Kalak e isuruh imam-imam kepala, ahli Undang-Undang Musa, ras peminpin-peminpin.+ 44 Si erhianat man bana enggo mere sada tanda man kalak e, nina, “Ise kari si kuema, ia jelmana. Tangkap ia, baba janah ula sempat pulah.” 45 Kenca si e mis dahina Jesus janah nina, “Guru!”* jenari emana ia alu lembut. 46 Emaka tangkap kalak e Jesus. 47 Tapi sekalak si tedis i je, tarikna pedangna janah serangna budak imam si mbelin, retap banna cupingna.+ 48 Tapi nina Jesus man kalak e, “Akap kena kin aku enda perampok maka reh kena maba pedang ras perpalu nangkap aku?+ 49 Tiap wari aku ras kena janah ngajar bas rumah pertoton,+ tapi la tangkap kena aku. Tapi alu bagenda, terjadi me kai nina Kitap si Badia.”+

50 Kerina murid kiam nadingken ia.+ 51 Tapi, lit sekalak anak perana si make uis linen halus ngenca, ngikuti Jesus arah deher nari. Usahaken kalak ndai nangkap ia, 52 emaka tadingkenna uis linenna e janah kiam ia la ruis.*

53 Kenca si e, ibaba me Jesus ku imam si mbelin,+ i je enggo pulung kerina imam kepala, peminpin, ras ahli Undang-Undang Musa.+ 54 Tapi Petrus ngikutken Jesus dauh-dauh nari, seh ku halamen rumah imam si mbelin. I je kundul ia ras pelayan-pelayan rumah janahna cudu deher api.+ 55 Sanga si e, imam-imam kepala ras kerina anggota Pengadilen Agama Jahudi* ndarami kesaksin guna ngelawan Jesus gelah ia ihukum mate. Tapi la lit kai pe si dat kalak e.+ 56 Amin pe enterem kalak mere kesaksin si palsu kerna ia,+ tapi sada pe la seri katana. 57 Selain si e, piga-piga kalak tedis janah mereken kesaksin si palsu kerna ia, nina, 58 “Pernah begi kami katakenna, ‘Kuruntuhken pagi rumah pertoton enda si iban alu tan manusia, janah bas telu wari kubangun ka pagi rumah pertoton si deban si la iban alu tan manusia.’”+ 59 Tapi kesaksin enda pe la seri ras kesaksin kalak si deban.

60 Kenca si e, tedis imam si mbelin i tengah-tengah kalak e, sungkunina Jesus, “La nge atendu katakenndu kai pe? Uga menurutndu tuduhen kalak e man bandu?”+ 61 Tapi tetap sinik Jesus, sitik pe la ia ngaloi.+ Sungkun imam si mbelin e ka, “Kam kin Kristus, Anak Dibata Si Badia e?” 62 Nina Jesus, “Ue, aku, idah kena pagi Anak manusia+ kundul i sebelah kanan+ Si Erkuasa janah reh i datas embun i langit.”+ 63 Perban si e, rigatken imam si mbelin uisna, nina, “Man kadeta nari kin saksi?+ 64 Enggo begi kena hinana Dibata. Uga keputusen kena?”* Kerina kalak e ngatakenca maka ia patut mate.+ 65 Piga-piga kalak mulai nciduri ia,+ nutupi ayona, ras ninjui ia, nina, “Adi nabi kin kam, kataken dage man kami ise si nggudam kam!” Parap petugas-petugas pengadilen e ayona, kenca si e babana lawes.+

66 Sanga Petrus i teruh denga, i halamen, reh sekalak diberu, pelayan imam si mbelin.+ 67 Sanga idahna Petrus cudu i je, tatapna ia janah nina, “Kam pe ras Jesus kap, kalak Nasaret e.” 68 Tapi persokenna, nina, “La ia kutandai, la kuangka kai maksudndu e.” Jenari lawes ia ku gerbang. 69 I je, idah pelayan si diberu e ia, mulihi katakenna man kalak si tedis i je, “Ia salah sada arah kalak e nari.” 70 Mulihi ka persokenna. La ndekah kenca si e, kalak si tedis i je ngerana man Petrus, “Pasti kam salah sada arah kalak e, kam me kalak Galilea.” 71 Tapi mulai ersumpah Petrus, “La kutandai dilaki si kataken kena e!” 72 Mis tekuak manuk pedua kaliken,+ jenari inget Petrus kai si enggo kataken Jesus, “Ope lenga tekuak manuk dua kali, enggo persokenndu aku telu kali.”+ Emaka getem kel pusuhna janah tangis kel ia.