Ketangkasen

15 Kenca si e, kuidah ka tanda si mbelin ras si luar biasa i langit. Lit pitu malekat+ si maba pitu bencana. Enda bencana si terakhir, sebap sanga enggo dung bencana e, rawa Dibata pe enggo dung.+

2 Kuidah lit si bagi laut kaca+ si icampur ras api. Kuidah ka kalak si menang+ ngelawan binatang buas bage pe patungna,+ ras si menang ngelawan kalak si gelarna itandai alu nomor.+ Kalak e tedis i tepi laut kaca janah jemakna harpa* Dibata. 3 Endeken kalak e lagu Musa+ budak Dibata, bage pe lagu Anak Biri-Biri,+ nina:

“O Dibata Jahwe* Si Madakuasa,+ seh kel belinna perbahanenNdu janah luar biasa kel.+ O Raja si rasa lalap,+ payo ras benar kap dalan-dalanNdu.+ 4 O Jahwe,* Kam ngenca si setia.+ Ise kin si la mbiar man baNdu, si la mereken kemulian man baNdu? Reh kerina bangsa nembah i lebe-lebeNdu,+ sebap kerina enggo ngidah maka adil kap penghakimenNdu.”

5 Kenca si e, kuidah terbuka ingan si badia* si lit i kemah kesaksin+ Dibata i surga.+ 6 Arah ingan si badia e ndarat pitu malekat si maba pitu bencana.+ Pakena linen si bersih ras ersinar, dadana iiket kain emas. 7 Salah sada empat mahluk si nggeluh e mereken pitu mangkok emas man pitu malekat e. Mangkok emas e dem alu rawa Dibata+ si nggeluh seh rasa lalap. 8 Ingan si badia e dem alu asap perban kemulian Dibata+ ras kuasaNa. Ise pe la banci masuk ku ingan si badia e seh asa dung pitu bencana+ si ibaba pitu malekat e.