Hakim-Hakim

11 Jepta+ kalak Gileat eme pejuang si megegeh. Ia anak pelacur, janah bapakna eme Gileat. 2 Diberu Gileat pe ngelahirken anak-anak dilaki. Sanga anak-anakna e enggo galang, pelawes kalak e Jepta janah nina kalak e man bana, “Labo kari datndu warisen arah keluarga bapak kami, sebap kam anak arah diberu si deban.” 3 Emaka kiam Jepta arah senina-seninana nari janah tading ia i negri Tob. Lit kalak si pengangguren si ergabung ras Jepta, janah ikutken kalak e ia.

4 Bas pudi wari, serang kalak Ammon kalak Israel.+ 5 Sanga serang kalak Ammon kalak Israel, mis legi peminpin-peminpin Gileat Jepta arah negri Tob nari. 6 Nina kalak e man Jepta, “Kam min jadi peminpin kami, gelah banci siserang kalak Ammon.” 7 Tapi nina Jepta man peminpin Gileat e, “Sange pelawes kena aku arah rumah bapakku nari perban segat kel ate kena aku.+ Gundari, engkai maka sanga susah e dahi kena aku?” 8 Nina peminpin Gileat e man Jepta, “Perban si e maka legi kami kam mulihi. Adi ikut kam ras kami nyerang kalak Ammon, ban kami kari kam jadi peminpin kerina penduduk Gileat.”+ 9 Nina Jepta man peminpin Gileat e, “Adi legi kena aku guna nyerang kalak Ammon janah taluken Jahwe pagi kalak e guna aku, jadi peminpin kena aku!” 10 Nina peminpin Gileat e man Jepta, “Jahwe si jadi saksi antara kita adi la lakoken kami bagi si katakenndu.” 11 Emaka lawes Jepta ras peminpin Gileat e, jenari ban kalak e ia jadi peminpin ras komandanna. Dung e ulihi Jepta kerina kata-katana ndai man Jahwe i Mispa.+

12 Kenca si e suruh Jepta utusen ndahi raja Ammon,+ nina, “Engkai maka bage ban kena man bangku? Engkai maka serang kena negriku?” 13 Emaka nina raja Ammon man utusen Jepta e, “Sanga ndarat kalak Israel arah Mesir nari,+ buat kalak e negriku mulai Arnon+ nari seh ku Jabok janah seh ka ku Lau Jordan.+ Gundari ulihkenlah e alu dame.” 14 Tapi suruh Jepta ka utusen e mulihken ndahi raja Ammon 15 guna ngataken,

“Bagenda nina Jepta, ‘Labo buat kalak Israel negri kalak Moap+ ras negri kalak Ammon,+ 16 sebap sanga ndarat kalak Israel arah Mesir nari, kalak e erdalan arah taneh mesawang* seh ku Laut Merah+ jenari seh ku Kades.+ 17 Kenca si e kirim kalak Israel pesan man raja Edom,+ nina, “Bere min kami lewat arah negrindu,” tapi tulak raja Edom. Man raja Moap+ pe kirim kalak e ka pesan, tapi la ka berena. Emaka terus kalak Israel tading i Kades.+ 18 Sanga erdalan kalak e arah taneh mesawang,* la kalak e lewat arah negri Edom+ bage pe arah negri Moap. Erdalan kalak e arah sebelah timur negri Moap+ janah erkemah i daerah Arnon. La kalak e erdalan arah perbatasen Moap,+ perban Arnon eme perbatasen Moap.

19 “‘Kenca si e kirim kalak Israel pesan man Sihon raja kalak Amori si merentah i Hesbon, nina kalak e, “Lawes ate kami ku ingan kami, emaka berelah kami lewat arah negrindu.”+ 20 Tapi Sihon la tek man kalak Israel janah la berena kalak e lewat arah daerahna. Emaka pepulung Sihon kerina pasukenna janah erkemah kalak e i Jahas jenari serang kalak e kalak Israel.+ 21 Jahwe Dibata Israel nyerahken Sihon ras kerina pasukenna ku tan kalak Israel. Emaka taluken kalak Israel kalak e janah rebut kalak Israel kerina negri kalak Amori, eme penduduk negri e.+ 22 Bage me kalak e ngerebut kerina daerah kalak Amori, mulai Arnon nari seh ku Jabok janah mulai taneh mesawang* nari seh ku Lau Jordan.+

23 “‘Jahwe Dibata Israel enggo mpelawes kalak Amori arah lebe-lebe kalak Israel,+ tapi gundari pelawes kena ate kena kalak Israel. 24 Apai pe negri si bereken Kemos+ dibata kena man kena pasti buat kena, kami pe pasti buat kami apai pe negri si bereken Jahwe Dibata kami man kami.+ 25 Ulin kin kam asangken Balak+ anak Sipor raja Moap? Pernah kin lawanna kalak Israel ntah pe erperang ia ngelawan kalak e? 26 Lit 300 tahun dekahna kalak Israel tading i Hesbon bage pe i kota-kota i sekelilingna,+ bas Aroer ras kota-kota i sekelilingna, bage pe bas kerina kota si lit i tepi Lau Arnon. Paksa si e, engkai maka la usahaken kena muat kota-kota e mulihi?+ 27 Labo lit dosaku man bandu, tapi ersalah kam adi serangndu aku. Pediatlah Jahwe Hakim Si Meganjangna+ si ngakimi kalak Israel ras kalak Ammon.’”

28 Tapi la begiken raja kalak Ammon pesan si kirimken Jepta man bana.

29 Nusur kesah si badia Jahwe ku Jepta+ jenari lewat Jepta arah Gileat ras Manase ku Mispa Gileat,+ janah arah Mispa Gileat terus ia ndahi kalak Ammon.

30 Kenca si e erjanji Jepta+ man Jahwe, nina, “Adi serahkenNdu kalak Ammon ku tanku, 31 janah mulih aku alu selamat arah peperangen ngelawan kalak Ammon, ise pe si pertama ndarat arah pintu rumahku guna ndahi aku, jadi jang Jahwe pagi ia.+ Kupersembahken pagi ia jadi persembahen tutungen.”*+

32 Emaka lawes Jepta erperang ngelawan kalak Ammon janah serahken Jahwe kalak e ku tanna. 33 Keri bunuhina kalak e, mulai Aroer nari seh ku Minit, lit 20 kota buena, janah seh ka ku Abel Keramim. Bage me kalak Ammon italuken i lebe-lebe kalak Israel.

34 Dungna mulih Jepta ku rumahna i Mispa.+ Ndarat anakna si diberu ngalo-ngalo ia janahna main rebana ras landek-landek! Ia ngenca anak Jepta. La lit anak Jepta si deban, dilaki ntah pe diberu. 35 Kenca idah Jepta anakna e, rigatkenna bajuna, janah nina, “O anakku! Getem kel banndu pusuhku, sebap kam si arus kupelawes. Enggo erjanji aku man Jahwe janah la banci kubatalken.”+

36 Tapi nina man bapakna, “Pak, adi enggo erjanji kam man Jahwe, banlah man bangku bagi si enggo janjikenndu e,+ sebap enggo sampati Jahwe kam mbalas musuhndu kalak Ammon.” 37 Nina ka man bapakna, “Sada ngenca pemindonku bandu: Pediatlah aku sisada sedekah dua bulan, janah pediatlah aku lawes ku pegunungen gelah tangis aku ras teman-temanku si diberu perban ngasa ndigan pe aku la erjabu.”

38 Megi si e nina Jepta, “Laweslah kam, Nakku.” Emaka pediat bapakna ia lawes dua bulan dekahna janah lawes ia ku pegunungen ras teman-temanna guna tangis, perban ngasa ndigan pe la ia erjabu. 39 Kenca dua bulan, mulih ia ndahi bapakna. Jenari tepati bapakna janji si enggo ibanna e kerna ia.+ Anakna e la pernah erhubungen seks ras dilaki. Mulai je nari, lit kebiasan* bas Israel, eme: 40 Tiap tahun, singuda-nguda Israel lawes ndahi anak Jepta kalak Gileat e guna muji ia, empat wari bas sada tahun.