Amu jé bia tôban abui minjuk?

1, 2. Minsili mivé abui bôte da sili?

BETA mimfô’ôsane mi si mi atyame nlam. Môt a nyine nda Zambe a bili ngal, a taté na a balé abime bôt éziñ, a wôé da vôk. Ôkône ba loone na cancer wo li’i bone betane bobenyui amu wo te wôé nyia wop.

² Éyoñ avale bibubua te da kui, abui bôte da sili na, “Amu jé?” Abui da kômbô fe yem amu jé émo é ne njalan a ziñ a minjuk. Ye ô siliya womiene nsili te?

3, 4. (a) Minsili mivé Habakuk a nga sili? (b) Aval avé Yéhôva a nga yalane nye?

³ Bia yé’é Kalate Zambe na, bôte be mbe be bili ngule mbunane be Zambe be nga sili fe avale minsili te. Tame yen éve’ane nkulu mejô Habakuk, a nga sili Yéhôva na: “Amu jé w’aliti me mbia be mam, a fombô ékotekot mboan? Amu éndaman a évô bi ne asu dam; ntañete ô ne, a melumane me kôlôya si.” ​—Habakuk 1:3.

⁴ E kalate Habakuk 2:2, 3, bia lañ éyalane Zambe a nga ve Habakuk, a ngaka’a a nga bo na, a ye kôm jame te. Yéhôva a bili ngule nye’an asu bone be bôt. Kalate Zambe a jô na: “A ba’ale mia.” (1 Pierre 5:7) Avale Zambe a vini a yen abé bia bo, nde fe a dañe vini a yene bia minju’u été. (Ésaïe 55:8, 9) Nde bi tame zu yen éyalane ya nsili wu, Amu jé bia toban abui minjuk?

 5. Jé abui betebe ôsu ya miñyebe da ye’ele mfa’a ya minjuk? Jé Kalate Zambe a ye’ele?

⁵ Betebe ôsu ya miñyebe ba ye’ele na éyoñe bôte ba tôbane minjuk, a ne nkômbane Zambe. Bôte béziñe be ne jô na, mam mese me akui môt, ja’a bitua bi mam me ne ma Zambe a maneya tyi’i na me ayiane kui, a bi se ngule ya yem amu jé. Bevo’o be ne fe jô na bôt, ja’a bongô ba wu asu na be ke tabe a Zambe yôp été. A ne minsos. Yéhôva a se ngule ya telé bia minju’u été. Kalate Zambe a jô na: “E bo’o Zambe ôyape na, a bo abé, a bo nyô a ne Ngul Ése ôyape na, a bo mbia jam!”​—Job 34:10.

 6. Amu jé abui bôte da jô na, Zambe nnye a telé bôte minju’u mise mi ne émo?

⁶ Abui bôte da jô na Zambe nnye a telé be minjuk, amu da buni na, Zambe nnye a jôé émo. Ve avale bi nga yé’é kabetôlô 3 nya njôô ya émo ji a ne Satan Diable.

7, 8. Amu jé minju’u mi ne abim abui di?

⁷ Kalate Zambe a jô bia na, “si nyô é ne éjôé mbia môte si.” (1 Jean 5:19, Mfefe Nkôñelan) Njôô ya émo ji, Satan a ne medu’an a njet. A ne “ndu’u si se.” (Nlitan 12:9) Abui bôte da vu nye. Amu ôsu a liti amu jé émo é ne njalan a minsos, ziñ a njet, nye le.

⁸ Beamu befe ba liti amu jé minju’u mi ne abui émo ji be ne na, éyoñ Adam ba Ève be boya Zambe engana’a, be nga kôé bone bap nsem. Nsem ôte wo tindi bôte na be telé ba bevo’o minju’u été. Amu nsem, bôte be wô’ô fe kômbô liti na ba dañe bôte bevok. Ba bo mesengan, ba ke bita a tibili bôt. (Ecclésiaste 4:1; 8:9) Biyoñe bizin, bôte ba tebe minju’u été amu “éyoñ a ndôba’ane bi akui be be bese.” (Ecclésiaste 9:11) Éyoñe be tele mbia vôme mbia éyoñ, bibubua bi mam, nge mbia be mam bi ne kui be.

 9. Amu jé bi ne tabe ndi na Yéhôva a bili beta amu a jô’é na minju’u mi ke ôsu a kui?

⁹ Yéhôva a se ngule ya telé bia minju’u été. Bi nji yiane ve nye bijô asu bita, mewôé me bôt, a bitibela’a. Zambe a se ngule ya telé bia bibubua aval ane mimfô’ôsane mi si, akôs, a ndône mendim. Ve bi ne sili biabebiene na, ‘Nge Yéhôva nnye a dañe bôte bese ya émo ngul, amu jé a nji telé bibubua?’ Bia yeme na Zambe a nyoñe ngap a bia, nde a yiane bi beta amu a jô’é na minju’u mi ke ôsu a kui.​—1 Jean 4:8.

10. Aval avé Satan a nga soñe Yéhôva?

¹⁰ Afup Éden, Diable a nga laan Adam ba Ève minsos. Satan a nga jô na Zambe a ne mbia Njôô. A nga jô na Zambe a nga kaman Adam ba Ève jôm é mbe mvo’é asu dap. Satan a mbe a yi na be buni na, nnye a ye bo mbamba njôô a lôte Yéhôva a na, bôte be ne nyiñe mvo’é teke’e Zambe.​—Metata’a 3:2-5; fombô’ô Ayemé 27.

11. Bia yiane yalane nsili ôvé?

¹¹ Adam ba Ève be nga bo Yéhôva melo a bo nye engana’a. Be nga simesane na, bebien be ne nyoñe ntyi’an ya jam é mbe mvaé, a di é mbe abé. Aval avé Yéhôva a nga liti na bebo engana’a be nga laane minsos a na, a yeme jôm é ne mvo’é asu dangan?

12, 13. (a) Amu jé Yéhôva a nji jiane bebo engana’a été été? (b) Amu jé Yéhôva a nga jô’é na Satan a bo njôô ya émo ji a na bôte be jôé bebien?

¹² Yéhôva a nji jian Adam ba Ève été été. Ve a nga jô’é na be biaé bon. Nde Yéhôva a nga ve bone be Adam ba Ève ngule ya tobe njôô wop. Nsôñane Yéhôva ô mbe na si é bo njalan a bezôsô be bôt. Satan akusa ve mengule mese, jame te da ye boban.​—Metata’a 1:28; Ésaïe 55:10, 11.

¹³ Satan a nga ve’ane Yéhôva mise bizu’u beéngele. (Job 38:7; Daniel 7:10) Nde Yéhôva a nga ve Satan éyoñe ya liti na a nga bele. Yéhôva a nga ve fe bôt éyoñe ya jôé éjôé Satan si asu na, a liti be na be se ngule ya jôé bôte teke mvolane Yéhôva.

14. Jé éyoñ é litiya bia?

¹⁴ Den a nto betoyini mimbu bôte ba jeñe na be jôé bebien, ve be teke kui na be bo de. Nalé a liti na Satan a yenéya na, a ne nlaa minsos. Bôte ba yi mvolane Zambe. Nkuli mejô Jérémie a nga kobô benya mejô éyoñ a nga jô na: “A Yéhôva m’ayeme na zene môt é nji bo be émien; ñyeman ô nji bo nleme môt été ane a ye wulu zene jé.”​—Jérémie 10:23.

15, 16. (a) Amu jé Yéhôva a jô’é na minju’u mi ke ôsu abim ayap éyoñe di? (b) Amu jé Yéhôva a nji volô jôé Satan?

¹⁵ Amu jé Yéhôva a jô’é na minju’u mi ke ôsu abim ayap éyoñe di? Amu jé a nji telé mbia be mam ba kui bia den? Asu na a liti na, éjôé Satan é loseya. Bôte be ve’eleya avale bijôé ése, ve be teke kui na be jôé bôt avale da yian. Akusa bo na ñyemane mame ya bôt a ñyemane mboane mame wo ke ôsu, mam aval ane ékotekot, azoé, mewôé me bôt a bita me ve nenenen. Bi se ngule ya jôé bia bebiene teke mvolane Zambe.

¹⁶ Nde Yéhôva a nji volô jôé Satan. Nge a nga ye bo de, nalé a nga ye liti na, a su’u éjôé Satan. Yéhôva a ye ke bo de môs éziñ. Bôte be nga ye fe buni na be ne ngule ya kôme jôé bebien. Ve jame te é ne minsos, a Yéhôva a se ngule ya jibi de. A ne étyi te laa minsos.​—Behébreu 6:18.

17, 18. Jé Yéhôva a ye bo mfa’a ya abé ése Satan a nga bo?

¹⁷ Ye Yéhôva a ne mane kôme mbia be mame bese engana’a Satan a bôt é nga so je? Ôwé, mame mese me aboban a Yéhôva. Yéhôva a yem éyoñe mbia be mame bese Satan a nga bo, be aye kômban. Nde a ye bo na si é bo paradis aval é mbe na da boban. Bôte bese be ne “mesoñ [ôsimesane Zambe été]” ba ye wômô. (Jean 5:28, 29) Bôte ba ye ke beta kon, nge wu. Yésus a ye mane kôm abé ése Satan a nga bo. Yéhôva a ye belane Yésus asu na, a “tyame mimboane mi mam mi Diable.” (1 Jean 3:8) Bia ve Yéhôva Zambe akéva, amu nté ôse wu, a jibi bia asu na, bi bo ngule ya yeme nye, a nyoñe ntyi’ane na a bo Njôô wongan. (Lañe 2 Pierre 3:9, 10.) Ja’a éyoñe bi tele minju’u été, a ve bia ngul. ​—Jean 4:23; lañe 1 Becorinthien 10:13.

¹⁸ Yéhôva a nji tindi bia a ngule na bi tobe nye ane Njôô wongan. A ve bôte fili ya nyoñe mintyi’an. Ñyenané jé édima dase te ja tinan asu dangan.

19. Beta dase mbé Yéhôva a nga ve bia? Aval avé bi ne ve Yéhôva akéva mfa’a ya dase te?

¹⁹ Yéhôva a nga ve bia beta dase ya bo fili ya nyoñe mintyi’an. Bia selan a betite mfa’a ôte. Betite ba bo mam teke fas, ve bia bi ne top avale bia kômbô nyiñ a tyi’i na bia bo Yéhôva mewôk. (Minkana 30:24) Nde fe bi nji bo ane beminsini, mbe ba bo fo’o ve mam be nga kôme be na be bo. Bi bili fili ya top avale môte bia kômbô bo, za a ye bia bo mvôé, a jé bia kômbô bo ényiñe jangan. Yéhôva a yi na bi bu’uban ényiñ.

20, 21. Mbamba ntyi’ane mbé ô ne nyoñ éyoñe di?

²⁰ Yéhôva a yi na bi nye’e nye. (Matthieu 22:37, 38) A ne ane ésa a bili meva’a éyoñ a wô’ô ane mone wé a jô nye na, “Ma nye’e wo,” jame te é so’o nye nlem, sa ke amu ba tindi nye. Yéhôva a nga ve bia fili ya tobe na bia kañe nye nge momo. Satan, a Adam ba Ève be nga tobe na ba bene Yéhôva. Aval avé wo ye belane fili ô bili na wo nyoñe mintyi’an?

²¹ Belane fili ô bili na wo nyoñe mintyi’an asu na ô kañe Yéhôva. Bizu’u bi bôte bife bi nga nyoñe ntyi’ane na bia bo nkômbane Zambe a na bia bene Satan. (Minkana 27:11) Jé ô ne bo éyoñe di, nge wo kômbô tabe mféfé émo Zambe éyoñ a ye vaa minju’u mise? E kabetôlô a tôñe nyi aye yalane nsili te.