Jeremias

44 Si Jeremias nakadawat ug mensahe alang sa tanang Hudiyo nga nagpuyo sa yuta sa Ehipto,+ kadtong nagpuyo sa Migdol,+ Tapanhes,+ Nop,*+ ug sa yuta sa Patros,+ nga nag-ingon: 2 “Kini ang giingon ni Jehova sa mga panon, ang Diyos sa Israel, ‘Nakita ninyo ang tanang katalagman nga akong gipahinabo sa Jerusalem+ ug sa tanang siyudad sa Juda, ug karon kini gun-ob na ug walay molupyo.+ 3 Kini tungod sa daotang mga butang nga ilang gibuhat sa pagpasuko kanako. Sila nangadto ug naghalad+ ug nag-alagad sa ubang mga diyos nga wala nila mailhi, nga bisan kamo o ang inyong mga katigulangan wala makaila.+ 4 Ug padayon nakong gipadala nganha kaninyo ang tanan nakong alagad nga propeta, nga nagpadala kanila nga balikbalik,* nga nag-ingon: “Palihog ayawg buhata kining dulumtanang butang nga akong gidumtan.”+ 5 Apan wala sila mamati o maghatag ug pagtagad* aron mobiya sa ilang pagkadaotan pinaagi sa dili paghalad ngadto sa ubang mga diyos.+ 6 Busa gibubo nako ang akong kapungot ug kasuko ug kini misilaob sa mga siyudad sa Juda ug sa kadalanan sa Jerusalem, ug kini nahimong gun-ob ug awaaw nga dapit, sama sa kahimtang niini karon.’+

7 “Ug karon kini ang giingon ni Jehova, ang Diyos sa mga panon, ang Diyos sa Israel, ‘Nganong nagpahinabo mog dakong katalagman sa inyong kaugalingon, maong ang matag lalaki ug babaye, bata ug masuso, nga gikan sa Juda mangalaglag, ug wala nay mahibilin kaninyo? 8 Nganong pasuk-on ko ninyo pinaagi sa mga buhat sa inyong mga kamot, pinaagi sa paghalad ngadto sa ubang mga diyos sa yuta sa Ehipto diin mo namuyo? Kamo malaglag ug tunglohon ug tamayon taliwala sa tanang kanasoran sa yuta.+ 9 Nalimot ba mo sa daotang mga buhat sa inyong mga katigulangan ug sa daotang mga buhat sa mga hari sa Juda+ ug sa daotang mga buhat sa ilang mga asawa,+ ingon man sa inyong daotang mga buhat ug sa daotang mga buhat sa inyong mga asawa,+ nga gibuhat didto sa yuta sa Juda ug sa kadalanan sa Jerusalem? 10 Hangtod karong adlawa, sila wala magpaubos,* wala magpakitag kahadlok,+ ug wala mosubay sa akong balaod ug mga lagda nga akong gihatag kaninyo ug sa inyong mga katigulangan.’+

11 “Busa kini ang giingon ni Jehova sa mga panon, ang Diyos sa Israel, ‘Ania, determinado kong magpahamtang ug katalagman kaninyo, sa paglaglag sa tibuok Juda. 12 Ug ipahinabo nako nga ang tanang nahibilin sa Juda nga determinadong moadto sa yuta sa Ehipto aron mopuyo didto mangalaglag didto sa yuta sa Ehipto.+ Sila mangapukan sa espada ug mangamatay sa gutom; gikan sa labing ubos ngadto sa labing taas, sila mangamatay sa espada ug gutom. Ug sila mahimong tinunglo, maldisyon, ug talamayon, ug ang mga tawo mangahadlok tungod kanila.+ 13 Ug silotan nako kadtong nagpuyo sa yuta sa Ehipto, sama nga gisilotan nako ang Jerusalem, pinaagig espada, gutom, ug kamatay.*+ 14 Ug ang nahibilin sa Juda nga mipuyo sa yuta sa Ehipto dili makaikyas o makalahutay aron mobalik sa yuta sa Juda. Sila mangandoy nga mobalik ug mopuyo didto, apan dili sila makabalik, gawas sa pipila nga makaikyas.’”

15 Ang tanang lalaki nga nahibalo nga ang ilang mga asawa nagahalad ngadto sa ubang mga diyos ug ang tanang asawa nga nagtindog didto, nga usa ka dakong grupo, ug ang tanang katawhan nga nagpuyo sa yuta sa Ehipto,+ sa Patros,+ miingon kang Jeremias: 16 “Dili mi mamati sa pulong nga imong gisulti kanamo sa ngalan ni Jehova. 17 Hinuon, buhaton gayod namo ang tanang pulong nga among gisulti, sa paghalad ngadto sa Rayna sa Langit* ug sa pagbubo ug mga halad nga ilimnon alang kaniya,+ sama sa gibuhat namo ug sa among mga katigulangan, sa among mga hari, ug sa among mga prinsipe, didto sa mga siyudad sa Juda ug sa kadalanan sa Jerusalem, dihang kami tagbaw sa pagkaon ug maayo ang pagkabutang, dihang kami wala gyoy nakitang katalagman. 18 Sukad nga mihunong mi sa paghalad ngadto sa Rayna sa Langit* ug sa pagbubo ug mga halad nga ilimnon alang kaniya, kami nakulangan na sa tanang butang ug nangamatay sa espada ug gutom.”

19 Ang kababayen-an midugang: “Ug dihang naghalad mi ngadto sa Rayna sa Langit* ug nagbubo ug mga halad nga ilimnon alang kaniya, dili ba gitugotan man mi sa among mga bana nga maghimog mga halad nga tinapay nga giporma sa iyang larawan ug magbubo ug mga halad nga ilimnon alang kaniya?”

20 Unya si Jeremias miingon sa tibuok katawhan, ngadto sa mga lalaki ug sa ilang mga asawa ug sa tibuok katawhan nga nakigsulti kaniya: 21 “Ang inyong mga halad ug ang mga halad sa inyong mga katigulangan, sa inyong mga hari, sa inyong mga prinsipe, sa katawhan sa yuta nga gihimo diha sa mga siyudad sa Juda ug sa kadalanan sa Jerusalem+​—⁠kining tanan gihinumdoman ni Jehova ug anaa sa iyang kasingkasing! 22 Sa kataposan, si Jehova wala na makaantos sa inyong daotang binuhatan ug dulumtanang mga butang, ug ang inyong yuta nahimong gun-ob nga dapit, nga kahadlokan ug tinunglo ug walay molupyo, sama sa kahimtang niini karon.+ 23 Kay naghimo mo niini nga mga halad ug nakasala mo kang Jehova pinaagi sa dili pagtuman sa tingog ni Jehova ug sa dili pagsubay sa iyang balaod, mga lagda, ug mga pahinumdom, kini nga katalagman midangat kaninyo, sama sa kahimtang karon.”+

24 Si Jeremias nagpadayon sa pag-ingon sa tibuok katawhan ug sa tanang kababayen-an: “Paminawa ang pulong ni Jehova, kamong tibuok Juda nga ania sa yuta sa Ehipto. 25 Kini ang giingon ni Jehova sa mga panon, ang Diyos sa Israel, ‘Gibuhat ninyo ug sa inyong mga asawa ang inyong gisulti, kay miingon mo: “Buhaton gyod namo ang among mga panaad nga maghalad sa Rayna sa Langit* ug magbubo ug mga halad nga ilimnon alang kaniya.”+ Kamong kababayen-an magatuman gayod sa inyong mga panaad ug himoon ninyo kini.’

26 “Busa paminawa ang pulong ni Jehova, kamong tibuok Juda nga nagpuyo sa yuta sa Ehipto: ‘“Ania, nanumpa ko pinaagi sa akong dakong ngalan,” miingon si Jehova, “nga ang akong ngalan dili na litokon dihang manumpa ang bisan kinsang tawo sa Juda+ diha sa tibuok yuta sa Ehipto, nga mag-ingon, ‘Ingon nga ang Soberanong Ginoong Jehova buhi!’+ 27 Karon, bantayan nako sila aron magdalag katalagman ug dili kaayohan;+ ang tanang tawo sa Juda diha sa yuta sa Ehipto mangamatay sa espada ug gutom, hangtod nga sila mahanaw.+ 28 Diyutay lang ang makaikyas sa espada ug sila mobalik sa yuta sa Juda gikan sa yuta sa Ehipto.+ Unya ang tanang nahibilin sa Juda nga miadto sa yuta sa Ehipto aron mopuyo didto mahibalo kon kansang pulong ang natuman, ang akoa ba o ilaha!”’”

29 “‘Ug kini ang ilhanan alang kaninyo,’ miingon si Jehova, ‘nga silotan mo nako niining dapita, aron mahibalo mo nga ang akong mga pulong nga nagsaad ug katalagman batok kaninyo matuman gayod. 30 Kini ang giingon ni Jehova: “Ania, akong itugyan si Paraon Hopra, ang hari sa Ehipto, ngadto sa kamot sa iyang mga kaaway ug niadtong nagtinguha sa iyang kinabuhi, sama nga akong gitugyan si Haring Zedekias sa Juda ngadto sa kamot ni Haring Nabucodonosor* sa Babilonya, nga iyang kaaway ug nagtinguha sa iyang kinabuhi.”’”+