Ecclesiastes

8 Kinsa ang sama sa tawong maalamon? Kinsay nahibalo sa solusyon sa usa ka problema?* Ang kaalam sa usa ka tawo magpasanag sa iyang nawong ug makapasadya sa iyang nagmug-ot nga panagway.

2 Ako moingon: “Tumana ang mga mando sa hari+ kay nanumpa ka sa Diyos.+ 3 Ayaw pagdalig biya sa iyang atubangan.+ Ayaw pakiglangkit sa bisan unsang daotan;+ sanglit mahimo niya ang bisan unsa nga iyang gusto, 4 kay ang pulong sa hari dili mabali;+ kinsay makaingon kaniya, ‘Unsay imong ginabuhat?’”

5 Ang usa nga nagatuman sa kasugoan dili makaagom ug kadaot,+ ug ang maalamong kasingkasing mahibalo sa hustong panahon ug pamaagi.*+ 6 Kay ang matag butang dunay panahon ug pamaagi,*+ sanglit ang katawhan daghan kaayog problema. 7 Kay walay nahibalo kon unsay mahitabo, kinsay makasulti kaniya kon sa unsang paagi kini mahitabo?

8 Sama nga walay tawo nga may gahom sa pagpugong sa espiritu,* wala usay makapugong sa adlaw sa kamatayon.+ Sama nga walay tugotang mobiya panahon sa gubat, dili usab tugotan sa pagkadaotan nga makaikyas kadtong nagahimo niini.*

9 Kining tanan nakita nako, ug kinasingkasing nakong gipamalandong ang tanang ginabuhat ilalom sa adlaw, sulod sa panahon nga ang tawo nagmando sa tawo alang sa iyang ikadaot.+ 10 Ug nakita nako ang mga daotan nga gipanglubong, kadtong nagasulod ug nagagula sa balaang dapit, apan nalimtan ra dayon sila sa siyudad diin ginahimo nila kini.+ Kini usab kawang.

11 Kay ang silot sa daotang buhat wala dayon ipahamtang,+ ang kasingkasing sa mga tawo nahimong mas determinadong mobuhat ug daotan.+ 12 Bisan pag ang usa ka makasasala mobuhat ug daotan sa 100 ka beses ug mabuhi gihapon ug taas nga panahon, nahibalo ko nga maayo ang dangatan niadtong mga nahadlok sa matuod nga Diyos, kay sila nahadlok kaniya.+ 13 Apan dili maayo ang dangatan sa tawong daotan,+ ug dili niya malugwayan ang iyang mga adlaw nga samag anino,+ kay siya wala mahadlok sa Diyos.

14 Dunay kawang* nga butang nga nagakahitabo sa yuta: Dunay mga matarong nga gitratar nga daw sila nagbuhat ug daotan,+ ug dunay mga daotan nga gitratar nga daw sila nagbuhat ug matarong.+ Makaingon ko nga kini usab kawang.

15 Busa giawhag nako ang pagsadya,+ kay wala nay mas maayo alang sa tawo ilalom sa adlaw kay sa pagkaon ug pag-inom ug pagsadya; angay niya kining buhaton samtang siya naghago sa mga adlaw sa iyang kinabuhi,+ nga gihatag kaniya sa matuod nga Diyos ilalom sa adlaw.

16 Determinado kong makabaton ug kaalam ug makita ang tanang kalihokan* nga nagakahitabo sa yuta,+ bisan pag dili ko matulog sa adlaw ug gabii.* 17 Unya gipamalandong nako ang tanang buhat sa matuod nga Diyos, ug akong nasabtan nga dili matugkad sa mga tawo ang mga hitabo ilalom sa adlaw.+ Bisag unsaon ug paningkamot sa tawo, dili nila kini matugkad. Bisan pag mangangkon sila nga maalamon kaayo sila, dili gyod nila kini matugkad.+