Deuteronomio

27 Dayon gisugo ni Moises ug sa mga ansiyano sa Israel ang katawhan: “Tumana ang matag sugo nga akong gihatag ninyo karon. 2 Sa adlaw nga motabok mo sa Jordan paingon sa yuta nga ihatag kaninyo ni Jehova nga inyong Diyos, pagpatindog mog dagkong bato ug palitadahi kana.*+ 3 Isulat niana ang tanang pulong niini nga Balaod dihang makatabok na mo, aron makasulod mo sa yuta nga ihatag kaninyo ni Jehova nga inyong Diyos, yuta nga abunda sa gatas ug dugos, sumala sa gisaad kaninyo ni Jehova,+ ang Diyos sa inyong mga katigulangan. 4 Dihang makatabok na mo sa Jordan, ipatindog ninyo ang maong mga bato sa Bukid sa Ebal+ ug palitadahi kana* sumala sa akong gisugo ninyo karon. 5 Paghimo pod mo didtog halaran nga bato para kang Jehova nga inyong Diyos. Ayaw kini gamitig puthaw nga himan.+ 6 Tibuok nga mga bato ang inyong gamiton sa paghimog halaran para kang Jehova nga inyong Diyos, ug pagtanyag niana ug mga halad nga sinunog para kang Jehova nga inyong Diyos. 7 Pagtanyag mog mga halad sa panag-ambit+ ug kan-a kana didto,+ ug paglipay mo atubangan ni Jehova nga inyong Diyos.+ 8 Ug tin-awng isulat sa mga bato ang tanang pulong niini nga Balaod.”+

9 Unya giingnan ni Moises ug sa mga saserdote nga Levihanon ang tibuok Israel: “Hilom ug paminaw, Oh Israel. Niining adlawa kamo nahimong katawhan ni Jehova nga inyong Diyos.+ 10 Paminawa gayod si Jehova nga inyong Diyos ug tumana ang iyang mga sugo+ ug mga regulasyon nga akong gihatag kaninyo karon.”

11 Nianang adlawa gisugo ni Moises ang katawhan: 12 “Dihang makatabok na mo sa Jordan, kini ang motindog sa Bukid sa Gerizim+ aron panalanginan ang katawhan: ang tribo ni Simeon, Levi, Juda, Isacar, Jose, ug Benjamin. 13 Ug kini ang motindog sa Bukid sa Ebal+ aron ipahayag ang tunglo: ang tribo ni Ruben, Gad, Aser, Zabulon, Dan, ug Neptali. 14 Ug ang mga Levihanon mosulti sa tibuok Israel sa kusog nga tingog:+

15 “‘Tinunglo ang tawo nga maghimo ug magtagog kinulit nga larawan+ o metal* nga estatuwa,+ butang nga gidumtan ni Jehova+ nga hinimo sa mga artesano.’* (Ug ang tibuok katawhan motubag, ‘Amen!’*)

16 “‘Tinunglo ang magtamay sa iyang amahan o inahan.’+ (Ug ang tibuok katawhan moingon, ‘Amen!’)

17 “‘Tinunglo ang magsibog sa mohon sa iyang isigkatawo.’+ (Ug ang tibuok katawhan moingon, ‘Amen!’)

18 “‘Tinunglo ang magpahisalaag sa buta diha sa dalan.’+ (Ug ang tibuok katawhan moingon, ‘Amen!’)

19 “‘Tinunglo ang maghikaw ug hustisya+ sa langyaw nga residente, sa batang wala nay amahan,* ug sa biyuda.’+ (Ug ang tibuok katawhan moingon, ‘Amen!’)

20 “‘Tinunglo ang makigsekso sa asawa sa iyang amahan, kay gipakaulawan niya ang iyang amahan.’*+ (Ug ang tibuok katawhan moingon, ‘Amen!’)

21 “‘Tinunglo ang makigsekso sa bisan unsang hayop.’+ (Ug ang tibuok katawhan moingon, ‘Amen!’)

22 “‘Tinunglo ang makigsekso sa iyang igsoong babaye, nga anak sa iyang amahan o inahan.’+ (Ug ang tibuok katawhan moingon, ‘Amen!’)

23 “‘Tinunglo ang makigsekso sa iyang ugangang babaye.’+ (Ug ang tibuok katawhan moingon, ‘Amen!’)

24 “‘Tinunglo ang moatang sa iyang isigkatawo aron patyon siya.’+ (Ug ang tibuok katawhan moingon, ‘Amen!’)

25 “‘Tinunglo ang modawat ug hiphip aron patyon ang inosenteng tawo.’*+ (Ug ang tibuok katawhan moingon, ‘Amen!’)

26 “‘Tinunglo ang dili motuman sa mga pulong niini nga Balaod.’+ (Ug ang tibuok katawhan moingon, ‘Amen!’)