Exodo
15 Niadtong higayona si Moises ug ang mga Israelinhon miawit niini nga awit kang Jehova:+
“Awitan nako si Jehova kay siya nabayaw pag-ayo.+
Ang kabayo ug ang nagsakay niini iyang gitambog sa dagat.+
2 Si Jah* ang akong kusog ug gahom, kay siya nagluwas kanako.+
Siya ang akong Diyos, ug dayegon nako siya;+ ang Diyos sa akong amahan,+ ug bayawon nako siya.+
3 Si Jehova maoy gamhanang manggugubat.+ Jehova ang iyang ngalan.+
4 Gitambog Niya sa dagat ang mga karo ug kasundalohan sa Paraon,+
Ug ang kinamaayohan niyang mga manggugubat nangalumos sa Pulang Dagat.+
5 Gitabonan sila sa nagbul-og nga katubigan; sama silag bato nga mitidlom sa kahiladman.+
6 Ang imong tuong kamot, Oh Jehova, gamhanan kaayo;+
Ang imong tuong kamot, Oh Jehova, makadugmok sa kaaway.
7 Tungod sa imong dakong gahom ikaw makapukan niadtong nakig-away kanimo;+
Ang imong nagasilaob nga kasuko milamoy kanila samag dagami.
8 Pinaagi sa gininhawa sa imong ilong, ang katubigan mitindog samag paril;
Mipondo ang tubig aron dili kini mobuhagay;
Ang nagbul-og nga katubigan daw migahi sa tunga sa dagat.
9 Ang kaaway miingon: ‘Gukdon nako sila! Apason nako sila!
Bahinbahinon nako ang mga inagaw hangtod nga matagbaw ko!
Hulboton nako ang akong espada! Laglagon nako sila!’+
10 Sa usa nimo ka paghuyop, ang dagat mitabon kanila;+
Sama silag tingga nga naunlod sa lawom nga katubigan.
11 Kinsa sa mga diyos ang sama kanimo, Oh Jehova?+
Kinsa ang sama kanimo nga balaan kaayo?+
Ang Usa nga angayng kahadlokan ug dayegon pinaagig mga awit, ang Usa nga naghimog kahibulongang mga buhat.+
12 Gituy-od nimo ang imong tuong kamot, ug ang yuta milamoy nila.+
13 Tungod sa imong maunongong gugma, gitultolan nimo ang katawhan nga imong gitubos;+
Pinaagi sa imong kusog imong giyahan sila ngadto sa imong balaang pinuy-anan.
14 Ang mga tawo makadungog;+ sila mangurog sa kahadlok;
Ang mga nagpuyo sa Filistia mobatig grabeng kasakit.*
Ang tanang molupyo sa Canaan mangaluya.+
16 Sila mangahadlok ug mangalisang.+
Tungod sa pagkagamhanan sa imong bukton, mahisama silag bato nga dili makalihok
Hangtod makaagi ang imong katawhan, Oh Jehova,
17 Ikaw magdala ug magtanom kanila sa bukid nga imong gipanag-iya,+
Sa lig-ong dapit nga imong giandam aron imong puy-an, Oh Jehova,
Usa ka sangtuwaryo nga gitukod sa imong mga kamot, Oh Jehova.
18 Si Jehova magmando ingong hari hangtod sa kahangtoran.+
19 Dihang ang mga karo nga panggubat sa Paraon ug ang iyang mga mangangabayo miadto sa dagat,+
Gibalik ni Jehova ang katubigan sa dagat ug mitabon kini kanila,+
Apan ang katawhan sa Israel milakaw sa uga nga yuta sa tunga sa dagat.”+
20 Dayon si Miriam nga propeta, nga igsoon ni Aaron, nagkuhag tamborin, ug ang tanang kababayen-an misunod kaniya nga may mga tamborin ug nanayaw. 21 Si Miriam miawit sab kanila:
“Pag-awit kang Jehova, kay siya nabayaw pag-ayo.+
Ang kabayo ug ang nagsakay niini iyang gitambog sa dagat.”+
22 Gikan sa Pulang Dagat, gidala ni Moises ang Israel sa kamingawan sa Sur. Tulo ka adlaw silang mipanaw sa kamingawan, apan wala silay nakitang tubig. 23 Nakaabot sila sa Mara,*+ apan dili nila mainom ang tubig sa Mara kay pait kini. Mao nga ginganlan niya kinig Mara. 24 Busa ang katawhan nagbagulbol kang Moises,+ nga nag-ingon: “Unsay among imnon?” 25 Siya misangpit kang Jehova,+ ug gipakita ni Jehova kaniya ang usa ka gamayng kahoy. Dihang giitsa niya kini sa tubig, mitam-is ang tubig.
Didto, gihatagan sila sa Diyos ug regulasyon ug basehanan sa paghukom, ug iyang gisulayan sila didto.+ 26 Siya miingon: “Kon maminaw gyod mo sa tingog ni Jehova nga inyong Diyos ug mobuhat kon unsay matarong sa iyang mga mata ug motuman sa iyang mga sugo ug sa tanan niyang regulasyon,+ dili nako ipahamtang kaninyo ang bisan unsang sakit nga akong gipahamtang sa mga Ehiptohanon,+ kay ako si Jehova, ang nagaayo ninyo.”+
27 Human niana, sila nakaabot sa Elim nga may 12 ka tubod ug 70 ka kahoyng palma. Busa nagkampo sila didto duol sa tubig.