Deuteronomio

2 “Unya mibalik ta ug miadto sa kamingawan agi sa dalan nga padulong sa Pulang Dagat, sumala sa giingon ni Jehova kanako,+ ug daghang adlaw tang naglakaw sa palibot sa Bukid sa Seir. 2 Sa kataposan giingnan ko ni Jehova, 3 ‘Dugaydugay na mong nagbalhinbalhin palibot niining bukira. Lakaw na mo paamihanan. 4 Ug sugoa ang katawhan: “Moagi mo sa utlanan sa inyong mga igsoon, ang mga kaliwat ni Esau+ nga nagpuyo sa Seir.+ Sila mahadlok ninyo,+ ug kinahanglang mag-amping gyod mo. 5 Ayaw mo pakig-away nila* kay walay yuta nila nga mainyo, bisag parehas ka gamay sa tunob sa tiil, kay gihatag na nako kang Esau ang Bukid sa Seir.+ 6 Bayri ninyog kuwarta ang pagkaon nga inyong kaonon ug ang tubig nga inyong imnon.+ 7 Kay gipanalanginan mo ni Jehova nga inyong Diyos sa tanan ninyong gibuhat. Nahibalo siya pag-ayo sa inyong paglakaw niining dako nga kamingawan. Sulod sa 40 ka tuig, giubanan mo ni Jehova nga inyong Diyos ug walay butang nga nakulang ninyo.”’+ 8 Busa gilabyan lang nato ang atong mga igsoon, ang mga kaliwat ni Esau+ nga nagpuyo sa Seir, ug nagpalayo ta sa dalan sa Araba, sa Elat, ug sa Ezion-geber.+

“Unya miliko ta ug miagi sa dalan nga paingon sa kamingawan sa Moab.+ 9 Dayon giingnan ko ni Jehova, ‘Ayaw pakig-away o pakiggubat sa Moab kay walay yuta niining lugara nga mainyo, kay ang Ar gihatag na nako sa mga kaliwat ni Lot.+ 10 (Didto nagpuyo ang mga Emim+ kaniadto. Sila gamhanan, daghan, ug tag-as parehas sa mga Anakim. 11 Ang mga Repaim+ giisip sab nga parehas sa mga Anakim,+ ug gitawag silag Emim sa mga Moabihanon. 12 Kaniadto mga Horihanon+ ang nagpuyo sa Seir, apan gipapahawa ug gipamatay sila sa mga kaliwat ni Esau ug sila nay mipuyo niini.+ Kini sab ang himoon sa Israel sa yuta nga ilang panag-iyahon, nga seguradong ihatag ni Jehova kanila.) 13 Karon, tabok mo sa Walog* sa Zered.’ Busa nanabok ta sa Walog* sa Zered.+ 14 Ang atong paglakaw gikan sa Kades-barnea hangtod nakatabok ta sa Walog* sa Zered miabot ug 38 ka tuig, hangtod nga nangamatay ug wala na sa kampo kadtong tibuok henerasyon sa mga manggugubat, sumala sa gipanumpa ni Jehova kanila.+ 15 Ang kamot ni Jehova mibatok kanila aron mamatay sila hangtod nga nawala sila sa kampo.+

16 “Pagkahurot gyod ug kamatay niadtong mga manggugubat,+ 17 si Jehova nakigsulti na sab nako, 18 ‘Karong adlawa, moagi mo sa teritoryo sa Moab, didto sa Ar. 19 Kon duol na mo sa mga Ammonhanon, ayaw pakig-away o panghagit nila kay walay yuta sa mga Ammonhanon nga mainyo, kay gihatag na nako kini sa mga kaliwat ni Lot.+ 20 Giisip sab kini kaniadto nga yuta sa mga Repaim.+ (Kaniadto mga Repaim ang nagpuyo didto, ug niadtong panahona gitawag silag Zamzumim sa mga Ammonhanon. 21 Sila gamhanan, daghan, ug tag-as parehas sa mga Anakim.+ Apan gilaglag sila ni Jehova atubangan sa mga Ammonhanon kinsa mipalayas nila ug mipuyo puli nila. 22 Kanay iyang gibuhat para sa mga kaliwat ni Esau nga namuyo karon sa Seir,+ dihang iyang gilaglag ang mga Horihanon+ sa ilang atubangan, aron ilang mapapahawa sila ug makapuyo puli nila hangtod niining adlawa. 23 Kon bahin sa mga Avim, nagpuyo sila sa mga komunidad hangtod sa Gaza.+ Unya ang mga Captorim+ nga gikan sa Captor* milaglag nila ug mipuyo puli nila.)

24 “‘Lakaw, panabok mo sa Walog* sa Arnon.+ Ania, akong gitugyan sa inyong kamot si Sihon+ nga Amorihanon nga hari sa Hesbon. Busa sugdi ang pagpanag-iya sa iyang yuta, ug pakiggubat kaniya. 25 Sugod niining adlawa, akong ipahinabo nga kalisangan ug kahadlokan mo sa tanang tawo ilalom sa langit nga makabalita bahin ninyo. Sila matugaw ug mangurog* tungod ninyo.’+

26 “Unya gikan sa kamingawan sa Kedemot,+ nagpadala kog mga mensahero kang Haring Sihon nga hari sa Hesbon, dala kining mensahe sa pakigdait,+ 27 ‘Paagia mi sa imong yuta. Diha lang mi sa dalan ug dili mi moliko sa tuo o sa wala.+ 28 Ang among kaonon ug imnon kadto lang imong ibaligya kanamo. Paagia lang mi 29 hangtod nga makatabok mi sa Jordan ngadto sa yuta nga ihatag kanamo ni Jehova nga among Diyos, parehas sa gihimo kanamo sa mga kaliwat ni Esau nga nagpuyo sa Seir ug sa mga Moabihanon nga nagpuyo sa Ar.’ 30 Apan wala ta paagia ni Sihon nga hari sa Hesbon, kay gitugotan ni Jehova nga inyong Diyos nga magmagahi siya+ ug motig-a ang iyang kasingkasing, aron itugyan siya sa inyong kamot sama sa nahitabo karon.+

31 “Unya giingnan ko ni Jehova, ‘Ania, gitugyan na nako kaninyo si Sihon ug ang iyang yuta. Sugdi na ang pagpanag-iya sa iyang yuta.’+ 32 Dihang migula si Sihon ug ang tibuok niyang katawhan aron makiggubat nato sa Jahaz,+ 33 gitugyan siya kanato ni Jehova nga atong Diyos, maong napildi nato siya, ang iyang mga anak, ug ang tibuok niyang katawhan. 34 Atong giilog ang tanan niyang siyudad niadtong higayona ug gilaglag ang matag siyudad, apil ang mga lalaki, babaye, ug bata. Wala tay gibiling buhi.+ 35 Ang ato lang gipanguha mao ang mga binuhing hayop ug mga butang gikan sa mga siyudad nga atong nailog. 36 Gikan sa Aroer,+ nga duol sa tampi sa Walog* sa Arnon (apil ang siyudad nga naa sa walog), hangtod sa Gilead, walay lungsod nga kusgan kaayo para nato. Kining tanan gitugyan kanato ni Jehova nga atong Diyos.+ 37 Apan wala ninyo adtoa ang yuta sa mga Ammonhanon,+ ang tibuok tampi sa Walog* sa Jabok+ ug ang mga siyudad sa kabukiran, o ang mga lugar nga gidili ni Jehova nga atong Diyos.