Jeremias
32 Si Jeremias nakadawat ug mensahe gikan kang Jehova sa ika-10 nga tuig sa pagmando ni Haring Zedekias sa Juda, nga mao, ang ika-18 nga tuig sa pagmando ni Nabucodonosor.*+ 2 Niadtong panahona ang kasundalohan sa hari sa Babilonya naglikos sa Jerusalem, ug si propetang Jeremias gibilanggo diha sa Hawanan sa Guwardiya+ sa balay* sa hari sa Juda. 3 Kay gibilanggo siya ni Haring Zedekias sa Juda,+ nga nag-ingon, “Nganong nanagna ka ug ingon niini? Miingon ka, ‘Kini ang giingon ni Jehova: “Itugyan nako kining siyudara ngadto sa kamot sa hari sa Babilonya, ug iya kining bihagon,+ 4 ug si Haring Zedekias dili makaikyas sa mga Caldeanhon, kay siya itugyan gayod ngadto sa kamot sa hari sa Babilonya, ug siya makigsulti ug makig-atubang kaniya.”’+ 5 ‘Iyang dad-on si Zedekias sa Babilonya, ug siya magpabilin didto hangtod iliso nako ang akong pagtagad kaniya,’ miingon si Jehova. ‘Bisag padayon mong makiggubat sa mga Caldeanhon, kamo dili makadaog.’”+
6 Si Jeremias miingon: “Nadawat nako ang mensahe ni Jehova, nga nag-ingon, 7 ‘Si Hanamel nga anak ni Salum nga imong uyoan* moanha kanimo ug moingon: “Palita ang akong uma sa Anatot,+ kay ikaw ang unang may katungod sa paglukat niini.”’”+
8 Si Hanamel nga anak sa akong uyoan mianhi kanako, sumala sa giingon ni Jehova, sa Hawanan sa Guwardiya, ug miingon: “Palihog palita ang akong uma sa Anatot, sa yuta sa Benjamin, kay ikaw ang may katungod sa pagpanag-iya ug sa paglukat niini. Palita kini.” Busa nahibaloan nako nga kini maoy tungod sa giingon ni Jehova.
9 Busa gipalit nako kang Hanamel nga anak sa akong uyoan ang uma sa Anatot. Nagtimbang kog salapi+ alang kaniya, pito ka siklo* ug 10 ka pirasong plata. 10 Unya gihimoan nako kinig kasulatan+ ug giselyohan kini. Nagtawag kog mga saksi+ ug nagtimbang ug salapi diha sa timbangan. 11 Gikuha nako ang kasulatan sa pagpalit, ang usa nga giselyohan sumala sa sugo ug sa legal nga mga kinahanglanon, ingon man ang usa nga wala selyohi, 12 ug gihatag nako ang kasulatan sa pagpalit ngadto kang Baruk+ nga anak ni Nerias+ nga anak ni Maseias sa atubangan ni Hanamel nga anak sa akong uyoan, sa mga saksi nga mipirma sa kasulatan sa pagpalit, ug sa tanang Hudiyo nga naglingkod didto sa Hawanan sa Guwardiya.+
13 Unya gisugo nako si Baruk sa ilang atubangan, nga nag-ingon: 14 “Kini ang giingon ni Jehova sa mga panon, ang Diyos sa Israel, ‘Dad-a kini nga mga kasulatan, kining kasulatan sa pagpalit, ang giselyohan ug ang wala selyohi, ug ibutang kini sa sudlanan nga kulonon, aron matipigan kini sa taas nga panahon.’ 15 Kay kini ang giingon ni Jehova sa mga panon, ang Diyos sa Israel, ‘Ang mga balay ug mga uma ug mga ubasan niining yutaa pamaliton pag-usab.’”+
16 Unya miampo ko kang Jehova human mahatag ang kasulatan sa pagpalit ngadto kang Baruk nga anak ni Nerias, nga nag-ingon: 17 “Intawon, Oh Soberanong Ginoong Jehova! Gibuhat nimo ang kalangitan ug ang yuta pinaagi sa imong dakong gahom+ ug gamhanang bukton. Walay butang nga lisod kaayo alang kanimo, 18 ang Usa nga nagapakitag maunongong gugma sa linibo, apan nagtugot nga maagoman sa* mga anak ang resulta sa kasaypanan sa ilang mga amahan,+ ang matuod nga Diyos, ang Usa nga mahimayaon ug gamhanan, kansang ngalan maoy Jehova sa mga panon. 19 Dagko ang imong katuyoan* ug gamhanan ang imong mga buhat,+ ikaw kansang mga mata nagmatikod sa tanang dalan sa mga tawo,+ aron balosan ang matag usa sumala sa iyang mga dalan ug binuhatan.+ 20 Nagbuhat kag mga ilhanan ug mga milagro sa yuta sa Ehipto, nga nahibaloan gihapon hangtod niining adlawa, ug busa nabantog ang imong ngalan sa Israel ug sa katawhan,+ sama sa mahitabo niining adlawa. 21 Ug gipagawas nimo ang imong katawhang Israel sa yuta sa Ehipto, pinaagig mga ilhanan, mga milagro, kusgang kamot, gamhanang bukton, ug makalilisang nga mga buhat.+
22 “Sa ulahi, imong gihatag kanila kining yutaa nga imong gipanumpa nga ihatag sa ilang mga katigulangan,+ usa ka yuta nga abunda sa gatas ug dugos.+ 23 Ug sila misulod ug gipanag-iya kini, apan wala sila motuman sa imong tingog o mosubay sa imong balaod. Wala nila buhata ang tanan nga imong gisugo kanila, mao nga gitugot nimo nga mahitabo kanila kining tanang katalagman.+ 24 Tan-awa! Ang mga tawo nangabot ug naghimog mga bungdo aron bihagon ang siyudad,+ ug tungod sa espada,+ gutom, ug kamatay,*+ ang siyudad mapukan gayod sa kamot sa mga Caldeanhon nga nakig-away niini; ang tanan nimong giingon nahitabo, sama sa imong nakita karon. 25 Apan miingon ka kanako, Oh Soberanong Ginoong Jehova, ‘Palita ang uma ug pagtawag ug mga saksi,’ bisan pag ang siyudad igatugyan gayod sa kamot sa mga Caldeanhon.”
26 Unya si Jeremias nakadawat ug mensahe gikan kang Jehova, nga nag-ingon: 27 “Ako si Jehova, ang Diyos sa tanang katawhan.* Duna bay butang nga lisod kaayo alang kanako? 28 Busa kini ang giingon ni Jehova, ‘Ania, itugyan nako kining siyudara sa kamot sa mga Caldeanhon ug sa kamot ni Haring Nabucodonosor* sa Babilonya, ug bihagon niya kini.+ 29 Ug ang mga Caldeanhon nga nagapakig-away niining siyudara moanhi, ug ilang daoban kining siyudara ug ugdawon kini+ lakip ang mga balay diin sa mga atop niini ang katawhan nagahalad kang Baal ug nagbubo ug mga halad nga ilimnon alang sa laing mga diyos sa pagpasuko kanako.’+
30 “‘Kay ang katawhan sa Israel ug Juda nagbuhat lang sa kon unsay daotan sa akong mga mata, sukad sa ilang pagkabatan-on;+ kay ang katawhan sa Israel padayong nagpasuko kanako pinaagi sa buhat sa ilang mga kamot,’ miingon si Jehova. 31 ‘Kay kining siyudara, sukad sa adlaw nga gitukod nila kini hangtod niining adlawa, wala nay laing gihimo gawas sa pagpasuko ug pagpapungot kanako,+ mao nga angay kining wagtangon gikan sa akong atubangan,+ 32 tungod sa tanang daotan nga gihimo sa katawhan sa Israel ug Juda sa pagpasuko kanako—sila, ang ilang mga hari,+ ilang mga prinsipe,+ ilang mga saserdote, ilang mga propeta,+ ug ang mga tawo sa Juda ug mga molupyo sa Jerusalem. 33 Ug sila padayong mitalikod kanako imbes moatubang;+ bisag gitudloan nako sila nga balikbalik,* walay usa kanila nga namati aron madisiplina.+ 34 Ug gipamutang nila ang ilang makaluod nga mga idolo diha sa balay nga nagdala sa akong ngalan, aron hugawan kini.+ 35 Dugang pa, sila naghimog tag-as nga dapit ni Baal sa Walog sa Anak ni Hinnom,*+ aron sunogon* sa kalayo ang ilang mga anak nga lalaki ug babaye alang kang Molek,+ butang nga wala nako isugo kanila.+ Ug wala gyod mosantop sa akong hunahuna* nga mobuhat nianang dulumtanang butang, ug tungod niana, ang Juda nakasala.’
36 “Busa kini ang giingon ni Jehova nga Diyos sa Israel bahin niining siyudara nga giingon ninyong itugyan ngadto sa kamot sa hari sa Babilonya pinaagig espada, gutom, ug kamatay, 37 ‘Ania, tigomon nako sila gikan sa tanang kayutaan diin nako sila gipatibulaag tungod sa akong kasuko ug kapungot ug dakong kasuko,+ ug dad-on nako silag balik niining dapita ug papuy-on sila nga may kasegurohan.+ 38 Ug sila mahimong akong katawhan, ug ako mahimong ilang Diyos.+ 39 Ug hatagan nako silag usa ka kasingkasing+ ug usa ka dalan aron kanunay silang mahadlok kanako, alang sa ilang kaayohan ug sa kaayohan sa ilang mga anak.+ 40 Ug maghimo kog walay kataposang pakigsaad uban kanila,+ nga dili ko mohunong sa pagbuhat ug maayo kanila;+ ug ibutang nako sa ilang kasingkasing ang pagkahadlok kanako, aron dili sila motalikod kanako.+ 41 Ug malipay ko sa pagbuhat ug maayo kanila,+ ug lig-on nako silang itanom niining yutaa,+ sa bug-os nakong kasingkasing ug sa bug-os nakong kalag.’”*
42 “Kay kini ang giingon ni Jehova, ‘Sama nga akong gipahinabo niini nga katawhan kining tanang dagkong katalagman, ipahinabo usab nako kanila ang tanang maayong butang* nga akong gisaad kanila.+ 43 Ug ang mga uma niining yutaa pamaliton pag-usab,+ bisag miingon mo: “Kini nga yuta umaw ug walay tawo ug mananap, ug gitugyan na kini sa kamot sa mga Caldeanhon.”’
44 “‘Ang mga uma pamaliton, ang mga kasulatan sa pagpalit himoon ug selyohan, ang mga saksi tawgon sa yuta sa Benjamin,+ sa mga dapit sa palibot sa Jerusalem, sa mga siyudad sa Juda,+ sa mga siyudad sa kabukiran, sa mga siyudad sa kapatagan,+ ug sa mga siyudad sa habagatan, kay dad-on nakog balik ang mga nabihag kanila,’+ miingon si Jehova.”