12 Ang nahigugma sa disiplina nahigugma sa kahibalo,+
Apan ang nagdumot sa pagbadlong walay maayong panghukom.+
2 Uyonan ni Jehova ang maayong tawo,
Apan hukman Niya ang nagplanog daotan.+
3 Walay tawo nga mahimong luwas pinaagi sa paghimog daotan,+
Apan ang matarong dili maluka.
4 Ang maayong asawa korona sa iyang bana,+
Apan ang asawa nga makauulaw ug buhat samag sakit nga modaot sa kabukogan sa iyang bana.+
5 Ang mga hunahuna sa matarong maoy hustisya,
Apan ang giya gikan sa daotan malimbongon.
6 Ang mga pulong sa daotan samag kaaway nga nangatang aron mopatay,+
Apan ang baba sa matul-id maoy makaluwas.+
7 Dihang laglagon ang daotan mawala na sila,
Apan ang panimalay sa matarong magpabilin.+
8 Ang tawo nga nag-amping sa iyang sinultihan dayegon,+
Apan ang daotag kasingkasing tamayon.+
9 Mas maayo pa ang dili kaayo inila pero naay sulugoon
Kay sa hambogiro nga walay pagkaon.+
10 Ang matarong nagaatiman sa iyang mga hayop,+
Apan bisan ang kaluoy sa daotan mapintas.
11 Ang nagtikad sa iyang yuta mabuhong sa pagkaon,+
Apan ang nangagpas sa way pulos nga mga butang dili maayog panghunahuna.
12 Ang daotan masina sa nakuha sa ubang tawong daotan,
Apan ang matarong samag kahoy nga nagapamunga kay nakagamot pag-ayo.
13 Ang daotan malit-agan sa iyang daotang sinultihan,+
Apan ang matarong makaikyas sa kasakitan.
14 Ang ginasulti sa usa ka tawo maghatag niyag kaayohan,+
Ug ang iyang ginabuhat maghatag niyag ganti.
15 Ang dalan sa buangbuang husto sa iyang panan-aw,+
Apan ang maalamon modawat ug tambag.+
16 Ipakita dayon sa buangbuang nga nasuko siya,+
Apan balewalaon ra sa maalamon ang insulto.
17 Ang matinud-anong saksi mosultig tinuod,
Apan ang bakakong saksi manglimbong.
18 Ang mga pulong nga wala hunahunaa samag dunggab sa espada,
Apan ang dila sa maalamon makaayo.+
19 Ang matinud-anong ngabil magpabilin hangtod sa hangtod,+
Apan ang bakakong dila dili magdugay.+
20 Ang pagpanglimbong naa sa kasingkasing niadtong nagplanog daotan,
Apan malipayon kadtong nagpasiugdag kalinaw.+
21 Walay kadaot nga modangat sa matarong,+
Apan ang daotan daghag katalagman.+
22 Ang bakakong ngabil dulumtanan kang Jehova,+
Apan ang matinumanon makapalipay niya.
23 Ang maalamon nagatago sa iyang nahibaloan,
Apan ang kasingkasing sa buangbuang manulti sa iyang mga kabuang.+
24 Ang mga kugihan mao ang magmando,+
Apan ang mga tapolan mao ang maulipon.+
25 Ang kabalaka diha sa kasingkasing sa tawo makapaguol niya,+
Apan ang maayong pulong makapalipay niya.+
26 Ang matarong nagasusi sa iyang sibsibanan,
Apan ang dalan sa mga daotan magpasaag kanila.
27 Ang tapolan dili mogukod sa hayop nga dakponon,+
Apan ang pagkakugihan maoy bililhong bahandi sa usa ka tawo.
28 Ang dalan sa pagkamatarong motultol sa kinabuhi;+
Niining dalana walay kamatayon.