Jeremias

34 Kini ang mensahe nga nadawat ni Jeremias gikan kang Jehova, dihang si Haring Nabucodonosor* sa Babilonya ug ang tibuok niyang kasundalohan ug ang tanang gingharian sa yuta nga sakop niya ug ang tanang katawhan nakig-away sa Jerusalem ug sa tanang siyudad niini:+

2 “Kini ang giingon ni Jehova nga Diyos sa Israel, ‘Lakaw ug ingna si Haring Zedekias+ sa Juda: “Kini ang giingon ni Jehova, ‘Ania, itugyan nako kining siyudara ngadto sa kamot sa hari sa Babilonya, ug iya kining sunogon.+ 3 Ug dili ka makaikyas sa iyang kamot. Madakpan ka gayod ug itugyan ngadto kaniya.+ Ug makig-atubang ka sa hari sa Babilonya, ug siya makigsulti kanimo, ug ikaw dad-on sa Babilonya.’+ 4 Apan paminaw sa pulong ni Jehova, Oh Haring Zedekias sa Juda, ‘Kini ang giingon ni Jehova bahin kanimo: “Dili ka mamatay pinaagig espada. 5 Mamatay ka nga malinawon,+ ug sila maghimog seremonyas sa pagsunog ug insenso alang kanimo sama sa ilang gihimo alang sa imong mga amahan, ang kanhing mga hari nga nauna kanimo, ug sila magbangotan alang kanimo, ‘Pagkamakaluluoy sa among hari!’ kay ‘ako ang misulti niini,’ miingon si Jehova.”’”’”

6 Unya gisulti ni propetang Jeremias kining tanan ngadto kang Haring Zedekias sa Juda didto sa Jerusalem, 7 dihang ang kasundalohan sa hari sa Babilonya nakig-away sa Jerusalem ug sa tanang siyudad sa Juda nga nahibilin,+ batok sa Lakis+ ug sa Azeka;+ kay sa mga siyudad sa Juda, kini na lang ang nahibiling pinarilang mga siyudad.

8 Si Jeremias nakadawat ug mensahe gikan kang Jehova human maghimo si Haring Zedekias ug pakigsaad uban sa tanang katawhan sa Jerusalem sa pagpahigawas ug mga ulipon.+ 9 Angayng ipahigawas sa matag usa ang iyang Hebreohanong mga ulipon, lalaki ug babaye, aron walay usa nga padayong mag-ulipon sa iyang isigka-Hudiyo. 10 Busa ang tanang prinsipe ug ang tanang katawhan mituman. Miuyon sila sa pakigsaad nga ang matag usa magpahigawas sa iyang mga ulipong lalaki ug babaye ug nga sila dili na maghimo kanilang ulipon. Sila mituman ug nagpahigawas kanila. 11 Apan sa ulahi gipabalik nila ang mga ulipong lalaki ug babaye nga ilang gipahigawas, ug gipugos nila sila nga mahimong ulipon pag-usab. 12 Busa ang mensahe ni Jehova nadawat ni Jeremias gikan kang Jehova, nga nag-ingon:

13 “Kini ang giingon ni Jehova nga Diyos sa Israel, ‘Naghimo kog pakigsaad uban sa inyong mga katigulangan+ sa adlaw nga gipagawas nako sila sa yuta sa Ehipto, sa dapit diin sila naulipon,+ nga nag-ingon: 14 “Sa ikapitong tuig,* kinahanglang ipahigawas sa matag usa ang iyang Hebreohanong igsoon nga gibaligya kaniya ug nakasilbi kaniyag unom ka tuig; kinahanglan niya siyang ipahigawas.”+ Apan ang inyong mga katigulangan wala mamati o mosunod kanako. 15 Ug bag-o pa lang mong* nagbag-o ug nagbuhat kon unsay husto sa akong mga mata pinaagi sa pagpahigawas sa inyong isigkatawo, ug naghimo mog pakigsaad sa akong atubangan diha sa balay nga nagdala sa akong ngalan. 16 Apan mitalikod mo nako ug gipasipalahan ninyo ang akong ngalan+ pinaagi sa pagpabalik sa inyong mga ulipong lalaki ug babaye nga inyong gipahigawas, nga maoy ilang gitinguha, ug gipugos ninyo sila nga mahimong ulipon pag-usab.’

17 “Busa kini ang giingon ni Jehova: ‘Wala mo motuman kanako sa pagpahigawas sa inyong mga igsoon ug isigkatawo.+ Busa karon ipahigawas mo nako,’ miingon si Jehova, ‘ngadto sa espada, kamatay,* ug gutom,+ ug ipahinabo nako nga ang tanang gingharian sa yuta mangahadlok tungod kaninyo.+ 18 Ug kini ang mahitabo sa mga tawo nga milapas sa akong pakigsaad pinaagi sa dili pagtuman sa mga pulong sa pakigsaad nga ilang gihimo sa akong atubangan dihang gipikas nila ang nating baka ug miagi sa taliwala niini,+ 19 nga mao, ang mga prinsipe sa Juda, mga prinsipe sa Jerusalem, mga opisyal sa palasyo, mga saserdote, ug ang tanang katawhan sa yuta nga miagi sa taliwala sa napikas nga nating baka: 20 Itugyan nako sila sa kamot sa ilang mga kaaway ug niadtong mga nagtinguha sa ilang kinabuhi, ug ang ilang patayng lawas mahimong pagkaon sa mga langgam sa kalangitan ug sa mga mananap sa yuta.+ 21 Ug akong itugyan si Haring Zedekias sa Juda ug ang iyang mga prinsipe ngadto sa kamot sa ilang mga kaaway ug sa kamot niadtong mga nagtinguha sa ilang kinabuhi ug sa kamot sa kasundalohan sa hari sa Babilonya,+ nga miatras sa pag-atake kaninyo.’+

22 “‘Ania, ihatag nako ang mando,’ miingon si Jehova, ‘ug pabalikon nako sila niining siyudara, ug sila makig-away niini ug magbihag ug magsunog niini;+ ug ang mga siyudad sa Juda himoon nakong awaaw ug walay molupyo.’”+