Deuteronomio
6 “Kini ang mga sugo, mga regulasyon, ug hudisyal nga mga hukom nga gihatag ni Jehova nga inyong Diyos aron itudlo kaninyo, nga inyong tumanon inigtabok ninyo ngadto sa yuta nga inyong panag-iyahon, 2 aron sa tibuok ninyong kinabuhi mahadlok mo kang Jehova nga inyong Diyos ug motuman sa tanan niyang mga lagda ug mga sugo nga akong gihatag kaninyo, sa inyong mga anak, ug sa inyong mga apo,+ ug mabuhi mog dugay.+ 3 Ug paminaw, Oh Israel, ug tumana gayod kana, aron mouswag ug modaghan mo pag-ayo sa yuta nga abunda sa gatas ug dugos, sumala sa gisaad kaninyo ni Jehova, ang Diyos sa inyong mga katigulangan.
4 “Paminaw, Oh Israel: Si Jehova ang atong Diyos; usa lang gyod si Jehova.+ 5 Higugmaa si Jehova nga imong Diyos sa bug-os mong kasingkasing, sa bug-os mong kalag,*+ ug sa bug-os mong kusog.+ 6 Kining mga pulonga nga akong gisugo kanimo niining adlawa ibutang gayod sa imong kasingkasing, 7 ug isilsil kini* sa imong mga anak+ ug isulti kini dihang maglingkod ka sa imong balay, dihang maglakaw ka sa dalan, dihang maghigda ka, ug dihang mobangon ka.+ 8 Ihigot kini sa imong kamot ingong pahinumdom, ug kinahanglan nga sama kinig bugkos diha sa imong agtang.*+ 9 Isulat kini diha sa mga haligi sa pultahan sa imong balay ug sa imong mga ganghaan.
10 “Dihang dad-on ka ni Jehova nga imong Diyos sa yuta nga iyang gisaad sa imong mga katigulangan nga si Abraham, Isaac, ug Jacob nga iyang ihatag kanimo+—dagko ug nindot nga mga siyudad nga dili ikaw ang nagtukod,+ 11 mga balay nga punog maayong mga butang nga wala nimo hagoi, mga gahong nga pondohanag tubig nga wala nimo kubkoba, mga ubasan ug kaolibohan nga wala nimo itanom—ug makakaon ka ug mabusog,+ 12 pagbantay nga dili ka malimot kang Jehova,+ nga nagpagawas nimo sa Ehipto diin giulipon ka. 13 Kahadloki si Jehova nga imong Diyos,+ ug siyay alagara,+ ug panumpa pinaagi sa iyang ngalan.+ 14 Ayawg sunod sa ubang mga diyos, sa bisan unsang diyos sa katawhan palibot nimo,+ 15 kay si Jehova nga imong Diyos nga naa sa imong taliwala maoy Diyos nga nangayog eksklusibong debosyon.+ Kay kon dili, mosilaob ang kasuko ni Jehova nga imong Diyos batok nimo+ ug laglagon ka niya.+
16 “Ayawg sulayi si Jehova nga inyong Diyos parehas sa inyong pagsulay+ niya didto sa Masah.+ 17 Tumana gyod ninyo ang mga sugo ni Jehova nga inyong Diyos, ang iyang mga pahinumdom, ug ang iyang mga regulasyon nga gihatag niya aron inyong tumanon. 18 Buhata kon unsay matarong ug maayo sa panan-aw ni Jehova, aron mouswag mo ug makasulod ug makapanag-iya sa maayong yuta nga gipanumpa ni Jehova sa inyong mga katigulangan,+ 19 pinaagi sa pag-abog sa tanan ninyong kaaway gikan sa inyong atubangan, sumala sa gisaad ni Jehova.+
20 “Sa umaabot, kon pangutan-on ka sa imong anak, ‘Nganong gihatagan man ta ni Jehova nga atong Diyos ug mga pahinumdom, mga regulasyon, ug hudisyal nga mga hukom?’ 21 ingna ang imong anak, ‘Nahimo ming ulipon sa Paraon sa Ehipto, pero gipagawas mi ni Jehova sa Ehipto pinaagi sa iyang gamhanang kamot. 22 Nakita namo ang dagkong mga ilhanan ug mga milagro nga nakapahinabog grabeng kalaglagan nga gipadangat ni Jehova sa Ehipto,+ sa Paraon, ug sa tibuok niyang panimalay.+ 23 Gipagawas mi niya didto ug gidala mi dinhi aron ihatag kanamo ang yuta nga iyang gipanumpa sa among mga katigulangan.+ 24 Unya gisugo mi ni Jehova nga tumanon kining tanang regulasyon ug kahadlokan si Jehova nga atong Diyos para sa atong dumalayong kaayohan,+ aron magpabilin tang buhi,+ parehas karon. 25 Kon tumanon gyod nato kining tanang sugo ug magmasinugtanon kang Jehova nga atong Diyos sumala sa iyang gisugo, isipon tang matarong.’+