Sa Dihang ang Kaharmonya Maglungtad na sa Tibuok Kalibotan

NAKAKITA ka na bag mga tawo nga hawod kaayong manayaw ug ballet, mga ice skater, o mga sirkador nga nagtabyogtabyog diha sa trapeze? Ang matag lihok nila nagkinahanglan ug kahanas ug abilidad, nga may bug-os nga pagtinabangay ug koordinasyon. Makapahupay gayod kon ang kinabuhi karon mahisama niana​—nga may kaharmonya ug walay panagsumpaki ug panagbangi. Hinunoa, ang mga tawo “dili-ikasabot,” sama sa gitagna sa Bibliya bahin sa atong panahon.​—2 Timoteo 3:1-5.

Bisan pa niana, niining malisod nga palibot, milyonmilyong matinud-anog-kasingkasing nga mga tawo ang nakakat-on sa pagkinabuhi diha sa tinuod nga pakigdait ug kaharmonya sa usag usa. Sa unsang paagi? Pinaagi sa pagdawat sa mainitong pagdapit nga natala sa Bibliya sa Isaias 48:​17, 18. Kini nag-ingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.”

Kon atong dawaton kanang kinasingkasing nga pagdapit, sa usa ka diwa, si Jehova mahimong atong Magtatabang. Gipakita niya kanato kon unsaon ‘paglakaw’ diha sa tinuod nga pakigdait ug kaharmonya. Ang giingon nga kapilian​—ang pagsagop sa mga teoriya ug mga pilosopiya sa dili-hingpit nga mga tawo​—maoy kabuangan. Sublisubli nga gipamatud-an sa tawhanong kasaysayan ang paninugdang kamatuoran nga gihisgotan sa Jeremias 10:23: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” Sa laktod nga pagkasulti, wala kitay kapasidad sa pagmando sa atong kaugalingon ug pag-establisar ug usa ka maayo ug dalawaton-sa-tanan nga moral nga sukdanan. Iya lamang sa Diyos ang maong katungod.​—Isaias 33:22.

Tinuod nga Pakigdait ug Kaharmonya

Sa dili madugay ipahinabo na sa Diyos ang kaharmonya sa atong yuta. Siya nagsaad nga moabot ang panahon nga “ang yuta mapuno sa kahibalo kang Jehova ingon sa katubigan nga nagtabon sa dagat mismo.” (Isaias 11:9) Oo, ang permanenteng pakigdait molungtad na gayod.

Sa pagkatinuod, ang buhing mga linalang sa yuta makasinati ug bag-ong matang sa kaharmonya, kay ang Diyos magtudlo sa iyang maunongong ginsakpan nga mga tawo nga mahimong ekspertong mga tig-atiman sa ilang yutang puy-anan. Siya ‘maghimo pa gani ug usa ka pakigsaad,’ pagaingnon pa, sa tanang manunukob nga mga mananap aron sila magpuyo nga makigdaitong magpasakop sa mga tawo.​—Oseas 2:18; Genesis 1:26-28; Isaias 11:6-8.

Kining paglaoma dili pangandoy lamang. Gani, diha sa iyang Wali sa Bukid, kaduha na kini hisgoti ni Jesus. Una, siya miingon: “Malipayon ang mga malumog-buot, sanglit sila magapanunod sa yuta.” Dayon, sa dihang gitudloan niya ang iyang mga tinun-an kon unsaon pag-ampo, siya miingon: “Amahan namo . . . , matuman unta ang imong kabubut-on, maingon sa langit, mao man usab sa yuta.” (Mateo 5:1-5; 6:​9, 10) Sa hapit na siyang mamatay, gisumaryo ni Jesus ang ipasabot niini alang sa mga tawo diha sa usa ka matahom nga pulong​—“paraiso.” (Lucas 23:43) Sa pagkatinuod, tungod sa giulang dugo ni Jesus, ang paglaom sa walay-kataposang kinabuhi diha sa usa ka yutan-ong paraiso mamatuman gayod!​—Juan 3:16.

[Hulagway sa panid 12]

Sa umaabot nga Paraiso sa Diyos, ang kinabuhi sa yuta makasinati ug bag-ong matang sa kaharmonya