Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 1
Ang Tinguha sa Kalinaw ug Kasegurohan sa Tibuok Kalibotan
ANG kalinaw ug kasegurohan mao ang buot nato dinhi sa yuta. Ang panginahanglan sa maong maayong kahimtang labi pang dinalian karong adlawa. Kini matuod dili lamang kanatong mga indibiduwal kondili sa tibuok usab tawhanong banay sa tibuok yuta.
2 Kana ang hinungdan nga ang populasyon sa yuta nagakinabuhi karon sa labing bililhong panahon! ‘Sa unsang paagi kini matuod,’ tingali mangutana ka, ‘sanglit kita karon layo nag naabot sa labing makalilisang yugto sa tibuok kasaysayan sa tawo, ang panahon sa nukleyar nga armas?’
3 Labing menos walo ka nasod gitaho nga arang makagamag nukleyar nga bomba. Ug gibanabanang 31 ka nasod makabatog nukleyar nga armas sa pagkatuig 2000. Ang ilang katarongan sa pagbaton sa kinalabwang mga bomba giingon nga mao ang panalipod, usa ka pugong sa ubang susamang armadong kanasoran, usa ka pagbahad sa pagbalos pinaagig nukleyar nga armas. Atubangan nianang kahimtang sa kahikayan sa kalibotan, ang ordinaryong sentido komun magdiktar nga ang kanasoran angay magkauyon sa pagpuyong tupad nga magtinugotay sa usag usa.
4 Apan, yano bang hinimog-tawong kalinaw ang buot nato, uban sa kasegurohan nga ikatagana sa tawo? Bisan tuod ang Maglalalang wala magbabag sa tawhanong paningkamot sa pagtukod ug pagmentenar sa kalinaw ug kasegurohan sa tibuok kalibotan, siya dunay iyang kaugalingong hingpit nga paagi sa pagtagbaw sa atong kinaiyanhong tinguha sa kalinaw ug kasegurohan. Siya dunay iyang kaugalingong tinudlong panahon sa pagwagtang sa tanang nagadisturbo sa kasegurohan niadtong buot magsimba kaniya. Dako gayod ang atong kalipay nga masayrang haduol na ang iyang panahon alang niini!
5 Tapos ang linibong katuigan sa masamokong kasaysayan sa tawo, pagadahomon nga angay adunay dakong tinguha sa tibuok yuta alang sa kalinaw ug kasegurohan. Ang yuta maoy kinaiyanhong puy-anan sa tawo sukad sa sinugdan mismo sa paglungtad sa tawo. Ang dinasig nga salmista miingon: “Mahitungod sa mga langit, ang mga langit iya ni Jehova, apan ang yuta iyang gihatag ngadto sa mga anak sa mga tawo.” (Salmo 115:16) Sukad gayod sa sinugdan, maoy mahigugmaong katuyoan sa Maglalalang nga tagamtamon sa tawo ang tugob nga kinabuhi diha sa iyang hinatag-sa-Diyos nga yutang pinuy-anan.
6 Sumala sa talaan sa paglalang sa Genesis 2:7, “Giumol sa Diyos ang tawo gikan sa abog sa yuta ug gihuypan ang iyang mga ilong sa gininhawa sa kinabuhi, ug ang tawo nahimong usa ka buhing kalag.” Walay laing buhing linalang sa yuta ang katupong sa matang sa kinabuhi sa tawo o katupong sa katakos sa tawo—nga arang makalihok sama sa Diyos kon bahin sa paggamit sa kagahom. Dugang pa, ang maong kagahom dili lamang iya sa unang tawhanong linalang apan pagagamiton usab ug pahimuslan sa iyang mga anak.
7 Sa maong katarongan, ang Maglalalang mihatag kang Adan ug usa ka asawa. Siya ang mahimong inahan sa tanang umaabot tawhanong mga pumuluyo sa yuta. Kana ang hinungdan, sa gipresentahan sa maong hingpit nga linalang, ang lalaki nakaingon: “Sa kataposan kini ang bukog sa akong mga bukog ug ang unod sa akong unod.” Busa iyang gipahayag siya ang babaye sa tawhanong matang, ang ’ish·shahʹ, nga mao ang babayen-ong porma sa Hebreohanong pulong gihubad lalaki, nga mao, ’ish.—Genesis 2:21-23.
8 Ang Maglalalang ug langitnong Amahan miingon ngadto sa unang tawhanong magtiayon: “Sumanay kamo ug dumaghan ug pun-a ang yuta ug gamhi kini.” (Genesis 1:28) Ang maong paagi bug-os bag-o sa kasaysayan sa intelihenteng kalalangan. Ang espirituwal nga mga pumuluyo sa dili-makitang kalangitan wala patunghaa pinaagig pagsanay.
9 Dili katingalahan nga, sa panahon sa paglalang sa yuta, “ang mga bituon sa kabuntagon nagdungan sa pag-awit, ug ang tanang anak sa Diyos misinggit nga namakpak.” (Job 38:7) Niadtong panahona, ang tanan malinawon ug may panaghiusa sa tibuok uniberso. Sa ikawalong salmo, kay nalipay sa balaang kahikayan sa mga butang, ang salmista mipatugbaw mahitungod sa tawo: “Imo usab siyang gibuhat nga ubos kay sa mga samag-diyos, ug unya uban ang himaya ug katahom imo siyang gipurongpurongan.” (Bersikulo 4, 5) Sumala sa maong salmo, ang tanang butang dinhi sa yuta gibutang sa Diyos sa ilalom sa mga tiil sa tawo.
Ang Sinugdanan sa Kaindig nga Pagmando
10 Katingalahan, una pa isamkon ang unang tawhanong anak, ang pag-alsa mibutho sa unibersohanong organisasyon ni Jehova nga Diyos. Ang kahimtang mitultol sa pagpatindog sa usa ka bag-ong pagmando, usa ka bag-ong labaw nga pagmando, ibabaw sa katawhan—kon ang katawhan ikabulag ug ikapahilayo gikan sa unibersohanong organisasyon ni Jehova. Ang usa ka pagmando matukod nga kaindig sa iyaha. Kini nagpasabot sa pagsulti sa unang bakak, nga nagpadayag kang Jehova nga Diyos sa bakak nga paagi.
11 Ang pagsulti sa unang kabakakan naghimo sa maong unang rebelde batok sa Diyos ang unang bakakon, ang unang yawa, o mapasipalahon. Nga lahi kaayo kaniya, si Jesu-Kristo miingon: “Ako ang dalan ug ang kamatuoran ug ang kinabuhi.” (Juan 14:6) Ngadto sa iyang relihiyosong mga magsusupak, si Jesus miingon: “Kamo nagagikan sa inyong amahan ang Yawa, ug buot ninyong buhaton ang mga tinguha sa inyong amahan. Siya usa ka mamumuno sa iyang pagsugod, ug siya wala magpabilin sa kamatuoran, tungod kay ang kamatuoran wala man kaniya. Sa dihang magasulti siya sa bakak, siya magasulti sumala sa iyang kaugalingong kinaiya, tungod kay siya bakakon ug ang amahan sa bakak.”—Juan 8:44.
12 Pinaagi sa pagsulti nga gigamit ang usa ka bitin sa tanaman sa Eden, o paraiso sa kalipay, gipahayag sa Yawa ang unang bakak ngadto sa unang babaye. Iyang giangkon nga ang iyang Maglalalang maoy bakakon, sa ingon nagtugaw sa kalinaw sa hunahuna ni Eva. Gipabati niya ang babaye sa kawalay-kasegurohan diha sa iyang gihunahuna nga kahimtang sa kawalay-alamag, mao nga siya mikaon sa gidiling bunga. Iyang nadani ang iyang bana, si Adan, sa pagkaon sa gidiling bunga duyog kaniya ug sa ingon mikuyog kaniya sa iyang pag-alsa batok kang Jehova nga Diyos. (Genesis 3:1-6) Ang masupilong magtiayon nawad-an sa ilang kalinaw uban sa Diyos ug gipapahawa sa paraiso sa kalipay aron magkinabuhi sa kahimtang sa kawalay-kasegurohan sa gawas. Ang Roma 5:12 nagabatbat niining makapasubong kahimtangan, nga nagaingon: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug sa ingon ang kamatayon mikuyanap ngadto sa tanang tawo tungod kay silang tanan nakasala.”
13 Tungod sa kahimtang sa atong adlaw kinahanglan kita mohimog tinong pagpili. Kini maoy pagpili tali sa kaindig nga pagmando ni Satanas nga Yawa, “ang diyos niining sistema sa mga butang,” ug ang pagmando ni Jehova, ang Labing Hataas ug Diyos nga Makagagahom sa Tanan sa uniberso.—2 Corinto 4:4; Salmo 83:18.
Ang Paagi sa Pagpahimulos sa Pakigdait Uban sa Diyos
14 Uban ang kadaotan sa ilang kaugalingon, ang kinabag-an sa katawhan dili buot modawat o motuo sa tagna sa Diyos nga Makagagahom sa Tanan alang sa iyang mga magsisimba sa pagpahimulos sa relatibong kalinaw ug kasegurohan bisan niining labing makapasubong kahimtang sa tawhanong kahikayan. Bisan pa niana, si Jehova mao “ang Diyos nga nagahatag ug pakigdait,” ug maoy atong bulahang pribilehiyo karon nga mosulod ngadto sa kalinaw ug kasegurohan nga dili gayod mapakyas. (Roma 16:20; Filipos 4:6, 7, 9) Kini maoy kalinaw ug kasegurohan nga ginahatag niya bisan karon sa iyang hugpong sa yutan-ong mga alagad, ang iyang makitang organisasyon, ingong katumanan sa iyang kanunay-kasaligang mga saad. Kini kalinaw ug kasegurohan nga ato lamang kapahimuslan sa pagpakig-uban sa iyang makitang organisasyon sa yuta.
15 Dili mahiuyon sa yanong mga pagtulon-an sa Kasulatan ang pagtuo nga ang Diyos walay usa ka organisasyon, usa ka organisadong katawhan, nga iyang giilang linain. Giila ni Jesu-Kristo nga ang iyang langitnong Amahan may makitang organisasyon. Hangtod sa Pentekostes 33 K.P., kadto ang Hudiyong organisasyon nga may relasyon sa pakigtugon uban kang Jehova nga Diyos ilalom sa Kasugoan ni Moises.—Lucas 16:16.
16 Maingon nga ang karaang nasod sa Israel diha sa relasyong may pakigtugon uban kang Jehova nga Diyos pinaagi sa tigpataliwalang si Moises, ang nasod usab sa espirituwal nga Israel, “ang Israel sa Diyos,” may relasyon tungod sa pakigtugon pinaagi sa usa ka tigpataliwala. (Galacia 6:16) Kini maoy sumala sa gisulat ni apostol Pablo ngadto sa iyang Kristohanong kaubang magbubuhat: “Adunay usa ka Diyos, ug usa ka tigpataliwala tali sa Diyos ug sa mga tawo, ang tawo, si Kristo Jesus.” (1 Timoteo 2:5) Si Moises mao ba ang tigpataliwala tali kang Jehova nga Diyos ug sa katawhan sa linangkob? Dili, siya mao ang tigpataliwala tali sa Diyos ni Abraham, Isaac, ug Jacob ug sa nasod sa ilang unodnong mga kaliwat. Sa susama, ang Labawng Moises, si Jesu-Kristo, dili mao ang Tigpataliwala tali kang Jehova nga Diyos ug sa tanang tawo. Siya mao ang Tigpataliwala tali sa iyang langitnong Amahan, si Jehova nga Diyos, ug sa nasod sa espirituwal nga Israel, nga limitado lamang sa 144,000 ka membro. Kining espirituwal nga nasod maoy sama sa gamayng panon sa mga karnerohon ni Jehova.—Roma 9:6; Pinadayag 7:4.
Magbalantay Ibabaw sa Labaw pa kay sa “Gamay nga Panon”
17 Sa Salmo 23:1, si Haring David sa karaang Israel nadasig sa pag-ingon: “Si Jehova mao ang akong Magbalantay. Ako walay nakulang.” Si Jehova, ang Labawng Magbalantay, nagtudlo kang Jesu-Kristo nga mahimong “ang maayong magbalantay.” (Juan 10:11) Sa Lucas 12:32, si Jesus nakigsulti ngadto niadtong kanila siya mao ang Maayong Magbalantay: “Ayaw kahadlok, gamay nga panon, tungod kay nauyonan sa inyong Amahan ang paghatag kaninyo sa gingharian.”
18 Sa karaang panahon, may mga dili-Hudiyo, sama sa Nethinim ug ang mga anak sa dili-Israelinhong mga alagad ni Solomon, kinsa nakig-uban sa nasod sa Israel. (Esdras 2:43-58; 8:17-20) Sa susama karong adlawa, adunay mga lalaki ug mga babaye nga bug-os dedikado ngadto sa Diyos pinaagi kang Jesu-Kristo apan dili espirituwal nga mga Israelinhon. Hinuon, sila nakig-uban sa nahibilin sa espirituwal nga Israel tungod sa pagpahinungod sa ilang kaugalingon kang Jehova nga Diyos pinaagi kang Jesu-Kristo, “kinsa mitugyan sa iyang kaugalingon nga usa ka katumbas nga lukat alang sa tanan.” (1 Timoteo 2:6) Karong adlawa, kini sila labaw kaayo sa gidaghanon kay sa 144,000 espirituwal nga Israelinhon, kinsa maoy manunod sa langitnong Gingharian.
19 Busa si Jesu-Kristo igatudlo, sa nahaigong panahon sa Diyos, nga mahimong Magbalantay sa labi pang dakong panon sa mga karnerohon nga makabaton sa yutan-ong panulondon pinaagi kaniya. Kini sila mao ang diha sa iyang hunahuna sa miingon siya: “Ako adunay ubang mga karnero, nga wala niining torila; sila usab akong pagadad-on, ug sila magapatalinghog sa akong tingog, ug sila mahimong usa ka panon, usa ka magbalantay.” Kay diha usab sa hunahuna kining “ubang mga karnero,” si apostol Juan misulat usab bahin kang Jesus: “Siya mao ang pasig-uli nga halad alang sa atong mga sala, apan dili lamang alang sa atoa kondili alang usab sa iya sa tibuok kalibotan.”—Juan 10:16; 1 Juan 2:2.
20 Karong adlawa, adunay mga 9,000 nga nagaangkong mga membro sa nahibilin sa “gamay nga panon” sa espirituwal nga mga karnero. Sa laing bahin, adunay minilyong mga dedikado nga nakig-uban sa dinihogang nahibilin sa pagsunod sa mga lakang sa Maayong Magbalantay, si Jesu-Kristo. Sila hikaplagan diha sa kapin sa 200 ka nasod sa tibuok yuta. Unsay kahulogan alang kanilang tanan sa pag-atiman sa maong Maayong Magbalantay? Kini nagkahulogan sa pagpahimulos sa kalinaw ug kasegurohan! Kon sila walay pakigdait sa ilang mga kapunongan, wala untay kinasingkasing nga panaghiusa ug dili-mabugtong kooperasyon sa ilang taliwala. Kon sila walay mutuwal nga kabalaka sa usag usa kon bahin sa espirituwal nga intereses, dili unta nila mabatonan ang kasegurohang ilang gipahimuslan. Busa, ang ilang tinguha sa kalinaw ug kasegurohan sa tibuok yuta nasugdan sa pagtagbaw bisan karon.
[Mga Pangutana ng Pagatun-an]
1, 2. Unsang dinaliang panginahanglan ang nabatonan sa katawhan, ug ngano?
3. (a) Unsay giingon nga maoy hinungdan sa pagbaton sa kanasoran sa nukleyar nga bomba? (b) Unsay idiktar sa ordinaryong sentido komun?
4. Bisan pag ang Maglalalang wala mobabag sa tawhanong paningkamot sa pagpangitag kasegurohan, unsay iyang katuyoan bahin niini?
5. Unsay giingon sa dinasig nga salmista mahitungod sa yuta, ug unsa ang katuyoan sa Maglalalang alang sa tawo?
6. Sa unsang bahin ang unang tawo ug iyang kaliwat makaarang sa paglihok nga sama sa Diyos?
7. Sa unsang paagi si Adan nakabatog asawa, ug unsay iyang giingon dihang ang maong hingpit nga linalang gipresentar kaniya?
8. Unsang mga instruksiyon ang gihatag sa Maglalalang ngadto sa unang tawhanong magtiayon?
9. Giunsa pagbatbat sa Salmo 8:4, 5 ang balaang kahikayan sa mga butang?
10. (a) Una isamkon ang unang tawhanong anak, unsay mibutho? (b) Sa ingon unsay natukod ibabaw sa katawhan?
11. Pinaagi sa pagpadayag kang Jehova nga Diyos sa bakak nga paagi, ang unang rebelde nahimong unsa?
12. (a) Sa unsang paagi gipahinabo sa Yawa nga isulti ang unang bakak, ug unsa ang epekto niana diha kang Eva? (b) Unsay misangpot sa dihang si Adan mikaon sa gidiling bunga?
13. Unsang pagpili ang kinahanglang himoon sa matag usa kanato karong adlawa?
14. Unsang kalinaw ug kasegurohan ang masugdan nato sa pagpahimulos bisan karon?
15. Dili ba makataronganon ang paghunahunang ang Diyos may usa ka organisasyon, ug unsay giila ni Jesu-Kristo?
16. (a) Tali kang kinsa nga si Moises ang tigpataliwala? (b) Tali kang kinsa ang Labawng Moises, si Jesu-Kristo, ang Tigpataliwala?
17. (a) Gitudlo ni Jehova nga Diyos nga mahimong unsa si Jesu-Kristo? (b) Unsay giingon ni Jesus ngadto niadtong manunod sa langitnong Gingharian?
18. (a) Kinsa karong adlawa ang katumbas sa Nethinim ug sa mga anak sa dili-Israelinhong mga sulugoon ni Solomon? (b) Uban kang kinsa sila suod nakig-uban?
19. Unsay giingon ni Jesu-Kristo ang magapaila nga siya maoy Magbalantay ibabaw sa labaw pa kay sa “gamay nga panon”?
20. (a) Komosta ang gidaghanon sa “ubang mga karnero” kon itandi sa iya sa mga nahibilin sa “gamay nga panon”? (b) Unsay kahulogan sa pag-atiman sa Maayong Magbalantay alang kanilang tanan?