Kapitulo 15

Kaugmaran sa Katukoran sa Organisasyon

ANG palakaw sa organisasyon sa mga Saksi ni Jehova nailalom sa dagkong mga kausaban sukad nga gisugdan ni Charles Taze Russell ug sa iyang mga kauban ang pagtuon sa Bibliya niadtong 1870. Sa dihang diyutay pa lang ang mga Estudyante sa Bibliya, kabos sila sa kon unsay alang sa mga taga-gawas mahimong tawgong usa ka organisasyon. Apan, karong adlawa, samtang panid-an sa mga tawo ang mga kongregasyon sa mga Saksi ni Jehova, ang ilang mga kombensiyon, ug ang ilang pagwali sa maayong balita diha sa kapin sa 200 ka kayutaan, sila nahingangha sa kahusay sa pagpalakaw sa organisasyon. Sa unsang paagi kana naugmad?

Ang mga Estudyante sa Bibliya ikag kaayo sa pagsabot dili lamang sa doktrina sa Bibliya apan usab sa paagi nga ang pag-alagad sa Diyos pagahimoon, sama sa gipaila sa Kasulatan. Ilang naamgohan nga ang Bibliya wala mohatag ug pasikaranan alang sa tituladong klerigo, nga may ginsakpan nga ilang pagawalihan. Si Brader Russell determinado nga walay matang sa klero taliwala kanila.a Pinaagi sa mga lindog sa Watch Tower, ang iyang mga magbabasa sa subsob gipahinumdoman nga si Jesus nagsulti sa iyang mga sumusunod: “Ang inyong Pangulo usa lamang, si Kristo,” apan, “Kamong tanan mga magsoon.”​—Mat. 23:​8, 10.

Unang Asosasyon sa mga Estudyante sa Bibliya

Ang mga magbabasa sa Watch Tower ug sa susamang mga publikasyon sa wala madugay nakasabot nga aron mapahimut-an ang Diyos, kinahanglang mobulag sila sa bisan unsang simbahan nga napamatud-an sa iyang kaugalingon nga dili matinumanon sa Diyos pinaagi sa pag-una sa mga kredo ug mga tradisyon sa tawo inay kay sa iyang nasulat nga Pulong. (2 Cor. 6:​14-18) Apan human makabulag sa mga simbahan sa Kakristiyanohan, asa man sila paingon?

Diha sa usa ka artikulo nga nag-ulohang “Ang Ekklesia,”b si Brader Russell mipunting nga ang tinuod nga iglesya, ang Kristohanong kongregasyon, dili usa ka organisasyon nga may mga membro nga nag-uyon ug nagpaluyo sa hinimog-tawo nga kredo ug nagpatala sa ilang mga ngalan sa listahan sa usa ka iglesya. Inay, saysay niya, kana gilangkoban ug mga tawo nga “nagkonsagrar” (o, nagpahinungod) sa ilang panahon, mga kahanas, ug kinabuhi ngadto sa Diyos, ug anaa sa ilang atubangan ang kalaoman sa pagpakig-ambit sa langitnong Gingharian kauban ni Kristo. Kini sila, matud niya, maoy mga Kristohanong nahiusa diha sa bugkos sa Kristohanong gugma ug komon nga interes, nga misanong sa pagtultol sa espiritu sa Diyos, ug nga nagpasakop sa pagka-ulo ni Kristo. Si Brader Russell dili interesado sa pagtukod ug laing kahikayan, ug siya batok gayod sa bisag unsang paagi nga makatabang sa sektaryanismo nga naglungtad taliwala sa nangangkong mga Kristohanon.

Sa samang panahon, siya bug-os nga nakasabot sa panginahanglan nga ang mga alagad sa Ginoo magtigom, ingong kaharmoniya sa tambag diha sa Hebreohanon 10:​23-25. Sa personal siya mipanaw sa pagduaw ug sa pagpalig-on sa mga magbabasa sa Watch Tower ug sa pagtigom kanila kauban sa uban diha sa ilang kaugalingong dapit nga may susamang panghunahuna. Sayo niadtong 1881 siya mihangyo nga kadtong nagahimog regular nga mga tigom magpahibalo sa buhatan sa Watch Tower sa dapit nga kana ginahimo. Iyang nakita ang kahinungdanon sa pagpakisayod sa usag usa.

Hinuon, gitataw ni Brader Russell nga sila wala magsulay sa pagtukod ug usa ka “yutan-ong organisasyon.” Inay, siya nagkanayon, “kami nagasunod lamang nianang langitnong organisasyon​—‘kansang mga ngalan nahisulat sa langit.’ (Heb. 12:23; Luc. 10:20.)” Tungod sa makapasubong kasaysayan sa Kakristiyanohan, ang paghisgot sa “organisasyon sa iglesia” sa kasagaran magpahinumdom sa usa mahitungod sa sektaryanismo, sa pagmando sa klero, ug sa pagkamembro nga pinasikad sa pagsunod sa kredo nga gimugna sa usa ka relihiyosong konsilyo. Busa, sa dihang maghisgot bahin sa ilang kaugalingon, si Brader Russell mibati nga ang terminong “asosasyon” mas maayo.

Siya nasayod pag-ayo nga ang mga apostoles ni Kristo nagpormag mga kongregasyon ug nagtudlo ug mga ansiano sa kada usa. Apan siya nagtuo nga presente na pag-usab si Kristo, hinuon dili makita, ug siya mismo sa personal nagadumala sa kataposang pagpangani kanila nga mahimong mga manununod kauban niya. Tungod niining mga kahimtanga, si Brader Russell sa sinugdan mibati nga sulod sa panahon sa pagpangani ang kahikayan alang sa mga ansiano nga naglungtad niadto sa unang-siglong mga Kristohanong kongregasyon wala kinahanglana.

Bisan pa niana, samtang nagkadaghan ang mga Estudyante sa Bibliya, si Brader Russell nakasabot nga ang Ginoo nagmaneobra sa mga butang diha sa usa ka paagi nga lahi kay sa iya mismong gidahom. Ang pagpasibo sa panglantaw gikinahanglan. Apan sa unsang pasikaranan?

Pagtagana sa Unang mga Panginahanglan sa Nagkadako nga Asosasyon

Ang Watch Tower sa Nobyembre 15, 1895, halos gigugol sa bug-os sa ulohang “Uban sa Kaligdong ug Kahusay.” Sa prangka, gidawat didto ni Brader Russell: “Ang mga apostoles daghag ikasulti ngadto sa sayong Iglesya may labot sa kahusay diha sa mga panagkatigom sa mga balaan; ug dayag nga kita daw wala manumbaling bahin niining maalamong tambag, nga mibating kana daw dili kaayo importante, tungod kay ang Iglesya maoy haduol na gayod nga mosangko sa iyang dalan ug ang pagpangani maoy usa ka panahon sa pagbahinbahin.” Unsay nakatukmod kanila nga repasohon ang maong tambag?

Ang artikulo naglista ug upat ka kahimtang: (1) Dayag nga ang espirituwal nga pagtubo sa mga indibiduwal nagkadaiya sa usag usa. May mga tentasyon, pagsulay, kalisdanan, ug mga kapeligrohan nga ang tanan dili managsama ang kaandam sa pagsagubang. Mao nga, dihay panginahanglan alang sa maalamon ug matinumanong mga magtatan-aw, mga lalaking may kasinatian ug katakos, nga maikagon kaayo sa pagtagad sa espirituwal nga kaayohan sa tanan ug may katakos sa pagtudlo kanila diha sa kamatuoran. (2) Nakita nga ang panon nagkinahanglang panalipdan batok sa ‘mga lobo nga nagpakakarnero.’ (Mat. 7:​15, KJ) Kinahanglan silang palig-onon pinaagi sa pagtabang nga magbaton sa mabug-osong kahibalo sa kamatuoran. (3) Ang kasinatian nagpakita nga kon walay kahikayan alang sa pagtudlo sa mga ansiano sa pagpanalipod sa panon, ang pila mokuha nianang posisyona ug maghunahuna nga ang panon ilaha. (4) Kon walay mahusay nga kahikayan, basin ang mga indibiduwal nga maunongon sa kamatuoran mag-isip nga ang ilang serbisyo dili kinahanglan tungod sa impluwensiya sa pipila nga dili mouyon kanila.

Sa lamdag niini, ang Watch Tower nag-ingon: “Kami walay pag-ukon-ukon sa pagsugyot ngadto sa mga Iglesyac sa tanang dapit, kon sila daghan man o diyutay, sa Apostolikong tambag, nga, sa kada kompaniya, mopili ug mga ansiano gikan sa ilang taliwala aron sa ‘pagpakaon’ ug sa ‘pagtan-aw’ sa panon.” (Buh. 14:​21-23; 20:​17, 28) Ang lokal nga mga kongregasyon nagtuman niining maayong Kasulatanhong tambag. Kini maoy usa ka hinungdanong lakang diha sa pagtukod sa gambalay sa kongregasyon ingong kaharmoniya sa kon unsay milungtad sa mga adlaw sa mga apostoles.

Hinuon, segun sa paagi sa ilang pagsabot sa mga butang kaniadto, ang pagpili sa mga ansiano, ug sa mga deakono nga motabang kanila, gihimo pinaagi sa piliay sa kongregasyon. Kada tuig, o sa mas masubsob kon gikinahanglan, ang mga kuwalipikasyon niadtong mahimong makaalagad pagatagdon, ug himoon ang piliay. Sa pagkatinuod kadto usa ka demokratikanhong pamaagi, apan usa nga dihay mga limitasyon nga nagsilbing pugong nga gidesinyo ingong panalipod. Ang tanan diha sa kongregasyon gidasig sa pagrepaso nga maampingon sa Biblikanhong mga kuwalipikasyon ug sa pagpili, dili sumala sa ilang kaugalingong opinyon, apan kon unsay gituohan nilang kabubut-on sa Ginoo. Tungod kay kadto lamang “nakonsagrar sa bug-os” ang takos nga mopili, ang ilang tiningob nga boto, sa dihang giniyahan sa Pulong ug espiritu sa Ginoo, gihunahuna ingong kapahayagan sa kabubut-on sa Ginoo sa maong butang. Bisan pag si Brader Russell lagmit wala masayod niana sa bug-os, ang iyang rekomendasyon niining kahikayana tingali naimpluwensiyahan sa usa ka sukod dili lamang sa iyang determinasyon nga malikayan ang bisag unsang kaamgiran sa tinuboyng matang nga klero apan usab tungod sa iyang kasinatian ingong usa ka tin-edyer diha sa Kongregasyonal nga Simbahan.

Sa dihang ang tomo sa Millennial Dawn nga nag-ulohang The New Creation (gipatik niadtong 1904) sa makausa pa detalyadong mihisgot sa papel sa mga ansiano ug sa paagi nga sila pagapilion, ang linaing pagtagad gihatag sa Buhat 14:23. Ang mga konkordansiya nga tinigom ni James Strong ug Robert Young gigamit ingong mga awtoridad alang sa panglantaw nga ang pahayag nga “gikatudlo na nila ang mga anciano” (KJ) angayng hubaron nga “sila nagpili kanila ingong mga ansiano pinaagi sa pag-isa sa mga kamot.”d Ang pila ka hubad sa Bibliya nag-ingon pa gani nga ang mga ansiano maoy ‘gitudlo pinaagi sa pagboto.’ (Literal Translation of the Holy Bible ni Young; Emphasised Bible ni Rotherham) Apan kinsa ang moboto?

Ang pagsagop sa ideya nga ang piliay pagahimoon sa tibuok kongregasyon wala kanunay magpatungha sa gilaomang mga resulta. Kadtong moboto maoy mga tawong “nakonsagrar sa bug-os,” ug ang pila nga napili sa pagkatinuod nakakab-ot sa Kasulatanhong mga kuwalipikasyon ug nga nag-alagad nga mapainubsanon sa ilang mga igsoon. Apan ang piliay nagsumbalik sa personal nga kagustohan inay kay sa Pulong ug espiritu sa Diyos. Mao nga, sa Halle, Alemanya, sa dihang ang pipila nga naghunahunang angayan silang mahimong ansiano wala mapili sa katungdanan nga ilang gusto, sila hilabihang misupak. Sa Barmen, Alemanya, taliwala kanilang mga kandidato niadtong 1927 maoy mga lalaki nga supak sa buluhaton sa Sosyedad, ug may igoigong sininghagay panahon sa pag-isahay ug mga kamot sa yugto sa piliay. Busa gikinahanglan ang pagbalhin ngadto sa sekretong balota.

Balik niadtong 1916, daghang tuig una pa niining mga hitaboa, si Brader Russell, nga may tumang kabalaka, misulat: “Usa ka ngil-ad nga pamaagi ang naglungtad diha sa pila ka mga Saring sa dihang ang piliay gihimo. Ang mga alagad sa Iglesya nagsulay nga mahimong mga magmamando, mga diktador​—gani usahay nagpakatsirman sa miting tungod sa klarong katuyoan nga maseguro nga sila ug ang ilang pinalabing mga higala mapili ingong mga Ansiano ug mga Deakono. . . . Ang pila hilom nga misulay sa pagpahimulos sa Saring pinaagi sa paghimog piliay sa usa ka panahon nga ilabinang paborable kanila ug sa ilang mga higala. Ang uban naningkamot nga pun-on ang miting sa ilang mga higala, nga nagdalag mga bag-ohan pa, nga wala maghunahuna nga motambong sa regular sa Saring, apan nga mianha lamang tungod sa panaghigala aron moboto alang sa usa sa ilang mga higala.”

Kinahanglan ba lamang nilang mahibaloan ang maayong pagdumala alang sa mas hapsay demokratikanhong paagi sa piliay, o may usa ka butang gikan sa Pulong sa Diyos nga wala pa nila hisabti?

Giorganisar Aron Mawali ang Maayong Balita

Sa kinasayohang panahon, si Brader Russell nakasabot nga ang usa sa labing hinungdanong mga kaakohan sa matag membro sa Kristohanong kongregasyon mao ang buluhaton sa pag-ebanghelyo. (1 Ped. 2:9) Ang Watch Tower nagpatin-aw nga dili lamang kang Jesus apan sa tanan niyang mga sumusunod nga dinihogan sa espiritu nga ang matagnaong mga pulong sa Isaias 61:1 mapadapat, nga nag-ingon: “Si Jehova nagdihog kanako aron sa pagwali sa maayong balita,” o, sama sa paghubad sa King James Version sa pagkutlo ni Jesus niining tekstoha, “Kay iya akong gidihogan aron sa pagwali sa maayong balita.”​—Luc. 4:18.

Ingon ka sayo sa 1881, ang Watch Tower naundan sa artikulong “Nagkinahanglan ug 1,000 ka Magwawali.” Kini usa ka hangyo sa matag membro sa kongregasyon nga gamiton ang bisan unsang panahon nga iyang maarangan (katunga sa oras, usa ka oras, o duha, o tulo) sa pagpakig-ambit sa pagpakaylap sa kamatuoran sa Bibliya. Ang mga lalaki ug mga babaye nga walay mga pamilyang nagsandig kanila ug nga makahatag sa katunga o kapin pa sa ilang panahon nga eksklusibo sa buluhaton sa Ginoo gidasig nga mosulod sa buluhaton ingong colporteur nga mga ebanghelista. Ang gidaghanon nagkadaiya kaayo sa matag tuig, apan sa 1885 may mga 300 na nga nakig-ambit niining buluhatona ingong mga colporteur. Ang uban usab may bahin apan diha sa mas limitadong sukod. Gisugyotan ang mga colporteur kon sa unsang paagi himoon ang ilang buluhaton. Apan ang kanataran dako kaayo, ug sa labing menos sa sinugdan, sila ang mipili sa ilang kaugalingong teritoryo ug mibalhin gikan sa usa ka dapit ngadto sa laing dapit nga kasagaran morag maayo alang kanila. Unya sa dihang sila magkahibalag sa mga kombensiyon, sila mohimo ug gikinahanglang mga pagpasibo aron mapatakdo ang ilang mga paningkamot.

Sa samang tuig nga ang pag-alagad sa colporteur nagsugod, si Brader Russell may napatik nga daghang pulyeto alang sa libreng pag-apod-apod. Ang labing ilado niini mao ang Food for Thinking Christians, nga naapod-apod sa gidaghanong 1,200,000 ka kopya sa unang upat ka bulan. Ang buluhatong naglakip niining kahikayan sa pag-imprinta ug pag-apod-apod maoy hinungdan sa pagporma sa Zion’s Watch Tower Tract Society aron sa pag-atiman sa gikinahanglang mga detalye. Aron malikayan ang pagkabalda sa buluhaton inigkamatay niya, ug sa pagpasayon sa pagdumala sa mga donasyon nga gigamit diha sa buluhaton, legal nga giparehistro ni Brader Russell ang Sosyedad, ug kini opisyal nga natala niadtong Disyembre 15, 1884. Kini nakapatungha sa gikinahanglang legal nga ahensiya.

Sa mitungha ang panginahanglan, mitukod ug mga sangang buhatan ang Watch Tower Society diha sa ubang kayutaan. Ang una maoy sa Londres, Inglaterra, niadtong Abril 23, 1900. Usa pa, sa Elberfeld, Alemanya, niadtong 1902. Duha ka tuig sa ulahi, sa pikas nga bahin sa yuta, usa ka sangang buhatan ang giorganisar sa Melbourne, Australia. Sa panahon nga kini gisulat, may 99 na ka sangang buhatan sa tibuok kalibotan.

Bisan pag ang organisasyonal nga mga kahikayan nga gikinahanglan sa pagtagana sa daghang literatura sa Bibliya ginaugmad na, sa sinugdan ang mga kongregasyon gipasagdan sa paghimog bisan unsang lokal nga mga kahikayan alang sa pag-apod-apod sa publiko nianang materyal. Sa usa ka sulat nga pinetsahan ug Marso 16, 1900, si Brader Russell nagpahayag sa iyang panglantaw bahin niini. Kanang sulata, nga naadres kang “Alexander M. Graham, ug sa Iglesya sa Boston, Mass.,” miingon: “Sumala sa inyo nang nasayran, kini mao ang akong desisyon nga pasagdan ang matag kompaniya sa katawhan sa Ginoo sa pagdumala sa ilang kaugalingong mga kalihokan, sumala sa ilang kaugalingong mga panghukom, nga mohatag ug mga sugyot, dili agig pagpanghilabot, apan agi lamang ug tambag.” Kini naglakip dili lamang sa ilang mga tigom apan usab sa pamaagi sa pagbuhat sa ilang ministeryo sa kanataran. Mao nga, tapos mohatag ug pila ka praktikal nga tambag sa mga igsoon, siya mihinapos pinaagi sa pag-ingon: “Kini usa lamang ka sugyot.”

Ang pila ka kalihokan nagkinahanglan ug mas espisipikong pagtultol gikan sa Sosyedad. May kalabotan sa pagpasalida sa “Photo-Drama of Creation,” ang matag kongregasyon gipasagdan sa pagtino kon sila ba gusto ug makaarang ba sa pagplete ug usa ka sinehan o laing pasilidad alang sa lokal nga pagpasalida. Ugaling, kinahanglang ibalhin ang mga kasangkapan gikan sa usa ka siyudad ngadto sa laing siyudad, ug ang mga eskedyul kinahanglang matuman; busa dinhing bahina ang sentralisadong pagtultol gihatag sa Sosyedad. Ang matag kongregasyon gidasig sa pagbaton ug usa ka Komite sa Drama nga motagad sa lokal nga mga kahikayan. Apan usa ka tagdumala gikan sa Sosyedad ang nagtagad ug maayo sa mga detalye aron masegurong hapsay ang tanan.

Samtang ang katuigang 1914 ug unya 1915 minglabay, kadtong dinihogan sa espiritu nga mga Kristohanon ikag nga naghulat sa katumanan sa ilang langitnong paglaom. Sa samang panahon, sila gidasig sa pagpabiling puliki sa pag-alagad sa Ginoo. Bisan pag ilang gilantaw ang nanghibilin nilang panahon diha sa unod ingong mubo na kaayo, nahimong tin-aw nga aron mapadayon ang pagwali sa maayong balita sa hapsay nga paagi, ang dugang pagtultol gikinahanglan kay kaniadtong sila pipila pa lamang ka gatos. Wala madugay tapos mahimong ikaduhang presidente sa Watch Tower Society si J. F. Rutherford, kanang pagtultol nagdalag bag-ong mga dagway. Ang Marso 1, 1917, isyu sa The Watch Tower nagpahibalo nga, sukad niadto, ang tanang teritoryo nga pagakobrehan sa mga colporteur ug sa pastoral nga mga magbubuhate diha sa mga kongregasyon igaasayn na sa buhatan sa Sosyedad. Kon ang lokal nga mga magbubuhat ug mga colporteur nag-ambitay sa maong pag-alagad sa kanataran sa usa ka dakbayan o lungsod, ang teritoryo pagabahinon taliwala kanila pinaagi sa usa ka tinudlo sa lokal nga komite sa distrito. Kining kahikayana nakatabang sa tagsaon kaayong pag-apod-apod sa The Finished Mystery sulod lamang sa pipila ka bulan niadtong 1917-18. Kana usab nakatabang sa pagkab-ot sa paspas nga pag-apod-apod sa 10,000,000 ka kopya sa usa ka kusganong pagyagyag sa Kakristiyanohan diha sa usa ka tract nga naghisgot sa ulohang “Ang Pagkapukan sa Babilonya.”

Wala madugay pagkatapos niini, ang mga membro sa administratibong kawani sa Sosyedad gidakop, ug niadtong Hunyo 21, 1918, sila gisentensiyahan nga mabilanggo sa 20 ka tuig. Ang pagwali sa maayong balita hapit nang mahunong. Kadto na ba ang panahon nga sa kataposan sila mahiusa sa Ginoo diha sa langitnong himaya?

Pipila ka bulan sa ulahi, ang gubat natapos. Sa sunod nga tuig ang opisyales sa Sosyedad gipagawas. Sila diha gihapon sa unod. Kadto dili mao ang ilang gilaoman, apan sila nakahinapos nga ang Diyos seguradong may ipahimo pang buluhaton kanila sa yuta.

Sila bag-o pa lamang nakalabang sa grabeng mga pagsulay sa ilang pagtuo. Hinuon, niadtong 1919, ang The Watch Tower naglig-on kanila pinaagi sa makapaukyab nga Kasulatanhong mga pagtuon bahin sa temang “Bulahan ang Dili-Mahadlokon.” Kini gisundan sa artikulong “Kahigayonan sa Pag-alagad.” Apan ang mga igsoon wala makahanduraw sa malukpanong organisasyonal nga mga kaugmaran nga mahitabo sa mga dekada nga mosunod.

Hustong Pananglitan Alang sa Panon

Si Brader Rutherford sa tinuod nakasabot nga aron ang buluhaton makapadayon sa pag-uswag diha sa mahusay ug nahiusang paagi, walay sapayan sa kamubo tingali sa panahon, ang hustong pananglitan alang sa panon maoy importante. Gihubit ni Jesus ang iyang mga sumusunod ingong mga karnero, ug ang mga karnero nagsunod sa ilang magbalantay. Siyempre, si Jesus mismo mao ang Maayong Magbalantay, apan nagagamit usab siya ug hamtong nga mga lalaki, o mga ansiano, ingong luyoluyong mga magbalantay sa iyang katawhan. (1 Ped. 5:​1-3) Ang maong mga ansiano kinahanglang mga lalaki nga sa ilang kaugalingon nakig-ambit sa buluhatong giasayn ni Jesus ug kinsa nagdasig sa uban nga buhaton kana. Sila kinahanglang may tininuod nga espiritu sa pag-ebanghelyo. Hinuon, sa panahon sa pag-apod-apod sa The Finished Mystery, ang pila sa mga ansiano mihunong; ang uban gani prangka kaayong nagpaluya sa uban sa pagpakig-ambit.

Ang hinungdanon kaayong lakang ngadto sa pagtul-id niining kahimtanga gihimo niadtong 1919 sa dihang ang magasing The Golden Age gisugdan sa pagpublikar. Kini nahimong usa ka kusganong instrumento sa pagpahayag sa Gingharian sa Diyos ingong ang bugtong dumalayong sulbad sa mga suliran sa katawhan. Ang kada kongregasyon nga gustong makig-ambit niining kalihokana gidapit nga mohangyo sa Sosyedad sa paglista niana ingong “organisasyon sa pag-alagad.” Unya usa ka direktor, o direktor sa pag-alagad ingong tawag kaniya sa kadugayan, nga dili ilalom sa tinuig nga piliay, ang gitudlo sa Sosyedad.f Ingong lokal nga hawas sa Sosyedad, siya moorganisar sa buluhaton, moasayn sa teritoryo, ug modasig sa pagpakig-ambit sa kongregasyon diha sa pag-alagad sa kanataran. Mao nga, kauban sa mga ansiano ug mga deakono nga napili sa demokratikanhong paagi, ang laing matang sa organisasyonal nga kahikayan misugod sa paglihok, usa nga nag-ila sa awtoridad sa pagtudlo sa gawas sa lokal nga kongregasyon ug nga nagpasiugda gayod sa pagwali sa maayong balita sa Gingharian sa Diyos.g

Sa misunod nga katuigan, ang buluhaton sa pagmantala sa Gingharian labi pang gidasig, nga daw pinaagi sa usa ka dili mapugngang kusog. Ang mga panghitabo sa 1914 ug human niadto nagpatataw nga ang dakong propesiya diin gibatbat ni Ginoong Jesu-Kristo ang konklusyon sa karaang sistema nagkatuman na. Tungod niini, niadtong 1920, ang The Watch Tower nagpatin-aw nga ingon sa gitagna sa Mateo 24:​14, kadto maoy panahon sa pagmantala sa maayong balita mahitungod sa “kataposan sa karaang kahikayan sa mga butang ug sa pagkatukod sa gingharian sa Mesiyas.”h (Mat. 24:​3-14) Pagkatapos motambong sa kombensiyon sa mga Estudyante sa Bibliya sa Cedar Point, Ohio, niadtong 1922, ang mga delegado nanglakaw dala ang islogan nga milanog diha sa ilang mga dalunggan: “Imantala, imantala, imantala, ang Hari ug iyang gingharian.” Ang papel sa tinuod nga mga Kristohanon labi pang nasabtan niadtong 1931 sa dihang ang ngalang mga Saksi ni Jehova gisagop.

Dayag nga si Jehova mitahas sa iyang mga alagad ug buluhaton nga silang tanan makaambit. May madasigong pagsanong. Daghan ang mihimo ug dakong pagpasibo sa ilang mga kinabuhi aron sa paggugol sa ilang bug-os panahon niining buluhatona. Bisan taliwala niadtong naggugol lamang ug tipik sa panahon, daghan ang migugol ug tibuok nga mga adlaw sa pag-alagad sa kanataran sa tapos-semana. Sa pagsanong sa pagdasig nga nabasa diha sa Ang Bantayanang Torre ug sa Informant niadtong 1938 ug 1939, daghan sa mga Saksi ni Jehova niadtong panahona ang matanlagong naningkamot sa paggugol ug 60 ka oras kada bulan sa pag-alagad sa kanataran.

Apil niadtong masibotong mga Saksi maoy ubay-ubayng mapaubsanon, debotadong mga alagad ni Jehova nga mga ansiano diha sa mga kongregasyon. Hinuon, sa pila ka dapit, sa katuigang 1920 ug sayo niadtong katuigang 1930, may igo-igo usab nga pagsupak sa ideya nga ang tanan makig-ambit sa pag-alagad sa kanataran. Ang napiling mga ansiano pinaagi sa demoktratikanhong piliay subsob nga mapadayganon batok sa ginaingon sa The Watch Tower labot sa kaakohang mowali sa mga tawo sa gawas sa kongregasyon. Ang dili pagpaminaw sa igasulti sa espiritu sa Diyos, pinaagi sa Balaang Kasulatan, ngadto sa kongregasyon labot niining butanga nakapugong sa agos sa espiritu sa Diyos ngadto nianang mga grupoha.​—Pin. 2:​5, 7.

Gihimo ang mga lakang niadtong 1932 aron sa pagtul-id niining kahimtanga. Ang punto nga gikabalak-an ug dako dili kay basin ang pila ka iladong ansiano masilo o kaha basin ang pila niadtong nakig-uban sa mga kongregasyon mobiya. Inay, ang gitinguha sa mga igsoon mao ang pagpahimuot kang Jehova ug ang pagbuhat sa iyang kabubut-on. Sa maong tuyo, ang Agosto 15 ug Septiyembre 1 nga mga isyu sa Ang Bantayanang Torre (sa Ingles) nianang tuiga mihatag ug linaing pagtagad sa ulohang “Organisasyon ni Jehova.”

Kadtong mga artikuloha tin-awng nagpakita nga ang tanang tinuod nga bahin sa organisasyon ni Jehova magahimo sa buluhaton nga giingon sa iyang Pulong nga pagabuhaton niining yugtoa sa panahon. Ang mga artikulo mipaluyo sa ideya nga ang Kristohanong pagkaansiano dili usa ka katungdanan nga ang usa mahimong iboto apan maoy usa ka kahimtang nga makab-ot pinaagi sa espirituwal nga pagtubo. Ang linaing pasiugda gihatag sa giampo ni Jesus nga ang iyang mga sumusunod “tanan mausa”​—nga mahiusa sa Diyos ug kang Kristo, ug mao nga nahiusa sa usag usa sa pagbuhat sa kabubut-on sa Diyos. (Juan 17:21) Ug unsay sangpotanan? Ang ikaduhang artikulo mitubag nga “ang kada usa sa mga nanghibilin kinahanglang mahimong saksi sa ngalan ug gingharian ni Jehova nga Diyos.” Ang pagkamagtatan-aw dili igasalig kang bisan kinsa nga napakyas o midumili sa pagbuhat sa ilang maarangan sa pagpakig-ambit diha sa publikong pagpanaksi.

Sa konklusyon sa pagtuon niining mga artikuloha, ang mga kongregasyon gidapit sa pagpasa ug usa ka resolusyon nga nagtimaan sa ilang pag-uyon. Mao nga ang tinuig kongregasyonal nga piliay sa mga lalaki nga mahimong mga ansiano ug mga deakono giwala. Sa Belfast, Amihanang Irlandia, ingon man sa ubang dapit, ang pila nga sa kanhi “giboto nga mga ansiano” mibiya; ang ubang mga indibiduwal nga may sama nilag panglantaw mikuyog kanila. Kini misangpot sa pagkunhod sa gidaghanon apan nakapalig-on sa tibuok nga organisasyon. Silang nagpabilin maoy mga tawong andam sa pag-abaga sa Kristohanong kaakohan sa pagpanaksi. Inay sa pagbotar alang sa mga ansiano, ang mga kongregasyon​—nga sa gihapon migamit sa demokratikanhong mga paagi​—mipili ug komite sa pag-alagadi nga gilangkoban sa hamtong sa espirituwal nga mga lalaki nga aktibong nakig-ambit diha sa publikong pagsangyaw. Ang mga membro sa kongregasyon miboto usab alang sa usa ka tsirman aron manguna sa ilang mga tigom maingon usab sa sekretaryo ug tesurero. Kining tanan maoy mga lalaking aktibo nga mga saksi ni Jehova.

Kay ang pagtan-aw sa kongregasyon niadtong tungora nasalig na sa mga lalaki nga dili interesado sa ilang personal nga posisyon apan diha sa pagtuman sa buluhaton sa Diyos​—ang pagmantala sa iyang ngalan ug Gingharian​—ug nga nagpakita ug maayong panig-ingnan pinaagi sa ilang kaugalingong pagpakig-ambit niana, ang buluhaton miuswag nga mas mahapsay. Bisan pag sila wala masayod niana kaniadto, dako pa ang buluhaton, usa ka mas malukpanong pagsangyaw kay sa nahimo na, usa ka wala nila damhang pagpanigom. (Isa. 55:5) Tataw nga si Jehova nag-andam kanila alang niana.

Ang pipila nga naglaom ug kinabuhing walay kataposan sa yuta nagsugod sa pagpakig-uban kanila.j Hinuon, ang Bibliya nagtagna sa pagpanigom sa usa ka dakong pundok (o, dakong panon) nga nagalaom nga tipigan silang buhi latas sa umaabot nga dakong kasakitan. (Pin. 7:​9-14) Niadtong 1935 ang pagkamao niining dakong panon gipatataw. Ang mga kausaban sa pagpili ug mga magtatan-aw sa katuigang 1930 nagsangkap ug maayo sa organisasyon sa pag-atiman alang sa buluhatong pagpanigom, pagpanudlo, ug pagbansay kanila.

Alang sa kadaghanan sa mga Saksi ni Jehova, kining gipalapad nga buluhaton maoy usa ka makalilipayng kaugmaran. Ang ilang ministeryo sa kanataran nakadawat ug bag-ong importansiya. Ugaling, ang pila dili gustong mosangyaw. Midumili sila sa pagpakig-ambit, ug misulay sila sa pagpakamatarong sa ilang kawalay-kalihokan pinaagi sa pagpangatarongan nga walay matigom nga dakong panon hangtod sa pagkatapos sa Armageddon. Apan ang kadaghanan nakasabot sa dugang kahigayonan sa pagpasundayag sa ilang kamaunongon kang Jehova ug sa ilang gugma alang sa ilang isigkatawo.

Sa unsang paagi kadtong sakop sa dakong panon mosibo ngadto sa gambalay sa organisasyon? Gipakita kanila ang papel sa “gamayng panon” sa mga dinihogan-sa-espiritu nga giasayn sa Pulong sa Diyos, ug sila malipayong nagbuhat uyon nianang kahikayana. (Luc. 12:​32-44) Ila usab nasayran nga, sama sa mga dinihogan-sa-espiritu, sila may responsabilidad nga magpaambit sa maayong balita sa uban. (Pin. 22:17) Sanglit kay gusto nilang mahimong yutan-ong mga sakop sa Gingharian sa Diyos, kanang Ginghariana kinahanglang pagaunahon diha sa ilang mga kinabuhi, ug kinahanglang magmasiboton sila sa pagsulti sa uban mahitungod niana. Aron mosibo sa gibatbat sa Bibliya mahitungod niadtong mapreserbar latas sa dakong kasakitan ngadto sa bag-ong kalibotan sa Diyos, kinahanglang mahimo silang mga tawo nga “nanagsinggit sa makusog nga tingog, nga nagaingon: ‘Ang kaluwasan utang namo sa atong Diyos, nga nagalingkod sa trono, ug sa Kordero.’” (Pin. 7:​10, 14) Niadtong 1937, samtang ang ilang gidaghanon misugod sa pagtubo ug ang ilang kasibot alang sa Ginoo nagkadayag, sila usab gidapit aron motabang sa pagpas-an sa responsabilidad sa pagtan-aw diha sa kongregasyon.

Hinuon, sila gipahinumdoman nga ang organisasyon kang Jehova, dili iya ni bisan kinsang tawo. Walay mahimong pagkabahin tali sa nanghibilin sa mga dinihogan-sa-espiritu ug sa dakong panon sa ubang mga karnero. Sila magabuhat nga magkauban ingong mga brader ug mga sister diha sa pag-alagad kang Jehova. Ingon sa gisulti ni Jesus, “Ako adunay ubang mga karnero nga dili sakop niining torila; kinahanglan pagamandoan ko usab sila, ug sila magapatalinghog sa akong tingog, ug sila mahimong usa ka panon, usa ka magbalantay.” (Juan 10:16) Ang kamatuoran niini nagkadayag.

Ang makapahinganghang mga kaugmaran nahitabo sa organisasyon sa mubo ra kaayong panahon. Apan may dugang pa bang gikinahanglan nga pagahimoon aron nga ang mga kalihokan sa mga kongregasyon pagadumalahon nga bug-os kaharmoniya sa mga pamaagi ni Jehova ingon sa nahan-ay diha sa iyang dinasig nga Pulong?

Teokratikanhong Organisasyon

Ang “teokrasya” nagkahulogang “pagmando sa Diyos.” Mao ba kana ang matang sa pagmando nga nagdumala sa mga kongregasyon? Dili lang ba sila nagsimba kang Jehova apan usab nagsalig kaniya nga motultol sa ilang kongregasyonal nga mga kalihokan? Sila ba sa bug-os nagsunod sa iyang giingon mahitungod ning mga butanga diha sa iyang dinasig nga Pulong? Ang duhag-bahin nga artikulong “Organisasyon” nga mabasa diha sa Ang Bantayanang Torre sa Hunyo 1 ug 15, 1938 (sa Ingles), tin-awng nag-ingon: “Ang organisasyon ni Jehova dili gayod demokratikanhon. Si Jehova maoy supremo, ug ang iyang kagamhanan o organisasyon maoy teokratikanhon gayod.” Bisan pa, diha sa lokal nga mga kongregasyon sa mga Saksi ni Jehova niadtong panahona, ang demokratikanhong mga pamaagi gigamit pa sa pagpili sa kadaghanan niadtong gisaligan sa pagtan-aw sa mga tigom ug pag-alagad sa kanataran. Ang dugang mga kausaban maoy haom.

Apan dili ba ang Buhat 14:23 nagpaila nga ang mga ansiano diha sa mga kongregasyon igatudlo sa katungdanan pinaagi sa ‘pagtuy-od sa kamot,’ sama diha sa pagboto? Ang una niadtong mga artikulo sa Bantayanang Torre nga nag-ulohang “Organisasyon” midawat nga kining tekstoha wala masabtig husto sa miagi. Dili pinaagi sa ‘pagtuy-od sa kamot’ sa bahin sa tanang mga membro sa kongregasyon nga ang mga pagtudlo gihimo taliwala sa unang-siglong mga Kristohanon. Inay, gipakita kini nga, ang mga apostoles ug kadtong giawtorisahan nila mao ang ‘mituy-od sa ilang mga kamot.’ Kini gihimo dili pinaagi sa pag-apil diha sa piliay sa kongregasyon apan pinaagi sa pagpandong sa ilang mga kamot ibabaw sa kuwalipikadong mga indibiduwal. Kini maoy simbolo sa pagpalig-on, pag-uyon, o pagtudlo.k Ang sayong Kristohanong mga kongregasyon usahay nagrekomenda ug kuwalipikadong mga lalaki, apan ang pangataposang pagpili o pag-uyon gihatag sa mga apostoles, nga direktang sinugo ni Kristo, o pinaagi niadtong giawtorisahan sa mga apostoles. (Buh. 6:​1-6) Ang Bantayanang Torre nagdala sa pagtagad ngadto sa kamatuoran nga diha lamang sa mga sulat ngadto sa kasaligang mga magtatan-aw (Timoteo ug Tito) nga si apostol Pablo, ubos sa pagtultol sa balaang espiritu, mihatag ug mga instruksiyon sa pagtudlo ug mga magtatan-aw. (1 Tim. 3:​1-13; 5:22; Tito 1:5) Walay mausa sa dinasig nga mga sulat ngadto sa mga kongregasyon ang naundan sa maong mga instruksiyon.

Nan, sa unsang paagi pagahimoon ang mga pagtudlo sa pag-alagad karon sulod sa mga kongregasyon? Ang pag-analisar sa Bantayanang Torre sa teokratikanhong organisasyon nagpakita gikan sa Kasulatan nga si Jehova nagtudlo kang Jesu-Kristo nga “ulo sa . . . kongregasyon”; nga sa dihang si Kristo ingong Agalon mibalik, saligan niya ang iyang “matinumanon ug maalamong ulipon” ug responsabilidad “sa pagdumala sa iyang katigayonan”; nga kining matinumanon ug maalamong ulipon gilangkoban sa tanang anaa sa yuta nga gidihogan sa balaang espiritu aron mahimong isigkamanununod ni Kristo ug nga nag-alagad nga nahiusa ubos sa iyang pagtultol; ug nga si Kristo mogamit sa maong ulipon nga matang ingong iyang instrumento sa paghatag ug gikinahanglang pagtan-aw sa mga kongregasyon. (Col. 1:18; Mat. 24:​45-47; 28:18) Katungdanan sa ulipon nga matang ang pagpadapat nga mainampoon sa mga instruksiyon nga tin-awng gipahayag diha sa dinasig nga Pulong sa Diyos, nga gamiton kana sa pagtino kon kinsa ang kuwalipikado alang sa mga posisyon sa pag-alagad.

Tungod kay ang makitang instrumento nga pagagamiton ni Kristo mao ang matinumanon ug maalamong ulipon (ug ang mga panghitabo sa modernong-adlaw nga kasaysayan nga nahisgotan na nagpakita nga kining maong “ulipon” nagagamit sa Watch Tower Society ingong usa ka legal nga instrumento), Ang Bantayanang Torre misaysay nga ang teokratikanhong pamaagi magkinahanglan nga ang mga pagtudlo sa pag-alagad pagahimoon pinaagi niining maong ahensiya. Ngani sama nga ang mga kongregasyon niadtong unang-siglo miila sa nagamandong lawas didto sa Jerusalem, mao usab karong adlawa ang mga kongregasyon dili molambo sa espirituwal kon walay sentral nga pagdumala.​—Buh. 15:​2-30; 16:​4, 5.

Hinuon, sa pag-isip sa mga butang sa hustong paagi, gipatin-aw nga sa dihang Ang Bantayanang Torre mohisgot sa “Ang Sosyedad,” kini nagkahulogan, dili lamang sa usa ka legal nga instrumento, apan sa grupo sa dinihogang mga Kristohanon nga nagtukod nianang legal nga instrumento ug migamit niana. Mao nga ang ekspresyon nagpasabot sa matinumanon ug maalamong ulipon kauban sa iyang Nagamandong Lawas.

Bisan sa wala pa mapublikar ang mga artikulo sa Bantayanang Torre nga nag-ulohang “Organisasyon” niadtong 1938, sa dihang ang mga kongregasyon sa Londres, New York, Chicago, ug Los Angeles midaghan kutob sa punto nga kinahanglan nang bahinon sila ngadto sa gagmayng mga grupo, sila mihangyo sa Sosyedad sa pagtudlo sa tanan nilang mga alagad. Ang Hunyo 15, 1938, isyu sa Ang Bantayanang Torre (sa Ingles) midapit sa tanang ubang kongregasyon sa paghimog susamang lihok. Sa maong tumong, ang mosunod nga resolusyon gisugyot:

“Kami, ang kompaniya sa katawhan sa Diyos nga gikuha alang sa iyang ngalan, ug karon anaa sa . . . . . . . . . . . . , midawat nga ang kagamhanan sa Diyos maoy usa ka lunsay nga teokrasya ug nga si Kristo Jesus anaa sa templo ug sa bug-os nagdumala ug nagkontrolar sa makitang organisasyon ni Jehova, maingon usab sa dili makita, ug nga ‘ANG SOSYEDAD’ maoy makitang hawas sa Ginoo sa yuta, ug busa among gihangyo ‘Ang Sosyedad’ sa pag-organisar niining kompaniyaha alang sa pag-alagad ug sa pagtudlo sa nagkadaiyang mga alagad niana, aron nga kaming tanan mahimong magkauban sa pagbuhat diha sa kalinaw, pagkamatarong, kaharmoniya ug bug-os nga paghiusa. Among gisukip dinhi ang usa ka listahan sa mga ngalan sa mga tawo niining kompaniya nga alang kanamo makitang mas hamtong ug busa haom kaayo sa pag-alagad sa iya-iyang mga katungdanan nga pagatudloon alang sa pag-alagad.”l

Halos tanan sa mga kongregasyon sa mga Saksi ni Jehova miuyon dayon niini. Kadtong pipila nga midumili sa wala madugay nangundang sa pagpakig-ambit sa pagmantala sa Gingharian ug mao nga mihunong sa pagkahimong mga Saksi ni Jehova.

Mga Kaayohan sa Teokratikanhong Pagtultol

Dayag nga kon ang mga pagtulon-an, mga sukdanan sa panggawi, ug organisasyonal o sa pagsangyaw nga mga pamaagi madesisyonan sa lokal, ang organisasyon sa dili madugay mawad-an sa iyang pagkamao ug panaghiusa. Ang mga igsoon dali rang mabahin tungod sa sosyal, kultural, ug nasodnong mga kalainan. Ang teokratikanhong pagtultol, sa laing bahin, magpaneguro nga ang mga kaayohan gikan sa espirituwal nga pagtubo makaabot ngadto sa tanang kongregasyon sa tibuok kalibotan nga walay babag. Busa molungtad ang tinuod nga panaghiusa nga giampo ni Jesus nga molungtad taliwala sa iyang tinuod nga mga sumusunod, ug ang buluhatong pag-ebanghelyo nga iyang gisugo mahimong matuman sa bug-os.​—Juan 17:​20-22.

Hinuon, giangkon sa pila nga tungod sa pagtuboy niining organisasyonal nga kausaban, si J. F. Rutherford yanong naningkamot sa mas pang pagkontrolar sa mga Saksi ug nga iyang gigamit kining pamaagiha aron ipugos ang iyang awtoridad. Mao ba gayod kana ang kahimtang? Walay duhaduha nga si Brader Rutherford usa ka tawo nga may lig-ong pagtuo. Siya kusganong manulti ug walay pagkompromiso sa butang nga iyang gituohang kamatuoran. Siya mahimong isogon sa pagdumala sa mga kahimtang sa dihang iyang masabot nga ang mga tawo mas nabalaka sa kaugalingon kay sa buluhaton sa Ginoo. Apan si Brader Rutherford maoy sa pagkatinuod mapaubsanon sa atubangan sa Diyos. Ingon sa gisulat sa ulahi ni Karl Klein, nga nahimong membro sa Nagamandong Lawas niadtong 1974: “Ang mga pag-ampo ni Brader Rutherford sa buntag nga pagsimba . . . nagpamahal niya kanako. Bisan tuod siya kusog ug tingog, sa dihang makigsulti sa Diyos mora siyag usa ka gamayng bata nga nakigsulti sa iyang amahan. Pagkamaayong relasyon uban kang Jehova ang gipadayag niana!” Si Brader Rutherford kombinsido gayod labot sa pagkamao sa makitang organisasyon ni Jehova, ug siya naningkamot aron maseguro nga walay tawo ni grupo sa mga tawo ang makababag sa lokal nga mga igsoon sa pagdawat sa bug-os nga kaayohan sa espirituwal nga pagkaon ug pagtultol nga gitagana ni Jehova alang sa Iyang mga alagad.

Bisan pag si Brader Rutherford mialagad sulod sa 25 ka tuig ingong presidente sa Watch Tower Society ug naggugol sa tanan niyang kusog sa pagpauswag sa buluhaton sa organisasyon, siya dili pangulo sa mga Saksi ni Jehova, ug dili niya gustong mahimong ingon. Sa usa ka kombensiyon sa St. Louis, Missouri, niadtong 1941, sa hapit na siyang mamatay, mihisgot siya mahitungod sa pagkapangulo, nga nag-ingon: “Gusto kong ipahibalo kang bisan kinsang estranyo dinhi kon unsay inyong panghunahuna mahitungod sa usa ka tawo ingong inyong pangulo, aron sila dili mahikalimot. Sa matag higayong ang usa ka butang mogula ug mosugod sa pagtubo, sila moingon nga may usa ka pangulong tawo nga daghag sumusunod. Kon aduna may usa ka tawo diha sa mga mamiminaw nga naghunahuna nga ako, kining tawo nga nagbarog dinhi, maoy pangulo sa mga saksi ni Jehova, pagsulti ug Oo.” Ang tubag maoy usa ka hilabihang kahilom, nga gibuak lamang sa usa ka mabinationg “Dili” gikan sa pipila diha sa mamiminaw. Ang mamumulong mipadayon: “Kon kamo nga ania dinhi nagtuo nga ako usa lamang sa mga alagad sa Ginoo, ug nga kita nanagbuhat abaga sa abaga diha sa panaghiusa, nga nag-alagad sa Diyos ug nag-alagad kang Kristo, pagsulti ug Oo.” Ang asembliya dungan nga misinggit sa kusganong “Oo!” Pagkasunod bulan usa ka grupo sa mga mamiminaw sa Inglaterra misanong sa tukmang paagi.

Sa pila ka dapit ang mga kaayohan sa teokratikanhong organisasyon nabati dayon. Sa ubang dapit, nadugaydugay; kadtong wala magpakita nga hamtong, mapaubsanong mga alagad sa igong panahon gitangtang, ug gitudlo ang uban.

Bisan pa niana, samtang ang teokratikanhong mga pamaagi nalig-on sa bug-os, ang mga Saksi ni Jehova nagkalipay nga nasinati ang gitagna sa Isaias 60:17. Nga migamit ug simbolikong mga termino sa paghulagway sa mauswagong mga kahimtang nga molungtad taliwala sa mga alagad sa Diyos, si Jehova nag-ingon didto: “Puli sa tumbaga ako magadala ug bulawan, ug puli sa puthaw ako magadala ug salapi, ug puli sa kahoy, tumbaga, ug puli sa mga bato, puthaw; himoon ko usab ang pakigdait nga imong mga punoan ug ang pagkamatarong nga imong mga magtutudlo sa buluhaton.” Kini wala magbatbat kon unsay pagahimoon sa mga tawo, inay, kon unsa mismo ang pagahimoon sa Diyos ug sa mga kaayohan nga mabatonan sa iyang mga alagad samtang sila nagpasakop niana. Ang pakigdait molungtad sa ilang taliwala. Ang gugma sa pagkamatarong kinahanglang mao ang kusog nga motukmod kanila sa pag-alagad.

Gikan sa Brazil, si Maud Yuille, asawa sa magtatan-aw sa sanga, misulat kang Brader Rutherford: “Ang artikulong ‘Organisasyon’ niadtong Hunyo 1 ug 15 [1938] nga mga Tower nakatukmod kanako sa pagpahayag sa pipila ka pulong kanimo, kansang matinumanong pag-alagad gigamit ni Jehova, sa akong pasalamat kang Jehova alang niining dalayegong kahikayan nga iyang gihimo alang sa iyang makitang organisasyon, ingon sa gilaraw niining duha ka Bantayanang Torre. . . . Pagkadakong kahupayan nga makita ang pagkatapos sa ‘Kinaugalingong Pagmando sa Ginagmayng Grupo’, lakip na sa ‘mga katungod sa kababayen-an’ ug ubang dili kasulatanhong pamaagi nga nag-ulipon sa pila ka tawo sa lokal nga mga opinyon ug indibiduwal nga paghukom, inay kang [Jehova nga Diyos ug kang Jesu-Kristo], busa nagdalag pasipala sa ngalan ni Jehova. Tinuod nga ‘ning bag-o pa lamang nga ang Sosyedad mitawag sa tanang anaa sa organisasyon ingong “mga alagad”’, bisan pa akong namatikdan nga sa daghang tuig una pa niana sa imong sulat ngadto sa imong kaigsoonan gipaila nimo ang imong kaugalingon ingong ‘ang inyong igsoon ug alagad, pinaagi sa Iyang grasya’.”

May kalabotan niining organisasyonal nga pagpasibo, ang sangang buhatan sa British Isles nagtaho: “Ang maayong epekto niini maoy makapahingangha gayod. Ang balaknon ug matagnaong kahubitan niini sa Isaias kapitulo saysenta puno sa kanindot apan wala maghingapin. Ang tanang anaa sa kamatuoran naghisgot mahitungod niana. Kadto maoy pangunang topiko sa mga kabildohay. Ang katibuk-an may pagbati sa kalagsik​—sa kaandam nga modasdas sa natunong-ug-maayo nga bugno. Samtang misamot ang katahap sa kalibotan, ang kalipay diha sa teokratikanhong pagmando midagaya.”

Nagapanaw nga mga Magtatan-aw Nagalig-on sa mga Kongregasyon

Ang organisasyonal nga relasyon nalig-on pa tungod sa serbisyo sa nagapanawng mga magtatan-aw. Sa unang siglo, si apostol Pablo iladong naghimo niining buluhatona. Usahay, ang mga lalaki sama kang Bernabe, Timoteo, ug Tito miambit usab. (Buh. 15:36; Filip. 2:​19, 20; Tito 1:​4, 5) Silang tanan maoy masibotong mga ebanghelista. Dugang pa, gidasig nila ang mga kongregasyon pinaagi sa ilang mga diskurso. Sa dihang may mobangon nga mga isyu nga makadaot sa panaghiusa sa kongregasyon, kana dad-on sa sentral nga nagamandong lawas. Unya, “samtang sila mipadayon sa ilang panaw latas sa mga siyudad,” kadtong sinaligan sa responsabilidad “magahatod didto kanila sa mga lagda nga gikauyonan sa mga apostoles ug mga ansiano sa Jerusalem aron pagabantayan.” Ang resulta? “Ang mga kongregasyon padayon nga nalig-on sa pagtuo ug nag-uswag ang gidaghanon sa matag-adlaw.”​—Buh. 15:​1–16:5; 2 Cor. 11:28.

Sa mga tuig 1870, si Brader Russell nagduaw na sa mga grupo sa mga Estudyante sa Bibliya​—ang mga grupo sa duha o tulo ka tawo ingon man sa mas daghang membro​—aron lig-onon sila sa espirituwal. Ang pila ka ubang igsoon nakig-ambit niadtong katuigang 1880. Unya, niadtong 1894, ang Sosyedad naghikay sa pagbaton ug kuwalipikadong mga mamumulong nga magbiyahe sa mas regular aron motabang sa mga Estudyante sa Bibliya nga motubo sa kahibalo ug apresasyon sa kamatuoran ug aron sila masuod.

Kon posible, ang mamumulong mogugol ug usa o tingali pipila ka adlaw uban sa usa ka grupo, nga maghatag ug usa o duha ka pakigpulong publiko ug unya, moduaw sa diyutayng mga grupo ug mga indibiduwal aron hisgotan ang pila ka laglom nga mga butang sa Pulong sa Diyos. Gipaningkamotan nga maduaw ug kaduha sa usa ka tuig ang kada grupo sa Tinipong Bansa ug Canada, bisag dili kanunay sa samang igsoon. Sa pagpili niining nagapanawng mga mamumulong, ang gihatagan ug gibug-aton mao ang kaaghop, kamapaubsanon, ug tin-aw nga pagsabot sa kamatuoran ingon man sa matinumanong pagsunod niana ug ang katakos sa pagtudlo ug tin-aw niana. Ang ila maoy wala gayoy bayad nga pag-alagad. Sila pakan-on lang ug papuy-on sa balay sa lokal nga mga igsoon, ug kon kinahanglan, tabangan sila sa Sosyedad sa gasto sa pagbiyahe. Sila nailhang mga pilgrim.

Daghan niining nagapanawng mga hawas sa Sosyedad gihigugma gayod niadtong ilang gialagaran. Si A. H. Macmillan, nga usa ka Canadianhon, gihinumdoman ingong igsoon nga alang kaniya ang Pulong sa Diyos “morag nagadilaab nga kalayo.” (Jer. 20:9) Maghisgot lang gayod siya niana, ug iyang gihimo kana, nga nagpahayag ngadto sa mga mamiminaw dili lamang sa Canada apan usab sa daghang bahin sa Tinipong Bansa ug sa ubang kayutaan. Si William Hersee, laing pilgrim, gihinumdoman nga may kahidlaw tungod sa espesyal niyang pagtagad sa mga batan-on. Ang iyang mga pag-ampo dili usab malimtan tungod kay sila nagbanaag sa kalalom sa espirituwalidad nga managsamang nakatandog sa mga kasingkasing sa batan-on ug tigulang.

Ang pagbiyahe dili sayon alang sa mga pilgrim niadtong unang mga adlaw. Pananglitan, aron makaalagad sa grupo nga duol sa Klamath Falls, Oregon, si Edward Brenisen nagsugod sa pagsakay sa tren, unya sa tibuok gabii sa karwahe, ug sa kataposan sa makataltal-ug-bukog nga karomata ngadto sa kabukiran sa umahan nga ilang tigoman. Sayo sa buntag, sa sunod adlaw tapos sa ilang tigom, usa ka igsoon nagtaganag kabayo aron sakyan niya sa paglatas sa mga 100 kilometros ngadto sa kinaduolang estasyon sa tren aron siya makabiyahe ngadto sa iyang sunod nga asaynment. Usa kadto ka hago nga kinabuhi, apan maayo ang resulta gumikan sa mga paningkamot sa mga pilgrim. Ang katawhan ni Jehova nalig-on, nahiusa sa ilang pagsabot sa Pulong sa Diyos, ug mas nasuod bisan tuod nakatag pag-ayo sa lainlaing dapit.

Niadtong 1926, giimplementar ni Brader Rutherford ang mga kahikayan nga nag-usab sa buluhaton sa mga pilgrim gikan sa yanong nagapanawng mga mamumulong ngadto sa nagapanawng mga tigdumala ug tigduso sa pag-alagad sa kanataran sa mga kongregasyon. Sa pagpasiugda sa ilang bag-ong mga responsabilidad, niadtong 1928 sila gitawag ug rehiyonal nga mga direktor sa pag-alagad. Sila nagbuhat uban mismo sa lokal nga mga igsoon, nga naghatag nila ug personal nga instruksiyon sa pag-alagad sa kanataran. Nianang panahona maabot na nila ang kada kongregasyon sa Tinipong Bansa ug sa pipila ka ubang kayutaan makausa sa usa ka tuig, samtang nakontak usab ang mga indibiduwal ug gagmayng mga grupo nga wala pa maorganisar alang sa pag-alagad.

Sa katuigan nga misunod, ang buluhaton sa nagapanawng mga magtatan-aw nakadawat ug kadaiyang mga pagbag-o.a Gipalig-on pa kini ug maayo niadtong 1938 sa dihang ang tanang alagad sa mga kongregasyon gitudlo sa teokratikanhong paagi. Ang pagduaw sa mga kongregasyon sa regular nga mga yugto sulod sa sunod pipila ka tuig naghatag ug kahigayonan aron mabansay sa personal ang matag tinudlo nga mga alagad ug ang tanan natabangan pa sa pag-alagad sa kanataran. Niadtong 1942, sa wala pa ipadala pag-usab ang nagapanawng mga magtatan-aw ngadto sa mga kongregasyon, sila mabug-osong gitudloan; ingong resulta, ang ilang buluhaton gihimo na sa halos samang paagi. Ang ilang mga pagduaw mubo ra (usa ngadto sa tulo ka adlaw, depende sa gidak-on sa kongregasyon). Nianang panahona ilang susihon ang mga rekord sa kongregasyon, makigtagbo sa tanang alagad aron makahatag sa gikinahanglang tambag, mohatag ug usa o kapin pang mga pakigpulong sa kongregasyon, ug manguna sa pag-alagad sa kanataran. Niadtong 1946 ang mga pagduaw gipatas-an ngadto sa usa ka semana sa kada kongregasyon.

Sukad sa 1938 latas sa 1941, ang rehiyonal nga mga alagad, diha sa bag-ong papel, sa regular nag-alagad sa lokal nga mga asembliya, diin ang mga Saksi gikan sa limitadong dapit (usa ka sona) nagtigom alang sa usa ka espesyal nga programa. Sa dihang kining buluhatona gipasig-uli niadtong 1946, kining nagapanawng mga magtatan-aw nailhang mga alagad sa distrito; karon, mga magtatan-aw sa distrito.

Kining kahikayana alang sa pagduaw sa mga kongregasyon giabagan niadtong 1938 pinaagi sa serbisyo sa rehiyonal nga alagad diha sa bag-ong papel. Iyang kobrehan ang dakodakong dapit, nga sa popanahon mogugol ug usa ka semana uban sa usa ka nagapanawng igsoon diha sa sona (sirkito) sa pagduaw sa mga kongregasyon. Sa panahon sa iyang pagduaw siya magadumala sa programa sa asembliya nga tambongan sa tanang kongregasyon diha nianang sonaha.b Kining kahikayana nakapadasig kaayo sa mga igsoon ug naghatag ug regular nga kahigayonan alang sa pagbawtismo sa bag-ohang mga tinun-an.

“Usa nga Nahigugma sa Pag-alagad”

Usa niadtong miambit niining pag-alagara sukad niadtong 1936 mao si John Booth, nga niadtong 1974, nahimong membro sa Nagamandong Lawas. Sa giinterbiyu ingong umaabot nga nagapanawng tigdumala, siya giingnan: “Ang maayong mga mamumulong dili mao ang gikinahanglan, ang usa lamang nga nahigugma sa pag-alagad ug manguna diha niana ug maghisgot mahitungod sa pag-alagad diha sa mga tigom.” Si Brader Booth may ingon nga gugma alang sa pag-alagad kang Jehova, nga gipamatud-an pinaagi sa iyang masibotong pag-alagad ingong payunir sukad sa 1928, ug iyang gipukaw ang masibotong pag-ebanghelyo diha sa uban pinaagi sa buhat ug mga pulong sa pagdasig.

Ang unang kongregasyon nga iyang giduaw, niadtong Marso 1936, maoy sa Easton, Pennsylvania. Sa ulahi siya misulat: “Kasagaran ako moabot sa dapit nga tunong sa panahon sa pag-alagad sa kanataran sa buntag, nga mitingon ang mga alagad sa kompaniya sa sawumsom inigkatapos mitingon ang tibuok kompaniya. Sa masabog ako mogugol ug duha lamang ka adlaw sa usa ka kompaniya ug usa lamang ka adlaw sa mas gamay nga grupo, usahay moduaw sa unom ka ingon nga grupo sa usa ka semana. Ako kanunay lang nagbiyahe.”

Duha ka tuig sa ulahi, niadtong 1938, siya giasayn, ingong usa ka rehiyonal nga alagad, aron atimanon ang asembliya sa sona (karon nailhang sirkitong asembliya) kada semana. Kini nakatabang sa pagpalig-on sa mga igsoon sa nagkainit na ang mga paglutos sa pila ka dapit. Sa paghinumdom niadtong mga adlawa ug sa iyang kadaiyang mga responsabilidad, si Brader Booth miingon: “Sa mismong semana [diin ako nagbarog nga saksi sa usa ka kaso nga nalangkit ang mga 60 ka Saksi sa Indianapolis, Indiana] ako gidemanda sa laing kaso sa Joliet, Illinois, abogado alang sa usa ka igsoon sa lain pang kaso sa Madison, Indiana, ug, dugang pa, nagdumala sa usa ka asembliya sa sona kada hinapos sa semana.”

Duha ka tuig tapos ibalik ang maong mga asembliya sa sona niadtong 1946 (karon sirkitong mga asembliya), si Carey Barber usa niadtong naasayn ingong mga alagad sa distrito. Siya membro na sa pamilyang Bethel sa Brooklyn, New York, sulod sa 25 ka tuig. Ang iyang unang distrito nagkobre sa bug-os kasadpang bahin sa Tinipong Bansa. Sa sinugdan, ang biyahe tali sa mga asembliya maoy mga 1,600 kilometros kada semana. Samtang ang gidaghanon ug ang gidak-on sa mga kongregasyon nagtubo, kadtong mga distansiyaha nagkamubo, ug daghang sirkitong asembliya sa subsob himoon sulod sa usa ka dapit sa dakbayan. Human sa 29 ka tuig nga kasinatian ingong nagapanawng magtatan-aw, si Brader Barber gidapit nga mobalik ngadto sa tibuok kalibotang hedkuwarter niadtong 1977 ingong membro sa Nagamandong Lawas.

Sa panahon sa gubat ug hilabihang paglutos, ang nagapanawng mga magtatan-aw sa subsob nagpameligro sa ilang kagawasan ug sa ilang mga kinabuhi aron maatiman ang espirituwal nga kaayohan sa ilang mga igsoon. Sa panahon sa pagsakop sa Nazi sa Belgium, si André Wozniak wala mohunong sa pagduaw sa mga kongregasyon ug nagtabang sa pag-abiyo kanila ug literatura. Kanunay siyang gisundan sa Gestapo apan wala gayod molampos sa pagdakop kaniya.

Sa Rhodesia (karon nailhang Zimbabwe) niadtong ulahing bahin sa katuigang 1970, ang mga tawo nagkinabuhi sa kahadlok, ug ang pagbiyahe gilimitihan sa panahon sa gubat sibil. Apan ang mga nagapanawng magtatan-aw sa mga Saksi ni Jehova, ingong mahigugmaong mga magbalantay ug magtatan-aw, napamatud-ang “sama sa salipdanan gikan sa hangin” alang sa ilang mga igsoon. (Isa. 32:2) Ang pipila mobaktas sa mga adlaw latas sa kabagnotan, motungas ug modulhog sa kabukiran, motabok sa peligrosong mga suba, matulog kon gabii sa gawas​—ang tanan aron maabot ang nahilit nga mga kongregasyon ug mga magmamantala, sa pagdasig kanila nga magpabiling lig-on sa pagtuo. Usa kanila mao si Isaiah Makore, nga hapit mamatay sa dihang gihagyongan ug mga bala ang iyang ulo sa panahon sa engkwentro tali sa mga sundalo sa kagamhanan ug sa “mga insurektos.”

Ang ubang nagapanawng mga magtatan-aw nag-alagad sa organisasyon sa internasyonal nga gilapdon sa daghang katuigan. Ang mga presidente sa Watch Tower Society sa subsob nagbiyahe ngadto sa ubang kayutaan sa pagtagad sa organisasyonal nga mga panginahanglan ug sa pagdiskurso panahon sa mga kombensiyon. Ang maong mga pagduaw nakatabang ug dako aron ang mga Saksi ni Jehova makasabot ug maayo sa ilang internasyonal nga panag-igsoonay. Si Brader Knorr ilabina ang naghimo niining kalihokan sa regular nga paagi, nga nagduaw sa kada sanga ug misyonaryong balay. Samtang ang organisasyon nagkadako, ang kalibotan gibahin ngadto sa napulo ka internasyonal nga mga sona, ug sugod niadtong Enero 1, 1956, ang kuwalipikadong mga igsoon, ubos sa pagdumala sa presidente, nagtabang niining pag-alagara aron nga matagad kini sa regular. Kadtong mga pagduaw sa sona, nga karon gihimo ubos sa pagdumala sa Komite sa Pag-alagad sa Nagamandong Lawas, padayon nga nagatabang sa tibuok-yutang panaghiusa ug pag-uswag sa tibuok organisasyon.

Lain pang hinungdanong mga kaugmaran ang nakatabang sa presenteng katukoran sa organisasyon.

Dugang Teokratikanhong Pagpaigo

Sa tungatunga sa Gubat sa Kalibotan II, si Joseph F. Rutherford namatay, niadtong Enero 8, 1942, ug si Nathan H. Knorr nahimong ikatulong presidente sa Watch Tower Society. Ang organisasyon nailalom sa bug-at nga pagpiit tungod sa mga pagdili nga gipahamtang sa ilang kalihokan diha sa daghang kayutaan, sa kapintasan sa magubtanong-panon nga nagtakoban sa ngalan sa patriotismo, ug sa pagdakop sa mga Saksi samtang sila nag-apod-apod sa mga literatura sa Bibliya diha sa ilang publikong ministeryo. Ang pag-ilis ba sa administrasyon mosangpot sa paghinay sa buluhaton sa maong lisod nga panahon? Ang mga igsoon nga nag-atiman sa administratibong mga butang nagsalig kang Jehova alang sa iyang direksiyon ug panalangin. Uyon sa ilang tinguha alang sa langitnong giya, ilang gisusi-pag-usab ang katukoran mismo sa organisasyon sa pagtan-aw kon kaha adunay bisan unsang bahin nga mapasuod pa sa mga paagi ni Jehova.

Unya, niadtong 1944, usa ka asembliya sa pag-alagad ang gihimo sa Pittsburgh, Pennsylvania, may kalabotan sa tinuig nga miting sa Watch Tower Society. Sa Septiyembre 30, sa wala pa ang tinuig nga miting, usa ka serye sa importante kaayong mga pakigpulong ang gihatag mahitungod sa giingon sa Kasulatan labot sa organisasyon sa mga alagad ni Jehova.c Ang pagtagad gitumong sa Nagamandong Lawas. Nianang okasyona gipasiugda nga ang teokratikanhong prinsipyo kinahanglang mapadapat sa tanang ahensiya nga gigamit sa matinumanon ug maalamong ulipon nga matang. Gipatin-aw nga dili tanan sa “nakonsagrar” nga tawo sa Diyos membro sa legal nga korporasyon. Kana naghawas lamang kanila, nga naglihok ingong legal nga ahensiya alang kanila. Hinuon, tungod kay ang Sosyedad mao ang ahensiya sa pagpublikar nga gigamit aron matagan-an ang mga Saksi ni Jehova ug literatura nga naundan sa espirituwal nga kahayag, angayan ug kinahanglan nga ang Nagamandong Lawas may suod nga pakiglabot sa mga opisyales ug mga direktor nianang legal nga Sosyedad. Ang teokratikanhong mga prinsipyo ba napadapat sa bug-os sa iyang mga kalihokan?

Ang karta sa Sosyedad naglaraw ug kahikayan bahin sa aksiyonista nga sa matag $10 (U.S.) nga kontribusyon ang usa ka membro may usa ka boto labot sa piliay sa hunta direktiba ug mga opisyales sa Sosyedad. Morag ang maong amot nagpakita sa tininuod nga interes sa buluhaton sa organisasyon. Hinuon, kining kahikayana naghatag ug mga suliran. Si Brader Knorr, ang presidente sa Sosyedad, nagpatin-aw: “Gikan sa mga termino sa karta sa Sosyedad, morag mopakita nga ang pagkamembro sa nagamandong lawas nagdepende sa mga kontribusyon ngadto sa legal nga Sosyedad. Apan sumala sa kabubut-on sa Diyos dili kana mahimo taliwala sa iyang tinuod nga piniling katawhan.”

Usa ka kamatuoran nga si Charles Taze Russell, nga sa unang 32 ka tuig sa Sosyedad mao ang kinalabwan sa nagamandong lawas, mao ang sa pinansiyal, pisikal, ug mental kinadakoan ug naamot ngadto sa Sosyedad. Apan dili amot sa salapi ang nagtino kon sa unsang paagi siya gigamit sa Ginoo. Mao ang iyang bug-os nga dedikasyon, ang iyang walay-pagkaluya nga kasibot, ang iyang dili-mokompromisong baroganan dapig sa Gingharian sa Diyos, ug ang iyang dili mabungkag nga kamatinud-anon ug kamatinumanon ang nagtimaan kaniya sa panan-aw sa Diyos ingong angayan alang sa pag-alagad. Kon bahin sa teokratikanhong organisasyon, ang lagda mapadapat: “Ang mga bahin gipahimutang sa Diyos diha sa lawas, ang matag-usa kanila, sumala sa iyang gikahimut-an.” (1 Cor. 12:​18) “Ugaling,” si Brader Knorr misaysay, “kay ang karta sa Sosyedad naghatag ug gidaghanon sa boto alang sa mga nag-amot ug salapi alang sa buluhaton sa Sosyedad, kana nagpalubog o nanghilabot sa Teokratikanhong prinsipyo may labot sa nagamandong lawas; ug kana usab lagmit magpameligro niana o magmugna ug mga suliran alang niana.”

Mao nga, sa opisyal nga miting sa tanang botanteng-aksiyonista sa Sosyedad niadtong Oktubre 2, 1944, gibotohan sa tanan nga ang karta sa Sosyedad rebisahon ug mas mouyon pa sa teokratikanhong mga prinsipyo. Ang membro sa karon limitado na ang gidaghanon nga maoy tali sa 300 ug 500, nga ang tanan maoy mga lalaki nga gipili sa hunta direktiba, dili pinasikad sa amot nga pinansiyal, apan tungod kay sila hamtong, aktibo, matinumanong mga Saksi ni Jehova nga nag-alagad nga bug-os-panahon diha sa buluhaton sa organisasyon o maoy aktibong mga ministro sa mga kongregasyon sa mga Saksi ni Jehova. Kining mga membroha mopili sa hunta direktiba, ug unya ang hunta direktiba mopili sa iyang mga opisyales. Kining bag-ong mga kahikayan miepekto sa pagkasunod tuig, niadtong Oktubre 1, 1945. Napamatud-an kini nga maayong panalipod sa panahon nga ang masupakong mga pundok kanunay nagmaneobra sa mga kalihokang pang-opisyal sa pagkontrolar sa mga korporasyon aron balayon kana pag-usab sa pagpasibo sa ilang kaugalingong mga tumong!

Ang panalangin ni Jehova niining abanteng mga lakang sa pagpauyon sa teokratikanhong mga prinsipyo nadayag. Bisan pa sa hilabihang pagpig-it nga gipahamtang sa organisasyon sa panahon sa Gubat sa Kalibotan II, ang gidaghanon sa mga magmamantala sa Gingharian nagpadayon sa pagtubo. Sa walay hunong, sila masingkamoton nga nagpadayon sa pagpanaksi mahitungod sa Gingharian sa Diyos. Sukad niadtong 1939 hangtod sa 1946, dihay dakong pagtubo nga 157 porsiento diha sa gidaghanon sa mga Saksi ni Jehova, ug nakaabot sa dugang pang unom ka kayutaan dala ang maayong balita. Sulod sa sunod 25 ka tuig, ang gidaghanon sa aktibong mga Saksi mitubo sa hapit laing 800 porsiento, ug sila nagtaho ug regular nga kalihokan diha sa dugang 86 ka kayutaan.

Linaing Pagbansay Alang sa mga Magtatan-aw

Ang pila ka tigpaniid nga tagagawas nagtuo nga dili malikayan nga sa dihang ang organisasyon modako, ang mga sukdanan maluag. Apan, sa kasukwahi, ang Bibliya nagtagna nga molungtad ang pagkamatarong ug kalinaw taliwala sa mga alagad ni Jehova. (Isa. 60:17) Kana nagkinahanglan sa maampingon ug walay undang nga edukasyon sa responsableng mga magtatan-aw diha sa Pulong sa Diyos, sa tin-aw nga pagsabot sa iyang hudisyal nga mga sukdanan, ug usa ka mapadayonong pagpadapat nianang mga sukdanana. Ang maong edukasyon gihatag. Ang mabug-osong pagtuon sa matarong nga mga kinahanglanon sa Diyos sa progresibo gitagana diha sa Ang Bantayanang Torre, ug kining materyala sa sistematiko gitun-an sa matag kongregasyon sa mga Saksi ni Jehova sa tibuok kalibotan. Apan, dugang pa niana, ang mga magtatan-aw sa panon gitudloan pa ug dugang.

Ang pangunang mga magtatan-aw sa mga sanga sa Sosyedad gitigom alang sa linaing pagbansay sa panahon sa internasyonal nga mga kombensiyon. Sukad sa 1961 latas sa 1965, ang mga kurso sa tunghaan nga gidesinyo ug linain, nga modurar ug walo ngadto sa napulo ka bulan, maoy gidumala alang kanila sa New York. Sukad sa 1977 ngadto sa 1980, may laing serye sa linaing lima-ka-semana nga mga kurso alang kanila. Ang pagbansay kanila naglakip sa bersikulo-por-bersikulo nga pagtuon sa tanang basahon sa Bibliya ingon man sa pagtagad sa mga detalye ug mga paagi sa organisasyon nga mapalapad ang pagwali sa maayong balita. Walay nasyonalistikanhong mga pagkabahinbahin taliwala sa mga Saksi ni Jehova. Bisag asa sila nagpuyo, sila nagasunod sa samang hataas nga mga sukdanan sa Bibliya ug nagtuo ug nagtudlo sa samang mga butang.

Ang mga magtatan-aw sa sirkito ug distrito gihatagan usab ug linaing pagtagad. Daghan kanila nakatambong sa Watchtower Bible School of Gilead o usa sa iyang mga Ekstensiyon nga Tunghaan. Sa popanahon, sila usab tigomon diha sa mga sangang buhatan sa Sosyedad, o sila magtigom sa ubang kombenyenteng mga lokasyon, alang sa mga seminar sa pipila ka adlaw o usa ka semana.

Niadtong 1959 laing talagsaong tagana ang gisugdan. Kini mao ang Tunghaan sa Ministeryo sa Gingharian, nga gitambongan sa mga magtatan-aw sa sirkito ug distrito ingon man sa mga magtatan-aw sa kongregasyon. Nagsugod kini ingong usa ka bulan nga kurso. Tapos magamit sa usa ka tuig sa Tinipong Bansa, ang materyal alang sa kurso gihubad ngadto sa ubang mga pinulongan ug sa progresibo gigamit sa tibuok kalibotan. Sanglit dili posible alang sa mga magtatan-aw nga mapalayo sa ilang sekular nga trabaho sulod sa tibuok bulan, ang duha-ka-semana nga bersiyon sa kurso ang gigamit sugod niadtong 1966.

Kining tunghaana dili seminaryo diin ang mga lalaki ginabansay sa pag-andam alang sa ordinasyon. Ang nagtungha maoy ordinado na nga mga ministro. Daghan kanila maoy mga magtatan-aw ug mga magbalantay na sa panon sulod sa mga dekada. Ang ilang kurso sa pagtuon maoy usa ka kahigayonan sa detalyadong paghisgot sa mga instruksiyon gikan sa Pulong sa Diyos mahitungod sa ilang buluhaton. Gipasiugdag maayo ang kahinungdanon sa ministeryo sa kanataran ug kon unsaon sa paghimo niana nga epektibo. Tungod sa nagkausab nga mga sukdanan sa moral sa kalibotan, igo-igong panahon usab ang gigugol sa paghisgot mahitungod sa pagtuboy sa mga sukdanan sa Bibliya sa moralidad. Kini nga kurso gisundan niining ulahing mga panahon sa mga seminar kada duha o tulo ka tuig, ingon man sa makatabang nga mga miting nga gidumala sa nagapanawng mga magtatan-aw uban sa lokal nga mga magtatan-aw sa pipila ka higayon kada tuig. Kini naghatag ug kahigayonan aron mahatagan ug linaing pagtagad ang presenteng mga panginahanglan. Sila maoy panalipod batok sa bisan unsang pagpalayo gikan sa mga sukdanan sa Bibliya, ug sila nakatabang padulong sa managsamang pagdumala sa mga kahimtang diha sa tanang mga kongregasyon.

Ang mga Saksi ni Jehova nagtuman sa tambag sa 1 Corinto 1:10: “Apan magahangyo ako kaninyo, mga igsoon, tungod sa ngalan sa atong Ginoong Jesu-Kristo nga unta kamong tanan magasulti sa mao rang usa ka butang, ug nga wala unta kaninyoy mga pagkabahinbahin, kondili mausa unta hinuon kamo diha sa mao rang paagiha sa paghunahuna ug sa mao rang hunahunaa.” Kini dili usa ka pinugos nga pagpahiuyon; kini ang sangpotanan sa pagkaedukar diha sa mga paagi sa Diyos nga natala sa Bibliya. Ang mga Saksi ni Jehova nagkalipay diha sa mga paagi sa Diyos ug sa iyang katuyoan. Kon si bisan kinsa moundang sa pagkalipay diha sa pagkinabuhi sumala sa mga sukdanan sa Bibliya, sila libre sa pagbiya sa organisasyon. Apan kon si bisan kinsa mosugod sa pagwali sa laing mga tinuohan o mosalikway sa moralidad sa Bibliya, ang mga magtatan-aw mohimog lakang sa pagpanalipod sa panon. Ang organisasyon magpadapat sa tambag sa Bibliya: “Inyong timan-an ang mga nagahimog mga pundokpundok ug mga pagpangdol supak sa pagtulon-an nga inyong nakat-onan, ug likayi ninyo sila.”​—Roma 16:17; 1 Cor. 5:​9-13.

Ang Bibliya nagtagna nga tugotan sa Diyos nga molungtad ang maong kahimtang taliwala sa iyang mga alagad, usa ka kahimtang nga modaog ang pagkamatarong ug mamungag malinawong mga bunga. (Isa. 32:​1, 2, 17, 18) Kanang mga kahimtanga madanihon kaayo sa mga tawo nga nahigugma sa matarong.

Unsa ka daghan sa maong mga mahigugmaon sa pagkamatarong ang pagatigomon una pa matapos kining karaang sistema? Ang mga Saksi ni Jehova wala masayod. Apan si Jehova nahibalo kon unsay gikinahanglan sa iyang buluhaton, ug sa iyang kaugalingong panahon ug sa iyang kaugalingong paagi iyang tinoon nga ang iyang organisasyon nasangkapan sa pag-atiman niana.

Nangandam Alang sa Kusog nga Pagtubo

Sa dihang naghimo ug panukiduki ubos sa pagdumala sa Nagamandong Lawas aron andamon ang reperensiyang basahon nga Aid to Bible Understanding, ang pagtagad sa makausa pa gitumong sa paagi sa pag-organisar sa unang-siglo nga Kristohanong kongregasyon. Gihimo ang maampingong pagtuon mahitungod sa Biblikanhong mga termino sama sa “ansiano,” “magtatan-aw,” ug “ministro.” Ang modernong-adlaw nga organisasyon sa mga Saksi ni Jehova sa bug-os nahiuyon ba sa hularan nga natipigan diha sa Kasulatan?

Ang mga alagad ni Jehova nakahukom nga padayong magpasakop sa balaang direksiyon. Sa serye sa mga kombensiyon nga gihimo niadtong 1971, ang pagtagad gitumong sa mga kahikayan sa pagdumala sa sayong Kristohanong kongregasyon. Gipaila nga ang ekspresyon nga pre·sbyʹte·ros (gulang nga lalaki, ansiano), ingong gigamit sa Bibliya, dili limitado alang sa mga gulang nga tawo, ni kana mapadapat sa tanan diha sa kongregasyon nga hamtong sa espirituwal. Kana sa linain gigamit sa usa ka opisyal nga kahulogan nga nagatumong sa mga magtatan-aw sa mga kongregasyon. (Buh. 11:30; 1 Tim. 5:17; 1 Ped. 5:​1-3) Kini sila nakadawat sa ilang mga posisyon pinaagi sa pagtudlo, ingong uyon sa mga kinahanglanon nga nahimong bahin sa dinasig nga Kasulatan. (Buh. 14:23; 1 Tim. 3:​1-7; Tito 1:​5-9) Kon may igong kuwalipikadong mga lalaki, may kapin sa usa ka ansiano sa kongregasyon. (Buh. 20:17; Filip. 1:1) Kini naglangkob sa “lawas sa mga ansiano,” nga ang tanan may samang opisyal nga posisyon, ug walay mausa kanila ang labing ilado o gamhanang membro sa kongregasyon. (1 Tim. 4:14) Sa pag-abag sa mga ansiano, kini gisaysay, may tinudlo usab nga “ministeryal nga mga alagad,” sumala sa mga kinahanglanon nga gihan-ay ni apostol Pablo.​—1 Tim. 3:​8-10, 12, 13.

Ang mga kahikayan gipatuman nga walay langan aron ang organisasyon mas maharmoniya pa niining hularan sa Bibliya. Kini nagsugod sa Nagamandong Lawas mismo. Ang iyang membro gidugangan nga mokapin na sa pito nga, ingong mga membro sa hunta direktiba sa Watch Tower Bible and Tract Society of Pennsylvania, nag-alagad ingong nagamandong lawas alang sa mga Saksi ni Jehova. Walay permanenteng gidaghanon sa mga membro sa Nagamandong Lawas. Niadtong 1971, may 11; sulod sa pipila ka tuig, mikabat sa 18; niadtong 1992, may 12. Tanan sila maoy mga lalaki nga dinihogan sa Diyos ingong isigka-manununod uban kang Jesu-Kristo. Ang 12 nga nag-alagad ingong mga membro sa Nagamandong Lawas sa 1992 nakagugol na niadtong panahona ug kapin sa 728 ka tuig tanantanan diha sa bug-os-panahong pag-alagad ingong mga ministro ni Jehova nga Diyos.

Gikauyonan niadtong Septiyembre 6, 1971, nga ang pagtsirman sa mga miting sa Nagamandong Lawas kinahanglang magturnohay kada tuig sumala sa alpabetikong han-ay sa mga apelyido sa mga membro niana. Kini sa pagkatinuod miepekto sa Oktubre 1. Ang mga membro sa Nagamandong Lawas nagpulipuli usab, kada semana, sa pagpanguna sa pagsimba sa buntag ug sa pagdumala sa Pagtuon sa Bantayanang Torre alang sa mga membro sa kawani sa hedkuwarter.d Kining kahikayana miepekto sa Septiyembre 13, 1971, sa dihang si Frederick W. Franz nanguna sa programa sa pagsimba sa buntag sa hedkuwarter sa Sosyedad sa Brooklyn, New York.

Sa misunod nga tuig, gihimo ang pagpangandam alang sa mga pagpasibo diha sa pagtan-aw sa mga kongregasyon. Dili na kay usa lang ang alagad sa kongregasyon nga abagan sa tinong gidaghanon sa ubang mga alagad. Ang mga lalaki nga kuwalipikado sa Kasulatanhon igatudlo sa pag-alagad ingong mga ansiano. Ang uban, nga nakakab-ot sa mga kinahanglanon sa Bibliya, igatudlo nga ministeryal nga mga alagad. Nagbukas kini sa dalan alang sa mas daghan nga makaambit sa mga responsabilidad sa kongregasyon ug sa ingon makabaton ug bililhong kasinatian. Walay mausa sa mga Saksi ni Jehova ang nakahunahuna kaniadto nga ang gidaghanon sa mga kongregasyon mitubo ug 156 porsiento sulod sa misunod nga 21 ka tuig, nga mikabat sa gidaghanon nga 69,558 sa 1992. Apan ang Ulo sa kongregasyon, ang Ginoong Jesu-Kristo, sa dayag nangandam alang sa umaabot.

Niadtong sayo sa katuigang 1970, gihunahuna ug maayo ang dugang pag-organisar pag-usab sa Nagamandong Lawas. Sukad sa pagkainkorporar sa Watch Tower Society niadtong 1884, ang pagpatik sa literatura, pagdumala sa tibuok-yutang buluhaton sa pag-ebanghelyo, ug ang mga kahikayan sa mga tunghaan ug mga kombensiyon giatiman ubos sa direksiyon sa buhatan sa presidente sa Watch Tower Bible and Tract Society. Apan tapos sa maampingong pag-analisar ug paghisgot sa mga detalye sulod sa usa ka yugto nga daghang bulan, usa ka bag-ong kahikayan ang gisagop sa tanan niadtong Disyembre 4, 1975. Unom ka komite sa Nagamandong Lawas ang giporma.

Ang Komite sa Tsirman (gilangkoban sa presenteng tsirman sa Nagamandong Lawas, ang gisundan nga tsirman, ug sa moabotay nga tsirman) nagadawat sa mga taho mahitungod sa dagkong mga emerhensiya, mga katalagman, ug mga kampanya sa paglutos, ug kana nagatino nga kining tanan madumala nga walay langan sa Nagamandong Lawas. Ang Komite sa Pagsulat nagadumala sa pagsulat, pagrekord, ug pag-video sa espirituwal nga pagkaon alang sa mga Saksi ni Jehova ug aron ipang-apod-apod sa publiko, ug kana nagatan-aw sa paghubad nga buluhaton ngadto sa gatosan ka pinulongan. Ang responsabilidad sa Komite sa Pagtudlo mao ang pagdumala sa mga tunghaan ug mga asembliya, ug usab sa distrito ug internasyonal nga mga kombensiyon, sa katawhan ni Jehova, ingon man sa instruksiyon sa pamilyang Bethel ug ang paglaraw sa materyal nga pagagamiton alang sa maong mga katuyoan. Ang Komite sa Pag-alagad nagdumala sa tanang bahin sa buluhatong pag-ebanghelyo, lakip sa kalihokan sa mga kongregasyon ug nagapanawng mga magtatan-aw. Ang pagpatik, pagpublikar, ug pagpadala sa literatura ingon man sa pagpalakaw sa mga pabrika ug ang pagdumala sa legal ug opisyal nga mga kahikayan tanantanan gidumala sa Komite sa Pagpamatik. Ug ang Komite sa Kawanihan nagatan-aw sa mga kahikayan alang sa personal ug espirituwal nga tabang ngadto sa mga membro sa mga pamilyang Bethel ug maoy responsable sa pagdapit sa bag-ong mga membro aron sa pag-alagad diha sa mga pamilyang Bethel sa tibuok kalibotan.

Ang dugang makatabang nga mga komite giasayn sa pagtan-aw sa mga pabrika, sa mga balayng Bethel, ug sa mga uma nga may kalabotan sa hedkuwarter sa kalibotan. Mahitungod niining mga komiteha ang Nagamandong Lawas libreng nagagamit sa mga katakos sa mga membro sa “dakong panon.”​—Pin. 7:​9, 15.

Gipasibo usab ang pagtan-aw sa mga sanga sa Sosyedad. Sukad sa Pebrero 1, 1976, ang kada sanga ginadumala sa usa ka komite nga may tulo o kapin pang mga membro, depende sa panginahanglan ug sa gidak-on sa sanga. Kini sila nagabuhat ubos sa direksiyon sa Nagamandong Lawas aron atimanon ang buluhaton sa Gingharian diha sa ilang dapit.

Niadtong 1992, gihatagan ug dugang tabang ang Nagamandong Lawas sa dihang ang ubay-ubayng mga magtatabang, nga sa kinadak-an gikan sa taliwala sa dakong panon, giasayn sa pag-ambit diha sa mga miting ug buluhaton sa mga komite sa Pagsulat, Pagtudlo, Pag-alagad, Pagpamatik, ug Kawanihan.e

Kining pag-apod-apod sa responsabilidad napamatud-an nga mapuslanon gayod. Uban sa mga pagpasibo nga nahimo na diha sa mga kongregasyon, kana nakatabang sa pagkuha sa bisan unsang babag nga lagmit makapugong sa mga indibiduwal sa pag-apresyar nga si Kristo mao ang Ulo sa kongregasyon. Napamatud-an nga labing makaayo ang pagbaton ug ubay-ubayng mga igsoon nga magtinambagay mahitungod sa mga butang nga nagaapektar sa buluhaton sa Gingharian. Dugang pa, kining pag-organisar pag-usab nakapaposible sa pagtagana sa gikinahanglan nga pagdumala diha sa daghang mga dapit diin kana gikinahanglan dayon sa panahon nga dako gayod ang pagtubo sa organisasyon. Dugay na kaniadto, nga si Jehova nagtagna pinaagi ni propetang Isaias: “Ang usa nga diyutay mahimo nga usa ka libo, ug ang usa nga gamay mahimo nga usa ka kusganon nga nasod. Ako mismo, si Jehova, magapadali niini sa iyang kaugalingong panahon.” (Isa. 60:22) Wala lamang niya kini padalia apan naghatag usab siya sa gikinahanglang direksiyon aron nga ang iyang makitang organisasyon makaarang sa pag-atiman niana.

Ang interes karon sa mga Saksi ni Jehova maoy anaa sa buluhaton nga gihatag kanila sa Diyos nga buhaton sa panahon niining kataposang mga adlaw sa karaang kalibotan, ug sila organisado kaayo sa pagpalampos niana. Ang mga Saksi ni Jehova nakakita sa dili kaduhaduhaan nga mga ebidensiya nga kini nga organisasyon dili iya sa tawo kondili iya sa Diyos ug nga ang kaugalingong Anak sa Diyos, si Jesu-Kristo, maoy nagadumala niini. Ingong nagamandong Hari, panalipdan ni Jesus ang iyang matinumanong mga sakop latas sa umaabot nga dakong kasakitan ug tinoon nga sila epektibong naorganisar alang sa pagtuman sa kabubut-on sa Diyos sa umaabot nga Milenyo.

[Mga footnote]

Sukad sa 1938 hangtod sa 1941, ang mga alagad sa sona giasayn sa pagbuhat uban sa limitadong gidaghanon sa mga kongregasyon nga magturnohay, mao nga makabalik sa samang mga grupo sa regular nga mga yugto. Tapos mahunong ug hapit usa ka tuig, kining pag-alagara gibalik niadtong 1942 pinaagi sa mga alagad sa kaigsoonan. Niadtong 1948 ang terminong alagad sa sirkito gisagop; karon, magtatan-aw sa sirkito.

[Blurb sa panid 204]

Ang klerong matang walay dapit sa ilang taliwala

[Blurb sa panid 205]

Wala mosulay sa pagtukod ug usa ka “yutan-ong organisasyon”

[Blurb sa panid 206]

Sa unsang paagi gipili ang mga ansiano?

[Blurb sa panid 212]

Usa ka direktor nga tinudlo sa Sosyedad

[Blurb sa panid 213]

Ang pila ka ansiano dili gustong mosangyaw sa gawas sa kongregasyon

[Blurb sa panid 214]

Nikunhod ang mga membro apan nalig-on ang organisasyon

[Blurb sa panid 218]

Sa unsang paagi ang mga pagtudlo pagabuhaton?

[Blurb sa panid 220]

Si Rutherford ba nagsulay lamang sa pagbaton ug mas dakong pagkontrolar?

[Blurb sa panid 222]

Pakigkontak uban sa mga grupo sa duha o tulo ka tawo ingon man sa mas daghang membro

[Blurb sa panid 223]

Bag-ong mga responsabilidad alang sa nagapanawng mga magtatan-aw

[Blurb sa panid 234]

Usa ka pinadak-ang Nagamandong Lawas nga nagturnohay sa pagtsirman

[Blurb sa panid 235]

Gikinahanglang pagdumala sulod sa panahon sa kusog nga pagtubo

[Kahon sa panid 207]

Nganong Giusab?

Dihang gisukna mahitungod sa iyang pag-usab sa panglantaw labot sa pagpili sa mga ansiano diha sa nagkadaiyang mga grupo sa katawhan sa Ginoo, si C. T. Russell mitubag:

“Una sa tanan pasaligan ko kamo dayon nga wala gayod ako mangangkon nga dili masayop. . . . Wala kami maglimod nga nagatubo pa diha sa kahibalo, ug nga karon among nakita diha sa daw lahi nga pagsabot ang kabubut-on sa Ginoo may kalabotan sa mga Ansiano o mga pangulo sa nagkadaiyang ginagmayng grupo sa iyang katawhan. Ang sayop namo sa panghukom mao ang pagdahom ug dako sa minahal nga mga igsoon nga, tungod kay unang nakahibalo sa Kamatuoran, kinaiyanhon unta nga mangulo niining ginagmayng mga kompaniya. Ang maayong tinamdan bahin kanila nga kanunay namong gituohan mao, nga ang kahibalo sa Kamatuoran mohimo kanilang mapaubsanon gayod, nga sila makaapresyar sa ilang kadili-hinungdanon, ug nga ang bisan unsa nga kahibalo nila ug ang pagpahayag niana ngadto sa uban maoy tungod kay sila mga tigpamaba sa Diyos ug gigamit niya. Kami naglaom gayod nga kini sila unta sa tanang kahulogan sa pulong mahimong mga panig-ingnan sa panon; ug nga unta ang Ginoo sa iyang kabubut-on modala ngadto sa gagmayng mga kompaniya ug usa o kapin pang mga brader nga may samang katakos, o may labawng katakos, sa pagpahayag sa Kamatuoran, nga ang espiritu sa gugma moagak kanila sa pagtahod sa usag usa, ug sa ingon makatabang ug makadasig sa usag usa sa pagpakig-ambit diha sa pag-alagad sa Iglesya, ang lawas ni Kristo.

“Uban niining panghunahuna kami nakahinapos nga ang dagayang sukod sa grasya ug kamatuoran nga gituyo nga moabot niining panahona ug gipabilhan sa konsagradong katawhan sa Ginoo dili na magkinahanglan nga sila mosunod pa sa kurso nga gilaraw sa mga apostoles sa sayong Iglesya. Ang sayop namo mao ang pagkapakyas sa pag-ila nga ang mga kahikayang gilaraw sa mga apostoles ilalom sa langitnong pagdumala maoy labaw sa bisan unsang butang nga mahimong imugna sa uban, ug nga ang Iglesya sa katibuk-an magkinahanglan sa mga latid nga gisugo sa mga apostoles hangtod, sa among pagkausab sa pagkabanhaw, kaming tanan mabug-os ug mahingpit ug sa laktod makauban sa Agalon.

“Ang among sayop inanay nga misantop kanamo samtang among nakita taliwala sa minahal nga mga igsoon ang diyutayng espiritu sa panag-indig, ug sa bahin sa daghan ang tinguha nga manguna diha sa mga tigom ingong posisyon inay ingong pag-alagad, ug sa pagpahigawas ug pagbabag sa pagtubo ngadto sa pagkapangulo sa ubang mga igsoon nga may susamang kinaiyanhong katakos ug may susamang kahibalo sa Kamatuoran ug katakos sa paggunit sa espada sa Espiritu.”​—“Zion’s Watch Tower,” Marso 15, 1906, p. 90.

[Kahon/Mga hulagway sa panid 208, 209]

Mga Pasilidad nga Gigamit sa Sosyedad sa Miaging Siglo sa Dapit sa Pittsburgh

Ang Bible House, gipakita dinhi, nagsilbing hedkuwarter sulod sa 19 ka tuig, gikan niadtong 1890 hangtod 1909f

Si Brader Russell may tun-anan dinhi

Ang mga membro sa pamilya sa Bible House nga nag-alagad dinhi niadtong 1902

Ang tinukod naglakip niining departamento sa tipohanan ug komposisyon (itaas sa tuo), departamento sa shipping (ubos sa tuo), tagoanan sa literatura, puy-anan alang sa kawani, usa ka tigomanan (assembly hall) nga kalingkoran sa mga 300

[Footnote]

[Kahon sa panid 211]

Kansang Buluhaton Kini?

Talitapos sa iyang yutan-ong kinabuhi, si Charles Taze Russell misulat: “Sa masubsob ang katawhan sa Diyos makalimot nga ang Ginoo Mismo mao ang nanguna sa Iyang buluhaton. Sa kasagaran ang panghunahuna mao, Kita mohimog buluhaton ug dapiton ang Diyos nga mobuhat uban kanato sa atong buluhaton. Atong batonan ang hustong panglantaw mahitungod ning butanga, ug sabton nga ang Diyos nagtuyo ug nagabuhat ug usa ka dakong buluhaton; ug nga kini molampos, sa bug-os walay sapayan kanato ug sa atong paningkamot; ug kini usa ka dakong pribilehiyo nga gihatag sa katawhan sa Diyos nga mobuhat uban sa ilang Maglalalang sa pagpalampos sa Iyang mga laraw, Iyang mga hunahuna, Iyang mga kahikayan, diha sa Iyang paagi. Ang pagtan-aw sa mga butang sumala niining panglantaw, ang atong pag-ampo ug ang atong pagbantay kinahanglang uban sa hunahuna nga mahibalo ug motuman sa kabubut-on sa Ginoo, nga makontento sa bisan unsang papel nga ipabuhat kanato, sanglit ang atong Diyos mao ang nagatultol kanato. Kini mao ang mga kahikayan sa mga butang nga gitinguha nga sundon sa Watch Tower Bible and Tract Society.”—“The Watch Tower,” Mayo 1, 1915.

[Kahon sa panid 215]

V.D.M. nga mga Pangutana

Ang mga letrang V.D.M. naghawas sa Latin nga mga pulong “Verbi Dei Minister,” o Ministro sa Balaang Pulong.

Niadtong 1916 usa ka listahan sa mga pangutana mahitungod sa Kasulatanhong mga butang ang giandam sa Sosyedad. Kadtong mohawas sa Sosyedad ingong mga mamumulong gihangyo sa pagtubag sa matag pangutana nga sinulat. Kini nakapaarang sa Sosyedad sa pagkahibalo sa mga panghunahuna, mga opinyon, ug pagsabot niining maong mga brader kon bahin sa paninugdang mga kamatuoran sa Bibliya. Ang sinulat nga mga tubag gisusig maayo sa usa ka tigsusing hunta diha sa mga buhatan sa Sosyedad. Kadtong pagailhon nga kuwalipikadong mga mamumulong kinahanglang makakuhag grado nga 85 porsiento o mas maayo pa.

Sa ulahi, daghan sa mga ansiano, mga deakono, ug ubang mga Estudyante sa Bibliya nangutana kon sila mahimo bang makabaton sa listahan sa mga pangutana. Sa wala madugay, gipahayag nga makaayo kon ang mga saring mopili lamang niadtong mga tawo nga kuwalipikadong V.D.M. ingong ilang mga hawas.

Sa dihang ang Sosyedad mihatag ug titulo nga Ministro sa Balaang Pulong, kini wala magkahulogan nga ang indibiduwal giordinahan. Kini yanong nagpasabot nga ang tigsusing hunta sa mga buhatan sa Sosyedad nakasusi sa doktrinal nga kauswagan sa usa ka tawo, ug sa makataronganong sukod sa iyang reputasyon, ug nakahinapos nga siya takos nga pagatawgong Ministro sa Balaang Pulong.

Ang V.D.M. nga mga pangutana mao ang mosunod:

(1) Unsa ang unang buhat sa paglalang sa Diyos?

(2) Unsay kahulogan sa pulong “Logos,” ingong nalangkit sa Anak sa Diyos? ug unsay gipasabot sa mga pulong Amahan ug Anak?

(3) Kanus-a ug sa unsang paagi ang sala misulod sa kalibotan?

(4) Unsa ang Balaang silot alang sa sala diha sa mga makasasala? ug kinsa ang mga makasasala?

(5) Nganong kinahanglanon nga ang “Logos” magpakaunod? ug Siya ba “diyos nga anaa sa unod”?

(6) Sa unsang kinaiya ang Tawo nga si Kristo Jesus sukad sa pagkamasuso hangtod sa kamatayon?

(7) Sa unsang kinaiya si Jesus sukad sa pagkabanhaw; ug unsa ang Iyang opisyal nga relasyon kang Jehova?

(8) Unsa ang buluhaton ni Jesus niining Kapanahonan sa Maayong Balita​—ang panahon sukad niadtong Pentekostes hangtod karon?

(9) Unsa na ang nahimo ni Jehova nga Diyos alang sa kalibotan sa katawhan? ug unsa ang nahimo ni Jesus?

(10) Unsa ang Balaang katuyoan kon bahin sa Iglesya sa dihang mabug-os?

(11) Unsa ang Balaang katuyoan kon bahin sa kalibotan sa katawhan?

(12) Unsay mahimong dangatan sa dili na gayod mamatul-id?

(13) Unsa ang mahimong ganti o mga panalangin nga moabot sa kalibotan sa katawhan pinaagi sa kamasinugtanon sa Gingharian sa Mesiyas?

(14) Pinaagi sa unsang mga lakang nga ang usa ka makasasala mahimong makadangat sa gikinahanglang relasyon uban kang Kristo ug sa Langitnong Amahan?

(15) Pagkatapos igaanak ang usa ka Kristohanon sa Balaang Espiritu, unsa ang iyang kurso, ingon sa gimando sa Pulong sa Diyos?

(16) Nakatalikod ka na ba sa sala aron sa pag-alagad sa Diyos nga buhi?

(17) Gikonsagrar na ba nimo sa bug-os ang imong kinabuhi ug ang tanan nimong kusog ug kahanas ngadto sa Ginoo ug sa Iyang pag-alagad?

(18) Gisimbolohan na ba nimo kining maong konsagrasyon pinaagi sa pagtuslob sa tubig?

(19) Nakahimo ka na ba ug Panaad sa I. B. S. A. [International Bible Students Association] sa pagkabalaan sa kinabuhi?

(20) Nabasa na ba nimo sa bug-os ug sa maampingon ang unom ka tomo sa STUDIES IN THE SCRIPTURES?

(21) Nalamdagan ka ba ug nakakuhag kaayohan gikan niana?

(22) Nagtuo ka ba nga ikaw may igo na ug dumalayong kahibalo sa Bibliya nga mohimo kanimong mas epektibo ingong usa ka alagad sa Ginoo sa nahibilin nimong kinabuhi?

[Kahon/Mga hulagway sa panid 216, 217]

Mga Tinukod nga Gigamit sa Unang mga Adlaw sa Brooklyn

Balayng Bethel

122-124 Columbia Heights

Lawak kan-anan sa Balayng Bethel

Tabernakulo

Mga buhatan, tipiganan sa literatura, departamento sa mailing, hiraminta sa pagtipo, ug usa ka 800-lingkoranan nga awditoryum nahimutang dinhi, sa 17 Hicks Street (gigamit sukad sa 1909 hangtod sa 1918)

Ang awditoryum

Unang mga Pabrika

Mga membro sa pamilyang Bethel nga nagtrabaho sa Myrtle Avenue nga pabrika niadtong 1920 (tuo)

35 Myrtle Avenue (1920-22)

18 Concord Street (1922-27)

117 Adams Street (1927- )

[Kahon/Mga hulagway sa panid 224, 225]

Nagapanawng mga Magtatan-aw Pipila sa Linibo nga Nakaalagad

Canada, 1905-33

Inglaterra, 1920-32

Pinlandia, 1921-26, 1947-70

Tinipong Bansa, 1907-15

Nagabiyahe tali sa mga kongregasyon sa​—

Greenland

Venezuela

Lesotho

Mexico

Peru

Sierra Leone

Mabalhinbalhin nga mga puy-anan sa Namibia

Nakig-ambit uban sa lokal nga mga Saksi sa pag-alagad sa kanataran sa Hapon

Miting uban sa lokal nga mga ansiano sa Alemanya

Nagahatag ug praktikal nga tambag sa mga payunir sa Hawaii

Nagatudlo sa usa ka kongregasyon sa Pransiya

[Kahon/Hulagway sa panid 229]

Unang Legal nga mga Korporasyon

Zion’s Watch Tower Tract Society. Unang giporma niadtong 1881 ug unya legal nga giinkorporar sa estado sa Pennsylvania niadtong Disyembre 15, 1884. Niadtong 1896 ang iyang ngalan giusob ngadto sa Watch Tower Bible and Tract Society. Sukad sa 1955 kana nailhan ingong Watch Tower Bible and Tract Society of Pennsylvania.

Peoples Pulpit Association. Giporma niadtong 1909 may kalabotan sa pagbalhin sa Sosyedad sa iyang pangunang mga opisina ngadto sa Brooklyn, New York. Niadtong 1939 ang ngalan giusob ngadto sa Watchtower Bible and Tract Society, Inc. Sukad sa 1956 kana nailhan ingong Watchtower Bible and Tract Society of New York, Inc.

International Bible Students Association. Nainkorporar sa Londres, Inglaterra, niadtong Hunyo 30, 1914.

Aron matagbaw ang legal nga mga kinahanglanon, ang ubang korporasyon giporma sa mga Saksi ni Jehova diha sa daghang komunidad ug kayutaan. Hinuon, ang mga Saksi ni Jehova wala mabahinbahin ngadto sa nasyonal o rehiyonal nga mga organisasyon. Sila maoy nahiusang tibuok-yuta nga panag-igsoonay.

[Kahon sa panid 234]

‘Sama sa Sayong Kristohanong Komunidad’

Ang relihiyosong publikasyon nga “Interpretation” nag-ingon niadtong Hulyo 1956: “Sa ilang organisasyon ug buluhatong pagwali, sila [mga Saksi ni Jehova] ang mas nakasundog ug suod sa sayong Kristohanong komunidad kay sa bisan unsang pundok. . . . Diyutay ra sa ubang pundok ang migamit sa mabug-oson sa Kasulatan diha sa ilang mga mensahe, binaba man ug sinulat, sama sa ilang gihimo.”

[Hulagway sa panid 210]

Aron madumala sa mas suod, ang mga sangang buhatan gitukod. Ang una maoy sa Londres, Inglaterra, niining maong tinukod

[Hulagway sa panid 221]

Si J. F. Rutherford niadtong 1941. Ang mga Saksi nahibalo nga siya dili nila pangulo

[Hulagway sa panid 226]

Si John Booth, nagapanawng magtatan-aw sa T.B.A. sukad niadtong 1936 hangtod sa 1941

[Hulagway sa panid 227]

Si Carey Barber, kansang distrito naglakip sa halapad nga bahin sa Tinipong Bansa

[Hulagway sa panid 228]

Si Brader Knorr regular nga nagduaw sa kada sanga ug balay sa misyonaryo

[Hulagway sa panid 230]

Ang pangunang mga magtatan-aw sa mga sanga sa Sosyedad gitigom tanan alang sa linaing pagbansay (New York, 1958)

[Mga hulagway sa panid 231]

Ang Tunghaan sa Ministeryo sa Gingharian nakahatag ug bililhong instruksiyon alang sa mga magtatan-aw sa tibuok yuta

Tunghaan sa Ministeryo sa Gingharian sa usa ka kampo sa mga kagiw sa Thailand, 1978; sa Pilipinas, 1966 (taas sa wala)

[Hulagway sa panid 232]

Ang mga instruksiyon sa organisasyon sa progresibo gipublikar (una sa Ingles, unya sa ubang pinulongan) aron ipatakdo ang mga kalihokan sa mga Saksi ug sa pagpahibalo sa tanan bahin sa mga tagana nga gihimo aron sa pagtabang kanila diha sa ilang ministeryo