Kapitulo 16

Mga Tigom Alang sa Pagsimba, Pagtudlo, ug Pagdasig

ANG mga tigom sa kongregasyon maoy hinungdanong bahin sa kalihokan sa mga Saksi ni Jehova. Bisan sa dihang ang mga kahimtang nakapalisod kaayo niana, sila naningkamot sa pagtambong nga regular sa ilang mga tigom, uyon sa tambag sa Bibliya: “Magtinagdanay kita sa usag usa nga magdinasigay ngadto sa paghigugma ug sa maayong mga buhat, nga dili magabiya sa atong panagkatigom, sama sa ginabuhat sa pipila, apan sa pagdasig sa usa ug usa, ug ilabina gayod sa makita ninyo nga ang adlaw nagkahiduol na.” (Heb. 10:​24, 25) Kon posible, ang kada kongregasyon magtigom ug katulo sa usa ka semana, nga tanantanan mokabat ug 4 ka oras ug 45 minutos. Ugaling, ang pamaagi sa mga tigom, ingon man sa ilang kasubsob, nagkadaiya sumala sa panginahanglan nianang panahona.

Niadtong unang siglo, ang mga pagpadayag sa milagrosong mga gasa sa espiritu maoy iladong bahin sa Kristohanong mga tigom. Ngano? Tungod kay pinaagi nianang mga gasaha, ang Diyos nagpamatuod nga siya wala na mogamit sa relihiyosong sistema sa Hudiyo apan ang iyang espiritu sa maong panahon diha na sa bag-ong naporma nga Kristohanong kongregasyon. (Buh. 2:​1-21; Heb. 2:​2-4) Sa mga tigom sa sayong mga Kristohanon, ang mga pag-ampo gitanyag, ang mga pagdayeg sa Diyos giawit, ug gipasiugda ang pagpanagna (nga mao, ang mga pagpadayag sa balaang kabubut-on ug katuyoan) ug pagpaambit sa instruksiyon nga makapalig-on niadtong makadungog niana. Kadtong mga Kristohanon nagkinabuhi sa panahon nga may dagkong mga kaugmaran mahitungod sa katuyoan sa Diyos. Kinahanglang makasabot sila niini ug mahibalo kon unsaon sa pagbuhat nga kaharmoniya niana. Ugaling, ang pila kanila nagdumala sa ilang mga tigom sa paaging dili balanse, ug sama sa gipakita sa Bibliya, gikinahanglan ang tambag aron nga himoon ang mga butang sa paagi nga labing mapuslanon.​—1 Cor. 14:​1-40.

Ang mga gibuhat sa panahon sa mga tigom niadtong sayong mga Kristohanon gibuhat ba usab sa mga Estudyante sa Bibliya sa dihang nagtigom niadtong katuigang 1870 ug human niana?

Pagtagana sa Espirituwal nga mga Panginahanglan sa Sayong mga Estudyante sa Bibliya

Si Charles Taze Russell ug ang gamayng grupo sa mga kauban nga diha ug sa duol sa Allegheny, Pennsylvania, nagpormag usa ka klase sa pagtuon sa Bibliya niadtong 1870. Ingong resulta sa ilang mga tigom, inanay nga mitubo ang ilang gugma sa Diyos ug sa iyang Pulong ug sa progresibo nakasabot sa gitudlo mismo sa Bibliya. Walay milagrosong pagpanultig dila sa panahon sa maong mga tigom. Nganong wala? Kay ang maong milagrosong mga gasa nakatuman na sa ilang katuyoan niadtong unang siglo, ug ingon sa gitagna sa Bibliya, sila gihunong. “Ang sunod nga lakang sa pag-uswag,” saysay ni Brader Russell, “mao ang pagpadayag sa mga bunga sa Espiritu, ingon sa gipatin-aw pag-ayo ni San Pablo.” (1 Cor. 13:​4-10) Dugang pa, sama usab niadtong unang siglo, may dinaliang buluhaton sa pag-ebanghelyo, ug tungod niini sila kinahanglang madasig. (Heb. 10:​24, 25) Sa wala madugay, sila may duha na ka regular nga tigom kada semana.

Si Brader Russell nakaamgo nga hinungdanong mahiusa ang mga alagad ni Jehova, walay sapayan kon asa man sila nagpuyo sa tibuok yuta. Busa, niadtong 1879, sa pagsugod gayod ug patik sa Watch Tower, ang mga magbabasa niana gidasig nga mohangyo kang Brader Russell o sa usa ka kaubanan niya nga moduaw kanila. Ang usa ka tin-aw nga pagkapahayag nga kondisyon maoy “Walay bayranan ni koleksiyon nga himoon.” Human makadawat ug ubay-ubayng mga hangyo, si Brader Russell misugod sa usa ka bulan nga pagbiyahe nga nagdala kaniya hangtod sa Lynn, Massachusetts, nga sa matag hapit naghimog mga tigom nga dangtag upat hangtod unom ka oras sa usa ka adlaw. Ang ulohan nga gipasiugda mao ang “Mga Butang Mahitungod sa Gingharian sa Diyos.”

Sayo niadtong 1881, si Brader Russell nagdasig sa mga magbabasa sa Watch Tower nga wala pay regular nga tigom sa ilang dapit: “Pagtigom sa inyong kaugalingong balay uban sa inyong pamilya, o uban sa pipila nga basin interesado. Pagbasa, pagtuon, pagdayeg ug pagsimba nga magkauban, ug diin ang duha o tulo nagtigom sa Iyang ngalan, ang Ginoo maanaa sa inyong taliwala​—ang inyong magtutudlo. Ingon niana ang paagi sa pila ka tigom sa kongregasyon sa kapanahonan sa mga Apostoles. (Tan-awa ang Filemon, 2).”

Ang programa sa mga tigom inanay nga naugmad. May mga gisugyot, apan ang pagdesisyon kon unsay maayo sa ilang kahimtang gitugyan sa matag lokal nga grupo. Tingali may magpakigpulong sa matag karon ug unya, apan gipasiugda ug dako ang mga tigom nga libreng makaambit ang tanan. Ang pila ka klase sa mga Estudyante sa Bibliya sa sinugdan wala kaayo mogamit sa mga publikasyon sa Sosyedad diha sa ilang mga tigom, apan gitabangan sila sa nagapanawng mga ministro, ang mga pilgrim, sa pagkasabot sa bili sa paggamit niana.

Tapos mapatik ang pila ka tomo sa Millennial Dawn, kana gigamit nga pasikaranan sa pagtuon. Niadtong 1895 ang mga grupo sa pagtuon nailhang Dawn Circles for Bible Study.a Ang pila sa Norway nagtawag kanila ingong “nagabasa ug nagahisgot nga mga tigom,” nga midugang: “Ang mga kinutlo gikan sa mga libro ni Brader Russell basahon ug kusog, ug sa dihang ang mga tawo buot mokomento o mangutana, iisa nila ang ilang mga kamot.” Girekomenda ni Brader Russell nga sa maong mga pagtuon ang mga sumasalmot mogamit sa lainlaing mga hubad sa Kasulatan, panaplin nga mga reperensiya sa Bibliya, ug mga konkordansiya sa Bibliya. Ang mga pagtuon sa subsob himoon sa mga grupo nga kasarangan ang gidaghanon, diha sa pribadong balay, sa gabii nga kombenyente sa grupo. Kini maoy gipulihan sa presenteng-adlaw nga Pagtuon sa Libro sa Kongregasyon.

Nasabtan ni Brader Russell nga labaw pa ang gikinahanglan kay sa pagtuon lamang sa mga butang kabahin sa doktrina. Kinahanglan usab adunay mga ekspresyon sa pagtuo aron nga ang mga kasingkasing sa mga tawo mapalihok tungod sa apresasyon sa gugma sa Diyos ug sa tinguha nga mapasidunggan ug alagaran siya. Ang mga klase gidasig sa paghikay ug usa ka linaing tigom kada semana alang ning katuyoana. Kini usahay tawgon nga “Cottage Meetings” tungod kay sila himoon man diha sa pribadong mga balay. Ang programa naglakip sa mga pag-ampo, mga awit sa pagdayeg, ug mga testimoniya nga ibatbat niadtong nanambong.b Kining mga testimoniya usahay maoy makapadasig nga mga eksperyensiya; nga naglakip, usab, sa mga pagsulay, mga kalisdanan, ug mga kalibog nga nasugamakan sa dili pa dugay. Sa pila ka dapit kini nga mga tigom wala makakab-ot sa ilang tumong tungod sa hinobrang pagpasiugda sa kaugalingon. Ang The Watch Tower naghatag ug maayong mga sugyot alang sa pagpauswag.

Sa paghinumdom niadtong mga tigoma, si Edith Brenisen, ang asawa sa usa niadtong sayong mga pilgrim sa Tinipong Bansa, nag-ingon: “Kadto maoy usa ka gabii alang sa pagpamalandong sa mahigugmaong pag-atiman ni Jehova ug alang sa suod nga pagpakig-uban sa atong mga brader ug mga sister. Samtang maminaw kami sa pila nila ka eksperyensiya mailhan namo sila ug maayo. Ang pagpaniid sa ilang pagkamatinumanon, ang pagkakita kon giunsa nila pagsagubang ang ilang mga kalisdanan, sa subsob nakatabang kanamo sa pagsulbad sa pipila sa among kaugalingong mga kalibog.” Hinuon, sa lakat sa panahon nahimong dayag nga mas makaayo ang mga tigom nga gidesinyo alang sa pagsangkap sa kada usa sa pagpakig-ambit diha sa buluhatong pag-ebanghelyo.

Ang paagi sa pagdumala sa tigom sa Dominggo sa pila ka dapit gikabalak-an sa mga igsoon. Ang pila ka klase misulay sa paghisgot sa Bibliya bersikulo por bersikulo. Apan usahay ang nagkalainlaing opinyon kon bahin sa kahulogan dili gayod makapalig-on. Sa pagpauswag sa kahimtang, dihay mga igsoon sa kongregasyon sa Los Angeles, California, nga naghimo ug laraw sa por topiko nga pagtuon sa Bibliya, nga may mga pangutana ug mga reperensiya nga pagatukion sa tanang estudyante una pa moadto sa tigom. Niadtong 1902 ang Sosyedad mipatunghag Bibliya nga naundan ug “Bereanhong mga Tabang sa Pagtuon sa Bibliya,” lakip na ang indese sa topiko.c Aron payanohon pa ang mga butang, sugod sa Marso 1, 1905, nga Watch Tower, gipatik ang mga laraw nga pagahisgotan sa kongregasyon, nga may mga pangutana ingon man mga reperensiya sa Bibliya ug mga publikasyon sa Sosyedad alang sa pagdukiduki. Kini nagpadayon hangtod sa 1914, nga sa maong panahon ang mga pangutana sa pagtuon sa mga tomo sa Studies in the Scriptures gipatik aron gamiton nga pasikaranan sa Bereanhong mga Pagtuon.

Ang tanang klase may samang materyal, apan ang kasubsob sa senemanang tigom nagkadaiya gikan sa usa ngadto sa upat o sobra pa, depende sa lokal nga kahikayan. Sa Colombo, Ceylon (karon Sri Lanka), sugod niadtong 1914, sa aktuwal gihimo ang tigom pito ka adlaw sa usa ka semana.

Ang mga Estudyante sa Bibliya gidasig nga motuon sa pagpanukiduki, sa “pagsulay sa tanang butang,” sa pagpahayag sa mga ideya sa ilang kaugalingong pulong. (1 Tes. 5:​21, KJ) Gidasig ni Brader Russell ang mabug-oson ug dayag nga panaghisgot sa tun-anang materyal. Siya usab nagpasidaan: “Ayaw kalimot nga ang Bibliya mao ang atong Sukdanan ug bisan tuod nga hinatag-sa-Diyos ang atong mga tabang sila ‘mga tabang’ ra ug dili ilis sa Bibliya.”

Pagsaulog sa Kamatayon sa Ginoo

Sugod sa mga 1876, kada tuig ang mga Estudyante sa Bibliya mihikay sa pagsaulog sa kamatayon sa Ginoo.d Sa sinugdan, ang grupo sa Pittsburgh, Pennsylvania, ug sa kasikbit nagtigom sa balay sa usa sa mga higala. Sa tuig 1883, ang nanambong didto mitubo ngadto sa mga usa ka gatos, ug gigamit ang usa ka inabangan nga tigomanan. Aron maarang ang daghang mamiminaw nga gidahom sa Pittsburgh niadtong 1905, ang mga igsoon nakahukom nga mangayog permiso nga magamit ang dako nga Carnegie Hall.

Ang mga Estudyante sa Bibliya nakaila nga kini usa ka tinuig nga kasaulogan, dili usa ka butang nga pagabuhaton kada semana. Ang petsa nga ilang gihimo ang pagsaulog mitumbas sa Nisan 14 sa Hudiyonhong kalendaryo, ang panahon sa kamatayon ni Jesus. Latas sa katuigan, giayo pa ang paagi sa pagkalkulo sa petsa.e Apan ang pangunang butang nga gihunahuna mao ang kahinungdanon sa okasyon mismo.

Bisan tuod ang mga Estudyante sa Bibliya nagtigom alang sa maong saulog sa lainlaing gidak-on sa grupo sa daghang dapit, ang bisan kinsa nga makig-uban sa mga igsoon sa Pittsburgh giabiabi. Sukad sa 1886 hangtod 1893, ang mga magbabasa sa Watch Tower ilabinang gidapit sa pag-adto sa Pittsburgh, kon posible, ug sila nangadto, gikan sa lainlaing bahin sa Tinipong Bansa ug gikan sa Canada. Kini wala lamang makapaarang kanila sa pagsaulog sa Memoryal nga magkauban apan nagtabang usab kanila sa pagpalig-on sa espirituwal nga paghiusa. Ugaling, samtang nagkadaghan ang mga klase, sa Tinipong Bansa ug sa ubang mga bahin sa kalibotan, dili na praktikal ang magtigom sa usa ka dapit, ug ilang nasabtan nga daghan pang kaayohan ang malampos pinaagi sa pagpakigtigom uban sa isigkamagtutuo diha sa dapit nga ilang gipuy-an.

Ingon sa gitudlo sa Watch Tower, daghan ang nangangkon nga nagtuo sa lukat, ug walay mausa ang giabog gikan sa tinuig nga pagsaulog. Apan ang okasyon may linaing kahinungdanon alang niadtong sa tinuoray nahisakop sa “gamayng panon” ni Kristo. Kini sila mao ang makig-ambit sa langitnong Gingharian. Sa gabii una pa sa kamatayon ni Jesus, sa dihang iyang gihimo ang Memoryal, ang mga indibiduwal nga gihatagan sa maong paglaom ang giingnan ni Kristo: “Buhata ninyo kini sa paghandom kanako.”​—Luc. 12:32; 22:​19, 20, 28-30.

Ilabina sukad sa katuigang 1930, ang umaabot nga mga membro sa “dakong panon” sa ubang mga karnero, misugod sa pagpadayag sa ilang kaugalingon. (Pin. 7:​9, 10, KJ; Juan 10:16) Niadtong panahona gitawag sila ug mga Jonadab. Sa unang higayon, Ang Bantayanang Torre sa Pebrero 15, 1938 nga isyu niini, espisipiko nga nagdapit kanila nga motambong sa Memoryal, nga nag-ingon: “Human sa alas sayes s.g. sa Abril 15 ang matag kompaniya sa mga dinihogan magtigom ug magsaulog sa Memoryal, nga ang ilang mga kauban nga mga Jonadab presente usab.” Sila nagtambong, dili ingong mga tig-ambit, kondili ingong mga tigpaniid. Ang ilang presensiya nagpadaghan sa tumatambong sa Memoryal sa kamatayon ni Kristo. Niadtong 1938 ang mitambong maoy 73,420, samtang silang miambit sa emblemang tinapay ug bino mikabat ug 39,225. Sa misunod nga katuigan, kadtong mga tigpaniid giapilan usab sa daghang bag-ohan nga interesadong mga tawo ug uban nga wala pa mahimong aktibo nga mga Saksi ni Jehova. Mao nga, sa 1992, sa dihang ang kinatas-ang ihap sa nakig-ambit sa ministeryo sa kanataran maoy 4,472,787, ang mitambong sa Memoryal maoy 11,431,171, ug ang gidaghanon sa miambit sa mga emblema mao lamay 8,683. Sa pila ka kayutaan ang nagtambong mikabat ug lima o unom ka pilo sa gidaghanon sa aktibong mga Saksi.

Tungod sa ilang dulot nga pagpabili sa kahinungdanon sa kamatayon ni Kristo, ang mga Saksi ni Jehova nagsaulog sa Memoryal bisan pag sila nag-atubang sa lisod kaayong mga kahimtang. Sa katuigang 1970, sa dihang gidili ang paglakaw sa gabii tungod sa curfew sa panahon-sa-gubat sa Rhodesia (karon nailhang Zimbabwe), ang mga igsoon sa pila ka dapit nagtigom sa balay sa usa ka Saksi ni Jehova sa adlaw ug unya gisaulog ang Memoryal sa gabii. Siyempre, dili sila makapauli tapos sa tigom, busa sila nagpabilin sa tibuok gabii. Ang nahibilin nga mga oras sa gabii gigamit sa pag-awit ug mga awit sa Gingharian ug sa pag-asoy ug mga kasinatian, nga usa ka tinubdan sa dugang represko.

Sa mga kampo konsentrasyon sa panahon sa Gubat sa Kalibotan II, ang Memoryal gisaulog, bisan pag ang pagbuhat niana mahimong mosangpot sa grabeng silot kon hisakpan sa mga bantay. Sa dihang gibilanggo nga nag-inusara sa Komunistang Tsina sukad sa 1958 hangtod 1963 tungod sa iyang Kristohanong pagtuo, si Harold King nagsaulog sa Memoryal sa labing maayong paagi nga iyang mahimo ubos sa naglungtad nga kahimtang. Sa ulahi siya nag-ingon: “Gikan sa bintana sa akong bilanggoan akong gibantayan ang pagtakdol sa bulan duol sa pagsugod sa tingpamulak. Kutob sa akong mahimo kalkulohon nakog maayo ang petsa sa pagsaulog.” Naghimohimo siyag gikinahanglang mga emblema, nga naghimog diyutayng bino gikan sa itom nga mga pasas ug migamit sa bugas humay nga walay lebadura, alang sa tinapay. Siya usab nag-ingon: “Nag-awit ako ug nag-ampo ug nagpakigpulong alang sa okasyon, sama gayod sa himoon sa bisan haing kongregasyon sa katawhan ni Jehova. Mao nga gibati nako nga kada tuig ako nahiusa uban sa akong mga igsoon sa tibuok kalibotan niining labing importanteng okasyon.”

Ang mga Bata May Dapit

Sa sayong katuigan, ang mga publikasyon ug mga tigom sa mga Estudyante sa Bibliya wala andama alang sa pagtagana sa panginahanglan sa mga batan-on. Sila makatambong sa mga tigom, ug ang pila kanila nagbuhat sa ingon ug naminaw nga maikagon. Apan walay linaing tinguha sa paglangkit kanila sa nagkahitabo. Nganong wala?

Ang pagsabot sa mga igsoon niadtong panahona mao nga mubo na kaayo ang nabiling panahon hangtod nga ang tanang membro sa pangasaw-onon ni Kristo mahiusa uban kaniya sa langitnong himaya. Ang Watch Tower, niadtong 1883, nagsaysay: “Kita nga gibansay alang sa hataas nga pagtawag dili makalikay sa espesyal nga buluhaton niining kapanahonan​—ang buluhaton sa pag-andam sa ‘Pangasaw-onon, ang asawa sa Kordero.’ Ang Pangasaw-onon magaandam sa iyang kaugalingon; ug maingon nga sa pagkakaron, sa dihang ang kataposang mga dayandayan ginasul-ob sa dayon na sa kasal, ang serbisyo sa kada membro gikinahanglan niining pinakaimportante, presente nga buluhaton.”

Ang mga ginikanan kusganong gidasig sa pag-abaga sa ilang kaugalingong hinatag-sa-Diyos nga responsabilidad sa pag-atiman sa espirituwal nga instruksiyon sa ilang mga anak. Ang separadong mga tunghaan sa Dominggo alang sa mga bata wala ipasiugda. Dayag nga ang paggamit sa Kakristiyanohan sa mga tunghaan sa Dominggo nakadaot gayod. Ang mga ginikanan nga nagpatungha sa ilang mga anak sa maong mga tunghaan sagad nag-isip nga kining kahikayan nagpahigawas kanila sa responsabilidad sa paghatag ug relihiyosong instruksiyon sa ilang mga anak. Ang mga bata, sa baylo, tungod kay wala sila magsalig sa ilang mga ginikanan ingong pangunang tinubdan sa instruksiyon mahitungod sa Diyos, wala mapalihok sa pagtahod sa ilang ginikanan ug sa pagsugot kanila sumala sa angay nilang himoon.

Ugaling, sukad sa 1892 ngadto sa 1927, ang Watch Tower migahin ug luna alang sa komento sa teksto nga gipatik diha sa “Mga Leksiyon sa Internasyonal nga Tunghaan sa Dominggo,” nga kaniadto popular sa daghang Protestanteng simbahan. Sa daghang katuigan kining mga tekstoha gipili ni F. N. Peloubet, usa ka klerigo sa Kongregasyonal, ug sa iyang mga luyoluyo. Ang Watch Tower naghisgot niining mga tekstoha gikan sa panglantaw sa abanteng pagsabot sa Kasulatan sa mga Estudyante sa Bibliya, nga nahigawas sa mga kredo sa Kakristiyanohan. Gilaoman nga niining paagiha ang Watch Tower mapailaila ngadto sa pila ka simbahan, nga ang kamatuoran mapresentar, ug nga ang pila ka sakop sa simbahan modawat niana. Ingnon pa, ang kalainan dayag, ug kini nakapasuko sa klero sa Protestante.

Ang tuig 1918 miabot, ug ang nanghibilin, o mga nabilin sa mga dinihogan, sa gihapon anaa pa sa yuta. Ang mga bata sa ilang mga tigom midaghan usab pag-ayo. Sa subsob ang mga batan-on yanong tugotan sa pagdula samtang ang ilang mga ginikanan nagtuon. Bisan pa, ang mga batan-on, usab, kinahanglang makakat-on sa “pagpangita sa pagkamatarong, sa pagpangita sa pagkamaaghop,” kon sila gustong “pagatagoan sa adlaw sa kasuko sa GINOO.” (Sof. 2:​3, KJ) Mao nga, niadtong 1918 ang Sosyedad nagdasig sa mga kongregasyon sa paghikay ug klase sa kabataan nga gikan sa 8 kutob 15 ka tuig ang edad. Sa pila ka dapit may mga klase gani sa primarya alang niadtong bata pa kaayo sa pagtambong sa klase sa kabataan. Sa samang panahon, ang responsabilidad sa mga ginikanan ngadto sa ilang mga anak gipasiugda pag-usab.

Kini mitultol sa ubang mga kaugmaran. Ang The Golden Age, niadtong 1920, may artikulong nag-ulohang “Pagtuon sa Bibliya sa Kabataan,” nga may mga pangutana nga inubanan sa mga pagsitar sa Kasulatan diin ang mga tubag mahimong makit-an. Nianang samang tuig, ang The Golden Age ABC gipatik; kana maoy ilustradong pulyeto aron gamiton sa mga ginikanan sa pagtudlo sa paninugdang mga kamatuoran sa Bibliya ug Kristohanong mga hiyas sa ilang mga bata. Ang librong nag-ulohang The Way to Paradise, nga gisulat ni W. E. Van Amburgh, misunod sa 1924. Kana gipaigo sa “intermidiya nga mga estudyante sa Bibliya.” Sa usa ka panahon kana gigamit sa mga tigom alang sa mga batan-on. Dugang pa, sa Amerika, ang “Dyunyor nga mga Saksi” may kaugalingong mga kahikayan sa pag-alagad sa kanataran. Sa Switzerland usa ka grupo sa batan-on nagporma ug asosasyon nga gitawag ug “Kabatan-onan ni Jehova,” alang niadtong tali sa 13 ug 25 ka tuig ang pangedaron. Sila may kaugalingong buhatan sa kalihim sa Berne, ug usa ka linaing magasin, ang Jehovah’s Youth, giedit ug gipatik sa mga imprintahanan sa Sosyedad didto. Kining mga batan-ona may kaugalingong mga tigom ug gani naghimog mga drama sa Bibliya, sama sa ilang gihimo sa Volkshaus sa Zurich alang sa tumatan-aw nga 1,500.

Ugaling, nagakaugmad ang usa ka organisasyon sa sulod sa organisasyon sa mga alagad ni Jehova. Dili kana makatabang sa paghiusa, ug kana gihunong niadtong 1936. Niadtong Abril 1938, sa pagduaw sa Australia, si J. F. Rutherford, ang presidente sa Sosyedad, nakadiskobre nga dihay klase alang sa mga bata nga gihimo gawas sa kombensiyon alang sa mga hamtong. Dihadiha iyang gihikay nga ang tanang bata madala sa pangunang kombensiyon, nga mas nakaayo kanila.

Sa maong tuig, gihisgotan pag-usab sa Ang Bantayanang Torre ang bug-os nga ulohan may labot sa separadong mga klase sa mga batan-on diha sa kongregasyon. Kana nga pagtuon sa makausa pa nagpasiugda sa kamatuoran nga ang mga ginikanan maoy responsable sa pagtudlo sa ilang kaugalingong mga anak. (Efe. 6:4; itandi ang Deuteronomio 4:​9, 10; Jeremias 35:​6-10.) Kana usab nagpakita nga ang Bibliya wala maghatag ug hularan sa pagpalain sa mga batan-on pinaagi sa mga klase sa kabataan. Inay, sila kinahanglang presente kauban sa ilang mga ginikanan sa pagpaminaw sa Pulong sa Diyos. (Deut. 31:​12, 13; Jos. 8:​34, 35) Sa dihang gikinahanglan ang dugang pagpatin-aw sa gitun-ang materyal, kini igahatag sa mga ginikanan sa balay. Dugang pa, ang mga artikulo mipatin-aw nga ang mga kahikayan sa separadong mga klase sa pagkatinuod nakabalda sa balay-sa-balay nga pagwali sa maayong balita. Sa unsang paagi? Tungod kay ang mga magtutudlo dili na magsangyaw sa kanataran kay mangandam ug magdumala niining mga klaseha. Busa, ang tanang separadong klase alang sa mga batan-on gihunong.

Hangtod karon, kini nagpabiling kustombre taliwala sa mga Saksi ni Jehova nga ang bug-os pamilya magatambong sa mga tigom sa kongregasyon nga magkauban. Ang mga bata tabangan sa ilang mga ginikanan sa pagpangandam aron nga sila makapakig-ambit sa hustong mga paagi. Dugang pa, ang daghang maayong publikasyon gitagana aron gamiton sa mga ginikanan sa pagtudlo sa mga batan-on sa balay. Lakip niini mao ang mga librong Children, sa 1941; Pagpatalinghog sa Dakong Magtutudlo, sa 1971; Ang Imong Pagkabatan-on​—Pagpahimulos sa Labing Maayo Niini, sa 1976; Akong Basahon sa mga Estorya sa Bibliya, 1978; ug Mga Pangutanang Gisukna sa mga Batan-on​—Mga Tubag nga Mosaler, sa 1989.

Nagasangkap sa Tanan nga Mahimong Aktibong mga Ebanghelista

Sukad gayod sa unang isyu sa Watch Tower, ang mga magbabasa niana regular nga gipahinumdoman nga ang tanang tinuod nga Kristohanon may pribilehiyo ug responsabilidad sa pagmantala sa maayong balita mahitungod sa katuyoan sa Diyos. Ang mga tigom sa kongregasyon nakatabang sa pag-andam sa ilang mga kasingkasing ug mga hunahuna alang niining kalihokana pinaagi sa pagpalig-on sa ilang gugma kang Jehova ug sa ilang kahibalo sa iyang katuyoan. Hinuon, ilabina tapos sa kombensiyon sa Cedar Point, Ohio, niadtong 1922, nga gipasiugda ug dako ang nalampos sa pag-alagad sa kanataran ug ang epektibong paagi sa pagbuhat niana.

Ang Bulletin,f usa ka polder nga naundan sa impormasyon nga direktang may kalabotan sa pag-alagad sa kanataran, may sulod nga usa ka mubong pamatuod, nga kanhi gitawag ug canvass, nga kinahanglang sag-ulohon ug gamiton sa dihang magsangyaw ngadto sa mga tawo. Sulod sa dakodakong bahin sa 1923, sa nahaunang adlaw kada bulan, ingong panukmod alang sa nahiusang singkamot sa pagmantala sa Gingharian, ang katunga sa gabii-sa-Miyerkoles nga Tigom sa Pag-ampo, Pag-awit ug Pagtestimoniya gigahin alang sa paghatag ug mga eksperyensiya sa pag-alagad sa kanataran.

Sa labing menos sa tuig 1926, ang binulang mga tigom diin hisgotan ang pag-alagad sa kanataran gitawag ug Mga Tigom sa mga Mamumuo. Kadtong sa aktuwal nakig-ambit sa maong pag-alagad sa masabog mao ang nagtambong. Niining mga tigoma, ang mga paagi nga gigamit sa pagsangyaw ngadto sa uban gihisgotan, ug giplano ang umaabot nga kalihokan. Pagka 1928 ang Sosyedad nag-awhag sa mga kongregasyon sa paghikay sa maong mga tigom kada semana. Sulod sa laing upat ka tuig, ang mga kongregasyon nag-ilis sa Tigom sa Pagtestimoniya (o, Pahayag) sa gitawag sa ulahi ug Tigom sa Pag-alagad, ug ang tanan gidasig sa Sosyedad nga motambong. Sulod sa kapig 60 ka tuig, kining senemanang tigom gihimo sa mga kongregasyon. Pinaagi sa mga diskurso, mga panaghisgot nga giambitan sa mga mamiminaw, mga pasundayag, ug mga interbiyu, ang espisipikong tabang gihatag labot sa tanang bahin sa Kristohanong ministeryo.

Kining matanga sa tigom tinong wala magsugod sa ika-20ng siglo. Si Jesus mismo naghatag ug detalyadong mga instruksiyon sa iyang mga tinun-an una pa sila ipadala aron sa pagwali. (Mat. 10:​5–11:1; Luc. 10:​1-16) Sa ulahi, naglig-onay sila sa usag usa pinaagi sa pagtigom aron sa pag-asoy sa ilang mga eksperyensiya samtang nagatuman sa ministeryo.​—Buh. 4:​21-31; 15:3.

Bahin sa pagbansay sa pagdiskurso sa publiko, niadtong sayong mga tuig kini wala himoa nga regular diha sa mga tigom sa kongregasyon. Ugaling, sa labing menos sa tuig 1916, gisugyot nga kadtong mibati nga may hiyas ingong mamumulong sa publiko makahikay ug mga klase sa ilang kaugalingon, nga tingali dumalahon sa usa ka ansiano nga maminaw ug motambag kanila aron mapauswag ang unod sa pahayag ug ang paagi sa ilang pagpanulti. Kining mga tigoma, nga gitambongan lamang sa mga lalaki diha sa kongregasyon, sa ulahi gitawag ug Mga Tunghaan sa mga Propeta. Sa dihang gihisgotan pag-usab ang mga nahitabo niadtong mga adlawa, si Grant Suiter mihinumdom: “Ang makapalig-ong pagsaway nga akong nakuha sa tunghaan gamay ra kon itandi sa akong nadawat sa personal gikan sa akong amahan tapos siya makatambong sa usa ka sesyon aron maminaw kanako nga nagdiskurso.” Aron tabangan kadtong naningkamot nga mouswag, ang mga igsoon sa pribado nagtipon ug nagpatik ug usa ka tun-anang basahon nga naundan sa mga instruksiyon mahitungod sa pagdiskurso, inubanan sa mga laraw sa lainlaing mga diskurso. Hinuon, sa wala madugay kining Mga Tunghaan sa mga Propeta gihunong. Aron tagan-an ang linaing panginahanglan nga naglungtad niadtong panahona, ang bug-os nga pagtagad gitumong sa pagsangkap sa matag membro sa kongregasyon sa pag-ambit sa bug-os diha sa balay-sa-balay nga pag-ebanghelyo.

Posible ba nga sangkapan ang kada membro niining nagatubo internasyonal nga organisasyon dili lamang sa paghatag ug mubong pamatuod ug sa pagtanyag ug literatura sa Bibliya apan usab sa epektibong pagpanulti ug mahimong magtutudlo sa Pulong sa Diyos? Mao kana ang tumong sa linaing tunghaan nga gitukod sa kada kongregasyon sa mga Saksi ni Jehova, sugod niadtong 1943. Kana naglihok na sa hedkuwarter sa tibuok kalibotan sa mga Saksi ni Jehova sukad sa Pebrero 1942. Kada semana, may pagtudlo, ug ang mga estudyante maghatag ug pakigpulong ug tambagan labot niana. Sa sinugdan, ang mga lalaki lamang ang naghatag ug pakigpulong diha sa tunghaan, bisan tuod ang tibuok kongregasyon gidasig nga motambong, nga andamon ang mga leksiyon, ug moapil sa mga pagrepaso. Niadtong 1959 ang mga sister nakapribilehiyo usab nga matala, aron mabansay sa pagpakighisgot sa mga ulohan sa Bibliya sa tawo-por-tawo nga setting.

Mahitungod sa epekto niining tunghaana, ang sanga sa Watch Tower Society sa Habagatang Aprika nagtaho: “Kining maayo kaayong kahikayan sa mubong panahon nakatabang sa daghang igsoon nga naghunahuna nga dili gayod sila makadiskurso sa publiko nga mahimong epektibo kaayo sa plataporma ug mas epektibo sa kanataran. Sa tanang dapit sa Habagatang Aprika ang mga igsoon nag-abiabi niining bag-ong tagana ni Jehova ug gipalihok kana nga madasigon. Gihimo kini bisan pa sa dagkong mga babag sa pinulongan ug sa kakulang sa edukasyon sa bahin sa pipila.”

Ang Tunghaan sa Teokratikanhong Ministeryo sa gihapon usa ka hinungdanong tigom diha sa mga kongregasyon sa mga Saksi ni Jehova. Hapit ang tanang makaarang sa paghimo nahitala. Ang batan-on ug tigulang, bag-ohang mga Saksi ug kadtong eksperyensiyado na nakig-ambit. Kana usa ka nagapadayon nga programa sa edukasyon.

Ang Publiko Gidapit sa Pagtan-aw ug sa Pagpamati

Ang mga Saksi ni Jehova dili sekreto nga sosyedad. Ang ilang pinasikad-sa-Bibliya nga mga tinuohan gisaysay sa bug-os diha sa mga publikasyon nga arang mabatonan sa tanan. Dugang pa, sila naningkamot ug maayo sa pagdapit sa publiko nga motambong sa mga tigom aron makakita ug makadungog sa personal kon unsay nagakahitabo.

Si Jesu-Kristo naghatag ug personal nga instruksiyon sa iyang mga tinun-an, apan siya nagsulti usab sa publiko​—ubay sa baybayon, sa bakilid, sa mga sinagoga, sa dapit sa templo sa Jerusalem​—diin makadungog ang daghan. (Mat. 5:​1, 2; 13:​1-9; Juan 18:20) Sa pagsundog niini, ingon ka sayo sa katuigang 1870, ang mga Estudyante sa Bibliya mihikay ug mga tigom diin ang mga higala ug mga silingan ug uban nga interesado makapaminaw ug diskurso mahitungod sa katuyoan sa Diyos alang sa katawhan.

May gihimong linaing paningkamot nga makadiskurso sa mga dapit nga kombenyente alang sa publiko. Kini gitawag nga buluhaton sa ekstensiyon nga klase. Niadtong 1911, ang mga kongregasyon nga may daghang hanas nga mamumulong gidasig nga magpadala sa pila kanila ngadto sa sikbit nga mga lungsod ug mga balangay sa paghikayg mga tigom sa publikong mga tigomanan. Kon posible, mohikay sila ug serye sa unom ka mga diskurso. Human sa kataposang pakigpulong, mangutana ang mamumulong kon pila sa mamiminaw ang mibati ug igong interes sa pagtuon sa Bibliya aron magtigom nga regular. Kapin sa 3,000 nianang mga diskursoha ang gihimo sa unang tuig.

Sugod niadtong 1914, ang “Photo-Drama of Creation” gipasalida usab sa publiko. Ang mga igsoon wala magpabayad sa tumatan-aw. Sukad niadto, migamit silag ubang mga pelikula ug mga pasundayag sa slayd. Sugod sa katuigang 1920, ang mabug-osong paggamit sa radyo sa Watch Tower Society nakapaarang sa mga tawo sa pagpaminaw sa mga diskurso sa Bibliya sa ilang kaugalingong mga balay. Unya, sa katuigang 1930, ang mga pakigpulong ni J. F. Rutherford girekord ug gipatokar sa linibo ka miting publiko.

Sa pagka 1945, dihay daghan kaayong mamumulong sa publiko nga nabansay sa Tunghaan sa Teokratikanhong Ministeryo. Sa Enero niadtong tuiga, usa ka nahan-ayg-maayo nga kampanya sa mga miting publiko gilansad. Ang Sosyedad mihatag ug mga laraw alang sa serye sa walo ka diskurso nga angay sa panahon. Mga handbill, ug usahay mga plakard, gigamit sa pag-anunsiyo. Ingong dugang sa paggamit sa regular nga mga dapit tigomanan sa mga kongregasyon, ang mga igsoon mihimog linaing paningkamot sa paghikay niining publikong mga miting diha sa mga teritoryo nga walay kongregasyon. Ang tanan sa mga kongregasyon makaambit​—pinaagi sa pagpahibalo sa mga tigom, pinaagi sa personal nga pagtambong niana, ingon man pinaagi sa pag-abiabi sa mga bag-ohan ug sa pagtubag sa ilang mga pangutana. Sulod sa unang tuig niining linaing kalihokan, 18,646 ka miting publiko ang napahayag sa Tinipong Bansa, nga may 917,352 nga mitambong. Sa misunod nga tuig ang gidaghanon sa mga miting publiko misaka ngadto sa 28,703 sa Amerikanhong natad. Ug sa Canada, diin 2,552 nianang mga mitinga ang gihikay niadtong 1945, may 4,645 sa sunod nga tuig.

Sa kadaghanan sa mga kongregasyon sa mga Saksi ni Jehova, ang mga Miting Publiko karon bahin na sa regular nga iskedyul sa senemanang mga tigom. Kini anaa sa pormang diskurso diin ang tanan gidasig sa pagsusi sa yawing mga teksto sa Kasulatan samtang kini gibasa ug gihisgotan. Kining mga mitinga maoy dagayang tinubdan sa espirituwal nga instruksiyon alang sa kongregasyon ug sa mga bag-ohan.

Ang mga tawo nga motambong sa mga tigom sa mga Saksi ni Jehova sa unang higayon kasagaran mahingangha. Usa ka iladong politiko sa Zimbabwe miadto sa Kingdom Hall sa pagsuta kon unsay nagakahitabo didto. Siya usa ka tawo nga bangis ug kinaiya, ug tinuyo nga siya miadto nga wala makapamalbas ug wala makapanudlay. Iyang gidahom nga ang mga Saksi moabog kaniya. Inay, sila mipakita ug tinuod nga interes kaniya ug midasig kaniya sa pagtuon ug Bibliya. Karon siya usa ka mapaubsanon ug makigdaitong Kristohanong Saksi.

Dihay minilyong tawo nga, kay nakatambong na sa mga tigom sa mga Saksi ni Jehova, natukmod sa pag-ingon: “Ang Diyos tinuod nga anaa kaninyo.”​—1 Cor. 14:25.

Maayong mga Dapit nga Pagatigoman

Sa mga adlaw sa mga apostoles ni Jesu-Kristo, ang mga Kristohanon sagad nagtigom sa pribadong mga balay. Sa pila ka dapit sila nakahigayon sa pagsulti diha sa Hudiyong mga sinagoga. Sa Efeso si apostol Pablo mihatag ug mga diskurso sulod sa duha ka tuig sa usa ka awditoryum sa tunghaan. (Buh. 19:​8-10; 1 Cor. 16:19; Filem. 1, 2) Sa susama, sa ulahing bahin sa ika-19ng siglo, ang mga Estudyante sa Bibliya nagtigom sa pribadong mga balay, usahay nagpakigpulong sa mga kapelya, ug migamit sa ubang mga tigomanan nga maabangan. Sa pipila ka kaso, sila sa ulahi nakapalit ug mga tinukod nga kanhi gigamit sa ubang relihiyosong mga pundok ug migamit niini nga regular. Mao kana ang nahitabo sa Brooklyn Tabernacle ug sa London Tabernacle.

Apan dili nila kinahanglan ni gusto ang inadornohang mga tinukod alang sa ilang mga tigom. Ang pipila ka kongregasyon nagpalit ug nag-ayo sa mga tinukod nga angay; ang uban nagtukod ug bag-ong mga tigomanan. Human sa 1935 ang ngalang Kingdom Hall inanay nga gigamit sa pagngalan niining mga dapita alang sa mga tigom sa kongregasyon. Sa kasagaran madanihon kini sa dagway apan dili mapagawalon. Ang arkitektura mahimong magkalahi depende sa dapit, apan ang katuyoan sa tinukod maoy alang sa praktikal nga gamit.

Usa ka Nahiusang Programa sa Instruksiyon

Sa ulahing bahin sa ika-19ng siglo ug sa sayong bahin sa ika-20ng siglo, ang espirituwal nga pagtubo ug kalihokan nagkadaiya gikan sa usa ka kongregasyon ngadto sa lain. Sila nagtuo sa samang tinong paninugdang mga tinuohan nga nagpalahi kanila gikan sa Kakristiyanohan. Bisan pa, samtang ang pila ka igsoon dulot nga nag-apresyar sa instrumento nga gigamit ni Jehova sa pagpakaon sa iyang katawhan, ang uban dali rang madala sa mga opinyon sa mga indibiduwal nga may kusganon personal nga panglantaw sa mga butang.

Una pa sa iyang kamatayon si Jesus miampo nga ang iyang mga sumusunod “mahiusang tanan”​—nga nahiusa sa Diyos ug kang Kristo ug sa usag usa. (Juan 17:​20, 21) Dili kadto pinugos nga paghiusa. Mosangpot kadto gumikan sa usa ka nahiusang programa sa edukasyon nga nakakaplag ug sanong diha sa madinawatong mga kasingkasing. Ingon sa gitagna sa dugay nang panahon: “Ang tanan nimong mga anak pagatudloan ni Jehova, ug dako ang pakigdait sa imong mga anak.” (Isa. 54:13) Aron matagamtam sa bug-os kanang pakigdaita, ang tanan nanginahanglan ug kahigayonan nga makabenepisyo gikan sa progresibong instruksiyon nga gitagana ni Jehova pinaagi sa iyang makitang kanal sa komunikasyon.

Sa daghang katuigan ang mga Estudyante sa Bibliya migamit sa kadaiyang mga tomo sa Studies in the Scriptures, kauban sa Bibliya, ingong pasikaranan sa panaghisgot. Ang ilang sulod maoy, sa pagkatinuod, espirituwal nga “pagkaon sa tukmang panahon.” (Mat. 24:45) Hinuon, ang padayong pagsusi sa Kasulatan ubos sa direksiyon sa espiritu sa Diyos nagpatin-aw nga may daghan pang angay kat-onan ug dugang pang espirituwal nga pagputli ang gikinahanglan sa mga alagad ni Jehova. (Mal. 3:​1-3; Isa. 6:​1-8) Dugang pa, pagkatukod sa Gingharian niadtong 1914, daghang tagna ang sagunson nga natuman, ug kini nagtumong sa dinaliang buluhaton nga kinahanglang buhaton sa tanang tinuod nga Kristohanon. Kining tukma-sa-panahon nga Kasulatanhong impormasyon sa regular gitagana pinaagi sa mga lindog sa The Watch Tower.

Kay nakaamgo nga dili tanan diha sa mga kongregasyon nakabenepisyo gikan niining mga artikuloha, ang pila ka nagapanawng mga hawas sa Sosyedad misugyot sa buhatan sa hedkuwarter nga sa regular senemanang mga tigom tun-an sa mga kongregasyon ang The Watch Tower. Kana nga rekomendasyon gipahibalo sa mga kongregasyon, ug ang “Bereanhong mga Pangutana” nga gamiton sa pagtuon sa pangunang mga artikulo sa Watch Tower nahimong regular nga unod sa magasin, sugod sa isyu sa Mayo 15, 1922. Kadaghanan sa mga kongregasyon may maong pagtuon sa makausa o daghang beses sa kada semana, apan ang gidugayon sa ilang tinuod nga pagtuon sa unod sa magasin nagkadaiya. Sa pila ka dapit, kay ang konduktor daghang isulti, kining pagtuon modagan ug duha ka oras o kapin pa.

Hinuon, sa katuigang 1930 ang teokratikanhong organisasyon nag-ilis sa demokratikanhong mga paagi. Kini nakaimpluwensiyag dako sa panglantaw sa pagtuon sa Ang Bantayanang Torre.g Dakong pagtagad ang gihatag sa pagsabot kon unsay sulod sa materyal nga gitagana sa Sosyedad. Kadtong migamit sa mga tigom ingong mga kahigayonan sa pagpahayag sa personal nga panglantaw ug dili modawat sa responsabilidad sa pagpakig-ambit diha sa ministeryo sa kanataran sa hinayhinay misibog. Pinaagi sa mapailobong tabang ang mga igsoon nakakat-on ra kon unsaon sa paglimiti sa pagtuon sa usa ka oras. Ingong resulta, may dakong pagpakigbahin; ang mga tigom mas bibo. Ang espiritu sa tinuod nga panaghiusa misuhop usab sa mga kongregasyon, pinasikad sa nahiusang espirituwal nga programa sa pagpakaon diin ang Pulong sa Diyos mao ang sukdanan sa kamatuoran.

Niadtong 1938, Ang Bantayanang Torre gipatik na diha sa mga 20 ka pinulongan. Ang tanan migula una sa Ingles. Kana sagad nga dili mabatonan diha sa ubang mga pinulongan sa pipila ka bulan, o tingali bisan usa ka tuig, tungod sa panahon nga gikinahanglan sa paghubad ug pagpatik niana. Ugaling, tungod sa kausaban sa mga pamaagi sa pagpatik, sa katuigang 1980, ang dungan nga pagpatik sa Ang Bantayanang Torre nakab-ot diha sa daghang pinulongan. Pag-abot sa 1992, ang mga kongregasyon nga makasabot sa bisag hain sa 66 ka pinulongan makadungan sa pagtuon sa samang materyal. Mao nga ang kinabag-an sa mga Saksi ni Jehova sa tibuok kalibotan nagakaon sa samang espirituwal nga pagkaon semana por semana. Sa tibuok Amerika del Norte ug del Sur, kadaghanan sa Uropa, sa ubay-ubayng kayutaan sa Oriente, sa daghang dapit sa Aprika, ug sa daghang isla sa tibuok yuta, ang katawhan ni Jehova nagapahimulos sa dungan nga kahikayan alang sa espirituwal nga pagpakaon. Sa dungan, sila “haom nga ginahiusa diha sa samang kaisipan ug sa samang laraw sa panghunahuna.”​—1 Cor. 1:10.

Ang gidaghanon sa mga tumatambong sa ilang mga tigom sa kongregasyon nagpaila nga giisip nga maugdang sa mga Saksi ni Jehova ang mga tigom. Sa Italya, diin may mga 172,000 ka aktibong mga Saksi niadtong 1989, ang tumatambong kada semana sa mga tigom sa Kingdom Hall maoy 220,458. Sa kasukwahi, ang Katolikong ahensiya sa pabalita nag-ingon nga 80 porsiento sa mga Italyano miangkon nga sila Katoliko apan mga 30 porsiento lamang ang nagatambong sa mga serbisyo sa simbahan nga may pagka-regular. Kon tan-awon ang proporsiyon, ang hulagway kokaamgid sa Brazil. Sa Denmark, niadtong 1989, ang Nasodnong Simbahan nangangkon nga 89.7 porsiento sa populasyon ang membro niana, apan 2 porsiento lamang ang nagatambong sa simbahan makausa sa usa ka semana! Taliwala sa mga Saksi ni Jehova sa Denmark, ang tumatambong sa senemana sa maong panahon mikabat ug 94.7 porsiento. Sa Alemanya, usa ka surbi sa Allensbach Opinion Research Institute sa 1989 nagpaila nga 5 porsiento sa mga Lutherano ug 25 porsiento sa mga Katoliko sa Pederal nga Republika nagtambong sa simbahan nga regular. Hinuon, sa mga Kingdom Hall sa mga Saksi ni Jehova, ang mga tumatambong kada semana mosobra sa gidaghanon sa mga Saksi.

Kadtong nanambong sa subsob naningkamot pag-ayo aron mapresente. Sa katuigang 1980, usa ka 70-anyos nga babaye sa Kenya sa regular mobaktas ug 10 kilometros ug moubog sa suba aron makatambong sa mga tigom kada semana. Aron makatambong sa mga tigom sa iyang pinulongan, usa ka Koreanong Saksi sa Tinipong Bansa sa regular mobiyaheg tulo ka oras sa matag biyahe, nga mosakay ug bus, tren, ug lansa, ingon man mobaktas. Sa Suriname, usa ka pamilya nga gamay ug kita mogugol sa usa ka tibuok adlaw nga suhol alang sa pletehan sa bus kada semana aron makatambong sa mga tigom. Sa Argentina, usa ka pamilya sa regular mopanaw ug 50 kilometros ug gastoson ang un-kuwarto sa kita sa pamilya sa pagtambong sa mga tigom alang sa pagtuon sa Bibliya. Kon ang balatian sa bug-os makapugong sa pila gikan sa pagtambong sa mga tigom sa kongregasyon, ang mga kahikayan sagad himoon aron sila makonektar pinaagi sa telepono o makapaminaw sa tape recording sa programa.

Ang mga Saksi ni Jehova ugdang nga nagasunod sa tambag sa Bibliya nga dili biyaan ang panagkatigom alang sa pagpalig-on sa espirituwal. (Heb. 10:​24, 25) Ug dili lamang kay sila nagatambong sa mga tigom sa ilang lokal nga mga kongregasyon. Ang pagtambong sa mga kombensiyon usab usa ka hinungdanong bahin sa ilang tinuig nga programa sa mga kalihokan.

[Mga footnote]

[Blurb sa panid 237]

Mga tigom nga nanginahanglan ug personal nga pagpakig-ambit

[Blurb sa panid 238]

Dili lamang usa ka mental nga pilosopiya apan mga kapahayagan nga mopalihok sa kasingkasing

[Blurb sa panid 246]

Ang tanan sa pamilya gidasig sa pagtambong sa mga tigom nga dungan

[Blurb sa panid 252]

Paghiusa sa programa alang sa espirituwal nga pagpakaon

[Blurb sa panid 253]

Giisip nga maugdang sa mga Saksi ang ilang mga tigom

[Kahon/Mga hulagway sa panid 239]

Unang mga Kongregasyon

Niadtong 1916, dihay mga 1,200 ka grupo sa mga Estudyante sa Bibliya sa tibuok kalibotan

Durban, Habagatang Aprika, 1915 (ibabaw sa tuo); British Guiana (Guyana), 1915 (tunga nga tuo); Trondheim, Norway, 1915 (ubos nga tuo); Hamilton, Ont., Canada, 1912 (ubos); Ceylon (Sri Lanka), 1915 (ubos nga wala); India, 1915 (ibabaw nga wala)

[Box/Mga hulagway sa panid 240, 241]

Pagdayeg Kang Jehova Pinaagi sa Awit

Sama sa karaang mga Israelinhon ug ni Jesus mismo nga migamit sa mga awit diha sa pagsimba, mao usab ang mga Saksi ni Jehova sa modernong panahon. (Neh. 12:46; Mar. 14:26) Samtang nagapahayag ug pagdayeg kang Jehova ug nagaapresyar sa iyang mga buhat, ang maong pag-awit nakatabang sa pagpasilsil sa mga kamatuoran sa Bibliya sa hunahuna ug sa kasingkasing.

Daghang koleksiyon sa mga awit ang gigamit sa mga Saksi ni Jehova latas sa katuigan. Ang mga pulong gipanunot-sa-panahon ingong kaharmoniya sa progresibong pagsabot sa Pulong sa Diyos.

1879: “Songs of the Bride”

(144 ka awit nga nagapahayag sa mga pangandoy ug mga paglaom sa pangasaw-onon ni Kristo)

1890: “Poems and Hymns of Millennial Dawn”

(151 ka balak ug 333 ka awit, gipatik nga walay musika. Kadaghanan maoy mga buhat sa ilado-kaayong mga magsusulat)

1896: “Watch Tower” sa Pebrero 1 gipahinungod ngadto sa “Zion’s Glad Songs of the Morning”

(Mga pulong alang sa 11 ka awit, may musika; ang mga pulong gisulat sa mga Estudyante sa Bibliya)

1900: “Zion’s Glad Songs”

(82 ka awit, daghan kanila gisulat sa usa ka Estudyante sa Bibliya; aron idugang sa unang mga koleksiyon)

1905: “Hymns of the Millennial Dawn”

(Ang 333 ka awit gipatik niadtong 1890, apan may musika)

1925: “Kingdom Hymns”

(80 ka awit, may musika, ilabina alang sa mga bata)

1928: “Songs of Praise to Jehovah”

(337 ka awit, panagsagol sa bag-ong mga sinulat sa mga Estudyante sa Bibliya ug sa karaang mga himno. Diha sa mga pulong, linaing paningkamot ang gihimo aron sa paghimulag sa mga pagbati sa bakak nga relihiyon ug gikan sa pagsimba sa linalang)

1944: “Kingdom Service Song Book”

(62 ka awit. Gipahaom sa panginahanglan sa pag-alagad sa Gingharian nianang panahona. Walay gipaila nga mga nagsulat o mga nagkomposo)

1950: “Mga Awit sa Pagdayeg Kang Jehova”

(91 ka awit. Kining basahon sa awit may daghang nunot-sa-panahon nga mga tema ug mibiya sa karaang pinulongan. Gihubad kini sa 18 ka pinulongan)

1966: “Nagaawit ug Nagaduyog sa Inyong Kaugalingon Uban sa Honi sa Inyong mga Kasingkasing”

(119 ka awit nga nagkobre sa tanang bahin sa Kristohanong pagkinabuhi ug pagsimba. Ang musikang nailhan nga naggikan sa sekular o bakak-relihiyosong mga tinubdan gikuha. Mga rekording sa gipatokar sa orkestra sa bug-os nga libro gihimo ug masangkarong gigamit sa pagduyog diha sa mga tigom sa kongregasyon. Ang pila ka piniling awit nga may mga pulong girekord usab. Sugod niadtong 1980, ang mga rekording sa mga sonata sa orkestra sa “Kingdom Melodies” gigama aron nga sa balay ang mga indibiduwal makapahimulos sa makapalig-on nga musika)

1984: “Mag-awit ug mga Pagdayeg Kang Jehova”

(225 ka awit sa Gingharian, nga may mga pulong ug mga sonata nga gikomposo sa bug-os sa dedikadong mga alagad ni Jehova gikan sa lain-laing dapit sa yuta. Mga rekord sa ponograpo ug mga audiocassette gigama aron iduyog sa pag-awit)

Sa ilang unang mga Cottage Meeting, ang mga Estudyante sa Bibliya naglakip sa mga awit sa pagdayeg. Ang pag-awit usab sa wala madugay nahimong bahin sa ilang mga kombensiyon. Ang pila nag-awit sa usa sa mga awit una mamahaw, may kalabotan sa ilang pagsimba sa buntag, ingon sa gihimo sa daghang tuig sa Bible House. Bisan pag ang pag-awit sa lokal nga mga kongregasyon sa dakong bahin gihunong sa mga 1938, kana gibalik pag-usab niadtong 1944 ug nagpadayong hinungdanong bahin sa mga tigom sa kongregasyon ug mga programa sa kombensiyon sa mga Saksi ni Jehova.

[Hulagway]

Si Karl Klein nanguna sa orkestra sa kombensiyon sa 1947

[Graph sa panid 242]

(Alang sa aktuwal nga pagkahan-ay, tan-awa ang publikasyon)

Memoryal sa Kamatayon ni Kristo

Aktibong mga Saksi

Tumatambong

11,000,000

10,000,000

9,000,000

8,000,000

7,000,000

6,000,000

5,000,000

4,000,000

3,000,000

2,000,000

1,000,000

1935 1945 1955 1965 1975 1985 1992

[Hulagway sa panid 243]

Bisan tuod nag-inusara sa bilanggoan sa Tsina, si Harold King nagpadayon sa pagsaulog sa Memoryal

[Hulagway sa panid 244]

Klase sa Bibliya sa mga kabataan sa Alemanya, sa sayong katuigan sa 1930

[Mga hulagway sa panid 244]

Sa Switzerland, niadtong tunga-tunga sa katuigang 1930, ang mga batan-ong Saksi mipatik niining magasina (ubos) ug nagpasundayag ug mga drama sa Bibliya (sama sa gipakita sa ubos sa tunga) alang sa daghang mga tumatan-aw

[Mga hulagway sa panid 247]

“Bulletin” (1919-35), “Director” (1935-36), “Informant” (1935-36), ug karon “Atong Ministeryo sa Gingharian” sa 100 ka pinulongan​—tanantanan nagatagana sa regular nga mga instruksiyon alang sa nahiusang pag-alagad sa kanataran sa mga Saksi ni Jehova

[Hulagway sa panid 248]

Mga pasundayag sa mga Tigom sa Pag-alagad nagatabang sa mga Saksi sa pagpauswag sa ilang personal nga pag-alagad sa kanataran (Sweden)

[Hulagway sa panid 249]

Batan-ong Saksi sa Kenya nakabaton ug kasinatian pinaagi sa paghatag ug usa ka pakigpulong ngadto sa iyang amahan diha sa Tunghaan sa Teokratikanhong Ministeryo

[Hulagway sa panid 250]

Sa pagka 1992, ang tun-anang materyal sa Bibliya alang sa mga kongregasyon sa mga Saksi ni Jehova dungan nga gipatik sa 66 ka pinulongan, ug padayon pang gidugangan