UMAGAD NGA BABAYE

Ang asawa sa anak nga lalaki sa usa ka tawo. Ang Hebreohanon (kal·lahʹ) ug Grego (nymʹphe) nga mga pulong nga gihubad ingong “umagad nga babaye” gihubad usab ingong “pangasaw-onon” diha sa pipila ka teksto.​—Aw 4:8-12; Isa 61:10; Jer 7:34; Ju 3:29; Pin 18:23; 21:​2, 9; 22:17.

Sanglit ang amahan sa kapanahonan sa mga patriarka mao ang mangunay sa paghikay sa kaminyoon sa iyang anak nga lalaki, sagad nga siya maoy mopili sa iyang mahimong umagad nga babaye. (Gen 24) Ang umagad nga babaye mopuyo uban sa panimalay sa iyang ugangang lalaki ug kon ang panimalay mobalhin, siya mouban usab kanila. (Gen 11:31) Ang Moisesnong Balaod nagdili sa usa ka tawo sa pagpakigrelasyon sa iyang umagad nga babaye ubos sa silot nga kamatayon.​—Lev 18:15; 20:12; Eze 22:11.

Magkalahi gayod ang mga disposisyon sa mga umagad nga babaye ug ang ilang mga tinamdan ngadto sa ilang mga ugangan. Pananglitan, si Ruth napamatud-ang mas maunongon ug debotado nga kauban sa iyang ugangang babaye nga si Noemi labaw pa kay kang Orpa, nga nag-ingon, “Ang imong katawhan mahimong akong katawhan, ug ang imong Diyos akong Diyos. Kon asa ikaw mamatay, adto ako mamatay.” (Ru 1:6-17, 22; 4:​14, 15) Ang Hitihanong mga asawa ni Esau nakahasol pag-ayo sa ilang mga ugangang si Isaac ug Rebeca. (Gen 26:34; 27:46) Gitagna ni Kristo Jesus nga ang mensahe sa Gingharian mopatunghag panagbulag tali sa mga umagad nga babaye ug sa ilang mga ugangang babaye.​—Luc 12:53.