May Makapabulag ba Kanimo Gikan sa Gugma sa Diyos?

“Ako nagtuo nga walay kamatayon o kinabuhi o mga manulonda o mga kagamhanan o mga butang ania karon o mga butang nga umaabot, o mga gahom o gihabogon o giladmon o ubang kalalangan ang makaarang sa pagbulag kanato gikan sa gugma sa Diyos nga anaa kang Kristo Jesus nga atong Ginoo.”—ROMA 8:38, 39.

ANG Diyos gugma. Sa mohatag-kinabuhi nga mga paagi kini gipahayag kanato sa kada adlaw. Ang hangin nga atong giginhawa, ang tubig nga atong giinom, ang pagkaon nga atong gikaon​—ang tanan maoy mga pasundayag sa gugma sa Diyos. Dugang pa, sila moabot sa samang maayo ug daotan, bisan kon pabilhan o dili. Gipamatud-an kini ni Jesus sa miingon siya mahitungod sa iyang langitnong Amahan: “Siya nagapasidlak sa iyang adlaw ibabaw sa mga tawong daotan ug sa maayo ug nagapaulan ibabaw sa mga tawong matarong ug sa dili matarong.” (Mateo 5:45) Ang tanang buhing linalang sa yuta angay magpasalamat sa Diyos tungod sa pagsustento niini sa kinabuhi.​—Salmo 145:15, 16.

2. Sa unsang paagi gipadayag ang dakong gugma ni Jehova sa katawhan, ug giunsa pagpadayag ni Jesus ang pagpabili sa kon unsay buot ni Jehova?

² Alang sa tawhanong mga linalang ang gugma sa Diyos milabaw kay sa yanong pagsustento niining presenteng kinabuhi nga malawos sama sa bulak ug malaya sama sa balili. (1 Pedro 1:24) Gihimo niya ang tagana aron ang katawhan mabuhi sa walay kataposan: “Gihigugma pag-ayo sa Diyos ang kalibotan nga iyang gihatag ang iyang bugtong nga Anak, aron ang tanan nga motuo kaniya dili unta malaglag kondili makabaton ug kinabuhing walay kataposan.” (Juan 3:16) Kining maong tagana gihimo sa dakong kapildihan sa Amahan ug sa Anak. Sa Getsemane sa gabii una siya mamatay, si Jesus mihapa sa yuta ug miampo sa dakong kasakit nga “ang iyang singot nahimong sama sa tinulo sa dugo nga nangatagak sa yuta.” Niadtong gutloa sa kasakitan, si Jesus naghunahuna sa kaulawan nga gipahamtang diha sa ngalan sa Diyos, ug siya mihangyo gani nga kuhaon gikan kaniya ang kopa. Apan siya midugang: “Apan dili sumala sa akong pagbuot, kondili sa imong pagbuot.” (Lucas 22:44; Marcos 14:36) Bisan pag si Jesus diha sa labihang kasakitan, ang pagbuot ni Jehova maoy una. Ang kalaoman sa bunal ug inanay nga kamatayon pinaagi sa paglansang sa kahoy sa pagsakit wala gani makapabulag kaniya gikan sa gugma sa Diyos.

³ Alang sa mga Saksi ni Jehova nga karon nagasubay sa mga lakang ni Jesus ang pagbuot ni Jehova mao usab ang una. “Kon ang Diyos dapig kanato,” sila nagaingon, nga gisulti ang mga pulong ni apostol Pablo, “kinsay mobatok kanato? Kinsay magabulag kanato gikan sa gugma ni Kristo? Ang kasakitan kaha o kagul-anan o paglutos o kagutmanan o pagkahubo o kapeligrohan o espada? Sa kaatbang, niining tanang butanga kita nagagulang bug-os nagamadaogon pinaagi kaniya nga nahigugma kanato.” (Roma 8:31, 35, 37) Sulod niining sigloha ang mga Saksi ni Jehova giatake sa manggugubot nga mga panon, gibukbok, gibulitan sa alkitran ug gitabonan sa balhibo, gipamiangan, gilugos, gipagutman, gipusil, ug gipunggotan pag mga ulo diha sa mga kampo konsentrasyong Nazi​—ang tanan tungod sa pagdumili nila nga mobulag gikan sa gugma sa Diyos.

4. Unsay imong impresyon sa pagdumili sa usa ka ulitawo sa pagbulag sa iyang kaugalingon gikan sa gugma sa Diyos?

⁴ Kap-atag-upat ka tuig kanhi, ang usa ka ulitawo, usa sa mga Saksi ni Jehova, misulat sa iyang mga ginikanan gikan sa usa ka kampo konsentrasyong Nazi, nga miingon, sa bahin:

“Karon alas 9 na sa adlaw sa akong husay, apan kinahanglang mohulat ako sa 11:30. Nagasulat ako niining mga linyaha sulod sa usa ka atob sa militaryong korte sa estado. Nabatonan ko ang dako kaayong kalinaw, nga dili gayod katuohan; apan ang tanan gitugyan ko na sa Ginoo, ug busa ako malinawong nagapaabot niining taknaa ug sa makanunayong mga gapos. Gisultihan kamo nila nga ako dili ginapos. Kabakakan! Adlaw ug gabii: panahon lamang sa pag-ilis ug paghubo sa sinina ug alang sa paglimpiyo sa atob nga ang usa badbaran sa gapos . . .

“Alas 12:35. Natapos na ang tanan. Tungod kay gipadayon ko ang akong pagsupak [sa ilang gipangayo nga biyaan niya ang iyang pagsimba kang Jehova nga Diyos], gihukom ang silot sa kamatayon. Ako namati, ug dayon tapos akong mapamulong ang mga pulong ‘Magmatinumanon ka hangtod sa kamatayon’ ug ang pila ka laing pulong sa atong Ginoo, ang tanan natapos. Apan pasagdi lamang kana karon. Naangkon ko ang dako kaayong kalinaw, dako kaayong kakalmado sa kahiladman, nga dili gayod nimo mahanduraw. . . . Kini nga kalinaw, kini nga kalipay nga mihupong na kanako sa korte, nga dili gayod hisabtan sa kalibotan, milukop ug mipuno kanako samtang misulod na usab ako sa akong atob . . . Ayaw kamo paghilak. . . . Kini ang labing maayong ikahatag ko kaninyo, ug sa tanang minahal nga igsoon karong adlawa, ang kataposang Dominggo una sa pagpatay kanako (pagpunggot sa ulo), nga sa maong adlaw badbaran ako sa gapos.”a

“Kamo Iyang Lig-onon, Kamo Iyang Pabaskugon”

5, 6. Unsang mga pasalig nga gipahayag ni Pablo ug Pedro ang makalipay niadtong grabeng gisulayan tungod sa hugot nga pagkupot sa gugma sa Diyos?

⁵ Ang maong ulitawo nabulag gikan sa kinabuhi apan dili gikan sa gugma sa Diyos. Gipahamtang ang susamang kapintasan sa mga Saksi ni Jehova latas sa kasiglohan. Ang katakos sa mga alagad sa Diyos sa pag-agwanta sa maong mga paglutos, bisan hangtod sa kamatayon, maoy dili diha sa kaugalingon nilang kusog kondili sa kusog sa Diyos. “Ang Diyos matinumanon,” gipasaligan kita ni Pablo, “ug dili niya itugot nga kamo pagapanulayon nga labaw sa inyong maantos, kondili duyog sa pagpanulay iyang ihatag usab ang lutsanan aron kamo makaantos niana.” (1 Corinto 10:13) Sa dihang mailalom sa pagsulay ang matinumanong mga saksi ni Jehova karong adlawa makaarang sa pagsulti sama sa gisulti ni Pablo sa gibilanggo siya: “Ang Ginoo mibarog haduol kanako ug gihatagan niya akog gahom.”​—2 Timoteo 4:17.

⁶ Si apostol Pedro, tapos sa pagpasidaan kanato nga magbantay sa Yawa, nga nagalibotlibot sama sa usa ka leyon nga nagangulob nga nagatinguha sa pagtukob kanato, nagahatag sa pasalig: “Tapos kamo makaantos sa makadiyut, ang Diyos sa tanang dili-takos nga kalulot, kinsa nagtawag kaninyo ngadto sa iyang walay-kataposang himaya nga nahiusa kang Kristo, magatapos sa inyong pagbansay, kamo iyang lig-onon, kamo iyang pabaskugon.” (1 Pedro 5:8-10) Sa pagpalandong niining tanang balaang pagpaluyo, dayag ang usa ka butang: Ang gugma sa Diyos dili mapakyas; ang pagbulag gikan niana ato na unyang sala, dili iyaha.

⁷ Si Satanas dili kanunayng moatakeng samag leyon nga nagangulob. Kadaghanan siya moabot nga samag ‘malalangong bitin’ ug bisan ingong apostatang “manulonda sa kahayag.” Siya dunay daotang mga laraw diha kanato, ug kinahanglang magmaigmat kita aron dili niya hisakpan. Kinahanglang atong isul-ob ang hingpit nga hinagiban sa Diyos sa “pagbarog nga malig-on batok sa malalangong mga buhat sa Yawa.” (Genesis 3:1, The Jerusalem Bible; 2 Corinto 2:11; 11:13-15; Efeso 6:11, potnot sa Ref. Bi.) Sa sinugdan sa ministeryo ni Jesus, si Satanas miduol kaniya nga mikutlo sa kasulatan, nga sayop nagpadapat niana sa paningkamot sa pagtental ni Jesus sa pagbuhat ug daotan. Sa tulo ka beses iyang gitental si Jesus ug sa tulo ka beses siya napakyas. Gipaling ni Jesus ang pagtuis ni Satanas sa Kasulatan pinaagi sa mga kasulatang tukmang pagkapadapat. Unya gisultihan ni Jesus si Satanas sa pagpahawa. Apan si Satanas “mipahawa lamang gikan kaniya hangtod sa laing higayon.”​—Lucas 4:13; Mateo 4:3-11.

8, 9. Sa unsang malalangong mga paagi nga si Satanas mibalik sa pag-atake kang Jesus, ug unsay giingon ni Pablo nga atong buhaton alang sa atong panalipod?

⁸ Si Satanas dili molunga. Siya mopunay sa pagbalik diha sa nagkalainlaing takoban. Mibalik siya kang Jesus pinaagi sa relihiyosong klero niadtong panahona. Nakasabot si Jesus niadto ug prangka niya silang giingnan: “Kamo nagagikan sa inyong amahan ang Yawa.” Ang pila ka tawo mahimong nagaalagad pang wala tuyoa sa mga katuyoan ni Satanas. Gibuhat kini ni apostol Pedro dihang siya, bisag maayog tuyo, mibadlong kang Jesus, nga miingon: “Maluoy ka sa imong kaugalingon, Ginoo; dili gayod kini mahitabo kanimo.” Gibadlong ni Jesus si Pedro: “Magpalikod ka kanako, Satanas! Ikaw usa ka kapandolanan alang kanako.” (Juan 8:44; Mateo 16:22, 23) Sa susama, ang mga katuyoan ni Satanas mahimong alagarang wala tuyoa sa usa ka amo, kauban sa trabaho, kauban sa tunghaan, higala, paryente, ginikanan, o kapikas sa kaminyoon. Kinahanglang magbantay kita kanunay nga dili nato tugotan ang bisan unsa nga magpahuyang sa atong relasyon uban kang Jehova.

⁹ Busa kinahanglang “isul-ob ninyo ang hingpit nga hinagiban gikan sa Diyos aron makabarog kamong malig-on batok sa mga kaugdahan sa Yawa; tungod kay kita adunay pagpakigdumog, dili batok sa dugo ug unod, kondili batok . . . sa daotang espirituhanong mga gahom sa langitnong mga dapit.”​—Efeso 6:11, 12.

Ang Hugot nga Pagkupot sa Sala sa Nahulog nga Unod

10. Unsay kahulogan sa pulong “sala,” ug unsang mga buhat ang magpabulag kanato gikan sa gugma sa Diyos?

¹⁰ Si Satanas moatake sa bahin nga kita mahuyang. Uyon niana ginahimo niyang paboritong puntiriya ang unodnon natong kiling sa sala. (Salmo 51:5) Ang Gregong pulong gihubad nga sala maoy ha·mar·tiʹa. Ang berbo maoy ha·mar·taʹno, nga nagkahulogang “pagkasipyat sa tumong.” (Roma 3:9, potnot sa Ref. Bi.) Sa dugang masipyat kita sa tumong ug mapakyas sa pagbantay sa mga sugo sa Diyos, sa dugang kita mahilayo sa gugma sa Diyos, kay “kini ang kahulogan sa gugma sa Diyos, nga atong pagabantayan ang iyang mga sugo.” (1 Juan 5:3) Ang pagpanapaw, pakighilawas, seksuwal nga kahiwian, mga paghuboghubog, mga parti nga walay kontrol, pagpatuyang sa unodnong mga pangibog, mga pangabugho, mga kasuko, materyalistikanhong mga kaibog​—kanang tanang butang nagabulag kanato gikan sa gugma sa Diyos, ug “kadtong nagabuhat [niana kanila] dili magapanunod sa gingharian sa Diyos.”​—Galacia 5:19-21.

11. Sa unsang paagi ang sala inanay makakupot kanato, uban ang unsang sangpotanan sa kataposan?

¹¹ Ang mga sine, mga libro, mga dula, mga programa sa TV​—nga punog materyalistikanhon, ako-una, mahilig-sa-sekso nga mga anunsiyo​—nagapausbaw sa pangagpas sa walay-renda ug walay-pagpugong nga kalingawan. Ang unang sala mopasayon sa ikaduha, mosunod ang ikatulo ug ikaupat, ug sa dili madugay tulin na kaayo ang pagkatumpawak ngadto sa pagkakalibotanon. Sa kataposan, kadtong “mahigugmaon sa mga kalingawan inay sa Diyos” mapuliki sa “paglaraw alang sa mga pangibog sa unod.” (2 Timoteo 3:4; Roma 13:14) Ang batag tigulang maganoy ngadto sa lunangan sa sala, ug ang ilang mga tanlag bug-os makubalan. “Kay bug-os mawad-an sa salabotan sa maayong kagawian, ilang gitugyan ang ilang kaugalingon sa malaw-ayng kagawian sa pagbuhat sa kahugawan sa tanang matang uban ang kadalo.”​—Efeso 4:19; 1 Timoteo 4:2.

12. Unsang mga kasulatan ang nagapadayag sa gahom sa sala ibabaw kanato, ug sa unsang paagi si Pablo mimulo bahin niini?

¹² Kadtong determinadong dili mabulag sa gugma sa Diyos kinahanglang maglig-on sa ilang kaugalingon batok sa hugot nga pagkupot sa sala sa nahulog nga unod. Kini usa ka lisod-pildihong kaaway, sumala sa gibalikbalik pagpasiugda sa Bibliya: “Ang matag mamumuhat sa sala maoy ulipon sa sala,” “ang tanan nailalom sa sala,” “ang tanan nakasala,” “ayaw itugot nga ang sala magpadayon sa paghari sa inyong himalatyong mga lawas,” “kamo iyang mga ulipon tungod kay kamo nagasugot kaniya,” “ang bayad sa sala mao ang kamatayon,” ug ang tanan “gihuptan sa sala.” (Juan 8:34; Roma 3:9, 23; 6:12, 16, 23; Galacia 3:22) Si Pablo “nabaligya sa sala,” usa ka “binihag sa kasugoan sa sala,” nga tungod niana siya mimulo: “Ang maayo nga buot kong buhaton wala ko pagabuhata, apan ang daotan nga dili ko buot mao ang akong ginabuhat.” (Roma 7:14, 19, 23) Busa siya nagapatugbaw: “Pagkaalaot ko nga tawo! Kinsay moluwas kanako gikan sa lawas nga himalatyon?” Unya moabot ang masadyaong tubag: “Salamat sa Diyos pinaagi kang Jesu-Kristo nga atong Ginoo!”​—Roma 7:24, 25.

13, 14. (a) Sa unsang paagi kita gipahigawas sa sala? (b) Sa unsang paagi kita makapabilin sa gugma ni Kristo?

¹³ Hangtod sa pag-abot ni Kristo Jesus, “ang sala naghari uban ang kamatayon.” (Roma 5:14, 17, 21) Apan sa pagkamatay ug pagkabanhaw ni Jesus, ang haring sala nawad-an sa trono alang niadtong nagasanong sa mahigugmaong gasa sa Diyos sa Iyang Anak. Kita iyang giluwas gikan sa atong mga sala, iyang gihugasan niana, gihinloan gikan niana, gipahigawas gikan niana, ug bug-os gipapas kana alang kanato. (Mateo 1:21; Buhat 3:19; 22:16; 2 Pedro 1:9; 1 Juan 1:7; Pinadayag 1:5) Busa dili lamang si apostol Pablo kondili ang tanang nagtuo sa inula nga dugo ni Kristo Jesus ang angay magpasalamat sa Diyos pinaagi kang Jesu-Kristo nga atong Ginoo tungod sa pag-abli sa dalan sa pagpahigawas gikan sa alaot nga unodnong pagkaulipon sa sala ug kamatayon.

¹⁴ Busa gikinahanglan ang dili lamang paglikay sa pagbulag sa gugma sa Diyos kondili ang pagpabilin usab sa gugma ni Kristo. Ang pormula sa pagpabiling suod kang Jesus sama ra alang sa pagpakigsuod sa Diyos. Gipunting kini ni Jesus, nga miingon: “Maingon nga ang Amahan nahigugma kanako ug ako nahigugma kaninyo, magpabilin kamo sa akong gugma. Kon inyong bantayan ang akong mga sugo, kamo magpabilin sa akong gugma, maingon nga akong gibantayan ang mga sugo sa Amahan ug nagapabilin sa iyang gugma.”​—Juan 15:9, 10.

Ang Kapeligrohan nga Mahianod

15. Sa unsa kita mahuyang, ug unsay atong pagabuhaton sa paglikay sa kapeligrohan?

¹⁵ Ayawg wad-a kining kagawasan gikan sa pagkaulipon sa sala ug kamatayon pinaagi sa pagsibog o pagkaanod. Kini mahimong mahitabo nga inanay kaayo nga kita basin dili makabantay. Sumala sa ginaingon sa Galacia 6:1: “Mga igsoon, bisan pag ang usa ka tawo mahiligas sa dili pa siya makaamgo niana, kamong adunay espirituhanong mga katakos sulayi ang pagpasibo pag-usab nianang tawhana diha sa espiritu sa kalumo, samtang ang matag usa kaninyo magbantay sa inyong kaugalingon, kay basi kamo usab matental.” Maingon nga ang usa magatambag sa lain, kinahanglang siya ‘magbantay sa iyang kaugalingon.’ Kitang tanan mahuyang kaayo! “Kinahanglang kita magahatag ug labaw sa kasagaran nga pagtagad sa mga butang atong nadunggan, aron kita dili mahianod.”​—Hebreohanon 2:1.

16, 17. Unsay nagailustrar sa kapeligrohan nga mahianod sa espirituwal nga paagi, ug unsay atong pagabuhaton sa paglikay niini?

¹⁶ Ang pagkaanod dili hago. Kana ang hinungdang kini sayon kaayo​—ug peligroso kaayo, sa espirituwal nga pagkasulti. Mahimong hikaplagan nimong ikaw nabulag sa gugma sa Diyos sa dili ka pa makaamgo niana. Kini sama sa karnero nga mahisalaag. Sa unsang paagi kana mahisalaag? Ang usa ka magbalantay nagapatin-aw: ‘Kini manibsib hangtod kini mawala. Kini makakitag lunhawng balili pila ka tiil ang kalayo sa usa ka kiliran, moadto didto aron manibsib. Kini makakitag laing luna nga napulo ka tiil ang kalayo ug moadto didto aron manibsib. Ang ikatulong luna daw makapadani, ug ang karnero moadto sa pagsibsib didto. Sa taudtaod kini mahibulag sa panon. Kini manibsib hangtod mawala.’

¹⁷ Kini matuod usab niadtong mahianod sa espirituwal nga paagi. Kini mahimong magsugod nga dili daotan sa pila ra ka materyal nga butang, o sa kalibotanong mga pakig-uban, o sa mga pagbanabana bahin sa pila ka kasulatan. Apan sa inanay, kana sila mahilayo ug mahilayo sa panon sa Diyos, ug sa dili madugay sila mabulag sa kongregasyon ug sa gugma sa Diyos. Wala nila pamatii ang awhag ni Pablo: “Ipadayon ninyo ang pagsusi kon kamo anaa ba sa pagtuo, ipadayon ninyo ang pagsuta kon unsa kamo sa inyong kaugalingon.”​—2 Corinto 13:5.

18, 19. Sa unsang paagi kita makapapahawa sa Yawa gikan kanato, ug sa unsang paagi kita masuod sa Diyos?

¹⁸ “Sukli ninyo ang Yawa,” kita giingnan, “ug siya mokalagiw gikan kaninyo.” Pinaagi sa mahanasong paggamit sa “espada sa espiritu, nga mao, ang Pulong sa Diyos,” kita makapasumbalik sa malalangong mga atake ni Satanas. Kana ang paagi nga gipapahawa ni Jesus si Satanas didto sa kamingawan. Kita gisultihan usab: “Makigsuod kamo sa Diyos, ug siya mosuod kaninyo.” (Santiago 4:7, 8; Efeso 6:17) Sama sa mga magsusulat sa mga Salmo, kinahanglang makigsuod kita sa Diyos pinaagi sa pagpangupot sa iyang pulong: “Ang pahinumdom ni Jehova kasaligan, nga nagahimo sa walay-kasinatian nga maalamon.” “Sa imong mga pahinumdom ako magpadayon sa pagpakita sa pagkamatinagdanon. Ang imong pulong maoy lamparahan sa akong tiil, ug kahayag sa akong alagianan. . . . Ako wala mobulag sa imong mga pahinumdom.”​—Salmo 19:7; 119:95, 105, 157.

¹⁹ Pinaagi sa pag-ampo, pinaagi sa pagtuon sa Pulong sa Diyos, pinaagi sa paghigugma sa atong mga igsoon ug pagpakigtigom nga regular kanila, pinaagi sa pagsangyaw sa uban sa Gingharian sa Diyos​—niining tanang paagi kita masuod sa Diyos ug sa iyang gugma sumala sa gipadayag diha kang Kristo Jesus nga atong Ginoo.​—1 Tesalonica 5:17; Roma 12:2; Hebreohanon 10:24, 25; Lucas 9:2.

20. Unsang determinasyon ang gipahayag ni Pablo nga gipahayag sa mga Saksi ni Jehova karong adlawa?

²⁰ Sa malukopong deklarasyon, gipahayag ni Pablo ang determinasyon sa tanang matinumanong saksi ni Jehova sa yuta karong adlawa, nga nag-ingon: “Ako nagtuo nga walay kamatayon o kinabuhi o mga manulonda o mga kagamhanan o mga butang ania karon o mga butang nga umaabot o mga gahom o gihabogon o giladmon o ubang kalalangan ang makaarang sa pagbulag kanato gikan sa gugma sa Diyos nga [gihimong makita, JB] anaa kang Kristo Jesus nga atong Ginoo.”​—Roma 8:38, 39.

[Mga footnote]

Makahinumdom Ka Ba?

◻ Sa unsang paagi ang gugma ni Jehova gipadayag diha sa iyang mga tagana alang sa kinabuhi?

◻ Unsang mga paagi ang gisulayan ni Satanas sa pagpabulag sa mga Saksi ni Jehova gikan sa gugma sa Diyos?

◻ Unsang mga kasulatan ang nagapadayag sa hugot nga pagkupot sa sala kanato, ug sa unsang paagi mahimong mabugto ang pagpangupot?

◻ Nganong peligroso kaayo ang pagkaanod, ug sa unsang paagi kini masumpo?

1. Sa unsang mga paagi ang gugma sa Diyos gipadayag sa matag adlaw?

3. Unsang mga pulong ni Pablo ang gipamulong karong adlawa sa mga Saksi ni Jehova ingon nga ilang kaugalingon, ug unsay sangpotanan nganha kanila?

7. Unsang mga taktika ang gigamit ni Satanas kang Jesus, ug sa unsang paagi gipildi siya ni Jesus?

[Hulagway sa panid 13]

Ang usa ka karnero inanay mahisalaag hangtod kini mawala