Kang Kinsang mga Pag-ampo ang Gidungog?

SI Jehova mao ang Diyos nga nagatubag sa mga pag-ampo. Ngani, ang iyang Pulong, ang Bibliya, nagtawag kaniya nga “tigpatalinghog sa pag-ampo.” (Salmo 65:2) Siya andam motubag sa mga pag-ampo. Apan kang kinsang mga pag-ampo ang iyang dunggon?

Ang Diyos motubag sa mga pag-ampo sa mga indibiduwal nga iyang gikahimut-an. Sila adunay matinahuron nga tinamdan sa salmista kinsa miingon: “Ingon nga ang lagsaw nangandoy sa pagpangita sa tubig sa kasapaan, mao man usab ang akong kalag nangandoy sa pagpangita kanimo, O Diyos. Ang akong kalag giuhaw sa Diyos, sa Diyos nga buhi.” (Salmo 42:1, 2) Apan, unsay ebidensiya nga nagmatuod nga dunggon si Jehova ang mga pag-ampo sa iyang matuod nga mga magsisimba?

Pamatuod nga ang Diyos Motubag sa mga Pag-ampo

Ang Bibliya nasudlan sa daghang rekord nga nagpamatuod nga si Jehova motubag sa mga pag-ampo sa iyang matinumanong mga alagad. Pananglitan, sa dihang si Haring Jehosaphat sa Juda miampo alang sa kaluwasan, ang Diyos mitubag sa iyang pag-ampo ug mihatag kaniya sa kadaogan pinaagi sa pagpahinabo nga magpinatyanay ang iyang mga kaaway sa usa ug usa. (2 Cronicas 20:1-26) Sa dihang si Haring Hezekias susama nga miatubang sa usa ka malig-ong puwersa militar, siya mapaubsanon nga miampo sa Diyos alang sa panabang. Nakita ni Hezekias ang kaluwasan ni Jehova sa dihang ang usa ka manulonda mipatay sa 185,000 ka Asiryanhon sa usa ka gabii.​—Isaias 37:14-20, 36-38.

Nganong gitubag sa Diyos ang maong mga pag-ampo? Sa duha ka kaso, ang mga hari nangamuyo nga ang kapildidan sa gubat makapasipala sa ngalan ni Jehova. (2 Cronicas 20:6-9; Isaias 37:17-20) Sila nabalaka sa iyang kadungganan. “Ang bugtong tumong sa pag-ampo,” miingon ang The International Standard Bible Encyclopedia, “dili lamang kaayohan sa nangamuyo kondili kadungganan sa ngalan sa Diyos.” Busa, ang matinumanong mga alagad ni Jehova makatino nga siya motabang kanila “tungod ug alang sa iyang ngalan.” Ang rekord nga nagpamatuod nga ang maong mga pag-ampo gidungog mohatag sa katawhan sa Diyos ug pagsalig nga siya mopatalinghog sa ilang mga pag-ampo.​—Salmo 91:14, 15; 106:8; Proverbio 18:10.

Apan, bisan pag ang situwasyon naglangkit sa ngalan ni Jehova, ang Diyos maoy mohukom kun dunggon ba niya ang mga pag-ampo o dili. Siya tingali may mga katarongan sa dili pagtubag sa pipila ka mga pag-ampo. Kon gibati nato nga ang atong mga pag-ampo wala patalinghogi, maayong palandongon kon nganong naingon niini.

Kon Nganong Wala Dungga ang Pipila ka mga Pag-ampo

“Bisag kamo mihimo sa daghang mga pag-ampo, ako dili mamati,” miingon kas-a si Jehova sa mga Israelinhon. Nagpunting sa hinungdan, siya mipadayon: “Ang inyong mga kamot napuno sa dugo.” (Isaias 1:15) Unsaon sa pagpamati ni Jehova sa ilang pag-ampo kon sila wala magtagad sa kasugoan ni Jehova? Usa ka sanglitanan sa Bibliya naghatag ug tin-aw nga tubag, nga nag-ingon: “Kadtong nagapalingog-lingog sa iyang igdulongog gikan sa pagpamati sa kasugoan​—bisan ang iyang pag-ampo maoy usa ka dulumtanan.”​—Proverbio 28:9.

Ang Bibliya mihatag ug laing katarongan kon nganong ang pipila ka mga pag-ampo wala dungga, sa dihang kini miingon: “Kamo nagapangayog mga butang, apan dili makadawat niini, tungod kay nangayo kamo alang sa daotang tuyo, aron lamang gastohon kini sa pagtagbaw sa inyong mga pangibog.” (Santiago 4:3) Dili, si Jehova dili motubag sa mga pag-ampo sa pagtagbaw sa daotang nga mga pangibog. Atong hinumdoman usab nga ang Diyos dili mahimong mandoan sa mga tawo, pagaingnon pa. Siya mao ang Usa nga mohukom kon unsaon niya pagtubag ang atong mga pag-ampo.

Ang segurado nga pagadunggon mao ang pag-ampo nga gipaabot sa Diyos gikan sa usa ka mahinlong kasingkasing, uban ang hustong motibo, ug diha sa iyang tinudlong paagi​—pinaagi kang Jesu-Kristo. (Juan 14:6, 14) Apan bisan ang mga pag-ampo niadtong nakaabot sa mga kinahanglanon usahay mibati nga sila wala pamatii. Nganong dili dayon tubagon sa Diyos ang pila ka mga pag-ampo sa iyang mga alagad?

Si Jehova nasayod sa labing maayong panahon sa pagtubag sa mga pag-ampo. Bisan pa nga nangayog bisikleta ang bata, ang iyang amahan dili mopalit niana hangtod ang bata mohingkod na ug makaarang na sa paggamit niana nga hilwas. Ingon usab kana sa pipila ka mga pag-ampo sa mga nahigugma sa Diyos. Nasayod sa labing maayo alang kanila, siya mohatag sa gikinahanglan sa labing tukma nga panahon.

Bisan pa, dili mabatonan sa mga alagad ni Jehova ang tanan nga tingali ilang giampo. Tungod kay dili hingpit, sila tingali naninguha sa pipila ka mga butang nga dili maayo alang kanila. Ang ilang mahigugmaon langitnong Amahan dili mohatag kanila sa bisan unsa nga makadaot, kay siya ang Maghahatag sa “tanang maayong gasa ug sa tanang hingpit nga regalo.” (Santiago 1:17) Sa susama, ang Diyos mahimong dili mohatag sa butang nga wala kinahanglana gikan sa iyang punto de vista. (Itandi ang 2 Corinto 12:7-10.) Siya motubag sa mga pag-ampo nga nahiuyon sa iyang kabubut-on ug katuyoan alang sa iyang katawhan.​—1 Juan 5:14, 15.

Si Jesus “Gipatalinghogan”

Si Jesu-Kristo mao ang tawo sa pag-ampo. (Mateo 6:9-13; Juan 17:1-26) Siya may bug-os nga pagsalig nga patalinghogan ug dunggon sa iyang langitnong Amahan ang iyang mga pag-ampo. Si Jesus kas-a miingon: “Amahan, . . . ako nahibalo nga ikaw mamati kanako sa kanunay.” (Juan 11:41, 42) Apan dili ba nga si Jesus nahigawad sa kataposan mismo sa iyang yutan-ong dalan? Dili ba siya niadto misinggit: “Diyos ko, Diyos ko, nganong gibiyaan mo ako?”​—Mateo 27:46.

Sa dihang gisulti si Jesus kadtong mga pulonga, dayag nga siya nagtuman sa usa ka tagna mahitungod sa iyang kamatayon. (Salmo 22:1) Diha sa usa ka limitadong diwa, mahimong gipasabot usab ni Jesus nga gikuha ni Jehova ang iyang panalipod ug mitugot nga ang iyang Anak mamatay sa usa ka masakit ug makauulaw nga kamatayon aron masulayan ang iyang pagkamaunongon sa bug-os. Ang pagsuhid sa mga panghitabo nianang kataposang adlaw sa yutan-ong kinabuhi ni Jesus nagpakita nga ang Diyos nagpatalinghog sa iyang mga pag-ampo.

Sa gabii sa pagdakop kaniya, si Jesus miampo sa tanaman sa Getsemane. Tulo ka higayon siya nangaliyopo: “Amahan ko, kon mahimo, isaylo kining kopa gikan kanako.” (Mateo 26:39, 42, 44) Wala magpanuko si Jesus sa paghatag sa iyang kinabuhi ingong usa ka lukat alang sa nagatuo nga katawhan. Wala, kondili siya sa dayag dulot nga nabalaka sa posibilidad nga mapasipalahan ang iyang hinigugma kaayong Amahan pinaagi sa pagkamatay diha sa usa ka kahoy sa pagsakit ingong usa ka tinunglo nga tigpasipala. Gitubag ba ni Jehova ang pag-ampo ni Jesus?

Mga katuigan sa ulahi, ang apostol nga si Pablo misulat: “Sa mga adlaw sa tawhanon niyang kinabuhi si Kristo mitanyag ug mga pag-ampo ug usab mga pangamuyo ngadto sa Usa nga arang makaluwas kaniya gikan sa kamatayon, uban ang makusog nga pagsinggit ug mga paghilak, ug siya gipatalinghogan tungod sa iyang diyosnong kahadlok.” (Hebreohanon 5:7; Lucas 22:42, 44) Oo, diha sa mahiwasa nga gabii sa wala pa siya mamatay, si Jesus, “gipatalinghogan.” Apan sa unsang paagi?

Gipadala ni Jehova ang usa ka manulonda kinsa “mipakita kang [Jesus] ug nagpalig-on kaniya.” (Lucas 22:43) Sa ingon nalig-on, si Jesus nakaarang sa pag-atubang sa kamatayon diha sa kahoy sa pagsakit. Tataw, si Jehova mihatag sa maong panahon ug iyang pasalig nga ang iyang kamatayon diha sa kahoy dili mohatag pasipala sa balaang ngalan kondili sa ulahi mahimong butang mismo nga magamit sa pagbalaan niana. Sa pagkamatuod, ang kamatayon ni Jesus diha sa kahoy sa pagsakit nagbukas sa dalan alang sa mga Hudiyo, kinsa mga tinunglo ilalom sa Kasugoan, aron maluwas gikan sa pagkahinukman sa kamatayon.​—Galacia 3:11-13.

Tulo ka adlaw sa ulahi, gibanhaw ni Jehova si Jesus ug gihinloan siya sa tanang sumbong sa pagpasipala pinaagi sa pagbayaw kaniya ngadto sa usa ka superyor nga posisyon sa langit. (Filipos 2:7-11) Pagkakahibulongang paagi sa pagtubag sa pag-ampo ni Jesus mahitungod “niining kopa”! Kana nga pag-ampo gitubag sa paagi ni Jehova. Ug natagamtam ni Jesus ang katingalahang mga panalangin tungod kay iyang giingnan ang iyang langitnong Amahan: “Hinunoa, dili ang akong pagbuot ang matuman, kondili ang imoha.”​—Lucas 22:42.

Kon sa Unsang Paagi Gidungog ni Jehova ang mga Pag-ampo Karong Adlawa

Sama kang Jesus, kadtong nagatinguha sa pagpahimuot kang Jehova karong adlawa sa kanunay mohangyo nga matuman ang kabubut-on sa Diyos. Sila kinahanglang magbatog pagtuo nga si Jehova motubag sa ilang mga pag-ampo diha sa paagi nga makabenepisyo ug dako kanila. Ngani, siya ‘arang makahimo sa tanang butang sa sukod nga labaw pa gayod ka daghan kay sa atong arang mapangayo o mahunahuna.’​—Efeso 3:20.

Usa ka dalagang Kristohanon nga nagpuyo uban sa iyang di-magtutuo nga mga ginikanan nakasinati nga tinuod kanang tekstoha. Diha sa usa ka sulat gikan sa Watch Tower Society, gihangyo siya nga mainampoon niyang palandongon ang posibilidad sa pagdawat sa usa ka linain misyonaryong asaynment. Bisag ang iyang tim-os nga tinguha mao ang pagpabilin sa balay aron tabangan ang iyang mga ginikanan nga mahimong mga Kristohanon, iyang gisukna ang Diyos diha sa pag-ampo: “Unsay imong kabubut-on? Dawaton ko ba kining imbitasyona bisan pa sa pagsupak sa akong mga ginikanan, o tabangan ko ba ang akong mga ginikanan pinaagi sa padayong pagpuyo uban kanila?” Matag panahong moampo siya, ang iyang konsensiya nagaingon kaniya sa pagdawat sa imbitasyon. Siya mihukom nga kini mao ang tubag gikan kang Jehova.

Gilig-on sa Diyos kining babayehana sa pagpabilin sa iyang desisyon. Sa dihang siya gihangyo nga mobalhin ngadto sa Awaji Island, Hapon, ang iyang mga ginikanan nakurat ug misamot ang ilang pagsupak. Apan, tungod kay wala makakombinser kaniya sa pag-usab sa iyang hunahuna, ang iyang inahan mihukom sa pagtuon sa Bibliya aron matino kon nganong ang iyang anak nga babaye mihimo sa maong desisyon. Tulo ka bulan sa ulahi ang iyang mga ginikanan miduaw kaniya. Sa pagkakita nga giatiman siya pag-ayo sa ubang mga Saksi ni Jehova, ang iyang amahan nakadayeg kaayo ug mihilak dihang nag-inusara siya. Sa wala magdugay siya usab misugod sa pagtuon sa Bibliya. Sa ulahi ang duha ka ginikanan niini nga dalaga nabawtismohan ug misugod sa pag-alagad nga matinumanon kang Jehova. Dili ba gipanalanginan ni Jehova kining Kristohanong dalaga sa pagkamadagayaon gayod?

Gidungog ang Ilang mga Pag-ampo

Imo bang nahinumdoman ang mga pulong sa babayeng gihisgotan sa sinugdan sa nag-unang artikulo? Wala gayod niya hibatyagi nga gidungog ang iyang mga pag-ampo. Apan, siya sa ulahi nakasabot nga ang Diyos mitubag sa iyang mga pag-ampo. Ang babaye mihupot ug rekord sa punto sa iyang mga pag-ampo. Usa ka adlaw iyang gibasa ang kuwaderno ug nakaamgo nga gidungog ni Jehova ang kadaghanan sa iyang mga pag-ampo, bisan ang mga bahin nga iya na mismong nakalimtan! Siya sa ingon nahibalo nga ang Diyos nagatagad kaniya ug gidungog ang iyang mga pag-ampo diha sa maluloton nga paagi nga nakabenepisyo kaniya ug dako.

Kon gibati mo nga ang imong mga pag-ampo wala tubaga, suknaa ang imong kaugalingon: ‘Ako ba may personal nga relasyon uban kang Jehova, ang “Tigpatalinghog sa pag-ampo”? Kon wala, mihimo ba akog mga lakang nga makakat-on bahin kaniya ug mahimong usa sa iyang dedikadong mga alagad?’ Siya nagatubag sa mga pag-ampo niadtong kinsa nahigugma kaniya ug nagabuhat sa iyang kabubut-on. Sila “milahutay sa pag-ampo” ug gipatalinghogan, sama kang Jesus. (Roma 12:12) Busa, “ibubo ang imong kasingkasing” ngadto kang Jehova ug buhata ang iyang kabubut-on. (Salmo 62:8) Unya dunggon ang imong mga pag-ampo.

Karong adlawa, minilyong mga tawo ang nagaampo alang sa mga butang espesyal. Oo, ang ilang mga pag-ampo gipatalinghogan. Atong tan-awon kon nganong kita makatino nga ang maong mga pag-ampo dunggon.