Ang Hagit sa Pangsangyaw Diha sa Usa sa Labing Dakong mga Dunggoanan sa Kalibotan

ANG Rotterdam, nahimutang sa dapit nga ang Rhine, ang labing okupadong suba sa Uropa, nagasulod sa North Sea, nagatagamtam sa ngalan sa pagkahimong usa sa labing dakong mga dunggoanan sa kalibotan. May 500 ka kompaniya sa barko nga magdunggoan dinhi, ang Rotterdam adunay direktang koneksiyon sa kapin sa 800 ka destinasyon sa tibuok kalibotan. Kini sa pagkatinuod maoy usa ka internasyonal nga dunggoanan.

Apan, kining 650-anyos nga dunggoanang Olandes dili lamang agianan sa mga barko. Kini usab maoy tagboanan sa mga tawo. Ang agos sa mga marinero mangabot kada adlaw ug gabii gikan sa tanang suok sa kalibotan. Kini nga mga marinero wala makaikyas sa pagtagad sa mga Saksi ni Jehova sa Netherlands. Sama sa mga Saksi bisan diin, sila nangitag mga paagi sa pagwali sa labing maayong balita sa kalibotan​—nga himoon sa Gingharian sa Diyos sa dili madugay ang yuta nga usa ka Paraiso—alang sa mga tawo sa tanang matang, lakip na ang mga marinero.​—Daniel 2:44; Lucas 23:43; 1 Timoteo 4:10.

“Misyonaryong Buluhaton nga Baliskad”

Sa katuigang nanglabay, ang Watch Tower Society sa Netherlands mihangyo sa unom ka bug-os panahong magsasangyaw, o mga payunir, nga buhaton ang pagsangyaw sa barko ug barko diha sa tanang dunggoanan sa Rotterdam. Gipahimuslan dayon sa mga payunir ang higayon. Sila nangayog impormasyon gikan sa nagadumala sa dunggoanan, gisusi ang mga pantalan, ug sa ulahi nakaamgo nga sila adunay usa ka mahagitong buluhaton.

“Daw sama kinig misyonaryong buluhaton nga baliskad,” matud pa ni Meinard, nga maoy nagapalakaw sa pagsangyaw sa pantalan. Unsay buot niyang ipasabot? “Kasagaran ang usa ka misyonaryo mohimog halayong biyahe aron maabot ang mga tawo, apan sa among bahin ang mga tawo ang naghimog halayong biyahe aron maabot kami.” Siya midugang, “ang among teritoryo nga pagasangyawan maoy internasyonal.” Ang Rotterdam Europoort nga yearbook sa 1985 miingon nga niadtong 1983, ang tuig nga gisugdan sa mga payunir kining linain nga buluhaton, ang dunggoanan sa Rotterdam nakapadunggo ug 30,820 ka nagabiyaheng mga barko gikan sa 71 ka nagkalainlaing nasod. Kana maoy internasyonal!

Sa kahaom, ang “mga misyonaryo sa dunggoanan”​—nga maoy pagtawag sa mga marinero sa mga payunir sa ulahi—​nagpabanaag usab ug usa ka internasyonal nga palibot. Si Geert, Peter, ug ang iyang asawa, si Karin maoy mga Olandes; si Daniël ug Meinard gikan sa Indonesia; ug si Solomon maoy Ethiope. Ang ilang Uropanhon, Asianhon, ug Aprikanhong kagikan igo nga makawala sa kababagan sa walo ka pinulongan, apan aron magmalamposon niining buluhatona, sila adunay laing kababagan nga pagabuntogon.

“Ang Nagabiseklitang Relihiyon”

“Dili ka mahimong magsuroysuroy diha sa pantalan, molatay sa damyo, ug mosaka sa barko,” miingon ang 32-anyos nga si Peter, nga marinero niadto. “Kinahanglan mo ang mga permiso niana.” Kana nagpasabot nga mga permiso sa pagsulod sa mga pantalan ug mga permiso sa pagsakay sa mga barko. “Daghan kaayong kuskos-balungos,” nahinumdom si Peter, “apan human nga nakakuha kamig walo ka permiso, kompleto sa among mga letrato ug opisyal nga mga selyo, andam na kami sa pag-adto bisan asa.” Ilang gibahin ang 37 kilometros nga pantalan sa tulo ka seksiyon, ang matag usa giatiman sa duha ka payunir.

Apan, sa unsang paagi madumala ninyo ang nagkalainlaing mga pinulongan nga maoy sinultihan sa mga marinero gikan sa daghan kaayong mga nasod? Bisag ang mga payunir nagdalag daghang literatura sa Bibliya sa 30 ka pinulongan ug ikarga kutob sa mahimo diha sa ilang mga biseklita, daw dili pa kana igo. “Wala kay kasayoran kon unsang mga pinulongana ang imong kinahanglan,” miasoy nga mapahiyomon ang 30-anyos nga si Solomon. “Kasagarang mahitabo nga gusto ang mga marinero ug mga libro sa ilang kaugalingong pinulongan nga wala kami makadala, ug unya sultihan ka nila nga ang ilang barko molarga na sa mga tulo ka oras o kapin pa.” Dili buot nga mapalaw ang mga marinero, ang usa sa mga payunir nagdalidali sa pagpauli, mikuhag hustong mga libro, nagdali nga makabalik, ug gitunol kini sa maikagong mga marinero. “Sa dihang ang samang suliran mitungha samtang kami nagsangyaw sa mga bahin sa pantalan nga daganon ug tulo ka oras sa biseklita,” matud pa ni Peter, “dayag nga among gikinahanglan ang laing paagi sa pag-atubang sa suliran.”

Usa ka adlaw gihatagan ug sorprisa ang mga payunir sa pipila ka mga Saksi nga nagpuyo sa duol sa pantalan ug duha ka biseklita nga trailer, ang matag usa ka trailer sama ka dakoa sa usa ka dulang. Gikargahan sa mga payunir ang trailer ug mga literatura sa tanang pinulongang mabatonan, gihigot kini diha sa ilang mga biseklita, ug giguyod paingon sa pantalan. Sa ulahi ang mga trailer nahimong pamilyar na nga talan-awon. “Kini nahimong among ilhanan sa among presensiya.” miingon ang usa sa mga payunir. “Sa dihang ang guwardiya sa ganghaan makakita kanamong nagsingabot, iyang buksan ang ganghaan, ug mosinyas sa pagpasulod kanamo, ug mosinggit: ‘Ania na ang relihiyong nagabiseklita!’” Sa ubang panahon, sa dihang makit-an sa guwardiya ang “relihiyong nagabiseklita” nga taliabot, iyang buksan ang ganghaan ug mosinggit: “Dunay duha ka barkong Polako ug usa ka Intsek ang midunggo!” Ang sama niini nga makatabang nga pahibalo nakahimo sa mga payunir sa pagsaka sa barko nga may dalang literatura sa hustong mga pinulongan. Apan sila usab kinahanglang mosaka sa hustong panahon. Ngano man?

Tukma sa Panahong mga Pagduaw ug Tukma sa Panahong Mensahe

Ang mga payunir makahimo sa pagpakigsulti lamang sa mga tripulante sa panahon sa ilang meryenda sa buntag ug hapon o sa oras sa ilang paniudto. Apan, ang kosinero dunay laing mga oras sa pagtrabaho, ug ang kapitan ug ubang mga opisyal makaplagan sa tibuok adlaw. Dugang pa ang mga payunir nahibalo nga ang mga barkong Ingles nga modunggo sa Rotterdam nagsunod sa ilang kaugalingong oras (ulahig usa ka oras sa Olandes), mao nga ang ilang mga tripulante nagapaingon pa sa kan-anan samtang ang di-Ingles nga mga tripulante mamalik na sa ilang trabaho. Dayag, alang sa usa ka payunir sa pantalan, kinahanglan ang usa ka kasaligang orasan.

Apan, ang mga tripulante ba malipay sa paggamit sa ilang libreng panahon alang sa mga panaghisgot sa Bibliya? “Sagad, nakita ko nga bukas ang ilang hunahuna sa mensahe sa Gingharian,” miingon ang 31-anyos nga si Geert. “Tingali tungod kay nakita nila mismo ang kapakyasan sa gobyerno sa tawo.” Pananglitan, gisultihan sa ubang mga marinero si Geert nga ang kamada sa sinakong bugas nga ilang gidiskarga alang sa gigutom nga mga Etiopianhon anaa pa gihapon sa mulye sa milabay ang daghang bulan sa dihang sila midunggo pag-usab, nga nianang panahona nadaot na ug gikutkot sa mga ilaga. “Dili ikahibulong nga daghang marinero ang nawad-ag paglaom sa politika,” miingon si Geert. “Busa ang saad sa Bibliya sa usa ka gobyerno alang sa tanang katawhan madanihon kanila.”

Miuyon si Peter. “Ang usa ka kapitang Aleman miingon nga pakanaogon ako sa iyang mga tripulante sa barko kon kini nahitabo pa sa napulo ka tuig sa miagi, apan ang nagakausab nga mga kahimtang sa kalibotan karong adlawa nakapukaw sa ilang interes sa tukma sa panahong mensahe sa Bibliya.” Ang usa ka kosinero sa barkong Koreano miasoy nga sa panahong ang Iran ug Iraq naggubatay, ang supertanker nga iyang gitrabahoan naigo sa usa ka raket ug nasunog sa Persian Gulf. Siya misaad nga kon siya mabuhi pa, pangitaon niya ang Diyos. Siya nabuhi. Sa dihang nahibalag siya sa ulahi sa mga payunir sa Rotterdam, buot niya nga dad-an siya sa tanang basahon sa Koreano nga pinulongan.

Ang kadaghanang mga barko magpabilin diha sa pantalan sa daghang adlaw. Kini nagtugot sa mga payunir nga makabalik sa duha, tulo, o kapin pa nga higayon aron ipadayon ang ilang panaghisgot sa Bibliya human sa mga oras sa trabaho. Apan, kon madaot ang makina sa barko, kini magpabilin sa tulo ka semana. “Dili kana maayo alang sa kompaniya,” matud pa sa usa ka mipahiyom nga payunir, “apan maayo kana alang sa among buluhaton.” Unya, gawas pa nga makapadayon sa among panaghisgot sa Bibliya, ang mga payunir usab mihikay sa pagpasundayag sa usa sa mga programang slide sa Sosyedad, “Ang Bibliya​—Usa ka Basahon Alang Niini nga Kaliwatan,” diha sa kan-anan. Ang ubang mga marinero usab motambong sa mga tigom sa daghang langyawg-pinulongang mga grupo sa mga Saksi ni Jehova sa Rotterdam. Kini magpadayon hangtod moandar na usab ang makina. Panahon na nga tiklopan ang Bibliya. Ang mga pisi nga gihigot sa barko sa pantalan tangtangon aron ang barko makalarga, ug ang barko nahanaw sa pantalan​—apan wala mahanaw sa mga hunahuna sa mga payunir.

Makapadasig nga mga Sugilanon sa Marinero

Pinaagi sa mga listahan sa mantalaan o sa publikong sistema sa kompiyuter sa nagadumala sa pantalan, ang mga payunir sa pantalan makabantay sa mga pag-abot ug sa paglarga sa mga barko nga ilang naduaw. Sa dihang ang usa niini moabot pag-usab, ang mga payunir maikagon sa pagduaw sa mga marinero aron sa pagsusi kon unsa nay nahitabo sukad sa kataposang pagduaw. Pagkamakapadasig sa mga sugilanong iasoy sa mga marinero!

Ang usa ka marinero nakahatag ug mga kopya sa librong Ikaw Mabuhing Walay Kataposan sa Paraisong Yuta ngadto sa iyang lima ka kauban human nga milawig ang iyang barko, ug unom kanila dunay pagtuon sa Bibliya. Iyang girekord usab ang kapitulo mahitungod sa pamilyahanong kinabuhi diha sa usa ka audiocassette ug gipatokar kini diha sa kan-anan aron makabenepisyo ang tanang tripulante. Sakay sa laing barko, usa ka marinero nga nakaduaw sa usa ka Kingdom Hall duol sa dunggoanan sa Antwerp nagbutang diha sa kan-anan ug usa ka karatula nga may mga pulong “Kingdom Hall sa mga Saksi ni Jehova” diha sa dagkong letra. Unya iyang gidapit ang mga tripulante sa pagtambong didto sa dihang magdumala siya ug tigom sa Bibliya. Sa dili pa kuhaon ang karatula, iyang dapiton ang mga tripulante sa sunod nga tigom. Sa mosunod nga semana, ang karatula ug ang mga tripulante nagpahimutang na usab.

Nakita usab sa mga payunir nga dili tagoon sa mga marinero ang ilang mga libro. “Sa dihang kami misulod sa kabin ni Isaac, usa ka opisyal sa radyo sa Kasadpang Aprika, kami naglisod sa pagpangitag kalingkoran,” miasoy si Meinard. “Ang mga magasin, libro, ug mga konkordansiya sa Sosyedad nagkatag​—ug binuksan.” Si Isaac usab dunay listahang giandam sa mga pangutana sa Bibliya, samtang siya nagpaabot sa pagduaw ug balik sa mga payunir.

Ang ubang mga marinero, hinunoa, dili na magpaabot nga duawon sila sa mga payunir. Usa ka gabii mibagting ang telepono ni Geert samtang siya natulog.

“Kinsa kaha kining nanawag?” bagutbot pa ni Geert samtang gikawhat ang telepono.

“Hello, ang imo kining higala!” miingon ang mahigalaong tingog.

Naningkamot si Geert sa paghinumdom kon kinsa.

“Ang imong higala sa barko,” matud pag-usab sa tingog.

“Alas tres pa sa buntag!” miingon si Geert.

“Oo, apan miingon ka nga tawga dayon ako inigdunggo pag-usab sa among barko sa Rotterdam. Aw, ania na ako!” Wala magdugay, si Geert mipaingon na sa pagtagbo niini nga higala nga interesado sa Pulong sa Diyos.

“Isalibay ang Inyong Tinapay”

Ang pagpabili sa basahon sa Bibliya gipahayag usab diha sa mga sulat sa mga marinero ngadto sa mga payunir. Ang mosunod maoy pipila ka mga kinutlo:

‘Gisugdan ko pagbasa ang librong Ikaw Mabuhing Walay Kataposan sa Paraisong Yuta . . . Karon nasabtan ko ang daghang butang nga wala nako hisabti kaniadto. Nanghinaot ako nga makabalik pag-usab ang among barko sa Rotterdam.’​—Angelo.

‘Gibasa ko ang libro, ug nagpadala akog mga pangutana kanimo aron matubag mo kini sa imong mga sulat’​—Alberta.

‘Karon gibasa ko na ang Bibliya kada adlaw. Nalipay ako nga nahimong imong higala. Ang pagkabatog mga higala nga nagatultol kanako ngadto sa Diyos mao ang labing maayong butang nga nahitabo sa akong kinabuhi.’​—Nickey.

Ang maong makapadasig nga mga sulat nagpahinumdom sa mga payunir sa giingon sa Bibliya sa Ecclesiastes 11:1: “Isalibay ang imong mga tinapay ngadto sa katubigan, kay kini hikaplagan ra nimo tapos ang daghang mga adlaw.” Sila ilabinang nalipay sa dihang ilang masayran nga ang pipila ka marinero mibarog alang kang Jehova.

Ang Polakong marinero nga si Stanislav, pananglitan, nalipay sa iyang nakat-onan sa mga basahon sa Sosyedad. Siya nakabaton dayon ug gamay nga librarya sa literatura sa Bibliya ug, samtang naglawig pa sa dagat, iyang gitun-an ang matag usa niini. “Sa dihang nabalitaan namo siya pag-usab,” matud pa ni Meinard, “siya misulat nga siya bawtismado na.”

Si Folkert, kapitan sa barko nga nagabiyahe sa sulod ra sa nasod, unang nakadungog sa mensahe sa Gingharian sa Rotterdam. Matag duha ka bulan siya makabalik sa dunggoanan sulod sa usa ka semana ug nagtuon sa Bibliya sulod sa pito ka adlaw nga sunodsunod. Dayon, sa wala pa siya mogikan alang sa laing duha ka bulang biyahe, gihatagan siya sa mga payunir ug listahan sa direksiyon sa mga Kingdom Hall nga eskalahan sa iyang barko. Miduaw si Folkert sa maong mga tigomanan ug natandog sa mainitong pag-abiabi nga iyang nadawat. Wala magdugay, kini nga kapitan gibawtismohan ug karon nag-alagad na kang Jehova nga masiboton.

Si Mike, usa ka opisyal sa British Navy, may kontak sa mga Saksi kaniadto ug nagtuon sa Bibliya samtang naglawig sa dagat. Kas-a, sa dihang ang bapor nga iyang gitrabahoan midunggo sa Rotterdam, iyang gigamit ang iyang mapilopilo nga biseklita aron makaadtog Kingdom Hall. Siya nakadayeg sa gugma ug panaghiusa nga iyang nakita ug miingon sa iyang mga higala nga siya nakadesisyon na nga moundang sa iyang trabaho. Bisag upat ka tuig na lamang ang iyang paaboton aron madawat ang dakong pensiyon, siya nagpabilin sa iyang desisyon ug sa ulahi nabawtismohan.

Miingon si Meinard: “Ang kadasig ni Mike, Stanislav, Folkert, ug sa uban sa pag-alagad kang Jehova nagpalihok kanamo sa pagpadayon sa pagpangita sa mga dunggoanan sa mga marinero nga sama kanila.”

Mahimo Ka ba nga Makaambit?

Sa paglantaw ug balik sa duolan sa usa ka dekada sa pagsangyaw diha sa usa sa labing dakong mga dunggoanan sa kalibotan, ang unom ka “misyonaryo sa dunggoanan” bug-os kasingkasing miuyon​—nga ang asaynment mahagiton apan magantihon. “Human sa adlaw-adlaw nga pagsangyaw,” miingon si Meinard, “kami magbiseklitang mopauli uban ang pagbati nga ang pipila niadtong mga marinero naghulat sa among sunod nga pagduaw.”

May mga marinero ba kahang nagapaabot alang sa usa ka pagduaw diha sa dunggoanan sa inyong dapit? Tingali ang mga ansiano sa inyong kongregasyon makahimog mga kahikayan aron nga ikaw makaambit niining mahagiton apan magantihong buluhaton.

[Kahon sa panid 20]

PAG-ABOT NGADTO SA GIDILING MGA TERITORYO

Usa ka tuig nga dili pa dugay, kapin sa 2,500 ka barko gikan sa mga nasod diin gidili ang kalihokan sa mga Saksi ni Jehova midunggo diha sa Rotterdam. Ug nakita sa mga payunir sa pantalan nga kini usa ka higayon nga maabot kining mga teritoryoha sa mensahe sa Bibliya.

Diha sa usa sa unang mga barko sa Asia nga ilang giduaw, napahimutang sa mga payunir ang ilang entirong suplay sa 23 ka libro, naguol ang ubang mga marinero kay sila wala makakuhag usa ka kopya. Ang usa ka batan-ong lalaki nga nagtrabaho sa kosina sa laing barko sa Asia mas mapanagan-on. Human madawat ang usa ka libro gikan sa payunir, iyang giuli kini nga naputos sa papel nga may adres nga nakasulat niana. Nakasabot ang payunir. Peligroso kaayo alang sa maong batan-ong lalaki ang pagdala ug libro uban niya. Nianang mismong adlawa gipadala kini sa payunir ngadto sa Halayong Silangan.

Diha sa barko gikan sa Aprika mao ang usa ka marinero nga may listahan sa mga libro nga gustong mabatonan sa mga Saksi nga madala niyag balik. Sukad niadto, matag panahong mopauli ang maong marinero, ang iyang maleta punog basahon. Usa ka marinero gikan sa laing nasod sa Aprika napalaw gayod sa dihang ang payunir nga nagtuon kaniya nakatanyag lamang ug tulo ka kopya sa librong Paghimo sa Imong Pamilyahanong Kinabuhi nga Malipayon. “Diyutay ra kana!” miingon ang marinero, nga nangumpas sa iyang mga kamot sa kapalaw. “Ang mga igsoon sa amoa nagkinahanglag 1,000 ka kopya!” Alang sa iyang kaugalingong kahilwasan, gitambagan siya sa mga payunir nga magdala lamang ug 20 ka kopya sa matag panahon.

Tingali ang labing makapatandog mao ang panahon sa dihang masayod ang mga payunir nga may barkong miabot gikan sa usa ka nasod diin ang mga Saksi ginalutos tungod sa ilang pagtuo, ug daghan ang nawad-an sa ilang mga trabaho ug kabtangan. Sa dihang ilang nahibaloan nga Saksi ang mayordomo sa barko, ilang giadto ang kapitan ug nangayog permiso nga magpadalag hinabang nga ikarga sa iyang barko. Ang kapitan misugot, ug pila ka adlaw sa ulahi, usa ka gatos ka dagkong bag sa mga bisti, mga sapatos, ug ubang mga gamit nagapaingon na sa mga Saksi sa maong nasod.

[Kahon sa panid 21]

BARKO-UG-BARKO NGA PAGSANGYAW​—HUNAHUNA SA USA KA BABAYE

“Una, nagpanuko ako sa pag-uban kang Peter,” nahinumdom si Karin, ang bugtong babaye nga kauban sa mga payunir, “tungod kay nakabati akog mga estorya nga kasagaran ang mga marinero bastos ug hubog. Apan, nakaplagan ko nga ang kadaghanan matinahuron. Sagad, human nga mahibalo ang marinero nga kami magtiayon, ipagawas niya ang hulagway sa iyang asawa ug mga anak ug mosugod sa pagpakigsulti mahitungod sa iyang pamilya. Nianang paagiha, kami makapahimutang ug daghang kopya sa librong Paghimo sa Imong Pamilyahanong Kinabuhi nga Malipayon.”

Ang pagduaw sa mga barko ingong bana ug asawa usab nakapasayon sa pagkontak sa mga asawa sa mga tripulante ug ubang mga babaye nga usahay nagtrabaho ingong mga nars. “Kasagaran sila maulawon sa mga estranghero,” miingon si Karin, “apan sa dihang makita nila ako, gusto silang makig-estorya.”

Unsa ang labing dakong hagit diha sa iyang asaynment? “Ang pising mga hagdanan,” mitubag si Karin. “Maglagot gayod ko niana.” Nabuntog ba niya ang iyang kahadlok? “Oo. Kas-a sa dihang ako nagpanuko sa pagkatkat niana, ang grupo sa mga marinero gikan sa Paraguay mitan-aw kanako ug misinggit: ‘Mahimo mo kana. Salig lamang sa Diyos.’ Siyempre,” matud ni Karin nga mipahiyom, “human niadto, wala akoy kapilian gawas sa pagsaka.” Miingon ang iyang midayeg nga bana: “Upat ka tuig nga milabay ug daghang pising mga hagdanang nakatkat, siya makasaka na samag usa ka marinero.”

Si Karin ug iyang bana, nga si Peter, mitungha sa ika-89 nga klase sa Watchtower Bible School of Gilead sa Tinipong Bansa. Niadtong Septiyembre 28, 1990, sila migikan alang sa ilang bag-ong asaynment, sa Ecuador, usa ka nasod nga dunay pantalan. Sila mibati nga sama rag anaa sa kaugalingong nasod.

[Kahon sa panid 22]

IKAW BA USA KA MARINERO?

Buot ba nimong motambong sa usa ka Ingles-ug-pinulongang tigom sa mga Saksi ni Jehova samtang gipundo ang inyong barko diha sa usa sa labing dakong pantalan sa kalibotan? Nan tipigi kining listahan karon sa mga adres sa Kingdom Hall ug sa oras sa mga tigom:

Hamburg, Schellingstr. 7-9; Sabado, 4:00 s.h.; telepono: 040-4208413

Hongkong, 26 Leighton Road; Dominggo, 9:00 s.b.; telepono: 5774159

Le Havre, 65 rue de Trouville; Dominggo, 2:30 s.h.; telepono: 35 44 54 27

Marseilles, 5 Bis, rue Antoine Maille; Dominggo, 10:00 s.b.; telepono: 91 79 27 89

Naples, Castel Volturno (40 km amihanan sa Naples), Via Napoli, corner of Via Salerno, Parco Campania; Dominggo, 2:45 s.h.; telepono: 081/5097292

New York, 512 W. 20 Street; Dominggo, 10:00 s.b.; telepono: 212 627-2873

Rotterdam, Putsestraat 20; Dominggo, 10:00 s.b.; telepono: 010-41 65 653

Tokyo, 5-5-8 Mita, Minato-ku; Dominggo, 4:00 s.h.; telepono: 03-3453-0404

Vancouver, 1526 Robson Street; Dominggo, 10:00 s.b.; telepono: 604-689-9796