Ang Kaluoy ni Jehova Nagaluwas Kanato Gikan sa Kawalay Paglaom
“Maluoy ka kanako, Oh Diyos, sumala sa imong mahigugmaong-kalulot. Sumala sa kadagaya sa imong kaluoy palaa ang akong mga kalapasan.”—SALMO 51:1.
1, 2. Sa unsang paagi ang usa sa mga alagad ni Jehova maapektohan sa grabeng sala?
ANG kasugoan ni Jehova dili mahimong malapas nga walay silot. Pagkatinuod niini kon kita makahimog usa ka mabug-at nga sala batok sa Diyos! Bisan tuod nakaalagad na kita kang Jehova nga matinumanon sa daghang tuig, ang paglapas sa iyang kasugoan mahimong mopahinabog dakong kabalaka ug grabe nga kaguol. Tingali bation nato nga gibiyaan na kita ni Jehova ug nga kita dili na takos sa pag-alagad kaniya. Ang atong sala daw sama sa usa ka baga nga panganod nga nagtabon sa kahayag sa pag-uyon sa Diyos.
2 Nakita ni Haring David sa karaang Israel kas-a ang iyang kaugalingon sa maong kahimtang. Sa unsang paagi miugmad kining kahimtanga?
Sayop nga mga Lakang Motultol sa Dako nga Sala
3, 4. Unsay nahitabo kang Haring David sa yugto sa kauswagan?
3 Gihigugma ni David ang Diyos apan mihimog sayop nga mga lakang nga misangpot sa grabe nga mga sala. (Itandi ang Galacia 6:1.) Kini mahimong mahitabo ngadto kang bisan kinsang dili-hingpit nga tawo, ilabina kon siya may awtoridad ibabaw sa uban. Ingong usa ka mauswagong hari, gitagamtam ni David ang dungog ug gahom. Kinsay makapangahas sa paghagit sa iyang pulong? Ang mga tawong may katakos andam kanunay sa pag-alagad kaniya, ug ang mga tawo maikagon sa pagbuhat sa bisan unsay iyang ihangyo kanila nga buhaton. Bisan pa, nakasala si David tungod sa pagbaton ug daghang asawa alang sa iyang kaugalingon ug sa pag-ihap sa katawhan.—Deuteronomio 17:14-20; 1 Cronicas 21:1.
4 Niining yugtoa sa materyal nga kauswagan, si David nakahimog seryosong mga sala batok sa Diyos ug sa tawo. Gani, usa ka sala mitultol ug laing sala sama sa nagsalapid nga mga hilo sa usa ka panapton nga gilaraw ni Satanas! Samtang nakiggubat ang kaubang mga Israelinhon sa mga Amonhanon, gikan sa atop sa iyang balay nakita ni David ang matahom nga asawa ni Uria, si Bath-sheba, nga naligo. Samtang si Uria nakiggubat, nagpasugo ang hari sa pagdala sa babaye ngadto sa iyang palasyo ug nanapaw uban kaniya. Handurawa ang iyang kakurat sa dihang nahibaloan sa ulahi nga nagsabak siya! Gipakuha ni David si Uria, naglaom nga makigdulog siya kang Bath-sheba sa gabii ug isipon ang anak nga iyaha. Bisan pa nga gihubog siya ni David, mibalibad si Uria sa pagdulog kang Bath-sheba. Karon kay nawad-ag-paglaom, gipadalhan ni David ang komander nga si Joab ug sekretong sugo sa pagbutang kang Uria sa atubangan sa panggubatan diin siya seguradong mamatay. Si Uria namatay sa gubat, nagbangotan ang iyang nabalo nga asawa sama sa nabatasan, ug giminyoan ni David si Bath-sheba samtang wala pay tawong nakamatikod sa iyang pagsabak.—2 Samuel 11:1-27.
5. Unsay nahitabo human nga nakasala si David kang Bath-sheba, ug unsay epekto diha kaniya sa iyang mga sala?
5 Pinaagi ni propetang Nathan, giyagyag sa Diyos ang mga sala ni David ug miingon: “Ako magpadalag katalagman batok kanimo gikan sa imong kaugalingong panimalay.” Tungod niana, ang anak nga natawo kang Bath-sheba namatay. (2 Samuel 12:1-23) Gilugos sa kamagulangang anak ni David, si Amnon, ang iyang igsoon sa amahan nga si Tamar ug siya gipatay sa igsoon ni Tamar. (2 Samuel 13:1-33) Ang anak nga lalaki sa hari nga si Absalom misulay sa pag-ilog sa trono ug gipakaulawan ang iyang amahan pinaagi sa pagpakigsekso sa mga puyopuyo ni David. (2 Samuel 15:1–16:22) Natapos ang sibil nga gubat sa dihang namatay si Absalom ug dugang kasubo alang kang David. (2 Samuel 18:1-33) Hinunoa, ang mga sala ni David nagpaubos kaniya ug nagpaamgo kaniya sa panginahanglan sa pagpabiling suod sa iyang mahangawaon nga Diyos. Kon kita makasala, mapainubsanong maghinulsol kita ug magpasuod kang Jehova.—Itandi ang Santiago 4:8.
6. Nganong sad-an kaayo si Haring David?
6 Ilabinang sad-an si David tungod kay usa siya ka Israelinhong magmamando nga bug-os nahibalo sa Kasugoan ni Jehova. (Deuteronomio 17:18-20) Dili siya usa ka paraon sa Ehipto o usa ka hari sa Babilonya nga kulang nianang kahibaloa ug tingali naanad na sa paghimog mga butang nga supak sa Diyos. (Itandi ang Efeso 2:12; 4:18.) Ingong membro sa usa ka nasod nga dedikado kang Jehova, si David nahibalo nga dakong mga sala ang pagpanapaw ug pagpatay. (Exodo 20:13, 14) Ang mga Kristohanon nahibalo usab sa kasugoan sa Diyos. Sama kang David, hinunoa, makalapas ang uban niini tungod sa napanunod nga pagkamakasasala, tawhanong kahuyangan, ug sa wala-sukli nga tentasyon. Kon mahitabo man ugaling kana kang bisan kinsa kanato, dili kinahanglang magpabilin kita sa mangiob nga kahimtang nga nagapalubog sa atong espirituwal nga panan-aw ug mopabati kanato ug grabeng kawalay-paglaom.
Pagsugid sa Sala Mohatag Kahupayan
7, 8. (a) Unsay nahitabo kang David sa dihang misulay siya sa pagtago sa iyang mga sala? (b) Nganong isugid ug mohunong sa pagpakasala?
7 Kon sad-an sa grabeng mga kalapasan sa kasugoan sa Diyos, tingali kita maglisod sa pagsugid sa atong mga sala, bisan kang Jehova. Unsay mahitabo ilalom sa maong mga kahimtang? Diha sa Salmo 32, si David miadmiter: “Sa nagpakahilom ako [imbes isugid ang sala] ang akong mga bukog nagakaut-ot tungod sa akong pag-agulo sa tibuok adlaw. Kay adlaw ug gabii ang imong [kang Jehova] kamot bug-at ibabaw nako. Ang kaumog sa akong kinabuhi nawala sama sa kainit sa ting-init.” (Bersikulo 3, 4) Naningkamot sa pagtago sa iyang sala ug sa pagpugong sa sad-an nga konsensiya nakapaluya sa nahisalaag nga David. Ang kabalaka nakawalag dako sa iyang kalagsik nga nahisama siya sa usa ka kahoy nga gihampak sa hulaw nga walay kaumog nga nagahatag ug kinabuhi. Sa pagkatinuod, tingali naagoman niya ang dili maayong mga epekto sa hunahuna ug sa lawas. Bisan pa, nawad-an siyag kalipay. Kon ang si bisan kinsa kanato makaagom sa samang kahimtang, unsay angay natong buhaton?
8 Ang pagsugid sa sala ngadto sa Diyos mohatag ug kapasayloan ug kahupayan. “Gisugid ko sa kataposan ang akong sala nganha kanimo, ug wala ko tagoi ang akong kasal-anan,” miawit si David. “Miingon ako: ‘Isugid ko kang Jehova ang akong mga kalapasan.’ Ug imong gipasaylo ang kasaypanan sa akong mga sala.” (Salmo 32:5) Natugaw ka ba sa usa ka gitago nga sala? Dili ba labing maayo nga isugid ug mohunong na sa pagpakasala aron makadawat sa kaluoy sa Diyos? Nganong dili mosangpit sa mga ansiano sa kongregasyon ug mangayog espirituwal nga pagkaayo? (Proverbio 28:13; Santiago 5:13-20) Ang imong mahinulsolon nga espiritu pagailhon, ug sa ulahi ang imong Kristohanong kalipay mahibalik. “Malipayon siya kansang pagsukol gipasaylo, kansang sala gitabonan,” miingon si David. “Malipayon ang tawo kansang kalapasan wala isipa ni Jehova, ug diha sa iyang espiritu walay limbong.”—Salmo 32:1, 2.
9. Kanus-a gihimo ang Salmo 51, ug ngano?
9 Si David ug Bath-sheba may tulobagon kang Jehova nga Diyos tungod sa ilang buhat nga daotan. Bisan tuod nga mahimo silang patyon tungod sa ilang mga sala, gikaluy-an sila sa Diyos. Ilabinang maluluy-on siya kang David tungod sa pakigtugon sa Gingharian. (2 Samuel 7:11-16) Ang mahinulsolong tinamdan ni David sa iyang mga sala nga naglangkit kang Bath-sheba makita diha sa Salmo 51. Kining makapatandog nga salmo gihimo sa usa ka naghinulsol nga hari human nga gipukaw ni propetang Nathan ang iyang konsensiya sa kadako sa iyang mga kalapasan sa kasugoan sa Diyos. Dakong kaisog ang gikinahanglan ni Nathan sa pagpaila kang David sa iyang mga kasal-anan, sama nga kinahanglang magmaisogon ang Kristohanong mga ansiano aron makahimo nianang butanga karong adlawa. Inay ilimod ang sumbong ug ipapatay si Nathan, ang hari mapainubsanong misugid sa sala. (2 Samuel 12:1-14) Ang Salmo 51 nagpakita kon unsay iyang gisulti sa Diyos diha sa pag-ampo mahitungod sa talamayong mga buhat ug maayo kaayo alang sa mainampoon nga pagpamalandong, ilabina kon kita nakasala ug nangandoy sa kaluoy ni Jehova.
Kita May Tulobagon sa Diyos
10. Sa unsang paagi maeksperyensiyahan ni David ang espirituwal nga kahimsog?
10 Si David wala mangita ug pasangil sa iyang sala apan mihangyo: “Maluoy ka kanako, Oh Diyos, sumala sa imong mahigugmaong-kalulot. Sumala sa kadagaya sa imong kaluoy palaa ang akong mga kalapasan.” (Salmo 51:1) Pinaagi sa pagpakasala, milapas si David sa mga utlanan sa Kasugoan sa Diyos. Apan, may paglaom pa nga siya maulian sa iyang espirituwal nga kahimsog kon kaluy-an siya sa Diyos sumala sa Iyang mahigugmaong-kalulot, o maunongong gugma. Ang kadagaya sa nangaging mga kaluoy sa Diyos naghatag sa mahinulsolong hari ug pasikaranan sa pagtuo nga palaon sa iyang Maglalalang ang iyang mga kalapasan.
11. Unsay gisugyot sa mga halad sa Adlaw sa Pagtabon-sa-Sala, ug unsay gikinahanglan alang sa kaluwasan karon?
11 Pinaagi sa matagnaong mga landong sa mga halad sa Adlaw sa Pagtabon-sa-Sala, gipaila ni Jehova nga siya adunay paagi sa paghinlo sa mga mahinulsolon sa ilang sala. Kita karon nahibalo nga ang iyang kaluoy ug kapasayloan ihatag kanato pinasukad sa atong pagtuo sa halad lukat ni Jesu-Kristo. Kon si David, nga ang sa hunahuna lamang niya mao ang larawan ug mga landong niining mga halara, nakasalig sa mahigugmaong-kalulot ug mga kaluoy ni Jehova, mas labaw nang magpakitag pagtuo ang mga alagad sa Diyos karong adlawa sa lukat nga gitagana alang sa ilang kaluwasan!—Roma 5:8; Hebreohanon 10:1.
12. Unsay kahulogan sa pagpakasala, ug unsay gibati ni David labot sa iyang buhat nga daotan?
12 Sa nangamuyo sa Diyos, si David midugang: “Hugasi ang tanan ko nga kalapasan, ug hinloi ako sa akong sala. Kay nahibalo ako sa akong mga kalapasan, ug ang akong sala anaa kanunay sa akong atubangan.” (Salmo 51:2, 3) Ang pagpakasala maoy pagsipyat sa pagsunod sa mga sukdanan ni Jehova. Dayag nga mao kanay nahimo ni David. Bisan pa, dili siya sama sa usa ka mamumuno o usa ka mananapaw nga wala mabalaka sa iyang sala, nga naguol lamang sa iyang silot o sa posibilidad nga matakdan sa sakit. Ingong mahigugmaon ni Jehova, gidumtan ni David ang daotan. (Salmo 97:10) Siya nayugot sa iyang sala mismo ug nagtinguha nga siya bug-os hugasan sa Diyos gikan niana. Si David nahibalo gayod sa iyang mga kalapasan ug naguol kaayo nga siya nagpadaog sa iyang makasasalang pangibog. Ang iyang sala anaa kanunay sa iyang atubangan, kay ang konsensiya sa usa ka tawong mahinadlokon-sa-Diyos dili gayod magmalinawon hangtod adunay paghinulsol, pagsugid sa sala, ug kapasayloan ni Jehova.
13. Nganong nakaingon si David nga siya nakasala batok sa Diyos lamang?
13 Midawat sa iyang tulobagon kang Jehova, si David miingon: “Batok kanimo, kanimo lamang, ako nakasala, ug nabuhat ko ang daotan sa imong mga mata, aron ikaw mapamatud-ang matarong inigsulti nimo, aron dili ka masaway sa dihang maghukom ka.” (Salmo 51:4) Si David nakalapas sa mga kasugoan sa Diyos, nakapasipala sa iyang katungdanan ingong hari, ug “sa walay duhaduha wala magpakitag pagtahod kang Jehova,” nga nagladlad Kaniya sa kaulawan. (2 Samuel 12:14; Exodo 20:13, 14, 17) Ang makasasalang mga buhat ni David maoy mga kalapasan usab batok sa katilingban sa Israel ug sa mga membro sa iyang pamilya, sama nga mopahinabog kaguol o kabalaka ang usa ka bawtismadong mamumuhat ug daotan sa Kristohanong kongregasyon ug sa mga minahal. Bisag nahibalo ang mahinulsolong hari nga siya nakasala batok sa isigkatawo sama kang Uria, iyang gidawat ang usa ka mas hataas nga responsabilidad kang Jehova. (Itandi ang Genesis 39:7-9.) Si David midawat nga ang paghukom ni Jehova matarong. (Roma 3:4) Ang mga Kristohanon nga nakasala kinahanglang magbaton ug samang hunahuna.
Makapagaan nga mga Kahimtang
14. Unsang makapagaan nga kahimtang ang gihisgotan ni David?
14 Bisag wala mosulay si David sa pagpakamatarong sa iyang kaugalingon, siya miingon: “Tan-awa! Uban sa kasakit sa pagpanganak ako natawo sa kasal-anan, ug sa sala gipanamkon ako sa akong inahan.” (Salmo 51:5) Si David natawo sa kasal-anan, ug naagoman sa iyang inahan ang kasakit sa pagpanganak tungod sa napanunod nga pagkamakasasala. (Genesis 3:16; Roma 5:12) Ang iyang mga pulong wala magkahulogan nga ang hustong mga relasyon sa kaminyoon, pagsamkon, ug pagpanganak makasasala, sanglit ang Diyos man ang mitagana sa kaminyoon ug pagpanganak; ni naghisgot si David sa bisan unsang espesipikong sala sa iyang inahan. Siya gisamkon sa sala tungod kay ang iyang mga ginikanan makasasala man sama sa tanang dili-hingpit nga mga tawo.—Job 14:4.
15. Bisan pag tagdon sa Diyos ang makapagaan nga mga kahimtang, unsa ang dili angay natong buhaton?
15 Kon kita nakasala, kita makahisgot sa Diyos diha sa pag-ampo ug bisan unsang makapagaan nga mga kahimtang nga tingali nakaagak sa atong buhat nga daotan. Apan dili nato himoon ang dili-takos nga kalulot sa Diyos nga usa ka pasangil sa haluag nga paggawi o gamiton ang napanunod nga pagkamakasasala ingong salimbong sa paglingkawas gikan sa responsabilidad sa atong sala. (Judas 3, 4) Gidawat ni David ang responsabilidad sa pag-abiabi sa mahugaw nga mga hunahuna ug sa pagpadaog sa panulay. Mag-ampo kita nga dili kita itugyan sa panulay ug unya molihok nga nahiuyon sa maong pag-ampo.—Mateo 6:13.
Pangamuyo nga Mamahinlo
16. Unsang hiyas nga kahimut-an sa Diyos, ug sa unsang paagi makaapekto kana sa atong paggawi?
16 Ang mga tawo tingali maoy maayong mga indibiduwal nga debotado sa Diyos kon tan-awon, apan siya nagatan-aw sa kinailadman ug makakita kon unsa sila sa sulod. Si David miingon: “Tan-awa! Ikaw [Jehova] nagakalipay sa kamatuoran sa mga sulod nga bahin; ug hinaot nga sa akong bahin nga natago pasabton mo ako sa putli nga kaalam.” (Salmo 51:6) Si David sad-an sa kabakakan ug pagkamalipoton sa pagmaniobra sa kamatayon ni Uria ug sa pagsulay sa pagtago sa mga kamatuoran bahin sa pagsabak ni Bath-sheba. Bisan pa, siya nahibalo nga malipay ang Diyos sa kamatuoran ug sa pagkabalaan. Kini angay makaapekto sa atong paggawi sa maayo nga paagi, kay pagahukman kita ni Jehova kon kita magmaliputon. (Proverbio 3:32) Si David usab nakaamgo nga kon siya hatagan sa Diyos ug ‘pagsabot sa putli nga kaalam,’ ingong mahinulsolong hari, siya makahimo sa pagsunod sa mga sukdanan sa Diyos sa nahibilin niyang kinabuhi.
17. Unsay kahulogan sa pag-ampo nga mapahinlo pinaagi sa hisopo?
17 Sanglit nakita sa salmista ang iyang panginahanglag tabang sa Diyos aron mabuntog ang makasasalang mga kiling, siya dugang nangamuyo: “Hinaot nga hinloan mo ako sa sala pinaagi sa hisopo, aron mamahinlo ako; hinaot nga hugasan mo ako, aron labi pa akong maputi kay sa niyebe.” (Salmo 51:7) Lakip sa ubang mga butang, ang tanom nga hisopo (tingali marjoram, kun Origanum maru) ang gigamit sa seremonyas sa paghinlo sa mga tawong sanlahon kaniadto. (Levitico 14:2-7) Busa tukma nga miampo si David nga hinloan siya sa sala pinaagi sa hisopo. Ang ideya sa kaputli nalangkit usab sa iyang pangamuyo nga hugasan siya ni Jehova aron siya bug-os nga mamahinlo, mas puti pa kay sa niyebe nga walay natigom nga anuos o ubang mga hugaw. (Isaias 1:18) Kon ang bisan kinsa kanato karon nag-antos sa kasakit sa konsensiya tungod sa usa ka buhat nga daotan, magpakita kita ug pagtuo nga kon kita mahinulsolong mangayog pasaylo sa Diyos, siya makaputli ug makahinlo kanato pinasukad sa halad lukat ni Jesus.
Pangamuyo nga Mapasig-uli
18. Unsay kahimtang ni David sa wala pa siya maghinulsol ug misugid sa sala, ug sa unsang paagi ang kahibalo bahin niini mapuslanon karong adlawa?
18 Ang bisan kinsa nga Kristohanong nag-antos sa sad-an nga konsensiya makasabot sa mga pulong ni David: “Hinaot nga imo [Jehova] akong padunggon sa kalipay ug pagmaya, aron ang akong mga bukog nga imong gidugmok magmasadya.” (Salmo 51:8) Sa wala pa maghinulsol ug misugid si David sa iyang mga sala, ang iyang natugaw nga konsensiya nagpaguol kaayo kaniya. Siya wala gani malipay sa mga awit sa pagsadya ug sa pagmaya nga gipresentar sa maayong mga mag-aawit ug sa hanas nga mga musikero. Hilabihan ang gibating kasakit sa makasasalang David tungod sa pagkawala sa pag-uyon sa Diyos nga siya kaamgid sa usa ka tawo kansang mga bukog masakit nga gidugmok. Gipangandoy niya ang kapasayloan, espirituwal nga pagkaayo, ug pagkabalik sa kalipay nga iyang gitagamtam sa miagi. Ang usa ka mahinulsolong makasasala karong adlawa nagkinahanglan usab sa pasaylo ni Jehova aron mahibalik pag-usab ang iyang kalipay sa wala pa siya makahimog usa ka butang nga nakadaot sa iyang relasyon sa Diyos. Ang pagkabalik sa “kalipay sa balaang espiritu” sa usa ka tawong mahinulsolon nagpakita nga siya gipasaylo na ug gihigugma ni Jehova. (1 Tesalonica 1:6) Pagkadakong kahupayan ang igahatag niana!
19. Unsay bation ni David kon gipala sa Diyos ang tanan niyang mga kalapasan?
19 Si David dugang miampo: “Tagoa ang imong nawong gikan sa akong mga sala, ug palaa ang tanan ko nga mga kalapasan.” (Salmo 51:9) Si Jehova dili malaoman nga magtan-aw sa sala nga mauyonon. Busa, siya gihangyo sa pagtago sa iyang nawong gikan sa mga sala ni David. Ang hari usab nangamuyo nga palaon sa Diyos ang iyang mga kalapasan, panason ang iyang tanang pagkadili-matarong. Kon buhaton lamang unta kana ni Jehova! Kini makalipay sa espiritu ni David, makakuha sa kabug-at sa usa ka natugaw nga konsensiya, ug ipahibalo karon sa naghinulsol nga hari nga siya gipasaylo na sa iyang mahigugmaong Diyos.
Komosta Kon Ikaw Nakasala?
20. Unsay girekomendar alang sa kang bisan kinsang Kristohanon nga nakahimog mabug-at nga sala?
20 Ang Salmo 51 nagpaila nga ang si bisan kinsang dedikadong mga alagad ni Jehova nga nakahimog seryosong sala apan mahinulsolon masaligong makapangayo kaniya nga pakitaan sila ug kaluoy ug hinloan sila sa ilang sala. Kon usa ikaw ka Kristohanon nga nakasala sa maong paagi, nganong dili mangayo sa atong langitnong Amahan ug pasaylo diha sa mapainubsanong pag-ampo? Dawata ang imong panginahanglag tabang sa Diyos aron makabaton ug inuyonang baroganan atubangan kaniya, ug pangayo nga iyang ibalik kanimo ang imong miaging kalipay. Ang mahinulsolong mga Kristohanon masaligong makadangop kang Jehova diha sa pag-ampo nga may mga hangyong sama niini, kay “siya mopasaylo sa madagayaon gayod.” (Isaias 55:7; Salmo 103:10-14) Siyempre, makadangop ka sa mga ansiano sa kongregasyon aron sila makahatag sa gikinahanglang espirituwal nga tabang.—Santiago 5:13-15.
21. Unsay atong sunod nga tukion?
21 Ang kaluoy ni Jehova nagaluwas sa iyang katawhan gikan sa kawalay-paglaom. Apan susihon nato ang ubang kinasingkasing nga mga pangamuyo sa mahinulsolong David diha sa Salmo 51. Ang atong pagtuon mopadayag nga si Jehova dili magatamay sa usa ka gun-ob nga kasingkasing.
Unsaon Nimo Pagtubag?
◻ Unsay epekto sa seryosong sala diha sa usa sa mga alagad ni Jehova?
◻ Sa unsang paagi naapektohan si David sa dihang misulay siya sa pagtago sa iyang sala?
◻ Nganong nakaingon si David nga siya nakasala batok sa Diyos lamang?
◻ Bisan pag tagdon sa Diyos ang makapagaan nga mga kahimtang kon kita makasala, unsa ang dili angay natong buhaton?
◻ Unsay angay buhaton sa usa ka Kristohanon kon siya nakahimog mabug-at nga sala?