Kon Nganong Dili Malipayon ang Kinabuhi sa Usa ka Reklamador

ANG kalipay nahimong kawalay-paglaom sa pipila lamang ka semana. Ang panagsadya sa mga Israelinhon sa sinugdan sa ilang bag-ong-napalgang kagawasan gikan sa pagkaulipon sa Ehipto nahimong walay-hinungdang pagbagulbol bahin sa pagkaon. Sa ikaduhang bulan human nga sila migula sa Ehipto, ang bagutbotang nasod miingon nga mas maayo pang nagpabilin na lang silang ulipon kay sa malisod nga kinabuhi diha sa kamingawan. Sa misunod nga mga bulan, kining reklamador nga espiritu nakapaluya sa ilang determinasyon sa pagsunod kang Jehova ug nakadaot sa palaaboton niadtong kaliwatana sa pagsulod sa Yutang Saad.​—Exodo 16:1-3; Numeros 14:26-30.

Hinuon, ang pagreklamo dili limitado sa usa ka kaliwatan o usa ka katawhan. Kinsay dili moreklamo panagsa sa trabaho, sa pagkaon, sa klima, sa mga anak, sa mga silingan, o sa palaliton? Daw ang tawhanong pagkadili-hingpit nagpakiling sa tawo sa pagreklamo.​—Roma 5:12; Santiago 3:2.

Nganong moreklamo man kita dayon? Tingali kita nawad-ag-kadasig, nalugda, o may sakit. Ang pagreklamo tingali maoy usa ka hungawanan sa atong kahigawad, o mahimong usa kini ka dili-direktang paagi sa pag-ingon: “Mas maayo pa akong mohimo sa trabaho!” Usahay ang mga reklamo mahalingan tungod sa kabangian sa personalidad. Lain pa, adunay tinuod nga mga mulo.

Bisan unsa pa may hinungdan, sama sa gipakita sa nahaunang pananglitan sa mga Israelinhon, ang pagreklamo makadaot kon kini magpadayon. Ang tawo mahimong reklamador, magbagulbol pa bahin sa paagi sa paghimo ni Jehova sa mga butang. Nganong peligroso kaayo kini? Ug sa unsang paagi ang makataronganong mga reklamo tukmang maatiman?

Makataronganong mga Reklamo

Kon ang mulo dili seryoso, ang unang pangutanang atong ipatugbaw mao, Mahimo bang palabyon na lang nako kini diha sa gugma? Tinuod, tingali may katarongan kita sa pagreklamo batok sa usa ka tawo, tingali sa usa ka kaubang magtutuo. Tingali gitratar niya kita nga maharasharason o dili-maluloton. Bisan pa, ang pagreklamo ba sa uban bahin sa dili-maayong pagtagad mopaarang-arang sa kahimtang? Unsay girekomendar sa Bibliya nga atong isanong? Ang Colosas 3:13 nag-ingon: “Mag-inantosay ang usag usa kaninyo ug dagayang magpinasayloay ang usag usa kon aduna may reklamo ang usa batok sa usa. Maingon nga dagayang gipasaylo kamo ni Jehova, busa kamo usab.” Busa bisag may katarongan pa ang reklamo, gisugyot sa Kasulatan ang mapinasayloong tinamdan inay usa ka reklamador nga espiritu.​—Mateo 18:21, 22.

Komosta kon seryoso kaayo ang butang nga dili angay ipalabay? Tingali adunay maayong katarongan nga ipatugbaw ang reklamo. Sa dihang nakaabot kang Jehova ang may pasikaranang “pagmulo” labot sa Sodoma ug Gomorra, siya milihok aron pakiglabotan ang makauulaw nga kahimtang niadtong nagkaut-ot nga mga siyudad. (Genesis 18:20, 21) Laing makataronganong reklamo mitungha human sa Pentekostes 33 K.P. Sa dihang giapod-apod ang pagkaon sa timawang mga babayeng balo, gipalabi ang mga babayeng Hebreohanog-sinultihan. Siyempre, kini nakapukaw ug kasuko sa mga babayeng balo nga Gregog-sinultihan. Sa kataposan, ang reklamo nakaabot sa mga dalunggan sa mga apostoles, ug sila nag-organisar dayon ug usa ka pundok sa responsableng mga tawo sa pagtul-id sa suliran.​—Buhat 6:1-6.

Ang tinudlo nga Kristohanong mga ansiano karong adlawa angay nga dili usab maglanganlangan sa paghimog gikinahanglang mga lakang kon ipaabot diha kanila ang seryosong mga butang. Ang Proverbio 21:13 nag-ingon: “Bahin sa usa nga nagasap-ong sa iyang dalunggan sa pagmulo sa kabos, siya usab magamulo ra ug dili pagatubagon.” Inay ipalabay lang ang may pasikaranang reklamo, ang mga ansiano angay mamati nga mabination. Sa laing bahin, kitang tanan mahimong magtinabangay pinaagi sa pagsugid sa seryosong mga reklamo ngadto sa mga ansiano, inay isulti kini sa tanan nga mamati.

Bisan pa, ang kadaghanan kanato prangkang moadmiter nga may mga panahong moreklamo kita nga walay hinungdan tungod sa tawhanong kahuyangon. Ang duol nga pagtan-aw sa paggawi sa mga Israelinhon sa kamingawan makatabang kanato sa pagkakita sa kapeligrohan sa pagtugot sa panagsang paggumbol nga mahimong reklamador nga espiritu.

Ang Panglantaw sa Diyos sa mga Reklamador

Ang pagbagulbol sa mga Israelinhon bahin sa tagana sa pagkaon nagbutyag ug duha ka kinaiyanhong mga kapeligrohan sa pagreklamo. Una, ang pagreklamo mananakod. Ang asoy nag-ingon nga “ang tibuok katilingban sa mga anak sa Israel misugod sa pagbagulbol batok kang Moises ug Aaron sa kamingawan.” (Exodo 16:2) Malagmit, dihay pipila nga misugod sa pagreklamo bahin sa kakulang sa pagkaon, ug wala magdugay ang tanan nagreklamo.

Ikaduha, sagad pasobrahan sa reklamador ang problema. Niining kahimtanga, ang mga Israelinhon miingon nga mas maayo pa ang ilang kahimtang sa Ehipto, diin didto sila makakaog tinapay ug karne sumala sa ilang gusto. Sila nagreklamo nga sila gidala ngadto sa kamingawan aron mamatay lamang sa kagutom.​—Exodo 16:3.

Tinuod ba gayod nga grabe ang kahimtang sa mga Israelinhon? Posible nga nagkadiyutay ang ilang pagkaon, apan nakita nang daan ni Jehova kanang problemaha, ug sa tukmang panahon siya mitagana ug mana aron matagbaw ang ilang pisikal nga mga panginahanglan. Ang ilang sobrang mga reklamo nagpakitag bug-os nga kawalay pagsalig sa Diyos. Samtang didto sa Ehipto sila may pasikaranan sa pagreklamo bahin sa malisod nga mga kahimtang. (Exodo 2:23) Apan sa dihang gipagawas sila ni Jehova gikan sa pagkaulipon, sila misugod sa pagreklamo bahin sa pagkaon. Wala kadto kinahanglana nga pagbagulbol. “Ang inyong mga pagbagulbol dili batok kanamo, kondili batok kang Jehova,” si Moises mipasidaan.​—Exodo 16:8.

Kining espiritu sa pagsige ug reklamo sa mga Israelinhon nagbalikbalik. Sulod sa usa ka tuig ang mana nahimong hinungdan sa pagreklamo. (Numeros 11:4-6) Wala magdugay human niadto usa ka dili maayong taho gikan sa 10 sa 12 ka espiya sa Israel nakapukaw ug usa ka pagsinggit bahin sa giingong mga kapeligrohan nga nalangkit sa pagdaog sa Yutang Saad. Ang mga tawo naghingapin pa pinaagi sa pag-ingon: “Maayo pa hinuong nangamatay na lang kami didto sa yuta sa Ehipto, o maayo pa unta mangamatay na lang kami niining kamingawan!” (Numeros 14:2) Pagkawalay apresasyon! Dili ikahibulong, si Jehova miingon kang Moises: “Hangtod kanus-a magpakitag kawalay-pagtahod kining maong katawhan kanako, ug hangtod kanus-a nga sila dili motuo kanako?” (Numeros 14:11) Kadtong ingrato nga mga reklamador gihukman sa paglaaglaag sa kamingawan sa 40 ka tuig hangtod nga nahanaw kadtong kaliwatana.

Gipahinumdoman kita ni apostol Pablo niining pananglitana. Iyang gipasidan-an ang isigka-Kristohanon sa dili pagsundog niadtong mga Israelinhon nga nahimong mga bagulbolan, nga nangamatay lamang didto sa kamingawan. (1 Corinto 10:10, 11) Sa matin-aw, ang dili-makataronganong pagbagulbol ug ang espiritu sa pagreklamo makadaot sa atong pagtuo ug mosangpot sa pagkawala sa kahimuot ni Jehova.

Bisan pa, si Jehova mapailobon sa iyang mga alagad nga tingali sa panagsa moreklamo tungod sa makapaluya nga mga kahimtang. Sa dihang mikalagiw si Elias sa Bukid sa Horeb tungod kay gilutos sa daotang Rayna Jezebel, nagtuo gayod siya nga ang iyang buluhaton ingong propeta natapos na. Nasayop siya sa pagtuo nga siya na lamang ang nahibiling magsisimba ni Jehova sa yuta. Aron mapalig-on ang pagtuo ni Elias, gihatagan una siya sa Diyos ug usa ka pasundayag sa Iyang balaang gahom. Unya ang propeta gisultihan nga may 7,000 pa ka matinumanong mga alagad ni Jehova sa Israel ug nga daghan pa ang iyang buluhatong pagahimoon. Busa, nakalimot si Elias sa iyang mga reklamo ug mipadayon nga napasig-uli ang kalagsik. (1 Hari 19:4, 10-12, 15-18) Samtang gamiton sa Kristohanong mga ansiano ang pagsabot, sila makahimo usab sa paglipay sa mga matinumanon, tabangan sila nga makasabot sa ilang papel diha sa katumanan sa katuyoan sa Diyos.​—1 Tesalonica 5:14.

Pagbuntog sa Espiritu sa Pagreklamo

Sa unsang paagi mabuntog ang espiritu sa pagreklamo? Buweno, kadtong gipakitaan ug ebidensiya sa kadaot nga mahatag sa tabako diha sa lawas maoy usa ka gamhanang panukmod sa paghunong sa pagtabako. Sa susama, ang pagsabot kon nganong ang espiritu sa pagreklamo makadaot kaayo mopalihok kanato sa paghunong sa bisan unsang batasan sa pagreklamo.

Unsa ang kaayohang mosangpot niadtong nakabuntog sa mareklamohong espiritu? Ang usa ka hinungdanong kaayohan nga gipahimuslan niadtong naglikay sa pagreklamo mao nga sila makalantaw sa mga butang sa Kasulatanhon ug mas matumongon nga paagi. Ang reklamador panagsa rang mohunong sa pagpalandong sa problema gikan sa baroganan ni Jehova. Ang reklamador nga mga Israelinhon nakalimot nga si Jehova nga Diyos ang nagpagawas kanila gikan sa pagkaulipon ug milagrosong nagbulag sa mga tubig sa Pulang Dagat alang kanila. Ang ilang negatibong hunahuna nagpabuta kanila sa gahom sa Diyos ug nagkuha kanila sa ilang kalipay. Ingong resulta, ang ilang pagsalig kang Jehova nawagtang.

Dugang pa, ang usa ka tawo nga makahimog matumongon nga pagtimbangtimbang sa iyang problema makasabot nga ang iyang kaugalingong mga sayop ang hinungdan sa iyang mga kalisdanan. Malagmit dili na kaayo siya mohimo sa samang sayop pag-usab. Gipasidan-an ni Jeremias ang iyang isigka-Israelinhon sa dili pagreklamo sa mga kalisod nga ilang giagoman human nga nalaglag ang Jerusalem. Ang ilang pag-antos maoy direktang resulta sa ilang kaugalingong mga sala, ug kadto ang ilang gikinahanglang masabtan aron makahinulsol ug mobalik kang Jehova. (Lamentaciones 3:39, 40) Sa susama, gisaway sa tinun-ang si Judas ang “mga tawong dili-diyosnon” nga misalikway sa pagtultol ni Jehova ug “mga reklamador sa ilang kahimtang sa kinabuhi.”​—Judas 3, 4, 16.

Sama sa giingon sa maalamong Haring Solomon kas-a, “ang kasingkasing nga malipayon maoy usa ka maayong tambal, apan ang usa ka masulob-on nga espiritu nagapauga sa bukog.” (Proverbio 17:22) Ang mareklamohong espiritu mopauga sa atong emosyon ug makawala sa atong kalipay. Kini nagpabanaag ug madulomon, dili masanagong panglantaw. Apan kadtong nakakat-on sa paghunahuna ug sa pagsulti bahin sa ‘dalayegong mga butang’ adunay malipayong kasingkasing, nga mohatag pa gani kanila ug maayong pagbati.​—Filipos 4:8.

Sa walay duhaduha, ang atong mga kinabuhi mas tugob kon maoy atong tan-awon ang maayong mga hiyas sa mga tawo imbes ang ilang mga kahuyangan. Kita madasig kon atong pahimuslan ang masulayong mga kahimtang inay magbagutbot sa atong mga kakulian. Bisan ang mga pagsulay mahimong hinungdan sa kalipay kon atong lantawon kini ingong higayon sa paglig-on sa atong pagtuo ug sa paghatag ug kusog sa atong pag-antos.​—Santiago 1:2, 3.

Hinungdanon usab nga hinumdoman nga kon kita magbagulbol, dili lamang ang atong kaugalingon ang atong gidaot. Pinaagi sa pagpunay ug reklamo, basin atong mapaluya ang pagtuo sa uban. Ang dili-maayong taho sa napulo ka espiyang Israelinhon nagpahinabo sa tibuok nasod sa paglantaw sa pagdaog sa Yutang Saad ingong walay-kapuslanang paningkamot. (Numeros 13:25–​14:4) Sa laing okasyon, nawad-ag kadasig si Moises tungod sa pagsige sa katawhan ug pagbagulbol nga tungod niana siya nakahangyo kang Jehova sa pagkuha sa iyang kinabuhi. (Numeros 11:4, 13-15) Sa laing bahin, kon magsultihay kita ug mga butang sa makapalig-ong paagi, basin mapalig-on pa nato ang pagtuo sa uban ug makadugang sa ilang kalipay.​—Buhat 14:21, 22.

Bisan ug matental kita sa pagreklamo sa atong mga kauban sa trabaho, sa atong mga higala, sa atong pamilya, o bisan sa mga ansiano sa kongregasyon, buot ni Jehova nga ang iyang katawhan “magbaton ug mainit nga gugma sa usag usa.” Ang maong gugma mopalihok kanato sa pagtabon sa mga kalapasan sa uban imbes padakoon ang ilang mga sayop. (1 Pedro 4:8) Sa mapasalamaton, si Jehova mahinumdom nga kita abog lamang ug dili magtan-aw sa atong mga kasaypanan. (Salmo 103:13, 14; 130:3) Kon kitang tanan mosulay sa pagsundog sa iyang pananglitan, walay duhaduha nga dili na kaayo kita moreklamo.

Sa dihang mapasig-uli na unya ang katawhan sa kahingpitan, wala na unyay hinungdan sa pagreklamo bahin sa iyang kahimtang sa kinabuhi. Hangtod moabot kanang panahona, kinahanglang atong suklan ang tentasyon sa pagreklamo bahin sa uban o sa atong malisod nga mga kahimtang. Sa pagpakita nga may pagsalig kita kang Jehova ug tinuod nga nahigugma sa atong isigkamagtutuo, pasagding “magpadayon kita sa pagbuhat sa tanang butang nga walay mga pagbagulbol.” (Filipos 2:14) Kini makahatag ug kalipay kang Jehova ug kita makabenepisyo ug dako. Nan, alang sa atong kaayohan ug sa uban, dili nato kalimtan nga dili malipayon ang kinabuhi sa usa ka reklamador.

[Hulagway sa panid 20]

Bisan ang milagrosong tagana sa Diyos nga mana nahimong hinungdan sa pagreklamo