Pagkaplag ug Lahi nga Matang sa Bahamas

SAMAG mga tikanganang-bato latas sa hayag nga pagkaasul nga kadagatan sa tunga sa Florida ug sa Cuba, ang Bahamas nakadawat sa labing dakong atensiyon sa palumagian sa balita sa kalibotan sa 1992. Ngano? Tungod kay giisip sa kadaghanang mga awtoridad ang Bahamas nga mao ang gidunggoan sa makasaysayanhong panaw ni Christopher Columbus sa 1492, sa dihang nadiskobrehan niya ang mga nasod sa Amerika. Ang ika-lima ka siglo, o ika-500 nga anibersaryo, sa pagdunggo ni Columbus sa Oktubre 12 nakadani sa pagtagad sa tibuok-kalibotan.

Bisan pa, ang ika-lima ka siglo nga kadasig may mga kakulian. Nagpakigpulong diha sa ika-23 Nasodnong Komperensiya sa Itom nga mga Abogado, si John Carew (propesor sa internasyonal nga mga pagtuon) gitaho nga miingon nga si Columbus “maoy responsable sa kamatayon sa daghang molupyo sa Caribbean.”​—The Nassau Guardian.

Karong adlawa, walay usa sa 250,000 ka lumad nga populasyon sa Bahamas ang makaangkon nga kadugo sila sa malinawong mga netibo nga nahibalag ni Columbus ug gihubit ingong “mga tawong himsog, nga nindot ug mga lawas ug matahom ug mga panagway.” Unsay nahitabo niadtong maong mga taga-isla? Ang A History of the Bahamas mitubag: “Tali sa mga 1500 ug 1520 ang entirong populasyon sa Bahamas, lagmit duolan sa 20,000 ka Lucayano, gipugos pagdala” ingong mga ulipon sa pagtrabaho sa Katsilang mga minahan sa bulawan sa Hispaniola.

Nawad-ag molupyo, ang Bahamas “nadiskobrehan pag-usab” una pinaagi sa mga taga-Britanya ug sa ulahi sa dakong mga pundok sa “mga loyalista.” Ang ulahi mao ang mga tag-iyag plantasyon gikan sa mga kolonya sa Amerika. Maunongon sa Hari sa Britanya, sila mikalagiw sa gubat sa independensiya nga niadto miulbo sa kontinente. Ang kadaghanan sa mga taga-Bahamas karong adlawa maoy mga kagikan niining unang mga molupyo ug sa ilang mga ulipon. Sa dihang gihatagag kagawasan, gisagop sa kadaghanang mga ulipon ang mga ngalan sa ilang kanhing mga agalon.

Laing Matang nga Kaplag

Tino nga giisip ni Columbus ang iyang kaugalingon ingong usa ka misyonaryo. Siya gitaho nga miingon: “Gihimo ako sa Diyos nga mensahero sa bag-ong langit ug sa bag-ong yuta. . . . Iyang gipakita kanako kon asa kini makaplagan.” Bisan pa, ang kalaglagan nga misangpot nagpamatuod sa kaatbang. Ang matarong nga ‘bag-ong mga langit ug bag-ong yuta’ nga gisaad sa Diyos kinahanglang magpaabot pa sa usa ka laing matang nga kaplag.​—2 Pedro 3:13.

Sa 1926, si Edward McKenzie ug ang iyang asawa miabot didto sa mga isla sa Bahamas. Lahi sa mga magdidiskobre una pa kanila, kining yanong magtiayong taga-Jamaica miabot sa pagpangita sa mga tawong tim-os ug kasingkasing nga ilang paambiton sa bahandi. Sila ang una nga nagdala sa mga taga-Bahamas sa maayong balita sa Gingharian sa Diyos. (Mateo 13:44; 24:14) Sa ulahing bahin nianang tuiga sila giduyogan sa duha pa ka laing taga-Jamaica, si Clarence Walters ug Rachel Gregory. Sa 1928 dihay pito ka magmamantala sa Gingharian sa Bahamas. Sa upat ka tuig sila nagkugi sa pagsangyaw sa maayong balita sa mga taga-isla.

Unya miabot si E. P. Roberts, usa ka mainitong mamumulong gikan sa Trinidad. Ang iyang mga pakigpulong publiko sa popular nga mga tigomanan dakog nahimo sa pagsugpo sa bakak nga mga pagtulon-an ug daghang kasingkasing ang natandog sa kamatuoran sa Bibliya. Naglingkod diha sa nabihag nga mamiminaw sa usa niadtong mga tigoma mao si Donald Oscar Murray, nga sa ulahi mabinationg gianggaag D. O. Siya sa kataposan ang midumala sa buluhaton.

Ang misyonerang si Nancy Porter nahinumdom pa sa gisulti ni D. O. Murray bahin sa iyang kinasingkasing nga mga pag-ampo sa pagpangayog tabang alang sa buluhatong pagsangyaw. Sa 1947, si Nancy ug ang iyang bana, si George, uban sa duha pa, nahimong unang mga misyonaryo nga gipadala ngadto sa Bahamas sa Watch Tower Society. Siya nahinumdom: “Ang unang miting nga among natambongan dili ko gayod makalimtan. Mga siyam o napulo ang mitambong. Si Igsoong Murray mao ang tsirman ug gibuksan kini sa pag-ampo, gipasalamatan si Jehova sa mga misyonaryo nga miabot. Ang tabang gikinahanglan, siya miingon, ug ‘dugay na kaming nangayog tabang diha sa pag-ampo.’ Ang Society misaad nga magpadala ug tabang, ug karon ania kami dinhi. Ang pag-ampo makapatandog kaayo nga kini mipabati kanamong kami buot nga magpabilin ug dili gustong mobiya.” Karon, mga 45 ka tuig sa ulahi ug bisan pa sa kamatayon sa iyang bana, si Sister Porter nagadala gihapon sa makahatag ug kalipay nga mensahe sa Gingharian sa mga taga-isla.

Ilabina sukad sa 1947 nga nakabatog dakong kaayohan ang buluhatong pagsangyaw-sa-Gingharian sa Bahamas gikan sa bug-os panahong mga ministro ug sa uban usab nga nakaduaw sa mga isla sakay sa sakayan. Kasagaran monabigar sila sa peligrosong mga piliw ug sa nagabaludbalod nga kamabawan ug unya moubog pabaybay aron sa pagdala sa maayong balita ngadto sa hilit nga kabalayan. Kadtong unang mga paningkamot nagapamunga gihapon bisan hangtod karon.

Usa ka hinungdanong hitabo ang nahimo sa 1950. Sa Disyembre nianang tuiga, si Nathan H. Knorr, ang presidente sa maong panahon sa Watch Tower Society, ug ang iyang sekretaryo, si Milton G. Henschel, miduaw sa Bahamas sa unang higayon. Si Knorr mipakigpulong sa 312 ka tawong naghuot didto sa Mother’s Club Hall, usa ka gamay nga kahoyng tinukod diha sa Jail Alley. Ubay-ubayng mga tawong ilado ang mitambong, lakip na ang usa ka membro sa parlamento ug ang editor sa usa ka peryodiko. Niadtong gabhiona, gipahibalo ni Igsoong Knorr ang pagtukod ug usa ka sangang buhatan sa Society sa Bahamas.

Mahigalaong Pagsanong samga Islahanon

Ang mahigalaong mga tawo sa Bahamas sa katibuk-an mapatalinghogon sa mensahe sa Gingharian. Apan, usa ka hagit ang pag-abot sa tanan kanila. Ngano? Buweno, bisag ang kadaghanan sa mga tawo nagpuyo sa kaulohan, sa Nassau, ug diha sa kasikbit nga Grand Bahama, ang uban nagkatibulaag diha sa tanang 15 ka mas dagkong mga isla ug sa duolan sa 700 ka gagmayng isla ug mga pulo nga katakotan nga naglangkob niining grupoha sa isla.

Kay nakakita sa panginahanglan, ang nagauswag nga gidaghanon sa lokal nga mga Saksi ug daghan pa gikan sa laing dapit ang mibalhin ngadto sa mga komunidad sa gagmayng isla sa pagtabang sa buluhatong pagsangyaw. Sa pagkadalayegon, gibuhat nila kana nga may dakong pagsakripisyo ug gasto sa ilang kaugalingon. Apan ang ilang mga paningkamot tugob nga gigantihan.

Usa ka batan-ong magtiayon mibalhin ngadto sa dakong isla sa Andros. Nagsangyaw sa balay ug balay sa usa ka adlaw niana, sila nakahibalag ug usa ka lalin gikan sa Haiti. Libolibo niining mga tawhana nagpuyo sa Bahamas. Ang tawo miuyon dayon sa pagtuon sa Bibliya sa balay. Dihay usa nga gisugdan dayon niadtong gabhiona mismo, gigamit ang Ingles ug Pranses nga mga kopya sa librong Ikaw Mabuhing Walay Kataposan sa Paraiso sa Yuta. Sa pagkasunod gabii, siya mitambong sa iyang unang Kristohanong tigom. Wala magdugay, ang tawo mihunong sa pagtabako, mihimog kusog nga pag-uswag, ug misugod sa pagpakig-ambit diha sa buluhatong pagsangyaw.

Sa buntag sa adlaw nga kining tawhana bawtismohan, siya nakadawat ug teyp gikan sa iyang pamilya sa Haiti, bisag wala na siya makadungog kanila sulod sa lima ka tuig. Unsay ilang giingon? Ilang gisaysay kon sa unsang paagi sila nahimong mga Saksi ni Jehova. Sila miingon nga ang iyang igsoong babaye usa na ka regular payunir, o bug-os panahong magwawali, ug ilang gitambagan siya sa pagpangita sa mga Saksi ug magtuon ug Bibliya uban kanila. Bisag dili na isulti pa, ang tawo gibawtismohan niadtong adlawa nga may bug-os nga pagsalig nga siya nagbuhat sa hustong butang.

Ang madasigong mga pagsanong nga sama niini nakapainit sa mga kasingkasing sa lokal nga mga Saksi. Ang nagadugang kanunay nga gidaghanon kanila nakigbahin sa buluhaton sa bug-os panahong mga ebanghelisador, ug kini nakaamot sa pag-uswag. Busa sa 1988 ang gidaghanon sa mga magmamantala sa Gingharian sa Bahamas nakaabot ug 1,000. Karong adlawa, diha sa 19 ka kongregasyon, adunay duolan sa 1,300 ka magmamantala sa Gingharian, halos sa tanang dagkong mga isla.

Andam Alang sa Umaabot

Tungod sa ilang pag-uswag sa gidaghanon, ang mga Saksi naglisod sa pagpangitag mga pasilidad nga may igong gidak-on nga maabot nila alang sa ilang tinuig nga mga kombensiyon. Duha ka kombensiyon ang himoon diha sa laing mga isla aron maokupar ang mga tawo. Busa, ang mga plano gihimo sa pagtukod ug Assembly Hall uban sa bag-ong sangang buhatan. Ang trabaho gisugdan sa Disyembre 1989. Gatosan ka internasyonal ug lokal nga mga boluntaryo ang nagtrabaho sa proyekto sa “bug-os kalag ngadto kang Jehova.”​—Colosas 3:23.

Walay duhaduha, ang labing dako ug labing malipayong panagkatigom sa mga Saksi sa Bahamas sukad nahitabo sa dihang gipahinungod ang bag-ong sangang buhatan ug ang Assembly Hall sa Pebrero 8 ug 9, 1992. Misamot ang kahinam samtang ang mga igsoon sa tanang bahin sa mga isla nangandam alang sa maong okasyon. Ang klima sa pagkatalagsaon bugnaw, ug miulan sa gabii una pa ang programa sa dedikasyon. Apan walay makakuha sa kalipay sa malipayong panon sa 2,714 samtang si John E. Barr, membro sa Nagamandong Lawas sa mga Saksi ni Jehova, mihatag ug pakigpulong sa dedikasyon, nga nag-ulohang “Ang Awit sa Pag-uswag sa Teokrasiya.”

Ang mga kasingkasing tugob sa pagpasalamat sa langitnong Amahan, si Jehova nga Diyos, alang sa okasyon sa kalipay ug kasadya. Ang mitambong labaw pang determinado sa pagpadapat sa ilang bug-os nga kusog alang sa buluhaton sa espirituwal nga edukasyon nga nagpahinabo sa panginahanglan sa pisikal nga pagpadako.

Kon usa ba ka dakong kausaban alang sa kaayohan niining mga islaha ang pagkaplag ni Columbus tingali padayon nga ginalantugi pa. Bisan pa, ang mga Saksi ni Jehova sa Bahamas nagakahiusa sa ilang pagpasalamat sa Diyos sa paghatag sa mga magmamantala sa Gingharian kansang espiritu sa pagsakripisyo-sa-kaugalingon nagpalihok kanila sa pagtahak sa wala-hiilhing mga lugar ug sa pagdala sa mahimayaong maayong balita ngadto sa katubigan nga kaniadto walay-alamag sa espirituwal. Ang ilang buluhaton ug “pagkaplag” miresulta sa espirituwal nga mga bahandi nga dili ikatandi alang sa tanang nagapangita sa kamatuoran sa Bahamas.

[Mapa/​Mga hulagway sa panid 24, 25]

(Alang sa aktuwal nga pagkahan-ay, tan-awa ang publikasyon)

Grand Bahama

Abaco

Andros

New Providence

Nassau

Eleuthera

Cat Island

Great Exuma

Rum Cay

San Salvador

Long Island

Crooked Island

Acklins Island

Mayaguana

Little Inagua

Great Inagua

CARIBBEAN SEA

FLORIDA

CUBA

[Mga hulagway]

Nagsangyaw diha sa Straw Market

Miubog pabaybay sa pagpakig-ambit sa maayong balita

Ang Assembly Hall bantaaw gikan sa sangang buhatan nga nahimutang sa bungtod