Kon Nganong Gikinahanglang Motambong Ka sa Kristohanong mga Tigom
SA DAGHANG bulan, si Rosario, nga nagpuyo sa Habagatang Amerika, nalipay sa pagtuon sa Bibliya uban kang Elizabeth. Naikag kaayo si Rosario sa pagkakat-on bahin sa Gingharian sa Diyos ug kon sa unsang paagi ipatungha niini ang Paraiso nga mga kahimtang sa yuta. Apan, sa dihang dapiton siya ni Elizabeth sa pagtambong sa mga tigom sa Kingdom Hall, siya mobalibad. Gibati niya nga siya makatuon sa Bibliya sa balay ug makapadapat sa gipamulong niini, nga dili na kinahanglang motambong pa sa mga tigom sa kongregasyon. Nahibulong ka ba usab kon ang Kristohanong mga tigom mohatag ba gayod kanimo ug kaayohan? Nganong gihikay sa Diyos nga magtigom ang iyang katawhan?
Sanglit ang mga Kristohanon sa unang siglo lahi kaayo sa mga tawo sa ilang palibot, ang hustong pag-ubanay hinungdanon alang sa ilang pagpadayong-buhi. Gisulatan ni apostol Pablo ang usa ka kongregasyon sa unang mga Kristohanon: ‘Kamo nahimong walay-ikasaway ug putli taliwala sa daotan ug hiwi nga kaliwatan, nga sa taliwala nila kamo nagasidlak ingon nga mga kahayag sa kalibotan.’ (Filipos 2:15) Ang mga Kristohanon naglisod sa Judea, ug ngadto kanila nga si Pablo misulat: “Mamalandong kita alang sa pagdinasigay sa usag usa sa paghigugma ug sa maayong binuhatan, sa dili pagbiya sa atong panagtigom, ingon sa gibuhat sa uban, hinunoa sa pagdasig sa usag usa, ug labi na gayod sa makita ninyo nga ang adlaw nagakahiduol na.” (Hebreohanon 10:24, 25) Sa unsang paagi madasig nato ang usag usa sa paghigugma ug sa maayong binuhatan pinaagi sa pagpakigtigom?
Kon sa Unsang Paagi “Mabaid” sa mga Kristohanon ang Usag Usa
Ang Gregong pulong nga gigamit ni Pablo ug gihubad nga “pagdasig” sa literal nagkahulogang “pagbaid.” Gibatbat sa usa ka sanglitanan sa Bibliya kon sa unsang paagi “mabaid” sa mga Kristohanon ang usag usa sa dihang kini miingon: “Ang puthaw makabaid sa puthaw. Ingon man mabaid sa usa ka tawo ang panagway sa uban.” (Proverbio 27:17; Ecclesiastes 10:10) Kita samag mga instrumento nga kinahanglag regular nga bairon. Sanglit ang pagpahayag ug gugma kang Jehova ug paghimog mga desisyon pinasukad sa atong pagtuo nagkahulogan sa pagkahimong lahi gikan sa kalibotan, kita kinahanglang mosubay ug lahi nga dalan kanunay, pagaingnon pa, gikan sa dalan sa kadaghanan.
Ang pagpaningkamot kanunay nga malahi makahabol sa atong kasibot sa maayong binuhatan. Apan kon kita mahiuban sa mga tawong nahigugma kang Jehova, kita nagabaid sa usag usa—kita nagadasig sa usag usa sa paghigugma ug sa maayong binuhatan. Sa laing bahin, kon kita mag-inusara, mokiling kita sa pagtagad ra sa atong kaugalingon. Ang imoral, hakog, o binuang nga mga ideya mahimong mosulod sa atong mga hunahuna. “Kadtong nagalain sa iyang kaugalingon nagapangita sa iyang kaugalingong hakog nga tinguha; ug mosupak sa tanang praktikal nga kaalam.” (Proverbio 18:1) Maoy hinungdan nga misulat si Pablo sa kongregasyon sa siyudad sa Tesalonica: “Padayon kamo sa pagdinasigay sa usag usa ug paglig-onay sa usag usa, sama sa inyo nang ginabuhat.”—1 Tesalonica 5:11.
Sa dihang natapos ni Rosario ang iyang pagtuon sa paninugdang mga pagtulon-an sa Bibliya, siya nagdumili gihapon sa pagpakig-uban sa kongregasyon. Busa, kay wala makahatag ug dugang tabang, mihunong si Elizabeth sa pagduaw kaniya. Pipila ka bulan sa ulahi usa ka magtatan-aw sa sirkito miduaw kang Rosario ug nangutana: “Bisan kon ang matag usa ka membro sa pamilya makakaon ug lamiang pagkaon sa gawas, unsay dili mapahimuslan sa tanang membro kon dili sila makigdungan ug pangaon sa balay?” Si Rosario mitubag: “Dili nila mapahimuslan ang panag-ubanay sa pamilya.” Nakasabot siya sa punto ug misugod sa regular nga pagtambong sa mga tigom. Nakaplagan niya kining mapuslanon kaayo nga siya sukad anaa halos sa matag tigom.
Ang pagpamati sa ubang mga tawo nga nagapahayag ug pagtuo sa samang mga butang nga imong gituohan makadasig ug ingon man ang pagkakita kon sa unsang paagi ang maong pagtuo nakausab sa ilang mga kinabuhi. Nahibalo si Pablo niini gikan sa iyang kasinatian, ug siya misulat sa kongregasyon sa Roma: “Nangandoy ako sa pagpakigkita kaninyo aron makapaambit ako kaninyo ug pipila ka espirituhanong gasa nga makapalig-on kaninyo; o, sa ato pa, aron kita magdinasigay, pinaagi sa pagtuo sa usag usa, sa inyo ug sa akoa.” (Roma 1:11, 12) Sa pagkamatuod, milabay una ang katuigan sa dihang nakaduaw si Pablo sa Roma, ug dihang siya miduaw, siya usa ka binilanggo sa mga kamot sa mga Romano. Apan sa dihang iyang nakita ang mga igsoon gikan sa Roma nga mibaklay ug 60 ka kilometros gikan sa siyudad sa pagtagbo kaniya, “nagpasalamat si Pablo sa Diyos ug nadasig pag-ayo.”—Buhat 28:15.
Pagpangitag Espirituwal nga Pagkaon sa Malisod nga mga Panahon
Samtang binilanggo sa balay sa Roma, gisulatan ni Pablo ang mga Hebreohanon nga dili isalikway ang ilang panagtigom. Hinungdanon alang kanato nga iyang gidugang kining mga pulonga: “Ug labi na gayod sa makita ninyo nga ang adlaw nagakahiduol na.” (Hebreohanon 10:25) Gipakita kanunay sa mga Saksi ni Jehova gikan sa Kasulatan nga ang tuig 1914 nagtimaan sa sinugdanan sa kataposang panahon niining kalibotana ug nga “ang adlaw sa paghukom ug sa kalaglagan sa mga tawong dili-diyosnon” haduol na. (2 Pedro 3:7) Sumala sa basahon sa Bibliya sa Pinadayag, sa dihang gitambog ang Yawa gikan sa langit sa sinugdanan sa panahon sa kataposan, siya may dakong kapungot ug “nakiggubat batok sa mga nahibilin . . . nga nagabantay sa mga sugo sa Diyos ug may buluhaton sa pagpanghimatuod mahitungod kang Jesus.” (Pinadayag 12:7-17) Busa, ang pagbantay sa mga kasugoan sa Diyos mas malisod na karon; kita ilabinang nagkinahanglang makigtigom sa mga isigkamagtutuo. Ang mga tigom makatabang kanato sa pagpalig-on sa atong pagtuo ug sa atong gugma sa Diyos aron makasukol sa mga pag-ataki sa Yawa.
Ang paghigugma ug pagtuo sa Diyos dili sama sa mga tinukod nga permanente sa dihang kini matukod na. Hinunoa, kini sama sa buhing mga butang nga hinayhinayng nagatubo pinaagi sa kanunayng pagpakaon apan kana maluya ug mamatay kon dili pakan-on. Maoy hinungdan nga si Jehova nagataganag espirituwal nga pagkaon sa pagpalig-on sa iyang katawhan. Kitang tanan nagkinahanglan nianang pagkaona, apan asa nato kana madawat gawas sa organisasyon sa Diyos ug sa mga tigom niini? Wala nay lain pang dapit.—Deuteronomio 32:2; Mateo 4:4; 5:3.
Nagpatugbaw si Jesus ug pangutana nga makatabang kanato sa pagkakita kon sa unsang paagi ginapakaon niya ang Kristohanong kongregasyon. Siya nangutana: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga panimalay, sa paghatag kanila sa ilang pagkaon sa hustong panahon? Malipayon kadtong ulipona nga mahiabtan sa iyang agalon nga nagabuhat sa ingon.” (Mateo 24:45, 46) Kinsay gitudlo ni Jesus sa unang siglo sa pagpakaon sa iyang mga sumusunod, ug kinsay iyang nakitang matinumanong nagapakaon kanila sa iyang pag-abot gikan sa paggahom sa Gingharian? Dayag, walay tawong nabuhi latas sa maong mga siglo. Ang ebidensiya nagpunting ngadto sa ulipon ingong ang kongregasyon sa dinihogan-sa-espiritu nga mga Kristohanon, sama nga ang nasod sa Israel maoy alagad sa Diyos sa una-Kristohanong mga panahon. (Isaias 43:10) Oo, si Jesus nagatagana sa atong espirituwal nga pagkaon pinaagi nianang tibuok-kalibotang lawas sa dinihogan-sa-espiritu nga mga Kristohanon, nga karon maoy agianan sa espirituwal nga pagkaon pinaagi sa lokal nga mga kongregasyon sa mga Saksi ni Jehova.
Ang tagana ni Jesus nga agianan alang sa abiyo sa espirituwal nga pagkaon dugang gihubit ni apostol Pablo: “‘Sa pagsaka niya sa kahitas-an nagdala siyag mga binihag; nanghatag siya ug mga gasa nga mga lalaki.’ . . . Siya mihatag ug gasa sa pipila ingong mga apostol, sa pipila mga manalagna, sa pipila mga ebanghelista, sa pipila mga magbalantay ug mga magtutudlo, uban ang hunahuna sa pagpasibo pag-usab sa mga balaan, alang sa ministeryal nga buluhaton, alang sa paglig-on sa lawas ni Kristo, hangtod kitang tanan makakab-ot sa pagkausa sa pagtuo ug sa tukma nga kahibalo mahitungod sa Anak sa Diyos, sa bug-os nakatubo nga tawo, sa sukod sa kahimtang sa kabug-osan ni Kristo.”—Efeso 4:8, 11-13.
Sa panguna diha sa sulod sa lokal nga mga kongregasyon—sa mga tigom—nga gilig-on niining “mga gasa nga mga lalaki” ang mga igsoon. Sa Antioquia, pananglitan, “si Judas ug Silas, sanglit mga manalagna man usab sila, nagdasig sa mga igsoon uban sa daghang pakigpulong ug gilig-on sila.” (Buhat 15:32) Ang mga pakigpulong sa kuwalipikado sa espirituwal nga mga lalaki karong adlawa samang nagapalig-on sa atong pagtuo aron dili kini maluya o mahimong di-aktibo.
Tingali tinuod nga kita miuswag ug maayo tungod sa personal nga tabang sa usa ka membro sa kongregasyon bisag wala pa kita magsugod sa pagtambong sa mga tigom. Ang Bibliya nag-ingon nga adunay panahon nga ikaw “nagakinahanglan nga may motudlo kanimo sa sinugdan sa nahaunang mga butang sa balaang mga pulong sa Diyos; ug ikaw . . . nagkinahanglan ug gatas, dili sa gahing kalan-on.” (Hebreohanon 5:12) Apan ang usa dili makapabilin sa gatas nga kahimtang hangtod sa hangtod. Ang Kristohanong mga tigom nagatagana ug padayong programa sa pagtudlo sa Bibliya nga gidesinyo aron magpabilin diha kaniya ang gugma ug pagtuo sa Diyos ingon man usab sa pagtaganag mapuslanong tabang sa pagpadapat sa “tanang tambag sa Diyos.” (Buhat 20:27) Kini labaw pa kay sa “gatas.” Ang Bibliya dugang nag-ingon: “Ang gahing kalan-on iya sa mga hamtong, alang kanilang kansang salabotan nabatid pinaagi sa pagbansay sa pag-ila sa maayo gikan sa daotan.” (Hebreohanon 5:14) Diha sa mga tigom daghang ulohan ang ginahisgotan nga tingali dili bahin sa pangunang kurso sa pagtudlo sa Bibliya sa balay, sama sa bersikulo-por-bersikulo nga mga pagtuon sa hinungdanong mga tagna sa Bibliya ug sa matugkarong mga panaghisgot kon sa unsang paagi atong masundog ang Diyos diha sa atong kaugalingong mga kinabuhi.
Mga Pahinumdom ni Jehova—Samag Tingog sa Imong Likod
Pinaagi sa maong mga pagtuon sa kongregasyon, regular nga nagapahinumdom kanato si Jehova kon unsang matang sa mga tawo kinahanglan nga mahimo kita. Ang maong mga pahinumdom hinungdanon. Kon wala kini dali kitang mokiling sa kahakog, garbo, ug kadalo. Ang mga pahinumdom sa Kasulatan motabang kanato nga matagamtam ang malamposong mga relasyon sa ubang tawo ug sa Diyos mismo. “Gipalandong ko ang akong mga dalan, aron ibalik ko ang akong mga tiil ngadto sa imong mga pahinumdom,” miangkon ang magsusulat sa Salmo 119:59.
Samtang regular kita nga nagatambong sa Kristohanong mga tigom, atong masinati ang katumanan sa tagna ni Jehova pinaagi ni Isaias, nga nagaingon: “Ang imong Dakong Magtutudlo dili na motago, ug ang imong mga mata mahimong mga mata nga makakita sa imong Dakong Magtutudlo. Ug ang imong mga dalunggan makadungog ug tingog sa imong likod nga mag-ingon: “Kini mao ang dalan. Lumakaw kamo diha niana.’” Ginabantayan ni Jehova ang atong pag-uswag ug mahigugmaong nagatul-id kanato kon kita makahimog sayop nga tikang. (Isaias 30:20, 21; Galacia 6:1) Ug siya nagatagana ug labaw pang tabang kay niini.
Pagdawat sa Balaang Espiritu Pinaagi sa Kongregasyon
Pinaagi sa regular nga pagtambong sa Kristohanong mga tigom uban sa mga Saksi ni Jehova, kita mapalig-on sa balaang espiritu sa Diyos, nga anaa ibabaw sa iyang katawhan. (1 Pedro 4:14) Dugang pa, ang Kristohanong mga magtatan-aw sa kongregasyon gitudlo pinaagi sa balaang espiritu. (Buhat 20:28) Kining aktibong gahom nga gikan sa Diyos dunay gamhanang impluwensiya diha sa usa ka Kristohanon. Ang Bibliya nag-ingon: “Ang mga bunga sa balaang espiritu sa Diyos mao ang gugma, kalipay, kalinaw, hataas-nga-pailob, kalulot, pagkamaayo, pagtuo, kaaghop, pagpugong sa kaugalingon.” (Galacia 5:22, 23) Ang balaang espiritu, nga nagalihok pinaagi sa organisasyon sa Diyos, motabang usab kanato nga makabaton sa kahibulongan tin-aw nga pagsabot sa gitagana ni Jehova alang niadtong nahigugma kaniya. Human sa pagpatin-aw nga ang prominenteng mga tawo niining sistemaha sa mga butang dili makasabot sa mga katuyoan sa Diyos, si Pablo misulat: “Diha kanato nga kini gipadayag sa Diyos pinaagi sa iyang espiritu.”—1 Corinto 2:8-10.
Gawas pa sa makapalig-on sa pagtuo nga espirituwal nga pagkaon, ang kongregasyon nagataganag mga pagbansay alang niadtong buot makig-ambit sa pangunang buluhaton sa kongregasyon. Unsa man kana?
Pagbansay Gitagana Pinaagi sa Kongregasyon
Ang Kristohanong kongregasyon dili usa ka sosyal nga klab diin ang mga tawo basta malingaw lamang ug tingali magdinasigay sa usag usa sa pagkinabuhi ug mas maayong mga kinabuhi. Gisugo ni Jesus ang kongregasyon sa pagdala sa maayong balita sa Gingharian ngadto sa mga tawong nagkinabuhi diha sa espirituwal nga kangitngit. (Buhat 1:8; 1 Pedro 2:9) Sukad sa adlaw nga kini gitukod, sa Pentekostes 33 K.P., kini maoy organisasyon sa mga magwawali. (Buhat 2:4) Nakasulay ka na ba sa pagpakigsulti sa uban mahitungod sa mga katuyoan ni Jehova apan wala makakombinsi kaniya? Ang mga tigom sa kongregasyon nagataganag personal nga pagbansay bahin sa arte sa pagpanudlo. Pinaagi sa pagtuon sa mga panig-ingnan sa Bibliya, makakat-on kita sa pagkaplag ug hilisgotan nga makapaikag nga gikan niana kita mangatarongan, kon unsaon sa paggamit ang Kasulatan ingong basehanan sa makataronganong argumento, ug kon unsaon sa pagtabang sa uban nga mangatarongan pinaagi sa paggamit ug mga pangutana ug mga ilustrasyon. Ang maong kahanas motabang kanimo nga masinati ang dili-matukib nga kalipay sa pagtabang sa ubang tawo sa pagsabot sa kamatuoran sa Bibliya.
Niining gigusbat-sa-panag-away, imoral nga kalibotan, ang Kristohanong kongregasyon maoy usa ka tinuod espirituwal nga dangpanan. Bisan tuod gilangkoban kinig mga tawong dili-hingpit, kini maoy dapit sa pakigdait ug gugma. Busa, paneguroa nga mahimo kang regular nga tigtambongan sa tanang mga tigom niini ug sinatia sa imong kaugalingon ang kamatuoran sa mga pulong sa salmista: “Tan-awa! Pagkamaayo ug pagkamalipayon gayod sa mga magsoon nga magpuyo sa panaghiusa! . . . Kay didto gisugo ni Jehova ang panalangin, bisan sa kinabuhi nga walay kataposan.”—Salmo 133:1, 3.