Unsay Gikinahanglan sa Diyos Kanato?
“Ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.”—1 JUAN 5:3.
1, 2. Nganong dili ikahibulong nga ang Diyos may mga kinahanglanon alang kanilang buot mosimba kaniya nga dalawaton?
“KONTENTO na ako sa akong relihiyon!” Dili ba mao man kana ang kasagarang isulti sa mga tawo? Apan, ang tinuod, ang pangutana angay nga, “Ang ako bang relihiyon makapahimuot sa Diyos?” Oo, ang Diyos adunay mga kinahanglanon alang niadtong buot nga mosimba kaniya nga dalawaton. Makapahibulong ba kana kanato? Dili gayod. Pananglitan nanag-iya ka ug usa ka matahom nga balay, nga bag-o lamang nimong giayo ug gigastohag dako. Motugot ka ba nga bisan kinsa lang ang mopuyo didto? Siyempre dili gayod! Si bisan kinsa nga lagmit papuy-on angay nga makakab-ot sa imong mga kinahanglanon.
2 Sa susama, si Jehova nga Diyos nagtagana niining yutan-ong puy-anan alang sa tawhanong pamilya. Ubos sa pagmando sa iyang Gingharian, ang yuta sa dili madugay “ayohon”—mabag-o ngadto sa pagkahimong usa ka matahom nga paraiso. Si Jehova ang magabuhat niini. Sa iyang dakong kapildihan, gihatag niya ang iyang bugtong Anak aron maposible kini. Sa pagkatinuod, ang Diyos aduna gayoy mga kinahanglanon alang niadtong mopuyo didto!—Salmo 115:16; Mateo 6:9, 10; Juan 3:16.
3. Giunsa pagsuma ni Solomon ang mga gidahom sa Diyos kanato?
3 Unsaon nato pagkasayod kon unsay mga kinahanglanon sa Diyos? Gidasig ni Jehova ang maalamong Haring Solomon sa pagsuma kon unsay Iyang gidahom kanato. Human palandonga ang tanan niyang nakab-ot—nga naglakip sa bahandi, mga proyekto sa pagpanukod, musikal nga intereses, ug romantikong gugma—si Solomon midangat niini nga kaamgohan: “Ang kataposan sa butang, ang tanan nadungog na, mao: Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.”—Ecclesiastes 12:13.
“Ang Iyang mga Sugo Dili man Mabug-at”
4-6. (a) Unsay literal nga kahulogan sa Gregong pulong nga gihubad ug “mabug-at”? (b) Nganong makaingon kita nga ang mga sugo sa Diyos dili mabug-at?
4 “Bantayi ang iyang mga sugo.” Sa panguna, mao kana ang gidahom sa Diyos kanato. Sobra ra ba kaayo kanang iyang gipangayo? Dili gayod. Si apostol Juan nagsugilon kanato sa butang nga makapadasig kaayo bahin sa kasugoan, o mga kinahanglanon sa Diyos. Siya nagsulat: “Ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.”—1 Juan 5:3.
5 Ang Gregong pulong nga gihubad “mabug-at” sa literal nagakahulogan ug “bug-at.” Nagpunting kini sa butang nga lisod sundon o lisod tumanon. Sa Mateo 23:4, kini gigamit sa paghubit sa “bug-at nga mga luwan,” ang hinimog-tawong mga balaod o mga tradisyon, nga gisang-at sa mga eskriba ug mga Pariseo diha sa mga tawo. Nasabtan ba nimo ang diwa kon unsay gihinapos sa tigulang nga apostol Juan? Ang kasugoan sa Diyos dili bug-at nga luwan, ni lisod kaayo kini natong tumanon. (Itandi ang Deuteronomio 30:11.) Sa kasukwahi, sa dihang atong higugmaon ang Diyos, ang pagtuman sa iyang mga kinahanglanon makapalipay kanato. Nagahatag kini kanato ug hamiling kahigayonan sa pagpasundayag sa atong gugma kang Jehova.
6 Sa pagpakita sa atong gugma sa Diyos, kinahanglang masayod kita nga espesipiko sa gidahom niya kanato. Atong hisgotan karon ang lima sa mga kinahanglanon sa Diyos. Samtang kita maghisgot niini, hinumdomi ang gisulat ni Juan: ‘Ang mga sugo sa Diyos dili man mabug-at.’
Pagkuha ug Kahibalo sa Diyos
7. Diha sa unsa nagadepende ang atong kaluwasan?
7 Ang unang kinahanglanon mao ang pagkuha ug kahibalo sa Diyos. Tagda ang mga pulong ni Jesus sa Juan kapitulo 17. Kadto maoy kataposang gabii sa kinabuhi ni Jesus ingong usa ka tawo. Gigugol ni Jesus ang dakong bahin sa maong gabii sa pag-andam sa iyang mga apostol sa iyang pagbiya. Nabalaka siya bahin sa ilang kaugmaon, sa ilang walay kataposang kaugmaon. Nga nagtan-aw sa langit, siya nag-ampo alang kanila. Sa bersikulo 3, atong mabasa: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” Oo, ang ilang kaluwasan nagdepende sa ilang “pagkuha ug kahibalo” sa Diyos ug kang Kristo. Mapadapat usab kana kanato. Aron makabatog kaluwasan, angay kitang magbaton niana nga kahibalo.
8. Unsay kahulogan sa ‘pagbaton ug kahibalo’ sa Diyos?
8 Unsay kahulogan sa ‘pagbaton ug kahibalo’ sa Diyos? Ang Gregong pulong dinhi nga gihubad “pagkuha ug kahibalo” nagpasabot ug “aron mahibalo, makaila” o “aron makasabot sa bug-os.” Matikdi, usab, nga ang hubad “pagkuha ug kahibalo” nagpasabot nga kini maoy usa ka padayong proseso. Busa ang pagkuha ug kahibalo sa Diyos nagpasabot sa pagkaila kaniya nga dili taphaw apan bug-os, nga nagaugmad ug masinabotong panaghigalaay uban kaniya. Ang nagpadayong relasyon sa Diyos modalag nag-uswag nga kahibalo bahin kaniya. Kini nga proseso magpadayon sa walay kataposan, sanglit dili gayod nato mahibaloan ang tanan bahin kang Jehova.—Roma 11:33.
9. Unsay atong makat-onan bahin kang Jehova gikan sa basahon sa kalalangan?
9 Unsaon nato pagbatog kahibalo sa Diyos? Adunay duha ka basahon nga motabang kanato. Ang usa mao ang basahon sa kalalangan. Ang mga butang nga gilalang ni Jehova—may kinabuhi ug walay kinabuhi—naghatag kanatog pipila ka pagsabot kon unsang matanga siya sa persona. (Roma 1:20) Tagda ang pipila ka pananglitan. Ang dinahunog sa usa ka halangdong busay, ang linagubo sa balod panahon sa bagyo, ang maanindot nga bituonong kalangitan sa malinawong kagabhion—dili ba kining mga butanga nagtudlo kanato nga si Jehova maoy usa ka Diyos nga “kusganon sa gahom?” (Isaias 40:26) Ang batang nagkatawa samtang nagasud-ong sa usa ka itoy nga nagkawhatkawhat sa ikog niini o usa ka gamayng iring nga nagduladula sa usa ka bola nga hilo—dili ba kana nagsugyot nga si Jehova, “ang malipayong Diyos,” maayong mopakatawa? (1 Timoteo 1:11) Ang kalami sa lamiang pagkaon, ang makapahimuot nga alimyon sa kabulakan diha sa kabalilihan, ang magilakong mga bulok sa talandogong alibangbang, ang honi sa nanag-awit nga kalanggaman sa tingpamulak, ang mainitong gakos sa usa ka minahal—dili ba nato masabtan sa maong mga butang nga ang atong Maglalalang maoy usa ka Diyos sa gugma, nga buot nga kita makatagamtam sa kalipay sa kinabuhi?—1 Juan 4:8.
10, 11. (a) Unsang mga butang bahin kang Jehova ug sa iyang mga katuyoan ang dili nato makat-onan gikan sa basahon sa kalalangan? (b) Ang mga tubag sa unsang mga pangutana ang makaplagan lamang diha sa Bibliya?
10 Ugaling, limitado ang atong makat-onan bahin kang Jehova gikan sa basahon sa kalalangan. Sa pag-ilustrar: Unsay ngalan sa Diyos? Nganong iyang gilalang ang yuta ug nagbutang sa tawo diha niana? Nganong gitugotan sa Diyos ang pagkadaotan? Unsay anaa sa umaabot alang kanato? Aron matubag ang maong mga pangutana, kinahanglang modangop kita sa laing basahon nga nagpaambit sa kahibalo sa Diyos—ang Bibliya. Sa mga panid niini, gibutyag ni Jehova ang mga butang bahin sa iyang kaugalingon, lakip sa iyang ngalan, iyang personalidad, ug iyang mga katuyoan—impormasyon nga dili nato makat-onan gikan sa bisan unsang ubang tinubdan.—Exodo 34:6, 7; Salmo 83:18; Amos 3:7.
11 Sa Kasulatan, ginapaambit usab ni Jehova ang hinungdanong kahibalo labot sa ubang mga tawo nga angay natong masayran. Pananglitan, kinsa si Jesu-Kristo, ug unsa ang papel nga ginadula niya sa katumanan sa mga katuyoan ni Jehova? (Buhat 4:12) Kinsa si Satanas nga Yawa? Sa unsang paagi nga siya nagpahisalaag sa katawhan? Unsaon nato paglikay nga dili niya mapahisalaag? (1 Pedro 5:8) Ang makaluwas-kinabuhing mga tubag niini nga mga pangutana makaplagan lamang diha sa Bibliya.
12. Unsaon nimo pagpatin-aw kon nganong dili mabug-at ang pagbatog kahibalo sa Diyos ug sa iyang mga katuyoan?
12 Mabug-at ba ang pagbatog kahibalo bahin sa Diyos ug sa iyang mga katuyoan? Dili gayod! Makahinumdom ka ba sa imong gibati sa dihang una nimong nakat-onan nga ang ngalan sa Diyos mao si Jehova, nga ang iyang Gingharian mopasig-uli sa Paraiso niining yutaa, nga iyang gihatag ang iyang pinalanggang Anak ingong lukat sa atong mga sala, ingon man sa uban pang bililhong mga kamatuoran? Dili ba sama kadto sa pagtangtang sa tabil sa pagkawalay-hibangkaagan ug pagkakita sa mga butang nga tin-aw sa unang higayon? Ang pagbatog kahibalo sa Diyos dili mabug-at. Usa kini ka kalipay!—Salmo 1:1-3; 119:97.
Pagkab-ot sa mga Sukdanan sa Diyos
13, 14. (a) Samtang magbaton kitag kahibalo sa Diyos, unsang mga kausaban ang kinahanglang buhaton nato sa atong mga kinabuhi? (b) Gibaod sa Diyos nga kinahanglang likayan nato ang unsang mahugaw nga mga buhat?
13 Samtang kita magbatog kahibalo sa Diyos, atong mahibaloan sa dili madugay nga kita kinahanglang maghimog mga kausaban sa atong mga kinabuhi. Kini modala kanato ngadto sa ikaduhang kinahanglanon. Kita kinahanglang makakab-ot sa mga sukdanan sa Diyos sa hustong paggawi ug modawat sa iyang kamatuoran. Unsa ang kamatuoran? Hinungdanon ba gayod sa Diyos kon unsay atong gituohan ug kon unsay atong gibuhat? Dayag daghang tawo karong adlawa ang wala maghunahuna niana. Usa ka taho nga gipatik sa Church of England niadtong 1995 nag-ingon nga ang pag-ipon ug puyo nga walay kasal angayng dili lantawon nga sala. “Ang mga pulong ‘pagkinabuhi sa sala’ magpakaulaw ug dili makatabang,” nag-ingon ang usa ka obispo sa simbahan.
14 Kon mao, ang “pagkinabuhi sa sala” dili na ba sala? Tin-aw kaayong gisulti ni Jehova kanato kon unsay iyang bation sa maong paggawi. Ang iyang Pulong, ang Bibliya, nag-ingon: “Himoang dungganon ang kaminyoon taliwala sa tanan, ug ang higdaanan sa kaminyoon nga walay kahugawan, kay hukman sa Diyos ang mga makihilawason ug ang mga mananapaw.” (Hebreohanon 13:4) Ang sekso sa dili pa ang kasal tingalig dili usa ka sala sa panglantaw sa matinugotong mga klerigo ug mga magsisimba, apan usa kini ka seryosong sala sa mga mata sa Diyos! Ug ingon man ang panapaw, insesto, ug homoseksuwalidad. (Levitico 18:6; 1 Corinto 6:9, 10) Ang Diyos nagbaod nga likayan nato ang maong mga buhat, nga ginalantaw niya nga mahugaw.
15. Sa unsang paagi nalangkit sa mga kinahanglanon sa Diyos ang atong paagi sa pagtagad sa uban ug ang atong ginatuohan?
15 Apan, dili pa igo nga maglikay sa mga buhat nga ginalantaw sa Diyos nga sala. Ang mga kinahanglanon sa Diyos naglangkit usab sa paagi sa atong pagtagad sa uban. Sa pamilya, gidahom niya nga ang bana ug asawa may gugma ug pagtahod sa usag usa. Gibaod sa Diyos nga ang mga ginikanan magtagana sa materyal, espirituwal, ug emosyonal nga mga panginahanglan sa ilang mga anak. Siya nagbaod sa kabataan nga magmasinugtanon sa ilang mga ginikanan. (Proverbio 22:6; Colosas 3:18-21) Ug komosta ang bahin sa atong mga pagtulon-an? Buot ni Jehova nga Diyos nga likayan nato ang mga pagtulon-an ug mga batasan nga nagagikan sa bakak nga pagsimba o sukwahi sa tin-aw nga kamatuoran nga gitudlo sa Bibliya.—Deuteronomio 18:9-13; 2 Corinto 6:14-17.
16. Ipatin-aw kon nganong dili mabug-at ang pagkab-ot sa mga sukdanan sa Diyos sa matarong nga paggawi ug pagdawat sa iyang kamatuoran.
16 Mabug-at ba alang kanato ang pagkab-ot sa mga sukdanan sa Diyos sa matarong nga paggawi ug sa pagdawat sa iyang kamatuoran? Dili kon palandongon nato ang mga kaayohan—mga kaminyoon diin ang bana ug asawa nagkahigugmaay ug may pagsalig sa usag usa inay kay sa mga kaminyoon nga nabungkag gumikan sa pagluib; mga panimalay diin ang mga anak mobating gihigugma ug gikinahanglan sa ilang mga ginikanan inay kay sa mga pamilya nga ang mga anak mobating wala higugmaa, pinasagdan, ug wala kinahanglana; usa ka hinlong tanlag ug maayong panglawas inay kay sa mga pagbati nga sad-an ug usa ka lawas nga gidaot sa AIDS o sa ubang sakit nga napasa sa sekso. Sa pagkatinuod, ang mga kinahanglanon ni Jehova wala maghikaw kanato sa tanan natong gikinahanglan aron sa pagtagamtam sa kinabuhi!—Deuteronomio 10:12, 13.
Magpakitag Pagtahod sa Kinabuhi ug Dugo
17. Unsay panglantaw ni Jehova sa kinabuhi ug dugo?
17 Samtang ipahiuyon nimo ang imong kinabuhi sa mga sukdanan sa Diyos, modangat ka sa pag-apresyar sa pagkabililhon gayod sa kinabuhi. Atong hisgotan karon ang ikatulong kinahanglanon sa Diyos. Kita kinahanglang magpakitag pagtahod sa kinabuhi ug dugo. Ang kinabuhi sagrado alang kang Jehova. Ingon gayod niana, sanglit siya mao ang Tuboran sa kinabuhi. (Salmo 36:9) Aw, bisan ang kinabuhi sa wala pa matawong bata sa tagoangkan sa inahan niini maoy bililhon kang Jehova! (Exodo 21:22, 23) Ang dugo nagahawas sa kinabuhi. Busa, ang dugo usab maoy sagrado sa mga mata sa Diyos. (Levitico 17:14) Nan, dili ikahibulong nga magdahom ang Diyos kanato nga molantaw sa kinabuhi ug dugo sama sa iyang panglantaw.
18. Unsay gibaod kanato sa panglantaw ni Jehova sa kinabuhi ug dugo?
18 Unsay gikinahanglan sa pagtahod sa kinabuhi ug dugo kanato? Ingong mga Kristohanon, dili nato ipameligro nga wala kinahanglana ang atong mga kinabuhi tungod lamang sa pagpaukyab. Kita mahunahunaon sa kahilwasan ug busa tinoon nga ang atong mga kotse ug mga balay hilwas. (Deuteronomio 22:8) Dili kita manabako, magmama, o mogamit ug makagiyan o makaliso-sa-pangisip nga mga droga alang sa kalingawan. (2 Corinto 7:1) Tungod kay kita nagpatalinghog sa Diyos sa dihang siya nag-ingon nga ‘magpahilayo gikan sa dugo,’ dili kita motugot nga ang dugo ipasulod sa atong mga lawas. (Buhat 15:28, 29) Bisag atong gihigugma ang kinabuhi, dili kita mosulay sa pagluwas sa atong presenteng kinabuhi pinaagi sa paglapas sa balaod sa Diyos ug sa ingon ipameligro ang atong palaaboton nga walay kataposang kinabuhi!—Mateo 16:25.
19. Ipatin-aw kon sa unsang paagi makabenepisyo kita sa pagpakitag pagtahod sa kinabuhi ug dugo.
19 Mabug-at ba alang kanato ang pagtagad sa kinabuhi ug dugo ingong sagrado? Dili gayod! Hunahunaa kini. Mabug-at ba nga walay kanser sa baga gumikan sa pagpanabako? Mabug-at ba nga makalingkawas sa pagkagiyan sa hunahuna ug lawas gumikan sa makadaot nga mga droga? Mabug-at ba nga dili matakboyan ug AIDS, hepatitis, o uban pang sakit gumikan sa pag-abono sa dugo? Tin-aw, ang atong paglikay sa makadaot nga mga batasan ug mga buhat maoy alang sa atong kaayohan.—Isaias 48:17.
20. Sa unsang paagi nakabatog kaayohan ang usa ka pamilya nga may panglantaw sa Diyos sa kinabuhi?
20 Palandonga kini nga kasinatian. Pipila ka tuig kanhi, usa ka babayeng Saksi nga mabdos ug tulo ka bulan ug tunga gitalinug-an usa ka gabii niana ug gidali pagdala sa ospital. Human siya masusi sa doktor, nadunggan niya ang doktor nga misulti sa usa sa mga nars nga ilang kuhaon ang iyang gisabak. Kay nahibalo kon unsay panglantaw ni Jehova sa kinabuhi sa wala pa matawo, hugot siya nga midumili sa aborsiyon, nga gisultihan ang doktor: “Kon buhi pa kini, ayaw kinig hilabti!” Nagpadayon siya sa pag-antos sa pipila ka pagdugo sa matag panahon, apan pipila ka bulan sa ulahi siya ahat nga nanganak ug usa ka himsog nga batang lalaki nga karon 17 anyos na. Siya misaysay: “Gisultihan namo ang among anak niining tanan, ug siya miingon nga siya nalipay nga siya wala ilabay sa basurahan. Siya nasayod nga ang among pag-alagad kang Jehova mao lamang ang katarongan kon nganong siya buhi pa.” Sa pagkatinuod, ang pagbaton sa panglantaw sa Diyos sa kinabuhi dili bug-at niining pamilyaha!
Pag-alagad Duyog sa Organisadong Katawhan ni Jehova
21, 22. (a) Duyog kang kinsa gidahom ni Jehova nga kita mosimba kaniya? (b) Sa unsang paagi mailhan ang organisadong katawhan sa Diyos?
21 Wala kita mag-inusara sa paghimog gikinahanglang mga kausaban aron ipahiuyon ang atong mga kinabuhi sa mga sukdanan sa Diyos. Si Jehova may katawhan dinhi sa yuta, ug gidahom niya nga kita mag-alagad kaniya duyog kanila. Kini modala kanato ngadto sa ikaupat nga kinahanglanon. Kita kinahanglang moalagad kang Jehova uban sa iyang tinultolan-sa-espiritung organisasyon.
22 Apan, sa unsang paagi mailhan ang organisadong katawhan sa Diyos? Sumala sa mga sukdanan nga gipakita sa Kasulatan, sila may tinuod nga gugma sa ilang taliwala, sila may halalom nga pagtahod sa Bibliya, sila nagpasidungog sa ngalan sa Diyos, sila nagsangyaw bahin sa iyang Gingharian, ug sila dili bahin niining daotang kalibotan. (Mateo 6:9; 24:14; Juan 13:34, 35; 17:16, 17) Adunay usa lamang ka relihiyosong organisasyon niining yutaa nga nakabaton niining tanang timaan sa matuod nga Kristiyanidad—Mga Saksi ni Jehova!
23, 24. Unsaon nato pag-ilustrar nga dili mabug-at ang pag-alagad kang Jehova duyog sa iyang organisadong katawhan?
23 Mabug-at ba ang pag-alagad kang Jehova duyog sa iyang organisadong katawhan? Dili gayod! Sa kasukwahi, usa ka hamiling pribilehiyo ang pagkabaton ug gugma ug pagpaluyo sa usa ka tibuok kalibotang pamilya sa Kristohanong mga igsoong lalaki ug babaye. (1 Pedro 2:17) Handurawa nga naluwas sa pagkalunod sa barko ug naglutawlutaw ka sa tubig, nga nanlimbasog nga magpabiling naglutaw. Sa dihang gibati nimo nga dili ka na makaagwanta, usa ka kamot ang mikawhat kanimo gikan sa usa ka bote. Oo, may uban pang mga naluwas! Sulod sa bote, ikaw ug ang uban nagpulihay pagbugsay paingon sa baybayon, nga nagsakmit sa uban pang mga naluwas nga inyong naagian.
24 Dili ba ingon niana ang atong kahimtang? Gisakmit kita gikan sa makuyaw nga “katubigan” niining tuman ka daotang kalibotan ngadto sa “bote” sa yutan-ong organisasyon ni Jehova. Sulod niana, kita nagaalagad kiliran por kiliran samtang kita nagapadulong sa “baybayon” sa usa ka matarong bag-ong kalibotan. Kon ang mga pagpit-os sa kinabuhi magpaluya kanato diha sa dalan, pagkamapasalamaton nato sa tabang ug paglipay sa matuod Kristohanong mga kauban!—Proverbio 17:17.
25. (a) Unsay atong obligasyon ngadto kanilang anaa pa sa “katubigan” niining daotang kalibotan? (b) Unsang kinahanglanon sa Diyos ang pagahisgotan sa mosunod nga artikulo?
25 Komosta ang uban—ang matinud-anon-ug-kasingkasing nga mga tawo nga anaa pa sa “tubig”? Kita may obligasyon sa pagtabang kanila nga makasulod sa organisasyon ni Jehova, dili ba? (1 Timoteo 2:3, 4) Nagkinahanglan sila ug tabang sa pagkakat-on kon unsay gikinahanglan sa Diyos. Kini modala kanato ngadto sa ikalimang kinahanglanon sa Diyos. Kita kinahanglang magmaunongong mga magmamantala sa Gingharian sa Diyos. Kon unsay nalangkit niini pagahisgotan sa mosunod nga artikulo.
Makahinumdom Ka Ba?
◻ Nganong ang kasugoan sa Diyos dili mabug-at?
◻ Unsaon nato pagbatog kahibalo sa Diyos?
◻ Nganong dili mabug-at ang pagkab-ot sa mga sukdanan sa Diyos sa matarong nga paggawi ug pagdawat sa iyang kamatuoran?
◻ Unsay gibaod kanato sa panglantaw sa Diyos sa kinabuhi ug dugo?
◻ Duyog kang kinsa gidahom sa Diyos nga kita mosimba kaniya, ug sa unsang paagi sila mailhan?
[Hulagway sa panid 18]
Kita makakat-on bahin kang Jehova gikan sa basahon sa kalalangan ug gikan sa Bibliya
[Credit Lines]
Buaya: Sa maayong kabubut-on sa Australian International Public Relations; oso: Safari-Zoo of Ramat-Gan, Tel Aviv