Pangitaa ang Tinuod nga Pakigdait ug Pangagpasa Kini!
“Siya nga buot mahigugma sa kinabuhi ug makakitag maayong mga adlaw, . . . pabiyai kaniya ang daotan ug ipabuhat ang maayo; ipapangita kaniya ang pakigdait ug pangagpason kini.”—1 PEDRO 3:10, 11.
1. Unsang iladong mga pulong sa Isaias ang tinong matuman?
“ILANG pagahimoon ang ilang mga espada nga mga punta sa daro ug ang ilang mga bangkaw nga mga galab. Ang nasod dili na mobakyaw ug espada batok sa laing nasod, ni makakat-on pa sila sa gubat.” (Isaias 2:4) Bisag kining iladong teksto gipasundayag duol sa hedkuwarter sa kalibotan sa Hiniusang Kanasoran sa Siyudad sa New York, kana nga organisasyon sa kalibotan wala gayod makatuman niana. Ugaling, ingong bahin sa dili mapakyas nga pulong ni Jehova nga Diyos, kana nga pahayag dili kay walay mga resulta.—Isaias 55:10, 11.
2. Unsay kinahanglang “mahinabo sa ulahing bahin sa mga adlaw,” sumala sa Isaias 2:2, 3?
2 Ang mga pulong nga makita sa Isaias 2:4 sa pagkatinuod maoy bahin sa usa ka kahibulongang tagna, usa ka tagna bahin sa tinuod nga pakigdait—ug kini nagakatuman karon mismo sa atong kaugalingong panahon. Sa wala pa imantala ang makalilipay nga palaaboton nga wala nay mga gubat ug mga hinagiban sa gubat, ang tagna nag-ingon: “Mahinabo sa ulahing bahin sa mga adlaw nga ang bukid sa balay ni Jehova pagatukoron sa ibabaw sa tumoy sa kabukiran, ug igatuboy ibabaw sa mga bungtod; ug ngadto niini ang tanang mga nasod magaganayan. Ug daghang katawhan ang mangadto ug manag-ingon: ‘Umari, kamong katawhan, ug manungas kita sa bukid ni Jehova, ngadto sa balay sa Diyos ni Jacob; ug kita pagatudloan niya sa iyang mga dalan, ug manlakaw kita sa iyang mga alagianan.’ Kay gikan sa Sion mogula ang kasugoan, ug ang pulong ni Jehova gikan sa Jerusalem.”—Isaias 2:2, 3.
Ang mga Tawo Mahimong Makigdaiton
3. Sa unsang paagi ang usa ka tawo makabag-o gikan sa pagkamapintas ngadto sa pagkamakigdaiton?
3 Matikdi nga sa dili pa mangagpas ang mga tawo ug makigdaitong dalan, sila kinahanglang matudloan sa mga dalan ni Jehova. Ang masinugtanong pagsanong sa pagtudlo ni Jehova makapabag-o sa paagi sa panghunahuna ug panglihok sa usa ka tawo, aron nga ang usa nga niadto mapintas mahimong makigdaiton. Sa unsang paagi kini nga pagbag-o malampos? Ang Roma 12:2 nag-ingon: “Hunong na sa pagpaumol sumala niining sistemaha sa mga butang, apan mag-usab pinaagi sa pagbag-o sa inyong kaisipan, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” Mabag-o nato ang atong panghunahuna, o mapalihok kini sa lahi nga direksiyon, pinaagi sa pagpuno niini uban sa mga prinsipyo ug mga kalagdaan gikan sa Pulong sa Diyos. Ang makanunayong pagtuon sa Bibliya motabang kanato sa paghimo niini nga kausaban ug magpaarang kanato sa pagpamatuod sa atong kaugalingon kon unsa ang kabubut-on ni Jehova alang kanato, busa makita nato nga tin-aw ang dalan nga atong pagalaktan.—Salmo 119:105.
4. Sa unsang paagi ang usa makasul-ob sa makigdaiton bag-ong pagkatawo?
4 Ang kamatuoran sa Bibliya nagapabag-o dili lamang sa sumbanan sa atong panghunahuna kondili usab sa atong mga lihok ug personalidad. Motabang kini kanato nga buhaton ang giawhag ni apostol Pablo: ‘Hukasa ang daan nga pagkatawo nga nahiuyon sa kanhi ninyong paagi sa panggawi ug nga ginapadunot sumala sa iyang malimbongong mga tinguha; apan . . . magmabag-o kamo diha sa puwersa nga nagapalihok sa inyong kaisipan, ug . . . magasul-ob sa bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.’ (Efeso 4:22-24) Ang puwersa nga nagapalihok sa hunahuna maoy sulodnon. Kini mabag-o ug mahimong gamhanan samtang ang atong gugma kang Jehova ug sa iyang mga balaod modako, ug kini maghimo kanatong espirituwal ug makigdaitong mga tawo.
5. Sa unsang paagi ang “bag-ong sugo” nga gihatag ni Jesus sa iyang mga tinun-an makaamot sa pakigdait taliwala kanila?
5 Ang panginahanglan niini nga pagbag-o makita gikan sa instruksiyon nga gihatag ni Jesus sa iyang mga tinun-an sa panahon sa iyang kataposang mga takna uban kanila: “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:34, 35) Kining samag-Kristo, dili-mahakogong gugma nagbugkos sa mga tinun-an diha sa bug-os nga panaghiusa. (Colosas 3:14) Kadtong andam lamang nga modawat ug magkinabuhi niining “bag-ong sugo” ang makatagamtam sa pakigdait nga gisaad sa Diyos. Aduna bay mga tawong nagabuhat niini karong adlawa?
6. Nganong ang mga Saksi ni Jehova nagatagamtam sa pakigdait, nga sukwahi sa mga tawo sa kalibotan?
6 Ang mga Saksi ni Jehova naningkamot sa pagpakitag gugma sa ilang tibuok-yutang panag-igsoonay. Bisag sila gikan sa tanang kanasoran sa kalibotan, sila dili makigbahin sa mga kontrobersiya sa kalibotan, bisan kon sila ipailalom sa grabeng politikal ug relihiyosong pagpit-os. Ingong usa ka nahiusang katawhan, gitudloan sila ni Jehova, ug sila nagatagamtam ug pakigdait. (Isaias 54:13) Sila nagpabiling neyutral sa politikal nga mga kabingkilan, ug sila dili makigbahin sa mga gubat. Ang pipila nga kanhi mabangis nagsalikway sa maong estilo sa kinabuhi. Nahimo silang mahigugmaon-sa-pakigdait nga mga Kristohanon, nga nagsundog sa panig-ingnan ni Kristo Jesus. Ug sila sa bug-os kasingkasing nagsunod sa tambag ni Pedro: “Siya nga buot mahigugma sa kinabuhi ug makakitag maayong mga adlaw, papugngi kaniya ang iyang dila gikan sa kon unsay daotan ug ang iyang mga ngabil sa pagsultig limbong, apan pabiyai kaniya ang daotan ug ipabuhat ang maayo; ipapangita kaniya ang pakigdait ug pangagpason kini.”—1 Pedro 3:10, 11; Efeso 4:3.
Kadtong Nagapangagpas ug Pakigdait
7, 8. Paghatag ug mga pananglitan sa mga tawong mihunong sa pagpakiggubat ug nahimong mga tigpangita sa tinuod nga pakigdait. (Iasoy ang uban nga pamilyar kanimo.)
7 Pananglitan, anaa si Rami Oved, kanhi opisyal sa usa ka gibansay nga pundok batok sa mga terorista. Gibansay siya sa pagpatay sa iyang mga kaaway. Bug-os niyang gituohan ang iyang Israelinhong nasyonalismo hangtod sa adlaw nga iyang nasuta nga dili buot sa mga rabi nga iyang pakaslan ang babaye nga iyang gihigugma sanglit siya sa yano usa ka taga-Asia, usa ka Hentil. Siya misugod sa pagpangita sa kamatuoran sa Bibliya. Dayon siya nakontak sa mga Saksi ni Jehova. Ang iyang pagtuon sa Bibliya uban sa mga Saksi nagkombinsir kaniya nga dili na siya mahimong usa ka panatikong nasyonalista. Ang Kristohanong gugma nagkahulogan sa pagsalikway sa gubat ug sa mga hinagiban ug sa pagkakat-on sa paghigugma sa katawhan sa matag rasa. Pagkadako sa iyang kahingangha sa dihang nadawat niya ang usa ka malulotong sulat uban sa pangbukas nga mga pulong, “Akong Igsoong Rami”! Unsay pagkatalagsaon niana? Ang nagsulat maoy usa ka Palestinong Saksi. “Ako naghunahuna nga kadto dili katuohan,” matod pa ni Rami, “sanglit ang mga Palestino akong mga kaaway, ug ania ang usa kanila nagtawag kanako nga ‘Akong Igsoon.’” Si Rami ug ang iyang asawa karon nagapangagpas na sa tinuod nga pakigdait diha sa paagi sa Diyos.
8 Ang laing panig-ingnan mao kanang kang Georg Reuter, nga nag-alagad sa kasundalohang Aleman nga misulong sa Rusya sa panahon sa Gubat sa Kalibotan II. Wala magdugay siya naglibog sa tuman ka dakong laraw ni Hitler sa pagmando sa kalibotan. Sa dihang siya nakabalik gikan sa gubat, misugod siya sa pagtuon sa Bibliya uban sa mga Saksi ni Jehova. Siya misulat: “Sa kataposan, natin-aw na ang mga butang kanako. Akong nahibaloan nga dili mabasol ang Diyos sa tanang pag-ula sa dugo . . . Akong nakat-onan nga iyang katuyoan ang pagtukod ug usa ka tibuok-yutang paraiso uban sa walay kataposang mga panalangin alang sa masinugtanong katawhan. . . . Nanghambog si Hitler bahin sa iyang ‘Usa ka Libo ka Tuig nga Pagmando’ apan nagmando lamang sulod sa 12 [ka tuig]—ug pagkamakalilisang ang resulta! Si Kristo inay kay si Hitler . . . ang makahimo ug makatukod sa usa ka libo ka tuig nga pagmando ibabaw sa yuta.” Sulod sa mga 50 ka tuig na karon, si Georg nag-alagad ingong sinugo alang sa tinuod nga pakigdait diha sa bug-os panahong ministeryo.
9. Sa unsang paagi ang kasinatian sa mga Saksi ni Jehova sa Nazi Alemanya nagpamatuod nga sila maisogon apan makigdaiton?
9 Ang pagkamaunongon ug pagkaneyutral sa mga Saksi ni Jehova sa Alemanya sa panahon sa pagmandong Nazi nagpadayong usa ka pamatuod sa ilang gugma sa Diyos ug sa pakigdait bisan karon, kapin sa 50 ka tuig sa ulahi. Usa ka pulyeto nga gipatik sa United States Holocaust Memorial Museum sa Washington, D.C., nag-ingon: “Ang mga Saksi ni Jehova nag-antos sa grabeng paglutos ubos sa pagmandong Nazi. . . . Ang kaisog nga gipasundayag sa kinabag-an sa pagdumili [nga isalikway ang ilang relihiyon], atubangan sa pagsakit, pagdagmal sa mga kampong konsentrasyon, ug usahay pagpatay, nakahatag kanila ug pagtahod sa daghang katalirongan.” Dayon kini midugang: “Sa panahon sa liberasyon sa mga kampo, ang mga Saksi ni Jehova nagpadayon sa ilang buluhaton, nakig-uban taliwala sa mga nangaluwas, nga nagapangabig.”
Usa ka Mas Dakong Kausaban
10. (a) Unsang dakong kausaban ang gikinahanglan aron moabot ang tinuod nga pakigdait? (b) Sa unsang paagi kini gipasundayag diha sa basahong Daniel?
10 Nagpasabot ba kini nga ang mga Saksi ni Jehova nagatuo nga sila makapatunghag pakigdait sa tibuok kalibotan pinaagig dinaghang pagpangabig ngadto sa pagtuo sa Kristohanong neyutralidad? Wala! Aron mapasig-uli ang pakigdait sa yuta, usa ka mas dakong kausaban ang gikinahanglan. Unsa kana? Ang pagkabahinbahin, malupigon, ug mapintas nga pagmando sa tawo kinahanglang ihiklin aron hatagag luna ang pagmando sa Gingharian sa Diyos, nga niana si Jesus nagtudlo sa iyang mga tinun-an sa pag-ampo. (Mateo 6:9, 10) Apan sa unsang paagi mahitabo kini? Diha sa dinasig sa Diyos nga damgo, ang manalagnang Daniel nahibalo nga sa ulahing mga adlaw, ang Gingharian sa Diyos, nga sama sa usa ka dakong bato nga ‘gisapsap dili pinaagi sa mga kamot sa tawo,’ magadugmok sa usa ka higanteng larawan nga naghawas sa politikanhong mga pagmando sa katawhan ibabaw sa yuta. Unya siya miingon: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug ang gingharian mismo dili igapasa ngadto sa lain nga katawhan. Kini magadugmok ug magatapos niining tanang gingharian, ug kini molungtad sa walay kataposan.”—Daniel 2:31-44.
11. Sa unsang paagi itagana ni Jehova ang gikinahanglang kausaban alang sa pakigdait?
11 Nganong mahitabo kining dakong kausaban sa kahimtang sa kalibotan? Tungod kay si Jehova nagsaad nga iyang hinloan ang yuta gikan sa tanan niadtong kinsa nagahugaw ug nagalaglag niini. (Pinadayag 11:18) Kini nga pagbag-o mahitabo diha sa matarong nga gubat ni Jehova batok kang Satanas ug sa iyang tuman ka daotang kalibotan. Atong mabasa sa Pinadayag 16:14, 16: “Sila [sa ato pa, mahugaw dinasig nga mga pahayag], sa pagkamatuod, mga pahayag nga inspirado sa mga demonyo ug nagahimog mga ilhanan, ug sila nangadto sa mga hari [ang politikanhong mga magmamando] sa tibuok gipuy-ang yuta, aron sa pagtigom kanila ngadto sa gubat sa dakong adlaw sa Diyos nga Labing-Gamhanan. Ug ilang gitigom sila ngadto sa dapit nga gitawag sa Hebreo nga Har–Magedon.”
12. Sama sa unsa unya ang Armagedon?
12 Sama sa unsa unya ang Armagedon? Dili kini usa ka bug-os nga kalaglagan pinaagig nukleyar o usa ka katalagman nga gipahinabo sa tawo. Dili, kini maoy gubat sa Diyos sa pagtapos sa tanang gubat sa tawo ug sa paglaglag niadtong nagpasiugda sa maong mga gubat. Kini maoy gubat sa Diyos nga magpatunghag tinuod nga pakigdait alang niadtong kinsa nahigugma sa pakigdait. Oo, ang Armagedon moabot ingon sa gituyo ni Jehova. Dili kini maglangan. Ang iyang manalagna nga si Habacuc gidasig sa pagsulat: “Ang panan-awon maoy sa tinudlo pang panahon, ug kini padayong nagdali ngadto sa kataposan, ug dili kini mamakak. Bisan pag kini malangan, padayon sa pagpaabot niini; kay kini matuman gayod. Kini dili maulahi.” (Habacuc 2:3) Tungod sa atong tawhanong mga pagbati, kini mahimong daw maulahi, apan tumanon ni Jehova ang iyang eskedyul. Ang Armagedon modangat sa takna nga gitinong-daan ni Jehova.
13. Sa unsang paagi makiglabot ang Diyos sa tinuod nga tagsala, si Satanas nga Yawa?
13 Kining mahukmanong aksiyon maghatag ug higayon alang sa tinuod nga pakigdait! Apan aron lig-ong matukod ang tinuod nga pakigdait, adunay butang nga kinahanglan buhaton—ang pagwagtang sa usa nga nagpahinabog pagbahinbahin, pagdumot, ug panag-away. Ug mao gayod kana ang sunod nga mahitabo sumala sa mga tagna sa Bibliya—ang pagtambog kang Satanas, ang tigpasiugda sa gubat ug ang amahan sa mga bakak. Nakita ni apostol Juan kining hitaboa diha sa usa ka matagnaong panan-awon, ingon sa girekord sa Pinadayag 20:1-3: “Nakita ko ang usa ka anghel nga nanaog gikan sa langit uban ang yawi sa kahiladman ug usa ka dakong kadena diha sa iyang kamot. Ug iyang gidakop ang dragon, ang orihinal nga halas, kinsa mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa kahiladman ug gisirhan kini ug gitimbrehan kini sa ibabaw kaniya, aron nga dili na niya mapahisalaag pa ang kanasoran hangtod nga matapos ang usa ka libo ka tuig.”
14. Sa unsang paagi gihubit ang madaogong aksiyon ni Jehova batok kang Satanas?
14 Dili kini usa ka damgo; saad kini sa Diyos—ug ang Bibliya nag-ingon: “Imposible sa Diyos nga mamakak.” (Hebreohanon 6:18) Busa si Jehova nakaingon pinaagi sa iyang manalagna nga si Jeremias: “‘Ako mao si Jehova: ang Usa nga nagpakitag mahigugmaong-kalulot, hustisya ug pagkamatarong sa yuta; kay niining mga butanga ako nahimuot,’ nagaingon si Jehova.” (Jeremias 9:24) Si Jehova molihok sa hustisya ug pagkamatarong, ug siya mahimuot sa pakigdait nga iyang ipatungha sa yuta.
Pagmando Pinaagi sa Prinsipe sa Pakigdait
15, 16. (a) Kinsay gipili ni Jehova nga magmando ingong Hari? (b) Giunsa paghubit kana nga pagmando, ug kinsay makig-ambit niana?
15 Aron mapaneguro nga ang tinuod nga pakigdait modangat sa tanan niadtong nagpuyo ubos sa iyang Gingharian nga kahikayan, gihatag ni Jehova ang pagmando sa tinuod nga Prinsipe sa Pakigdait, si Jesu-Kristo, ingon sa gitagna sa Isaias 9:6, 7: “Adunay usa ka bata nga natawo alang kanato, adunay usa ka anak lalaki nga gihatag kanato; ug ang prinsipenhong pagmando mahipatong sa iyang abaga. Ug ang iyang ngalan pagatawgong Kahibulongang Magtatambag, Diyos nga Gamhanan, Amahan nga Walay Kataposan, Prinsipe sa Pakigdait. Sa kadagaya sa prinsipenhong pagmando ug sa pakigdait walay kataposan . . . Ang kakugi ni Jehova sa mga panon mao ang magahimo niini.” Ang salmista usab misulat nga matagnaon bahin sa malinawong pagmando sa Mesiyas: “Sa iyang mga adlaw ang matarong moturok, ug ang kadagaya sa pakigdait hangtod ang bulan mawala na.”—Salmo 72:7.
16 Dugang pa, ang 144,000 dinihogan-sa-espiritu nga mga igsoon ni Kristo magmando uban kaniya sa mga langit. Kini sila ang kaubang manununod ni Kristo kang kinsa si Pablo misulat: “Sa iyang bahin, ang Diyos nga nagahatag ug kalinaw magagupok kang Satanas ilalom sa inyong mga tiil sa dili-madugay. Hinaot nga ang dili-takos nga kalulot sa atong Ginoong Jesus maanaa kaninyo.” (Roma 16:20) Oo, kini sila makigbahin gikan sa mga langit sa kadaogan ni Kristo batok sa tigpasiugda-sa-gubat, si Satanas nga Yawa!
17. Unsay kinahanglan natong buhaton aron makapanunod sa tinuod nga pakigdait?
17 Busa karon ang pangutana mao, Unsay kinahanglan nimong buhaton aron makapanunod sa tinuod nga pakigdait? Ang tinuod nga pakigdait moabot lamang sa paagi sa Diyos, ug aron makabaton niana ikaw kinahanglang mokuhag positibong mga lakang. Ikaw kinahanglang modawat sa Prinsipe sa Pakigdait ug modangop kaniya. Kini nagpasabot nga ikaw kinahanglang modawat kang Kristo sa iyang papel ingong Manunubos ug Manlulukat sa makasasalang katawhan. Si Jesus mismo miingon sa iladong mga pulong: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kondili makabaton ug kinabuhing walay-kataposan.” (Juan 3:16) Andam ka bang magpakitag pagtuo kang Kristo Jesus ingong Ahente sa Diyos sa pagdalag tinuod nga pakigdait ug kaluwasan? Wala nay lain pang ngalan ilalom sa langit ang makahatag ug pakigdait ug makagarantiya niana. (Filipos 2:8-11) Ngano? Tungod kay si Jesus mao ang Piniling Usa sa Diyos. Siya ang labing bantogang mensahero sa pakigdait nga sukad nakalakaw sa yuta. Mamati ka ba kang Jesus ug mosunod sa iyang panig-ingnan?
18. Unsay angay natong buhaton sa pagsanong sa mga pulong ni Jesus nga narekord sa Juan 17:3?
18 “Kini nagakahulogan ug kinabuhing walay-kataposan,” matod ni Jesus, “ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Karon mao na ang panahon sa pagkuhag tukmang kahibalo pinaagi sa regular nga pagtambong sa mga tigom sa mga Saksi ni Jehova sa Kingdom Hall. Kining edukasyonal nga mga tigom magdasig kanimo sa pagpakigbahin sa imong kahibalo ug sa imong paglaom sa uban. Ikaw usab mahimong sinugo alang sa pakigdait sa Diyos. Ikaw makatagamtam ug pakigdait karon pinaagi sa pagsalig kang Jehova nga Diyos, sama sa giingon sa Isaias 26:3, sumala sa New International Version: “Huptan nimo sa hingpit nga pakigdait siya kansang hunahuna matul-id, sanglit siya nagasalig kanimo.” Kang kinsa ikaw mosalig? “Sumalig kang Jehova, kamong katawhan, sa tanang panahon, kay diha kang Jah Jehova mao ang Bato sa mga panahong walay kataposan.”—Isaias 26:4.
19, 20. Unsay nagpaabot niadtong kinsa karong adlawa nagpangita sa pakigdait ug nagapangagpas niana?
19 Barog na karon alang sa walay kataposang kinabuhi diha sa malinawong bag-ong kalibotan sa Diyos. Sa Pinadayag 21:3, 4, ang Pulong sa Diyos nagpasalig kanato: ‘Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang nangagi na.’ Dili ba kana ang malinawong umaabot nga imong gipangandoy?
20 Nan hinumdomi kon unsay gisaad sa Diyos. “Ang mga maaghop magapanunod sa yuta, ug magakalipay sa ilang kaugalingon tungod sa kadagaya sa pakigdait. Timan-i ang usa nga walay ikasaway ug tan-awa ang usa nga matarong, kay ang umaabot nianang tawhana mao unyay pakigdait.” (Salmo 37:11, 37) Sa dihang moabot na kanang maong malipayong adlaw, hinaot kita makaingon uban ang pagpasalamat, “Sa kataposan tinuod nga pakigdait! Salamat kang Jehova nga Diyos, ang tinubdan sa tinuod nga pakigdait!”
Makapatin-aw Ka Ba?
◻ Unsay makatabang sa usa nga makahimog mga kausaban sa hunahuna ug lihok?
◻ Sa unsang paagi ang mga Saksi ni Jehova, sa tinagsatagsa ug sa katibuk-an, nagpakita sa ilang gugma alang sa tinuod nga pakigdait?
◻ Sa unsang paagi si Jehova makiglabot sa tanang nagapalambo sa pagdumot ug sa gubat?
◻ Unsay mahimo sa pagmando sa Prinsipe sa Pakigdait alang sa katawhan?
[Hulagway sa panid 14]
Ang mga pulong ni Isaias natuman, dili pinaagi sa HK, apan pinaagi niadtong nagasanong sa pagtudlo ni Jehova
[Hulagway sa panid 15]
Kining duha ka tawo nakahimog mga kausaban sa pagpangagpas sa pakigdait
[Hulagway sa panid 15]
Rami Oved
[Hulagway sa panid 15]
Georg Reuter
[Hulagway sa panid 16]
Ang tinuod nga pakigdait mangibabaw ubos sa pagmando sa Prinsipe sa Pakigdait