Makatuo Ka ba sa Diyos Ingong Persona?

“DILI na kinahanglang ikaw motuo sa Diyos aron mahimong usa ka Kristohanon . . . Kita maoy bahin sa usa ka rebolusyon karon, apan sa ika-21ng siglo ang iglesya mahimong wala nay Diyos sa naandang diwa,” misaysay ang senyor nga kapelyan sa unibersidad sa Britanya. Siya namulong alang sa kapunongang Sea of Faith nga niana labing menos usa ka gatos ka pari sa Britanya ang miuyon. Kining “Kristohanong mga ateyista” nangatarongan nga ang relihiyon maoy minugna sa mga tawo ug nga, sama sa gisulti sa usa ka membro niini, ang Diyos maoy “usa ka ideya” lamang. Ang Diyos nga labaw sa kinaiyanhon dili na mohaom sa ilang paagi sa panghunahuna.

“Patay ang Diyos” mao ang popular nga eslogan sa katuigang 1960. Kini nagbanaag sa panglantaw sa Alemang pilosopo sa ika-19ng siglo nga si Friedrich Nietzsche ug naghatag sa daghang batan-on ug katarongan sa pagbuhat kutob sa ilang gitinguha, sa pagpakigbahin sa gitawag ug librelibreng gugma ug pag-abuso sa droga nga walay moral nga pagpugong. Apan ang maong kagawasan nagtultol ba sa mga hippie, nga maoy pag-ila kanila, ngadto sa usa ka mas makapatagbawng kinabuhi sa kalipay?

Sa samang dekada, ang Anglikanong obispo nga si John A. T. Robinson nagpatik sa iyang kontrobersiyal nga librong Honest to God. Daghan sa iyang kaubang mga klerigo nagsaway kaniya sa paghunahuna sa Diyos “ingong usa ka bahin lamang sa gidak-on sa tawhanong kasinatian.” Ang propesor sa teolohiya nga si Keith Ward nangutana: “Ang pagtuo ba sa Diyos maoy kinaraan na nga patuotuo, nga karon gisalikway sa mga maalamon?” Sa pagtubag sa iyang kaugalingong pangutana, siya miingon: “Walay mas hinungdanon sa relihiyon karong adlawa kay sa pagkaplag pag-usab sa kahibalo sa naandang ideya bahin sa Diyos.”

Pag-antos ug ang Diyos Ingong Persona

Daghan nga nagtuo sa Diyos ingong persona ang nalisdan sa pagpasibo sa ilang pagtuo sa mga trahedya ug pag-antos nga ilang nakita. Pananglitan, niadtong Marso 1996, 16 ka bata, uban sa ilang magtutudlo, ang giluthang ug namatay sa Dunblane, Scotland. “Wala gayod ako makasabot sa kabubut-on sa Diyos,” nag-ingon ang usa ka natugaw nga babaye. Ang kasakit sa trahedya gipadayag sa usa ka kard nga gibilin nga may mga bulak sa gawas sa eskuylahan sa mga bata. Kini may usa ka pulong, “NGANO?” Sa pagtubag ang ministro sa Katedral sa Dunblane nag-ingon: “Walay katin-awan. Dili kami makatubag kon nganong kini nahitabo.”

Sa ulahi sa samang tuig, usa ka popular nga batan-ong klerigo sa Church of England sa walay kokaluoy gipatay. Ang Church Times nagtaho nga ang nakurat nga kongregasyon nakadungog sa pangulong diakono sa Liverpool nga naghisgot sa “pagmakmak sa pultahan sa Diyos pinaagi sa mga pangutanang ngano? ngano?” Kini nga klero walay mga pulong usab sa paghupay gikan sa usa ka personal nga Diyos.

Nan, unsay atong tuohan? Makataronganon ang pagtuo sa Diyos ingong persona. Mao kini ang yawi sa pagtubag sa mapugsanong mga pangutana nga gibangon sa itaas. Gidapit ka namong tagdon ang ebidensiya nga gipresentar sa nagsunod nga artikulo.

[Hulagway sa panid 3]

Ang kard nangutanang “Ngano?”

[Credit Line]

NEWSTEAM No. 278468/Sipa Press