Pagpaabot sa Maayong Balita sa Mas Daghan Pa

SAMTANG naghunahuna ako bahin sa mga tawo sa akong nasod nga gipuy-an, akong naamgohan nga daghan ang nakaila sa mga Saksi ni Jehova gikan lamang sa mga balita. Sa akong hunahuna, kining mga tawhana angayng makontak aron sila makahibalo kon kinsa ang mga Saksi ni Jehova ug unsa gayod ang ilang gituohan. Apan sa unsang paagi makatabang ako? Ang akong bana usa ka Kristohanong ansiyano, ug gihatagan niya ako ug maalamong giya ug mga sugyot.

Nakaplagan namo ang yawing ideya sa artikulong “Mga Magasin nga Nagahatag ug Praktikal nga Paghupay,” nga gipatik sa Enero 8, 1995, nga isyu sa magasing Pagmata! Mahitungod sa kalihokan sa usa ka Saksi, ang artikulo nag-ingon: “Gituyo gayod niya pagtigom ug karaang mga kopya sa pipila ka magasing Pagmata! nga nagtapun-og sa balay sa ubang mga Saksi. Dayon iyang duawon ang mga ahensiya nga gibati niyang mahimong magpakitag linaing interes sa pipila ka ulohan.”

Uban sa tabang sa akong bana, nakatigom ako ug gatosgatos nga kopya sa mga magasin. Gikan niini nakapili ako ug lainlaing mga ulohan nga angayan alang sa mga tawo nga akong sulayan sa pagkontak.

Ginamit ang mga direktoryo sa telepono ug publikong mga talaan, nakahipos ako ug lista nga naghawas sa mga ospital, mga sak-anan sa mga batan-on, ug mga nursing home. Gilista usab nako ang mga tagdumala sa paglubong, mga superbisor ug mga tigtambag sa tunghaan, mediko legal, ug mga opisyal sa mga prisohan ug mga korte. Ang akong listahan naglakip sa mga direktor sa mga institusyon alang sa mga alkoholiko ug mga nagiyan sa droga, mga asosasyon alang sa mga isyu bahin sa kalikopan, alang sa mga baldado ug mga biktima sa gubat, ug alang sa panukiduki sa nutrisyon. Wala usab nako sayloi ang mga manedyer sa mga opisina alang sa kaayohan sa katilingban, mga serbisyo sa katilingban, ug mga kalihokan sa pamilya.

Unsay Akong Isulti?

Ang unang butang nga akong gihimo sa dihang nagaduaw mao ang tin-awng pagpailaila kon kinsa ako. Unya akong gihisgotan nga ang akong pagduaw maoy sulod lamang sa pipila ka minuto.

Sa dihang maatubang na ang tawo nga nagdumala, ako moingon: “Usa ako sa mga Saksi ni Jehova. Apan, wala ako moanhi aron maghisgot ug relihiyon, nga mahimong dili-haom panahon sa oras tingtrabaho.” Kasagaran ang atmospera mahimong mas relaks. Unya, magpasibo sa akong mga komento sa kahimtang, ako mopadayon: “Duha ang katarongan sa akong pagduaw. Una, gusto nakong ipahayag ang akong apresasyon sa buluhaton nga giorganisar sa inyong buhatan. Siyempre, dili angayng pakamenoson nga adunay usa ka tawo nga naggugol sa iyang panahon ug kusog alang sa kinabag-an sa katawhan. Kini angay gayong dayegon.” Sa daghang kaso ang tawo nga giduol niining paagiha matingala.

Nianang tungora ang tawo kalagmitan kaayong mahibulong kon unsa ang ikaduhang rason sa akong pagduaw. Ako mopadayon: “Ang ikaduhang rason sa akong pagduaw mao kini: Gikan sa among magasing Pagmata!, nga gipatik sa tibuok kalibotan, nakapili ako ug pipila ka artikulo nga naghisgot ilabina sa imong matang sa trabaho ug sa mga suliran nga nalangkit niini. Ako nakaseguro nga buot nimong masayran kon giunsa paglantaw sa usa ka internasyonal nga magasin kining mga sulirana. Malipay ako nga mobilin niining mga kopyaha kanimo.” Kasagaran giingnan ako nga giapresyar ang akong mga paningkamot.

Makapatingala ug Magantihong mga Resulta

Sa dihang gigamit nako kining maong paagi, kadaghanan mahigalaong midawat kanako; usa lamang sa 17 ang mibalibad kanako. Daghan akog mga kasinatian nga makapatingala ug magantihon.

Pananglitan, human mosulay ug kaupat ug magpaabot nga mapailobon, milampos ako sa pagpakigkita sa inspektor sa tunghaan sa distrito. Siya puliki kaayo nga tawo. Bisan pa niana, mahigalaon kaayo siya ug nakigsulti kanako sa makadiyot. Sa dihang mibiya ako, siya miingon: “Giapresyar ko gayod ang imong paningkamot, ug mainampingon ko gayong basahon ang imong literatura.”

Sa laing okasyon, miduaw ako sa usa ka korte sa distrito, nga nakigkita sa pangulong huwes, usa ka edarang lalaki. Sa pagsulod nako sa iyang opisina, miyahat siya gikan sa iyang gitan-aw nga mga papeles nga morag napikal.

“Ang mga oras nga tingtrabaho maoy sa buntag sa Martes lamang, ug nianang panahona makahatag ako ug impormasyon,” misingka siya.

“Pasayloa ko nga mianhi sa dili-tukmang panahon,” mitubag dayon ako ug midugang, “Siyempre, malipay akong mobalik sa laing higayon. Apan ang akong pagduaw sa pagkatinuod maoy personal nga butang.”

Nianang tungora ang huwes maukiton na. Siya nangutana, sa medyo mahigalaong tono, kon unsay akong tuyo. Akong gisubli nga moduaw ako pag-usab sa Martes.

“Lingkod, palihog,” siya miinsistir, sa akong dakong katingala. “Unsay tuyo nimo?”

Misunod ang masadyang kabildohay, ug nangayo siyag pasaylo nga dili siya mahigalaon sa sinugdan tungod kay puliki gayod kaayo siya.

“Nasayod ka ba kon unsay akong naangayan sa mga Saksi ni Jehova?” nangutana ang huwes pagkataudtaod. “Sila adunay maayong-pagkasukad nga mga prinsipyo nga gikan niana dili sila motipas. Si Hitler misulay sa tanan niyang mahimo, apan ang mga Saksi wala gihapon makiggubat.”

Sa dihang duha kami nga misulod sa usa ka opisina, ang mga sekretarya didto nakaila kanamo. Unya ang ehekutibong sekretarya tin-awng mipahayag sa dili-mahigalaong tono, “Ang presidente dili gayod moabiabi ug bisan unsang grupo.”

“Apan abiabihon niya kami,” kalmado akong mitubag, “tungod kay kami mga Saksi ni Jehova. Kami walay ipasakang petisyon, ug ang among pagduaw dili molapas sa tulo ka minutos.” Sa akong kasingkasing mainiton akong nag-ampo, “Oh Jehova, palihog himoang maayo ang sangpotanan niini!”

Ang sekretarya mitubag sa dili-mabinationg paagi, “O sige, sulayan nako.” Milakaw siya. Human sa mga duha ka minutos, nga morag dugay kaayo alang kanako, migawas siya nga gisundan sa presidente mismo. Walay gisulting bisan unsa, gidala niya kami sa iyang opisina, nga milabay sa duha ka laing mga lawak.

Sa dihang nagsugod kami sa pagkabildohay, nagkaanam siya ka mahigalaon. Malipayon niyang gidawat ang linaing mga isyu sa magasing Pagmata! sa dihang gitanyag namo kana. Nagpasalamat kami kang Jehova tungod niining kahigayonan sa paghatag ug maayong pamatuod mahitungod sa katuyoan sa among buluhaton.

Sa paghinumdom sa daghang kahibulongang mga kasinatian, mas bug-os nakong naapresyar ang giingon ni apostol Pedro: “Sa tino naila ko nga ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” (Buhat 10:​34, 35) Ang kabubut-on sa Diyos mao nga ang tanang tawo sa tanang kagikan, mga pinulongan, o kahimtang sa katilingban hatagag kahigayonan sa pagkahibalo sa iyang katuyoan alang sa katawhan ug alang sa yuta.​—Tinampo.