Sa Kataposan​—Hustisya Alang sa Tanan

“Kami maningkamot nga magpatalinghog sa bag-ong mga paagi . . . sa nasamdan nga mga tingog, mabalak-ong mga tingog, mga tingog nga nagtinguha gayod nga hidunggan. . . . Ang nahibilin mao ang paghatag ug kinabuhi sa anaa sa balaod: ang pagpasalig sa kataposan nga sanglit ang tanan natawo nga managsama sa dignidad atubangan sa Diyos, ang tanan natawo nga managsama sa dignidad atubangan sa tawo.”​—Presidente sa T.B. nga si Richard Milhous Nixon, pakigpulong sa inagurasyon, Enero 20, 1969.

SA DIHANG mangatungdanan ang mga hari, mga presidente, ug mga primer ministro, lagmit hisgotan nila ang hustisya. Si Richard Nixon, kanhi presidente sa Tinipong Bansa, dili eksepsiyon. Apan ang iyang larinong-pagkasulti nga mga pulong mawad-an sa kasanag niini kon hunahunaon sa nag-awop nga kahayag sa kasaysayan. Bisan pag siya misaad ‘sa paghatag ug kinabuhi sa balaod,’ si Nixon nakaplagan sa ulahi nga sad-an sa paglapas sa balaod ug napugos pagluwat sa iyang katungdanan. Tulo ka dekada sa ulahi, ‘ang nasamdan, mabalak-on, ug masulub-ong mga tingog’ nagpadayon sa pag-awhag nga dunggon.

Ang pagpamati sa maong mga tingog ug pag-atubang sa ilang mga reklamo dili sayon nga tahas, sumala sa nadiskobrehan sa di-maihap nga maayog-katuyoang mga lider. Napamatud-an nga usa ka walay-katumanan nga tumong ang ‘hustisya alang sa tanan.’ Bisan pa niana, daghang siglo kanhi, usa ka saad ang gipahayag nga takos sa atong pagtagad​—usa ka talagsaong saad mahitungod sa hustisya.

Pinaagi sa iyang propetang si Isaias, ang Diyos mipasalig sa Iyang katawhan nga siya magpadala kanila sa usa ka “alagad” nga siya mismo ang mopili. “Gibutang ko kaniya ang akong espiritu,” giingnan sila ni Jehova. “Hustisya alang sa mga nasod mao ang iyang ipatungha.” (Isaias 42:1-3) Walay tawhanong lider ang mangahas pagpahayag sa ingon ka masakopong deklarasyon, nga magkahulogan sa malungtarong hustisya alang sa matag nasod. Masaligan ba kining saara? Matuman ba gayod ang ingon ka talagsaong kahimoan?

Usa ka Saad nga Atong Masaligan

Ang usa ka saad katuohan kon ang nagpahayag niini katuohan. Niining kasoha, walay lain kondili ang Diyos nga Labing Gamhanan maoy nagpahayag nga ang iyang “alagad” magpatuman ug hustisya sa tibuok kalibotan. Lahi sa mga politiko, si Jehova dili magpahayag ug mga saad nga wala sa buot. ‘Dili siya magbakak,’ maoy pasalig kanato sa Bibliya. (Hebreohanon 6:18) “Ang akong gihukom nga buhaton matuman,” mapasiugdahong pahayag sa Diyos.​—Isaias 14:24, Today’s English Version.

Ang atong pagsalig nianang saara gipalig-on usab sa binuhatan sa pinili sa Diyos nga “alagad,” si Jesu-Kristo. Siya nga maoy magpatuman sa hustisya kinahanglang mahigugma sa hustisya ug magkinabuhing matul-id. Si Jesus nagbilin ug usa ka walay-buling nga talaan sa binuhatan ingong usa ka tawong ‘nahigugma sa pagkamatarong ug nagdumot sa pagkamalapason.’ (Hebreohanon 1:9) Kon unsay iyang gipamulong, kon giunsa niya pagkinabuhi, ug bisan kon sa unsang paagi siya namatay, ngatanan nagpamatuod nga siya matarong gayod nga tawo. Sa pagkamatay ni Jesus, usa ka Romanong opisyal sa kasundalohan, kinsa lagmit nakasaksi sa paghusay kang Jesus ug sa pagpatay kaniya, natandog sa pag-ingon: “Sa pagkatinuod kining tawhana matarong.”​—Lucas 23:47.

Gawas sa pagkinabuhing matarong sa iyang kaugalingon, gitutolan ni Jesus ang pagkawalay-hustisya nga kaylap kaayo sa iyang adlaw. Gibuhat niya kini, dili pinaagi sa pag-alsa o sa rebolusyon, kondili pinaagi sa pagtudlo sa matuod nga hustisya sa tanan nga mamati. Ang iyang Wali sa Bukid maoy mahanasong pagpatin-aw kon unsaon pagpakita ang matuod nga hustisya ug pagkamatarong.​—Mateo, mga kapitulo 5-7.

Gibuhat ni Jesus kon unsay iyang gisangyaw. Siya wala magtamay sa alaot nga mga sanlahon, ang “mga yinam-iran” sa Hudiyonhong katilingban. Sa kapulihay, siya nakigsulti kanila, naghikap kanila, ug nag-ayo pa kanila. (Marcos 1:40-42) Ang tanang tawo nga iyang nahibalag, lakip ang mga kabos ug mga timawa, maoy bililhon kaniya. (Mateo 9:36) “Umari kanako, kamong tanan nga nagabudlay ug nabug-atan, ug ako magapalagsik kaninyo,” giingnan niya sila.​—Mateo 11:28.

Labaw sa tanan, wala itugot ni Jesus nga ang pagkawalay-hustisya sa iyang palibot magdaot o magpayugot kaniya. Wala gayod niya basli ug daotan ang daotan. (1 Pedro 2:22, 23) Bisan pag nag-antos sa grabeng kasakit, siya miampo ngadto sa iyang langitnong Amahan alang sa mga sundalo mismo nga naglansang kaniya. “Amahan, pasayloa sila,” siya mihangyo, “kay wala sila mahibalo sa ilang ginabuhat.” (Lucas 23:34) Sa tinuoray, si Jesus ‘nagpatin-aw ngadto sa mga nasod kon unsa ang hustisya.’ (Mateo 12:18) Unsang labaw nga pamatuod ang anaa nato sa tinguha sa Diyos nga ipahamutang ang usa ka matarong nga kalibotan kay sa buhing panig-ingnan sa iyang kaugalingong Anak?

Mapukgo ang Pagkawalay-Hustisya

Ang buhing pamatuod nga ang pagkawalay-hustisya mapukgo anaa usab sa kalibotan karong adlawa. Sa tinagsatagsa, ingon man isip organisasyon, ang mga Saksi ni Jehova naningkamot sa pagpukgo sa pagkamapihigon, pagkamay-pinalabi, rasismo, ug kapintasan. Tagda ang mosunod nga pananglitan.

Si Pedroa nagtuo nga ang maalsahong aksiyon mao ang bugtong paagi sa pagpatunghag hustisya sa Kabanikanhang Basque, ang rehiyon sa Espanya nga iyang gipuy-an. Sa maong tumong siya nahimong membro sa usa ka teroristang organisasyon nga mihatag kaniyag paramilitaryong pagbansay sa Pransiya. Sa dihang nahuman ang iyang pagbansay, gimandoan siya nga magpormag usa ka teroristang yunit ug pabuthan ang usa ka baraks sa kapolisan. Ang iyang pundok nag-andam na sa mga dinamita sa dihang nadakpan siya sa polis. Migugol siya ug 18 ka bulan sa prisohan, apan bisan sa prisohan siya nagpadayon sa iyang politikanhong kalihokan, nga miapil sa mga welga nga magpagutom ug naghiwa sa iyang mga pulso sa usa ka higayon.

Si Pedro naghunahuna nga siya nagpakig-away alang sa hustisya. Unya iyang nasayran si Jehova ug ang iyang mga katuyoan. Samtang si Pedro didto sa prisohan, ang iyang asawa misugod pagtuon sa Bibliya uban sa mga Saksi ni Jehova, ug sa dihang nakagawas na siya, iya siyang gidapit sa pagtambong sa usa sa ilang mga tigom. Naangayan niya pag-ayo ang tigom nga mihangyo siyag usa ka pagtuon sa Bibliya, usa ka pagtuon nga mitultol niya sa paghimog dagkong mga kausaban sa iyang panglantaw ug iyang paagi sa kinabuhi. Sa kataposan, niadtong 1989, si Pedro ug iyang asawa nabawtismohan.

“Nagpasalamat ako kang Jehova nga ako wala gayod makapatay kang bisan kinsa sulod sa katuigan sa akong pagkaterorista,” matod ni Pedro. “Karon ako nagagamit sa espada sa espiritu sa Diyos, ang Bibliya, aron hatagan ang katawhan sa mensahe bahin sa matuod nga kalinaw ug hustisya​—ang maayong balita sa Gingharian sa Diyos.” Dili pa dugay kanhi si Pedro, kinsa karon nag-alagad nga usa ka ansiyano sa mga Saksi ni Jehova, miduaw sa baraks mismo nga giplanohan niyang bungkagon. Sa maong panahon siya miadto sa tuyo nga isangyaw ang mensahe sa kalinaw ngadto sa mga pamilya nga nagpuyo didto.

Ang mga Saksi ni Jehova naghimo niining mga kausabana tungod kay nangandoy sila sa usa ka matarong nga kalibotan. (2 Pedro 3:13) Bisan pag sila bug-os nagsalig sa saad sa Diyos nga ipatungha kini, sila nakaamgo nga ilang katungdanan usab ang pagkinabuhing nahiuyon sa hustisya. Ang Bibliya sa walay duhaduha nagpahayag nga ang Diyos nagdahom nga buhaton nato ang atong bahin.

Pagpugas sa mga Binhi sa Pagkamatarong

Tinuod, kon mag-atubang sa pagkawalay-hustisya, kita tingali makiling sa pagtuaw: “Hain na ang Diyos sa hustisya?” Kana ang gipatugbaw sa mga Hudiyo sa adlaw ni Malaquias. (Malaquias 2:17) Giisip ba sa Diyos nga angay ang ilang reklamo? Sa kasukwahi, kadto “nakapaluya” kaniya tungod kay, lakip sa uban pang mga butang, sila mismo nagluib sa ilang mga asawa nga tigulang na, nga ilang gidiborsiyohan sila pinasukad sa way-hinungdang mga pasumangil. Gipahayag ni Jehova ang iyang kabalaka mahitungod sa ‘mga asawa sa ilang pagkabatan-on, nga ilang giluiban, bisan pag sila mao ang ilang mga kauban ug ang mga asawa sa ilang pakigsaad.’​—Malaquias 2:14.

Angay bang moreklamo kita bahin sa pagkawalay-hustisya kon kita mismo nagagawi nga dili matul-id? Sa laing bahin, kon maningkamot kita sa pagsundog kang Jesus pinaagi sa paglangkat sa pagkamapihigon ug rasismo gikan sa atong mga kasingkasing, pinaagi sa pagkahimong walay-pinalabi ug mahigugmaon sa tanan, ug pinaagi sa dili pagbalos ug daotan sa daotan, atong gipakitang kita tinuod nga nahigugma sa hustisya.

Aron kita moani ug hustisya, ang Bibliya nag-agda kanato nga ‘magpugas sa pagkamatarong.’ (Oseas 10:12) Bisan pa tingali unsa ka gamay tan-awon, ang matag personal nga kadaogan batok sa pagkawalay-hustisya mahinungdanon. Sumala sa gisulat ni Martin Luther King, Jr., diha sa iyang Letter From Birmingham Jail, “ang pagkawalay-hustisya sa bisan diing dapit maoy kapeligrohan sa hustisya sa tanang dapit.” Kadtong “mangita sa pagkamatarong” mao ang katawhang ginapili sa Diyos nga manunod sa iyang matarong nga bag-ong kalibotan nga duol nang moabot.​—Sofonias 2:3.

Dili kita makatukod sa atong paglaom alang sa hustisya ibabaw sa huyang nga patukoranan sa tawhanong mga saad, apan makasalig kita sa pulong sa atong mahigugmaong Maglalalang. Kanay hinungdan nga gisugo ni Jesus ang iyang mga sumusunod nga magpadayon sa pag-ampo alang sa pag-abot sa Gingharian sa Diyos. (Mateo 6:9, 10) Si Jesus, ang tinudlong Hari sa maong Gingharian, “magluwas sa kabos nga nagatuaw alang sa tabang, sa sinakit usab ug si bisan kinsa nga walay magtatabang. Siya mobatig kaluoy sa ubos ug sa kabos, ug ang mga kalag sa mga kabos iyang luwason.”​—Salmo 72:12, 13.

Tin-aw, ang pagkawalay-hustisya dili permanente. Ang pagmando ni Kristo ibabaw sa tibuok yuta magpukgo sa pagkawalay-hustisya sa walay kataposan, sumala sa gipasalig kanato sa Diyos pinaagi sa iyang propetang si Jeremias: “Ang panahon umaabot sa dihang akong pagatumanon ang saad nga akong gipahayag . . . Nianang panahona akong pagapilion ingon nga hari ang usa ka matarong nga kaliwat ni David. Kanang maong hari magabuhat kon unsay matarong ug makiangayon sa tibuok yuta.”​—Jeremias 33:14, 15, TEV.

[Footnote]