Pagbasa sa Bibliya—Mapuslanon ug Makalipay

“Kinahanglang . . . magbasa ka niini adlaw ug gabii.”—JOSUE 1:8.

 1. Unsa ang pipila ka kaayohan sa pagbasa sa katibuk-an ug ilabina sa pagbasa sa Bibliya?

ANG pagbasa ug mapuslanong balasahon maoy usa ka maayong buluhaton. Ang Pranses nga pilosopo sa politika nga si Montesquieu (Charles-Louis de Secondat) nagsulat: “Para nako, ang pagtuon mao gayod ang epektibo kaayong solusyon sa kalaay sa kinabuhi. Wala pa ako makaagi sukad ug kaguol nga dili mawagtang sa usa ka oras nga pagbasa.” Sa kinatas-ang sukod, tinuod kini bahin sa pagbasa sa Bibliya. Ang inspiradong salmista nag-ingon: “Ang balaod ni Jehova hingpit, nga nagapahiuli sa kalag. Ang pahinumdom ni Jehova kasaligan, nga nagahimo nga maalamon sa walay-kasinatian. Ang mga sugo ni Jehova matul-id, nga makapalipay sa kasingkasing.”—Salmo 19:7, 8.

 2. Nganong gipreserbar ni Jehova ang Bibliya latas sa kapanahonan, ug unsay iyang gidahom nga himoon sa iyang katawhan niini?

² Ingong Awtor sa Bibliya, si Jehova nga Diyos nagpreserbar niini latas sa kasiglohan sa grabeng pagsupak sa relihiyoso ug sekular nga mga kaaway niini. Kay iyang pagbuot nga ang “tanang matang sa mga tawo maluwas ug makadangat sa tukmang kahibalo sa kamatuoran,” iyang giseguro nga ang iyang Pulong mabatonan sa tanang tawo. (1 Timoteo 2:4) Gibanabana nga mga 80 porsiyento sa mga molupyo sa yuta maabot pinaagi sa paggamit ug 100 ka pinulongan. Ang mga sinulat diha sa tibuok Bibliya mabatonan sa 370 ka pinulongan, ug ang mga bahin sa Kasulatan mabasa sa dugang 1,860 ka pinulongan ug mga diyalekto. Buot ni Jehova nga basahon sa iyang katawhan ang iyang Pulong. Iyang panalanginan ang iyang mga alagad nga mohatag ug pagtagad sa iyang Pulong, oo, kinsa magbasa niana kada adlaw.—Salmo 1:1, 2.

Ang Pagbasa sa Bibliya Gikinahanglan sa mga Magtatan-aw

3, 4. Unsay gisugo ni Jehova sa mga hari sa Israel, ug unsay mga katarongan nga kining sugoa aplikado usab sa Kristohanong mga ansiyano karon?

³ Nagsulti nga naglantaw sa umaabot nga panahon sa dihang ang Israel makabaton ug usa ka tawhanong hari, si Jehova nag-ingon: “Mahitabo nga sa dihang siya molingkod sa trono sa iyang gingharian, siya magsulat diha sa usa ka basahon alang kaniya ug usa ka kopya niini nga balaod nga gihuptan sa mga saserdote, ang mga Levihanon. Ug kini magpabilin diha kaniya, ug magbasa siya niini sa tanang adlaw sa iyang kinabuhi, aron siya makakat-on sa pagkahadlok kang Jehova nga iyang Diyos aron sa pagtuman sa tanang pulong niini nga balaod ug niini nga mga regulasyon pinaagi sa pagbuhat niini; aron ang iyang kasingkasing dili magmapahitas-on ibabaw sa iyang mga igsoon ug aron siya dili motipas gikan sa sugo ngadto sa tuo o sa wala.”—Deuteronomio 17:18-20.

⁴ Matikdi ang mga hinungdan kon nganong gisugo ni Jehova ang tanang umaabot nga mga hari sa Israel sa pagbasa sa balaod sa Diyos kada adlaw: (1) “aron siya makakat-on sa pagkahadlok kang Jehova nga iyang Diyos aron sa pagtuman sa tanang pulong niini nga balaod ug niini nga mga regulasyon pinaagi sa pagbuhat niini”; (2) “aron ang iyang kasingkasing dili magmapahitas-on ibabaw sa iyang mga igsoon”; (3) “aron siya dili motipas gikan sa sugo ngadto sa tuo o sa wala.” Dili ba angay usab nga ang Kristohanong mga magtatan-aw karon mahadlok kang Jehova, magsunod sa iyang mga balaod, magpugong nga mahimong mapahitas-on ibabaw sa ilang mga igsoon, ug maglikay sa pagtipas gikan sa mga sugo ni Jehova? Ang pagbasa sa Bibliya kada adlaw hinungdanon alang kanila sama nga hinungdanon usab kini kanhi alang sa mga hari sa Israel.

 5. Unsay gisulat sa Nagamandong Lawas di pa dugay ngadto sa mga membro sa Komite sa Sangang Buhatan mahitungod sa pagbasa sa Bibliya, ug nganong maayong sundon sa tanang Kristohanong mga ansiyano ang maong tambag?

⁵ Ang Kristohanong mga ansiyano karon puliki kaayo, nga maghimo sa pagbasa sa Bibliya kada adlaw nga usa ka hagit. Pananglitan, ang mga membro sa Nagamandong Lawas sa mga Saksi ni Jehova ug ang mga membro sa mga Komite sa Sangang Buhatan sa tibuok kalibotan maoy puliki kaayo nga mga tawo. Bisan pa niana, usa ka sulat di pa dugay gikan sa Nagamandong Lawas nga gipadala ngadto sa tanang Komite sa Sangang Buhatan nagpasiugda sa panginahanglan sa adlaw-adlaw nga pagbasa sa Bibliya ug maayong mga batasan sa pagtuon. Kini, matod pa sa sulat, magpadako sa atong gugma alang kang Jehova ug alang sa kamatuoran, ug kini “motabang kanato sa pagpatunhay sa atong pagtuo, kalipay, ug pagkamalahutayon hangtod sa mahimayaong kataposan.” Ang tanang ansiyano sa mga kongregasyon sa mga Saksi ni Jehova dunay samang panginahanglan. Ang pagbasa sa Kasulatan kada adlaw motabang kanila aron ‘molihok nga maalamon.’ (Josue 1:7, 8) Alang kanila, ilabina, ang pagbasa sa Bibliya may “kapuslanan alang sa pagpanudlo, sa pagbadlong, sa pagsaway, ug sa pagmatuto diha sa pagkamatarong.”—2 Timoteo 3:16, Revised Standard Version.

Kinahanglanon sa Batan-on ug Tigulang

 6. Nganong gibasa sa makusog ni Josue ang tanang pulong sa balaod ni Jehova atubangan sa nagtigom nga mga banay sa Israel ug sa langyawng mga pumoluyo?

⁶ Sa karaang panahon, ang tagsatagsang mga kopya sa Kasulatan dili mabatonan aron gamiton sa personal, busa ang pagbasa sa Bibliya gihimo atubangan sa nagtigom nga mga tawo. Human nga gihatagan siya ni Jehova ug kadaogan batok sa siyudad sa Ai, gitigom ni Josue ang mga banay sa Israel atubangan sa Bukid sa Ebal ug sa Bukid sa Gerizim. Dayon, ang asoy nagsugilon kanato: “Iyang gibasa sa makusog ang tanang pulong sa balaod, ang panalangin ug ang tunglo, sumala sa tanang nahisulat sa basahon sa balaod. Wala gayoy usa ka pulong sa tanang gisugo ni Moises nga wala basaha ni Josue sa makusog sa atubangan sa tibuok kongregasyon sa Israel, uban sa mga babaye ug sa mga bata ug sa langyawng mga pumoluyo nga naglakaw sa ilang taliwala.” (Josue 8:34, 35) Kinahanglang masilsil diha sa kasingkasing ug hunahuna sa mga batan-on ug tigulang, sa lumad ug langyawng pumoluyo, kon unsang panggawi ang magpatungha sa panalangin ni Jehova ug kon unsay magpatungha sa iyang kasuko. Ang pagbasa sa Bibliya nga himoong regular makatabang gayod kanato niining bahina.

7, 8. (a) Kinsa karon ang sama “sa langyawng mga pumoluyo,” ug nganong kinahanglang mobasa sila sa Bibliya kada adlaw? (b) Sa unsang mga paagi ang “mga bata” taliwala sa katawhan ni Jehova makasunod sa panig-ingnan ni Jesus?

⁷ Karon, minilyon sa mga alagad ni Jehova ang sama niadtong “langyawng mga pumoluyo” sa espirituwal nga diwa. Kaniadto, sila nagkinabuhi sumala sa mga sukdanan sa kalibotan, apan nagbag-o na sila sa ilang mga kinabuhi. (Efeso 4:22-24; Colosas 3:7, 8) Kinahanglang ilang pahinumdoman kanunay ang ilang kaugalingon bahin sa mga sukdanan ni Jehova sa maayo ug sa daotan. (Amos 5:14, 15) Matabangan sila sa paghimo niini pinaagi sa pagbasa sa Pulong sa Diyos kada adlaw.—Hebreohanon 4:12; Santiago 1:25.

⁸ Dunay daghan usab kaayong “mga bata” taliwala sa katawhan ni Jehova nga gitudloan sa ilang mga ginikanan sa mga sukdanan ni Jehova apan nagkinahanglan sa pagkombinsir sa ilang kaugalingon sa pagkamatarong sa iyang kabubut-on. (Roma 12:1, 2) Sa unsang paagi mahimo nila kini? Sa Israel, ang mga saserdote ug ang mga tigulang gisugo: “Pagabasahon mo kining balaod atubangan sa tibuok Israel sa ilang igdulungog. Tigoma ang katawhan, ang mga lalaki ug ang mga babaye ug ang mga bata ug ang imong langyaw nga pumoluyo nga anaa sa sulod sa imong mga ganghaan, aron sila mamati ug aron sila makakat-on, sanglit angay silang mahadlok kang Jehova nga inyong Diyos ug magmatngon sa pagtuman sa tanang pulong niini nga balaod. Ug ang ilang mga anak nga wala mahibalo kinahanglang mamati, ug sila kinahanglang makakat-on sa pagkahadlok kang Jehova nga inyong Diyos.” (Deuteronomio 31:11-13) Nagkinabuhi ilalom sa Balaod, si Jesus sa linghod nga panuigong 12 nagpakita ug dakong kaikag sa pagsabot sa mga balaod sa iyang Amahan. (Lucas 2:41-49) Sa ulahi, nabatasan niya ang pagpatalinghog ug pagpakigbahin sa pagbasa sa Kasulatan diha sa sinagoga. (Lucas 4:16; Buhat 15:21) Ang mga bata karon gidasig sa pagsunod sa panig-ingnan ni Jesus pinaagi sa pagbasa sa Pulong sa Diyos kada adlaw ug sa regular nga pagtambong sa mga tigom diin ginabasa ug ginatun-an ang Bibliya.

Pagbasa sa Bibliya—Usa ka Priyoridad

 9. (a) Nganong kinahanglang magmapilion kita sa atong ginabasa? (b) Unsay gisulti sa editor nga tagmugna niining magasina mahitungod sa mga tabang sa pagtuon sa Bibliya?

⁹ Ang maalamong Haring Solomon nagsulat: “Tagda ang pasidaan: Sa paghimog daghang basahon walay kataposan, ug ang hilabihan nga kasibot alang niini makapabudlay sa unod.” (Ecclesiastes 12:12) Lagmit may moingon pa nga ang pagbasa sa daghang libro nga gipatik karon dili lamang makapabudlay sa unod kondili, sa prangka, peligroso sa hunahuna. Busa hinungdanong magmapilion. Dugang pa sa pagbasa sa atong mga publikasyon nga abag sa pagtuon sa Bibliya, kinahanglang atong basahon ang Bibliya mismo. Ang editor nga tagmugna niining magasina nagsulat sa mga magbabasa niini: “Ayawg kalimot nga ang Bibliya mao ang atong Sukdanan ug nga bisan pag hinatag sa Diyos ang atong mga tabang kini maoy mga ‘tabang’ ug dili mga kapuli sa Bibliya.”a Busa, bisan tuod dili kalimtan ang pinasukad sa Bibliya nga mga publikasyon, kinahanglang basahon nato ang Bibliya mismo.

10. Sa unsang paagi gipasiugda sa ‘matinumanon ug maalamong ulipon’ ang pagkahinungdanon sa pagbasa sa Bibliya?

¹⁰ Naghunahuna bahin niini nga panginahanglan, daghang tuig na karon nga gieskedyul sa ‘matinumanon ug maalamong ulipon’ ang pagbasa sa Bibliya ingong bahin sa programa sa Tunghaan sa Teokratikanhong Ministeryo diha sa matag kongregasyon. (Mateo 24:45) Ang programa sa pagbasa sa Bibliya karon nagkobre sa tibuok Bibliya sa yugto nga mokabat ug mga pito ka tuig. Kini nga eskedyul makabenepisyo sa tanan apan labaw na sa mga bag-ohan nga wala pa sukad makabasa sa tibuok Bibliya. Kadtong motambong sa Watchtower Bible School of Gilead alang sa mga misyonaryo ug sa Ministerial Training School maingon man sa bag-ong mga membro sa pamilyang Bethel gikinahanglan nga mobasa sa tibuok Bibliya sulod sa usa ka tuig. Bisag unsa pay eskedyul nga imong gisunod, sa personal o sa pamilya, gikinahanglang hatagag priyoridad ang pagbasa sa Bibliya aron maapas ang eskedyul.

Unsay Gipadayag sa Imong Batasan sa Pagbasa?

11. Sa unsang paagi ug nganong mobasa kita sa mga pulong ni Jehova kada adlaw?

¹¹ Kon naglisod ka sa pag-apas sa imong eskedyul sa pagbasa sa Bibliya, tingali angay nimong pangutan-on ang imong kaugalingon: ‘Unsa kahay epekto sa akong batasan sa pagbasa o pagtan-awg TV diha sa akong katakos sa pagbasa sa Pulong ni Jehova?’ Hinumdomi ang gisulat ni Moises—ug gisubli ni Jesus—nga ang ‘tawo mabuhi, dili sa tinapay lamang, kondili sa matag pulong nga nagagula sa baba ni Jehova.’ (Mateo 4:4; Deuteronomio 8:3) Maingon nga kinahanglang mokaon kita ug tinapay o sa susama niini matag adlaw sa atong kinabuhi aron molagsik ang atong pisikal nga lawas, sa ingon usab kinahanglang atong sabton ang mga hunahuna ni Jehova matag adlaw aron mahuptan ang atong espirituwalidad. Mahimo natong mahibaloan ang hunahuna sa Diyos matag adlaw pinaagi sa pagbasa sa Kasulatan.

12, 13. (a) Sa unsang paagi giilustrar ni apostol Pedro ang pagpangandoy nga angay natong huptan alang sa Pulong sa Diyos? (b) Sa unsang paagi lahi ang pagkagamit ni Pablo sa ilustrasyon sa gatas nianang kang Pedro?

¹² Kon kita nagpabili sa Bibliya, ‘dili ingong pulong sa mga tawo, kondili, ingon sa kon unsa kini sa pagkamatuod, ingong pulong sa Diyos,’ kita madani niini sama nga ang usa ka masuso mangandoy sa gatas sa inahan niini. (1 Tesalonica 2:13) Si apostol Pedro mihimo niana nga pagtandi, nga nagsulat: ‘Sama sa bata nga bag-o pang nahimugso, ugmara ang pagpangandoy sa walay sambog nga gatas nga iya sa pulong, nga pinaagi niini kamo managtubo ngadto sa kaluwasan, kon ugaling nakatilaw kamo nga ang Ginoo maluloton.’ (1 Pedro 2:2, 3) Kon kita nakatilaw gayod, pinaagi sa personal nga kasinatian, nga “ang Ginoo maluloton,” maugmad nato ang gana sa pagbasa sa Bibliya.

¹³ Maayong mamatikdan nga niining tekstoha ang pagtandi ni Pedro sa gatas lahi nianang kang apostol Pablo. Alang sa usa ka bag-ong natawong bata, ang gatas makatagana sa tanang sustansiya nga gikinahanglan niini. Ang ilustrasyon ni Pedro nagpakita nga ang Pulong sa Diyos nasudlan sa tanan nga atong gikinahanglan aron ‘managtubo ngadto sa kaluwasan.’ Si Pablo, sa laing bahin, migamit sa panginahanglan ug gatas sa pag-ilustrar sa dili maayong batasan sa pagpangaon sa bahin sa pipila nga nag-angkong mga hamtong sa espirituwal. Diha sa iyang sulat ngadto sa Hebreohanong mga Kristohanon, si Pablo nagsulat: ‘Bisan tuod kamo angay na unta nga mahimong mga magtutudlo tungod sa panahon, gikinahanglan na usab ninyo nga adunay magatudlo kaninyo gikan sa sinugdanan sa paninugdan nga mga butang sa sagradong mga pahayag sa Diyos; ug nahisama nga nagkinahanglan kamog gatas, dili sa gahing pagkaon. Kay ang matag usa nga moinom ug gatas wala masinati sa pulong sa pagkamatarong, kay bata pa man siya. Apan ang gahing pagkaon maoy alang sa hamtong nga mga tawo, alang kanila nga pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan.’ (Hebreohanon 5:12-14) Ang makugihong pagbasa sa Bibliya dakog mahimo sa pag-ugmad sa atong mga gahom sa pagsabot ug sa pagpukaw sa atong gana alang sa espirituwal nga mga butang.

Kon Unsaon Pagbasa ang Bibliya

14, 15. (a) Unsang pribilehiyo ang gitanyag kanato sa Awtor sa Bibliya? (b) Sa unsang paagi makabaton kita ug kaayohan gikan sa kaalam sa Diyos? (Paghatag ug mga pananglitan.)

¹⁴ Ang labing mapuslanong pagbasa sa Bibliya sugdan, dili pinaagi sa pagbasa, kondili pinaagi sa pag-ampo. Ang pag-ampo maoy usa ka talagsaong pribilehiyo. Morag nagsugod ka sa pagbasa sa usa ka libro bahin sa usa ka lisod sabton nga tema pinaagi sa pagpangayog tabang sa awtor aron masabtan ang imong pagabasahon. Pagkadakong bentaha kana! Ang Awtor sa Bibliya, si Jehova, nagtanyag kanimo nianang pribilehiyoa. Usa ka sakop sa unang-siglong nagamandong lawas nagsulat ngadto sa iyang mga igsoon: ‘Kon adunay usa kaninyo nga nakulangan sa kaalam, papadayona siya sa pagpangayo sa Diyos, kay siya nagahatag nga madagayaon ngadto sa tanan ug sa walay pagpamuyboy; ug kini igahatag kaniya. Apan kinahanglang magpadayon siya sa pagpangayo diha sa pagtuo, nga dili gayod magduhaduha.’ (Santiago 1:5, 6) Ang modernong-adlawng Nagamandong Lawas kanunayng nag-awhag kanato nga mag-ampo sa dihang mobasa sa Bibliya.

¹⁵ Ang kaalam mao ang praktikal nga pagpadapat sa kahibalo. Busa sa dili pa buksan ang imong Bibliya, pangayog tabang ni Jehova aron imong makuha ang mga punto sa imong pagbasa nga kinahanglang ipadapat sa imong kaugalingong kinabuhi. Ilangkit ang bag-ong mga butang nga nakat-onan uban sa nabatonang kahibalo sa miagi. Ipahiuyon kini diha sa “sumbanan sa makapahimsog nga mga pulong” nga imong nakat-onan. (2 Timoteo 1:13) Palandonga ang mga yugto sa kinabuhi sa mga alagad ni Jehova sa nangagi, ug pangutan-a ang imong kaugalingon kon unsa kahay imong himoon ilalom sa samang mga kahimtang.—Genesis 39:7-9; Daniel 3:3-6, 16-18; Buhat 4:18-20.

16. Unsang praktikal nga mga sugyot ang gihatag aron ang atong pagbasa sa Bibliya mas makahatag ug kapuslanan ug kaayohan?

¹⁶ Ayaw pagbasa aron lamang matapos ang gieskedyul nga mga panid nga basahonon. Ayaw pagdali. Hunahunaa ang imong gibasa. Kon maikag sa usa ka punto, tan-awa ang mga cross reference kon duna niini ang imong Bibliya. Kon dili gihapon tin-aw ang punto, paghimog nota aron makapanukiduki pag dugang sa ulahi. Samtang magbasa ka, markahi ang mga teksto nga buot nimong mahinumdoman o isulat kini. Makabutang ka usab ug kaugalingong mga nota ug mga cross reference diha sa daplin. Alang sa mga teksto nga imong gihunahuna nga magamit ra unya diha sa imong buluhatong pagsangyaw ug pagpanudlo, timan-i ang pangunang pulong ug susiha sa indese sa mga pulong sa Bibliya diha sa likod sa imong Bibliya.b

Kalipayi ang Pagbasa sa Bibliya

17. Nganong angay natong kalipayan ang pagbasa sa Bibliya?

¹⁷ Ang salmista naghisgot bahin sa malipayong tawo kansang “kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii.” (Salmo 1:2) Ang atong adlaw-adlawng pagbasa sa Bibliya dili angay nga usa ka trabaho kondili makapalipay gayod. Usa ka paagi aron makapalipay kini mao ang pagkahimong mahunahunaon sa bili sa mga butang nga nakat-onan. Ang maalamong Haring Solomon nagsulat: “Malipayon ang tawo nga nakakaplag ug kaalam . . . Ang mga dalan niini maoy mga dalan sa kahimuot, ug ang tanang alagianan niini maoy pakigdait. Kini maoy kahoy sa kinabuhi niadtong mga nagakupot niini, ug kadtong mga nagahawid niini pagatawgong malipayon.” (Proverbio 3:13, 17, 18) Ang paningkamot nga gikinahanglan aron mabatonan ang kaalam tinuod nga mapuslanon, kay ang mga dalan niini maoy mga dalan sa kahimuot, pakigdait, kalipay, ug sa kataposan, kinabuhi.

18. Unsay gikinahanglan gawas pa sa pagbasa sa Bibliya, ug unsay atong hisgotan sa sunod nga artikulo?

¹⁸ Oo, ang pagbasa sa Bibliya mapuslanon ug makalipay. Apan igo na ba kini? Ang mga membro sa mga iglesya sa Kakristiyanohan daghan nang siglo nga nagbasa sa Bibliya, ‘kanunayng nagtuon apan wala gayod makadangat sa tukmang kahibalo sa kamatuoran.’ (2 Timoteo 3:7) Aron magmabungahon ang pagbasa sa Bibliya, kinahanglang atong himoon kini uban ang katuyoan nga ipadapat ang kahibalo nga nabatonan diha sa atong kaugalingong mga kinabuhi ug paggamit niini diha sa atong buluhatong pagsangyaw ug pagpanudlo. (Mateo 24:14; 28:19, 20) Kini nagkinahanglag paningkamot ug maayong mga paagi sa pagtuon, nga mahimong makalingaw ug magantihon, ingon sa makita unya nato sa sunod nga artikulo.

[Mga footnote]

Mga Pangutana Agig Pagsubli

• Unsang tambag ang gihatag ngadto sa mga hari sa Israel nga aplikado sa mga magtatan-aw karon, ug ngano?

• Kinsa karon ang sama “sa langyawng mga pumoluyo” ug “sa mga bata,” ug nganong kinahanglang mobasa sila sa Bibliya kada adlaw?

• Unsang praktikal nga mga paagi nga ang ‘matinumanon ug maalamong ulipon’ nagtabang kanato aron regular nga makabasa sa Bibliya?

• Sa unsang paagi makabaton kita ug tinuod nga kaayohan ug kalipay sa atong pagbasa sa Bibliya?

[Hulagway sa panid 9]

Ang mga ansiyano ilabinang nagkinahanglan nga mobasa sa Bibliya kada adlaw

[Hulagway sa panid 10]

Nabatasan ni Jesus ang pagpakigbahin sa pagbasa sa Kasulatan diha sa sinagoga