Magmalipayon sa Pagkahimong mga Mamumuo sa Pagpangani!

“Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.”—MATEO 9:37, 38.

 1. Unsay nakatabang kanato sa pagpadayon sa pagtuman sa kabubut-on sa Diyos?

KON handomon nato ang adlaw nga kita gibawtismohan ingong usa sa mga alagad ni Jehova, nahitabo man kini sa pipila ka tuig kanhi o daghang tuig nang milabay, morag kagahapon lang kini nahitabo. Ang pagdayeg kang Jehova nahimong sentro sa atong dedikadong kinabuhi. Samtang atong gipahimuslan ang higayon sa pagtabang sa uban aron makadungog ug tingali modawat sa mensahe sa Gingharian, ang malipayong pag-alagad kang Jehova maoy atong gihatagan ug pangunang pagtagad. (Efeso 5:15, 16) Bisan karon, atong makita nga morag kusog kaayong modagan ang panahon kon kita puliki, tungod sa ‘kadaghan sa buluhaton sa Ginoo.’ (1 Corinto 15:58) Bisan tuod may mga problema kita nga sagubangon, ang atong kalipay sa pagtuman sa kabubut-on ni Jehova magdasig kanato sa pagpadayon.—Nehemias 8:10.

 2. Unsay nakadugang sa kalipay nga atong bation diha sa mahulagwayon nga buluhatong pagpangani?

² Ingong mga Kristohanon, kita nagpakigbahin sa mahulagwayon nga buluhatong pagpangani. Gipakasama ni Jesu-Kristo ang pagpanigom sa mga tawo alang sa kinabuhing walay kataposan sa usa ka pagpangani. (Juan 4:35-38) Kay nagpakigbahin man kita sa buluhatong pagpangani, makapadasig susihon ang gibating kalipay sa unang Kristohanong mga mamumuo sa pagpangani. Atong hisgotan pag-usab ang tulo ka butang nga makadugang sa kalipay nga atong bation diha sa buluhatong pagpangani karong panahona. Kini mao (1) ang atong mensahe sa paglaom, (2) ang kalamposan sa atong pagpangita, ug (3) ang atong makigdaiton nga tinamdan ingong mga mamumuo sa pagpangani.

Gipadala Ingong mga Mamumuo sa Pagpangani

 3. Sa unsang bahin nga malipayon ang unang mga sumusunod ni Jesus?

³ Pagkadako sa kausaban sa mga kinabuhi sa unang mga mamumuo sa pagpangani—ilabina sa 11 ka matinumanong mga apostoles ni Jesus—sa tuig sa 33 K.P. sa dihang sila mitungas sa bukid sa Galilea aron makigkita sa gibanhaw nga Kristo! (Mateo 28:16) “Kapin sa lima ka gatos ka igsoon” tingali presente niadtong okasyona. (1 Corinto 15:6) Ilang mahinumdoman kanunay ang sugo nga gihatag kanila ni Jesus. Iyang gisugo sila: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Bisan pa sa grabeng paglutos, malipayon kaayo sila sa buluhatong pagpangani tungod kay ilang nakita ang mga kongregasyon sa mga sumusunod ni Kristo nga natukod sa nagkalainlaing dapit. Wala magdugay, ‘ang maayong balita gikawali diha sa tibuok kalalangan ilalom sa langit.’—Colosas 1:23; Buhat 1:8; 16:5.

 4. Ilalom sa unsang mga kahimtang nga gipadala ang mga tinun-an ni Kristo?

⁴ Sa sayosayong bahin sa iyang ministeryo sa Galilea, gipatawag ni Jesus ang 12 ka apostoles ug gipadala sila ilabina sa pagmantala: “Ang gingharian sa mga langit haduol na.” (Mateo 10:1-7) Siya mismo “migikan aron sa paglibot sa tanang siyudad ug mga balangay [sa Galilea], nga nagtudlo diha sa ilang mga sinagoga ug nagwali sa maayong balita sa gingharian ug nag-ayo sa tanang matang sa balatian ug sa tanang matang sa kaluyahon.” Naluoy si Jesus sa mga tawo ‘tungod kay sila gipanitan ug nagkatibulaag sama sa mga karnero nga walay magbalantay.’ (Mateo 9:35, 36) Kay natandog pag-ayo, iya dayong gisultihan ang iyang mga tinun-an: “Oo, dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani [si Jehova nga Diyos] nga magpadalag mga mamumuo ngadto sa iyang pagpangani.” (Mateo 9:37, 38) Ang pagtimbangtimbang ni Jesus sa panginahanglan ug mga mamumuo sa pagpangani sama ra nianang sa Judea sa dihang unom ka bulan na lamang ang nahibilin sa iyang yutan-ong ministeryo. (Lucas 10:2) Niining duha ka higayon, iyang gipadala ang iyang mga sumusunod ingong mga mamumuo sa pagpangani.—Mateo 10:5; Lucas 10:3.

Ang Atong Mensahe sa Paglaom

 5. Unsang matanga sa mensahe ang atong giwali?

⁵ Ingong presenteng-adlawng mga alagad ni Jehova, kita malipayong mosanong sa panginahanglan ug mga mamumuo alang sa pagpangani. Usa ka butang nga nakapalipay kaayo kanato mao kanang pagdala nato sa mensahe sa paglaom ngadto sa nawad-an ug kadasig ug sa nagmagul-anon. Sama sa unang-siglong mga tinun-an ni Jesus, pagkadako sa atong pribilehiyo nga makawali sa maayong balita—usa ka tinuod nga mensahe sa paglaom—ngadto sa mga tawong ‘gipanitan ug nagkatibulaag sama sa mga karnero nga walay magbalantay’!

 6. Unsang buluhaton nga nagpakigbahin ang mga apostoles sa unang siglo?

⁶ Sa tungatunga sa unang siglo, okupado si apostol Pablo sa pagsangyaw sa maayong balita. Ug ang iyang buluhatong pagpangani epektibo gayod, kay sa dihang nagsulat sa mga Kristohanon sa Corinto sa mga 55 K.P., siya miingon: “Ipahibalo ko kaninyo, mga igsoon, ang maayong balita nga gipahayag ko kaninyo, nga inyong gidawat usab, nga niini kamo usab nagabarog.” (1 Corinto 15:1) Ang mga apostoles ug ang ubang unang mga Kristohanon maoy makugihong mga mamumuo sa pagpangani. Bisan tuod walay gipadayag kanato ang Bibliya kon pila ka apostoles ang nakalabang buhi sa dagkong mga hitabo nga natapos sa pagkalaglag sa Jerusalem sa 70 K.P., kita nahibalo nga si apostol Juan nagpadayon sa pagsangyaw sa mga 25 ka tuig sa ulahi.—Pinadayag 1:9.

7, 8. Unsang mensahe sa paglaom ang giwali sa mga alagad ni Jehova nga mas dinalian karon kay sa kaniadto?

⁷ Dayon miabot ang mga siglo sa pagmando sa klero sa Kakristiyanohan, ang apostata nga “tawo sa kalapasan.” (2 Tesalonica 2:3) Apan, sa naghinapos ang ika-19ng siglo, kadtong naningkamot sa pagpahiuyon sa ilang mga kinabuhi sama nianang sa unang Kristiyanidad midawat sa mensahe sa paglaom, ug miwali sa Gingharian. Sa pagkamatuod, sukad sa unang gula niini (Hulyo 1879), makita sa ngalan niining basahona ang mga pulong “Nagwali sa Presensiya ni Kristo,” “Nagwali sa Gingharian ni Kristo,” o “Nagapahayag sa Gingharian ni Jehova.”

⁸ Ang langitnong Gingharian sa Diyos natukod sa mga kamot ni Jesu-Kristo sa 1914, ug kita karon nagawali sa mensahe sa paglaom nga mas dinalian kay sa kaniadto. Ngano? Tungod kay usa sa mga panalangin sa pagmando sa Gingharian mao ang duol na kaayong kataposan sa presenteng daotang sistema. (Daniel 2:44) Aduna pa bay mas maayong mensahe kay niini? Ug may molabaw pa ba sa kalipay nga atong bation kay sa makigbahin sa pagpahayag sa Gingharian sa dili pa moabot ang “dakong kasakitan”?—Mateo 24:21; Marcos 13:10.

Usa ka Malamposong Pagpangita

 9. Unsang sugo ang gihatag ni Jesus sa iyang mga tinun-an, ug unsay reaksiyon sa mga tawo sa mensahe sa Gingharian?

⁹ Laing butang nga nakadugang sa atong kalipay ingong mga mamumuo sa pagpangani mao ang kalamposan sa atong pagpangita sa mga tawo nga mahimong mga tinun-an ug moduyog kanato sa buluhatong pagpangani. Balik sa 31-32 K.P., gisugo ni Jesus ang iyang mga tinun-an: “Sa bisan unsang siyudad o balangay nga kamo mosulod, pangitaa kon kinsa didto ang takos, ug puyo kamo didto hangtod sa inyong pagbiya.” (Mateo 10:11) Dili tanang tawo takos, ingon sa gipakita nilang reaksiyon sa mensahe sa Gingharian. Bisan pa niana, madasigong giwali sa mga tinun-an ni Jesus ang maayong balita sa bisan diin nga dapit nga may mga tawo.

10. Sa unsang paagi gipadayon ni Pablo ang iyang pagpangita sa mga tawong takos?

¹⁰ Human sa pagkamatay ug pagkabanhaw ni Jesus, ang pagpangita sa mga tawong takos nagpadayon nga madasigon. Si Pablo nangatarongan sa mga Hudiyo diha sa ilang sinagoga ug sa mga tawo nga diha sa tiyanggihan sa Atenas. Sa dihang nagpamatuod siya sa Areopago diha nianang siyudad sa Gresya, “dihay pipila ka tawo nga miduyog kaniya ug nahimong mga magtutuo, apil kanila usab mao si Dionisio, usa ka maghuhukom sa korte sa Areopago, ug usa ka babayeng ginganlag Damaris, ug uban pa gawas kanila.” Bisan asa moadto si Pablo, siya sulondan usab sa pagsangyaw sa “publiko ug sa balay ug balay.”—Buhat 17:17, 34; 20:20.

11. Unsang mga pamaagi ang gigamit aron matuman ang ministeryo sa katuigang nanglabay?

¹¹ Sa hapit nang matapos ang mga tuig sa ika-19ng siglo, ang dinihogang mga Kristohanon maisogong nakigbahin sa pagpangita sa mga tawong takos. Diha sa usa ka artikulo nga nag-ulohang “Gidihogan sa Pagsangyaw,” ang Zion’s Watch Tower sa Hulyo/Agosto 1881 nag-ingon: “Ang pagsangyaw sa maayong balita . . . ginapaabot ngadto ‘sa mga maaghop’—ngadto sa mga tawong andam ug buot mamati, aron matukod gikan sa ilang taliwala ang lawas ni Kristo, ang kaubang mga manununod.” Ang mga mamumuo sa Diyos sa pagpangani sagad makigkita sa mga tawo samtang manggawas sila gikan sa pagsimba ug manghatag kanila ug mga tract nga nasudlan sa mga mensahe sa Kasulatan nga gilaraw aron mapukaw ang interes sa mga tawong takos. Human sa pagpamalandong ug maayo sa pagkaepektibo niining paagiha sa pagsangyaw, giawhag sa Watch Tower sa Mayo 15, 1903, ang mga mamumuo sa pagpangani sa pag-apod-apod ug mga tract nga “gikan sa balay ug balay, sa Dominggo sa buntag.”

12. Sa unsang paagi kita miuswag sa pagkahimong epektibo diha sa atong buluhatong pagsangyaw? Iilustrar.

¹² Sa katuigang di pa dugay, atong gipadako ang atong ministeryo pinaagi sa pakigkita sa mga tawo sa mga dapit gawas sa ilang mga balay. Nakita nga epektibo kaayo kini diha sa kayutaan diin ang mga kahimtang sa ekonomiya ug ang pagpangagpas ug lulinghayaw nagpalayo sa mga tawo gikan sa ilang mga balay sa mga panahon nga kita kasagarang moduaw. Sa napanid-an sa usa ka Saksi sa Inglaterra ug sa iyang kauban nga regular nga manggikan ang mga bisita sakay sa bus human magpalabay ug usa ka adlaw diha sa baybay, nagbaton sila ug kaisog sa pagsakay sa mga bus ug sa pagtanyag sa mga kopya sa Ang Bantayanang Torre ug Pagmata! ngadto sa mga pasahero. Sa usa ka bulan, sila nakaapod-apod ug 229 ka kopya. Sila mitaho: “Dili kami mahadlok sa pagsangyaw diha sa daplin sa baybay, sa teritoryo sa negosyo, o sa bisan unsang kalisod nga among maatubang tungod kay kami nahibalo nga si Jehova nagauban kanamo kanunay.” Nakakita sila ug ruta sa magasin, nakasugod ug pagtuon sa Bibliya, ug silang duha nakaalagad ingong oksilyare payunir.

13. Unsang pagpasibo diha sa atong ministeryo ang gikinahanglan karon diha sa ubang mga dapit?

¹³ Samtang nagpadayon ang pagpangita sa mga tawong takos, gikinahanglang timbangtimbangon ug maayo ang atong ministeryo sa pipila ka dapit. Bisag daghang Saksi sagad makigbahin sa pagsangyaw gikan sa balay ug balay mabuntag sa Dominggo, diha sa pipila ka dapit ilang makita nga ang sayo nga pagbisita sa mga balay sa mga tawo dili kaayo epektibo tungod kay ang mga tagbalay tingalig namahulay pa. Pinaagi sa pagpahiangay sa ilang eskedyul, gihimo karon sa daghang Saksi ang ilang pagpangita sa ulahing bahin sa adlaw, tingali human sa Kristohanong mga tigom. Ug kini nga pagpangita may maayo gayod nga resulta. Sa miaging tuig ang gidaghanon sa mga magwawali sa Gingharian sa tibuok yuta miuswag ug 2.3 porsiyento. Napasidunggan niini ang Agalon sa pagpangani ug nakapalipay sa atong mga kasingkasing.

Pagpabiling Makigdaiton Diha sa Buluhatong Pagpangani

14. Pinaagi sa unsang tinamdan nga ipresentar nato ang atong mensahe, ug ngano?

¹⁴ Laing katarongan nga kita malipayon maoy tungod sa atong makigdaitong tinamdan nga atong ginapasundayag diha sa buluhatong pagpangani. “Inigsulod ninyo sa balay,” si Jesus miingon, “paghatag ug katahoran sa panimalay; ug kon takos ang balay, ipaabot niini ang kalinaw nga inyong gipanghinaot.” (Mateo 10:12, 13) Ang Hebreohanong pagpangomosta ug ang katugbang nga pulong diha sa Biblikanhong Grego nagkahulogan ug ‘Hinaot nga maayo ang imong lakat.’ Kini nga tinamdan mogiya sa paagi sa atong pagduol sa mga tawo kon magsangyaw kita sa maayong balita. Manghinaot kita nga mosanong sila sa mensahe sa Gingharian. Alang sa mga tawong mosanong, sila adunay palaaboton nga mapasig-uli sa Diyos basta maghinulsol sila sa ilang mga sala, magbag-o, ug motuman sa iyang kabubut-on. Sa baylo, ang pakigdait uban sa Diyos motultol ngadto sa kinabuhing walay kataposan.—Juan 17:3; Buhat 3:19; 13:38, 48; 2 Corinto 5:18-20.

15. Sa unsang paagi makapabilin kitang makigdaiton kon dili maayo ang reaksiyon sa atong gikaatubang diha sa atong buluhatong pagsangyaw?

¹⁵ Sa unsang paagi makapabilin kita nga makigdaiton kon dili maayo ang reaksiyon sa atong gikaatubang? Si Jesus nagsugo: “Kon [ang balay] dili-takos, ang kalinaw gikan kaninyo ipabalik nganha kaninyo.” (Mateo 10:13) Diha sa asoy ni Lucas bahin sa pagpadala sa 70 ka tinun-an makita kining mga pulonga ni Jesus: “Kon adunay usa ka higala sa kalinaw didto, ang inyong kalinaw mahianha kaniya. Apan kon wala, kini mobalik kaninyo.” (Lucas 10:6) Kon atong sangyawan ang mga tawo sa maayong balita, sangyawan nato sila nga maayo ang buot ug sa paagi nga makigdaiton. Ang bugnaw nga tinagdan, pagreklamo, o masakit nga sinultihan sa tagbalay mopatungha lamang ug kahimtang nga ‘mobalik kanato’ ang atong mensahe sa pakigdait. Apan dili kini makapawala sa atong pakigdait, nga usa ka bunga sa balaang espiritu ni Jehova.—Galacia 5:22, 23.

Usa ka Maayong Tumong Alang sa mga Mamumuo sa Pagpangani

16, 17. (a) Unsay atong tumong sa dihang maghimog mga pagbalikduaw? (b) Sa unsang paagi kita makatabang niadtong dunay mga pangutana bahin sa Bibliya?

¹⁶ Ingong mga mamumuo sa pagpangani kita malipayon nga may bahin sa pagpanigom sa katawhan alang sa kinabuhing walay kataposan. Ug pagkamalipayon nato kon ang tawo nga atong sangyawan mosanong, ug gustong mokat-on pa ug dugang, ug mopakita nga ‘usa ka higala sa pakigdait’! Tingali daghan siya ug mga pangutana bahin sa Bibliya ug imposible nga matubag nato ang tanan niini sa usa ka pagduaw. Kay dili man maayo nga magdugay sa unang pagduaw, unsay atong himoon? Himoon natong tumong kanang girekomendar mga 60 ka tuig na kanhi.

¹⁷ “Ang tanang mga Saksi ni Jehova angayng andam sa pagdumala ug sulondang mga pagtuon sa Bibliya.” Kanang pulonga migula sa ikatulong serye sa mga pulyetong Model Study nga naghatag ug instruksiyon nga gipatik gikan sa 1937 ngadto sa 1941. Kini nag-ingon: “Ang tanang magmamantala [sa Gingharian] angayng magkugi sa pagtabang sa tanang posibleng paagi sa mga tawo nga maayo ug kabubut-on nga nagpakitag interes sa mensahe sa Gingharian. Angayng duawon ug balik [mga pagbalikduaw] kining mga tawhana, tubagon ang nagkalainlaing mga pangutana . . . , ug dayon sugdan ang sulondang pagtuon . . . sa labing madali kon mahimo.” Oo, ang atong tumong sa mga pagbalikduaw maoy aron makasugod ug usa ka pagtuon sa Bibliya diha sa balay ug dumalahon kini nga regular.a Ang mahigalaon nga tinamdan ug mahigugmaong kabalaka sa mga tawong interesado mag-aghat kanato sa pagpangandam ug maayo ug dumalahon ang pagtuon sa epektibong paagi.

18. Sa unsang paagi makatabang kita sa mga bag-ohan aron mahimong mga tinun-an ni Jesu-Kristo?

¹⁸ Pinaagi sa tabang sa librong Kahibalo nga Motultol sa Kinabuhing Walay Kataposan ug sa mga brosyur sama sa Unsay Gikinahanglan sa Diyos Kanato?, makadumala kita ug epektibong mga pagtuon sa Bibliya diha sa balay ug busa makapakigbahin sa pagtabang sa bag-ong mga interesado nga mahimong mga tinun-an. Samtang maningkamot kita sa pagsundog sa Dakong Magtutudlo, si Jesu-Kristo, lagmit ang mga estudyante sa Bibliya makakat-on ra sa atong makigdaiton, malipayong kinaiya, sa atong pagkasinsero, ug sa atong pagtahod sa mga sukdanan ug mga tambag ni Jehova. Sa dihang tabangan nato ang mga bag-ohan pinaagi sa pagtubag sa ilang mga pangutana, tudloan usab nato sila kutob sa atong maarangan kon unsaon nila pagtubag sa mga tawong mangutana kanila. (2 Timoteo 2:1, 2; 1 Pedro 2:21) Ingong mahulagwayong mga mamumuo sa pagpangani, kita magmalipayon gayod nga dunay aberids nga 4,766,631 ka pagtuon sa Bibliya diha sa balay ang gidumala sa tibuok yuta niining miaging tuig sa pag-alagad. Kita magmalipayon na gayod kon kita mismo usa na sa mga mamumuo sa pagpangani nga nagpakigbahin sa buluhaton sa pagtuon sa Bibliya diha sa balay.

Pagpabiling Malipayon Diha sa Pagpangani

19. Nganong dunay maayong mga katarongan nga magmalipayon sa pagpangani panahon sa ministeryo ni Jesus ug wala magdugay human niadto?

¹⁹ Dihay maayong mga katarongan nga magmalipayon sa buluhatong pagpangani sa panahon sa ministeryo ni Jesus ug wala magdugay human niadto. Daghan niadtong panahona ang misanong sa maayong balita. Dihay dakong kalipay ilabina sa Pentekostes 33 K.P., kay duolan sa 3,000 niadtong tungora ang midawat sa sugo ni Pedro, nakadawat sa balaang espiritu ni Jehova, ug nahimong bahin sa nasod sa Diyos nga espirituwal nga Israel. Sa pagkatinuod, ang ilang gidaghanon nagpadayon sa pag-uswag, ug midagaya ang kalipay samtang “sa adlaw-adlaw padayong gitipon ni Jehova ngadto kanila ang mga ginaluwas.”—Buhat 2:37-41, 46, 47; Galacia 6:16; 1 Pedro 2:9.

20. Unsay nakahatag kanatog dakong kalipay diha sa atong buluhatong pagpangani?

²⁰ Niadtong tungora, natuman ang tagna ni Isaias: “Gipadaghan mo [Jehova] ang molupyo sa nasod; alang niini gipadako mo ang pagmaya. Sila nagmaya sa imong atubangan sama sa pagmaya sa ting-ani, sama niadtong nagmalipayon sa dihang sila magbahinbahin sa inagaw.” (Isaias 9:3) Bisag nakita na nato karon nga ang ‘gipadaghan nga nasod’ sa mga dinihogan halos kompleto na, modagaya ang atong kalipay samtang magtan-aw kita sa gidaghanon sa ubang mga mamumuo sa pagpangani nga nagkadaghan matag tuig.—Salmo 4:7; Zacarias 8:23; Juan 10:16.

21. Unsay atong hisgotan sa sunod nga artikulo?

²¹ Daghan kitag katarongan nga magpabiling malipayon diha sa buluhatong pagpangani. Ang atong mensahe sa paglaom, ang atong pagpangita sa mga tawong takos, ug ang atong makigdaitong tinamdan—kining tanan maoy mga butang nga makahatag kanato ug kalipay ingong mga mamumuo sa pagpangani. Apan, nakapukaw kini ug dili maayong reaksiyon sa kadaghanan. Nakaagi niini si apostol Juan. Siya nabilanggo sa isla sa Patmos “tungod sa pagsulti bahin sa Diyos ug sa pagpamatuod bahin kang Jesus.” (Pinadayag 1:9) Nan, sa unsang paagi makapabilin kitang malipayon kon makaatubang kitag paglutos ug pagsupak? Unsay makatabang kanato sa pagsagubang sa matig-a nga tinamdan sa kadaghanan sa atong ginasangyawan karon? Ang among sunod nga artikulo naghatag ug Kasulatanhong tabang aron matubag kining mga pangutanaha.

[Footnote]

Unsaon Nimo Pagtubag?

• Unsa ang mahulagwayon nga buluhatong pagpangani?

• Unsang matanga sa mensahe ang atong ginawali?

• Nganong malamposon ang atong pagpangitag mga tinun-an?

• Sa unsang paagi makapabilin kitang makigdaiton diha sa buluhatong pagpangani?

• Nganong magpadayon kita nga magmalipayon diha sa pagpangani?

[Mga hulagway sa panid 12, 13]

Pagsangyaw panahon sa ika-1 ug ika-20 nga siglo

[Mga hulagway sa panid 13]

Sama kang Pablo, ang presenteng-adlaw nga mga mamumuo sa pagpangani naningkamot sa pagduaw sa mga tawo sa tanang dapit

[Hulagway sa panid 13]

Iwali ang maayong balita nga maayo ang buot