Mga Problema sa Tawo sa Dili Madugay Matapos Na!
“ANG makitawhanong pagtabang limitado rag bili kon kini dili bahin sa usa ka mas malukpanong estratehiya ug kon kini walay politikanhong pagpaluyo nga ang tumong maoy pagtagad sa pangunang mga hinungdan sa panag-away. Balikbalik nang gipakita sa kasinatian nga ang makitawhanong pagtabang lamang dili makasulbad sa mga problema nga politikanhon ang kinaiyahan.”—The State of the World’s Refugees 2000.
Bisan pa sa dakong makitawhanong pagtabang, ang mga problema sa tawo padayong nagkadako. Posible kaha nga kini masulbad sa politika sa malungtarong paagi? Ang tinuod, gamay ra kaayo ang posibilidad. Apan asa pa man kita makadangop? Pinaagi sa makahuloganong mga pulong sa sinugdanan sa iyang sulat ngadto sa mga Kristohanon sa Efeso, gipatin-aw ni apostol Pablo kon sa unsang paagi taposon sa Diyos ang tanang problema sa tawo. Gipaila pa gani niya ang instrumento nga gamiton sa Diyos sa paghimo niini—usa ka instrumento nga magtagad sa pangunang mga hinungdan sa tanang problema nga naghampak kanato karon. Nganong dili palandongon ang gisulti ni Pablo? Ang maong mga pulong makita diha sa Efeso 1:3-10.
“Aron Tigomon Pag-usab ang Tanang Butang Diha Kang Kristo”
Ang katuyoan sa Diyos, matod sa apostol, mao ang iyang gitawag nga “usa ka pagdumala [o pagpalakat sa mga kahikayan] inig-abot sa kinutoban sa tinudlong kapanahonan.” Unsay ipasabot niini? Kini nagpasabot nga ang Diyos nagtakda ug panahon sa dihang siya molihok sa usa ka paagi “aron tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.” (Efeso 1:10) Oo, gisugdan paggamit sa Diyos ang usa ka kahikayan aron ipasig-uli ang panag-uyon sa tanang butang sa langit ug sa yuta ubos sa iyang direktang pagkontrolar. Makaiikag, mahitungod sa termino dinhi nga gihubad nga “aron tigomon pag-usab,” ang eskolar sa Bibliya nga si J. H. Thayer nag-ingon: “Tigomon pag-usab alang sa iyang kaugalingon . . . ang tanang butang ug mga tawo (nga hangtod niining panahona wala magkahiusa tungod sa sala) ngadto sa usa ka nahiusang kahimtang diha kang Kristo.”
Gipakita niana nga kinahanglang himoon kini sa Diyos tungod sa paagi sa pagtungha sa kawalay-panaghiusa sa sinugdan. Sa sayong bahin sa kasaysayan sa tawo, ang atong unang mga ginikanan, si Adan ug Eva, misunod kang Satanas nga Yawa sa pagrebelde batok sa Diyos. Buot nilang mabatonan ang pagkaindependente nga mao ang katungod sa paghukom alang sa ilang kaugalingon kon unsay maayo ug daotan. (Genesis 3:1-5) Uyon sa hustisya sa Diyos, gipalagpot sila gikan sa pamilya sa Diyos ug sila dili na iyang mga higala. Ilang gibanlod ang mga tawo ngadto sa pagkadili-hingpit uban sa tanang makalilisang nga mga resulta nga naagoman nato karon.—Roma 5:12.
Temporaryong Pagtugot sa Daotan
‘Nganong gitugotan man sa Diyos nga himoon nila kana?’ tingali mangutana ang uban. ‘Nganong wala na lang niya gamita ang iyang supremong gahom ug gipatuman ang iyang kabubut-on, sa ingon nalikayan unta ang tanang kasakit ug pag-antos nga naagoman nato karon?’ Natural lang tingali nga maghunahuna nianang paagiha. Apan unsa ba gayoy mapamatud-an kon gamiton ang maong dako kaayong gahom? Ikaw ba modayeg o mouyon ni bisan kinsa nga sa una pa lang nga timailhan sa pagsupak basta na lang mopukan sa tanang mosupil tungod kay siya dunay gahom sa pagbuhat niana? Dili gayod.
Sa pagkatinuod ang maong mga rebelde wala maghagit sa labing dakong gahom sa Diyos. Ang ilang gihagit sa partikular mao ang pagkamatarong ug pagkahusto sa iyang paagi sa pagmando. Aron mahusay sa bug-os ang paninugdang mga isyu nga gipatungha, gitugotan ni Jehova ang iyang mga linalang sa pagmando sa ilang kaugalingon nga wala niya direktang kontrolaha sulod sa limitadong panahon. (Ecclesiastes 3:1; Lucas 21:24) Kon matapos na kanang panahona, siya mosalga aron bug-os nga kontrolahon pag-usab ang yuta. Nianang panahona maklaro na kaayo nga ang iyang paagi sa pagmando mao ang bugtong paagi nga mogarantiya ug malungtarong kalinaw, kalipay, ug kauswagan sa mga molupyo sa yuta. Dayon ang tanang tigdaogdaog sa kalibotan pagawagtangon hangtod sa hangtod.—Salmo 72:12-14; Daniel 2:44.
“Sa Wala pa ang Pagkatukod sa Kalibotan”
Dugay na kanhi nga katuyoan ni Jehova nga himoon kining tanan. Si Pablo miingon nga “sa wala pa ang pagkatukod sa kalibotan.” (Efeso 1:4) Kana maoy dili sa panahong wala pa lalanga ang yuta o si Adan ug Eva. Kanang maong kalibotan “maayo kaayo,” ug wala pa mahitabo ang pagrebelde. (Genesis 1:31) Nan, unsa nga “kalibotan” ang gipasabot ni apostol Pablo? Ang kalibotan sa mga anak ni Adan ug Eva—makasasala, dili-hingpit nga kalibotan sa mga tawo nga dunay paglaom nga malukat. Sa wala pay anak nga natawo, nahibalo na si Jehova kon unsaon niya pagdumala ang mga kahimtang sa pagtaganag kahupayan alang sa malukat nga mga kaliwat ni Adan.—Roma 8:20.
Siyempre, wala kini magpasabot nga ang Soberano sa uniberso kinahanglang modumala sa mga kahimtang sama sa paagi sa mga tawo. Kay nakaamgo nga basin motungha ang usa ka emerhensiya, sila magplano ug lainlaing detalyado nga mga pamaagi aron makasagubang. Dili ingon niana ang paagi sa Diyos. Ipahayag lamang sa labing gamhanang Diyos ang iyang katuyoan ug ipalampos kini. Bisan pa niana, gipatin-aw ni Pablo kon sa unsang paagi si Jehova nakahukom sa pagsulbad sa mga butang aron makahatag ug bug-os nga kahupayan sa mga tawo. Unsa kining maong mga pamaagi?
Kinsay Mohatag ug Kahupayan?
Gipatin-aw ni Pablo nga ang dinihogan sa espiritu nga mga tinun-an ni Kristo dunay linaing papel sa pagwagtang sa kadaot nga gipahinabo sa sala ni Adan. Si Jehova ‘nagpili kanato nga nahiusa kang Kristo,’ matod ni Pablo, aron sa pagmando uban ni Jesus diha sa iyang langitnong Gingharian. Sa pagpatin-aw ug dugang niini, si Pablo miingon nga ‘kita gimbut-an daan ni Jehova nga sagopon ingon nga iyang kaugalingong mga anak pinaagi ni Jesu-Kristo.’ (Efeso 1:4, 5) Siyempre, sila wala pilia, o gimbut-an daan, ni Jehova ingong mga indibiduwal. Apan, iya gayong gimbut-an daan ang usa ka grupo sa matinumanon ug debotadong mga tawo nga makig-ambit uban kang Kristo sa pagwagtang sa kadaot nga gipahinabo ni Satanas nga Yawa, apil ni Adan ug Eva, diha sa tawhanong pamilya.—Lucas 12:32; Hebreohanon 2:14-18.
Pagkakahibulongang butang! Sa iyang orihinal nga hagit batok sa pagkasoberano sa Diyos, gipakita ni Satanas nga depektoso ang tawhanong linalang sa Diyos—nga kon mailalom sa igong kapit-os o tentasyon, silang tanan morebelde batok sa pagmando sa Diyos. (Job 1:7-12; 2:2-5) Sa usa ka talagsaong pagpasundayag sa “iyang mahimayaong dili-takos nga kalulot,” sa ngadtongadto gipakita ni Jehova nga Diyos ang iyang pagsalig sa iyang yutan-ong mga linalang pinaagi sa pagsagop sa pipila gikan sa makasasalang pamilya ni Adan aron mahimong iyang espirituwal nga mga anak. Kadtong bahin niining gamayng grupo pagadad-on aron moalagad sa langit. Alang sa unsang katuyoan?—Efeso 1:3-6; Juan 14:2, 3; 1 Tesalonica 4:15-17; 1 Pedro 1:3, 4.
Kining gisagop nga mga anak sa Diyos, matod ni apostol Pablo, mahimong “kaubang mga manununod ni Kristo” diha sa iyang langitnong Gingharian. (Roma 8:14-17) Ingong mga hari ug saserdote, duna unya silay bahin sa pagpahigawas sa tawhanong pamilya gikan sa kasakit ug pag-antos nga naagoman niini karon. (Pinadayag 5:10) Tinuod, “ang tibuok kalalangan duyog nga nagpadayon sa pag-agulo ug anaa sa kasakitan hangtod karon.” Apan, sa dili madugay kining pinili gayod nga mga anak sa Diyos molihok uban kang Jesu-Kristo, ug sa makausa pa ang tanang matinumanong mga tawo “ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”—Roma 8:18-22.
“Kagawasan Pinaagi sa Lukat”
Kining tanan naposible pinaagi sa labing talagsaon ug hamiling pagpahayag sa dili-takos nga kalulot sa Diyos alang niining kalibotan sa malukat nga katawhan—ang halad lukat ni Jesu-Kristo. Si Pablo misulat: “Pinaagi [ni Jesu-Kristo] atong nabatonan ang kagawasan pinaagi sa lukat pinaagi sa iyang dugo, oo, ang kapasayloan sa atong kalapasan, sumala sa bahandi sa iyang dili-takos nga kalulot.”—Efeso 1:7.
Si Jesu-Kristo mao ang pangunang persona diha sa katumanan sa katuyoan sa Diyos. (Hebreohanon 2:10) Ang iyang halad lukat naghatag sa legal nga pasikaranan kang Jehova aron sagopon ang pipila sa mga kaliwat ni Adan ngadto sa iyang langitnong pamilya ug aron mahupay ang mga tawo sa mga resulta sa sala ni Adan, nga dili madaot ang pagsalig sa mga tawo sa Iyang mga balaod ug mga prinsipyo. (Mateo 20:28; 1 Timoteo 2:6) Gisulbad ni Jehova ang mga problema sa paagi nga magtuboy sa iyang pagkamatarong ug magtagbaw sa gipangayo sa hingpit nga hustisya.—Roma 3:22-26.
Ang “Sagradong Tinago” sa Diyos
Sa libolibo ka tuig, wala ipadayag sa Diyos ang detalye kon unsaon niya pagtuman ang iyang katuyoan alang sa yuta. Sa unang siglo K.P., “gipahibalo niya [sa mga Kristohanon] ang sagradong tinago sa iyang kabubut-on.” (Efeso 1:9) Si Pablo ug ang iyang kaubang dinihogan nga mga Kristohanon nakasabot pag-ayo sa halangdong buluhaton nga gipabuhat kang Jesu-Kristo aron matuman ang katuyoan sa Diyos. Nasabtan na usab nila ang ilang linaing mga papel ingong kaubang mga manunod ni Kristo diha sa iyang langitnong Gingharian. (Efeso 3:5, 6, 8-11) Oo, ang Gingharian nga kagamhanan diha sa mga kamot ni Jesu-Kristo ug sa iyang kauban nga mga magmamando mao ang instrumento nga gamiton sa Diyos sa pagpahinabo ug malungtarong kalinaw dili lamang sa mga langit kondili usab sa yuta. (Mateo 6:9, 10) Pinaagi niini, ipasig-uli ni Jehova kining yutaa ngadto sa kahimtang nga maoy iyang orihinal nga katuyoan niini.—Isaias 45:18; 65:21-23; Buhat 3:21.
Ang iyang tinudlo nga panahon alang sa direktang paglihok aron hinloan ang yuta sa tanang pagdaogdaog ug inhustisya duol nang mahitabo. Apan sa pagkatinuod gisugdan ni Jehova ang proseso sa pagpasig-uli niadto pang Pentekostes 33 K.P. Sa unsang paagi? Pinaagi sa pagsugod niadtong panahona sa pagtigom sa “mga butang sa mga langit,” kadtong magamando uban kang Kristo sa mga langit. Naglakip kini sa mga Kristohanon sa Efeso. (Efeso 2:4-7) Dili pa dugay, sa atong panahon, si Jehova nagtigom sa “mga butang sa yuta.” (Efeso 1:10) Pinaagi sa tibuok kalibotang kampanya sa pagsangyaw, siya nagpahibalo sa tanang kanasoran sa maayong balita bahin sa iyang Gingharian nga kagamhanan diha sa mga kamot ni Jesu-Kristo. Kadtong mosanong bisan karon ginatigom ngadto sa usa ka dapit sa espirituwal nga panalipod ug pagkaayo. (Juan 10:16) Sa dili madugay, diha sa usa ka nahinloan nga paraisong yuta, ilang maagoman ang bug-os nga kagawasan gikan sa tanang inhustisya ug pag-antos.—2 Pedro 3:13; Pinadayag 11:18.
“Daghang makapahingangha nga mga kauswagan” ang nahimo sa makitawhanong mga paningkamot sa pagtabang sa gidaogdaog nga mga tawo. (The State of the World’s Children 2000) Apan, ang labing makapahingangha nga lakang mao ang nagasingabot nga pagsalga ni Kristo Jesus ug sa iyang kaubang mga magmamando diha sa langitnong Gingharian nga kagamhanan. Ilang sulbaron sa bug-os ang tanang pangunang hinungdan sa panag-away ug ang tanang uban pang mga kadaotan nga naghasol kanato. Ilang taposon ang tanang problema sa tawo.—Pinadayag 21:1-4.
[Mga hulagway sa panid 4]
Ang makitawhanong mga buhat wala makasulbad sa mga problema sa tawo
[Hulagway sa panid 6]
Ang halad lukat ni Kristo naghatag sa mga tawo ug kahupayan gikan sa sala ni Adan
[Hulagway sa panid 7]
Posible nga makaplagan ang espirituwal nga panalipod ug pagkaayo karon
[Mga hulagway sa panid 7]
Sa dili madugay, pinaagi sa Mesiyanikong Gingharian, ang bug-os nga kahupayan gikan sa mga problema mabatonan