Unsa ka Lig-on ang Imong Pagsalig sa Diyos?
“Nan, magpadayon sa pagpangita pag-una sa gingharian.”—MATEO 6:33.
1, 2. Unsang mga pagpasibo maylabot sa panarbaho ang gihimo sa usa ka batan-ong lalaki, ug ngano?
GUSTO sa usa ka batan-ong lalaki nga mas makatabang siya sa iyang kongregasyon. Ang problema mao nga ang iyang sekular nga trabaho makabalda sa iyang regular nga pagtambong sa tigom. Giunsa niya kana pagsulbad? Iyang gipayano ang iyang kinabuhi, miluwat siya sa iyang trabaho, ug sa ngadtongadto nakakitag trabaho nga dili makabalda sa iyang Kristohanong mga kalihokan. Karon, mas gamay na ang iyang kita kay kaniadto, apan naatiman gihapon niya ang panginahanglan sa iyang pamilya ug mas nakatabang na siya sa kongregasyon.
2 Nasabtan ba nimo kon nganong gihimo sa batan-ong lalaki ang maong mga pagpasibo? Makita ba nimo ang imong kaugalingon nga naghimo sa susamang mga pagpasibo kon anaa ka sa ingon niining kahimtanga? Dalayegon nga daghang Kristohanon ang naghimo niana, ug ang ilang mga buhat nagpasundayag sa ilang pagsalig sa saad ni Jesus: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” (Mateo 6:33) Sila nagasalig kang Jehova aron makabaton ug kasegurohan inay kay sa sekular nga kalibotan.—Proverbio 3:23, 26.
3. Nganong ang uban maghunahuna tingali kon praktikal pa ba gihapon nga unahon ang Gingharian sa Diyos?
3 Tungod sa malisod nga mga panahon nga atong gikinabuhian, ang uban maghunahuna tingali kon maalamon ba ang desisyon nga gihimo sa maong batan-ong lalaki. Karon, ang ubang mga tawo nag-ilaid sa kakabos samtang ang uban nagtagamtam sa taas kaayo nga sukdanan sa kinabuhi sa tibuok kasaysayan. Kadaghanang tawo sa kabos nga kayutaan maghinamhinam sa pagpahimulos sa bisan unsang kahigayonan aron moarang-arang ang ilang kinabuhi. Sa laing bahin, daghan diha sa adunahang kayutaan ang napit-osan sa pagmentinar sa ilang sukdanan sa kinabuhi bisan pa sa nagakahuyang nga mga ekonomiya, walay-kasegurohan nga trabaho, ug mga amo nga nagkinahanglan ug dugang sa ilang panahon ug kusog. Tungod sa kapit-os nga nalangkit sa pagpanginabuhi, ang uban maghunahuna tingali, ‘Praktikal pa ba gihapon nga unahon pagpangita ang Gingharian?’ Aron matabangan kita sa pagtubag nianang pangutanaha, tagda ang matang sa mga tawo nga gisultian ni Jesus niana.
“Hunong na sa Pagkabalaka”
4, 5. Sa unsang paagi giilustrar ni Jesus nga makataronganon nga ang katawhan sa Diyos dili sobrang mabalaka bahin sa adlaw-adlawng mga butang?
4 Si Jesus didto sa Galilea, nga nakigsulti sa usa ka dakong panon sa katawhan gikan sa daghang dapit. (Mateo 4:25) Pipila lang niadtong mga tawhana, kon aduna man, ang adunahan. Lagmit, kadaghanan kanila mga kabos. Bisan pa niana, giawhag sila ni Jesus nga unahon, dili ang pagbaton ug materyal nga bahandi, kondili ang pagtigom ug bahandi nga mas bililhon pa—ang espirituwal nga bahandi. (Mateo 6:19-21, 24) Siya miingon: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob. Dili ba ang kalag labaw pa man kay sa pagkaon ug ang lawas kay sa besti?”—Mateo 6:25.
5 Sa kadaghanan niadtong namati, ang mga pulong ni Jesus morag dili praktikal paminawon. Sila nahibalo nga kon sila dili maghago, ang ilang mga pamilya mag-antos. Apan, gipahinumdoman sila ni Jesus bahin sa mga langgam. Ang mga langgam mangitag pagkaon adlaw-adlaw, bisan pa niana si Jehova nag-atiman kanila. Gipunting usab ni Jesus ang paagi nga si Jehova nag-atiman sa ihalas nga mga bulak, nga ang katahom niana nakalabaw kang Solomon sa tanan niyang himaya. Kon si Jehova nag-atiman sa mga langgam ug mga bulak, dili ba labaw pa siyang mag-atiman kanato? (Mateo 6:26-30) Sumala sa giingon ni Jesus, ang atong mga kinabuhi (mga kalag) ug mga lawas mas hinungdanon pa kay sa pagkaon nga atong mapalit aron kita mabuhi ug sa mga besti nga atong isul-ob. Kon atong ideboto ang tanan natong mga paningkamot sa pagpangita lamang ug makaon ug ikabesti, nga wala nay mahibilin para sa pag-alagad kang Jehova, wala nato masabti ang mismong katuyoan sa pagkinabuhi.—Ecclesiastes 12:13.
Usa ka Timbang nga Panglantaw
6. (a) Sa unsa responsable ang mga Kristohanon? (b) Kang kinsa bug-os nga misalig ang mga Kristohanon?
6 Siyempre, wala dasiga ni Jesus ang iyang mga mamiminaw sa paghunong sa pagtrabaho ug magpaabot na lang nga ang Diyos maoy motagana sa panginahanglan sa ilang mga pamilya. Bisan ang mga langgam kinahanglang mangitag pagkaon alang sa ilang kaugalingon ug sa ilang mga kuyabog. Busa, ang mga Kristohanon kinahanglang motrabaho aron sila makakaon. Kinahanglang atimanon nila ang mga responsibilidad sa pamilya. Ang Kristohanong mga alagad ug mga ulipon kinahanglang motrabaho nga makugihon alang sa ilang mga agalon. (2 Tesalonica 3:10-12; 1 Timoteo 5:8; 1 Pedro 2:18) Si apostol Pablo subsob nga nagtrabaho ingong tighimog mga tolda aron masuportahan ang iyang kaugalingon. (Buhat 18:1-4; 1 Tesalonica 2:9) Bisan pa niana, ang maong mga Kristohanon wala magsalig sa sekular nga trabaho aron makabaton ug kasegurohan. Sila misalig kang Jehova. Tungod niana, sila nakatagamtam ug kalinaw sa kahiladman nga wala batia sa uban. Ang salmista nag-ingon: “Sila nga nagasalig kang Jehova nahisama sa Bukid sa Zion, nga dili matarog, kondili magapabilin hangtod sa panahong walay tino.”—Salmo 125:1.
7. Lagmit unsa ang panglantaw sa usa nga dili hugot nga nagasalig kang Jehova?
7 Si bisan kinsa nga dili hugot nga nagasalig kang Jehova lahi tingali ug hunahuna. Ang kadaghanan sa mga tawo mag-isip sa materyal nga bahandi ingong pangunang yawi sa kasegurohan. Busa, ang mga ginikanan nagdasig sa ilang mga anak sa paggugol sa dakong bahin sa ilang pagkabatan-on sa pagkuhag taas nga edukasyon, nga naglaom nga kana mag-andam kanila alang sa dagkog-suweldong mga trabaho. Ikasubo, ang pipila ka Kristohanong mga pamilya nakaagom sa dakong kapildihan, tungod kay ang ilang mga anak dili na mahunahunaon sa espirituwal nga mga butang kondili nangagpas na hinuon sa materyalistikong mga tumong.
8. Unsang pagkatimbang ang kinahanglang huptan sa mga Kristohanon?
8 Busa, ang maalamong mga Kristohanon nakaamgo nga ang tambag ni Jesus mapadapat karon sama niadtong unang siglo, ug sila naningkamot sa pagpabiling timbang. Bisan pag kinahanglan silang mogugol ug daghang oras diha sa sekular nga trabaho aron maatiman ang ilang Kasulatanhong mga responsibilidad, wala gayod nila tugoti ang panginahanglan nga mokita ug salapi nga mopugong kanila sa pag-una sa mas hinungdanong espirituwal nga mga butang.—Ecclesiastes 7:12.
“Ayaw Gayod Pagkabalaka”
9. Sa unsang paagi gipasaligan ni Jesus kadtong bug-os nga nagasalig kang Jehova?
9 Sa iyang Wali sa Bukid, giawhag ni Jesus ang iyang mga mamiminaw: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga.” (Mateo 6:31, 32) Makapadasig gayod kining mga pulonga! Kon kita bug-os nga mosalig kang Jehova, siya motabang gayod kanato. Apan, ang mga pulong ni Jesus makapahinuklog usab. Kana nagpahinumdom kanato nga kon kita “maikagong” mangagpas sa materyal nga mga butang, ang atong panghunahuna susama nianang sa “mga nasod,” mga tawo nga dili matuod nga mga Kristohanon.
10. Sa dihang ang usa ka batan-ong lalaki nagpatambag kang Jesus, sa unsang paagi gipadayag ni Jesus kon unsay gihigugma pag-ayo sa batan-ong lalaki?
10 Sa usa ka higayon, ang usa ka dato kaayo nga batan-ong lalaki nangutana kang Jesus kon unsay angay niyang buhaton aron makabaton ug kinabuhing walay kataposan. Gipahinumdoman siya ni Jesus sa mga kinahanglanon sa Balaod, nga gipatuman pa niadtong panahona. Ang batan-ong lalaki nagpasalig kang Jesus: “Akong gisunod kining tanan; unsa pay akong kulang?” Ang tubag ni Jesus morag dili praktikal paminawon para sa uban. Siya miingon: “Kon buot ka nga mahingpit, lakaw ug ibaligya ang imong mga kabtangan ug ipanghatag sa mga kabos ug makabaton ka ug bahandi sa langit, ug umari ka mahimong akong sumusunod.” (Mateo 19:16-21) Ang batan-ong lalaki milakaw nga masulub-on, tungod kay dili niya madawat nga mawala ang iyang bahandi. Bisan unsa pa ka dako ang iyang paghigugma kang Jehova, mas gihigugma niya ang iyang mga kabtangan.
11, 12. (a) Unsang makapahinuklog nga mga pulong ang gisulti ni Jesus bahin sa bahandi? (b) Sa unsang paagi ang mga kabtangan mahimong babag sa pag-alagad kang Jehova?
11 Tungod niana si Jesus misulti sa usa ka butang nga wala damha: “Malisod gayod sa usa ka datong tawo nga makasulod sa gingharian sa mga langit. . . . Mas sayon pa sa usa ka kamelyo nga makalusot sa mata sa dagom kay sa usa ka datong tawo nga makasulod sa gingharian sa Diyos.” (Mateo 19:23, 24) Gipasabot ba ni Jesus nga walay tawong adunahan nga makapanunod sa Gingharian? Wala, kay siya mipadayon sa pagsulti: “Sa Diyos ang tanang butang posible.” (Mateo 19:25, 26) Sa pagkatinuod, uban sa tabang ni Jehova ang pipila ka adunahan kaniadto nahimong dinihogang mga Kristohanon. (1 Timoteo 6:17) Bisan pa niana, si Jesus adunay maayong katarongan nga gisulti niya kadtong makapakurat nga mga pulong. Siya naghatag ug pasidaan.
12 Kon hatagan sa usa ka tawo ug dako kaayong importansiya ang iyang mga kabtangan sama sa gibuhat niadtong batan-ong lalaki, kini makababag kaniya sa pag-alagad kang Jehova sa tibuok niyang kasingkasing. Mahimong mahitabo kana sa usa nga adunahan na ug sa usa nga “determinadong madato.” (1 Timoteo 6:9, 10) Ang sobrang pagsalig sa materyal nga mga butang makapahimo sa usa ka tawo nga dili kaayo ‘mahunahunaon sa iyang espirituwal nga panginahanglan.’ (Mateo 5:3) Tungod niana, basin bation niya nga wala na siya magkinahanglan sa tabang ni Jehova. (Deuteronomio 6:10-12) Basin magdahom siya nga hatagan siyag linaing pagtagad diha sa kongregasyon. (Santiago 2:1-4) Ug mahimong gugolon niya ang dakong bahin sa iyang panahon sa pagpahimulos sa iyang bahandi inay kay sa pag-alagad kang Jehova.
Ugmara ang Hustong Panglantaw
13. Unsang sayop nga panglantaw ang nabatonan sa mga taga-Laodicea?
13 Ang usa ka pundok nga adunay sayop nga panglantaw sa mga kabtangan mao ang unang-siglong kongregasyon sa Laodicea. Si Jesus miingon kanila: “Ikaw nagaingon: ‘Ako dato ug nakabatog mga bahandi ug wala na manginahanglan ug bisan unsa pa,’ apan wala ka mahibalo nga ikaw alaot ug makaluluoy ug kabos ug buta ug hubo.” Ang ilang bahandi dili maoy hinungdan nga ang mga taga-Laodicea nahimutang sa ingon nianang makaluluoy nga espirituwal nga kahimtang. Ang hinungdan mao nga sila nagsalig sa bahandi inay kang Jehova. Tungod niana, sila dagaang sa espirituwal, ug sa dili madugay ‘isuka na’ ni Jesus.—Pinadayag 3:14-17.
14. Nganong ang Hebreohanong mga Kristohanon takos dayegon ni Pablo?
14 Sa laing bahin, gidayeg ni Pablo ang Hebreohanong mga Kristohanon tungod sa ilang tinamdan panahon sa di pa dugayng paglutos nga nahitabo. Siya miingon: “Kamo nagpahayag ug simpatiya kanila nga anaa sa bilanggoan ug malipayong nagdawat sa pagpangagaw sa inyong mga gipanag-iya, kay nahibalo nga kamo adunay mas maayo ug dumalayong kabtangan.” (Hebreohanon 10:34) Ang maong mga Kristohanon wala maguol sa pagkahanaw sa ilang mga kabtangan. Nagmalipayon gihapon sila tungod kay ilang nahuptan ang ilang labing bililhong kabtangan, ang ilang “mas maayo ug dumalayong kabtangan.” Sama sa magpapatigayon sa sambingay ni Jesus nga nagsakripisyo sa tanang butang alang sa usa ka bililhong perlas, sila determinado nga dili mobuhi sa paglaom sa Gingharian, bisan unsa pay mahitabo. (Mateo 13:45, 46) Pagkamaayong tinamdan!
15. Sa unsang paagi ang usa ka Kristohanong babaye sa Liberia nag-una sa intereses sa Gingharian?
15 Daghan karon ang nakaugmad ug susamang maayong tinamdan. Pananglitan, sa Liberia usa ka Kristohanong babaye ang gitanyagan ug kahigayonan nga makaeskuyla sa unibersidad. Nianang nasora, ang maong tanyag isipon nga usa ka paagi sa pagbaton ug maayong kaugmaon. Apan, siya usa ka payunir, usa ka bug-os-panahong ebanghelisador, ug nakadawat ug imbitasyon nga mag-alagad ingong temporaryong espesyal payunir. Iyang giuna ang Gingharian ug nagpabilin sa bug-os-panahong pag-alagad. Siya miadto sa iyang asaynment ug nakasugod ug 21 ka panagtuon sa Bibliya sulod sa tulo ka bulan. Kining batan-ong sister ug ang libolibo pa nga sama kaniya nangita pag-una sa Gingharian, bisan pag mawala ang posibleng materyal nga mga bentaha. Sa unsang paagi ilang nahuptan ang maong tinamdan niining materyalistikong kalibotan? Ilang naugmad ang daghang maayong mga hiyas. Hisgotan nato ang pipila niini.
16, 17. (a) Nganong ang pagkamakasaranganon hinungdanon diha sa atong pagsalig kang Jehova? (b) Nganong angay natong ugmaron ang pagsalig sa mga saad sa Diyos?
16 Pagkamakasaranganon: Ang Bibliya nag-ingon: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan. Ayaw pagpakamaalamon sa kaugalingon mong mga mata.” (Proverbio 3:5-7) Usahay, ang usa ka dalan morag praktikal gikan sa kalibotanong panglantaw. (Jeremias 17:9) Bisan pa niana, ang usa ka sinserong Kristohanon mangayog giya kang Jehova. (Salmo 48:14) ‘Sa tanan niyang mga dalan’—sa mga butang maylabot sa kongregasyon, edukasyon o sekular nga trabaho, paglingawlingaw, o sa bisan unsa pa—siya makasaranganong mangayo sa tambag ni Jehova.—Salmo 73:24.
17 Pagsalig sa mga saad ni Jehova: Si Pablo miingon: “Siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Kon kita nagduhaduha nga tumanon ni Jehova ang iyang mga saad, morag makataronganon nga ‘gamiton sa bug-os ang kalibotan.’ (1 Corinto 7:31) Sa laing bahin, kon lig-on ang atong pagtuo, kita determinado nga pangitaon pag-una ang Gingharian. Sa unsang paagi maugmad ang lig-on nga pagtuo? Pinaagi sa pagduol kang Jehova diha sa makanunayon, kinasingkasing nga pag-ampo ug pinaagi sa regular nga personal nga pagtuon. (Salmo 1:1-3; Filipos 4:6, 7; Santiago 4:8) Sama kang Haring David, kita makaampo: “Kanimo nagsalig ako, Oh Jehova. Ako miingon: ‘Ikaw mao ang akong Diyos.’ Pagkadagaya sa imong pagkamaayo!”—Salmo 31:14, 19.
18, 19. (a) Sa unsang paagi ang atong pagkamakugihon magpalig-on sa atong pagsalig kang Jehova? (b) Nganong ang usa ka Kristohanon angay nga magmaandam sa paghimog mga sakripisyo?
18 Pagkamakugihon diha sa pag-alagad kang Jehova: Gilangkit ni Pablo ang pagsalig sa mga saad ni Jehova ngadto sa pagkamakugihon sa dihang siya misulat: “Kami nagtinguha nga ang matag usa kaninyo magpakita sa samang kakugi aron makabaton sa bug-os nga pagsalig sa paglaom hangtod sa kataposan.” (Hebreohanon 6:11) Kon kita puliki sa pag-alagad kang Jehova, siya motabang kanato. Sa matag higayon nga atong masinati ang maong tabang, ang atong pagsalig kaniya mas molig-on, kita mahimong ‘lig-on, dili matarog.’ (1 Corinto 15:58) Ang atong pagtuo mapasig-uli, ug ang atong paglaom mapalig-on.—Efeso 3:16-19.
19 Pagkaandam nga mohimog mga sakripisyo: Gisakripisyo ni Pablo ang usa ka maayong karera aron mosunod kang Jesus. Klaro nga gihimo niya ang hustong pagpili, bisan tuod ang iyang kinabuhi malisod usahay kon lantawon sa materyal nga paagi. (1 Corinto 4:11-13) Si Jehova wala magsaad ug maluhong kinabuhi, ug usahay ang iyang mga alagad mag-antos sa mga kalisdanan. Ang atong pagkaandam nga mopayano sa atong estilo sa kinabuhi ug mohimog mga sakripisyo magpamatuod sa kalig-on sa atong determinasyon nga moalagad kang Jehova.—1 Timoteo 6:6-8.
20. Nganong ang pagkamapailobon hinungdanon sa usa nga nag-una sa mga intereses sa Gingharian?
20 Pagkamapailobon: Ang tinun-an nga si Santiago nag-awhag sa mga isigka-Kristohanon: “Busa, mga igsoon, magmapailobon hangtod sa presensiya sa Ginoo.” (Santiago 5:7) Niining puliki kaayo nga kalibotan, lisod nga magmapailobon. Gusto natong mahitabo dayon ang mga butang. Apan giawhag kita ni Pablo nga sundogon kadtong “pinaagi sa pagtuo ug pailob nagapanunod sa mga saad.” (Hebreohanon 6:12) Magmaandam sa paghulat kang Jehova. Segurado nga takos paaboton ang kinabuhing walay kataposan sa paraiso sa yuta!
21. (a) Unsay atong gipasundayag sa dihang atong unahon ang mga intereses sa Gingharian? (b) Unsay hisgotan sa sunod nga artikulo?
21 Oo, praktikal ang tambag ni Jesus nga unahon pagpangita ang Gingharian. Kon buhaton nato kana, atong gipasundayag nga kita nagasalig gayod kang Jehova ug mipili sa bugtong luwas nga paagi nga ang usa ka Kristohanon magkinabuhi. Apan, gitambagan usab kita ni Jesus nga magpadayon sa “pagpangita pag-una . . . sa pagkamatarong [sa Diyos].” Sa sunod nga artikulo, atong mahibaloan kon nganong ang maong pagdasig ilabinang gikinahanglan karon.
Makapatin-aw Ka Ba?
• Maylabot sa materyal nga mga butang, unsang pagkatimbang ang gidasig ni Jesus nga atong batonan?
• Unsay atong makat-onan gikan sa ilustrasyon ni Jesus bahin sa kamelyo ug sa mata sa dagom?
• Unsang Kristohanong mga hiyas ang motabang kanato sa pagpangita pag-una sa Gingharian sa Diyos?
[Hulagway sa panid 21]
Daghan sa nakadungog sa mga pulong ni Jesus maoy mga kabos
[Hulagway sa panid 23]
Ang paghigugma sa adunahan nga batan-ong lalaki sa iyang mga kabtangan mas labaw pa kay sa iyang paghigugma sa Diyos
[Hulagway sa panid 23]
Ang magpapatigayon sa sambingay ni Jesus nagsakripisyo sa tanan alang sa usa ka bililhong perlas
[Hulagway sa panid 24]
Kon kita puliki diha sa pag-alagad kang Jehova, siya motabang kanato