Sa Unsang Paagi Gibayaw ni Jesus ang Pagkamatarong sa Diyos?

‘Si Kristo gitanyag sa Diyos ingong halad alang sa pagpasig-uli pinaagi sa pagtuo diha sa iyang dugo. Kini maoy aron ipasundayag ang iyang kaugalingong pagkamatarong.’—ROMA 3:25.

1, 2. (a) Unsay gitudlo sa Bibliya bahin sa kahimtang sa katawhan? (b) Unsang mga pangutana ang pagatubagon?

DAGHAN ang nahibalo sa asoy sa Bibliya bahin sa rebelyon didto sa tanaman sa Eden. Kitang tanan nakasinati sa epekto sa sala ni Adan sumala sa giingon sa mosunod: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.” (Roma 5:12) Bisag maningkamot kita pag-ayo sa pagbuhat ug matarong, kita masayop, busa atong gikinahanglan ang pagpasaylo sa Diyos. Bisan si apostol Pablo miingon: “Ang maayo nga buot nakong buhaton wala nako buhata, apan ang daotan nga dili nako buot buhaton mao ang akong ginabuhat. Alaot ako nga tawo!”—Roma 7:19, 24.

² Tungod sa atong pagkamakasasala, motungha kining hinungdanong mga pangutana: Sa unsang paagi si Jesus sa Nasaret natawo nga walay sala, ug nganong gibawtismohan siya? Sa unsang paagi ang pagkinabuhi ni Jesus nagbayaw sa pagkamatarong ni Jehova? Labaw sa tanan, unsay nalampos sa kamatayon ni Kristo?

Gihagit ang Pagkamatarong sa Diyos

 3. Sa unsang paagi gilimbongan ni Satanas si Eva?

³ Ang atong unang ginikanan, si Adan ug Eva, dili-maalamong misalikway sa pagkasoberano sa Diyos ug mipili sa pagmando sa “orihinal nga halas, ang usa nga gitawag Yawa ug Satanas.” (Pin. 12:9) Tagda kon sa unsang paagi kini nahitabo. Gihagit ni Satanas ang pagkamatarong sa pagmando ni Jehova. Gihimo niya kana pinaagi sa pagpangutana kang Eva: “Tinuod ba nga miingon ang Diyos nga dili gayod kamo makakaon gikan sa tanang kahoy sa tanaman?” Si Eva miingon nga ang Diyos nagsugo nga dili sila mohikap sa usa ka kahoy, kay kon buhaton nila kana, sila mamatay. Dayon giakusahan ni Satanas ang Diyos nga bakakon. “Dili gayod kamo mamatay,” miingon ang Yawa. Iyang gipatuo si Eva nga ang Diyos naghikaw kaniya ug usa ka butang nga maayo ug kon siya mokaon sa bunga, siya mahisama sa Diyos, nga mahibalo kon unsay maayo ug daotan.—Gen. 3:1-5.

 4. Sa unsang paagi ang katawhan nailalom sa pagmando ni Satanas?

⁴ Si Satanas miingon nga mas malipayon ang tawo kon mobulag sa Diyos. Imbes bayawon ni Adan ang matarong nga pagkasoberano sa Diyos, siya miduyog sa iyang asawa sa pagkaon sa gidili nga bunga. Busa giwala ni Adan ang iyang hingpit nga baroganan atubangan kang Jehova ug gipailalom kita sa mabug-at nga yugo sa sala ug kamatayon. Sa samang higayon, nailalom ang katawhan sa pagmando ni Satanas, “ang diyos niining kalibotana.”—2 Cor. 4:4, King James Version; Roma 7:14.

 5. (a) Unsay nagpakita nga gituman ni Jehova ang iyang gipamulong? (b) Unsang paglaom ang gihatag sa Diyos sa mga kaliwat ni Adan ug Eva?

⁵ Ingon sa iyang gipamulong, gisilotan ni Jehova ug kamatayon si Adan ug Eva. (Gen. 3:16-19) Apan, nagpasabot ba kana nga napakyas ang katuyoan sa Diyos? Wala gayod! Sa dihang gisilotan ni Jehova si Adan ug Eva, gihatagan niyag paglaom ang ilang umaabot nga kaliwat. Gibuhat niya kana pinaagi sa pagpahibalo sa iyang katuyoan nga magpatunghag usa ka “binhi” nga pagasamaran ni Satanas sa tikod. Apan, ang maong gisaad nga Binhi maulian sa iyang samad ug “magsamad [kang Satanas] sa ulo.” (Gen. 3:15) Ang Bibliya nagpatin-aw niini pinaagi sa paghisgot sa mosunod bahin kang Jesu-Kristo: “Tungod niini nga katuyoan nga gipadayag ang Anak sa Diyos, nga mao, aron sa pagbungkag sa mga buhat sa Yawa.” (1 Juan 3:8) Apan sa unsang paagi ang panggawi ug kamatayon ni Jesus nagbayaw sa pagkamatarong sa Diyos?

Ang Kahulogan sa Bawtismo ni Jesus

 6. Giunsa nato pagkahibalo nga si Jesus wala makapanunod sa sala ni Adan?

⁶ Si Jesus kinahanglan nga mahimong eksaktong katumbas sa hingpit nga si Adan. (Roma 5:14; 1 Cor. 15:45) Kini nagpasabot nga kinahanglan siyang matawo nga hingpit. Sa unsang paagi kana nahitabo? Ang manulondang si Gabriel tin-awng nagsulti niini sa inahan ni Jesus nga si Maria: “Pagakunsaran ikaw sa balaang espiritu, ug pagalandongan ikaw sa gahom sa Labing Hataas. Tungod niana usab ang matawo pagatawgong balaan, Anak sa Diyos.” (Luc. 1:35) Sa bata pa si Jesus, lagmit gisultihan siya ni Maria ug pipila ka detalye bahin sa iyang pagkatawo. Busa, sa dihang nakaplagan siya ni Maria ug sa iyang amaama nga si Jose didto sa templo, siya nangutana: “Wala ba kamo mahibalo nga ako kinahanglang ania sa balay sa akong Amahan?” (Luc. 2:49) Dayag nga sukad sa iyang pagkabata, nahibalo si Jesus nga siya Anak sa Diyos. Busa, hinungdanon gayod kaniya ang pagbayaw sa pagkamatarong sa Diyos.

 7. Unsang bililhong mga butang ang nabatonan ni Jesus?

⁷ Gipakita ni Jesus ang dulot nga interes sa espirituwal nga mga butang pinaagi sa regular nga pagtambong sa mga tigom. Kay hingpit man ang iyang hunahuna, dayag nga iyang nasabtan ang tanan niyang nadunggan ug nabasahan diha sa Hebreohanong Kasulatan. (Luc. 4:16) Duna usab siyay laing bililhong butang—usa ka hingpit nga tawhanong lawas nga mahimong ihalad alang sa katawhan. Sa dihang nabawtismohan si Jesus, siya nag-ampo ug lagmit naghunahuna bahin sa tagna sa Salmo 40:6-8.—Luc. 3:21; basaha ang Hebreohanon 10:5-10.a

 8. Nganong gipugngan ni Juan Bawtista si Jesus sa pagpabawtismo?

⁸ Sa sinugdan, gipugngan ni Juan Bawtista si Jesus sa pagpabawtismo. Ngano? Tungod kay si Juan nagbawtismo sa mga Hudiyo ingong simbolo sa paghinulsol sa ilang mga sala batok sa Balaod. Isip suod nga paryente, nahibalo si Juan nga si Jesus matarong ug busa dili kinahanglang maghinulsol. Giingnan ni Jesus si Juan nga kinahanglan Siyang magpabawtismo. “Sa ingon nga paagi,” si Jesus miingon, “angay nga atong pagatumanon ang tanan nga matarong.”—Mat. 3:15.

 9. Unsay gisimbolohan sa bawtismo ni Jesus?

⁹ Ingong hingpit nga tawo, si Jesus nahibalo nga sama kang Adan, siya may katakos nga mahimong amahan sa hingpit nga mga tawo. Apan, wala gayod kana tinguhaa ni Jesus tungod kay dili kana ang kabubut-on ni Jehova. Ang Diyos nagpadala kang Jesus sa yuta aron sa pagtuman sa papel sa gisaad nga Binhi, o Mesiyas. Naglakip kini sa paghalad ni Jesus sa iyang hingpit nga tawhanong kinabuhi. (Basaha ang Isaias 53:5, 6, 12.) Siyempre, ang bawtismo ni Jesus dili samag kahulogan sa atoa. Wala kana maglangkit ug pagpahinungod kang Jehova, sanglit si Jesus maoy bahin na sa napahinungod nga nasod sa Israel. Hinunoa, ang bawtismo ni Jesus nagsimbolo sa pagtanyag sa iyang kaugalingon aron buhaton ang kabubut-on sa Diyos ingon sa gitagna sa Kasulatan alang sa Mesiyas.

10. Unsay nalakip sa pagbuhat sa kabubut-on sa Diyos ingong Mesiyas, ug unsay pagbati ni Jesus niini?

¹⁰ Ang kabubut-on ni Jehova alang kang Jesus naglangkit sa pagsangyaw sa maayong balita sa Gingharian, paghimog mga tinun-an, ug pag-andam kanila alang sa buluhatong paghimog mga tinun-an. Ang pagtanyag ni Jesus sa iyang kaugalingon naglakip usab sa iyang pagkaandam nga molahutay sa paglutos ug sa masakit nga kamatayon ingong pagsuportar sa matarong nga pagkasoberano ni Jehova. Tungod kay gihigugma pag-ayo ni Jesus ang iyang langitnong Amahan, siya nalipay sa pagbuhat sa kabubut-on sa Diyos ug sa paghalad sa iyang lawas. (Juan 14:31) Nalipay usab siya nga ang bili sa iyang hingpit nga kinabuhi makalukat kanato gikan sa pagkaulipon sa sala ug kamatayon. Gidawat ba sa Diyos ang pagtanyag ni Jesus sa iyang kaugalingon aron moabaga niining dagkong responsibilidad? Oo!

11. Sa unsang paagi gipakita ni Jehova ang iyang pag-uyon kang Jesus ingong gisaad nga Mesiyas, o Kristo?

¹¹ Ang upat ka magsusulat sa Ebanghelyo nagpamatuod nga si Jehova tin-awng nagpahayag sa iyang pag-uyon sa dihang si Jesus mihaw-as sa Suba sa Jordan. “Nakita ko ang espiritu nga mikunsad ingon sa salampati gikan sa langit,” miingon si Juan Bawtista, “ug kini mipabilin diha [kang Jesus] . . . Ug nakita ko kini, ug ako nagpamatuod nga kini siya mao ang Anak sa Diyos.” (Juan 1:32-34) Dugang pa, nianang higayona si Jehova miingon: “Kini mao ang akong Anak, ang hinigugma, nga akong giuyonan.”—Mat. 3:17; Mar. 1:11; Luc. 3:22.

Matinumanon Hangtod sa Kamatayon

12. Unsay gihimo ni Jesus sulod sa tulo ka tuig ug tunga human sa iyang bawtismo?

¹² Sa misunod nga tulo ka tuig ug tunga, gigugol ni Jesus ang iyang kinabuhi sa pagtudlo sa mga tawo bahin sa iyang Amahan ug sa matarong nga pagkasoberano sa Diyos. Bisag kapoy kaayo ang pagbaktas sa tibuok Yutang Saad, walay nakapugong kaniya sa bug-os nga pagpamatuod sa kamatuoran. (Juan 4:6, 34; 18:37) Gitudloan ni Jesus ang mga tawo bahin sa Gingharian sa Diyos. Pinaagi sa milagrosong pagpang-ayo sa mga masakiton, pagpakaon sa gigutom nga panon sa katawhan, ug bisan sa pagbanhaw sa mga patay, iyang gipasundayag kon unsa unyay buhaton sa Gingharian alang sa katawhan.—Mat. 11:4, 5.

13. Unsay gitudlo ni Jesus bahin sa pag-ampo?

¹³ Imbes angkonon ni Jesus ang kadungganan sa iyang pagpanudlo ug pagpang-ayo, nagpakita siyag talagsaong ehemplo pinaagi sa mapainubsanong paghatag sa tanang pagdayeg ngadto kang Jehova. (Juan 5:19; 11:41-44) Gipadayag usab ni Jesus ang labing hinungdanong mga butang nga angay natong iampo. Ang atong pag-ampo angayng maglakip ug mga pangamuyo nga “pagabalaanon” unta ang ngalan ni Jehova ug nga ang matarong nga pagkasoberano sa Diyos mopuli sa daotang pagmando ni Satanas aron ‘matuman ang Iyang kabubut-on, maingon sa langit, mao man usab sa yuta.’ (Mat. 6:9, 10) Gidasig usab kita ni Jesus nga molihok nga kaharmonya sa atong mga pag-ampo pinaagi sa ‘pagpangita pag-una sa gingharian ug sa pagkamatarong sa Diyos.’—Mat. 6:33.

14. Bisag hingpit si Jesus, nganong kinahanglan siyang maningkamot sa pagtuman sa iyang papel diha sa katuyoan sa Diyos?

¹⁴ Samtang nagkaduol ang iyang kamatayon, mibati si Jesus ug kabalisa tungod sa bug-at nga responsibilidad nga iyang pas-anon. Ang katuyoan ug kadungganan sa iyang Amahan nagdepende sa paglahutay ni Jesus sa dili-makataronganong paghusay ug masakit nga kamatayon. Lima ka adlaw una sa iyang kamatayon, si Jesus miampo: “Karon ang akong kalag nabalisa, ug unsay akong igaingon? Amahan, luwasa ako gikan niining taknaa. Bisan pa, kini ang hinungdan nga ako nahiabot niining taknaa.” Human niya ipahayag kining normal nga pagbati, gisentro ni Jesus ang iyang pagtagad sa mas hinungdanong butang ug miampo: “Amahan, himayaa ang imong ngalan.” Dihadiha si Jehova miingon: “Gihimaya ko na kini ug pagahimayaon ko kini pag-usab.” (Juan 12:27, 28) Oo, andam gayod si Jesus nga moantos sa kinadak-ang pagsulay sa integridad nga masinati ni bisan kinsang tawo. Apan sa walay duhaduha, ang pagkadungog ni Jesus sa gisulti sa iyang langitnong Amahan nagpalig-on kaniya nga molampos siya sa pagbayaw ug pagbindikar sa pagkasoberano ni Jehova. Ug milampos gayod siya!

Kon Unsay Nalampos sa Kamatayon ni Jesus

15. Una siya mamatay, nganong miingon si Jesus: “Natuman na”?

¹⁵ Samtang nagbitay si Jesus sa estaka ug hapit nang mabugtoan sa gininhawa, siya miingon: “Natuman na!” (Juan 19:30) Sa tabang sa Diyos, dako gayod ang nalampos ni Jesus sulod sa tulo ka tuig ug tunga gikan sa iyang bawtismo hangtod sa iyang kamatayon. Sa dihang namatay si Jesus, dihay makusog nga linog, ug ang Romanong opisyal sa kasundalohan nga maoy gitugyanan sa pagpatay kaniya natukmod sa pag-ingon: “Sa pagkatinuod kini siya maoy Anak sa Diyos.” (Mat. 27:54) Lagmit nakakita ang maong opisyal nga gibugalbugalan si Jesus tungod sa iyang pag-angkon nga siya Anak sa Diyos. Bisan pa sa tanang giantos ni Jesus, iyang nahuptan ang iyang integridad ug napamatud-an si Satanas nga dakong bakakon. Gihagit ni Satanas ang tanang nagpaluyo sa pagkasoberano sa Diyos pinaagi sa pag-ingon: “Ang usa ka tawo mohatag sa tanan niyang nabatonan aron maluwas ang iyang kinabuhi.” (Job 2:4, Complete Jewish Bible) Pinaagi sa iyang pagkamatinumanon, gipakita ni Jesus nga si Adan ug Eva makapabilin untang matinumanon ilalom sa ilang mas sayon nga pagsulay. Labaw sa tanan, ang kinabuhi ug kamatayon ni Jesus nagbayaw sa matarong nga pagkasoberano ni Jehova. (Basaha ang Proverbio 27:11.) Duna pa bay laing nalampos ang kamatayon ni Jesus? Oo!

16, 17. (a) Nganong ang mga alagad ni Jehova sa wala pa ang Kristohanong panahon nakabaton ug matarong nga baroganan uban sa Diyos? (b) Sa unsang paagi gigantihan ni Jehova ang pagkamatinumanon sa iyang Anak, ug unsay padayong gibuhat ni Ginoong Jesu-Kristo?

¹⁶ Daghang alagad ni Jehova ang nabuhi sa wala pa moanhi si Jesus sa yuta. Duna silay matarong nga baroganan atubangan sa Diyos ug paglaom sa pagkabanhaw. (Isa. 25:8; Dan. 12:13) Apan sa unsang legal nga pasukaranan nga ang balaang Diyos, si Jehova, magpanalangin sa makasasalang katawhan sa talagsaong paagi? Ang Bibliya nagpatin-aw: ‘Si Jesu-Kristo gitanyag sa Diyos ingong halad alang sa pagpasig-uli pinaagi sa pagtuo diha sa iyang dugo. Kini maoy aron ipasundayag ang iyang kaugalingong pagkamatarong, tungod kay siya nagpasaylo sa mga sala nga nahitabo sa nangagi samtang ang Diyos nagmainantoson; aron ikapasundayag ang iyang kaugalingong pagkamatarong niining panahona karon, aron nga siya mahimong matarong bisan sa dihang nagpahayag nga matarong sa tawo nga may pagtuo kang Jesus.’—Roma 3:25, 26.b

¹⁷ Si Jesus gigantihan ni Jehova ug pagkabanhaw ngadto sa usa ka posisyon nga mas taas kay sa iyang nabatonan una siya moanhi sa yuta. Sa pagkakaron, si Jesus nagtagamtam ug imortalidad ingong mahimayaong espirituhanong linalang. (Heb. 1:3) Isip Hataas nga Saserdote ug Hari, ang Ginoong Jesu-Kristo padayong nagtabang sa iyang mga sumusunod sa pagbayaw sa pagkamatarong sa Diyos. Ug pagkamapasalamaton nato nga ang atong langitnong Amahan, si Jehova, mao ang Tigganti sa tanang nagbayaw sa pagkamatarong sa Diyos ug maunongong nag-alagad kaniya sama sa iyang Anak!—Basaha ang Salmo 34:3; Hebreohanon 11:6.

18. Unsay hisgotan sa sunod nga tun-anang artikulo?

¹⁸ Sukad pa sa panahon ni Abel, ang matinumanong mga tawo nakabaton ug suod nga relasyon kang Jehova tungod kay nagpasundayag silag pagtuo ug pagsalig sa gisaad nga Binhi. Si Jehova nahibalo nga ang iyang Anak magmaunongon kaniya ug ang kamatayon niini bug-os nga magtabon sa “sala sa kalibotan.” (Juan 1:29) Ang kamatayon ni Jesus naghatag usab ug kaayohan sa mga tawong nagkinabuhi karon. (Roma 3:26) Busa, unsang mga panalangin ang imong madawat tungod sa halad lukat ni Kristo? Mao kanay hisgotan sa sunod nga tun-anang artikulo.

[Mga footnote]

Unsay Imong Tubag?

• Sa unsang paagi gihagit ang pagkamatarong sa Diyos?

• Unsay gisimbolohan sa bawtismo ni Jesus?

• Unsay nalampos sa kamatayon ni Jesus?

[Hulagway sa panid 9]

Nahibalo ka ba kon unsay gisimbolohan sa bawtismo ni Jesus?