Andam Ka Bang Mahimong Mangingisdag Tawo?

 1. Sa unsa gidapit ni Jesus ang upat ka mangingisda, ug unsay ilang gibuhat?

ANG tinun-ang si Pedro, Andres, Santiago, ug Juan maoy mga mangingisda. Imadyina ang ilang kahibulong dihang gidapit sila ni Jesus: “Sunod mo nako, ug himoon mo nakong mga mangingisdag tawo.”b Unsay ilang gibuhat? Ang Bibliya nag-ingon: “Gibiyaan dayon nila ang ilang mga pukot ug misunod kaniya.” (Mat. 4:18-22) Ang maong desisyon nakapausab gyod sa ilang kinabuhi. Imbes manguhag literal nga isda, sila ‘mangisda nag mga tawo.’ (Luc. 5:10) Karon, si Jesus nagdapit sab sa sinserong mga tawo kinsa nahigugma sa kamatuoran. (Mat. 28:19, 20) Gidawat na ba nimo ang pagdapit ni Jesus nga mahimong mangingisdag tawo?

 2. Nganong angay natong seryosohon ang desisyon nga mahimong mangingisdag tawo, ug unsay makatabang nato sa pagdesisyon?

² Tingali miuswag ka na sa imong pagtuon sa Bibliya ug naghunahuna ka kon gusto ba nimong mahimong magmamantala sa maayong balita. Kon nagduhaduha kag dawat sa pagdapit ni Jesus, ayawg kaguol. Tingali nagduhaduha ka kay nahibalo ka nga importante kaayo ni nga desisyon. Tinuod, ang Bibliya nag-ingon nga gibiyaan “dayon” ni Pedro ug sa iyang mga kauban ang ilang pukot. Pero ang desisyon ni Pedro ug sa iyang igsoon dili dinalidali. Kapig unom ka bulan una pa niana, sila nakaila na kang Jesus ug midawat kaniya ingong Mesiyas. (Juan 1:35-42) Sa susama, tingali daghan ka nag nahibaloan bahin kang Jehova ug Jesus, ug gusto nimong mouswag pa sa espirituwal. Pero sa dili ka pa modesisyon, kinahanglang hunahunaon nimo kini pag-ayo. Unsay nakatabang kang Pedro, Andres, ug sa uban sa pagdesisyon?

 3. Unsang mga hiyas ang makatabang nimo sa pagdawat sa pagdapit ni Jesus?

³ Ang unang mga tinun-an ni Jesus ganahang mangisda, hanas, maisogon, ug disiplinado. Segurado nga ang susamang mga hiyas nakatabang nila nga mahimong epektibo nga mangingisdag tawo. Hisgotan niining artikuloha kon sa unsang paagi maugmad nimo ang maong mga hiyas aron mahimo kang epektibong tinun-an sa Kristo.

 4. Nganong ganahang mangisda si Pedro?

⁴ Si Pedro nangisda aron matagan-an ang iyang pamilya. Pero dili kay kana ray rason. Si Pedro ganahang mangisda. (Juan 21:3, 9-15) Ganahan sab siyang mangisdag tawo. Ug sa tabang ni Jehova, si Pedro nahimong maayo kaayo nianang buluhatona.​—Buh. 2:14, 41.

 5. Base sa Lucas 5:8-11, nganong nahadlok si Pedro, ug unsay makatabang nato nga madaog ang susamang pagbati?

⁵ Mosangyaw ta kay gimahal nato si Jehova. Mao nay atong pangunang rason sa pagbuhat niana. Ang atong gugma kang Jehova makapalihok nato sa pagsangyaw bisag mobati tang dili kuwalipikado. Sa dihang gidapit ni Jesus si Pedro nga mahimong mangingisdag tawo, siya miingon: “Ayaw nag kahadlok.” (Basaha ang Lucas 5:8-11.) Si Pedro wala mahadlok sa posibleng mahitabo kon mahimo siyang tinun-an. Hinunoa, si Pedro nakurat sa kadaghan sa isda nga ilang nakuha tungod sa milagro nga gihimo ni Jesus, ug mibati siya nga dili siya kuwalipikado nga mahimong kauban ni Jesus sa buluhaton. Sa susama, mabalaka tingali ka nga dili nimo mahimo ang tanang gikinahanglan aron mahimong tinun-an sa Kristo. Kon mao, palig-ona ang imong gugma kang Jehova, kang Jesus, ug sa imong isigkatawo, ug mapalihok ka sa pagdawat sa pagdapit ni Jesus nga mahimong mangingisdag tawo.​—Mat. 22:37, 39; Juan 14:15.

 6. Unsa pay ubang rason nga mosangyaw ta?

⁶ Tagda ang uban pang rason kon nganong mosangyaw ta. Gusto natong sundon ang sugo ni Jesus: “Adtoa ninyo ang mga tawo . . . ug tudloi sila aron mahimong akong mga tinun-an.” (Mat. 28:19, 20) Mosangyaw sab ta kay ang mga tawo “pinanitan ug nagkatibulaag” ug kinahanglan kaayong makakat-on sa kamatuoran bahin sa Gingharian. (Mat. 9:36) Gusto ni Jehova nga ang tanang matang sa tawo makakat-on sa tukmang kahibalo sa kamatuoran ug maluwas.​—1 Tim. 2:4.

 7. Giunsa pagpakita sa Roma 10:13-15 nga importante ang pagsangyaw?

⁷ Mapalihok ta sa pagsangyaw kon atong hunahunaon ang epekto niini. Ang mangingisda mamaligya o mokaon sa isda nga iyang makuha, pero kita “mangisda” ug mga tawo aron maluwas ang ilang kinabuhi.​—Basaha ang Roma 10:13-15; 1 Tim. 4:16.

8-9. Unsay kinahanglang sayron sa mangingisda, ug ngano?

⁸ Sa panahon ni Jesus, kinahanglang sayron sa Israelinhong mangingisda kon unsang klaseha sa isda ang puwede niyang makuha. (Lev. 11:9-12) Kinahanglan sab niyang sayron kon asa makita ang mga isda. Sagad, ang mga isda naa sa dapit diin ganahan sila sa tubig ug daghag pagkaon. Importante ba kon unsang orasa mangisda ang mangingisda? Kon bahin sa kinamaayohang panahon nga mangisda, matikdi ang giingon sa usa ka Saksi sa isla sa Pasipiko dihang gihagad niyag pangisda ang usa ka misyonaryo. Ang misyonaryo miingon, “Magkita tag alas nuybe sa buntag ugma.” Ang igsoon miingon, “Dili ingon ana. Dili kitay magbuot kon kanus-a ta mangisda. Ang isda maoy atong agdon.”

⁹ Sa susama, ang mga mangingisdag tawo sa unang siglo miadto sa mga dapit diin makita ang mga tawo, ug sa panahon nga posibleng tua didto ang mga tawo. Pananglitan, ang mga sumusunod ni Jesus nagsangyaw sa templo ug sa mga sinagoga, sa balay ug balay, ug sa merkado. (Buh. 5:42; 17:17; 18:4) Kita sab kinahanglang pamilyar sa mga tawo sa atong teritoryo. Kinahanglan tang mopasibo ug mosangyaw kon asa ug kon kanus-a posibleng makita ang mga tawo.​—1 Cor. 9:19-23.

10. Unsang mga galamiton ang gitagana sa organisasyon ni Jehova?

¹⁰ Ang mangingisda nagkinahanglag saktong galamiton ug kinahanglang mahibalo kon unsaon kana paggamit. Kita sab nagkinahanglag saktong galamiton sa atong pagsangyaw. Ug kinahanglang mahibalo ta kon unsaon kana paggamit. Si Jesus naghatag sa iyang mga tinun-an ug klarong mga instruksiyon kon unsaon pagpangisdag tawo. Giingnan niya sila kon unsay dad-on, kon asa mosangyaw, ug kon unsay isulti. (Mat. 10:5-7; Luc. 10:1-11) Karon, ang organisasyon ni Jehova nagtagana sa Teaching Toolbox nga dunay epektibong mga galamiton.c Ug gitudloan ta kon unsaon paggamit ang maong mga galamiton. Kana nga pagbansay makatabang nato nga makabaton ug kompiyansa ug kahanas aron mahimong epektibo sa atong buluhaton.​—2 Tim. 2:15.

11. Nganong kinahanglang magmaisogon ang mga mangingisdag tawo?

¹¹ Ang mga mangingisda kinahanglang magmaisogon. Usahay kalit silang makaatubang ug lisod nga mga kahimtang diha sa dagat. Sagad mangisda sila sa gabii, ug usahay kalit rang mounos. Ang mga mangingisdag tawo nagkinahanglan sab ug kaisog. Dihang mosugod tag sangyaw ug magpaila ingong mga Saksi ni Jehova, posibleng makaatubang ta ug samag unos nga mga kahimtang. Tingali lutoson ta sa atong pamilya, bugalbugalan ta sa atong mga higala, ug dili paminawon ang atong mensahe. Pero dili ni ikatingala. Si Jesus nagpasidaan nga ipadala niya ang iyang mga sumusunod ngadto sa mga tawo nga mosupak sa ilang mensahe.​—Mat. 10:16.

12. Base sa Josue 1:7-9, unsay makatabang nato nga mahimong mas maisogon?

¹² Sa unsang paagi mahimo kang mas maisogon? Una, kinahanglang kombinsido ka nga, gikan sa langit, si Jesus padayong naggiya sa buluhatong pagsangyaw. (Juan 16:33; Pin. 14:14-16) Dayon, palig-ona ang imong pagtuo sa saad ni Jehova nga iyang itagana ang imong panginahanglan. (Mat. 6:32-34) Kon mas lig-on ang imong pagtuo, mas maisogon ka. Si Pedro ug ang iyang mga kauban nagpakitag dakong pagtuo dihang ilang gibiyaan ang ilang panginabuhi aron mosunod kang Jesus. Sa susama, nagpakita kag dakong pagtuo dihang imong giingnan ang imong mga kaila ug pamilya nga nagpa-Bible study ka na sa mga Saksi ni Jehova ug nagtambongan sa ilang mga tigom! Seguradong nakahimo ka nag mga kausaban sa imong panggawi ug pagkinabuhi aron masunod ang matarong nga mga sukdanan ni Jehova. Kana nagpakita sab nga duna kay pagtuo ug kaisog. Samtang padayon kang magpakitag kaisog, makasalig ka nga “si Jehova nga imong Diyos magauban kanimo bisan asa ka moadto.”​—Basaha ang Josue 1:7-9.

13. Sa unsang paagi ang pagpamalandong ug pag-ampo makatabang nimo nga mahimong mas maisogon?

¹³ Unsa pay imong himoon aron mahimo kang mas maisogon? Mag-ampo alang sa kaisog. (Buh. 4:29, 31) Tubagon ni Jehova ang imong pag-ampo ug dili gyod ka niya pasagdan. Naa siya kanunay aron tabangan ka. Dugang pa, puwede nimong pamalandongon kon sa unsang paagi giluwas ni Jehova ang uban kaniadto. Hunahunaa sab kon sa unsang paagi gitabangan ka ni Jehova dihang may mga problema ka ug kon giunsa ka niya pagpalig-on aron makahimo kag mga kausaban sa imong pagkinabuhi. Ang Usa nga naggiya sa iyang katawhan latas sa Pulang Dagat seguradong makatabang nimo nga mahimong tinun-an sa Kristo. (Ex. 14:13) Batoni ang pagtuo nga susama nianang sa salmista kinsa miingon: “Si Jehova dapig kanako; dili ko mahadlok. Unsay mabuhat sa tawo kanako?”​—Sal. 118:6.

14. Unsay imong makat-onan sa eksperyensiya ni Masae ug Tomoyo?

¹⁴ Nia pay laing paagi nga mahimo kang mas maisogon. Sayra kon sa unsang paagi gitabangan ni Jehova ang mga tawong maulawon nga mahimong maisogon. Konsideraha ang eksperyensiya sa sister nga si Masae. Siya maulawon ug mibati nga dili gyod siya makahimo sa pagsangyaw. Para niya, subidahon kaayo ang pagpakig-estorya sa mga dili kaila, ug naghunahuna siya nga dili gyod nâ niya makaya. Busa naningkamot siya nga molawom ang iyang gugma sa Diyos ug sa isigkatawo. Gipamalandong niya ang pagkadinalian sa buluhaton karon, ug nag-ampo siya nga mapalig-on ang iyang tinguha nga mosangyaw. Nadaog niya ang iyang kahadlok, ug nag-alagad pa gani siya ingong regular payunir. Si Jehova makatabang sab sa bag-ong mga magmamantala nga “magmaisogon.” Matikdi ang eksperyensiya sa sister nga si Tomoyo. Pagsugod niyag sangyaw sa balay ug balay, gisingkahan siya sa unang tagbalay nga iyang naatubang: “Dili ko ganahang makig-estorya sa mga Saksi ni Jehova!” Ug gilamba niini ang pultahan. Si Tomoyo wala mahadlok ug giingnan niya ang iyang partner: “Kadungog ka ato? Wâ pa gani ko kasulti, nahibalo na siya nga Saksi ni Jehova ko. Lipay kaayo ko!” Karon, si Tomoyo regular payunir na.

15. Unsay gipasabot sa pagkahimong disiplinado, ug nganong importante kini para sa mga Kristohanon?

¹⁵ Ang malamposong mga mangingisda disiplinado. Nagpasabot nâ nga maningkamot sila nga mahimo ang mga butang nga angay nilang buhaton. Pananglitan, momata silag sayo, humanon nila ang ilang trabaho, ug mopadayon silag pangisda bisag nagdaot ang panahon. Kita sab kinahanglan nga mahimong disiplinado aron makalahutay ta ug mahuman nato ang atong buluhaton.​—Mat. 10:22.

16. Sa unsang paagi mahimo tang disiplinado?

¹⁶ Wala ta matawo nga disiplinado. Sagad, gusto nato ang trabaho nga sayon kaayong himoon. Gikinahanglan ang pagpugong sa kaugalingon aron mahimong disiplinado. Busa nagkinahanglan tag tabang sa pagbansay sa atong kaugalingon sa paghimo sa mga butang nga lisod tingaling buhaton. Si Jehova naghatag sa maong tabang pinaagi sa iyang balaang espiritu.​—Gal. 5:22, 23.

17. Sa 1 Corinto 9:25-27, unsay giingon ni Pablo nga kinahanglan niyang buhaton aron mahimong disiplinado?

¹⁷ Si apostol Pablo disiplinado. Pero miangkon siya nga kinahanglan niyang ‘makmakon’ ang iyang lawas aron mahimo niya kon unsay husto. (Basaha ang 1 Corinto 9:25-27.) Giawhag niya ang uban nga disiplinahon ang kaugalingon ug buhaton ang tanang butang nga “may kahapsay ug pinaagig kahikayan.” (1 Cor. 14:40) Kinahanglan tang mahimong disiplinado aron mapadayon ang maayong espirituwal nga rutina nga nag-apil sa regular nga pagpakigbahin sa simbolikong pagpangisda.​—Buh. 2:46.

18. Unsay atong buhaton aron isipon ta ni Jehova nga malamposon sa pagsangyaw?

¹⁸ Ang mangingisda malamposon kon daghan siyag kuha. Pero ang atong kalamposan wala mag-agad sa gidaghanon sa tawo nga atong madala sa organisasyon sa Diyos. (Luc. 8:11-15) Kon molahutay ta sa pagsangyaw sa maayong balita ug sa pagtudlo sa uban, isipon ta ni Jehova nga malamposon. Ngano? Tungod kay padayon natong ginahimo ang gipabuhat kanato ni Jehova ug sa iyang Anak.​—Mar. 13:10; Buh. 5:28, 29.

19-20. Unsay labawng rason nga mosangyaw ta karon?

¹⁹ Sa pipila ka nasod, duna ray mga bulan nga gitugot ang pagpangisda. Nianang mga nasora, ang mangingisda mas maningkamot pa dihang hapit nang matapos ang maong mga bulan. Ingong mangingisdag tawo, duna tay dugang rason nga mosangyaw karon: Hapit na gyong matapos kining sistemaha! Mubo na lang kaayo ang panahong nahibilin sa pagsangyaw sa maayong balita nga makaluwas ug kinabuhi. Ayaw paglangan o ayaw paghulat nga mahimong maayo ang tanan ayha ka makigbahin niining importanteng buluhaton.​—Eccl. 11:4.

²⁰ Lihok na karon aron molig-on ang imong tinguha nga mosangyaw, molawom ang imong kahibalo sa Bibliya, ug mahimo kang mas maisogon ug disiplinado. Duyog sa kapig walo ka milyong mangingisdag tawo ug imong masinati ang kalipay nga gikan kang Jehova. (Neh. 8:10) Himoa ang tanan nimong maarangan sa pagsangyaw hangtod moingon si Jehova nga kini natapos na. Sa sunod nga artikulo, atong hisgotan ang tulo ka paagi nga mapalig-on nato ang atong determinasyon nga magpadayon sa pagsangyaw sa maayong balita sa Gingharian ingong mangingisdag tawo.