Tubagon ba ni Jehova ang Akong mga Pag-ampo?

1-2. Nganong mobati tingali ta nga wala tubaga ni Jehova ang atong mga pag-ampo?

“PAGBATON ug tumang kalipay diha kang Jehova, ug ihatag niya kanimo ang mga tinguha sa imong kasingkasing.” (Sal. 37:4) Pagkanindot niana nga saad! Pero angay ba tang magdahom nga ihatag dayon ni Jehova ang tanan natong hangyo? Ngano kahang makapangutana ta ana? Konsideraha ang mosunod nga mga kahimtang. Ang tagsaanong sister nag-ampo nga unta makaeskuwela siya sa School for Kingdom Evangelizers. Pero milabay na lang ang pipila ka tuig, wala gihapon siya makadawat ug imbitasyon. Ang batan-ong brader nag-ampo kang Jehova nga unta maayo siya sa grabeng sakit aron mas makaalagad siya sa kongregasyon. Pero wala moarang-arang ang iyang sakit. Ang Kristohanong mga ginikanan nag-ampo nga unta ang ilang anak magpabilin sa kamatuoran. Pero ang ilang anak midesisyon nga mohunong sa pag-alagad kang Jehova.

² Tingali naa pod kay gihangyo kang Jehova, pero wala pa nimo ni madawat. Tungod ana, basig makaingon ka nga gitubag ni Jehova ang pag-ampo sa uban, pero ang imoha wala. O tingali maghunahuna ka nga basig naa kay nahimong sayop. Kanay gibati sa sister nga si Janice.b Siya ug ang iyang bana nag-ampo nga gusto kaayo nilang mag-alagad sa Bethel. Siya miingon: “Kombinsido ko nga matawag dayon mi sa Bethel.” Pero milabay na lang ang mga bulan ug tuig, ang magtiayon wala gihapon matawag. Si Janice miingon: “Naguol ko ug naglibog. Naa ba koy nahimo nga nakapasuko kang Jehova? Espesipiko man unta ang akong pag-ampo. Nganong wala man ko niya tubaga?”

 3. Unsay atong hisgotan niining artikuloha?

³ Usahay, maghunahuna tingali ta kon si Jehova naminaw ba sa atong mga pag-ampo. Bisan ang ubang matinumanong alagad ni Jehova kaniadto nakahunahuna pod ana. (Job 30:20; Sal. 22:2; Hab. 1:2) Unsay makakombinsir nimo nga tubagon gyod ni Jehova ang imong mga pag-ampo? (Sal. 65:2) Aron matubag na nga pangutana, konsiderahon una nato kini nga mga punto: (1) Unsay atong madahom kang Jehova? (2) Unsay gidahom ni Jehova kanato? (3) Ngano tingaling kinahanglan natong usbon ang uban natong mga hangyo?

 4. Sumala sa Jeremias 29:12, unsay gisaad ni Jehova nga iyang buhaton?

⁴ Nagsaad si Jehova nga paminawon niya ang atong mga pag-ampo. (Basaha ang Jeremias 29:12.) Gihigugma sa atong Diyos ang iyang matinumanong mga alagad, busa dili gyod niya balewalaon ang ilang mga pag-ampo. (Sal. 10:17; 37:28) Pero wala ni magpasabot nga ihatag niya ang tanan natong hangyo. Kinahanglan tingali tang maghulat nga moabot ang bag-ong kalibotan ayha nato madawat ang ubang butang nga atong gihangyo.

 5. Unsay konsiderahon ni Jehova dihang maminaw siya sa atong mga pag-ampo? Ipatin-aw.

⁵ Konsiderahon ni Jehova ang iyang katuyoan dihang maminaw siya sa atong mga pag-ampo. (Isa. 55:8, 9) Apil sa iyang katuyoan nga pun-on ang yuta ug malipayong mga tawo nga nagkahiusa ug nagpasakop sa iyang pagmando. Pero si Satanas miingon nga mas maayo kon ang mga tawo maoy magmando sa ilang kaugalingon. (Gen. 3:1-5) Aron mapamatud-an nga bakakon ang Yawa, gitugotan ni Jehova ang mga tawo sa pagmando sa ilang kaugalingon. Pero ang pagmando sa tawo miresultag daghan kaayong problema karon. (Eccl. 8:9) Nasabtan nato nga sa pagkakaron, dili wad-on ni Jehova ang tanan natong problema. Kon iya nang buhaton, ang uban tingali maghunahuna nga milampos ang pagmando sa tawo, nga kaya niining sulbaron ang tanan natong problema.

 6. Nganong kinahanglang kombinsido ta nga kanunayng himoon ni Jehova kon unsay mahigugmaon ug makataronganon?

⁶ Lainlain tingali ang tubag ni Jehova sa susamang mga hangyo. Pananglitan, dihang grabeng nasakit si Haring Ezequias, nagpakiluoy siya kang Jehova nga ayohon siya. Ingong tubag, giayo siya ni Jehova. (2 Hari 20:1-6) Pero dihang si apostol Pablo mihangyo kang Jehova nga tangtangon ang iyang “tunok sa unod,” nga posibleng usa ka depekto sa lawas, wala tangtanga ni Jehova ang iyang problema. (2 Cor. 12:7-9) Konsideraha pod ang pananglitan ni apostol Santiago ug Pedro. Silang duha nameligrong patyon ni Haring Herodes. Ang kongregasyon nag-ampo para kang Pedro, ug tingali kang Santiago pod. Pero si Santiago gipatay, samtang si Pedro milagrosong giluwas. (Buh. 12:1-11) Makapangutana tingali ta, ‘Nganong giluwas ni Jehova si Pedro pero wala niya luwasa si Santiago?’ Walay giingon ang Bibliya.c Pero makaseguro ta nga “walay inhustisya” kang Jehova. (Deut. 32:4) Ug nahibalo ta nga si Pedro ug Santiago parehong giuyonan ni Jehova. (Pin. 21:14) Usahay, ang tubag ni Jehova sa atong pag-ampo lahi tingali sa atong gidahom. Pero kay naa tay pagsalig nga kanunayng mahigugmaon ug makataronganon ang tubag ni Jehova sa atong mga pag-ampo, dili nato kuwestiyonon ang iyang paagi sa pagtubag kanato.—Job 33:13.

 7. Unsay atong likayan, ug ngano?

⁷ Likayan nato nga ikompara ang atong kahimtang nianang sa uban. Pananglitan, mihangyo tingali ta kang Jehova nga tabangan ta sa espesipikong paagi, pero wala niya tubaga ang atong hangyo. Sa ulahi, atong nasayran nga naa poy mihangyo ug susama sa atong gihangyo, ug morag gitubag siya ni Jehova. Kanay naeksperyensiyahan sa sister nga si Anna. Nag-ampo siya nga ang iyang bana, si Matthew, maulian unta sa cancer. Niadtong panahona, naay duha ka edarang sister nga nagsakit pod ug cancer. Si Anna kinasingkasing nga nag-ampo para kang Matthew ug sa mga sister. Ang mga sister naayo, pero si Matthew namatay. Sa primero, naghunahuna si Anna nga naulian ang mga sister kay giayo sila ni Jehova. Tungod ana, nakapangutana siya kon nganong wala tubaga ni Jehova ang iyang mga pag-ampo nga maulian ang iyang bana. Siyempre, wala ta mahibalo kon nganong naulian ang duha ka sister. Pero nahibalo ta nga si Jehova naay permanenteng solusyon sa tanan natong pag-antos, ug nga naghinamhinam siya sa pagbanhaw sa namatay niya nga mga higala.—Job 14:15.

 8. (a) Sumala sa Isaias 43:2, sa unsang paagi gitabangan ta ni Jehova? (b) Sa unsang paagi ang pag-ampo makatabang nato dihang mag-atubang tag lisod nga mga pagsulay? (Tan-awa ang video nga Ang Pag-ampo Makatabang Nato sa Pagsagubang.)

⁸ Si Jehova kanunay nga motabang nato. Ingong atong mahigugmaong Amahan, dili gusto ni Jehova nga makita tang nag-antos. (Isa. 63:9) Pero dili sa tanang higayon nga panalipdan ta niya sa mga pagsulay, nga gipakasamag mga suba o kalayo. (Basaha ang Isaias 43:2.) Bisan pa ana, nagsaad siya nga tabangan ta nga ‘makatabok’ o ‘makalatas’ niana. Ug bisan unsa pang pagsulay ang atong giatubang karon, seguroon ni Jehova nga posible gihapon tang makaalagad niya. Hatagan pod ta ni Jehova sa iyang gamhanang balaang espiritu aron makalahutay ta. (Luc. 11:13; Filip. 4:13) Busa makaseguro ta nga ihatag gyod niya kon unsay atong gikinahanglan aron makalahutay ta ug makapabiling matinumanon kaniya.d

 9. Base sa Santiago 1:6, 7, nganong kinahanglan tang mosalig nga tabangan ta ni Jehova?

⁹ Gidahom ni Jehova nga mosalig ta niya. (Heb. 11:6) Usahay, mobati tingali ta nga dili nato kaya ang atong mga problema. Basin magduhaduha pa gani ta kon tabangan ba ta ni Jehova. Pero ang Bibliya nagpasalig nato nga pinaagi sa gahom sa Diyos kita “makakatkat ug paril.” (Sal. 18:29) Busa imbes magpadaog sa atong mga pagduhaduha, kinahanglang mag-ampo ta uban ang bug-os nga pagtuo, nga mosalig nga tubagon ni Jehova ang atong mga pag-ampo.—Basaha ang Santiago 1:6, 7.

10. Paghatag ug pananglitan kon sa unsang paagi molihok ta uyon sa atong mga pag-ampo.

¹⁰ Gidahom ni Jehova nga molihok ta uyon sa atong mga pag-ampo. Pananglitan, ang usa ka brader mohangyo tingali kang Jehova nga tabangan siya nga maka-day off sa iyang trabaho aron makatambong sa rehiyonal nga kombensiyon. Unsaon kaha pagtubag ni Jehova ang iyang pag-ampo? Puwede niyang hatagag kaisog ang brader sa pagduol sa iyang amo. Pero ang brader kinahanglan pong molihok pinaagi sa paghangyo sa iyang amo. Basin kinahanglan pa gani siyang balikbalik nga mohangyo. O kaha makigbaylo siyag eskedyul sa iyang kauban sa trabaho. Ug kon gikinahanglan, puwede pod siyang moingon nga mobakasyon siya nga walay suweldo.

11. Nganong angay nga balikbalik natong iampo ang atong mga gikabalak-an?

¹¹ Gidahom ni Jehova nga balikbalik natong iampo ang atong mga gikabalak-an. (1 Tes. 5:17) Gipasiugda ni Jesus nga ang uban natong hangyo dili dayon ihatag ni Jehova. (Luc. 11:9) Busa ayawg surender! Padayon sa pag-ampo nga kinasingkasing. (Luc. 18:1-7) Kon padayon tang mag-ampo bahin sa usa ka butang, atong gipakita kang Jehova nga seryoso gyod ta sa atong gihangyo. Ato pong gipakita ang atong pagtuo nga kaya gyod ta niyang tabangan.

12. (a) Unsay usa sa angay natong ipangutana bahin sa atong mga hangyo, ug ngano? (b) Unsaon nato pagseguro nga ang atong mga pag-ampo nagpakitag pagtahod kang Jehova? (Tan-awa ang kahong “Ang Ako Bang mga Hangyo Nagpakitag Pagtahod Kang Jehova?”)

¹² Kon wala nato madawat ang atong giampo, naay tulo ka butang nga puwede natong ipangutana sa atong kaugalingon. Una, ‘Husto ba ang akong giampo?’ Sagad maghunahuna ta nga nahibalo ta kon unsay pinakamaayo para nato. Pero ang atong mga gihangyo basig dili makahatag natog kaayohan sa ulahi. Kon nag-ampo ta bahin sa usa ka problema, basig naay mas maayong solusyon niana kay sa atong gihangyo. Ug ang ubang butang nga atong gipangayo basig dili uyon sa kabubut-on ni Jehova. (1 Juan 5:14) Pananglitan, konsideraha ang pag-ampo sa mga ginikanan nga gihisgotan ganina. Ilang gihangyo si Jehova nga seguroon nga ang ilang anak dili mobiya sa kamatuoran. Morag maayo na nga hangyo. Pero dili pugson ni Jehova si bisan kinsa sa pag-alagad kaniya. Gusto niya nga kitang tanan, apil ang atong mga anak, mopili sa pagsimba kaniya. (Deut. 10:12, 13; 30:19, 20) Busa mas maayong hangyoon sa mga ginikanan si Jehova nga tabangan sila nga matandog ang kasingkasing sa ilang anak aron mapalihok siya nga higugmaon si Jehova ug makigsuod Kaniya.—Prov. 22:6; Efe. 6:4.

13. Base sa 1 Pedro 5:6, 7, kanus-a ta tabangan ni Jehova? Ipatin-aw.

¹³ Ang ikaduhang pangutana maoy, ‘Panahon na ba nga tubagon ni Jehova ang akong hangyo?’ Mobati tingali ta nga kinahanglan na dayon nato ang tubag sa atong mga pag-ampo. Pero ang tinuod, si Jehova nahibalo kon kanus-a ang pinakamaayong panahon nga tabangan ta. (Basaha ang 1 Pedro 5:6, 7.) Dihang dili dayon nato madawat ang atong gihangyo, maghunahuna tingali ta nga ‘Dili’ ang tubag ni Jehova. Pero basig ang iyang tubag maoy ‘Dili pa.’ Pananglitan, hunahunaa ang batan-ong brader nga gihisgotan ganina nga nag-ampo nga maulian siya sa iyang sakit. Kon giayo siya ni Jehova pinaagig milagro, basig moingon si Satanas nga ang brader padayong nag-alagad kang Jehova tungod lang kay giayo siya. (Job 1:9-11; 2:4) Dugang pa, si Jehova naa nay gitakdang panahon sa pag-ayo sa tanang sakit. (Isa. 33:24; Pin. 21:3, 4) Sa pagkakaron, dili ta makadahom nga ayohon ta ni Jehova sa atong mga sakit. Busa mas maayong hangyoon sa brader si Jehova nga hatagan siyag kusog ug kalinaw sa hunahuna aron makalahutay siya sa iyang sakit ug makapadayon sa pag-alagad nga matinumanon.—Sal. 29:11.

14. Unsay imong nakat-onan sa eksperyensiya ni Janice?

¹⁴ Hunahunaa ang eksperyensiya ni Janice, kinsa nag-ampo nga makaalagad sa Bethel. Milabay pa ang lima ka tuig ayha niya nasabtan kon giunsa pagtubag ni Jehova ang iyang pag-ampo. Siya miingon: “Gigamit ni Jehova ang maong panahon aron tudloan ug tabangan ko nga mahimong mas maayong Kristohanon. Niadtong panahona, kinahanglan pa nakong palig-onon ang akong pagsalig kaniya. Kinahanglan pod nakong pauswagon ang akong rutina sa personal nga pagtuon. Ug kinahanglan kong makakat-on nga mahimong tinuod nga malipayon, bisag unsa pay akong kahimtang.” Sa ulahi, si Janice ug ang iyang bana gidapit nga mag-alagad sa sirkitong buluhaton. Si Janice miingon: “Gitubag gyod ni Jehova ang akong mga pag-ampo, pero dili sa paagi nga akong gidahom. Milabay pa ang pipila ka panahon ayha nako nakita kon unsa ka nindot ang iyang tubag, pero mapasalamaton kaayo ko nga naeksperyensiyahan nako ang iyang gugma ug pagkamaayo.”

15. Nganong maayo usahay nga dili kaayo espesipiko ang atong mga hangyo? (Tan-awa sab ang mga hulagway.)

¹⁵ Ang ikatulong pangutana maoy, ‘Espesipiko ra ba kaayo ang akong giampo?’ Gidasig ta nga mahimong espesipiko sa atong mga pag-ampo. Pero usahay, mas makita nato ang kabubut-on ni Jehova kon dili kaayo espesipiko ang atong mga hangyo. Konsideraha ang pananglitan sa tagsaanong sister nga dugay nang nag-ampo nga makaeskuwela sa School for Kingdom Evangelizers. Gusto niyang moeskuwela aron makaalagad siya sa lugar nga mas dakog panginahanglan. Busa samtang padayon siyang mag-ampo nga matawag sa SKE, puwede pod niyang hangyoon si Jehova nga tabangan siyang makita ang ubang kahigayonan sa pagpalapad sa iyang ministeryo. (Buh. 16:9, 10) Dayon, puwede siyang molihok uyon sa iyang pag-ampo pinaagi sa pagpangutana sa tigdumala sa sirkito kon naa bay duol nga kongregasyon nga nanginahanglag dugang payunir. O puwede siyang mosulat sa sangang buhatan aron mangutana kon asang mga lugara ang nanginahanglag dugang magsasangyaw.e

16. Sa unsa ta makasalig?

¹⁶ Sa ato nang nakat-onan, makasalig ta nga tubagon ni Jehova ang atong mga pag-ampo sa mahigugmaon ug makataronganong paagi. (Sal. 4:3; Isa. 30:18) Usahay dili tingali nato madawat ang tubag nga atong gidahom. Pero dili gyod balewalaon ni Jehova ang atong mga pag-ampo. Gimahal ta niya pag-ayo. Ug dili ta niya biyaan. (Sal. 9:10) Busa padayon sa ‘pagsalig kaniya sa tanang panahon,’ ug ibubo ang imong kasingkasing kaniya diha sa pag-ampo.—Sal. 62:8.