Pakigkomunikar Pinaagig mga Sulat

ANG mga sulat nakapauswag sa mga kinabuhi ug tinamdan sa milyonmilyong katawhan. Ang kadaghanang basahon sa Kristohanon Gregong Kasulatan sa orihinal maoy mga sulat. Kita karon makahimog mga sulat aron palig-onon ang mga bag-ohan, pangomostahon ang mga higala, dasigon ang mga igsoong lalaki ug babaye nga nakadawat ug espesyal nga mga kaakohan, palig-onon kadtong nag-atubang ug mga kalisdanan, ug ipaabot ang impormasyon nga gikinahanglan sa pag-atiman sa mga kalihokan sa kongregasyon.​—1 Tes. 1:​1-7; 5:​27; 2 Ped. 3:​1, 2.

Ang pagsulat maoy usa usab ka epektibong paagi sa pagsangyaw. Sa pipila ka dapit, daghang tawo ang nagpuyo diha sa binantayan-pag-ayong mga apartment o puy-anang mga hotel nga lisod masangyawan. Ang pipila kasagarang wala sa ilang balay, busa dili nato sila maabtan inigsangyaw nato sa balaybalay. Ang uban nagpuyo sa hilit nga mga dapit.

Ang sakit, dili maayong panahon, o ang curfew usahay magpatanggong nimo sa balay. Makapadala ka kaha ug usa ka sulat aron makahatag ug dugang pamatuod ngadto sa usa ka paryente o sa usa ka tawo nga naestorya nimo sa di-pormal nga paagi? Mibalhin ba ang usa sa imong mga estudyante sa Bibliya? Ang usa ka sulat gikan nimo basin mao ray iyang gikinahanglan aron magpabiling buhi ang iyang interes sa espirituwal. O kaha makapaambit kag tukmang Kasulatanhong impormasyon ngadto kanilang nagminyo sa di pa dugay, nahimong mga ginikanan, o namatyan sa mga mahal sa kinabuhi.

Sa dihang magsulat aron mosangyaw sa usa ka tawong wala pa nimo sukad ikahimamat, ipaila una ang imong kaugalingon. Mahimong isaysay nimo nga ikaw nakigbahin sa usa ka internasyonal nga boluntaryong buluhaton. Kon daw tukma ang pagbuhat sa ingon, hisgoti nga ikaw usa sa mga Saksi ni Jehova. Pahibaloa ang tawo kon nganong nagsulat ka inay personal nga moduaw. Pagsulat nga morag nakigsulti ka sa tawo nga inatubangay. Sa gihapon, uyon sa pagtultol nga “magmabinantayon kamo ingon sa mga halas apan inosente ingon sa mga salampati,” palandonga pag-ayo kon unsa ka daghang impormasyon ang angay nimong ibutyag bahin sa imong kaugalingon.​—Mat. 10:16.

Ilakip sa sulat kon unsay imong isulti unta sa tawo kon imo pa siyang giduaw. Mahimong ipahiuyon nimo ang introduksiyon gikan sa Nangatarongan nga basahon o mogamit ug usa ka Kasulatanhong presentasyon gikan sa ulahing isyu sa Atong Ministeryo sa Gingharian. Mahimo kang mangutana ug dasigon ang tawo sa paghunahuna bahin niana. Ang ubang mga magmamantala yanong mosaysay nga kita adunay libreng programa sa pagtubag sa mga pangutana sa Bibliya ug dayon mositar ug pipila ka ulohan sa kapitulo gikan sa usa sa atong mga tabang sa pagtuon. Ang usa ka sampol nga sulat nga gisulat aron makahatag pamatuod makita sa panid 73. Mahimong mohatag nimo kini ug pipila ka ideya, apan maayong lainlainon ang kaundan. Kay kon dili, sa ngadtongadto, ang mga tawo basin sublisubling makadawat ug mao rang klaseha sa sulat.

Ang ubang mga tawo magpanuko pagbasa ug taas nga sulat gikan sa usa ka estranyo. Busa hayan maoy maalamong dalan nga himoong mubo ang imong sulat. Kon taas kaayo ang imong sulat basin kapoyag basa ang modawat niana. Mas tukma kon isukip nimo ang usa ka pinatik nga imbitasyon alang sa mga tigom sa Kingdom Hall. Mahimong ilakip nimo ang usa ka tract, brosyur, o usa ka isyu sa Ang Bantayanang Torre o Pagmata! ug isaysay nga kini ikatagana sa regular nga paagi kon gusto niya. O ikaw makapakisayod kon mahimo bang moduaw sa balay sa imong gikaestorya aron makigsulti kaniyag dugang bahin sa gihisgotang ulohan.

Karon tan-awa ang sampol nga sulat. Matikdi ang mosunod: (1) Kini hapsay tan-awon, dili gubot. (2) Bisan kon matigwalaan ang sobre, ang makadawat makabasa gihapon sa ngalan ug adres sa nagpadala. (3) Ang katuyoan sa sulat gihisgotan nga yano ug direkta diha sa unang parapo. (4) Ang matag pangunang ideya gihisgotan diha sa separadong parapo. (5) Tungod sa katuyoan niini, ang sulat dili kaayo kaswal ni sobra ka pormal.

Diha sa mas pormal nga sulat, sama nianang ipadala sa sekretaryo sa kongregasyon ngadto sa sangang buhatan, ang ngalan sa kongregasyon ilakip, uban ang ngalan sa sekretaryo, iyang adres, ug petsa. Ang ngalan ug adres sa tawo o organisasyon nga padad-an sa sulat makita usab. Sundan kini sa hustong pagtimbaya o salutation. Sa pagtiklop sa sulat, diha sa ubang mga pinulongan makita ang ekspresyong sama sa “Kanimo matinud-anon” o “Maminatud-on” sa ibabaw sa pirma. Ang pirma kinahanglang kinamoton pagsulat.

Sa bisan unsang sulat, bantayi ang hustong espeling, gramarya, puntuwasyon ug, siyempre, ang kahinlo. Ang pagbuhat sa ingon makaamot sa dignidad sa imong sulat ug sa mensahe nga gidala niini.

Sa gawas sa sobre, isulat kanunay ang adres sa tagsulat​—mas maayo nga ang imong kaugalingong adres sa koreyo. Kon mobati ka nga dili maalamong ihatag ang imong adres sa dihang mosangyaw ngadto sa mga estranyo pinaagig sulat, pangutan-a ang mga ansiyano kon mouyon ba sila nga gamiton mo ang adres sa lokal nga Kingdom Hall. Ang adres sa Watch Tower Society dili gayod angayng gamiton niining katuyoana, kay kini sayop nga magpasabot nga ang imong sulat gipadala gikan sa mga buhatan sa Sosyedad ug makapahinabog kalibog. Kon walay ihatag nga adres sa tagsulat ug ang literatura gisukip, kini usab makahatag ug sayop nga impresyon nga ang Sosyedad maoy nagpadala.

Tinoa nga papitlan nimo ug igong selyo, ilabina kon imong sukipan ug literatura. Hinumdomi nga sa daghang nasod kon isukip ang usa ka brosyur o magasin, mas dakog bayaran sa selyo kay sa usa lamang ka sulat.

Inigkahuman sa imong sulat, basaha kana aron masusi ang sulod. Maayo ba kining paminawon? Kini ba mahigalaon ug mataktikanhon? Ang gugma ug kalulot maoy lakip sa mga hiyas nga gipaningkamotan natong ipakita sa atong mga pagpakiglabot sa uban. (Gal. 5:​22, 23) Kon makamatikod ka ug dili maayong paminawon o daw negatibong ideya, usba ang pagkabalay sa pulong.

Ang usa ka sulat makaadto sa mga dapit nga dili nimo maabot. Kining kamatuorana lamang maoy nakapahimo niini nga usa ka talagsaong himan sa ministeryo. Sanglit ang sulat magahawas kanimo ug sa mga butang nga imong gibarogan, palandonga kon unsay gisulti niini, kon unsay dagway niini, ug kon maayo ba kining paminawon. Mahimong itagana niini ang gikinahanglan aron sa pagsugod, paglig-on, o pagdasig sa usa ka bililhong kalag nga mosubay sa dalan sa kinabuhi.