Paningkamot Alang sa Kaluwasan sa Inyong Panimalay

“Padayong matutoa sila diha sa disiplina ug mapasiboong pagdumala-sa-kaisipan ni Jehova.”​—EFESO 6:4.

 1, 2. Unsang mga kalisod ang ginaatubang sa mga ginikanan karong adlawa?

USA ka popular nga magasin nagtawag niini nga usa ka kausaban. Anaa kini sa usa ka artikulo nga nagbatbat sa makakurat nga mga kausaban nga nagakahitabo sa pamilya sa katuigang dili pa dugay. Kini giingon nga mao “ang resulta sa usa ka epidemiya sa diborsiyo, pagminyo-pag-usab, pagdiborsiyo-pag-usab, anak sa gawas, ug bag-ong mga kapit-osan sulod sa dili-bungkag nga mga pamilya.” Ang maong mga kalisod ug mga kapit-osan dili makapatingala, tungod kay nagtagna ang Bibliya nga atubangon sa mga tawo ang “makuyaw nga mga panahon” sulod niining “kataposang mga adlaw.”​—2 Timoteo 3:1-5.

² Mao nga ang mga ginikanan karong adlawa nagaatubang ug mga kalisdanan nga wala mahibaloi sa nangaging mga kaliwatan. Bisan tuod may pipila ka ginikanan sa atong taliwala nga nakamatuto sa ilang mga anak diha sa diyosnong mga dalan “sukad sa pagkamasuso,” daghang pamilya dili pa dugayng nagsugod sa “paglakaw diha sa kamatuoran.” (2 Timoteo 3:15; 3 Juan 4) Ang ilang mga anak tingali gulang-gulang na sa dihang nagsugod ang mga ginikanan sa pagtudlo kanila sa mga dalan sa Diyos. Dugang pa, ang misulbong nga gidaghanon sa mga pamilya nga usa ra ang ginikanan ug tapik nga mga pamilya makita sa atong taliwala. Bisan unsa pay inyong mga kahimtang, ang tambag ni apostol Pablo aplikado: “Padayong matutoa sila diha sa disiplina ug mapasiboong pagdumala-sa-kaisipan ni Jehova.”​—Efeso 6:4.

Kristohanong mga Ginikanan ug ang Ilang mga Papel

 3, 4. (a) Unsa ang mga hinungdan sa pagkadaot sa papel sa mga amahan? (b) Nganong ang Kristohanong mga amahan kinahanglang mahimong labaw pa kay sa tigpangitag kabuhian?

³ Matikdi nga gitumong ni Pablo ang iyang mga pulong sa Efeso 6:4 ilabina ngadto sa “mga amahan.” Usa ka magsusulat miingon nga sa nangaging mga kaliwatan “ang mga amahan mao ang may kaakohan sa pagmatuto sa moral ug espirituwal sa ilang mga anak; ang mga amahan mao ang may kaakohan sa edukasyon sa ilang mga anak. . . . Apan gikuha sa Kausaban sa Industriya kini nga panagsuoray; gibiyaan sa mga amahan ang ilang kaumahan ug mga tindahan, gibiyaan ang ilang mga panimalay aron sa pagtrabaho sa mga pabrika ug sa ulahi sa mga opisina. Gipangabaga sa mga inahan ang daghang katungdanan nga ang mga amahan maoy may kaakohan. Sa makadaghan, ang pagkaamahan nahimong usa na lamang ka ideya.”

⁴ Kristohanong mga lalaki: Ayaw pagkatagbaw nga mahimong mga tigpangitag kabuhian lamang, nga itugyan ang tanang pagbansay ug pagmatuto sa inyong mga anak diha sa inyong mga asawa. Ang Proverbio 24:27 nag-awhag sa mga amahan sa karaang panahon: “Hikaya ang inyong trabaho sa gawas, ug andama kini alang kanimo diha sa uma. Ug human niini kinahanglang imong tukoron usab ang imong panimalay.” Sa susama karong adlawa, ingong usa ka tawo nga nagtrabaho, lagmit kinahanglan mo nga magtrabahog dugay ug magmakugihon sa pagpangitag kabuhian. (1 Timoteo 5:8) Apan, human niana, palihog paggahin ug panahon aron “tukoron ang imong panimalay”​—sa emosyonal ug sa espirituwal nga paagi.

 5. Sa unsang paagi ang Kristohanong mga asawa maningkamot alang sa kaluwasan sa ilang panimalay?

⁵ Kristohanong mga asawa: Kamo usab kinahanglang maningkamot alang sa kaluwasan sa inyong mga panimalay. Ang Proverbio 14:1 nag-ingon: “Ang tinuod nga babayeng maalamon nagatukod sa iyang balay.” Ingong mga kapikas sa kaminyoon, kamo ug ang inyong mga bana mag-ambitay sa kaakohan sa pagbansay sa inyong mga anak. (Proverbio 22:6; Malaquias 2:14) Mahimong nalangkit niini ang pagdisiplina sa inyong mga anak, pag-andam kanila alang sa Kristohanong mga tigom ug sa pag-alagad sa kanataran, o bisan sa pagdumala sa pagtuon sa pamilya kon ang inyong mga bana dili makahimo niini. Dako usab ang inyong mahimo sa pagtudlo sa inyong mga anak sa mga buluhaton sa balay, sa maayong pamatasan, sa pisikal nga kahinlo, ug daghang ubang makatabang nga mga butang. (Tito 2:5) Kon ang mga bana ug mga asawa magkaubang magtrabaho niining paagiha, labaw pa nilang matagan-an ang mga panginahanglan sa ilang mga anak. Unsa ang pipila sa maong mga panginahanglan?

Pag-atiman sa Ilang Emosyonal nga mga Panginahanglan

 6. Unsang mga papel ang ginadula sa mga inahan ug mga amahan diha sa emosyonal nga kaugmaran sa ilang mga anak?

⁶ “Kon ang usa ka nagapasusong inahan nagapangga sa iyang kaugalingong mga anak,” sila mobati nga luwas, may kasegurohan, ug gihigugma. (1 Tesalonica 2:7; Salmo 22:9) Pipila lamang ka inahan ang makapugong sa tinguha sa paghatag ug dakong pagtagad sa ilang mga masuso. Nangutana ang manalagnang Isaias: “Malimot ba ang usa ka asawa sa iyang masuso nga bata nga dili siya magpakita ug kaluoy sa anak nga lalaki sa iyang tagoangkan?” (Isaias 49:15) Busa ang mga inahan adunay usa ka dako nga papel sa emosyonal nga kaugmaran sa mga anak. Bisan pa, ang mga amahan adunay usa ka dakong papel usab niining bahina. Ang edukador sa pamilya nga si Paul Lewis nag-ingon: “Wala pa gayod akoy tawo nga gitabangan nga may usa ka [delingkuwente] nga anak nga miingon nga maayo ang relasyon nila sa ilang papa. Walay usa gikan sa ginatos.”

 7, 8. (a) Unsay pamatuod nga adunay malig-ong bugkos tali kang Jehova nga Diyos ug sa iyang Anak? (b) Sa unsang paagi matukod sa mga amahan ang usa ka mahigugmaong bugkos uban sa ilang mga anak?

⁷ Busa hinungdanong ugmaron ug maayo sa Kristohanong mga amahan ang mahigugmaong bugkos uban sa ilang mga anak. Pananglitan, tagda si Jehova nga Diyos ug si Jesu-Kristo. Sa pagbawtismo ni Jesus, si Jehova miingon: “Ikaw mao ang akong Anak, ang hinigugma; giuyonan ko ikaw.” (Lucas 3:22) Pagkadaghan ang gipadayag niadtong pipila ka pulong! Si Jehova (1) miila sa iyang Anak, (2) bukas kaayong mipahayag sa iyang gugma kang Jesus, ug (3) nagpadayag sa iyang pag-uyon kang Jesus. Bisan pa, dili lamang kini mao ang higayon nga gipahayag ni Jehova ang iyang gugma alang sa iyang Anak. Si Jesus sa ulahi miingon sa iyang Amahan: “Ikaw nahigugma man kanako sa wala pa ang pagkatukod sa kalibotan.” (Juan 17:24) Nan, dili ba ang tanang masinugtanong mga anak nga lalaki ug anak nga babaye nagkinahanglan sa pag-ila, paghigugma, ug pag-uyon sa ilang mga amahan?

⁸ Kon usa ikaw ka amahan, tingali dako kag mahimo sa pagtukod ug mahigugmaong bugkos uban sa inyong mga anak pinaagi sa regular nga paghimog hustong mga pagpadayag sa gugma sa pisikal ug sa pulong. Tinuod, malisdan ang ubang mga lalaki sa pagpakita sa ilang pagmahal, ilabina kon sila wala gayod makadawat ug dayag nga pagmahal gikan sa ilang kaugalingong mga amahan. Apan bisan ang usa ka bakikaw nga pagsulay sa pagpadayag sa gugma ngadto sa inyong mga anak mahimong adunay gamhanang epekto. Gawas pa, “ang gugma nagapalig-on.” (1 Corinto 8:1) Kon ang inyong mga anak mobati nga may kasegurohan tungod sa inyong inamahan nga gugma, sila mas makiling nga mahimong ‘tinuod nga anak nga mga lalaki ug anak nga mga babaye’ ug dili-managana sa pagpadayag sa ilang pribadong mga butang diha kanimo.​—Proverbio 4:3.

Pag-atiman sa Ilang Espirituwal nga mga Panginahanglan

 9. (a) Sa unsang paagi giatiman sa mahinadlokon-sa-Diyos nga Israelinhong mga ginikanan ang espirituwal nga mga panginahanglan sa ilang mga pamilya? (b) Unsang mga higayon ang nabatonan sa mga Kristohanon sa pagtudlo sa ilang mga anak sa dili-pormal nga paagi?

⁹ Ang mga anak usab adunay espirituwal nga mga panginahanglan. (Mateo 5:3) Gitambagan ni Moises ang Israelinhong mga ginikanan: “Kining mga pulonga nga akong gisugo kaninyo karong adlawa kinahanglang magapaibabaw sa inyong kasingkasing; ug itudlo mo kini sa dakong kakugi sa imong anak ug magasulti ka mahitungod niini sa magalingkod ikaw sa imong balay ug sa magalakaw ikaw sa dalan ug sa imong paghigda ug sa imong pagbangon.” (Deuteronomio 6:6, 7) Kon usa ikaw ka Kristohanong ginikanan, dako ka ug mahimo sa imong pagtudlo sa dili-pormal nga paagi, sama sa dihang “magalakaw ikaw sa dalan.” Ang panahong magugol sa pagsakay nga magkauban diha sa awto sa pamilya, sa pagpamalit, o paglakaw uban sa imong mga anak diha sa pultahan-ug-pultahan nga Kristohanong ministeryo maoy maayong mga higayon sa paghatag ug instruksiyon sa relaks nga kahimtang. Ang panahon sa pagpangaon maoy maayo kaayong panahon sa panag-estoryahay sa mga pamilya. “Ang panahon sa pagpangaon maoy among gamiton sa panagsultiay bahin sa mga butang nga nahitabo sa adlaw,” miingon ang usa ka ginikanan.

10. Nganong ang pagtuon sa pamilya maoy usa ka hagit usahay, ug unsang determinasyon ang kinahanglang huptan sa mga ginikanan?

¹⁰ Ugaling, ang pormal nga pagtudlo pinaagi sa usa ka regular nga pagtuon sa Bibliya uban sa inyong mga anak hinungdanon usab. Sa tinuod, “ang binuang nabugkos diha sa kasingkasing” sa kabataan. (Proverbio 22:15) Ang ubang mga ginikanan moingon nga tuyoon sa pagsabotahe sa ilang mga anak ang pagtuon sa pamilya. Pinaagi sa unsa? Pinaagi sa paglihok nga naghiwasa ug gilaayan, pinaagi sa paghimog makalagot nga mga pagbalda (sama sa mga pag-awayay sa mga igsoon), o sa pagtusotuso nga wala mahibalo sa paninugdang nga mga kamatuoran sa Bibliya. Kon moabot na sa punto nga mahimo na kining tigiay kon kinsang pagbuot ang matuman, ang pagbuot sa ginikanan kinahanglan mao ang matuman. Kinahanglang dili mosurender ang Kristohanong mga ginikanan ug pasagdan ang kabataan nga maoy modominar sa panimalay.​—Itandi ang Galacia 6:9.

11. Sa unsang paagi himoon ang pagtuon sa pamilya nga makalingaw?

¹¹ Kon ang inyong mga anak dili malipay sa pagtuon sa pamilya, tingali ang pipila ka kausaban himoon. Pananglitan, ang pagtuon ba gigamit ingong pasangil sa pagsubli sa labing ulahi nga kasaypanan sa inyong mga anak? Tingali maayo nga hisgotan ang maong mga suliran sa pribado. Regular ba nga ginahimo ang inyong pagtuon? Kon inyong kanselahon kini alang sa usa ka paboritong salida sa telebisyon o dula, posible nga dili hatagag seryosong pagtagad sa inyong mga anak ang pagtuon. Kamo ba masingkamoton ug madasigon sa inyong paagi sa pagdumala sa pagtuon? (Roma 12:8) Oo, ang pagtuon angay nga makalingaw. Paningkamot nga malangkit ang tanang kabataan. Magmapositibo ug makapalig-on, dayega sa kinasingkasing ang inyong mga anak sa ilang pagpakigbahin. Siyempre, ayaw pagkobrehi lamang ang materyal, apan paningkamot nga maabot ang mga kasingkasing.​—Proverbio 23:15.

Pagdisiplina Diha sa Pagkamatarong

12. Nganong ang disiplina dili sa tanang panahon nagkinahanglag pisikal nga silot?

¹² Ang kabataan usab nagkinahanglag kusganong disiplina. Ingong ginikanan, kinahanglan hatagan ninyo sila ug mga limitasyon. Nag-ingon ang Proverbio 13:24: “Ang usa nga nagahawid sa iyang bunal nagadumot sa iyang anak, apan ang usa nga nahigugma kaniya nagadisiplina kaniya.” Ang Bibliya wala magpasabot, hinunoa, nga ang disiplina kinahanglang ipahamtang kanunay sa pisikal nga paagi. Ang Proverbio 8:33 nag-ingon: “Pamati sa disiplina,” ug kita gisultihan nga ang “usa ka pagbadlong motidlom sa halalom sa usa nga may salabotan kay sa usa ka gatos ka latos nganha sa usa ka buang.”​—Proverbio 17:10.

13. Sa unsang paagi ipahamtang ang disiplina sa bata?

¹³ Usahay, angay ang pipila ka pisikal nga disiplina. Apan, kon ipahamtang diha sa kasuko, malagmit manobra kini ug walay epekto. Ang Bibliya nagpasidaan: “Kamong mga amahan, ayaw palagota ang inyong mga anak, aron sila dili magminghoy.” (Colosas 3:21) Sa pagkatinuod, “ang pagdaogdaog makapabuang sa usa nga maalamon.” (Ecclesiastes 7:7) Ang usa ka nasuko nga batan-on mahimong mosupak pa gani bisan sa matarong nga mga sukdanan. Busa angay gamiton sa mga ginikanan ang Kasulatan sa pagdisiplina sa ilang mga anak sa pagkamatarong diha sa malig-on apan timbang nga paagi. (2 Timoteo 3:16) Ang diyosnong disiplina ipahamtang uban ang gugma ug kalumo.​—Itandi ang 2 Timoteo 2:24, 25.a

14. Unsay kinahanglang himoon sa mga ginikanan kon mobati sila nga hapit nang madaog sa kasuko?

¹⁴ Siyempre, “kita mangapandol man sa makadaghan.” (Santiago 3:2) Bisan ang usa ka kinaiyanhon mahigugmaong ginikanan madaog sa pagpit-os sa panahon ug makasultig masakit o magpasundayag sa kasuko. (Colosas 3:8) Kon kana mahitabo, ayaw pasalopi ang adlaw nga magpabiling masulob-on kaayo ang inyong anak o ikaw mismo nasuko pa. (Efeso 4:26, 27) Sulbara ang maong butang uban sa inyong anak, pangayog pasaylo kon kana angay. (Itandi ang Mateo 5:23, 24.) Ang pagpakitag pagkamapainubsanon mahimong magpasuod kanimo ug sa imong anak. Kon imong bation nga dili ka makapugong sa imong emosyon ug madaog sa kasuko, pangitag tabang gikan sa tinudlong mga ansiano sa kongregasyon.

Usay-Ginikanan nga mga Panimalay ug Tapik nga mga Pamilya

15. Sa unsang paagi ang mga anak sa usay-ginikanan nga mga pamilya matabangan?

¹⁵ Bisan pa, dili tanang mga anak adunay tabang gikan sa duha ka ginikanan. Sa Tinipong Bansa, 1 ka bata gikan sa 4 gipadako sa usa ka ginikanan. Daghan ang ‘mga ilo nga anak nga lalaki’ sa panahon sa Bibliya, ug ang kabalaka alang kanila masubsob nga gihisgotan sa Kasulatan. (Exodo 22:22) Karong adlawa, ang Kristohanong mga panimalay nga usay-ginikanan nagaatubang usab ug mga pagpit-os ug mga kalisod, apan sila malipay sa pagkasayod nga si Jehova mao ang “amahan sa mga anak nga lalaki nga ilo sa amahan ug maghuhukom sa mga balong babaye.” (Salmo 68:5) Ang mga Kristohanon giawhag “sa pag-atiman sa mga ilo ug sa mga babayeng balo diha sa ilang kasakitan.” (Santiago 1:27) Ang isigka-magtutuo dako ug mahimo sa pagtabang sa usay-ginikanan nga mga pamilya.b

16. (a) Unsay angay himoon sa nag-inusarang ginikanan alang sa ilang kaugalingong mga panimalay? (b) Nganong malisod ang pagdisiplina, apan nganong kinahanglang ipahamtang kini?

¹⁶ Kon nag-inusara ikaw nga ginikanan, unsay imong mahimo aron makabatog kaayohan ang imong panimalay? Kinahanglang magkugi ka sa pagtuon sa Bibliya sa pamilya, sa pagtambong sa tigom, ug sa pag-alagad sa kanataran. Ang disiplina, hinunoa, tingali maoy usa ka malisod nga buluhaton. Tingali nagbangotan ka pa sa imong namatay nga minahal nga kapikas. O tingali nakigbisog ka pa sa mga pagbating sad-an o kasuko tungod sa pagbulag sa kapikas. Kon nag-ambitay kamo sa pag-atiman sa kabataan, hayan may kahadlok ka pa nga basig palabihon sa imong anak ang imong gibulagan o gidiborsiyohan nga kapikas. Ang ingon niini nga mga kahimtang nagpalisod sa emosyonal nga paagi sa pagpahamtang ug timbang nga disiplina. Ugaling, ang Bibliya nagsulti kanato nga ang “usa ka bata nga pinasagdan makahatag kaulawan sa iyang inahan.” (Proverbio 29:15) Busa ayaw padaog sa pagbating sad-an, pagbasol, o emosyonal nga kalisod sa kanhi nga kapikas sa kaminyoon. Pagbutang ug makataronganon ug malig-ong mga sukdanan. Ayaw ikompromiso ang mga prinsipyo sa Bibliya.​—Proverbio 13:24.

17. Sa unsang paagi mahimong malubog ang mga papel sa mga sakop sa pamilya diha sa usay-ginikanan nga panimalay, ug unsay mahimo aron mapugngan kini?

¹⁷ Ugaling, adunay mga kalisdanang motungha kon tratahon sa nag-inusarang inahan ang iyang anak nga lalaki ingong kapuli nga bana​—ang lalaki sa panimalay—​o ang iyang anak nga babaye ingong sumbonganan, pabug-atan siya sa pribadong mga problema. Ang paghimo niini dili-angay ug makapalibog sa bata. Kon ang mga papel sa ginikanan ug bata malubog, ang disiplina madaot. Ipaila nga ikaw ang ginikanan. Kon usa ikaw ka inahan nga nagkinahanglan ug pinasukad-sa-Bibliya nga tambag, pangayo niini gikan sa mga ansiano o tingali sa usa ka hamtong gulang-gulang nga igsoong babaye.​—Itandi ang Tito 2:3-5.

18, 19. (a) Unsa ang pipila ka hagit nga ginaatubang sa tapik nga mga pamilya? (b) Sa unsang paagi ang mga ginikanan ug mga anak diha sa tapik nga pamilya magpakitag kaalam ug pagsabot?

¹⁸ Ang tapik nga mga pamilya nagaatubang usab ug mga hagit. Sa masubsob, ang tapik nga mga ginikanan nakakaplag nga ang “dihadiha nga paghigugma” talagsa ra. Pananglitan, ang tapik nga mga anak basin sensitibo sa bisan unsang kiling sa pagpakitag paboritismo ngadto sa tinuod nga mga anak. (Itandi ang Genesis 37:3, 4.) Sa pagkatinuod, ang tapik nga mga anak tingali nakigbisog pa sa kaguol alang sa mibulag nga ginikanan ug nahadlok nga ang mahigugmaong ama-ama o ina-ina sa usa ka paagi dili-magmaunongon sa ilang tinuod nga amahan o inahan. Ang mga pagsulay sa paghatag sa gikinahanglang disiplina basin sugaton ug mapintas nga pahinumdom, ‘Dili ka akong tinuod nga ginikanan!’

¹⁹ Ang Proverbio 24:3 nag-ingon: “Pinaagi sa kaalam natukod ang usa ka panimalay, ug pinaagi sa salabotan kini malig-on.” Oo, nagkinahanglag kaalam ug pagsabot sa bahin sa tanan aron ang tapik nga pamilya magmalamposon. Sa ulahi, kinahanglang dawaton sa mga anak ang sagad masakit nga kamatuoran nga ang mga butang nausab. Ang mga ama-ama o ina-ina kinahanglang magtuon usab nga magmapailobon ug maluloy-on, dili masilo dayon kon atubangon ang daw pagsalikway. (Proverbio 19:11; Ecclesiastes 7:9) Sa dili pa pangakohan ang papel nga tigdisiplina, paningkamoti nga matukod ang panaghigalaay uban sa tapik nga anak. Hangtod nga matukod ang maong bugkos, lantawon sa pipila nga mas maayo nga ang tinuod nga ginikanan ang magpahamtang sa disiplina. Kon motungha ang mga suliran, paningkamot sa pagpakigkomunikar. “Kadtong nagapakigtambag adunay kaalam,” nag-ingon ang Proverbio 13:10.c

Padayon sa Pagpaningkamot Alang sa Kaluwasan sa Inyong Panimalay!

20. Unsa ang kinahanglang padayonong buhaton sa Kristohanong mga ulo sa pamilya?

²⁰ Ang malig-ong Kristohanong mga pamilya dili sulagmang miugmad. Kamo nga mga ulo sa pamilya kinahanglang magpadayon sa pagpaningkamot alang sa kaluwasan sa inyong mga panimalay. Magmaigmat, matikdi ang dili-maayong mga hiyas o kalibotanong mga kiling. Pagpakitag maayong panig-ingnan sa sinultihan, pamatasan, gugma, pagtuo, ug kaputli. (1 Timoteo 4:12) Ipasundayag ang mga bunga sa espiritu sa Diyos. (Galacia 5:22, 23) Ang pailob, konsiderasyon, pasaylo, ug kalumo makalig-on sa inyong mga paningkamot sa pagtudlo sa inyong mga anak sa mga dalan sa Diyos.​—Colosas 3:12-14.

21. Sa unsang paagi ang mainit, malipayong palibot mahuptan diha sa panimalay?

²¹ Uban sa tabang sa Diyos, paningkamoti nga mahuptan ang usa ka malipayon, mainitong espiritu sulod sa inyong panimalay. Paggugol ug panahon nga magkausa ingong pamilya, maningkamot nga magkadungan ug pangaon labing menos kausa sa usa ka adlaw. Ang Kristohanong mga tigom, pag-alagad sa kanataran, ug pagtuon sa pamilya importante. Bisan pa, aduna usay “panahon sa pagkatawa . . . ug panahon sa paglukso.” (Ecclesiastes 3:1, 4) Oo, pag-iskedyul ug mga panahon sa makalig-on nga kalingawan. Ang mga pagduaw sa mga museo, mga zoo, ug sa susamang mga lugar makalingaw alang sa tibuok pamilya. O mahimo nimong palongon ang TV ug paggugol ug panahon sa pagkanta, pagpamati sa musika, pagdula, ug panagsultiay. Kini makatabang sa pamilya nga mas masuod pa.

22. Nganong kinahanglan kang maningkamot alang sa kaluwasan sa inyong panimalay?

²² Hinaot kamong tanang Kristohanong mga ginikanan magpadayon sa pagpaningkamot sa pagpahimuot kang Jehova sa bug-os “samtang padayon kamong magapamunga sa tanang maayong buhat ug magalambo diha sa tukmang kahibalo sa Diyos.” (Colosas 1:10) Tukora ang inyong panimalay diha sa malig-on nga pundasyon nga masinugtanon sa Pulong sa Diyos. (Mateo 7:24-27) Ug makasalig kamo nga ang inyong mga paningkamot sa pagmatuto sa inyong mga anak “diha sa disiplina ug mapasiboong pagdumala-sa-kaisipan ni Jehova” makabaton sa iyang pag-uyon.​—Efeso 6:4.

[Mga footnote]

Unsaon Nimo Pagtubag?

◻ Sa unsang paagi ang bana ug asawa magtinabangay sa pagtukod sa ilang panimalay?

◻ Unsa ang pipila ka emosyonal nga panginahanglan sa mga anak, ug sa unsang paagi kini ikatagana?

◻ Sa unsang paagi ang mga ulo sa pamilya magtudlo sa ilang mga anak sa pormal ug dili-pormal nga paagi?

◻ Sa unsang paagi ang mga ginikanan magadisiplina diha sa pagkamatarong?

◻ Unsay himoon aron makabatog kaayohan ang usay-ginikanan nga mga pamilya ug tapik nga mga pamilya?

[Hulagway sa panid 16]

Ang gugma ug pag-uyon sa amahan hinungdanon sa emosyonal nga kaugmaran sa usa ka bata