Abughoan Alang sa Putli nga Pagsimba Kang Jehova

“Si Jehova, kansang ngalan Abughoan, siya maoy usa ka Diyos nga abughoan.”​—EXODO 34:14.

 1. Unsa ang nangibabawng hiyas sa Diyos, ug unsay kalabotan niini sa iyang pangabugho?

GIHUBIT ni Jehova ang iyang kaugalingon ingong “usa ka Diyos nga abughoan.” Tingali nahibulong ka kon ngano, sanglit ang pulong “pangabugho” adunay negatibong mga kahulogan. Tinuod, ang nangibabawng hiyas sa Diyos mao ang gugma. (1 Juan 4:8) Ang bisan unsang mga pagbati niya sa pangabugho sa ingon maoy sa kaayohan sa katawhan. Sa pagkamatuod, ato unyang makita nga ang pangabugho sa Diyos hinungdanon sa kalinaw ug panag-angay sa uniberso.

 2. Unsa ang pipila ka paagi gihubad ang Hebreohanong mga pulong alang sa “pangabugho”?

² Ang nalangkit Hebreohanong mga pulong alang sa “pangabugho” makita kapin sa 80 ka beses sa Hebreohanong Kasulatan. Halos katunga niini nga mga paghisgot nagatumong kang Jehova nga Diyos. “Kon ipadapat ngadto sa Diyos,” miingon si G. H. Livingston, “ang ideya sa pangabugho wala magpasabot sa usa ka dili-maayo nga emosyon, kondili, hinunoa, sa pag-insister sa eksklusibo nga pagsimba kang Jehova.” (The Pentateuch in Its Cultural Environment) Busa, ang New World Translation naghubad usahay sa Hebreohanong nombre ingong “pag-insister sa eksklusibong debosyon.” (Ezekiel 5:13) Ang ubang tukmang mga hubad maoy “kainit” o “kadasig.”​—Salmo 79:5; Isaias 9:7.

 3. Sa unsang mga paagi ang pangabugho usahay mahimong puwersa alang sa kaayohan?

³ Ang tawo gilalang nga adunay katakos sa pagpangabugho, apan ang pagkahulog sa tawo sa sala nagdaot sa pangabugho. Bisan pa, ang pangabugho sa tawo mahimong puwersa alang sa kaayohan. Kini magpalihok sa tawo sa pagpanalipod sa usa ka minahal gikan sa daotang mga impluwensiya. Dugang pa, ang mga tawo tukmang makapakitag pangabugho kang Jehova ug sa iyang pagsimba. (1 Hari 19:10) Aron mapasa ang hustong pagsabot sa maong pangabugho alang kang Jehova, ang Hebreohanong nombre mahimong hubaron ingong “dili pagtugot nga adunay kaindig” siya.​—2 Hari 10:16.

Ang Bulawan nga Nating Baka

 4. Unsang sugo may kalabotan sa matarong nga pangabugho ang nangibabaw sa Kasugoan sa Diyos sa Israel?

⁴ Usa ka pananglitan sa matarong nga pangabugho mao kanang nahitabo human madawat sa mga Israelinhon ang Kasugoan sa Bukid sa Sinai. Daghang higayon nga gipasidan-an sila sa dili pagsimba sa hinimo-sa-tawo nga mga diyosdiyos. Gisultihan sila ni Jehova: “Ako si Jehova nga inyong Diyos maoy usa ka Diyos nga nagpangayo ug eksklusibong debosyon [o, “usa ka Diyos nga abughoan (madasigon); usa ka Diyos nga dili magtugot nga may kaindig”].” (Exodo 20:5; potnot; itandi ang Exodo 20:22, 23; 22:20; 23:13, 24, 32, 33.) Si Jehova naghimog usa ka pakigtugon sa mga Israelinhon, nagsaad nga panalanginan sila ug sa pagdala kanila ngadto sa Yutang Saad. (Exodo 23:22, 31) Ug ang katawhan miingon: “Ang tanan nga gipamulong ni Jehova kami andam sa pagbuhat ug magmasinugtanon.”​—Exodo 24:7.

 5, 6. (a) Sa unsang paagi nakasala ug dako ang mga Israelinhon samtang nagkampo sa Bukid sa Sinai? (b) Sa unsang paagi si Jehova ug ang iyang maunongong mga magsisimba nagpakitag matarong nga pangabugho sa Sinai?

⁵ Bisan pa, ang mga Israelinhon sa wala magdugay nakasala batok sa Diyos. Nagkampo gihapon sila sa tiilan sa Bukid sa Sinai. Si Moises atua pa gihapon sa bukid sa daghan nang adlaw, nagdawat sa dugang sugo gikan sa Diyos, ug gipugos sa mga tawo ang igsoon ni Moises, si Aaron, sa paghimog usa ka diyos alang kanila. Misugot si Aaron ug naghimog nating baka nga hinimo sa bulawan nga gihatag sa mga tawo. Gipangangkon nga kini nga idolo naghawas kang Jehova. (Salmo 106:20) Sa pagkasunod adlaw sila nagtanyag ug mga halad ug nagpadayon sa “pagyukbo niana.” Dayon sila “naglipaylipay.”​—Exodo 32:1, 4, 6, 8, 17-19.

⁶ Si Moises milugsong sa bukid samtang nagsaulog ang mga Israelinhon. Sa pagkakita sa ilang makauulaw nga buhat, siya misinggit: “Kinsa ang dapig kang Jehova?” (Exodo 32:25, 26) Ang mga anak ni Levi mipundok diha kang Moises, ug iyang gisugo sila sa pagkuhag mga espada ug sa pagpatay sa nanaghudyakang mga magsisimbag diyosdiyos. Nagpasundayag sa ilang pangabugho alang sa putli nga pagsimba sa Diyos, ang mga Levihanon nakapatay ug duolan sa 3,000 sa ilang sad-ang mga igsoon. Gipaluyohan ni Jehova kining buhata pinaagi sa pagpadalag hampak ngadto sa mga nangaluwas. (Exodo 32:28, 35) Dayon gisubli sa Diyos ang sugo: “Ayaw kamo pagyukbo sa lain nga diyos, tungod kay si Jehova, kansang ngalan Abughoan, siya maoy usa ka Diyos nga abughoan.”​—Exodo 34:14.

Si Baal sa Peor

 7, 8. (a) Sa unsang paagi nangahulog ang daghang Israelinhon sa grabeng idolatriya may kalabotan kang Baal sa Peor? (b) Sa unsang paagi natapos ang hampak ni Jehova?

⁷ Kap-atan ka tuig sa ulahi, sa dihang talisulod na ang nasod sa Israel sa Yutang Saad, gidani sa matahom nga mga babayeng Moabihanon ug Midianhon ang daghang Israelinhon sa pagduaw ug sa pagpahimulos sa ilang pagkamaabiabihon. Angay untang isalikway niining mga lalakiha ang suod nga pagpakig-uban sa mga magsisimba sa bakak nga mga diyos. (Exodo 34:12, 15) Hinunoa, sila nanagan samag ‘mga baka ngadto sa ihawan,’ nga nagpakighilawas sa mga babaye ug miduyog kanila sa pagyukbo kang Baal sa Peor.​—Proverbio 7:21, 22; Numeros 25:1-3.

⁸ Si Jehova nagpadalag hampak sa pagpatay niadtong nalangkit niining makauulaw nga pagsimba sa sekso. Gisugo usab sa Diyos ang walay-sala nga mga Israelinhon sa pagpatay sa ilang sad-ang mga igsoon. Sa kagahig-ulo, gidala sa usa ka pangulo sa banay sa Israel nga ginganlag Zimri ang usa ka Midianhong prinsesa ngadto sa iyang tolda aron makigsekso kaniya. Sa pagkakita niini, gipatay sa mahinadlokon sa Diyos nga saserdoteng si Pinehas ang imoral nga parisan. Dayon ang hampak napahunong, ug ang Diyos miingon: “Si Pinehas . . . nagpalayo sa akong kaligutgot gikan sa mga Israelinhon; siya nagpakita taliwala kanila sa samang mapangabughoong kasuko nga nagpalihok kanako, ug mao nga wala nako laglaga sa akong pagpangabugho ang mga Israelinhon.” (Numeros 25:11, The New English Bible) Bisan tuod ang nasod naluwas gikan sa kalaglagan, labing menos 23,000 ka Israelinhon ang nangamatay. (1 Corinto 10:8) Wala nila madawat ang ganti sa ilang dugay nang gipangandoy nga paglaom sa pagsulod sa Yutang Saad.

Usa ka Pasidaan nga Leksiyon

 9. Unsay naagoman sa katawhan sa Israel ug Juda tungod kay sila dili abughoan alang sa putli nga pagsimba kang Jehova?

⁹ Ikasubo, nakalimot dayon ang mga Israelinhon niining mga leksiyona. Sila wala magpakita nga abughoan alang sa putli nga pagsimba kang Jehova. “Uban sa ilang linilok nga mga larawan sila nagpadayon sa paghagit [sa Diyos] sa pagpangabugho.” (Salmo 78:58) Tungod niini, gitugotan ni Jehova ang napulo ka tribo sa Israel nga mabihag sa mga Asiryanhon sa 740 W.K.P. Ang nahibiling duha ka tribo nga gingharian sa Juda nakaagom ug susamang silot sa dihang ang ilang kaulohan nga siyudad sa Jerusalem nalaglag sa tuig 607 W.K.P. Daghan ang gipamatay, ug ang nangaluwas gibihag ngadto sa Babilonya. Pagkagamhanan nga pasidaang panig-ingnan alang sa tanang Kristohanon karon!​—1 Corinto 10:6, 11.

10. Unsay mahitabo sa dili-mahinulsolong mga magsisimbag diyosdiyos?

¹⁰ Ang ikatulong bahin sa populasyon sa yuta​—duolan sa 1,900 ka milyon—​karon nag-angkong Kristohanon. (1994 Britannica Book of the Year) Ang kadaghanan kanila sakop sa mga relihiyon nga nagagamit ug mga rebulto, mga larawan, ug mga krus sa ilang pagsimba. Wala luwasa ni Jehova gikan sa kamatayon ang iyang kaugalingong katawhan nga naghagit kaniya sa pagpangabugho pinaagi sa ilang idolatriya. Ni luwason niya gikan sa kamatayon kadtong nag-angkong mga Kristohanon nga nagsimba pinaagi sa tabang sa materyal nga mga butang. “Ang Diyos maoy usa ka Espiritu, ug silang nagasimba kaniya kinahanglang mosimba pinaagi sa espiritu ug kamatuoran,” miingon si Jesu-Kristo. (Juan 4:24) Dugang pa, ang Bibliya nagpasidaan sa mga Kristohanon sa pagbantay batok sa idolatriya. (1 Juan 5:21) Ang dili-mahinulsolong mga magsisimbag mga diyosdiyos malakip niadtong dili makapanunod sa Gingharian sa Diyos.​—Galacia 5:20, 21.

11. Sa unsang paagi ang Kristohanon mahimong sad-an sa idolatriya bisag dili moyukbo sa usa ka idolo, ug unsay makatabang sa usa aron makalikay sa maong idolatriya? (Efeso 5:5)

¹¹ Bisan pag ang usa ka matuod nga Kristohanon dili gayod moyukbo sa usa ka idolo, siya kinahanglang maglikay sa bisan unsa nga gilantaw sa Diyos nga idolatroso, mahugaw, ug makasasala. Pananglitan, ang Bibliya nagpasidaan: “Patya . . . ang inyong mga sangkap sa lawas nga anaa sa yuta maylabot sa pakighilawas, pagkadili-hinlo, seksuwal nga gana, makadaot nga tinguha, ug hakog nga pangibog, nga maoy idolatriya. Gumikan sa maong mga butang ang kapungot sa Diyos moabot.” (Colosas 3:5, 6) Ang pagsunod niining mga pulonga nagkinahanglan sa pagsalikway sa imoral nga paggawi. Kini nagkinahanglan sa paglikay sa kalingawan nga gilaraw sa pagpukaw sa mahugaw seksuwal nga gana. Imbes tagbawon ang maong gana, ang matuod nga mga Kristohanon maoy abughoan alang sa putli nga pagsimba sa Diyos.

Ulahing mga Panig-ingnan sa Diyosnong Pangabugho

12, 13. Sa unsang paagi si Jesus nagpakitag talagsaong panig-ingnan sa pagpasundayag sa pangabugho alang sa putli nga pagsimba sa Diyos?

¹² Ang labing talagsaong panig-ingnan sa usa ka tawo nga nagpakitag pangabugho sa putli nga pagsimba sa Diyos mao si Jesu-Kristo. Sa unang tuig sa iyang ministeryo, iyang nakita ang hakog nga mga magpapatigayon nga nagpalakaw ug negosyo diha sa mga sawang sa templo. Ang mga Hudiyo nga dili taga-Jerusalem tingali nagkinahanglan sa mga serbisyo sa mga tig-ilis ug salapi aron mabayloan ang ilang langyaw nga salapi ilis sa salapi nga madawat ingong buhis sa templo. Sila nagkinahanglan usab nga mopalit ug mga mananap ug mga langgam aron makatanyag ug mga halad nga gikinahanglan sa Kasugoan sa Diyos. Ang maong mga transaksiyon sa negosyo angay himoon sa gawas sa mga sawang sa templo. Mas grabe pa, klarong gipahimuslan sa mga magpapatigayon ang relihiyosong mga panginahanglan sa ilang mga igsoon pinaagi sa pagsingil ug taas kaayong mga prisyo. Nahupngan sa pangabugho alang sa putli nga pagsimba sa Diyos, si Jesus migamit ug latigo sa pagbugaw sa mga karnero ug mga baka. Iyang gipanglintuwad usab ang mga lamesa sa mga tig-ilis ug salapi, nga nag-ingon: “Ihunong ang paghimo sa balay sa akong Amahan nga balay sa mga paninda!” (Juan 2:14-16) Sa ingon natuman ni Jesus ang mga pulong sa Salmo 69:9: “Ang tuman nga kadasig [o, “pangabugho,” Byington] alang sa imong balay naglamoy kanako.”

¹³ Sa milabay ang tulo ka tuig namatikdan na usab ni Jesus ang hakog nga mga magpapatigayon nga nagpalakaw ug negosyo sa templo ni Jehova. Hinloan ba kini niya sa ikaduhang higayon? Ang iyang pangabugho alang sa putli nga pagsimba sa Diyos niadtong tungora maoy sama gihapon ka lig-on sa nagsugod pa siya sa iyang ministeryo. Iyang giabog ang mga magtitinda ug mga pumapalit. Ug siya mihatag ug mas mabug-at pa nga katarongan alang sa iyang mga lihok, nga nag-ingon: “Dili ba nahisulat man kini, ‘Ang akong balay tawgon nga balay ampoanan alang sa tanang kanasoran’? Apan gihimo ninyo kining usa ka langob sa mga tulisan.” (Marcos 11:17) Pagkamaayo nga panig-ingnan sa malahutayong pagpakitag diyosnong pangabugho!

14. Sa unsang paagi ang pangabugho ni Jesus alang sa putli nga pagsimba makaapekto kanato?

¹⁴ Ang personalidad sa gihimaya karon nga Ginoong Jesu-Kristo wala mausab. (Hebreohanon 13:8) Niining ika-20ng siglo, siya abughoan gihapon alang sa putli nga pagsimba sa iyang Amahan sama sa dihang dinhi pa siya sa yuta. Kini makita sa mga mensahe ni Jesus ngadto sa pito ka kongregasyon nga narekord sa basahon sa Pinadayag. Kini aplikado kaayo karon, sa “adlaw sa Ginoo.” (Pinadayag 1:10; 2:1–3:22) Diha sa panan-awon nakita ni apostol Juan ang nahimayang Jesu-Kristo nga may “mga mata ingon sa nagadilaab nga kalayo.” (Pinadayag 1:14) Kini nagpakita nga walay makaikyas sa panan-aw ni Kristo samtang magsusi siya sa mga kongregasyon sa pagtino nga sila magpabiling mahinlo ug angay alang sa pag-alagad kang Jehova. Kinahanglang ibutang sa hunahuna sa presenteng-adlawng mga Kristohanon ang pasidaan ni Jesus batok sa pagsulay sa pag-alagad sa duha ka agalon​—ang Diyos ug mga bahandi. (Mateo 6:24) Gisultihan ni Jesus ang materyalistikong mga sakop sa kongregasyon sa Laodicea: “Tungod kay ikaw mainit-init ug dili init ni bugnaw, isuka ko ikaw gikan sa akong baba. . . . Pagmasiboton ug paghinulsol.” (Pinadayag 3:14-19) Pinaagi sa pulong ug panig-ingnan, angay tabangan sa tinudlong mga ansiano sa kongregasyon ang ilang kaubang mga magtutuo aron makalikay sa bitik sa materyalismo. Kinahanglang panalipdan usab sa mga ansiano ang panon batok sa pagkadunot sa moral niining hilig-sa-sekso nga kalibotan. Dugang pa, ang katawhan sa Diyos dili gayod motugot nga adunay bisan unsang impluwensiya ni Jezebel diha sa kongregasyon.​—Hebreohanon 12:14, 15; Pinadayag 2:20.

15. Sa unsang paagi gisundog ni apostol Pablo si Jesus sa pagpakitag pangabugho alang sa pagsimba kang Jehova?

¹⁵ Tigsundog si apostol Pablo kang Kristo. Aron mapanalipdan ang bag-ong nabawtismohang mga Kristohanon gikan sa dili-maayong impluwensiya sa espirituwal, siya miingon: “Ako nangabugho kaninyo sa usa ka diyosnong pangabugho.” (2 Corinto 11:2) Una pa niini, ang pangabugho ni Pablo alang sa putli nga pagsimba nagpalihok kaniya sa pagtudlo niining mao gihapong kongregasyon sa pagpalagpot sa usa ka dili-mahinulsolong makihilawason nga usa ka makahugaw nga impluwensiya. Ang dinasig nga mga sugo nga gihatag sa maong higayon dako kaayong tabang sa mga ansiano karon samtang nagapaningkamot sila sa pag-amping sa kapin sa 75,500 ka kongregasyon sa mga Saksi ni Jehova nga mahinlo.​—1 Corinto 5:1, 9-13.

Ang Pangabugho sa Diyos Makahatag Kaayohan sa Iyang Katawhan

16, 17. (a) Sa dihang gisilotan sa Diyos ang karaang Juda, unsang tinamdan ang gipakita sa mga nasod? (b) Human sa pagkabihag sa Juda sa 70 ka tuig, sa unsang paagi nagpakita si Jehova sa iyang pangabugho alang sa Jerusalem?

¹⁶ Sa dihang gisilotan sa Diyos ang katawhan sa Juda pinaagi sa pagtugyan kanila nga mabihag ngadto sa Babilonya, sila gibiaybiay. (Salmo 137:3) Sa mapangabughoong pagdumot, gitabangan sa mga Edomihanon ang mga Babilonyanhon sa paghatag ug katalagman sa katawhan sa Diyos, ug si Jehova nakakita niini. (Ezekiel 35:11; 36:15) Diha sa pagkabihag ang nangaluwas naghinulsol, ug human sa 70 ka tuig gipasig-uli sila ni Jehova ngadto sa ilang yuta.

¹⁷ Sa sinugdan, malisod kaayo ang kahimtang sa mga tawo sa Juda. Ang siyudad sa Jerusalem ug ang templo niini anaa sa kagun-oban. Apan ang mga nasod sa palibot misupak sa tanang paningkamot sa pagtukod pag-usab sa templo. (Esdras 4:4, 23, 24) Unsay gibati ni Jehova niini? Ang dinasig nga rekord nag-ingon: “Mao kini ang giingon ni Jehova sa mga panon: ‘Ako nangabugho alang sa Jerusalem ug alang sa Zion sa dako nga pagpangabugho. Uban sa dakong kasuko ako nasuko batok sa mga nasod nga anaa sa kasayon; tungod kay ako, sa akong bahin, diyutay ra unta ug kasuko, apan sila, sa ilang bahin, mitabang sa katalagman.’ Busa mao kini ang giingon ni Jehova, ‘Ako mobalik sa Jerusalem uban ang mga kaluoy. Ang akong balay pagatukoron diha kaniya,’ mao ang giingon ni Jehova sa mga panon.” (Zacarias 1:14-16) Tinuod sa iyang saad, ang templo ug ang siyudad sa Jerusalem malamposong natukod pag-usab.

18. Unsay naagoman sa matuod nga mga Kristohanon sa panahon sa unang gubat sa kalibotan?

¹⁸ Ang tinuod nga Kristohanong kongregasyon samag naagoman sa ika-20ng siglo. Sa unang gubat sa kalibotan, gidisiplina ni Jehova ang iyang katawhan tungod kay sila wala magpabilin sa hugot nga neyutralidad sa maong kalibotanong kasungian. (Juan 17:16) Gitugotan sa Diyos ang politikanhong mga gahom sa pagdaogdaog kanila, ug ang klero sa Kakristiyanohan nalipay niini nga katalagman. Sa pagkatinuod, ang mga klerigo maoy nanguna sa pagsulsol sa mga politiko nga idili ang buluhaton sa mga Estudyante sa Bibliya, nga maoy pagtawag niadto sa mga Saksi ni Jehova.​—Pinadayag 11:7, 10.

19. Sa unsang paagi nagpakita si Jehova ug pangabugho sa iyang pagsimba sukad sa 1919?

¹⁹ Apan, si Jehova nagpakitag pangabugho alang sa iyang pagsimba ug gipasig-uli ang iyang mahinulsolong katawhan sa iyang pabor tapos sa gubat nga tuig sa 1919. (Pinadayag 11:11, 12) Tungod niini, ang gidaghanon sa mga magdadayeg ni Jehova midaghan gikan sa wala pay 4,000 niadtong 1918 ngadto sa mga 5 ka milyon karon. (Isaias 60:22) Sa dili madugay, ang pangabugho ni Jehova alang sa iyang putli nga pagsimba ipasundayag sa mas dramatikong mga paagi.

Umaabot nga mga Buhat sa Diyosnong Pangabugho

20. Unsay himoon sa Diyos sa dili madugay sa pagpakita sa iyang pangabugho alang sa putli nga pagsimba?

²⁰ Sulod sa daghang siglo ang mga relihiyon sa Kakristiyanohan misunod sa dalan sa apostatang mga Hudiyo kinsa nagpukaw kang Jehova sa pagpangabugho. (Ezekiel 8:3, 17, 18) Sa dili madugay si Jehova nga Diyos molihok pinaagi sa pagbutang ug makuyawng hunahuna diha sa mga kasingkasing sa mga membro sa Hiniusang Kanasoran. Kini mopalihok niining politikanhong mga gahom sa paglaglag sa Kakristiyanohan ug sa nahibilin sa bakak nga relihiyon. (Pinadayag 17:16, 17) Ang matuod nga mga magsisimba makalabangbuhi nianang makahahadlok nga pagpahamtang sa balaang paghukom. Sila mosanong sa mga pulong sa langitnong mga linalang kinsa miingon: “Dayega ninyo si Jah! . . . Tungod kay iya nang gikapahamtangan ug paghukom ang dakong bigaon [bakak nga relihiyon] kinsa nagdunot sa yuta pinaagi sa iyang pagpakighilawas [ang iyang bakak nga mga pagtulon-an ug pagsuportar sa mahugaw nga politika], ug siya nakapanimalos na sa dugo sa iyang mga ulipon diha sa iyang kamot.”​—Pinadayag 19:1, 2.

21. (a) Unsay himoon ni Satanas ug sa iyang sistema human nga malaglag ang bakak nga relihiyon? (b) Sa unsang paagi mosanong ang Diyos?

²¹ Unsay mahitabo human malaglag ang empiryo sa bakak nga relihiyon sa kalibotan? Pukawon ni Satanas ang politikanhong mga gahom sa pag-organisar ug tibuok-yuta nga pag-atake sa katawhan ni Jehova. Sa unsang paagi mosanong ang matuod nga Diyos niining pagsulay ni Satanas sa pagpapha sa matuod nga pagsimba sa nawong sa yuta? Ang Ezekiel 38:19-23 nagsugilon kanato: “Sa akong kainit [o, pangabugho], sa nagdilaab ko nga kaligutgot, ako [Jehova] mamulong. . . . Ug ako magpakanaog ug paghukom batok kaniya [Satanas], pinaagi sa kamatay ug dugo; ug magpadala akog bul-og nga ulan ug ulan nga yelo, kalayo ug asupri nganha kaniya ug sa iyang mga pundok ug sa daghang katawhan uban kaniya. Ug ipahimaya ko gayod ang akong kaugalingon ug ipabalaan ko ang akong kaugalingon ug ipaila ko ang akong kaugalingon atubangan sa mga mata sa daghang kanasoran; ug unya sila makaila nga ako si Jehova.”​—Tan-awa usab ang Sofonias 1:18; 3:8.

22. Sa unsang paagi atong ikapasundayag nga kita mapangabughoon alang sa putli nga pagsimba kang Jehova?

²² Pagkamakapahupay ang pagkasayod nga ang Soberano sa uniberso mapangabughoong nagtagad sa iyang matuod nga mga magsisimba! Agig lalom nga apresasyon sa iyang dili-takos nga kalulot, magmapangabughoon kita alang sa putli nga pagsimba kang Jehova nga Diyos. Uban ang kadasig, hinaot nga magpadayon kita sa pagsangyaw sa maayong balita ug masaligong magpaabot sa dakong adlaw sa dihang ipahimaya ug ipabalaan ni Jehova ang iyang bantogang ngalan.​—Mateo 24:14.

Mga Punto nga Pamalandongon

◻ Unsay kahulogan sa pagpangabugho alang kang Jehova?

◻ Unsay atong makat-onan gikan sa panig-ingnan nga gihatag sa karaang mga Israelinhon?

◻ Sa unsang paagi kita makalikay sa pagpukaw kang Jehova sa pagpangabugho?

◻ Sa unsang paagi gipakita sa Diyos ug ni Kristo ang pangabugho alang sa putli nga pagsimba?

[Kahon sa panid 12]

Ang Gugma Dili Abughoan

MAHITUNGOD sa kasina, ang ika-19ng siglong eskolar sa Bibliya nga si Albert Barnes nagsulat: “Usa kini sa labing kasagarang mga timaan sa pagkadaotan, ug tin-awng nagpakita sa tuman nga pagkatampalasan sa tawo.” Siya dugang nga miingon: “Siya nga makasubay sa tuboran sa tanang gubat ug mga kasungian ug kalibotanong mga plano​—sa tanang mga laraw ug mga katuyoan bisan sa nagaangkong mga Kristohanon, kana dakog nahimo sa pagdaot sa ilang relihiyon ug sa paghimo kanila nga kalibotanog-hunahuna, kon masubay ang tinuod nga tuboran niini​—makapahingangha ang pagkahibalo nga kining tanan maoy tungod sa kasina. Kita masakit kon ang uban mas mauswagon kay kanato; kita mangandoy nga makabaton sa nabatonan sa uban, bisan pag kita walay katungod niana; ug kini moagak ngadto sa nagkalainlaing mga paaging daotan nga ginahimo aron mamenosan ang ilang pagkalipay niini, o aron makapanag-iya niini alang sa atong kaugalingon, o aron ipakita nga wala nila mabatoni ang samang gidaghanon nga kasagarang gituohan nilang nabatonan. . . . sa ingon ang espiritu sa kasina diha sa atong mga kahiladman matagbaw.”​—Roma 1:29; Santiago 4:5.

Sa kasukwahi, si Barnes mihimog makaiikag nga pahayag mahitungod sa gugma, nga “dili sinahan.” (1 Corinto 13:4, King James Version) Siya nagsulat: “Ang gugma dili masina sa uban tungod sa kalipay nga ilang ginatagamtam; kini malipay sa ilang kaayohan; ug sa dihang magkadako ang ilang kalipay . . . , kadtong naimpluwensiyahan sa gugma . . . dili magtibhang niini; dili nila pakaulawan kadtong nakabaton niini; dili nila daoton kana nga kalipay; dili sila magbagulbol o mahiubos tungod kay sila dili kaayo pinalabi. . . . Kon gihigugma nato ang uban​—kon mahimuot kita sa ilang kalipay, dili gayod kita masina kanila.”

[Hulagway sa panid 10]

Si Pinehas mapangabughoon sa putli nga pagsimba kang Jehova