Sa Unsang Paagi ang Lukat Magluwas Kanato?
“Siya nga magpasundayag ug pagtuo sa Anak adunay kinabuhing walay kataposan; siya nga dili mosugot sa Anak dili makakita sa kinabuhi, apan ang kapungot sa Diyos magpabilin diha kaniya.”—JUAN 3:36.
1, 2. Unsa ang usa ka rason kon nganong gipatik ang Zion’s Watch Tower?
“KON tun-an pag-ayo sa usa ang Bibliya, iyang masabtan ang kahinungdanon sa kamatayon ni Kristo,” nag-ingon ang Oktubre 1879 nga gula niining magasina. Ang maong artikulo mihinapos: “Isalikway gayod nato ang bisan unsa nga nagpakamenos sa kamatayon ni Kristo, o nagtudlo nga kini dili usa ka halad nga magtabon sa sala.”—Basaha ang 1 Juan 2:1, 2.
2 Ang usa sa mga hinungdan kon nganong gisugdan pagpatik ang Zion’s Watch Tower niadtong Hulyo 1879 maoy aron sa pagdepensa sa pagtulon-an sa Bibliya bahin sa lukat. Kini nagtaganag “pagkaon sa hustong panahon,” kay sa ulahing bahin sa katuigan sa 1800, nagkadaghan ang nag-angkong Kristohanon nga nagduhaduha nga ang kamatayon ni Jesus makalukat sa atong mga sala. (Mat. 24:45) Nianang panahona, daghan ang misugod pagtuo sa ebolusyon, usa ka teoriya nga supak sa kamatuoran nga ang tawo nahulog sa pagkadili-hingpit. Ang mga ebolusyonista nagtudlo nga ang tawo mouswag ra sa iyang kaugalingon, ug wala magkinahanglan sa lukat. Nan, haom gayod ang tambag ni apostol Pablo kang Timoteo: “Bantayi ang gipiyal kanimo, nga magpahilayo gikan sa mga sulting walay-pulos nga nagpasipala sa kon unsay balaan ug gikan sa mga pagsumpakiay nianang bakak nga gitawag ug ‘kahibalo.’ Tungod sa pagpagawal sa maong kahibalo ang pipila mitipas gikan sa pagtuo.”—1 Tim. 6:20, 21.
3. Unsang mga pangutana ang atong tagdon?
3 Sa walay duhaduha, determinado ka nga dili ‘motipas gikan sa pagtuo.’ Aron magpabiling lig-on ang imong pagtuo, maayong tagdon nimo kining mga pangutanaha: Nganong gikinahanglan nako ang lukat? Unsa kadako ang gisakripisyo aron matagana kini? Sa unsang paagi ako makabenepisyo niining bililhong tagana nga makaluwas kanako gikan sa kapungot sa Diyos?
Mahimo Kitang Maluwas Gikan sa Kapungot sa Diyos
4, 5. Unsay nagpamatuod nga ang kapungot sa Diyos nagpabilin diha sa daotang sistema sa mga butang?
4 Gipakita sa Bibliya ug sa kasaysayan sa tawo nga sukad makasala si Adan, ang kapungot sa Diyos ‘nagpabilin diha’ sa mga tawo. (Juan 3:36) Dili kini ikalimod kay ang tanang tawo mamatay. Ang pagmando ni Satanas wala gayod makapanalipod sa katawhan batok sa mga kalamidad, ug walay gobyerno sa tawo ang nakatagana sa mga panginahanglan sa tanang lungsoranon niini. (1 Juan 5:19) Busa ang katawhan padayong nag-antos sa gubat, krimen, ug kakabos.
5 Nan, dayag gayod nga si Jehova wala magpanalangin niining daotang sistema sa mga butang. Si Pablo miingon nga “ang kapungot sa Diyos gipadayag gikan sa langit batok sa tanang pagkadili-diyosnon.” (Roma 1:18-20) Busa, kadtong magpadayon sa pagbuhat ug daotan dili makalingkawas sa epekto sa ilang binuhatan. Karong adlawa, ang kapungot sa Diyos gipahibalo diha sa mga mensahe sa paghukom nga gibubo samag mga hampak nganha sa kalibotan ni Satanas, ug ang maong impormasyon makita diha sa daghan natong binase-sa-Bibliya nga mga publikasyon.—Pin. 16:1.
6, 7. Unsang buluhatona ang gipangunahan sa dinihogang mga Kristohanon, ug unsang kahigayonan ang bukas pa alang niadtong bahin sa kalibotan ni Satanas?
6 Nagpasabot ba kini nga ulahi na kaayo para sa mga tawo nga makalingkawas sa pagmando ni Satanas ug makadawat sa pag-uyon sa Diyos? Dili, kay bukas pa ang kahigayonan nga mapasig-uli kang Jehova. Ang dinihogang mga Kristohanon, kinsa “mga embahador kapuli ni Kristo,” maoy nanguna diha sa publikong ministeryo nga pinaagi niana ang mga tawo sa tanang kanasoran gidapit: “Magpasig-uli kamo ngadto sa Diyos.”—2 Cor. 5:20, 21.
7 Si apostol Pablo miingon nga si Jesus “magluwas kanato gikan sa kapungot nga nagsingabot.” (1 Tes. 1:10) Kanang kataposang pagpahayag sa kasuko ni Jehova moresulta sa bug-os nga kalaglagan sa mga dili mahinulsolon. (2 Tes. 1:6-9) Kinsay makaikyas niana? Ang Bibliya nag-ingon: “Siya nga magpasundayag ug pagtuo sa Anak adunay kinabuhing walay kataposan; siya nga dili mosugot sa Anak dili makakita sa kinabuhi, apan ang kapungot sa Diyos magpabilin diha kaniya.” (Juan 3:36) Oo, ang tanang buhi nga nagpasundayag ug pagtuo kang Jesus ug sa lukat sa dihang matapos kining sistemaha dili malaglag sa kataposang pagpahayag sa kapungot sa Diyos.
Kon sa Unsang Paagi Nagalihok ang Lukat
8. (a) Unsa untay paglaom ni Adan ug Eva? (b) Unsay nagpamatuod nga si Jehova usa ka Diyos sa hingpit nga hustisya?
8 Si Adan ug Eva gilalang nga hingpit. Kon nagmatinumanon pa sila sa Diyos, ang yuta karon puno na unta sa ilang malipayong mga anak nga kauban nilang magpuyo sa Paraiso. Apan, ikasubo nga ang atong unang ginikanan misupak sa sugo sa Diyos. Ingong resulta, sila gisilotag kamatayon ug gipagawas sa Paraiso. Sa dihang nakabatog mga anak si Adan ug Eva, ang sala nakaapektar na sa tawo, ug sa ngadtongadto ang unang lalaki ug babaye natigulang ug namatay. Kini nagpamatuod nga gituman ni Jehova ang iyang gisulti. Dugang pa, siya usa ka Diyos sa hingpit nga hustisya. Si Jehova nagpasidaan kang Adan nga ang pagkaon sa gidiling bunga moresulta sa kamatayon—ug nahitabo kana.
9, 10. (a) Nganong mamatay man ang mga kaliwat ni Adan? (b) Sa unsang paagi kita makaikyas sa walay-kataposang kamatayon?
9 Ingong mga kaliwat ni Adan, atong napanunod ang dili-hingpit nga lawas nga makasala ug sa ulahi mamatay. Sa dihang nakasala si Adan, anaa pa kita sa iyang balat-ang, ingnon ta. Busa apil kita sa silot nga kamatayon. Kon basta na lang wagtangon ni Jehova ang kamatayon nga dili bayran ug lukat, wala niya tumana ang iyang gisulti. Sa diwa, si Pablo naghawas kanato sa dihang siya miingon: “Kita nahibalo nga ang Balaod espirituwal; apan ako unodnon, gibaligya ilalom sa sala. Alaot ako nga tawo! Kinsa ang magluwas kanako gikan sa lawas nga nahiagom niini nga kamatayon?”—Roma 7:14, 24.
10 Si Jehova nga Diyos lamang ang makatagana sa legal nga basehanan aron makataronganon niyang mapasaylo ang atong mga sala ug mapahigawas kita sa silot nga kamatayon. Gibuhat niya kini pinaagi sa pagpadala sa iyang pinalanggang Anak dinhi sa yuta aron mahimugso ingong hingpit nga tawo, kinsa makahatag sa iyang kinabuhi ingong lukat alang kanato. Dili sama ni Adan, si Jesus nagpabiling hingpit. Sa pagkatinuod, “siya walay nahimong sala.” (1 Ped. 2:22) Busa, si Jesus may katakos nga magpatunghag hingpit nga mga anak. Apan, iyang gitugotan ang mga kaaway sa Diyos sa pagpatay kaniya aron iyang masagop ang makasasalang kaliwat ni Adan ug mahimong makabaton ug kinabuhing walay kataposan kadtong magpasundayag ug pagtuo kaniya. Ang Kasulatan nagpatin-aw: “Adunay usa ka Diyos, ug usa ka tigpataliwala sa Diyos ug sa mga tawo, usa ka tawo, si Kristo Jesus, nga naghatag sa iyang kaugalingon ingong katugbang nga lukat alang sa tanan.”—1 Tim. 2:5, 6.
11. (a) Sa unsang paagi ikailustrar ang mga benepisyo sa lukat? (b) Kinsay makabenepisyo niana?
11 Ang paglihok sa lukat ikailustrar sa kahimtang sa mga tawo kansang tinigom nahurot tungod sa anomaliya sa bangko nga miresulta sa ilang pagkautang-utang. Ang mga tag-iya sa bangko gisentensiyahan nga mabilanggo sulod sa taastaas nga panahon. Apan komosta man ang inosenteng mga biktima? Kay nagkalisodlisod na, wala nay laing paagi nga makalingkawas sila sa maong kahimtang gawas lang kon dunay buotan ug adunahang tawo nga mosalbar sa bangko ug mag-uli sa mga biktima sa ilang gideposito, ug sa ingon mabayran na nila ang ilang mga utang. Sa samang paagi, si Jehova nga Diyos ug ang iyang pinalanggang Anak nagpalit sa mga kaliwat ni Adan ug nagkanselar sa ilang utang nga sala pinasukad sa giula nga dugo ni Jesus. Mao kanay hinungdan nga si Juan Bawtista nakaingon bahin kang Jesus: “Tan-awa, ang Kordero sa Diyos nga magakuha sa sala sa kalibotan!” (Juan 1:29) Ang kalibotan sa katawhan kansang mga sala pagakuhaon naglakip dili lamang sa mga buhi kondili sa mga patay usab.
Kon Unsa Kadako ang Gisakripisyo Aron Matagana ang Lukat
12, 13. Unsay atong makat-onan sa pagkaandam ni Abraham nga ihalad si Isaac?
12 Dili nato matugkad kon unsa gayod kadako ang gisakripisyo sa atong langitnong Amahan ug sa iyang pinalanggang Anak aron matagana ang lukat. Apan ang Bibliya nag-asoy ug mga hitabo nga makatabang kanato sa pagpamalandong bahin niini. Pananglitan, handurawa kon unsay gibati ni Abraham samtang gihimo niya ang tulo ka adlaw nga panaw paingon sa Moria agig pagsugot sa sugo sa Diyos: “Kuhaa, palihog, ang imong anak nga lalaki, ang imong bugtong anak nga imong gihigugma pag-ayo, si Isaac, ug panaw ngadto sa yuta sa Moria ug didto itanyag siya ingong usa ka halad-nga-sinunog sa usa sa mga bukid nga akong itudlo kanimo.”—Gen. 22:2-4.
13 Sa kataposan, nakaabot si Abraham sa maong dapit. Hunahunaa kon unsay iyang gibati samtang iyang gigapos ang mga kamot ug tiil ni Isaac ug gipahigda kini sa halaran nga siya mismo ang naghimo. Pagkasakit gayod kang Abraham nga ibakyaw ang kutsilyo aron sa pagpatay sa iyang anak! Handurawa ang gibati ni Isaac samtang naghigda siya sa halaran, nga naghulat sa iyang masakit nga kamatayon. Si Abraham gipugngan sa manulonda ni Jehova. Ang gibuhat ni Abraham ug Isaac motabang kanato sa pagsabot kon unsa kadako ang gisakripisyo ni Jehova sa dihang gitugotan niya ang mga sakop ni Satanas sa pagpatay sa Iyang Anak. Ang pagpakigkooperar ni Isaac kang Abraham haom nga nag-ilustrar sa pagkaandam ni Jesus nga moantos ug mamatay alang kanato.—Heb. 11:17-19.
14. Unsang hitabo sa kinabuhi ni Jacob ang makatabang kanato sa pagsabot kon unsa kadako ang gisakripisyo aron matagana ang lukat?
14 Ang kadako sa gisakripisyo aron matagana ang lukat ikailustrar usab sa usa ka panghitabo sa kinabuhi ni Jacob. Sa tanan niyang mga anak, si Jose ang labaw nga gihigugma ni Jacob. Ikasubo, ang mga igsoon ni Jose nasina ug nagdumot kaniya. Bisan pa niana, andam si Jose nga mosugot sa sugo sa iyang amahan sa pagsusi kon unsay kahimtang sa iyang mga igsoon. Nianang panahona, sila nagbantay sa mga karnero sa ilang amahan nga mga 100 kilometros ang gilay-on paamihanan gikan sa ilang pinuy-anan sa Hebron. Handurawa kon unsay gibati ni Jacob sa dihang ang iyang mga anak mipauli nga nagdala sa besti ni Jose nga nagkadugo! “Ang taas nga besti kini sa akong anak!” siya mituaw. “Gitukob gayod siya sa usa ka mapintas nga ihalas nga mananap! Seguradong gikuniskunis si Jose!” Nakapaguol gayod kini kang Jacob, ug siya nagbangotan alang sa iyang anak sulod sa daghang adlaw. (Gen. 37:33, 34) Ang reaksiyon ni Jehova sa mga panghitabo lahi gayod nianang sa dili-hingpit nga mga tawo. Apan, ang pagpamalandong niining hitaboa sa kinabuhi ni Jacob makatabang kanato sa pagsabot kon unsay gibati sa Diyos sa dihang ang iyang pinalanggang Anak gimaltratar ug gipaagom ug masakit nga kamatayon.
Kon sa Unsang Paagi Kita Makabenepisyo sa Lukat
15, 16. (a) Sa unsang paagi gipakita ni Jehova nga iyang gidawat ang lukat? (b) Sa unsang paagi ka nakabenepisyo sa lukat?
15 Gibanhaw ni Jehova nga Diyos ang iyang matinumanong Anak ug gihatagag usa ka mahimayaong espirituhanong lawas. (1 Ped. 3:18) Sulod sa 40 ka adlaw, ang nabanhawng si Jesus nagpakita sa iyang mga tinun-an, nga nagpalig-on sa ilang pagtuo ug nag-andam kanila alang sa dakong buluhaton nga pag-ebanghelyo. Dayon siya mikayab sa langit. Didto iyang gitanyag sa Diyos ang bili sa iyang giulang dugo nga maglukat niadtong magpasundayag ug pagtuo sa bili sa iyang halad. Gipakita ni Jehova nga iyang gidawat ang lukat pinaagi sa pagsugo kang Jesus sa pagbubo sa balaang espiritu nganha sa iyang mga tinun-an nga nagtigom sa Jerusalem sa Pentekostes 33 K.P.—Buh. 2:33.
16 Kining dinihogang mga sumusunod ni Kristo misugod dayon pag-awhag sa ilang mga isigkatawo sa pag-ikyas sa kapungot sa Diyos pinaagi sa pagpabawtismo sa ngalan ni Jesu-Kristo alang sa kapasayloan sa ilang mga sala. (Basaha ang Buhat 2:38-40.) Sukad nianang makasaysayanhong adlaw hangtod karon, minilyon sa katawhan gikan sa tanang kanasoran ang nakabaton ug suod nga relasyon sa Diyos pinasukad sa pagtuo sa halad lukat ni Jesus. (Juan 6:44) Karon, kinahanglan natong tubagon ang duha pa ka pangutana: Aduna ba kanatoy gihatagag paglaom nga mabuhi sa walay kataposan tungod sa atong maayong mga buhat? Kon ato nang nabatonan kining kahibulongang paglaom, posible ba nga mawala kini kanato?
17. Unsay angay nimong tinamdan sa kahibulongang pribilehiyo nga mahimong higala sa Diyos?
17 Ang tawo dili unta takos nga modawat sa lukat. Apan pinaagi sa pagpasundayag ug pagtuo niana, minilyon karon ang nahimong higala sa Diyos, nga may paglaom nga mabuhi sa walay kataposan sa paraisong yuta. Apan, ang pagkahimong higala ni Jehova dili garantiya nga kanunay natong mahuptan ang maong relasyon. Aron makalingkawas sa umaabot nga adlaw sa kapungot sa Diyos, kinahanglan nga padayon natong ipakita ang atong lalom nga pagpabili sa “lukat nga gibayad ni Kristo Jesus.”—Roma 3:24; basaha ang Filipos 2:12.
Padayon sa Pagpasundayag ug Pagtuo sa Lukat
18. Unsay nalakip sa pagpasundayag ug pagtuo sa lukat?
18 Ang temang teksto niining artikuloha, ang Juan 3:36, nagpakita nga ang pagpasundayag ug pagtuo kang Ginoong Jesu-Kristo naglakip sa pagsugot kaniya. Ang pagpabili sa lukat angayng magpalihok kanato nga magkinabuhi nga kaharmonya sa mga pagtulon-an ni Jesus, lakip na nianang bahin sa moralidad. (Mar. 7:21-23) “Ang kapungot sa Diyos modangat” sa tanan nga magpadayon sa paghimog pakighilawas, law-ayng panistis, ug “tanang matang sa kahugawan,” nga naglakip sa pagtan-awg pornograpiya.—Efe. 5:3-6.
19. Sa unsang mga paagi nato ikapakita ang atong pagtuo sa lukat?
19 Ang atong pagpabili sa lukat angayng maghimo kanatong puliki sa “mga buhat sa diyosnong pagkamahinalaron.” (2 Ped. 3:11) Maggahin kitag panahon alang sa regular ug tim-os nga pag-ampo, personal nga pagtuon sa Bibliya, pagtambong sa mga tigom, pamilyahanong pagsimba, ug masibotong pagsangyaw sa Gingharian. ‘Dili usab nato kalimtan ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.’—Heb. 13:15, 16.
20. Unsang mga panalangin ang madawat sa tanan nga padayong nagpasundayag ug pagtuo sa lukat?
20 Sa dihang ipahamtang na ni Jehova ang iyang kapungot niining daotang sistema, pagkamalipayon unya nato nga kita nagpasundayag ug pagtuo sa lukat ug padayong nagpabili niana! Ug sa gisaad sa Diyos nga bag-ong kalibotan, kita magmapasalamaton gayod niining kahibulongang tagana nga nagluwas kanato gikan sa kapungot sa Diyos.—Basaha ang Juan 3:16; Pinadayag 7:9, 10, 13, 14.
Unsay Imong Tubag?
• Nganong gikinahanglan nato ang lukat?
• Unsa kadako ang gisakripisyo aron matagana ang lukat?
• Unsang mga benepisyo ang atong madawat tungod sa lukat?
• Sa unsang paagi kita magpasundayag ug pagtuo sa halad lukat ni Jesus?
[Hulagway sa panid 13]
Bukas pa ang kahigayonan nga mapasig-uli kang Jehova
[Mga hulagway sa panid 15]
Ang pagpamalandong niining mga hitaboa nga naglangkit kang Abraham, Isaac, ug Jacob makatabang kanato sa pagpabili kon unsa kadako ang gisakripisyo aron matagana ang lukat