“Kinsay Sama Kang Jehova nga Atong Diyos?”
“Kinsay sama kang Jehova nga atong Diyos, siya nga atua sa kahitas-an ang iyang puloy-anan?”—SALMO 113:5.
1, 2. (a) Unsay paglantaw sa mga Saksi ni Jehova sa Diyos ug sa Bibliya? (b) Unsang mga pangutana ang maayong hisgotan?
ANG mga magdadayeg ni Jehova tinuod gayod nga bulahan. Pagkadako nga pribilehiyo nga malakip niining malipayong panon! Ingong iyang mga Saksi, kita modawat sa tambag, sa mga kasugoan, pagtulon-an, saad, ug mga tagna sa Pulong sa Diyos, ang Bibliya. Kita malipay sa pagtuon gikan sa Kasulatan ug “nagpatudlo ni Jehova.”—Juan 6:45.
2 Tungod sa ilang lalom nga pagtahod sa Diyos, ang mga Saksi ni Jehova makapangutana: “Kinsay sama kang Jehova nga atong Diyos?” (Salmo 113:5) Kadtong mga pulonga sa salmista nagpasabot ug pagtuo. Apan nganong ang mga Saksi may ingon niana nga pagtuo sa Diyos? Ug unsay ilang mga katarongan sa pagdayeg kang Jehova?
Pagtuo ug Pagdayeg Angay
3. Unsa ang Hallel nga mga Salmo, ug nganong gitawag sila niini?
3 Ang pagtuo kang Jehova nahiangay tungod kay siya mao ang talagsaon nga Diyos. Kini gipasiugda diha sa Salmo 113, 114, ug 115, nga bahin sa unom ka Hallel nga mga Salmo. Sumala sa rabbiniko nga School of Hillel, ang Salmo 113 ug 114 giawit sa panahon sa Hudiyohanong panihapon sa Paskuwa human nga gibubo ang ikaduhang kopa sa bino ug human nga gipatin-aw ang kahulogan sa pagsaulog. Ang Salmo 115 hangtod sa 118 giawit human sa ikaupat nga kopa sa bino. (Itandi ang Mateo 26:30.) Kini gitawag nga “Hallel nga mga Salmo” tungod kay masubsob nilang gigamit ang ekspresyong Hallelujah!—“Dayega si Jah!”
4. Unsay kahulogan sa terminong “Hallelujah,” ug pila ka higayon nga makita kini sa Bibliya?
4 “Hallelujah!” maoy transliterasyon sa Hebreohanong ekspresyon nga makita 24 ka higayon diha sa Salmo. Sa laing bahin sa Bibliya, usa ka Gregong porma niini makita upat ka higayon may kalabotan sa kalipay nga natagamtam tungod sa kalaglagan sa Babilonyang Bantogan, ang imperyo sa kalibotan sa bakak nga relihiyon, ug ang nalangkit nga kalipay tungod sa pagsugod sa pagmando ni Jehova nga Diyos ingong Hari. (Pinadayag 19:1-6) Samtang atong susihon karon kining tulo ka Hallel nga mga Salmo, maayong atong handurawon ang atong kaugalingon nga nagkanta mismo niining mga awita sa pagdayeg kang Jehova.
Dayega si Jah!
5. Ang Salmo 113 nagtubag sa unsang pangutana, ug ngadto kang kinsa ang sugo sa Salmo 113:1, 2 ilabinang aplikado?
5 Ang Salmo 113 nagtubag sa pangutana, Nganong dayegon si Jehova? Gibuksan kini ug sugo: “Dayega ninyo si Jah, kamo nga katawhan! Pagtanyag ug pagdayeg, Oh kamo nga mga alagad ni Jehova, dayega ang ngalan ni Jehova. Hinaot ang ngalan ni Jehova madayeg sukad karon ug hangtod sa walay kataposan.” (Salmo 113:1, 2) “Hallelujah!” Oo, “Dayega si Jah!” Kanang sugoa aplikado ilabina ngadto sa katawhan sa Diyos niining “panahon sa kataposan.” (Daniel 12:4) Sukad karon ug hangtod sa kahangtoran, ang ngalan ni Jehova bayawon sa tibuok yuta. Ang iyang mga Saksi karon nagasangyaw nga si Jehova mao ang Diyos, si Kristo ang Hari, ug ang Gingharian natukod na sa langit. Si Satanas nga Yawa ug ang iyang organisasyon dili makasanta niining pagdayeg kang Jehova.
6. Sa unsang paagi gidayeg si Jehova ‘gikan sa pagsubang ngadto sa pagsalop sa adlaw’?
6 Ang awit sa pagdayeg magpadayon hangtod ipahinabo ni Jehova nga mapuno ang yuta niini. “Gikan sa pagsubang sa adlaw ngadto sa pagsalop niini pagadayegon ang ngalan ni Jehova.” (Salmo 113:3) Kini nagkahulogan ug labaw pa kay sa adlaw-adlaw nga pagsimba sa ubang yutan-ong mga linalang. Ang adlaw mosubang sa silangan ug mosalop sa kasadpan, nga nagatabon sa tibuok yuta. Bisan asa ang adlaw nagasidlak, ang ngalan ni Jehova sa dili madugay pagadayegon sa tanang katawhan nga gipahigawas gikan sa pagkaulipon sa bakak nga relihiyon ug sa organisasyon ni Satanas. Sa pagkatinuod, kining awita nga dili gayod matapos ginaawit karon sa dinihogang mga Saksi ni Jehova ug niadtong mahimong yutan-ong mga anak sa iyang Hari, si Jesu-Kristo. Pagkadako sa ilang pribilehiyo ingong mga mag-aawit sa mga pagdayeg kang Jehova!
Si Jehova Dili Ikatandi
7. Unsa ang duha ka bahin sa pagkasupremo ni Jehova ang gipadayag sa Salmo 113:4?
7 Ang salmista midugang: “Si Jehova nahimong labing labaw sa tanang mga nasod; ang iyang himaya saylo sa kalangitan.” (Salmo 113:4) Tagda kining duha ka bahin sa pagkasupremo sa Diyos: (1) Alang kang Jehova, ang Usa nga Supremo, nga “labing labaw sa tanang mga nasod,” sila maoy sama sa usa ka tulo sa timba ug abog lamang diha sa timbangan; (Isaias 40:15; Daniel 7:18) (2) ang iyang himaya saylo pa sa pisikal nga kalangitan, kay ang mga manulonda nagatuman sa iyang soberano nga kabubut-on.—Salmo 19:1, 2; 103:20, 21.
8. Ngano ug sa unsang paagi nagpaubos si Jehova aron matagad ang mga butang didto sa langit ug dinhi sa yuta?
8 Napalihok sa pagkahataas sa Diyos, ang salmista miingon: “Kinsay sama kang Jehova nga atong Diyos, siya nga atua sa kahitas-an ang iyang puloy-anan? Siya nagpaubos sa kaugalingon aron sa pagtan-aw sa langit ug sa yuta.” (Salmo 113:5, 6) Hataas kaayo ang Diyos nga siya kinahanglang magpaubos sa pagtagad sa mga butang didto sa langit ug dinhi sa yuta. Bisag si Jehova dili ubos kang bisan kinsa o ilalom sa uban, siya nagpakitag pagkamapaubsanon sa pagpasundayag sa kaluoy ug kahangawa sa ubos nga mga makasasala. Ang pagtagana sa iyang Anak, si Jesu-Kristo, ingong “halad pasighiuli” alang sa dinihogang mga Kristohanon ug alang sa kalibotan sa katawhan maoy kapasundayagan sa pagkamapaubsanon ni Jehova.—1 Juan 2:1, 2.
Si Jehova Mahangawaon
9, 10. Sa unsang paagi ang Diyos ‘nagabayaw sa kabos, aron palingkoron siya uban sa mga halangdon’?
9 Gipasiugda ang kahangawa sa Diyos, ang salmista midugang nga si Jehova “nagabangon sa timawa gikan sa abog; nagabayaw sa kabos gikan sa lungag sa abo, aron palingkoron siya uban sa mga halangdon, uban sa mga halangdon sa iyang katawhan. Gipapuyo niya ang babaye nga apuli diha sa balay ingong usa ka malipayong inahan sa mga anak nga lalaki. Dayega ninyo si Jah, kamo nga katawhan!” (Salmo 113:7-9) Ang katawhan ni Jehova may pagtuo nga siya makaluwas sa mga matarong nga nanginahanglan, makausab sa ilang kahimtang, ug makatagbaw sa ilang angay nga mga panginahanglan ug mga tingusbawan. ‘Ang Hataas ug Usa nga Halangdon nagabuhi sa espiritu sa mga timawa ug sa kasingkasing niadtong ginalupigan.’—Isaias 57:15.
10 Sa unsang paagi si Jehova ‘nagabayaw sa kabos, aron palingkoron siya uban sa mga halangdon’? Kon kabubut-on na sa Diyos, iyang ibutang ang iyang mga alagad diha sa mga posisyon sa himaya nga sama sa mga halangdon. Iyang gihimo kini sa kahimtang ni Jose, kinsa nahimong tagdumala sa pagkaon sa Ehipto. (Genesis 41:37-49) Sa Israel, ang paglingkod uban sa mga halangdon, o mga tawong may awtoridad taliwala sa katawhan ni Jehova, maoy usa ka pribilehiyo nga gipabilhan. Sama sa Kristohanong mga ansiano karong adlawa, nabatonan niining mga tawhana ang tabang ug panalangin sa Diyos.
11. Nganong ikaingon nga ang Salmo 113:7-9 ilabinang aplikado sa katawhan ni Jehova sa modernong panahon?
11 Unsay ikasulti bahin sa ‘paghimo sa babaye nga apuli ingong usa ka malipayong inahan’? Gihatagan sa Diyos ang babayeng apuli nga si Ana ug anak nga lalaki—si Samuel, kinsa iyang gipahinungod sa pag-alagad Kaniya. (1 Samuel 1:20-28) Labing hinungdanon, gikan kang Jesus ug sa pagbubo sa balaang espiritu diha sa mga tinun-an sa Pentekostes 33 K.P., ang simbolikong babaye sa Diyos, ang langitnong Sion, nagsugod sa pagkabaton ug espirituwal nga mga anak. (Isaias 54:1-10, 13; Buhat 2:1-4) Ug sama nga gipasig-uli sa Diyos ang mga Hudiyo ngadto sa ilang yutang-natawhan human nga nabihag sa Babilonya, sa 1919 iyang gipagawas ang dinihogang nanghibilin sa “Israel sa Diyos” gikan sa pagkabihag sa Babilonya ug dagayang gipanalanginan sila sa espirituwal nga ang mga pulong sa Salmo 113:7-9 ikapadapat kanila. (Galacia 6:16) Ingong maunongong mga Saksi ni Jehova, ang nahibilin sa espirituwal nga Israel ug ang ilang mga kauban nga may yutan-ong mga paglaom kinasingkasing nga misanong sa kataposang mga pulong sa Salmo 113: “Dayega ninyo si Jah, kamo nga katawhan!”
Pamatuod sa Pagkatalagsaon ni Jehova
12. Sa unsang paagi gipakita sa Salmo 114 ang pagkatalagsaon ni Jehova?
12 Ang Salmo 114 nagpakita sa pagkatalagsaon ni Jehova pinaagi sa pagkutlo ug talagsaong mga hitabo nga nalangkit ang mga Israelinhon. Ang salmista miawit: “Sa paggawas sa Israel gikan sa Ehipto, ang panimalay ni Jacob gikan sa katawhan nga lain ug pinulongan, ang Juda nahimong iyang balaang pinuy-anan, ang Israel nahimong iyang dakong gingharian.” (Salmo 114:1, 2) Giluwas sa Diyos ang Israel gikan sa pagkaulipon sa mga Ehiptohanon, kansang pinulongan katingalahan sa ilang mga dalunggan. Ang kaluwasan sa katawhan ni Jehova, nga gitawag Juda ug Israel diha sa balaknong pagpaamgid, nagpakita nga ang Diyos makaluwas sa tanan niyang mga alagad karong adlawa.
13. Sa unsang paagi ang Salmo 114:3-6 nagpakita sa pagkasupremo ni Jehova ug ikapadapat ngadto sa mga natagamtam sa karaang Israel?
13 Ang pagkasoberano ni Jehova ibabaw sa tanang kalalangan dayag diha sa mga pulong: “Ang dagat nakakita ug mikalagiw; ang Jordan misibog. Ang kabukiran milukso sama sa laki nga karnero, ang kabungtoran sama sa nating mga karnero. Unsay nahitabo kanimo, Oh dagat, nga mikalagiw ka man, Oh Jordan, nga misibog ka man? Oh kabukiran, nga milukso ka man sama sa laki nga mga karnero; Oh kabungtoran, nga sama sa nating mga karnero?” (Salmo 114:3-6) Ang Pulang Dagat “mikalagiw” sa dihang gibuksan sa Diyos ang dalan aron makaagi niana ang iyang katawhan. Unya ang Israel nakakita sa dakong kamot ni Jehova nga milihok batok sa mga Ehiptohanon kinsa nangamatay sa pagbalik sa mga tubig. (Exodo 14:21-31) Diha sa samang pasundayag sa balaang gahom, ang Subang Jordan “misibog,” nagtugot sa mga Israelinhon sa pagtabok ngadto sa Canaan. (Josue 3:14-16) ‘Ang kabukiran milukso sama sa laki nga mga karnero’ samtang ang Bukid sa Sinai miaso ug miuyog sa dihang gihimo ang Kasugoan sa pakigtugon. (Exodo 19:7-18) Uban sa kinatayoktokan sa iyang awit nga haduol na, gipadayag sa salmista ang maong mga butang sa porma nga pangutana, tingali nagsugyot nga ang walay-kinabuhing dagat, suba, kabukiran, ug kabungtoran nahingangha niining mga pasundayag sa gahom ni Jehova.
14. Unsay nahimo sa gahom ni Jehova diha sa Meriba ug sa Kadesh, ug sa unsang paagi kini nagaapektar sa iyang modernong-adlaw nga mga alagad?
14 Naghisgot gihapon sa gahom ni Jehova, ang salmista miawit: “Tungod sa Ginoo kumorog ka sa kasakit, Oh yuta, tungod sa Diyos ni Jacob, nga naghimo sa bato nga linaw sa tubig, ang bato nga santik ngadto sa usa ka tuboran sa tubig.” (Salmo 114:7, 8) Sa mahulagwayong paagi, ang salmista sa ingon nagpaila nga ang katawhan kinahanglang mobarog sa kahingangha kang Jehova, ang Ginoo ug Magmamando sa Uniberso sa tibuok nga yuta. Siya mao “ang Diyos ni Jacob,” o Israel, sanglit siya mao man usab ang Diyos sa espirituwal nga mga Israelinhon ug sa ilang yutan-ong mga kauban. Didto sa Meriba ug sa Kadesh sa kamingawan, gipakita ni Jehova ang iyang gahom pinaagi sa milagrosong pagtagana sa Israel ug tubig, “gihimo ang bato nga usa ka linaw sa tubig, usa ka bato nga santik ngadto sa usa ka tubod.” (Exodo 17:1-7; Numeros 20:1-11) Ang maong mga pahinumdom sa katingalahang gahom ug malumong pagtagad ni Jehova naghatag sa iyang mga Saksi ug malig-ong mga katarongan alang sa walay-pagduhaduhang pagtuo kaniya.
Dili Sama sa Idolo nga mga Diyosdiyos
15. Sa unsang paagi kaha giawit ang Salmo 115?
15 Ang Salmo 115 nag-awhag kanato sa pagdayeg ug sa pagsalig kang Jehova. Kini naghisgot ug panalangin ug tabang kaniya ug nagpamatuod nga ang mga idolo walay kapuslanan. Kini nga salmo tingali giawit nga tubag-tubag. Sa ato pa, usa ka tingog mahimong miawit: “Kamo nga nahadlok kang Jehova, salig kang Jehova.” Ang kongregasyon tingali mitubag: “Siya mao ang ilang tabang ug ilang kalasag.”—Salmo 115:11.
16. Unsay kalainan ni Jehova ug sa mga idolo sa kanasoran?
16 Ang himaya dili angay moadto kanato kondili ngadto sa ngalan ni Jehova, ang Diyos sa mahigugmaong-kalulot, o maunongong gugma, ug pagkamatinuoron. (Salmo 115:1) Ang mga kaaway hayan mayubitong mangutana: “Hain . . . ang ilang Diyos?” Apan ang katawhan ni Jehova makatubag: ‘Ang among Diyos anaa sa langit ug nagabuhat sa tanang butang nga iyang gikahimut-an.’ (Bersikulo 2, 3) Apan, ang mga idolo sa kanasoran walay mahimo, tungod kay sila mga binuhat man sa tawo nga mga rebulto sa salapi ug bulawan. Bisan pa sa ilang mga baba, mga mata, ug mga dalunggan, sila dili makasulti, buta, ug bungol. Sila dunay mga ilong apan dili makapanimaho, mga tiil apan dili makalakaw, ug mga tutunlan nga dili makasulti. Kadtong nagabuhat niining walay gahom nga mga idolo ug kadtong nagasalig mahisama kanila nga walay-kinabuhi.—Bersikulo 4-8.
17. Sanglit ang mga patay dili man makadayeg kang Jehova, unsa ang angay natong himoon, ug uban sa unsang mga palaabuton?
17 Sunod gihatag ang tambag sa pagsalig kang Jehova ingong Magtatabang ug ang salipod nga Kalasag sa Israel, sa saserdotehanong panimalay ni Aaron, ug sa tanan nga nahadlok sa Diyos. (Salmo 115:9-11) Sama niadtong nangahadlok kang Jehova, kita adunay lalom nga pagtahod sa Diyos ug may maayong kahadlok nga siya dili mapahimut-an. Kita may pagtuo usab nga “ang Magbubuhat sa langit ug sa yuta” nagapanalangin sa iyang maunongong mga magsisimba. (Bersikulo 12-15) Ang kalangitan mao ang dapit sa iyang trono, apan gihimo sa Diyos ang yuta nga maoy walay kataposang puloy-anan sa maunongon ug masinugtanong katawhan. Sanglit ang hilom, walay kalibotan nga mga patay dili man makadayeg kang Jehova, kita, nga mga buhi, angay magahimo niini sa bug-os nga debosyon ug kamaunongon. (Ecclesiastes 9:5) Kadto lamang magadayeg kang Jehova ang makatagamtam ug walay kataposang kinabuhi ug makahimo sa “pagdayeg kang Jah” sa walay kataposan, magasulti ug maayo bahin kaniya “hangtod sa kahangtoran.” Busa moduyog kitang maunongon uban niadtong nagapamati sa tambag: “Dayega si Jah, kamo nga katawhan!”—Salmo 115:16-18.
Ang Katingalahang mga Hiyas ni Jehova
18, 19. Sa unsang mga paagi ang mga hiyas ni Jehova nagpalahi kaniya gikan sa bakak nga mga diyosdiyos?
18 Dili sama sa walay-kinabuhing mga idolo, si Jehova mao ang buhi nga Diyos, nga nagapasundayag sa katingalahang mga hiyas. Siya mao ang larawan sa gugma ug “maluloy-on ug mapuanguron, mahinay sa kasuko ug dagaya sa mahigugmaong-kalulot.” (Exodo 34:6; 1 Juan 4:8) Pagkalahi niya gikan sa mapintas nga Canaanhong diyosdiyos nga si Molech, diin ngadto kaniya ang mga bata gihalad! Gisugyot nga ang dagway niining maong idolo adunay porma sa tawo ug may ulo sa turo nga baka. Ang idolo gitaho nga gipabaga, ug ang mga bata ilabog ngadto sa iyang nagdupa nga mga kamot, nga mahulog ngadto sa hudno sa ubos. Apan si Jehova mahigugmaon kaayo ug maluloy-on nga ang ideya sa mga paghalad ug tawo wala gayod misantop “sa [iyang] kasingkasing.”—Jeremias 7:31.
19 Ang pangunang mga hiyas ni Jehova usab naglakip sa hingpit nga hustiya, walay-kinutobang kaalam, ug dako kaayo ang gahom. (Deuteronomio 32:4; Job 12:13; Isaias 40:26) Unsay ikasulti bahin sa mga diyosdiyos sa sugilambong? Inay magpasundayag ug hustisya, ang mga diyosdiyos ug mga diyosa sa Babilonya mapanimaslon. Ang mga diyosdiyos sa Ehipto dili mga sulondan sa kaalam kondili gihulagway ingong may tawhanong mga kahuyangan. Dili kini ikahibulong, sanglit ang bakak nga mga diyos ug mga diyosa maoy mga produkto sa “habol ug salabotan” nga mga tawo nga nag-angkong maalamon. (Roma 1:21-23) Ang mga diyosdiyos sa Gresya giingong nagkunsabohay batok sa usa ug usa. Pananglitan, diha sa mga sugilambong, giabusohan ni Zeus ang iyang gahom pinaagi sa pag-agaw sa trono sa iyang amahan, si Cronus, kinsa nagkuha sa trono sa iyang kaugalingong amahan, si Uranus. Pagkadako nga panalangin ang pag-alagad ug pagdayeg kang Jehova, ang buhi ug matuod nga Diyos, nga nagapasundayag ug hingpit nga gugma, hustisya, kaalam, ug gahom!
Si Jehova Takos sa Walay Kataposang Pagdayeg
20. Unsang mga katarongan ang gihatag ni Haring David sa pagdayeg sa ngalan ni Jehova?
20 Sama sa gipakita sa Hallel nga mga Salmo, si Jehova takos sa walay kataposang pagdayeg. Sa susama, sa dihang si David ug ang isigka-Israelinhon miamot alang sa pagtukod sa templo, siya miingon atubangan sa kongregasyon: “Dalayegon ikaw, Oh Jehova ang Diyos sa Israel nga among amahan, gikan sa panahong walay kataposan hangtod sa kahangtoran. Imo, Oh Jehova, ang pagkadako ug ang gahom ug ang katahom ug ang kahamili ug kahalangdon; kay ang tanan nga anaa sa kalangitan ug ang anaa sa yuta imo. Imo man ang gingharian, Oh Jehova, Ikaw nga nagpahitaas sa imong kaugalingon ingong pangulo ibabaw sa tanan. Ang bahandi ug dungog nagagikan kanimo, ug ikaw nagagahom sa tanan; ug sa imong kamot anaa ang gahom ug kusog, ug sa imong kamot mao ang katakos sa paghatag kabantog ug kusog sa tanan. Ug karon, Oh among Diyos, nagapasalamat kami kanimo ug nagadayeg sa imong matahom nga ngalan.”—1 Cronicas 29:10-13.
21. Ang Pinadayag 19:1-6 naghatag ug unsang pamatuod nga gidayeg si Jehova sa langitnong mga panon?
21 Si Jehova pagahimayaon usab ug pagadayegon sa walay kataposan didto sa kalangitan. Si apostol Juan nakadungog sa “dakong panon sa langit” nga nag-ingon: “Dayega ninyo si Jah, kamo nga katawhan! Ang kaluwasan ug ang himaya ug ang gahom iya sa atong Diyos, kay ang iyang mga hukom matuod ug matarong. Kay iyang gihukman ang dakong bigaon [Babilonyang Bantogan] nga maoy nagpadunot sa yuta tungod sa iyang pakighilawas, ug iyang gikapanimaslan ang dugo sa iyang mga ulipon diha sa iyang kamot.” Ug sila miingon pag-usab: “Dayega ninyo si Jah, kamo nga katawhan!” Maingon man “ang kaluhaan-ug-upat ka ansiano ug upat ka buhing binuhat.” Usa ka tingog nga gikan sa trono miingon: “Dayega ninyo ang atong Diyos, kamong tanan nga iyang mga ulipon, nga may kahadlok kaniya, ang dagko ug mga gagmay.” Unya si Juan midugang: “Ug unya nadungog ko ang daw tingog sa usa ka dakong panon ug tingog sama sa dinaguok sa dakong tubig ug sa dahunog sa kusog nga mga dalogdog. Sila miingon: ‘Dayega ninyo si Jah, kamo nga katawhan, kay si Jehova nga atong Diyos, ang Labing Gamhanan, naghari na.’”—Pinadayag 19:1-6.
22. Sa unsang paagi si Jehova madayeg diha sa iyang gisaad nga bag-ong kalibotan?
22 Pagkatukma nga ang langitnong mga panon nanagdayeg kang Jehova! Diha sa iyang bag-ong kalibotan nga karon haduol na, ang maunongong mga binanhaw moduyog sa mangaluwas sa kataposan niining sistema sa mga butang sa pagdayeg kang Jah. Ang hatag-as nga kabukiran mohangad sa ilang mga ulo diha sa mga awit sa pagdayeg ngadto sa Diyos. Ang lunhawng kabungtoran ug mabungahong mga kahoy manag-awit sa iyang mga pagdayeg. Ngani, ang tanang linalang nga buhi ug may gininhawa managdayeg sa ngalan ni Jehova diha sa dakong koro nga Hallelujah! (Salmo 148) Madunggan kaha ang imong tingog uban nianang malipayong panon? Kini mahimo kon ikaw maunongong moalagad kang Jah uban sa iyang katawhan. Mao kana ang angay nimong tumong sa kinabuhi, kay kinsay sama kang Jehova nga atong Diyos?
Unsaon Nimo Pagtubag?
◻ Nganong dayegon si Jehova nga Diyos?
◻ Sa unsang mga paagi si Jehova dili ikatandi?
◻ Unsay pamatuod nga si Jehova mahangawaon?
◻ Sa unsang paagi lahi si Jehova gikan sa walay-kinabuhi nga mga idolo ug bakak nga mga diyosdiyos?
◻ Nganong makaingon kita nga si Jehova makadawat ug walay kataposang pagdayeg didto sa langit ug dinhi sa yuta?
[Hulagway sa panid 9]
Ang Hallel nga mga Salmo giawit sa panahon sa panihapon sa Paskuwa