Usa ka Optiko Nagpugas ug Binhi

Unsay kalabotan sa mga paningkamot sa usa ka optiko sa Lviv, Ukraine, sa pagkatukod sa usa ka Rusog-pinulongan nga kongregasyon sa mga Saksi ni Jehova sa Haifa, Israel, mga 2,000 kilometros ug ubay-ubayng nasod ang kalay-on? Usa kini ka sugilanon nga nagpasundayag sa pagkatinuod sa giingon sa Bibliya sa Ecclesiastes 11:6: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon.”

ANG atong sugilanon nagsugod niadtong 1990 sa dihang si Ella, usa ka batan-ong babaye nga may Hudiyong kagikan, nagpuyo sa Lviv. Si Ella ug ang iyang pamilya nangandam sa paglalin ngadto sa Israel. Sa dihang hapit na silang mobiya, si Ella nakigkita sa usa ka optiko kinsa usa sa mga Saksi ni Jehova. Sa maong panahon, ang buluhaton sa mga Saksi ni Jehova gidili sa Ukraine. Bisan pa niana, ang optiko miuna sa paghimog tikang nga ipaambit ang iyang pinasukad-sa-Bibliyang mga pagtulon-an kang Ella. Natingala si Ella sa pag-ingon niya nga ang Diyos adunay personal nga ngalan. Napukaw niana ang pagkamausisaon ni Ella, ug nahitabo ang maayong panaghisgot sa Bibliya.

Nalingaw pag-yo si Ella sa maong panaghisgot nga siya mihangyo ug lain pa sa pagkasunod nga semana ug lain na usab human niana. Ang iyang kaikag misamot, apan dihay problema. Tuling nagsingabot ang panahon nga molarga na ang pamilya paingon sa Israel. Daghan pa kaayo ang kinahanglang makat-onan ni Ella! Aron mapahimuslan ug maayo ang nahibiling panahon, siya mihangyo ug usa ka pagtuon sa Bibliya matag adlaw hangtod sa iyang pagbiya. Bisan pag wala mapadayon ni Ella ang iyang pagtuon sa bag-o pa lang siyang miabot sa Israel, ang binhi sa kamatuoran nakagamot na diha sa iyang kasingkasing. Sa pagkatapos sa tuig, siya misugod na usab sa pagtuon sa Bibliya nga mainiton.

Ang gubat mibuto sa Persianhong Gulpo, ug gipaulanan sa Iraq ug misil ang Israel. Kini maoy sagad nga hilisgotan. Usa ka adlaw niana diha sa usa ka supermarket, nadunggan ni Ella ang usa ka nagsultig-Ruso nga pamilya sa bag-ong mga lalin nga nag-estoryahanay. Bisan pag siya nagtuon pa lang sa Bibliya, giduol ni Ella ang pamilya ug gipaambit kanila ang saad sa Bibliya bahin sa usa ka malinawong kalibotan. Ingong resulta, ang apohang babaye, si Galina; ang inahan, si Natasha; ang anak nga lalaki, si Sasha (Ariel); ug ang anak nga babaye, si Ilana, ngatanan miduyog kang Ella sa pagtuon sa Bibliya.

Si Sasha mao ang unang membro sa pamilya nga nakadangat sa punto sa pagpabawtismo—bisan pa sa daghang pagsulay. Bisan kon usa ka hawod nga estudyante, siya gipalagpot sa eskuylahan tungod kay ang iyang Kristohanong tanlag dili motugot kaniya nga moapil sa pasiunang militaryong pagbansay, usa ka kinahanglanong bahin sa kurikulum sa eskuylahan. (Isaias 2:2-4) Ang kaso ni Sasha nakaabot sa Hataas nga Korte sa Israel didto sa Jerusalem, nga dalayegong nagbaod nga pabalikon si Sasha sa eskuylahan aron iyang matapos ang maong semestre. Ang kaso napublikar sa tibuok nasod. Ingong resulta, daghang Israeli ang nahibalo sa mga pagtulon-an sa mga Saksi ni Jehova.a

Human sa iyang graduwasyon sa hayskul, si Sasha misulod sa bug-os-panahong ministeryo sa mga Saksi ni Jehova. Karon siya nag-alagad ingong espesyal payunir ug ansiyano sa kongregasyon. Ang iyang manghod nga babaye, si Ilana, miduyog kaniya sa bug-os-panahong ministeryo. Ang ilang inahan ug ang ilang apohang babaye parehong bawtismadong mga Saksi. Ang binhi nga gitisok sa optiko namunga pa gihapon!

Sa kasamtangan, si Ella padayong miuswag sa espirituwal ug wala madugay nagsangyaw na sa balay ug balay. Sa iyang una mismong pultahan nga gituktok, nahimamat ni Ella si Faina, kinsa di pa dugayng miabot gikan sa Ukraine. Si Faina nag-antos sa depresyon. Sa ulahi nahibaloan ni Ella nga sa wala pa siya manuktok sa pultahan ni Faina, ang magul-anong babaye miampo sa Diyos: “Wala ako mahibalo kon kinsa ka, apan kon naminaw ka kanako, tabangi ako.” Siya ug si Ella may makapadasig nga panaghisgot. Misukna ug daghang pangutana si Faina ug gipalandong pag-ayo ang mga tubag nga gihatag kaniya. Sa ngadtongadto siya kombinsido nga ang mga Saksi ni Jehova nagtudlo sa kamatuoran gikan sa Bibliya. Iyang gipasibo ang iyang programa sa mga pagtuon sa unibersidad aron siya makagugol ug dugang panahon uban sa kongregasyon ug sa buluhatong pagsangyaw. Sa Mayo 1994, si Faina nabawtismohan. Nagpayunir usab siya, nga nagsuportar sa iyang kaugalingon pinaagi sa partaym nga trabaho sa natad sa kompiyuter.

Sa Nobyembre 1994, samtang nakigbahin sa buluhatong pagsangyaw, sa kalit lang si Ella naluya pag-ayo. Miadto siya sa ospital diin ang mga pagsusi nagbutyag nga nagdugo ang iyang ulser sa tinai. Sa pagkagabii, ang ihap sa hemoglobin ni Ella mius-os ngadto sa 7.2. Usa ka ansiyano sa kongregasyon ni Ella, ang tsirman sa Hospital Liaison Committee (HLC) sa ilang dapit, naghatag sa mga doktor ug impormasyon bahin sa daghang medikal nga mga pamaagi nga wala magkinahanglan ug paggamit ug dugo.b Milampos ang operasyon nga walay dugo, ug si Ella bug-os nga naulian.—Buhat 15:28, 29.

Ang gynecologist ni Ella, si Karl, usa ka Hudiyo nga natawo sa Alemanya, nakadayeg pag-ayo. Dayon iyang nahinumdoman nga ang iyang mga ginikanan, kinsa nakalabang-buhi sa Holocaust, nakaila sa mga Saksi ni Jehova diha sa mga kampong konsentrasyon. Si Karl misuknag daghang pangutana. Bisan kon puliki kaayo sa iyang medikal nga propesyon, si Karl naggahin ug panahon alang sa regular nga pagtuon sa Bibliya. Sa pagkasunod tuig, siya nagtambongan na sa senemanang Kristohanong mga tigom.

Unsay resulta sa binhi nga gipugas sa optiko? Ato nang nahibaloan kon unsay nahitabo kang Sasha ug sa iyang pamilya. Mahitungod kang Ella, siya maoy espesyal payunir nga ministro. Ang iyang anak nga babaye, si Eina, nga mao pay paggraduwar sa hayskul, nagsugod na sa iyang karera ingong payunir. Si Faina nag-alagad usab ingong espesyal payunir. Mahitungod kang Karl, ang gynecologist ni Ella, siya karon maoy bawtismadong Saksi ug ministeryal nga alagad, nga nagpaambit sa makaayo nga gahom sa kamatuoran sa Bibliya ngadto sa iyang mga pasyente ug sa uban pa.

Ang gamayng grupo sa nagsultig-Ruso nga mga lalin nga nagsugod ingong bahin sa Haifa Hebrew Congregation sa pagkakaron nahimo nang usa ka masibotong Rusong kongregasyon nga dunay kapin sa 120 ka magmamantala sa Gingharian. Usa ka hinungdan niini nga pag-uswag maoy tungod sa kamatuoran nga gipahimuslan sa optiko sa Lviv ang kahigayonan nga ipugas ang binhi!

[Mga footnote]

[Mapa sa panid 29]

(Alang sa aktuwal nga pagkahan-ay, tan-awa ang publikasyon)

UKRAINE

ISRAEL

[Credit Line]

Mountain High Maps® Copyright © 1997 Digital Wisdom, Inc.

[Mga hulagway sa panid 30]

Si Ella ug iyang anak nga babaye, nga si Eina

[Hulagway sa panid 31]

Usa ka malipayong grupo sa nagsultig-Ruso nga mga Saksi sa Haifa. Wala ngadto sa tuo: Sasha, Ilana, Natasha, Galina, Faina, Ella, Eina, ug Karl